2011-12-31

2011 عام الشهد والدموع






ساعات ونودع 2011 ... ياااااااه اخيرا هاتخلص ..مش مصدقه نفسي 


اطول سنه في تاريخ مصر ..لأ لأ  اعتقد انها اطول سنة في تاريخ البشرية جمعااااااء 


بصراحه 2011 ماحرمتناش من حاجه نفسنا فيها ..


وصلتنا لقمة الامل.. ووصلتنا لقمة الاحباط 


مافيش كارثه الا وحصلت فيها ...مافيش يوم عدي من غير احداث مؤثره


كنا بنلهث ورا الاحداث يوم بعد يوم 


توسينامي


حرووب....ثورات 


ناس استشهدت.... ناس ماتت ...ناس اتقتلت


 ..وناس بتنافس علي نهائي كاس العالم للعب في المناخير 




سنه كان فيها قلب عربية خضار السبب في قلب موازين العالم العربي والعالم كله .. 
 وكانت بداية للربيع العربي اللي خرج من سيدي بوزيد في تونس لباقي الوطن العربي والعالم 




خرج المارد العربي في كل مكان بيطالب بالحرية  
 ميدان التحرير في مصر
 دواراللؤلؤة في البحرين 
ميدان التغيير في اليمن
بني غازي في ليبيا ومنها لباقي ليبيا
 درعا في سوريا  ومنها لباقي سوريا



   بدأ الربيع العربي ونتمني انه ينتهي علي خير لكل الشعوب وعلي مشانق لكل الطغاة


سنه كان فيها الثائر العربي هو شخصية العام




وكانت الثورات العربيه ملهمه لكل شعوب العالم اللي حاولت تقلدنا سواء في امريكا او 
في اليونان او اسبانيا او ايطاليا او انجلترا






سنه حسينا فيها بالامل وحسينا اننا الاقوي وان لينا الحق في العيش بكرامه وحريه وعدالة اجتماعية


سنة قدر فيها شباب مصري أعزل علي طرد سفير اسرائيل وانزال علمها 



في الوقت اللي مافيش حاكم عربي واحد يقدر يعمل كده








سنه ثورنا فيها علي الظلم والفساد ،ولما آمنا بنفسنا وغلبنا خوفنا وطلعنا المارد اللي 
ساكن جوانا نجحنا نشيل راس اكبر نظام فاسد في المنطقه العربيه والشرق الاوسط


سنة قدمنا فيها  آلاف الشهداء والمصابين والمفقودين وآلاف المحكومين عسكريا

اضرب علينا قنابل الغاز سواء المسيله للدموع او غاز الاعصاب او الغازات المسرطنه 


خرطوش ومطاطي ورصاص حي 


سحلونا وضربونا وعرونا واتبولوا علينا وسجنونا ولفقوا قضايا للشرفاء مننا




حاربونا باعلامهم القذر وقنوات دعارتهم الفضائيه  




وبرضو ماقدروش يهزمونا لانهم نسيوا ان طول ما ربنا معانا 
ماحدش هايقدر يهزمنا 

لسه مكملين وربنا معانا وها نسقط باقي النظام باذن الله 


سنة عرفنا فيها ان اللي حمي مصر وثورتها هو شعبها مش حد تاني 








سنه شعارها اروح ادور اروح ادور اروح ادور


بدأناها بندور علي اللي قتل ضحايا كنيسة القديسين وسيد بلال


بعدها  علي القله المندسه واجنداتها الخارجيه


وبعدين الاصابع الخفيه اللي بتلعب في الضلمه



ثم اخيرا بندور بلا انقطاع عن الطرف الثالث اللي مدوخ العالم وبقي عامل زي مستر اكس 






سنة 2011 اسقطت كل الاقنعه عن كل الوجوه 
 وحطت كل واحد قدام نفسه 


بان اللي بيحب البلد دي بجد واللي مايتأخرش عليها حتي لو طلبت منه حياته نفسها




 واللي بيدورعلي نصيبه من التورته ومايهمهوش غير هايكسب اد ايه 




السنه دي غيرت مفاهيم وثوابت كتييييره اوي كانت راسخه فعقولنا 
رفعت ناس ونزلت بناس لسابع ارض 


وعرفنا فيها ان حياة البشر عند بعضهم مش اهم من احتفاظهم بكراسيهم ومناصبهم واستمرارهم في النهب والسرقه والفساد 


او ان حياة البشر مش اهم من كام كتاب اتحرقوا عمد عشان يشوهوا صورة الثوره 


واخيرا 


اكتشفنا فيها المخططات "الماثونيه" لهدم العالم واخطرهم علي الاطلاق مخطط 13/13/2013 







سنة2011 خلااااااص بتحتضر ويارب ماترجع تاني ويارب 2012 تكون اسعد واهدي ونحقق فيها كل اللي كنا عاوزين نحققه في 2011 بس مالحقناش 




