2007-05-20

شوبينج

اسعار الملابس الجاهزه ....وآه من اسعار الملابس الجاهزه ، من كام يوم نزلنا نعمل شوبينج ونشتري كام قميص لزوجي بصراحه الاسعار سرقه علني ، قميص مايساويش ب 160 و 200 جنيه ليه يعني هو معمول من ايه ، و فيه حتت تانيه تلاقي قمصان اغلي من كده وممكن القميص يوصل ل 400 و 500 جنيه ويقولك ماركه !!! مش عارفه ليه هو متر القماش بكام ...؟؟؟؟ ولا اصلا تكلفة انتاجه كام..؟؟؟؟
بالنسبة للعماله المصريه تكلفتها منخفضه بشهادة
الجمعية البريطانيه المصرية للاعمال اللي بتقول ان مصر بتتميز بانخفاض أجور الايدي العامله اللي بتشغل خطوط الملابس الجاهزه واللي بتوصل ل 0.82 دولار مقارنة ب 2.56 دولار للمغرب و 2.05 دولار لتونس و 0.48 للصين،
كمان التقرير بيقول ان مصر بتتميز بانخفاض تكلفة الطاقه ، كل ده الي جانب طبعا توفر الخامات المتمثله في القطن المصري الشهير ، واكيد سعر القماش الخام مش خافي علي حد
بقول الكلام ده والحمد لله الواحد قادر انه يشتري بالاسعار دي ، فايه هو حال الناس اللي كل مرتبها ممكن ما يجبش قميص واحد بس ولا حتي كم قميص من اي مول
انا شايفه ان اصحاب مصانع الملابس الجاهزه زودوها شويه قولوا شويتين تلاته ، بيحطوا مكاسب خياليه ومش بيكتفوا بالربح المعقول ، بالرغم من قلة جودة منتجاتهم بالنسبة للمستورد
الناس دي مش حاسين ان لو اتفاقية الجات علي الملابس الجاهزه- واللي المفروض انها تكون اتطبقت في 2005 -لما تطبق مش هايلاقوا اللي يشتري منهم بجنيه ، اكيد لما المشتري يلاقي هدوم بجوده عاليه وتقفيل هايل وباسعار اقل بكتير مش هايعبر الصناعه المحليه
نفسي الناس دول يعملوا حساب اليوم ده ، ليه ما يهتموش بجودة منتجاتهم ويفكروا ازاي يخفضوا اسعارها علشان يقدروا ينافسوا في سوق ها يبقي مفتوح ، لازم يكونوا عارفين انهم مش هايصمدوا كتير قدام منتجات الصين وتركيا وحتي سوريا والاردن

اعتقد انهم عارفين كده كويس ، وبيحاولوا يحققوا اعلي الارباح في فتره قليله قبل ما يضطروا يرخصوا الاسعار اوحتي يغيروا نشاطهم بعد الجات وللاسف الخاسر الوحيد من تطبيق الاتفاقيه هما العمال الغلابه اللي مش هايلاقوا شغل بعد اغلاق المصانع دي

كمان النصب والغش والمكاسب الخياليه لاصحاب اى تجاره زاد اوي عن الحد ،اعرف مصنع بينتج قمصان بسعر 30 و 35 وبيبعها بالسعر ده للجمهور من منافذ بيع خاصه بالمصنع ،وجودتها عاليه جدا ، ناس بتيجي تشتري منه وترجع تبيعها في القاهره والاسكندريه باسعار فلكية
كمان شركة مصر للغزل والنسيج اللي في المحله بتعمل قمصان ب 30 و 35 جنيه اصلا كانت بتتصدر ، بيخدوها ويغيروا الكيس وتتباع ب 70 و80 جنيه


اكتر اللي لفت نظري ان الماركه الواحده اسعارها مش واحده في كل المحلات مع العلم ان مافيش فصال فكل المحلات اللي دخلناها...وده مالوش غير معني واحد ان مافيش ضابط ولا رابط للاسعار وكل واحد بيحط السعر اللي هو عاوزه ومش عارفه فين وزارة الصناعه والغرف التجاريه اللي المفروض تراقب الكلام ده

اخيرا انصح اي واحد عاوز يشتري ملابس جاهزه يفكر كويس ويبدأ يحوش علي الاقل قبلها بخمس سنين
ولا عزاء للموظف اللي كل مرتبه ما يجبش ياقة قميص

22 comments:

لحظة يقول...

