السواقة ادب ...مش لفة دركسيون

حلم غريب كان دايما بيتكرر معايا كتير، يمكن فيه اختلاف بسيط في الاماكن او بعض الاحداث بس الخط الرئيسي في الحلم واحد مش بيتغير ابدا
باحلم دايما اني باسوق عربيه بالليل( مع اختلاف نوعها او مكان تواجدها ) ومش عارفه اتحكم في اتجاهها ولا سرعتها ولا حتي عارفه اوقفها وبيتملكني احساس رهيب اني اكيد اكيد لازم في الآخر هاخبط في اي حاجه والعربيه ها تتدمر وانا كمان اكون في خبر كان بس الحمد لله بصحي قبل ما ده يحصل
مش عارفه بالظبط ايه دلالة لحلم ده
بعض المفسرين بيقولوا ان قياده السياره ترمز للتحكم في الحياة ومافيها من صراعات مع النفس وهموم الحياه وان فترة الجلوس فيها هي فتره مؤقته او انتقاليه من حياة الشخص ده
معني كده اني في مرحله من حياتي مش عارفه اتحكم فيها خالص ولا اخد اي قرار صحيح ولا حتي قراراتي مؤثره في خط سير حياتي !!!!

يمكن ...!!!؟؟؟؟

كذب المنجمون ولو صدفوا

وبما ان كل الناس بقوا مفسرين للاحلام وكل واحد بيفسر علي مزاجه انا كمان هافسر اشمعني انا يعني

وتفسيري للحلم هايكون مختلف لان ماحدش يعرفني كويس اد ما انا اعرف نفسي :

اولا اعتقد ان السبب الرئيسي في الحلم ده اني كل ماروح الملاهي واركب العربيات الكهربا مش باعرف اتحكم فيها ولا اسوقها كويس وبتفضل ماشيه في اتجاه واحد او تلف في دواير ومش باعرف اوقفها ابدا الا لما تقف لوحدها :)

تاني حاجه اني دايما باصاب بدوار الحركه لما اركب اي عربيه وبيجيلي غثيان شديد حتي من ريحة البنزين

كمان كمية الحوادث الرهيبه اللي كل يوم نسمع عنها دا غير عدم التزام السواقين في كل حته واللي بيعمله سواقين التكاتك والميكروباصات في الناس سواء اللي راكبين ولا اللي ماشين

والفوضي الرهيبه اللي في كل شوارع مصر المحروسه واللي ماتشجعش حد ابدا انه يغامر باعصابه ويركب او يسوق عربيه

كل ده كون في عقلي الباطن عقده وشنيطه من العربيات وكرهتها من كل قلبي

وخلاني رافضه لفكرة تعلم السواقه اللي زوجي بيلح بيها عليّ اليومين دول

واكيد اكيد هو سبب رئيسي من اسباب الحلم الغريب ده

ايه رايكم في التفسير ده بالذمه مش منطقي و بيعتمد علي اسباب واقعيه
ومش المفروض اني من هنا ورايح اشتغل في التفسير

ولا هو الشيخ سيد احسن مني :)