 سنة جديدة سعيده علي الجميع يارب 




2011-11-05

وَأَذِّنْ فِي النَّاسِ بِالْحَجِّ






لبيك اللهم لبيك لبيك لا شريك لك لبيك
 ان الحمد والنعمة لك والملك
لا شريك لك لبيك
 لبيك حجا حقا تعبدنا ورقا
لبيك مرغوبا ومرهوبا اليك

لبيك ذا النعماء والفضل الحسن
لبيك وسعديك والخير بيديك والرهباء اليك والعمل
 لبيك ذا المعارج
لبيك ذا الفواضل
لبيك إله الحق لبيك



2011-10-18

ليست مسبحتي







جائتني هدية من جوار رسول الله صلي الله عليه وسلم 
سبعة أعوام تلازمني 
 بين يدي أتحسس حباتها 
أحفظهم كأصدقائي
مسبحتي البيضاء اللامعة
ثمان وتسعون حبة ونصف من الصدف
الحبة السابعة مكسورة
شراشيبها ليست مرتبة كباقي المسابح
احبها كطفلتي الصغيرة
أغسلها أعطرها وأرتب الشراشيب 
أُسبح وأُكبر وأَحمد الله مائة مرة
ثم أخبئها في درج مكتبي 
لم تفارقني في حجي وعمراتي 
هذا العام ضاعت مسبحتي جوار رسول الله صلي الله عليه وسلم
فتشت عنها في كل مكان 
في حقيبتي 
 في صناديق المفقودات
بجوار المصاحف
في أيدي المعتمرات 
لم أجدها 
أشتريت أخري تشبهها بشراشيب مرتبة
وتسعٌ وتسعون حبة من الصدف الأبيض اللامع
أُسبح وأُكبر وأَحمد الله مائة مرة
أُفتش عن الحبة المكسورة .. وعن الشراشيب المشعثة


لا أجدها



أشعر بالاغتراب


 ليست مسبحتي






2011-09-07

الرحله 658



كنت في العمر ....ايوة عمرة رمضان اللي فاتت دي .. اللي المعتمرين فيها اتبهدلوا 
في مطار جده سواء الملك عبد العزيز او مدينة الحجاج

بالنسبه للعمره فالحمد لله كانت رائعه طبعا بغض النظر عن الزحام الرهيب اللي فاق كل سنه وكان حتي اكتر من موسم الحج نفسه
 وصلنا علي مطار المدينه وكانت الاجراءات سهله وسريعه وخلصنا  بسرعه الحمد لله
ايام الاقامه في المدينه كانت اكثر من رائعه وفيها سلام وسكينه روحيه كعادة  المدينه

وصلنا مكة ليلة 21 رمضان عملنا مناسك العمره والحمد لله تمت علي خير رغم الزحام الغير عادي ،وكملنا باقي رمضان الحمد لله علي خير

 المشاكل كلها كانت في مطار جده
ميعاد رجوعي المفروض كان ظهر تاني يوم العيد
معروف انه من ليلة 29 معظم الناس بتختم القرآن وجري علي المطار عشان يعيدوا فمصر
وفيه ناس بتدفع فرق عشان تقدم ميعاد رجوعها لليلة 29 ..المفروض ان اسمها الرحلات المميزه
وهي فعلا السنه دي كانت رحلات مميزه ...تختلف كليا عن اي سنه فاتت او سنه جاية :)

من يوم 29 وكل الاخبار بتتكلم عن المعتمرين المصريين العالقين في مطار جده وعن الطيران السعودي وتأخير الرحلات والناس اللي بايته في المطار بقالها يوم واتنين
وعن الخناقات اللي حصلت وتكسير مكاتب الطيران السعودي

كل ده وانا اقول لا لا لا  .....رحلتنا غير .....احنا علي مصر للطيران .... وكمان تاني يوم العيد .....ومش معقول تفضل الازمه لتاني يوم العيد دا يبقي تهريج <<<<<< متفائله دايما :))

المهم اول بشري جت ان الطياره مش علي مطار الملك عبد العزيز لا علي مطار مدينة الحجاج .. وما ادراك ما مطار مدينة الحجاج .. مطار زباله وخدماته محدوده للغايه واماكن الانتظار فيه خارجيه وغير مكيفه مجرد مظلات ومش علي كل الاماكن
وانا ابدا لسه متفائله ... ما احنا سافرنا عليه قبل كده وقبل ما يتجدد بالشكل ده وكان السفر سهل وسريع 

نتصل بقرايبنا واصحابننا اللي سافروا يوم 29 نلاقيهم لسه في المطار مرميين علي الارض ولا حد معبرهم وكمان فيه منهم خدوهم في الاتوبيسات ورموهم علي ممرات الطيارات في الصحراء والشمس الحارقه .... وانا لسه متفائله برضو :))


