TvQuran

٢٠٠٧-١٠-٢٨

وحشتني



وحشتني ..

عدد نجوم السما

وحشتني ..

عدد كلام الهوى

وحشتني ..

ما صدقتش وداني وانا بسمع صوت الرائعه سعاد محمد تردد "وحشتني " خارج من كاسيت الجيران ،
مش معقول امال فين العنب والحنطور وايظن وبقية اخواتهم من الاغاني اللي اتعودت انها تبقي دايما شغاله عندهم وعلي اعلي مستوي للصوت
خير ايه اللي حصل مش معقول اخيرا ذوقهم اتعدل وبداوا يسمعوا اغاني من زمن الفن الجميل زي ما بيقولوا
ماوقفتش كتير قدام النقطه دي ،
بس غبت عن الزمن وسرحت مع الصوت الشجيّ لسعاد محمد ، واللي كان بقالي كتير اوي ماسمعتهاش ، رجعتني الاغنيه لاكتر من اتناشر سنه وانا لسه يادوبك بدخل علي سن العشرين وببدا معاه حياه جديده ، حياه من نوع تاني ، كنت لسه باديه خطوبتي جديد و كانت سعاد محمد واغنيتها " وحشتني " من احب الاغاني لينا ،كنا بنعتبرها بتغنيها لنا احنا بس وانها بتاعتنا احنا بس

رجعت لايام الخطوبه الجميله ومكالمات التليفون الطويله ( طبعا الارضي لان المحمول ماكانش لسه ظهر ) واللي خلفيتها دايما اغنية " وحشتني "
رجعتني لايام الحريه والبال الرايق ، ايام ماكانش الواحد شايل هم حاجه
الايام دي رجعتلي كلها في صوت سعاد محمد وهي بتقول " وحشتني "


وحشتني ..

عدد نجوم السما

وحشتني ..

عدد كلام الهوى

وحشتني ..

في كل يوم إنما .. إنما ..

وحشتني ..

أكتر وأكتر .. واحنا سوا

تعالي نخلي الحلم حقيقة ..

تعالي .. تعالي

تعالي نعوض كل دقيقة ..

تعالي تعالي

من خوفي لبكرة يفرقنا ..

واحنا يا روح قلبي ما صدقنا

اشتقتلي .. ورجعتلي ..

وقولتلي .. وحشتني

***

ليالي .. ليالي .. ليالي ..

ما فارقتش ثانية حبيبي خيالي

بستني الفرحة وبستناك ..

وبغني وأنا بحلم بلقاك

الله علي لقي الحبيب .. بعد الغياب ..

حلاوته بتخلي الهوي .. يرجع شباب.

الله .. الله

تعالي نخلي الحلم حقيقة ..

تعالي .. تعالي

تعالي نعوض كل دقيقة ..

تعالي تعالي

من خوفي لبكرة يفرقنا ..

واحنا يا روح قلبي ما صدقنا

اشتقتلي .. ورجعتلي ..

وقولتلي .. وحشتني

***

يا قمر ..

يا سهر ..

يا قمر يا سهر .. يا سهر يا قمر

راجعين راجعين ..

راجعين بحنين .. بحنين كل العاشقين راجعين

اسهروا .. ونوروا .. ليالينا ..

ده الشوق ياما دوب فينا

ربنا يوعدنا ويسعدنا ..

ولا تخلص أبدا مواعيدنا

ونقول لبكرة يستني ..

ونقول لبعده ابعد عنا

تعالي نخلي الحلم حقيقة ..

تعالي .. تعالي

تعالي نعوض كل دقيقة ..

تعالي تعالي

من خوفي لبكرة يفرقنا ..

واحنا يا روح قلبي ما صدقنا

اشتقتلي .. ورجعتلي ..

وقولتلي .. وحشتني


60 comments:

http://kasperb4.blogspot.com/ يقول...

