2008-10-10

ليلي ويا ليلي انا قلبي حاسس بيكي من ليله


حملة مع ليلي السنة دي شكلها هاتبقي جامده جدا ومختلفه تماما عن السنتين اللي فاتو والحمد لله تم استعادة المدونة الرئيسية لليلي بدون اي خسائر

من وقت ما قررت اني اشارك في يوم ليلي وانا بقيت بشوف كل اللي بيحصل قدامي و باسمعه بطريقه مختلفه (وده اصلا اللي حاصلي من اول ما بدأت ادون ) باحاول ارفع الغطا عن ليلي المستخبيه جوا كل واحده باتعامل معاها واللي ساعات بتعاند ومش بترضي تعترف انها ممكن تكون ليلي ولو حتي في جزء بسيط من حياتها ومع اختلاف الشخصيات والتفاصيل بيبقي في حد بيتعامل معاها علي انها ليلي

الاب .....الاخ...... الزوج ... مديرها في الشغل... زمايلها او حتي مامتهااو خالتها او عمتها اللي في الاصل هما كمان ليلي

ناس كتير فاكرين ان يوم ليلي ده في الاساس ضد الرجل واننا بنشاور فيه علي آدم وبنتهمه انه سبب كل اللي بيحصل لليلي ، وده مش صحيح بالمره

آدم بالنسبة ليلي مش هو العدو ولا هو منبع كل الشرور ، العدو هي تقاليد وعادات غلط كتير مترسخه في العقول من عقود وعقود فاتت الكل محافظ عليها وكأنها قرآن منزل ، وكل جيل يسلمها للجيل اللي بعده وياخد عليه العهد انه مايغيرهاش حتي لو كان بعضها مخالف للشريعه وللي امرنا به لله ( اقروا هنا عند بنت القمر )

الناس اللي زي دول بيفكروني بالآية الكريمة

"واذا قيل لهم تعالوا الى ما انزل الله والى الرسول قالوا حسبنا ما وجدنا عليه اباءنا اولو كان اباؤهم لا يعلمون شيئا ولا يهتدون " صدق الله العظيم

آدم بالنسبة ليلي هو رفيق الدرب اللي عايش معاها نفس معاناتها واللي بيطوله جزء كبير من المشاكل اللي ناس البلد دي كلها متشاركين فيها


ليلي مش عاوزه من آدم اكتر من انه يسمعلها ويقدر يفهمها ويتجاوب معاها ومايكونش ضدها علي طول الخط حتي لو من غير حق

-----------------------

ميني ليلي

اول مافتحت الصيدليه انهارده دخل راجل معاه طفلين ، بنت حوالي خمس سنين وولد حوالي 4 سنين ، طلب حقنة لقئ للبنت لانها مابطلتش ترجيع من الفجر وفعلا كان باين عليها لانها ماكانتش قادره تقف ولا حتي تفتح عينها تقريبا ضغطها كان واطي بسبب القئ المستمر

جبت الحقنه وانا بحضرها لقيته بيشخط فيها وبيتهمها انها السبب لانها زودت الاكل ولخبطت فيه كمان ، وبيامرها انها تدخل تاخد الحقنه بسرعه ( طيب كنت فين انت ولا مامتها )
فاطلبت منه انه يشيلها احسن عشان ما تتحركش واعرف اديها الحقنه ، لقيته بيبصلي بقرف ويقلي ماهي كبيره اهه اشيل ايه هي هاتعرف تقف
فقلتله خلاص ادخل حضرتك امسكها عشان ماتتحركش ، المهم ان البنت اول ما بدأت تعيط وتتحرك حركه بسيطه ( وده عادي متعودين عليه من كل الاطفال في السن ده او اكبر ) نزل فيها ضرب وشتيمه ......ويا سيدي يهديك يرضيك مافيش فايده

بعد كده طلعلي حقنتين تانيين عاوزني اديهم للولد ، وياسلام علي الفرق ، شتان في المعامله ، شال الولد وقعد يتبطب عليه ومعلش يا حبيبي ده طنط اديها خفيفه وماتخفش .....الخ

بصراحه يعني كان هاين عليا اديله كلمتين في جنابه بس قلت اقصر الشر

لما هو بيعاملها كده وهي طفله وعيانه ومش قادره تقف ، امال لما تكبر شويه وتغلط غلطه صغيره هايعمل فيها ايه !!!؟؟؟؟؟؟

ولك الله يا كل ليلي تعانين في صمت




33 comments:

AD sabry يقول...

about mini laila this
remembering of something similar happened


i'll write about it in my blog

خمسة فضفضة يقول...

السلام عليكم ورحمة الله وبركاته

AD sabry

خلاص وانا هاستني اقراها هناك
بس رحت احترت افتح انهي بلوج في الموجودين


نورتيني

بنت القمر يقول...

:((
كنتي سميتي بدنه بعد ما حاسبتيه
!!

karakib يقول...

هو اصلا معتبرها غلطة
مراته لما خلفت بنت كانت غلطة
في واحد فقران مخلف سبع محرمين اعرفه
فخور اوي بأنه خلفته كلها رجاله !!

الطائر الحزين يقول...