تمام
بس حضرتك ما قلتيش عنوان المصنع عشان نجيب منه
ويا ترى فيه مصنع زي كده حريمي
احسن كده فعلا مش هاشتري هدوم الصيف ده خالص:)

عصفور المدينة يقول...

طب المشكلة الأكبر في أسعار الحريمي
والمشكلة الأكبر والأكبر ملابس الأطفال
أنا باجيب فعلا قمصان المحلة بس عيبها في المكواة
وبحكم عملي اطلعت على أسعار التكلفة لعدة محلات ملابس العادي بتاعهم هو 100% مكسب ده غير إن كثير منهم له مصانعه الخاصة بيكون تكلفته أقل

أشاهد الآن في الجزيرة الشيخ سلمان العودة عن ثقافة الاستهلاك برنامج الشريعة والحياة

gohayna يقول...

والله الدنيا بقيت مولعه نار

في مصر والكويت

حاجه زفت

بس الي يفرق بيني وبينك ان هنا الرخيص احسن من الغالي في صر

بس برضه غالي
مفيش حل غير انهم يخترعو حاجه تغني عن الهدوم او نغني عنينا بقي ونمشي

حاجه تقرف والله يا شيخه

المهم

الف شكر لسؤالك عليا واتمني دايما تنوريني

انت اخت وعزيزه

تحياتي ليكي

خالد وليس بخالد يقول...

الحقيقة
انك لو رحتي تشتري نفس القميص لطفلك
هتلاقي تمنه اغلى بكتير اوي من تمن القميص للكبار

============
أنا بجد نفسي افهم المعضلة دي

دايما لما بنزل عباس العقاد او العتبة اشوف الاسعار..الاقي اسعار ملابس او احذية الاطفال اغلى بكتير جدا من اسعار ملابس او احذية الكبار
نفسي اعرف ازاي؟؟؟
لو حد عنده معلومات يفيدنا

نقطة مية يقول...

مفيش ضابط لاسعار اي حاجة في مصر..مش بس الهدوم..اما اختلاف الاسعار للماركة الواحدة من مول و التاني حسب شهرة المول يعني القميص في ستي ستارز غير القميص في جنينة و الاتنين نفس الماركة بس الفرق هو اصحاب المحلات بيضيفوا الربح و يطلعوا ايجار المحل و الكهربة ..الله يكون في عون اللي قربوا يلبسوا ورق التوت!!؟

Sharm يقول...

امال الكوتشيهات بقى

في كوتشيهات بتوصل لا 1500 جنيه عشان ماركة

!!

ليه يعنى ؟؟

.:.-=- ELGaZaLy-=-.:. يقول...

اخيرا انصح اي واحد عاوز يشتري ملابس جاهزه يفكر كويس ويبدأ يحوش علي الاقل قبلها بخمس سنين
ولا عزاء للموظف اللي كل مرتبه ما يجبش ياقة قميص

-------------------

جميل بجد الموضوع دة اوى عجبة بجد

بس المشكلة بجد فى الاطفال...

المفروض ان الجالت كانت تتطبق فى مصر من فترة طويلة بس دة مش بيحصل

بس تقريبا فى شباب كتير اوى بيحلو الموضوع دة
بالنزول الى الشوارع الرئيسية زى رمسيس وكدة

فى بجوار الشوارع دى عربيات عليها حجات مستوردة كتير بسعر رخيص جدااا

بس بيفضلو فى تهديد من الامن علطول ربنا يرحمنا بجد

يا مراكبي يقول...