اللــــه

امتى بقى ييجي عليا انا كمان اليوم اللي افضل افتكر فيه ذكريات زمان واسرح كده واقول ياااااه فين الأيام دي يا واد يا محمود
:D

اللهم لا حسد
هههههههه

يعني بس اصلي بيني وبينك خلاص تعبت واتخنقت ونفسي ربنا يكرمني بقى واتأهل

هههههههههههه

تامر حسين يقول...

طيب ممكن تعملي فيا معروف وتدوري علي اغنيه ساكن قصادي وبحبه واسمعيها بتمعن شويه وشوفي مدي التعبير الموسيقي
في جزئيه
وفي يوم صحيت علي صوت فرح بصيت من الشباك
اوك مستني ردك في مدونتي ومتتأخريش
تحياتي

لو بطلنا نحلم نموت يقول...

تحسي ان صوتك حلو في الاغنيه
ديه
انا حاسس انك بتغنيها من كل قلبك
انا اول مره ليا اعلق في المدونه بتاعتك
والواحد برضه نفسه يبقاله اغنيه
بس مننين

mohand يقول...

السلام عليكم

ازيك يا دكتوره
ربنا يجعل ايامك كلها فرح يا رب

انا كمان بفتكر سعاد محمد واغنية وحشتني

بس اول مره كنت اسمعها من خالد عجاج زماااااااااااااان
وهو اشتهر بيها اصلا

ياه كانت ايام

انا قديم برضه

بس المشكلة بقي ان الاغاني دي لما تفتكريها لازم بتكون بشخصيات
او باماكن محدده

يعني انا بفتكر الاغنيه دي ببيتنا القديم خالص
وفي مكان محدد بالظبط واغمض عيني الاقيني فيه بالظبط

وبحزن قوي علي الايام دي
عرفتي ليه مشكلة

تحياتي يا دكتوره

واغنيه الخضار علي فكره تريقه مش قاصد الراجل يهبط بمستوي الاغنيه

يا مراكبي يقول...

مش قدام الناس كده يادكتورة .. الناس برضه عينيها وحشة

:-D

دايما بالسعادة والتوفيق إن شاء الله

البنت الشلبية يقول...

سلام عليكم
ازيك يا دكتورة
اكيد كل مارحلة وليها جمالها
المهم اننا نحاول نتزوق جمال كل مرحلة قبل ما تختفى من حياتنا
مبروك النيلو لوك وكنت عايزة اعرف لو فى طريقة شرح مبسطة اعرف منها ازاى عملتى شكل المدونة وتصميمها لانى على ما اعتقد انه مفيش نموزج بلوج موجود بالشكل ده
واشكرك

محمد عبد الغفار يقول...

وتشيلى الهم ليه

الهم على الله

فكرتينى بأيام الجيش

Unknown يقول...

sorry for writing in Eglish because of my keyboard
your blog is a pace of art.
congratulations
your post is ful of felings may allah bless you and your family
Ahmed

سها السباعي يقول...

ياه
فكرتيني بالذي مضى
اتغنت في فرحي
بس كان ساعتها عرفناها بصوت خالد عجاج
وبعدين عرفت انها اصلا بصوت سعاد محمد

تحياتي

رينـــــــــــا يقول...

ياااااااااا يا دكتور
والله رجعتينى لزماااااان
احيك على اختيارك بجد

jfjjg يقول...
أزال المؤلف هذا التعليق.
jfjjg يقول...

نورتي مدونتي الوليده
ومتشكرة قوي على كلامك الجميل بس انا ما فهمتش موضوع الحروف اللي قبل التعليق ده؟ ممكن تشرحيلي

سها السباعي يقول...
أزال المؤلف هذا التعليق.
Unknown يقول...

بتحاولى تثنينى عن رأيي فى الزواج ولا ايه يادكتورة

متحاوليش يا دكتورة انا بقولك اهوه .. إنى صاااااااامدة

هههههههههههههههههه

ربنا يحلى كل ايامك يارب اللهم آمييييين

أُكتب بالرصاص يقول...

الله الله يا ست

اولا.. مبروك على شكل المدونة الجديد

احلى كتير جدا من القديم ومريح للعين

ثانيا:
اتناشر سنة ، ماينص عشرين..
يعني ممكن نحسب السن ...همم...تلاتة واربعين؟

ثالثا:
مين سعاد محمد؟
:)

تامر حسين يقول...