جه يوم السفر ومندوب الشركة قعد يأقلمنا نفسيا ان الرحله هاتتأخر علي الاقل 6 ساعات واننا لازم نبقي جاهزين لتقبل ده وبلاش تنشنه ولا نرفزه وان شاء الله نوصل علي خير 

وصلنا مطار مدينة الحجاج الاتوبيس نزلنا في منطقة خارجيه بعيد عن مكان القاعه اللي فيها السير والوزن 
وبعدها وصل اتوبيس الشنط ووقف فمكان تاني بعييييييد قالك دي الاوامر المهم ندور علي عربيه نشيل عليها الشنط مافيش .. اكنها اتبخرت ..بعدها اتضح ان الباكستانيين والهنود مستوليين عليها وبيدوها للي يدفع .. قلنا مش مشكله هين قرشك ولا تهين نفسك ..وجبنا واحده ب 50 ريال (لاحظوا المفروض هي ببلاش اصلا )

حطينا الشنط (والحمد لله احنا شنطنا كانت لا تذكر كل واحد فينا انا وزوجي معاه شنطتين حجم صغير غيرنا كان جايب بلااااوي )
وبدأت رحلة البحث عن باب الدخول ،مشينا مسافه طويييييييييييييله لحد ما لقينا طابور طوييييييييييييييييييييييييييييييييييييييييل اكتر من نصه واقف في الشمس والمفروض اننا نقف في اخره 

فابما اني كنت واقعه علي رجلي ومش هاقدر اقف كل ده استأذنت من واحد نيجيري وقفني قدامه فابقيت في نص الطابور تقريبا ، نستني ان الطابور يتحرك لا ممكن ابدا 

يا عمي الطابور ده ماله واقف ليه ..... اتضح ان السير عطلان وانهم قافلين القاعه علي ما يخلصوا اللي جوه او يصلحوا السير لان الشنط بتتشال يدوي والعمال طالع عينهم فيها طبعا 

الناس اللي واقفه دي كان فيه منهم بقاله يوم واتنين بايتين في المطار ومنهم اللي كان دافع فرق فلوس عشان يرجع يوم 29 وطبعا كلهم علي اخرهم ومش مستحملين الهوا 

المهم نص ساعه او اكتر علي ما بدأ الطابور يتحرك ودخلونا اخيرا القاعه المكيفه اللي المفروض نوزن وناخد البوردينج منها 
وقفنا تاني طوابير لحد مانوصل الميزان ، بس الموظفين مش موجودين علي كل المنافذ برضو بسبب تكدس الشنط اللي بتتشال يدوي

شويه والطابور اللي انا فيه بدأ يتحرك ببطء والناس جايبه السعوديه كلها معاها دا غير مية زمزم
الموظف رفض يحط الميه في الطياره وقال كفاية العفش وبقت جراكن الميه مرميه في كل حته وبما ان الناس عاوزه تروّح وخلاص ماحدش كان بيتناقش ارمي يبقي ارمي ...وابص للميه وافتكر الصومال اللي الناس بتموت فيها ومش لاقيين نقطة الميه اللي احنا بنرميها بمنتهي البساطه دي 

واخيرا وصلنا للموظف .. طبعا لا وزن ولا ديالوا بيلزق ليبول علي الشنط ويديك الكارت اللي عليه رقم وميعاد الرحله وارقام الشنط وخلاص 
بعدها المفروض لو الطياره جاهزه ناخد الجواز والورقة دي ويتختموا وندخل عي الطياره بس طبعا ده ماحصلش ،جمعونا في منطقة جانبيه مافيهاش كراسي ولا فيها اي خدمات مجرد كافيتريا صغيره كده زي قلتها 
طبعا الناس قعدت علي الارض واللي كان معاه الكراسي الصغيره بتاع الصلاه فتحها وقعد عليها ، واحنا قعدنا علي السير العطلان ... اهو يبقي له لازمه 

نستني انهم يندهوا علي رحلتنا ...ابدا .....كل الارقام اللي قبلنا واللي بعدنا يندهوا عليها واحنا لا 
افارقه ..جزائرين ...جنوب شرق اسياويين .....كل الجنسيات واحنا قاعدين 

لحد ما واحد قام يصور وهددهم انه هايبعت الشريط للجزيره ...وشد معاهم والناس اتلمت وقعدت تزعق راحوا نادهين علي الرحله المنكوبه 658 
ختمولنا الجوازات ودخلونا علي المكان اللي هانتفتش فيه تفتيش ذاتي وبعده علي الطياره 
طوابير ..طوابير ..طوابير ... مابتنتهيش 