الجمارك - الضرائب - الجودة - المنافسة - حماية المنتج المحلي

هو ده عنوان الموضوع وإليكم التفاصيل

أولا: هنا في الكويت فيه نوعين من المحلات

نوع منهم بيبيع حاجات ماركات سينيه ودايما بتكون غالية ومتوجهه لطبقة معينة من الناس وتحديدا المواطنين

وفية سلاسل محلات تانية كبيرة وتتبع شركات مختلفه وسعرها رخيص جدا جدا لدرجة ملفته للنظر .. وهنا بقى الكلام المهم

سألت عنهم لقيتهم بدأوا بأنهم يستوردوا من الصين ودول شرق آسيا .. ولما الموضوع إتحرك معاهم أكتر راحوا فتحوا مصانع هناك .. وتحديدا في الصين

ثانيا: الفائدة من التصنيع في الصين مش بس رخص الأيدي العاملة لكن كمان المصاريف الإدارية لما بتتوزع على حجم إنتاج أكبر تلاقي سعره يقل .. طبعا فاهمين النقطة دي

ثالثا: الجمارك في الكويت 5% فقط على أي واردات أي كانت .. ومافيش جمارك لو البضائع جاية من دول الخليج زي دبي مثلا

رابعا: ماننساش إن دبي وأغلب دول الخليج بتكون الضرائب عندهم ضئيلة وتصل للصفر في بعد البلاد .. وده ليه مردود أكبر على الدولة عكس ما الناس فاكره

خامسا: في مصر فطبعا الجمارك مبنية على إن المستورد يغلى سعره حدا بعد فرض الجمارك لحماية المنتج المحلي اللي بيستحلى حكاية الحماية دي ويقدم جودة أغلبها سيء أو نقدر نقول عنها إنها أقل من الجودة اللي جاية من بره في أغلب الأحوال

سادسا: مصر هتصمد قد إيه قدام الضغوط الدولية لتفعيل إتفاقيات التجارة الحرة؟

بعد كل ده أقدر أقول لكم إن الإستهبال في الأسعار حسب ما قالت الدكتوره في البوست ده ليه حماية من الدولة وليه أسباب ملخصها هو

الجمارك - الضرائب - الجودة - المنافسة - حماية المنتج المحلي

خالص تحياتي

REEMOO يقول...

ده فى حاله الملابس الرجالى
اللى بتعتبر صفر علىالشمال الى جانب اسعار الملابس الحريمى او الاطفال
الملابس الحريمى بقى اسعارها فى منتهى الاستهبال
انا نزلت اجيب شورت درس لقيته ب280 جنيه
انا مصدقتش السعر
ولما لفيت لقيت ان كل الاسعار واحد وكأنهم متفقين على المستهلك
والاطفال بقى حدث ولا حرج
مش ممكن اسعار الخياليه لاسعار ملابس الاطفال دى
مشش عارفه جنان الاسعار ده هيوصل لفين فى الآخر
تحياتى

خمسة فضفضة يقول...

السلام عليكم ورحمة الله وبركاته


معلش اعذروني يا جماعه بسبب ضيق الوقت مش قادره ارد عليكم واحد واحد
بس ان شاء الله في اقرب فرصه هارد علي كل تعليق لكل واحد باسمه

شكرا علي تجاوبكم وتعليقاتكم

تحياتي

خمسة فضفضة يقول...

السلام عليكم ورحمة الله وبركاته
لحظه

عنوان المصنع في المحله
وخلينا نتفق انه بلاش نتكلم علي الهدوم الحريمي علشان الصحه العامه بس

خمسة فضفضة يقول...

السلام عليكم ورحمة الله وبركاته

باشمهندس عصفور

الحريمي والاطفال دول اللي فيهم السرقه والنصب علي اصوله

قمصان المحله دي حلوه جدا بس ابقي وديها لمكوجي ماتكويهاش في البيت

خمسة فضفضة يقول...

