حلاوة زمان عروسة حصان
وآن الاوان تدوق يا وله
ماليش دعوة ياما .....انا عاوز حلاوة
ماليش دعوة ياما ....يوه بطل داناوه
ماليش دعوة ياما.... حلاوة حلاوة
حلاوة زمان عروسة حصان
تعالى لعمك ....وشوف الحلاوه
وعيط لامك ....عشان الحلاوه
وعكر فى دمك..... عشان الحلاوه
ان الاوان ودوق ياوله
فاكرين الاغنيه دي -بصوت محمد قنديل وكلمات صلاح جاهين- كل ما باسمعها بافتكر المولد علي طول والحلاوه العروسه المتزوقه بمراوح من ورق الكوريشه - اللي اختفت ومع ان المناسبه مصريه خالصه الا انه حل محلها عروسه صيني متزوقه بالتل ليها عيون زرقه وشعر اصفر !!!! بالظبط زي ما حصل مع فوانيس رمضان وسجاجيد الصلاه والسِبَح وحاجات تانيه كتير - وبافتكر كمان الحصان الاحمر ابوفارس رافع سيفه و اللي اختفي برضو في ظروفه غامضه
اكيد كلكم اليومين دول من غير عياط ولا دبدبه فالارض غرقانين فالحلاوه ، سمسمية علي حمصيه علي فولية ...الخ -اللهم لا حسد - لو تلاحظوا ان كل احتفالاتنا كمصريين مرتبطه بالاكل مع اختلاف الاكلات طبعا ، وكما لكل مقام مقال فلكل احتفال اكلته المخصوصه [ الا كفتة الرز فادي بتتعمل فكل المناسبات مش عارفه ليه :) ]
" يوسف عوف في واحده من حلقات ساكن قصادي اتكلم علي النقطه دي بطريقه ساخره جدا ووصف تحول سيده اجنبيه من عود البان الي شجرة جميز بعد زواجها بمصري واستقرارها بمصر واتباعها عاداتنا في الاحتفال بالاكل والاكل للاحتفال "
اتعودنا نحتفل بالمولد باكل الحلاوه وركوب المراجيح ولبس الطراطير الملونه واللعب بالعروسه والحصان وبعد كده نكسرهم وناكلهم ، والموكب اللي بيلف البلد من اولها لآخرها ويستقر عند الصاري - بقالي اكتر من عشر سنين ماشفتوش بعد ما سبت بيت امي اللي الموكب بيعدي من جمبه - كنت باحب اوي شكل العربيات المتزوقه وخصوصا اللي علي شكل جامع صغير ،ومنظر الناس وهما فرحانين وكتير منهم بيوزعوا كوبايات شربات او لبن علي اللي رايح واللي جاي اما في الارياف فكان اعيان البلد بيدبحوا ويفرقوا اللحوم علي الفقراء والمساكين
وكان كتير من الناس بيقيموا سرادقات امام منازلهم لذكر الله والقاء التواشيح الدينيه وحكايات السيره العطره ومدح الرسول عليه الصلاة والسلام
افتقدنا كل ده وفضلت بس الحلاوه ، وحتي الحلاوة التقليديه اللي متعودين عليها من سنين بدات تقل وتحل محلها اصناف تانيه غريبه واسماء اغرب باسعار اغرب واغرب ، خايفه كمان سنه ولا اتنين تختفي الحلاوة هي كمان او تيجلنا مستورده من الصين