واخيرا ركبنا الاتوبيس اللي هايودينا علي الطياره ، ميشينا بيه مسافه طوييييييييييييله جدا (اتضح بعدها ان الطياره موجوده في مطار الملك عبد العزيز مش مدينة الحجاج  زي ما هانعرف بعد كده ) 
وشفت اكتر من 7 او 8 طيارات مصر للطيران موجوده علي الممرات ...دد كافي انه يحل الازمه بس مش عارفه هما واقفين  من غير ركاب ليه ؟؟؟

ركبنا الطياره متأخرين عن ميعاد البوردينج ساعتين بالظبط زي ماقالولنا قبل كده ان الرحلات كلها بتطلع متأخره ساعتين عن الميعاد بسب الدربكه اللي حاصله ، حمدت ربنا انهم مجرد ساعتين مش مشكله واحنا نيجي ايه في القاعدين بقالهم 48 ساعه .. الله يكون فعونهم

علي الطياره احلي معامله من طقم المضيفين وكمان كان معانا عقيد من الداخليه خلصلنا الاجراءات وختم الجوازات وكل الاجراءات التانيه بحيث ننزل مطار القاهره ناخد الشنط ونروّح 

الناس كلها ركبت ونستني انهم يطيروا مابيحصلش ، كنت جمب الشباك وجمبي المحرك الشمال شايفه ناس رايحه جايه عليه وشويه وفتحوه من الناحيتين وبعدها الطياره مشيت شويه لحد ماوصلت جمب حته زي الورش والمهندسين يروحوا ويجوا ومافيش فايده 
عشان الوقت يعدي طقم الضيافه نزلنا الاكل والشاي ونستني انهم يخلصوا مفيش فايده 

وبعد ركوبنا الطياره بساعتين قرروا ينزلونا منها لان المحرك عطلان ومحتاج قطعة غيار هايجيبوها من مصر علي الرحله اللي جايه 
طبعا حصلت مصيبه الناسماصدقوا يركبوا في طياره بعد كل الانتظار ده ، و مش راضيين ينزلوا الا اما يجيبولهم طياره غيرها واللي قررر ينزل سمع ما لا يرضي من اللي مش عاوزين ينزلوا والناس مسكت في بعضها ، وطبعا لازم يشتموا الثوره ماهي دي الشماعه اللي اي حد بيعلق عليها اي حاجه بتحصل 

واللي يقولك احنا شعب تييييييييييييت واللي يقولك اهو احنا كده عملنا زي بتوع التحرير اللي شالوا الريس وماعرفوش يجيبوا حد بداله وسابوا البلد تغرق طب كانوا يسيبوه يكمل مدته 
واللي يقولك ماهو اصلنا مابنعرفش نخطط لللي جاي قبل ما نشيل رجلنا من حته نشوف هانحطها فين ... كل ده وانا باسمع من هنا وطلع من هنا مش عاوزه العمره تبوظ وانا لسه حتي مارجعتش مصر 

المهم في الموضوع كله ان وضعنا بقي غريب جدا واخدين ختم مغادره من السعوديه وختم دخول مصر يعني احنا المفروض دلوقتي فمصر طب هانرجع مطار جدة تاني ازاي ؟؟ الله اعلم ؟؟

 نزلنا ركبونا اتوبيسات خدتنا علي مطارالملك عبد العزيز (الطياره كانت موجوده فيه من الاول )  في صالة ترانزيت نظيفه ومكيفه وفيها كراسي كتير وادونا كرت صعود طياره جديد وشويه وجابولنا وجبات ساخنه وميه ( سخنه برضو هههههههههه)

طبعا الناس زعقت واتشاكلت وليهم حق بقالهم يومين مرميين في المطار 

انا بقي كنت في قمة الاثاره .. حتة مغامره عمرها ما عدت عليا قبل كده 

اللي زود النرفزه عند الناس هما مسؤلي مصر للطيران في الاول قالوا اننا جاهزين للاقلاع مستنيين الاذن من السلطات السعوديه وهما مش راضيين يدوهولنا وده اللي خلا الناس ماتصدقش ان الطياره فيها عطل وانهم مش عارفين يصلحوها وخلي الناس تثور وماترداش تنزل منها


بعدما كل الركاب جم قالولنا ان الطياره هاتستني قطعة الغيار واننا هانركبها علي الساعه 4 الفجر ان شاء الله ، الناس ثارت وهاجت بس ماكنش قدامهم الا الرضوخ للامر الواقع فاللي قعد قعد واللي نام علي الارض نام واللي فضل واقف فضل 

اه نسيت اقولكوا كان معانا توانسه ونيجيريين نازلين ترانزيت لمطار القاهرة 



علي الساعه اربعه الا ربع الناس صبرها نفذ خصوصا اما شافوا مسؤول مصر للطيران قاموا عليه شتيمه وتهزيق وحسوا انه بيضحك عليهم وتدخل الامن السعودي لتهدأت الوضع واما اتهموهم ان التعطيل ده قرار سياسي سعودي رئيس الحرس اتنرفز وحلف ايمانات انه ده مش صحيح وانه الطياره كانت فعلا فيها عطل 