السلام عليكم ورحمة الله وبركاته

د/ جهينه
الهدوم في الخليج والعوديه ارخص من مصر بمراحل وكمان جودتها اعلي
في السعوديه بعشرين ريال ( 30 جنيه ) ممكن تجيبي قميص احسن ميت مره من اغلي قميص ب 300 جنيه في مصر
وكمان فيه حاجات كويسه بعشره ريال
عارفه في محلات اسمها ابو عشره ريال دي فيها هدوم ميه ميه ياريت يعملوا زيها في مصر بس ساعتها هايكون ابو 100 جنيه ...هههه

انت عامله ايه في الشغل الجديد ..ان شاء الله تكوني مبسوطه

خمسة فضفضة يقول...

السلام عليكم ورحمة الله وبركاته

د/ خالد

وانا كمان نفسي اعرف السبب ، يمكن علشان يتزهقهم شويه في التقفيل علشان صغيره ..هههه

خمسة فضفضة يقول...

السلام عليكم ورحمة الله وبركاته
نقطة ميه

علي رايك ، دي بقت حاجه تقرف

ربنا يكون في عونهم

خمسة فضفضة يقول...

السلام عليكم ورحمة الله وبركاته

د/ شارم
بلاش تفكرنا باسعار الاحذيه هي كمان ، لان بصراحه في ناس قربت تستغني عنها وتعتبرها من الكماليات بسبب الاسعار المبالغ فيها حبتين تلاته

يحيا باتا يعيش يعيش يعيش

خمسة فضفضة يقول...

السلام عليكم ورحمة الله وبركاته

الغزالي

وفيه كمان ناس بتروح سوق الكانتو ووكالة البلح

مش عارفه ليه الحكومه بتتلكع ومش عاوزه تطبق الجات علي الملابس الجاهزه لحد دلوقت
بس برضو مش عاوزين ننسي ان العمال الغلابه هما اكتر ناس هايضروا بعد الاتفاقيه دي

الفقرافي البلد دي ليهم ربنا

خمسة فضفضة يقول...

السلام عليكم ورحمة الله وبركاته

باشمهندس احمد

حضرتك لخصت الموضوع و اسبابه في الكومنت ده
مشكلتنا في الجمارك والضرايب اللي زياده عن الحد علي اي حاجه مستورده
وده لحماية الصناعه المحليه بس للاسف اصحاب الضمائر المعدومه بيستغلوا الكلام ده ويحطوا الاسعار اللي علي مزاجهم

تحياتي لحضرتك

خمسة فضفضة يقول...

السلام عليكم ورحمة الله وبركاته
ريموو

جنان الاسعار هايوصل لحد العباسيه ويستقر هناك بعد تطبيق الجات وعدم القدره علي منافسة المستورد

koukawy يقول...

اهو اي نصب
مش عارفه الغلابه بيعملوا ايه
و لا بلاش نلبس و نقضيها زي القبائل الهمجيه في افريقيا
ههههههههههههه

vetrinary يقول...

ممكن تروحى تشترى هدوم من العتبه
مش لازم من سيتى ستارز يعنى
ولو العتبه مش اد كده
عندنا فى شبرا ممر اسمه الراعى الصالح
القميص بخمسين جنيه
على فكرة
الفقير بياكل وبيشرب وبيلبس
على قد فلوسه
ومبتفرقش معاه
رزق الهبل
على البرجوازيين

عـلا - من غـزة يقول...



مرحبا يا دكتورة :)

والله انا بقرألك تعليقات من زمان واليوم زرت مدونتك لأول مرة مش حاتكون الاخيرة ان شاء الله

تعرفي انا بقالي اسبوع بعاني من نفس الموضوع علشان فرح ابن خالتي بكرة ,, حتى في غزة بالرغم من الحصار والوضع الاقتصادي الزفت الا ان الاسعار نااار نااار نااار والواحد لازم يشتري حاجة كويسة ,, زي مابتقولي بالزبط

وكتبت تدوينة عن الموضوع كمان
من هنا

تحياتي

القرآن الكريم