بس لو كان الولد هو اللى كان عمل كدة كان تصرفة اكيد هيبقى نفسش التصرف
======

هى محاولات لترييح الدماغ والقاء المسئولية على الغير

صيدلانيه طالعه نازله يقول...

ازيك يا جميله و كل سنه و انتى طيبه و حمد الله على السلامه
بالنسبه لموضوع مينى ليلى آباءكتير بتعامل بناتها بنفس الطريقه و اسوأ كمان و للاسف بشوف امهات كتير بتعمل زى الرجاله و اكتر و بستغرب من ده قوى يعنى لو ام كانوا بيعاملوها كده و هيا صغيره المفروض تتجنب ده مع بنتها بس الظاهر انها بتبقى عقده عندها و نظام اشمعنى اهلى عملوا كده زمان و انا مش اقل منهم
للاسف الاسوياء فى مجتمعنا بقوا القله و الاغلبيه هم المعقدين و المكلكعين نفسيا
ربنا يهدى الناس كلها
قولى آآآآآآآآآآآمييييييييييين

kafrawy يقول...

و الله يمكن الراجل كان نفسته تعبانة شويه من البنت ولا حاجه

ربنا يهدى

صبرني يارب يقول...

بصي يا فضفضه للاسف احنا كمجتمع مصممين على ان ليلى تفضلي مواطنه من الدرجه التانيه
فى البيت وفي الشغل وفى الشارع

هاروح اشوف ايه موضوع ليلى بقى

مهندس مصري يقول...

كان المفروض إديتي له الكلمتين على دماغه
ده صنف ما يجيش غير بالعين الحمرا

يَحيى المِصري يقول...

أنا مخنوق أوي من الراجل اللي في الصيدلية
ممكن تجيبيهول أتخانق معاه

أنسانة-شوية وشوية يقول...

بصراحة انت صبورة اكثر من اللازم انا لو كان اتعامل معاه بالشكل ده قدامى مش متخيلة ممكن انا اتعامل معاه ازاى بجد جسمى كله اقشعر من الكلام اللي انت كاتباه فما بالك لو حصل بالفعل امامى. ربنا يزيدك من فضلة . اما بالنسبة لليلي فمعتقدش اى واحد في الوطن العربي كله مش ليلي في اى جزء من حياتها، وانت عندك حق مش الراجل العدو ليلي نفسها عدو نفسها بالتربية اللي طلعنا لقينا امهاتنا بتعامل الاولاد ازاى وانهم مصرين نعامل الاولاد زيهم وهكذا....

لماضة يقول...

والله بيحصل كتير
ان شاء الله هكتب برضه احد المواقف اللى وجعتنى
بس انا لو مكانك كنت هوبخ الراجل ده

ibn_abdel_aziz يقول...

اتمني ان موقف الراجل ده مهما كان سئ تجاه بنته انه يكون موقف مبني علي ضيق مؤقت منها مش عشان هيا بنت يمكن عشان هو مش طايق تعقيدات حالها وربما كان الولد حالته زيها كان برضه بقي مقريف

بس برضة متغاظ منه قوي
لانه في النهاية أساء اليها جدا
ولو كان ولدا ايضا الذي اساء اليه بهذه الطريقة لتضايقت اشد الضيق

حسبي الله ونعم الوكيل
ما هذه القلوب التي لا رحمة فيها

وميض ابتسامة يقول...

معقول لسة فى اباء بهذه القلوب الغليظة وهذه المشاعر المستفزة ..
بصراحة مشاعره تجاه ابنته غير مفهومة خصوصا انه اظهر ودا وحبا لابنه فى نفس التوقيت وهذا ملوش غير معنى واحد ..
الراجل ده عنده خلل ومش طبيعى!!

هل الرحمه بداخله للولد دون البنت ؟؟
حالة نادرة ومستفزة .. ولايوجد لها عندى اى تفسير؟

تحياتى

كراكيب عادل يقول...

الرحمة ثم الرحمة عندما تنزع من القلوب

يحصل اي شئ

عمرة مقبولة مع انها متاخرة شوية

sampateek يقول...

اديلي ايميل الراجل الشرس ده و انا ابعت له ايميل زي وشه
هههههههه
و لا اقولك اقصر الشر انا كمان ما انا كمان ليلى


تحياتي

عصفور المدينة يقول...

الله المستعان يمكن ييجي يوم وتخلص النوعية دي

son's egypt يقول...

السلام عليكم
ادم وليلي اتنين بيكملوا بعض في الحياة
لا ادم يقدر يعيش من غير ليلي
ولا ليلي تقدر تعيش من غير ادم
بس ازاي يقدروا يعيشوا مع بعض من غير ما حد يجي علي حق التاني
هو ده فعلاالسؤال؟

ابو اعصار يقول...

اول زيارة لمدونتك وان شاء الله متكررة بس عاوزك اقلك نصيحة
بعد كده جيبي مسدس غير محشو بالرصاص عشان النوعيات ده بتكون عندها مرض نفسي ومحتاج لبعض الصدمات طبعا انا بمزح ده تعبيرا عن غضبي لا اكتر
والف شكر على الموضوع

خمسة فضفضة يقول...

