تغيير .... حرية ...عدالة اجتماعية
دي كانت المطالب الاساسية لثورة 25 يناير واللي الشعب نزل يطالب بيها في كل ميادين وشوارع مصر
تغيير
كتير اعتبروا انه بسقوط مبارك يوم 11 فبراير اتحقق حلم التغيير اللي طالبنا بيه لكن الحقيقه ده كان مجرد سقوط لقمة جبل الجليد اللي باينه فوق المايه وباقي الجبل راسخ ومتشعب وثابت مكانه زي ماهو
او تغيير علي طريقة الفكهانيه ، شالوا الوش المعطوب وسابلونا العفن والعطن موجود في بقية القفص
الفساد لسه فكل حته ماتغيرش قواعده سليمه ماتلمستش
محافظين من قيادات الحزب الوطني او لواءات سابقين في الجيش والشرطه
المجالس المحلية المزوره لسه موجوده
عمداء ورؤساء الجامعه اللي متعينين باوامر امن الدوله لسه موجودين
قيادات الاعلام اللي اتعينت بمباركة امن الدوله وعاشت طول عمرها تطبل لمبارك وعصابته لسه موجوده
قيادات فاسده في كل الوزرات
في كل حته ناس ولائها كان ومازال للنظام الفاسد السابق
حتي في وزارة الداخليه اللي الناس فيها متهمين باخطر تهمه في الوجود قتل النفس اللي حرم الله قتلها الا بالحق
لسه القيادات هي هي موجوده في اماكنها وان ماكنش كمان اترقت لمناصب واماكن احسن ومرتباتها زادت وفوق كل ده مش عاوزين ينزلوا يشوفوا شغلهم اللي بياخدوا عليه مرتبات من فلوس الشعب
جهاز امن الدوله اللي ياما عذب وقتل وروع آمنين واللي الشعب اسقطه باديه يوم 4 ويوم 5 مارس
رجعلنا باسم جديد <<<<<الامن الوطني ونسبه كبيره من ظباطه كانوا في امن الدوله
تعديل الدستور اللي كان من ضمن مطالب الثورة واللي عملنا استفتاء علي تعديل ست مواد منه ، وطلعت النتيجه بنعم بعدها فوجئنا باعلان دستوري من 62 ماده
ماسمعناش عنهم ولا قلنا راينا فيهم
ومش كده كمان دا علي حد كلام المجلس العسكري ان نعم كانت علي شرعية المجلس العسكري مش علي ال6 مواد
كل اللي اتغير في مصر من يوم 25 يناير لدلوقتي اننا شلنا مبارك وجبنا مكانه مجلس عسكري عينه مبارك بنفسه
مبارك وعصابته اللي قتلوا الناس وسمموا الاكل والميه وذلونا طول 30 سنه بيتحاكموا محاكمات هزليه عن تهم اكبر عقوبه ليها ماتتعداش 15 سنه اما التهم الاساسيه اللي بتتمثل في الفساد السياسي وقتل المتظاهرين وخيانه عظمي وارهاب للشعب وشق الصف وترويج للفتنه الطائفيه وفتح السجون وغيرها من التهم اللي اقل عقوبه ليها الاعدام فا دي مش في الحسبان واكنها ماحصلتش
اتغيرت الاسامي والوشوش هي هيا
عدالة اجتماعية
وده كان من اهم مطالب عدد كبير من اللي شاركوا في الثوره
حد ادني يحقق عيشه كريمه ويبعد الناس عن ذل الحاجه
واللي بيطالبوا بيه دلوقتي ( العمال) بيتوصفوا بانهم مخربين وعاوزين يوقفوا عجلة الانتاج ويخربوا الاقتصاد
واللي زاد وغطي ان مطالبهم بتتوصف انها مطالب فئويه ومش وقتها ، امال وقتها امتي
وفوق كل ده بيتم تحريض الناس ضدهم ويطالبوهم بالتصدي ليهم
وبيرهبوهم بقانون منع التظاهر وبالشرطه العسكريه اللي اكتر من مره هددت العمال بالاعتقال والسجن
ازاي تطالب واحد بياخد 150 جنيه يصبر وهو شايف رئيسه في نفس المؤسسه بياخد مليون جنيه
لا ومش يصبر وبس دا كمان يشتغل ويتنج ويدخل فلوس لصاحب المصنع اللي مابيديهوش حقه
طب اشمعني ميزانية الدوله تسمح انها تدي واحد مليون وماتسمحش انها تدي زميله 1200 جنيه ( حد ادني حكم بيه حكم محكمة في اواخر حكم مبارك بيلزم الحكومه بحد ادني للاجور)
مش هانحمل ميزانية الدوله حاجه زياده اعملوا حد ادني واقصي للاجور اللي بياخد مليون جنيه ده مرتبه يحل ازمة 500 واحد بياخد 150 جنيه
الوزارات ماليانه مستشارين كل وظيفتهم في الحياه انهم يقبضوا آلاف مؤلفه من فلوس الشعب اخر كل شهر من غير لازمه،
منصب مستشار في العاده اخترعوه عشان يريحوا فيه الحبايب والمحاسيب بعد مايطلعوا علي المعاش مش اكتر
غربلوا الوزارات منهم ووفروا فلوسهم لباقي الشعب
الحل سهل بس مافيش نيه صادقة لتنفيذه في الوقت الحالي
حرية
كانت اهم مطالب ثورتنا هي الحريه بس للاسف بعد 25 يناير اتغير الوضع للاسوأ اعتقالات وقمع تظاهرات ومحاكمات وسجون عسكريه
واهانات للثوار المقبوض عليهم وتعذيبهم ووصفهم بالبلطجيه
فض الاعتصامات بالقوه المفرطه زي ماحصل في فض اعتصامات التحرير في 26 فبراير و9 مارس و9 ابريل ، و15 مايو قدام السفاره الاسرائيليه
ووصل الامر لاستخدام الرصاص الحي واصابة بعض المتظاهرين منهم عاطف يحيي اللي حالته خطيره وبين الحياة والموت
دا غير قانون تجريم التظاهرات والاعتصامات اللي بيمنع حق من حقوق الانسان اللي كفالها له الاعلان العالمي لحقوق الانسان واللي بيمنح للناس حق التظاهر السلمي والتعبير عن رأيهم بحريه كامله
من اهم المطالب كانت حرية الاعلام وتطهيره من كل الفاسدين بعد الثوره رجع الرقيب بابشع ثوره
قانون الطوارئ اللي كان علي رأس مطالب الثوار هو الغاؤه فورا، لسه ساري وبعد ما وعدونا بالغاؤه قبل الانتخابات قرروا يمدوه لبعد انتخابات الرئاسه متحججين بالحاله الامنيه
ايام مبارك كنا عايشين في دولة بوليسيه من الطراز الاول
دلوقتي بقينا عايشين في دوله عسكريه بجداره
ايه اللي اتغير وفين الحريه المنشوده
نيابة امن الدوله اتحولت ل س 28
ومحاكم امن الدوله العليا اتغيرت للمحاكم العسكريه
عفوا مجلسنا العسكري مش دي الحريه اللي الشعب خرج يطالب بيها يوم 25 يناير
مش دي الحريه اللي مات عشان 840 واحد واتصاب اكتر من 6000 واحد من خيرة شباب مصر
مش حاسين بالتغيير ..وراجعين التحرير ...27 مايو 2011
