2013-02-17

اتسرقت !!!


بعد سنتين من انتهائها اكتشفتها امبارح بالصدفه , سرقه ممنهجه ومنظمه للبلوج بالكامل 

لقيت المدونة دي سارقه كل حاجه 

http://ahlanwasahlanentebahlol.blogspot.com/

كل البوستات الشخصي منها والفضفضات والقصص القصيرة

البوستات الهايفة والحاجات اللي متخصش حد غيري كله كله 



التنويهات عن بوستات مدونتي التانيه علي طول الحياة   مرحمهوش



عيد ميلاد المدونه واللي باين اوي فيها الاسم كمان نقله بالحرف 



حتي التحديثات تخيلوا حتي التحديثات كانت بتتنقل



اكتشفت ان البوست كان بيتكوبي بيست فور نزوله ويتم تعديل التاريخ فمعظم البوستات لقبل تاريخها بيوم واحد(طبعا مستخدمي بلوج سبوت عارفين ان ده مافيش اسهل منه من الاوبشن اللي تحت مربع كتابة البوست)


الاخ او الاخت -الله اعلم- حتي ماكنش بيكلف نفسه انه يعدل الغلطات الاملائية ولا لون الكتابة اللي - كان فاتح فاحيان كتيره وسابها علي خلفية مدونته الفاتحه مش باين منها حاجه


الصراحة أنا اتخضيت قلت يمكن كنت عامله باك اب ونسيت :)


او اكون بمشي وانا نايمة وبعمل حاجات وانساها بعد ما اصحي,

 طبعا الاكيد ان دي سرقه واني مش مجنونه ولسه ماجليش ألزهايمر ولا بمشي وانا نايمة , ومعملتش باك اب الا علي الوورد بريس وبنفس اسم المدونة والتعليقات كمان 

بس ليه وايه الحكمه ان واحد قاعدلي ينقل كل كلمة باكتبها الله اعلم مع اني يعني مش البلوجر الواو ولا بوستاتي احلي بوستات فالدنيا ولا انا الاديبة اللي محصلتش ولا مشهوره اوي زي باقي الناس وفوق كل ده مكنتش بأكتب بانتظام
حاجه تجنن مش كده :))


السرقه وقفت يوم 11فبراير2011  يوم التنحي,بعدها معدل كتابة البوستات بقي نادر وهو اصلا كان قليل من الاول وبقت كل الكتابة بوستات ثورية, تقريبا الأخ او الأخت كانوا فلول والكلام مجاش علي هواهم وقرر يقلبها لفيديوهات توك شو ومسلسلات تركي حاجه كده من اللي بتزود الرجل عالمدونه وتعلي الترافيك :)َ


سرقات الانترنت مافيش اكتر منها , وطول ما المحتوي مفتوح  عمرنا ماهانعرف نوقفها, والمنتديات والفيس بوك وحتي تويتر بينقشوا من بعض كل حاجه 


انا مش زعلانه ولا دي اول مره تتسرق مني حاجه بس مستغربه وياريت اعرف مين هو متيم كتاباتي اللي كان بيعمل كده 
هذا للعلم وشكرا

القرآن الكريم