السلام عليكم ورحمة الله وبركاته


بنت القمر

كنا لسه الصبح و قلت اقصر الشر
بس استفزني جدا

خمسة فضفضة يقول...

السلام عليكم ورحمة الله وبركاته

هاني (كراكيب )

ومش عارفين هايقدر يصلح الغلطه دي امتي ولا ازاي

ربنا يستر علي البنيه


سلام

خمسة فضفضة يقول...

السلام عليكم ورحمة الله وبركاته

الطائر الحزين

لا ماعتقدتش

اصلك ماشفتش منظره ولا الطريقه اللي قعد يضرب بيها البنت مع انها مالحقتش تتحرك ولا تتنفس
دي في عيال بيبهدلوا الدنيا واهلهم ولا في دماغهم

خمسة فضفضة يقول...

السلام عليكم ورحمة الله وبركاته

صيدلانية طالعه نازله

عندك حق
الامهات بتمارس عقدة الاضطهاد اللي عندهم علي بناتهم مع ان المفروض يحصل العكس وماتحاولش انها تعرض بنتها لنفس اللي هي اتعرضت له


ربنا يهدينا ويهدي الجميع

خمسة فضفضة يقول...

السلام عليكم ورحمة الله وبركاته

كفراوي

يمكن
بس ده ما يشفعلوش انه يعمل كده
وماتنساش ان دي مجرد طفله 5 سنين

عاشــــــ النقاب ـقــــة"نونو" يقول...

بتهزري صح؟؟
معقول فيه اب بيعمل كدة في بنته
معلش دة عاوز الحرق تصدقي
ولا اقول ايه
يمكن معتبرها كبيرة والواد صغير
لازم احسن الظن
لحسن مش بعيد اجيلك وادور عليه وابلغ عنه
حمد الله على السلامة
الغيبة طالت

الربان يقول...

تحياتي

- اشكرك كل الشكر علي مواساتك الكريمة ...لا اراكم الله مكروها في عزيز لديكم.

- بالنسبة لموضوع ليلي...هي السكن و المودة و الرحمة...و كذلك الرجل بالنسبة لها...و خارج هذه الاطر السماوية ستجدي حياة بائسة يائسة.

- بالنسبة لموضوع التفرقة في المعاملة بين الولد و البنت...ارجو الا يندم عليهامستقبلا ...لان حنان البنت و رفقها بأبيها لا يعادله شيء...
و الامر الاخطر من هذا...حين يلقي رب العالمين و يري الظلم الذي اقترفه.

تحياتي و شكري و تقديري

البحث عن الذات يقول...

والله دي حاجه تحرق الدم وتفوره

الموضوع مش موضوع بنت وولد بس الموضوع افكار ونظره
ابنك كان او بنتك ماله بتعمله بطريقه غبيه كده ليه والنصيبه ف صاحبنا انه قرفان م البيت طيب اتجوزت واحده ليه والا انت بتنظر ليها كوسيله للانجاب
ناس بتفكر بطريقه غريبه
انا كنت فاكرهم انقرضو بتوع الواد والبنت دوول

وعجبي...

أحلى حياة يقول...

ايه دا حرام عليه بجد التفريق في المعامله دا، دي حتى لو مش بنته زي ماهو ابنه مايعاملهاش هي بالطريقه دي ويعامله بعد كده هو بالطريقه دي قدامها عشان مايجرحهاش ويحسسها بفرق، فمابال بقى لو الاتنين ولاده
وحتى لو مش قدام بعض الاتنين او مع بعض في بردو حاجه اسمها رحمه ورقة وحنية وخصوصا في حالتها دي.

بجد حسبنا الله ونعم الوكيل

koukawy يقول...

بكره كره العمه التفرقه في التربيه و الدلع بين البنت و الولد

تسـنيم يقول...

معلش بقى انتي غلطانة أووي وظلمتي البنت الصغيرة زيه بالظبط لما سكيتيلوا


البوستات مش هتعمل حاجة يا دكتورة كل سنة نقعد نعمل حملة كلنا ليلى ولما يحصل موقف قدمنا نتخرس ونقول نقصر الشر أحسن


بذمتك كده البنوتة دي استفادت ايييييييه من بوست حضرتك والا من الحملة اذا كنت شوفتيها قدامك بتتضرب وتتبهدل وسكتي وقولتي لما أروح هبقى أعمل بوست ميني ليلى

الفقيرة إلى الله أم البنات يقول...

حسبى الله ونعم الوكيل
ويوما ما يمرض لا تهتم بيه سوى هذه الصغيرة التى بدل من تجده يضمها لبيعد عنها خوفها يصفعها
وكم من هذه الاصناف التى يقال لهم بشر وهم حجارة واشد قسوة

عاقلة علي ارض الجنون يقول...

دمي اتحررررررررررررق

آآآآآه يانا

نعكشة يقول...

عقوق الاباء

اعتقدانه لازم يديها حقها عشان لما تكبر متعيقوش

ربنا يسامحه
و يهديه
عشانها
وعشانه

ربنا يعافينا

سلام عليكِ

القرآن الكريم