في موضوع جديد مستنيكوم

غير معرف يقول...

من اجمل الاشياء الى ربنا ادهالنا نعمه التذكر والذكريات وخصوصا الذكريات الحلوه وتمنياتى انى ربنا يخليكم مع بعض دائما ويكتر ذكرياتكم الحلوه
على فكره استيل البلوج روعه بصراحه

Shower-Mirror يقول...

يااااه... فكرتينى باللذى مضى . فعلا كانت الاغنيه دى مكسره الدنيا فىالوقت ده ... و انا فاكر ان الناس ماكانتش عارفه الاغنيه دى لانها قديمه جدا ...و لكن فى اواخر التسعينات جه خالد عجاج و غناها بتوزيع جديد و فكر الناس بيها و لكنها رجعت و اشتهرت تانى بتوزيعها الاصلى و بصوت الرائعه سعاد محمد ...


تحياتى لذوقك الرقيق

Sou يقول...

جميل أن سرحت لزمان وأيام زكن بس رأيي تطمن علي الجيران ليكون جري لهم حاجة

سها السباعي يقول...

كنت عايزة اشكرك على فكرة ولوجوهات المدونة النظيفة انت وكل من ساهم في التصميم والتنفيذ
متشكرة قوي

Unknown يقول...

salam Dr.
i want to learn somthing from ur site.
how did u add the song?
thanks
Ahmed

القلم السكندري يقول...

ياعيني

الله يرحم ايامكم

كان فيها روقان بال

بيتهيألي ده عملة نادرة دلوقتي



أرق الامنيات بدوام السعادة ان شاء الله

•«ρяoιd»•™ يقول...

الله عليكي يا دكاتره

هي دي الأغاني

انا بعمل اغنيه جديده و قريب هحطها في المدونه

ابقي قولي رأيك

و متخافيش من اخوات و لاد عم و بنات خال العنب و الخرف ده

تحياتي

خمسة فضفضة يقول...

السلام عليكم ورحمة الله وبركاته

محمود ( آلام و آمال )

ان شاء الله قريب تلاقي بنت الحلال اللي تكمل معاها ايامك في سعاده

خمسة فضفضة يقول...

السلام عليكم ورحمة الله وبركاته

تامر حسين

تم عمل اللازم يافندم والرد طبعا قريته في مدونة حضرتك

:)

تحياتي

خمسة فضفضة يقول...

السلام عليكم ورحمة الله وبركاته

مصطفي محمود ( حواديت وحكاوي )

الله يخليك دا من ذوقك

ان شاء الله يبقالك تابوم اغاني كامل من اغنيه واحده

:)

تحياتي

خمسة فضفضة يقول...

السلام عليكم ورحمة الله وبركاته
مهند

ايوه انا كمان اول ماسمعتها سمعتها من خالد عجاج وبعدين بقي ادمنت سعاد محمد

وزي ما قلت في البوست الايام الجميله دي بترجعلي كلها بكل اللي فيها وكاني عايشه في شريط فيديو عنها
زيك بالظبط

--
تقصد الخضار بتاع احمد آدم
اه بس اهو برضو كلها تعتبر اغاني هابطه مهما كان الغرض من وراها ، دا كفايه صوته اللي يحيب طرش



تحياتي

خمسة فضفضة يقول...

السلام عليكم ورحمة الله وبركاته

باشمهندس احمد ( يامراكبي)

يلا بقي ، ربنا هو الحارس
:-D

ربنا يوفقك ويسعدك ويسعد الجميع

تحياتي

truelove يقول...

هتصدقيني اني استمتعت بالاغنية دي لما سمعتها اول مرة وانا في اولى اعدادي وعجبتني قوي وقعدت ادندن فيها اصل كلمات فعلا صعب الاذن متتذوقهاش سلامي ليكي وبعدين بلاش اتناشر سنة وكلام من ده احنا شوباب لسة

خمسة فضفضة يقول...