الغريب انهم كانوا بيرفضوا ان اي حد يصور اللي بيحصل او يسجل فيديو واي حد بيشوفوه بيمنعوه وبيمسحوا اللي معاه ... اي حد ماسك كاميرا او موبايل وبيصور كان بيعملهم ارتيكاريا .. طب خايفين من ايه دي كانت خناقه بين مصريين ومسؤول شركة مصريه .. مطاره جده ماله دا لو هو فعلا مالوش دعوه 
حاجه تانيه اترددت والله اعلم صح ولا اتهامات باطله ... قالوا ان قطعة الغيار دي كانت موجوده في جده بس هما رفضوا يدوها لمصر للطيران وده اللي عطلنا كل الوقت ده علي ما القطعه دي جت من القاهرة
 
بعض الناس اتصلت بالقنصليه المصرية في جدة وسمعوهم درر وعرفوهم ان فيه ناس بتموت فوسط الركاب 
وناس تانيه كلمت مكتب شركة مصر للطيران في القاهره وهددوهم انهم هايعملولهم مشاكل اما ينزلوا القاهرة

 ومافيش فايده 

كل ده ولا اكننا مصريين اصلا ولا اكن اللي بنكلمهم دول مسؤولين مصريين مافيش اي استجابه من اي حد كلهم حطين اديهم في الميه البارده ولا اكن المشكله تخصهم ولا تخص مواطنيين مصريين اصلا 

ده جزء بسيط اللي عرفت اصوره في الخباثه قبل ما يمنعوني لتاني مره 




وبعد ضغط الناس علي الساعه 4 ونص 



قرروا ينقلونا للطياره خصوصا ان كان فيه معانا اطفال وعواجيز منهم اللي دخل في كوما وهبوط حاد والدكتور جه اكتر من مره يشوف اكتر من حالة


وقفنا طابور اخير ونقلونا علي الطياره اللي الحمد لله اتحركت حوالي الساعه6 الفجر ووصنا القاهره سالمين ومعانا شنطنا  بالكامل 
الحمد لله 
وعقبال كل عمره واحنا طيبين 







2011-07-04

لؤي #freeloai





لؤي نجاتي مش بلطجي يا مجلس العسكر 



الحرية للؤي و لكل المعتقلين 

افرجوا عن ...مصر


2011-06-30

هو فيه إيه؟





اعتصامات واضرابات ..عمال بتطالب بحقوقها المهدره من عقود ...ويقولوا عليهم بلطجيه 

ناس غلابه حظهم ان بيوتهم اتهدت ..يوعدوهم بشقق جديده ويرجعوا فكلامهم ..يخرجوا يطالبوا بحقوقهم ...ويقولوا عليهم بلطجيه 

اللي قتلوا الشهداء يتكرموا .. ويترقوا .. ومرتباتهم تزيد ... ويتقال عليهم ابطال كانوا بيدافعوا عن اقسامهم ..والي ماتوا دول بلطجيه

محاكمات القتله تتأجل ...وتتأجل ...وتتأجل...يفرجوا عن القتله بضمان ويفضلوا في شغلهم ..ماهم ابطال ..قتلوا البلطجية 

اهالي الشهداء يتهانوا ويتبهدلوا ... واولادهم اللي فاضلينلهم من الدنيا يعتقلوا قدام عنيهم ... ويقولوا عليهم بلطجيه 

ناس مش عاجبها اللي بيحصل ..سرقه للثوره ..واهدار دم الشهداء ...واكل حق الفقراء..يتظاهروا ويعترضوا ..ينضرب عليهم غاز ومطاطي ..ويتقال عليهم بلطجيه 

الثوار في الميدان بيتهم الاول والاخير ...يتضربوا  ويتهانوا ...يعتقلوهم من الشوارع ...ويتقال عليهم بلطجيه

يخفضوا ميزانية الصحه والتعليم ..يعملوا خطة تقشف عام .. ووزارة الداخليه تطالب بزيادة ميزانيتها ..يشتروا قنابل مسيله للدموع انتاج مايو 2011 ...عشان يضربوها علي البلطجيه 

