شفت القمر نطيت لفوق في الهوا

انا اللي بالامر المحال اغتوى

شفت القمر نطيت لفوق في الهوا

طلته ما طلتوش ايه انا يهمني

مادام أنا بالنشوه قلبي ارتوي

وعجبي


و انا باقلب في اليوتيوب لقيت الفيديو الغريب اوي ده ،وحبيت انكم تتفرجوا عليه معايا

هو عباره عن تصوير لعبور القمر من امام الارض

اي حد يشوف الفيدو للوهله الاولي هايعتقد انه واحد من افلام الكرتون بس في الحقيقه انه فعلا حقيقي

تم تصوير الفيديو ده من خلال مركبة الفضاء تابعه لوكالة ناسا في رحله لاستكشاف النيازك تعرف باسم
The Deep Impact spacecraft

بعد ما انهت مهمتها استمرت الرحله و تم توجيه كاميراتها في اتجاه الارض
( مع تغيير اسمها لـ EPOXI )
و علي مدي ساعات طويله صورت الارض من علي بعد حوالي 31 مليون ميل ، وقدرت انها تصور القمر بيمر مباشرة امام الارض




آدي الفيديو



سبحان الله


بسم الله الرحمن الرحيم
" تبارك الذي جعل في السماء بروجا وجعل فيها سراجا وقمرا منيرا"
صدق الله العظيم

33

ماشى في طريقي وشايف السنة ورا السنة بتجري


وكل عام بيروح بياخد معاه حتة من عمرى


سمعت قلبي اللي بيعد الثواني من ورا صدري


صرخ وقال من غير مايسمع كلامي أو يطيع أمري


بتجري ليه يازمن، مش لسه على الرحيل بدري**

الاحد اللي فات (6 - 7) كان عيد ميلادي ال 33 ، يااااااااااااه حاسه اني بقالي كتير اوي عايشه ،
و من زمان اوي عندي احساس اني مش هاعدي ال 35 ( يعني باقيلي سنتين ) ، الاحساس الرهيب ده بيتملكني بشده كل ما تقرب ذكري ميلادي و دايما بحاول اطرد الهاجس ده ومافكرش فيه كتير
بس ياتري استعديت كويس لمقابلة ربنا ، يا تري كفة الحسنات هي اللي زايده ولاّ ........ لا قدر لله غير كده
باتخيل نفسي وانا واقفه بين ايديه جل وعلي وبيحاسبني علي كل اللي عملته في حياتي وبيسألني عن كل لحظة عشتها وعملت فيها ايه
الواحد بيحاولي يراعي ربنا في كل افعاله واقواله بس اكيد الامر ما يسلمش من بعض الذنوب ومافيش انسان كامل ( الكمال لله وحده ) وبحاول دايما اني اعجل بالاستغفار والتوبه والعوده الي الله
ربنا يفغر للجميع ويتقبل توبتنا
" اللهم اغفر لي ما مضي من ذنوبي ، واعصمني فيما تبقي من عمري ، وارزقني اعمالا زاكية ترضي بها عني ، وتب علي انك انت التواب الرحيم "


--------------------------------------

بقالي اسبوع عندي دور انفلوانزا رهيب (ربنا يستر ومايقلبش بحاجه تانيه ) ، اخدت كل انواع الادوية من مسكنات ومضادات حيويه ومضادات التهاب غيرالاعشاب لحد ما بقيت صيدلية متنقله لوحدي وبرضو مافيش فايده ، حتي المخدر الموضعي مش مأثر في التهاب الحلق

فعلا صدق اللي قال " برد الصيف احد من السيف "

ادعولي اخف بقي




------------------------------------------

**الابيات دي لبيكار