السلام عليكم ورحمة الله وبركاته

البنت الشلبيه

ايوه عندك حق ، كل مرحله وليها جمالها ، بس للاسف مش دايما بنحس الجمال ده اللي بعد ما تعدي

------
التمبلت ده موجود في موقع الفينال سينس ، وده موقع فيه كمان تمبليتس تانيه كتير اوي جميله جدا
الرابط بتاعه اهوه :

http://www.finalsense.com/services/blog_templates/index.htm

انا بس غيرت الصوره اللي في الهيدر
ومبسوطه اوي انه عاجبكم

تحياتي

خمسة فضفضة يقول...

السلام عليكم ورحمة الله وبركاته

استاذ محمد عبد الغفار

هو فيه حد ما عنجوش هموم حي لو كانت بسيطه

وياتري فكرتك بالجيش علشان الهم ولا علشان سعاد محمد ؟

:-D

خمسة فضفضة يقول...

السلام عليكم ورحمة الله وبركاته

استاذ احمد ( عيل مصري )

ربنا يخليك يا فندم ،متشكره اوي علي ذوقك ، فرحت اوي برايك في المدونه والبوست

ومايهمكش اكتب باللغه اللي انت عاوزها بس المهم انه يكون انجليزي انجليزي ، مش عربي بحروف انجليزيه ، اصلي بتنرفز منه جدا

نورتني

خمسة فضفضة يقول...

السلام عليكم ورحمة الله وبركاته

سها ( شئ مني )

اناكمان اتغنت في فرحي وعرفتها الاول بصوت خالد وبعدين ادمنتها بصوت سعاد

نورتيني

خمسة فضفضة يقول...

السلام عليكم ورحمة الله وبركاته

رينا

ازيك عامله ايه واخبارك ايه ، ان شاء الله تكوني بخير

كويس ان الاغنيه رجعتك انت كمان لايام حلوه

تحياتي

خمسة فضفضة يقول...

السلام عليكم ورحمة الله وبركاته

سها

اقصد ال
Word Verification
اللي بيبقي قبل الكومنت ،اصله بيبقي رخم شويه وبيحتاج يتعاد اكتر من مره

وعموما الحكايه دي ترجعلك

تحياتي

خمسة فضفضة يقول...

السلام عليكم ورحمة الله وبركاته

ياسمين احلي انسانه
لا ياستي لا باحاول ولا حاجه
:-D
وعموما رايك في الجواز انت بس اللي هاتبنيه لما ربنا يوفقك لابن الحلال اللي يحلي ايامك ويعيشك في سعاده وحب
زيي كده
بس مش عاوزه حسد ....هههههه
والله بتكلم بجد وسيبك من كلام مدام طهقانه انا عارفه ومتاكده انها بتقوله من ورا القلب واللي يدور عليها يلاقيها بتموت في طهقان
:-D

يا بنتي لو الحب ماكانش من الاول ، بيجي بالعشره الطيبه ،ربنا يرزقك وتجربي


سلام

خمسة فضفضة يقول...

السلام عليكم ورحمة الله وبركاته

اكتب بالرصاص

الله يبارك فيك وشكرا علي ذوقك

حضرتك مش عارف تحسب ولا ايه
دول يبقوا 62 مش كده
:-D

وسعاد محمد دي بنت الجيران ، مش قلتلكم الصوت كان طالع من عندهم

:-D

خمسة فضفضة يقول...

السلام عليكم ورحمة الله وبركاته

تامر حسين

عُلم وجايين في السكه

هههه

خمسة فضفضة يقول...

السلام عليكم ورحمة الله وبركاته

رئيس جمهورية نفسي

اللهم آمين يارب

فرحت ان الاستيل عجبك ومتشكره اوي علي ذوقك

تحياتي

خمسة فضفضة يقول...

السلام عليكم ورحمة الله وبركاته


Shower-Mirror

ايوه هو كده بالظبط
بس بصوت سعاد محمد احلي بكتيييييييييييررررررررر اوي عن صوت خالد عجاج

وانا اللي متشكره علي ذوقك

تحياتي

خمسة فضفضة يقول...