البلد بتغلي .....و الاشاعات ماليه الدنيا

الاخوان عاوزين الانتخابات الاول

والسلفيين عاوزين مرشحهم يبقي رئيس الجمهوريه

والليبراليين عاوزين الدستور الاول

والنخبه بايته في ستوديوهات التوك شو 


والثوار تايهين ومش ملاحقين علي الضربات اللي جيالهم من كل حته

ورئيس الوزراء سايب الدنيا تضرب تقلب ورايح غينيا يحضر قمة الاتحاد الأفريقى

ووزير الداخليه بيتفرج علي ماتش مالوش 30 لازمة 

والنائب العام راح يعمل عمره ويحضر غسيل الكعبة وسايب تل القضايا اللي علي دماغه

والمجلس العسكري واقف ورا الستاره بيضحك وعامل نفسه مش هنا 


والشعب لسه يريد اسقاط النظام  


2011-06-24

الفرسان

اكيد سمعت الكلمة دي قبل كده كتير 



طب تعرف مين الظباط دول ؟وهما فين دلوقتي ؟

شافوا الغلط قدام عنيهم وماسكتوش عليه زي كتير غيرهم خافوا علي نفسهم
ضحوا بكل حاجه في الدنيا عشان يوصلوا كلمة الحق ويسمع صوتهم كل الناس
  
نزلوا يعترفوا بالثوره وبمطالبها المشروعه ويطالبوا بكل اللي الناس طالبت بيه من محاكمة لرموز الفساد ومحاكمة قتله الثوار واسترداد الاموال المنهوبه ومجلس رئاسي مدني والافراج عن كل المعتقلين قبل وبعد 25 يناير

نزلوا رافعين شعار الجيش والشعب ايد واحده ومش ممكن اي حد يفرقهم،ماكنش ليهم مطالب خاصه ولاعاوزين يعملوا انقلاب علي الجيش زي ما اشيع عنهم ظلما وعدوانا 
نزلوا من غير سلاح فقط باللبس الميري رافعين كارنيهاتهم العسكريه عشان يأكدوا للجميع انهم من داخل الجيش ومازالوا في الخدمه مش زي ما اتقال انهم مفصولين
تفتكروا اللي عاوز يعمل انقلاب يعمل كده؟؟؟

كلنا شفناهم بعينيا اللي نزل الميدان يوم 8 ابريل واللي كان قاعد يتابع قدام شاشات التليفيزيون 

قرروا وقرر شرفاء الميدان انهم يعتصموا لحد ماتتنفذ مطالب الثورة واللي وقتها حتي تحويل رموز الفساد للنيابه ماكنش تم

ايه اللي حصل ياساده؟؟
 بعد اول دقيقه في حظر التجول حصل هجوم كاسح من الجيش وقواته الخاصه والامن الرمكزي لفض الميدان بالقوه مع اطلاق نار كثيف جدا ولا اكنها حرب
كلنا تابعناه علي الجزيره مباشر




وتم القبض عليهم من وسط المعتصمين بالقوه 


وتم محاكمتهم ومنهم اللي اتحكم عليه ب 10 سنين في السجن الحربي
 في الوقت اللي قتلة الثوار من ظباط الشرطه رجعوا اماكنهم ومرتباتهم تضاعفت ومنهم اللي اترقي 
في السجن 10 سنين و مبارك في شرم في مستشفي عشر نجوم وعصابته في بورتو طره معززين مكرمين-زي مابنسمع يعني ماهو احنا ماشوفناش بعنينا




الظباط دول يستحقوا مننا كل الدعم والتاييد والمطالبه بالافراج عنهم وعدم معاملتهم كانهم خونه 
دول واللي زيهم هما املنا في الخروج من الحفره اللي وقعنا فيها من يوم 11 فبراير ومش عارفين نخرج منها 


وزي ما الظباط والعساكر وقفوا جمب الشعب ال 18 يوم ورفضوا تنفيذ الاوامر بضرب الميدان
وكان ليهم فضل كبير في خلع مبارك من الحكم  برفضهم ضرب اخواتهم 
دلوقتي جه وقت رد الجميل  ليهم والوقوف جمبهم في محنتهم  والمطالبه بالافراج عنهم وعدم معاملتهم كخونه 
واكيد هايجي اليوم اللي تتكسر فيه اسوار السجون ويخرج منها كل الشرفاء المسجونين ظلما وعدوانا
ولحد ما اليوم ده يجي ان شاء الله عاوزاهم يقبلوا اسفي لان كل اللي فايدي دلوقتي هي مدونتي ان اكتب فيها واطالب بده  




افرجوا عن شرفاء الجيش 





2011-06-16

الاضراب مشروع مشروع .....ضد الفقر ضد الجوع





لن تستطيع ان تحبس الآآآآآآآه في صدور المرضي

 لن تستطيع أن تجرم البكاء علي الموتي 

 لن تستطيع أن  تمنع الهواء وتحرم الكلام 

 فأسهل لك انت تقتلنا لترغمنا علي الصمت التام 

 ستستمر الاعتصامات والمظاهرات والاحتجاجات المطالبه بالحقوق ،التي تسميها ظلما بالفئوية 

