الاسبوع اللي فات اخيرا زوجي اخذ اسبوع اجازته السنويه واللي المفروض اننا بنقضي نصه في الاسكندريه والنص الثاني في راس البر بس للاسف بسبب الانشغال الشديد وعدم وجود حد ثقه نسيبله الصيدليه ما قدرناش نروح في اي حته
بالعافيه قدرنا نخطف يوم في وسط الاسبوع نروح فيه بورسعيدواللي المفروض اننا بنروحها كل سنه في شم النسيم بس برضو ما رحناش السنه دي ، مع اني باستني اليومين دول من السنه للسنه
بورسعيد ليها في قلبي مكانه كبيره جدا جدا ، يمكن لان عائلة امي كانوا عايشين هناك وتم تهجيرهم بعد 67 ، رسمت ليها صور في خيالي من حكايات خالاتي وجدتي وازاي الفتره دي من حياتهم علي الاقل بالنسبه لي كانت عامله زي الحلم
كنت دايما افتكر حكاياتهم ايام شبابهم وطفولتهم في بورسعيد ، والبحر اللي كان قاسم مشترك في كل حاجه بيعملوها
لما كانوا ينزلوا يصطادوا الجمبري ، والسمك اللي جدي كان بيصطاده من علي كوبري الجميل
وازاي لما اتنقلوا لبورفؤاد وكانوا ساكنين في دور ارضي علي البحر وفي يوم صحيوا لقوا كل حاجه عايمه علي وش المايه اللي كانت مغرقه البيت
وخالتي اللي كانت رايحه تجيب الفطار يوم ضرب المدمره ايلات ادام سواحل بورسعيد والانفجار اللي حصل خلاها ترمي طبق الفول من الشباك وتنط فيه
ذكريات جميله ليهم ايام ما كانوا عايشين هناك ، ولحد ما اضطروا انهم يرجعوا بعد 67 لمسقط راس جدي اللي هي بلدنا الحاليه ، وبالرغم من انه رجع لشغله فيها بعد كده الا انه ما خدش العيله معاه وفضل لوحده هناك ومابيجيش الا اجازات قصيره لحد ما طلع علي المعاش
يمكن علشان كده لما بروح بورسعيد باحس اني خرجت بره الزمن ورجعت تاني لقبل 67 ،
وبالرغم من كل ده الا ان بورسعيد برضو بلد تستحق الاحترام بجد ،كل حاجه هناك تجبرك علي احترام البلد ، الشوارع نظيفه والناس بتعاملك ببشاشه و اي حد مستعد انه يساعدك في اي حاجه انت عاوزها بصدر رحب
واكتر حاجه عجباني هناك هي الجوامع الجميله اوي والنظيفه اوي اوي فوق العاده
حاجه هزتني اوي من جوايا المره دي وانا هناك ، بنت تقريبا 18 او 19 سنه منتقبه ، كانت بتصلي جمبي الظهر في جامع التوفيقي ، البنت ما بطلتش عياط من اول الصلاه لاخرها ، اتمنيت من كل قلبي اني ابقي في خشوعها وقربها من الله
حسيت السنه دي وانا ماشيه في الثلاثيني اني ماشيه في بكين ، كل المنتجات صنع في الصين ، الحاجه الوحيده اللي ناقصه ان البياعين كمان يبقوا صينيين
الله يكون في عون البورسعيديه لما يلغوا المنطقه الحره اواخر السنه الجايه ، مش عارفه هايعملوا ايه
طبعا ما ينفعش حد يروح بورسعيد وما ياكلش سمك ، زي كل سنه رحنا الكاستن واديناها اكلة سمك وجمبري متينه ،
و انصح اي واحد عاوز ياكل سمك بحق وحقيقي يروح بورسعيد ، مع كامل اعتذاري للاسكندرانيه (:
بجد السمك هناك له طعم تاني ، يمكن اسلوب التقديم والحفاوه والكرم الزايد بيديله طعم احسن
اكتر حاجه مش بتعجبي في البورسعيديه هي كرههم الشديد اوي للاهلي ودي الحاجه اللي
متهيألي ان عمرها ما هاتتغير ليه مش عارفه ، وطبعا عمرنا ما ننسي اليافطه الشهيره بتاعة " بورسعيد مش بتحبك يا اهلي "بس بصراحه كان يوم رائع وكنت بتمني انه يطول اكتر من كده
