2008-10-16

عن عمرة رمضان احدثكم "1"




كانت من اجمل الايام اللي عشتها علي الاطلاق ، متعه مابعدها متعه ولا يمكن ان يضاهيها شئ
مع كل الحر والزحام والمسافات الطويله ، بس كان نفسي تطول بعدد سنين العمر وما تنتهيش ابدا ، كنت حاسه اني جوا حلم جميل مش عاوزه اصحي منه ابدا

حصلت شوية حاجات اخرت سفرنا لقرب نص رمضان بعد ماكان المفروض اننا نسافر قبل كده بشويه ،بس الحمد لله حجز التذاكر ومواعيدها كان مظبوط بالثانيه ومحصلناش اللي بنسمع عنه من ركنه في المطار باليوم والاتنين ودي الحاجه اللي كنت خايفه منها جدا بعد اللي سمعت انه حصل السنة اللي فاتت

وصلنا المدينه قرب اذان المغرب احساس غريب اول ما تخرج من باب المطار وتحضن عينيك مدينة رسول الله صلي الله عليه وسلم ، تحس ان روحه عليه الصلاة والسلام موجود حوليك في كل حته ، في وشوش الناس اللي علي طول بتقابلك بالابتسامه ، في الهوا ولون السما، في صوت الاذان، في شكل المسجد النبوي الرائع بساحاته الواسعه ومآذنه الجميله

بتحس شعور بالهدوء والصفاء والسكينه ، شعور بالسلام والامان .....من الآخر كده شعور مش قادره اوصفه

اول ماوصلنا الفندق وشفنا شكل الحرم اللي كان علي بعد خطوات ماقدرناش نصبر حطينا الشنط ونزلنا جري عشان نلحق نصلي المغرب قبل اذان العشاء


اول ما تدخل المسجد النبوي بتشعر برهبه فظيعه وقشعريره ماليه جسمك كله ، عنيك تدمع وضربات قلبك تزيد لما تحس انه عليه الصلاة والسلام شايفك وسامعك وحاسس بكل حاجه بتعملها

طبعا المسجد كان زحمه جدا جدا ومافيهوش موضع لقدم ، وتتعجب من كمية الاجناس المختلفه الموجوده ، ايرانيين وجنوب شرق آسياويين وباكستانيين وهنود واتراك وحتي انجليز دا غير الجنسيات العربيه اللي كان اكترهم المصريين اللي يحسسوك انك دخلت مسجد في القاهره مش في المدينه :)))))))
وسبحان الله اللي جمع بين كل الناس دول علي كلمة لا اله الا الله محمد رسول الله

الحمد لله قدرت اني الاقي مكان صغنن كده جمب شوية سيدات فلسطينيات علي ما اعتقد صليت فيه المغرب وقعدت استني العشاء والتراويح ، وياسبحان الله فعلا ربنا بيوسع الارض للمصلين ، المكان ده بصلي في اده تلات اربع مرات في البيت :))))


يلفت نظرك اول ماتدخل الحرم النبوي جمال العماره الداخليه وزخرفة الاعمده الكتيره ، والقباب المتحركه اللي بتقفل وتفتح في اوقات معينه والنجف والثريات الرائعه


وكمان منطقة المظلات الموجوده في بعض اجزاء من الساحه ( امام القبه الخضراء ) وداخل الحرم نفسه فيه منطقة مكشوفه بتفتح بالنهار وتغلق بالليل ( بتشبه الشمسيات العادية بس بالكهرباء وفيه مشروع دلوقتي لتعميمها علي كل ساحة الحرم النبوي وبناء مثلها في صحن الكعبة كمان )
دا غير الارضيات الرخام الناصع البياض سواء داخل الحرم او في ساحاته ، كنت بزداد فخر لما كنت ببص لكل ده وانا عارفه ان اللي اشرف علي التوسعه والبناء الجميل ده شيخ المعماريين واستاذ الاجيال الدكتور مهندس محمد كمال اسماعيل المصري الجنسيه ، ويمكن تنبهروا لما تعرفوا ان مساحة الحرم النبوي الحاليه مع ساحاته بتعادل مساحة المدينة المنوره علي ايام الرسول صلي الله عليه وسلم