ومهما سُنت القوانين والتشريعات لن يتوقف احدنا عن الهتاف مطالبا بحقه الذي اهدر علي مدار السنوات ....ومازال 
حتي بعد ان قامت ثوره ضد القهر والظلم واهدار الحقوق ...مازالت تهدر الحقوق 

الثوره التي كان عمودها الفقري المظاهرات الاعتصامات والاضرابات هي من جاءت بكم لمقاعدكم ...ثم يكون اول القرارات قانون يجرمها !!!!؟؟؟




قانون مشبوه سن في الظلام وبدون اعلان ، بعد ان  احتج الجميع علي مرسومة وطالبوا بالغاؤه ، اذا بنا نفاجأ ذات ليلة انه قد تمت الموافقة عليه ونشر بالجريدة الرسمية في سرية تامة


قانون لا يتماشي مع حق الانسان في التظاهر السلمي والتعبير عن رأيه بحرية تامه  دون تعرضه للتخويف او التهديد او العنف 




كان من اهم مطالب ثورة 25 يناير العداله الاجتماعيه ومرعاة الفقراء وتحقيق توازن  بين الاسعار والرواتب


هؤلاء الفقراء من جاءوا بكم لمقاعدكم ..اصبحت مطالبهم  فئويه انتهازيه لا تراعي ظروف البلد ... اصبحوا ملاحقين امنيا 
 ومهددين بالسجن والغرامه لانهم يطالبون بما خرجوا ليطالبوا به في الخامس والعشرين من يناير 


عندما تنحي الطاغية اعتقد الجميع ان الحقوق ستعود لاصحابها ولن يكون هناك ظلم بعد اليوم ولكنها لم تعد فخرجوا يطالبون بها 


يخرجون للمطالبة بحقوقهم فيعاملون كبلطجيه قطاع طرق  مغضوب عليهم من الجميع

وهل لو كان احدهم يمتلك 50 الف جنيه (قيمة الغرامه المفترضه) هل كان سيخرج يوما من بيته ليطالب بشئ

كيف تريد من الناس ان يكفوا عن المطالبه بحقوقهم التي تسوف وتؤجل  ، بالرغم من وعودك الورديه بجعلها علي قمة اولوياتك

كيف تطالب احدهم ان ينتظر علي حقه- الذي لا تتحمله  ميزانية الدوله المنهكه بسبب تردي الاوضاع الاقتصاديه علي حد قولك - وهو يراك تقدم التسهيلات والتنازلات تلو الأخري لمن استولي علي خيرات هذا البد لسنوات وسنوات ولن يضره التنازل عن بعض ارباحه الخيالية - التي تتجاوز الحد الاقصي للارباح في اكبر دول العالم - ولو لحين 

تقترح فرض ضريبه علي الارباح الرأسمالية يتم الاحتجاج عليها فتستجيب الدوله 
فورا..اليست مطالب فئويه انانيه لا تهتم الا بمصلحة الاغنياء 


وحين تقترح حد ادني للأجور 700 -وهو اقل مما اقره حكم المحكمة الستوريه- فيعترض رجال الاعمال بحجج واهيه...ويهددون ان هذا القرار سيزيد نسبة البطاله ل 25% 


يخرج الفلاحون للمطالبة بتحسين ظروفهم وتمليكهم أراضيهم التي يزرعونها منذ عشرات السنين وتخفيض اسعار  الاسمده الزراعيه ورد الغرامات المحصله منهم بدون وجه حق ، فيتم القبض عليهم وتوجيه اتهامات لهم بالاعتداء على أمين شرطة وتكدير الأمن العام وحيازة أسلحة خشبية والتظاهر والتجمهر وتعطيل المرور


ويعتدي عليهم الامن المركزي بوقاحه وهمجية 



ثم يأمر النائب العام بالافراج عنهم بكفاله 10 الاف جنيه(وهل يملك فلاح بسيط ربع هذا المبلع) قبل ان يسقط الكفاله ويقرر اخلاء سبيلهم بضمان محل الاقامه بعد تضامن عدد  كبير من زملائهم  ومن النشطاء معهم


تعتقد الحكومه ان هؤلاء مجموعه من المنتفعين  الانتهازيين بالرغم من ان احتجاجاتهم في معظم الاحيان ماهي الا ثورات صغيره تكشف فساد زرعه النظام السابق في مفاصل الدوله - مصنع غزل شبين علي سبيل المثال  




واذا كانت الاعتصامات والمطالب تقض مضاجعكم فبدلا من تجريمها انظروا فيها وقوموا بتنفذها حتي  يعود الناس لاعمالهم ويتم الدفع بعجلة الانتاج المزعومه التي لا يستهويها الا ان تسير علي اعناق ملايين العمال 


فإننا وللمرة المليون لن نكف عن الصراخ والهتاف والمطالبه بحقوقنا المنهوبه مهما سُنت القوانين وفُرضت الغرامات 