السلام عليكم ورحمة الله وبركاته

SARAH

لا ماتقلقيش بعدها علي طول شغلوا شعبان عبد الرحيم

:-D

خمسة فضفضة يقول...

السلام عليكم ورحمة الله وبركاته

سها

العفو يا جميل ، دا واجب علينا والحمد لله في ناس كتير اوي شجعت الفكره وانضمت لينا

خمسة فضفضة يقول...

السلام عليكم ورحمة الله وبركاته

القلم السكندري


نورتني وشكرا علي ذوقك

في رايي ان روقان البال ده مرتبط بالسن وكمية المسؤليات اللي الواحد بيبقي حامل همها ، مش بزمن معين ولا ايام معينه


تحياتي

خمسة فضفضة يقول...

السلام عليكطم ورحمة الله وبركاته

رامي

ربنا يخليك

وهاستني الاغنيه الجديده ، ومتاكده انها هاتبقي تحفه ان شاء الله

وماتقلقش الاغاني اياها دي هوجه وموضه هاتاخد وقتها زي اي حاجه وهاتتنسي بعد شويه

تحياتي

خمسة فضفضة يقول...

السلام عليكم ورحمة الله وبركاته

truelove

فعلا مافيش حد عنده حس موسيقي وقدره علي التذوق يسمع الاغنيه دي ومايعجبش فيها


وطبعا احنا لسه شباب ......وفي اللفه كمان

ههههههههههههههه

نورتيني

أحمد سلامــة يقول...

:)
انا كنت بسمع الاغنية دي بردو
بس قبلسعاد محمد كنت لسه صغير مقدرش عليها
كان خالد عجاج بيغنيها ايام مكان بيختار الحان واغاني تتسمع

بس هي اغنية تحفة وسعاد محمد اصلا جبارة في كل اغانيها
لو مسمعتيلهاش انا هويت بتاع سيد درويش يبقى فاتتك

سلامي ليكي

kafrawy يقول...

قال بيسالونى عنك يانور عيونى


حقيقى حيرونى

ف الرد و غلبونى

عندى الاسباب كتيرة وهقول اية ولا اية



سلام

محمود الدوح يقول...

تعيشى وتفتكرى يادكتورة

لما سمعتى اغنية شادية
مبصتيش من الشباك لقيتى السما صافية والشوارع متسفلتة والدنيا عال العال

Unknown يقول...

السلام عليكم يا دكتورة
يعني مش عارف اقولك إيه أنا متشكر جدااا على تعليقك، ورحت على الword وكتبت بالعربي عشان اكتب براحتي
يا ستي، هذه المقالات كلها، هي تسريبات الطفل الذي في داخلنا، اللي لما كبرنا بدأنا ننساه، أو تقدري تقولي صراحة هي دي المكونات اللي اتكونا بيها.
حب الجنة، نصر أكتوبر، الارتباط بيوت وحواري وشوارع القاهرة، أقولك على حاجة الصيف اللي فات كنت في زيارة لتركيا، وانا كالعادة سبت الاجتماعات والحكي الكتير، وطلعت لوحدي اتفرج على حارات وشوارع اسطنبول الجوانية، مش اسطنبول اللي بيودوا السياح عليها، وصاحبت ناس في القهاوي، وصاحبت عائلة تركية بتبيع أيس كريم اللي هي دندورمة بالتركي، ورغم إن الأحياء كانت فقيرة وفكرتني بشارع الجيش والعتبة، وباب الشعرية والجمالية والموسكي، إلا إنها في غاية النظافة.. على فكرة أنا ماكنتش متضايق خالص، على العكس أنا كنت مستمتع جدا، وكنت حاسس انه سهل جدا القاهرة ترجع تاني كده، لأن اسطنبول كانت وصلت لدرجة عنيفة في القبح قبل ما تمسكها البلدية اللي مسكتها، القاهرة بس محتاجة حد يحبها زي ما بنحب عيالنا، نتكلم عليها، ونخاف عليها، ولما تتعب نوديها للدكتور..معلش تداعي خواطر سريعة
الشئ الآخر.. نصيحتك بعمل الكتاب.. انا فعلاً شغال عليها، بس أنا مقيم خارج مصر ومش راجع قبل مارس القادم، ودعواتك لأن الرجوع هيكون بعد الحصول على الدكتوراه في إدارة الجودة الشاملة للمؤسسات الإعلامية، بس أنا مش إعلامي ومش كاتب انا تربية حواري
مرة تانية خالص شكري ليكي. وتمنياتي بالتوفيق لك وللعائلة الكريمة
أحمد