2011-06-01

لا للمحاكمات العسكرية




 يومان واكثر استعد لكتابة هذه التدوينة عن المحاكمات العسكريه وانتهاكات النيابة والشرطة العسكرية 
شاهدت عشرات الفيديوهات من شهادات اهالي المحكومين باحكام عسكرية،او المفرج عنهم من قبل الشرطة العسكرية 
حكايات تدمي القلب 
قرأت تقارير المنظمات الحقوقية التي توثق ماحدث منذ الثامن والعشرين من يناير يوم نزول الجيش الي القاهرة وحتي الآن ،
 بعض التقارير تشير لاعداد كارثية -تتخطي ال5000 مدني -احيلوا لمحاكمات عسكرية 


اما منظمة العفو الدوليه فتحث الجيش المصري علي وقف العنف ضد المدنيين 




وبعد كل ما قرأت وشاهدت لم اجد ابلغ من كلمات الضحايا اوكلمات أهلهم تصف ماحدث ومازال يحدث في السجون العسكرية


اولا لتوضيخ الفرق بين المحاكمات العسكرية والمحاكمات المدنية شاهدوا هذا الفيديو 





وهذه بعض الشهادات التي تم توثيقها لبعض اهالي المحتجزين





ام احمد ومحمود نور الدين





والدة المعتقل محمد سعيد احداث السفارة الاسرائيلية 15 مايو 





اما اكبر الجرائم في حق المتظاهرين السلميين فكانت الانتهاكات التي حدثت في فض اعتصام 9 مارس بالقوه والتي اعتقل علي إثره حوالي 170 متظاهر من بينهم 17 فتاه اجبرن علي اجراء كشف للعذرية في الهايكستب
ومنذ ذلك الحين والمؤسسة العسكرية تنفي حدوث مثل هذا الفعل المشين حتي الأمس عندما نشرت السي ان ان بنسختيها الانجليزية   والعربية تحقيق يكشف اعتراف مسؤول عسكري بارز (لم يتم تحديد اسمه) أنه تم بالفعل اجبار الناشطات علي اجراء اختبارات العذرية


وتم إرفاق فيديو لإحدي ضحايا هذه الانتهاكات تحكي ما حدث معها









وهذه  نفس الفتاه سلوي حسيني تحكي ماحدث في مؤتمر لا للمحاكمات العسكريه بنقابة الصحفيين اواخر مارس الماضي







لمزيد من الشهادات المروعة يمكنكم الدخول علي يوتيوب 


هنا 


و 


هنا 




كل مطالبنا هو تحقيق العدالة والمحاكمات المنصفة امام قاضي مدني وليس عسكري
والافراج الفوري عن كافة معتقلي الرأي قبل وبعد 25 يناير
وإعادة محاكمة كل المحكوم عليهم بواسطة القضاء العسكري امام قاضي مدني يحدد ما اذا كانت التهم الموجهه اليهم صحيحه ام لا مع توفير محامين لهم


وذلك تطبيقا لنصوص الاعلان الدستوري الصادر في30 مارس 2011



المادة 8:


الحرية الشخصية حق طبيعى وهى مصونة لا تمس , وفيما عدا حالة التلبس لا يجوز القبض على أحد أو تفتيشه أو حبسه أو تقييد حريته بأى قيد أو منعه من التنقل إلا بأمر تستلزمه ضرورة التحقيق وصيانة أمن المجتمع , ويصدر هذا الأمر من القاضى المختص أو النيابة العامة , وذلك وفقا لأحكام القانون ، ويحدد القانون مدة الحبس الاحتياطى .

المادة 9:

كل مواطن يقبض عليه أو يحبس أو تقيد حريته بأى قيد تجب معاملته بما يحفظ عليه كرامة الإنسان , ولا يجوز إيذاؤه بدنيا أو معنويا , كما لا يجوز حجزه أو حبسه فى غير الأماكن الخاضعة للقوانين الصادرة بتنظيم السجون ، وكل قول يثبت أنه صدر من مواطن تحت وطأة شئ مما تقدم أو التهديد بشئ منه يهدر ولا يعول عليه.


المادة 20:

المتهم برئ حتى تثبت إدانته فى محاكمة قانونيه تكفل له فيها ضمانات الدفاع عن نفسه , وكل متهم فى جناية يجب أن يكون له محام يدافع عنه .

 المادة 21:

التقاضى حق مصون ومكفول للناس كافة , ولكل مواطن حق الالتجاء إلى قاضيه الطبيعى



المادة 22:

حق الدفاع أصالة أو بالوكالة مكفول ، ويكفل القانون لغير القادرين مالياً وسائل الالتجاء إلى القضاء والدفاع عن حقوقهم .





والله الموفق والمستعان 

القرآن الكريم