ياسر مدني ...دينامو الإخوان يقول...

في ذكري وعد بلفور ...لا تنسوا الدعاء لإخوانكم في فلسطين
والدعاء علي الظالمين..واللهم تقبل...وتيقنوا أن الدعاء سلاح مهم لكل المسلمين

david santos يقول...

Please!

Send an email to the Brazil embassj your country and repor the injustice that the brazilian courts are making with this girl
Release on Flavia’s accident and status of the process.

The resignation is to stop the evolution. (David Santos in times without end)

Thank you

الحمقاء المضلله innominate x يقول...

و انا صغيرة في تالته اعدادي كنت فاكرة ان صوتي حلو و كنت مزهقه اهلي بالغنيه دي قال ايه بدرب على الغنا هاهاهاهاها ف الأغنيه دي ليها دكريات خاصه جدا

خمسة فضفضة يقول...

السلام عليكم ورحمة الله وبركاته

د/ احمد سلامه

انت كده هاتخليني ادور عليها واسمعها ، بصراحه انا بموت في صوتها

تحياتي

خمسة فضفضة يقول...

السلام عليكم ورحمة الله وبركاته

كفراوي

ورده كمان
الله الله ياسيدي

خمسة فضفضة يقول...

السلام عليكم ورحمة الله وبركاته

محمود الدوح

صح بتبقي كل حاجه تمام وعال العال واحنا طايرين في دنيا الاحلام مع صوت سعاد الرائع

خمسة فضفضة يقول...

السلام عليكم ورحمة الله وبركاته

د/ احمد ( عيل مصري )

خلاص انا ماعتدش هاقول الا دكتور احمد
وان شاء الله ترجع مصر قريب ومعاك الدكتوراه بامتياز ومرتبة شرف

ومعلش تعبتك وخليتك تروح لحد الوورد عشان تكتب عربي
:-D

كلامك كله صح فعلا بس للاسف الناس اليومين دول مش حاسين ان البلد بقت بتاعهم علشان كده مش بيهتموا بيها وكل واحد بيقول يلا نفسي
مع انهم لو ادوها شوية من اهتمامهم وحبهم هاتبقي احسن بلد في الدنيا
ويارب يجي اليوم اللي نخاف فيه عليها من كل قلبنا ونديها شويه ولوصغيره من وقتنا
ونشوف بلديه فعلا بتخاف عليها ومش كل همها ازاي تعمل ثروات من الرشاوي والاكراميات علي حساب البلد

نورتني والله ومش عارفه اقول ايه لحضرتك انا سعيده جدا بوجودك هنا

تحياتي

خمسة فضفضة يقول...

السلام عليكم ورحمة الله وبركاته

دينامو الاخوان

اللهم انصر الاسلام والمسلمين في كل مكان ، وارفع رايته عالية خفاقه واظهره علي الدين كله ولو كره الكافرون

خمسة فضفضة يقول...

david santos


Here in our country who need more stopovers protest and demand their release

خمسة فضفضة يقول...

السلام عليكم ورحمة الله وبركاته

الحمقاء المضلله

انا كمان كنت زيك كده
وفي الآخر غنيت في فرحي ، والناس كلها اتبسطت من صوتي ،وقالوا ان حلو ، يمكن كانوا بيجاملوني، مش انا العروسه ولا ايه
:-D

نورتيني

Blank-Socrate يقول...

اتمنى لك حياة سعيدة دافئه دائما

القرآن الكريم