المظلات الكهربائية

بعد صلاة التراويح اول يوم وصولنا وبالرغم من كم الارهاق اللي كنا عليه الا اننا ماجلناش نوم من كتر الفرحه مجرد ساعتين تلاته وبعدهم نزلنا عشان صلاة الفجر وما قدرتش اصبر علي زياره حبيبي رسول الله صلي الله عليه وسلم ، سألت علي مواعيد الزياره للنساء فعرفت انها بتبقي من الساعه 7.5 صباحا حتي الساعه 10 صباحا ، بعد كده عرفت انها كمان من الساعه 12 مساءا بعد صلاة التراويح وده كان معاد لسه جديد وبدأوا يطبقوه السنه دي بعد ما الملك عبدالله قرر ان الحرم النبوي زي الكعبه مايتقفلش اربعه وعشرين ساعه


القبة الخضاء واسفلها قبر الرسول صلي الله عليه وسلم

صليت الفجر وفضلت في المسجد لحد بعد الشروق بتلت ساعه عشان اصلي الضحي وبعدها انطلقت لزيارة اشرف خلق لله ، مكان الدخول كان بعيد بس كله يهون

الدخول بيكون من باب عثمان ابن عفان ( باب رقم 25 ) يتم اولا تجميع النساء خلف بوابات خشبيه بتقسم الحرم وبتفصل النساء عن مكان الرجال بعد فتره بيفتحوا البوابات دي عشان نوصل لساتر من القماش يفصلنا عن الروضه امامه يتم تقسيم النساء علي حسب الجنسيه ، كل بلد او منطقه مع بعض
بعدها المفروض انهم يفتحوا الستاير دي عشان ندخل عند الوضه الشريفه بس برضو بيبقي فيه فاصل من قماش ابيض بينا وبين قبرخير المرسلين صلي الله عليه وسلم

واللي اعرفه انه من حوالي 3 او اربع سنين الستاره دي ماكانتش بتبقي موجوده

زعلت جدا لما فضلوا مقعدينا اكتر من ساعه ونص علي ما فتحولنا ندخل الروضه بسبب الزحام الرهيب وتدافع الستات وصوتهم العالي وعدم التزامهم بالتعليمات ، بس اللي خفف من زعلي شويه ان اول مافتحوا كان من ناحية المصريين لانهم كانوا الاكتر التزام
المهم اني اشتكيتهم لرسول الله واشهدته عليهم وعلي الذل اللي بيذلوهولنا لحد ما يخلونا نوصله ونسلم عليه ونصلي بجواره:))

اخيرا وبعد عناء قدرت اني اوصل لحد السجاجيد الخضراء اللي هي علامة اني بكده موجوده داخل الروضه وكانت المشكله الكبري ان الاقي ولو خمسه مللي عشان اصلي ركعتين في الجنه (( مابين بيتي ومنبري روضه من رياض الجنه))

وماتعرفوش ازاي سبحان الله زي ماتكون الارض انشقت عن مساحه صغيره جدا صليت فيها وكنت باسجد بين اقدام الستات وعلي اجسامهم بس الحمد لله صليت ،

احساسك وانت في الروضه احساس فوق الوصف مش بتبقي حاسس بنفسك ولا بالدموع وهي نازله من عنيك ومش عارف توقفها ، ومع كل الزحمه اللي حواليك بتبقي حاسس انك لوحدك واقف بين يدي رسول الله صلي الله عليه وسلم وبتناجيه وتسلم عليه وهو بيرد عليك السلام (ما من أحد يسلم على إلا رد الله على روحى أرد عليه السلام) واقف في المكان اللي شهد نزول الوحي واللي فيه كان رسولنا الحبيب بيضع لبنات هذه الامه
هنا تم التخطيط الاعظم الغزوات واكبر الفتوحات ،هنا كان الصحابه بيلتفوا حول رسول الله صلي الله عليه وسلم لما كان بيحطلهم اسس وتعاليم دينهم
هنا حصلت معظم الاحداث اللي بنقراها في آيات القرآن ، هنا ثاني اعظم مكان علي وجه الارض بعد الكعبة المكرمة
وهنا تم بناء خير امة اخرجت للناس

بس اللي دايقني فعلا هما الستات اللي ماكانوش مراعيين حرمة المكان ولا عظمة صاحب المكان والتدافع اللي كان حاصل والصوت العالي ، وكانهم مش حاسين انهم فعلا في حته من الجنه ولا بين يدي رسول الله صلي الله عليه وسلم
مش عارفين ان (إن حرمته صلي الله عليه وسلم ميتا كحرمته حيا) ربنا يهدينا ويهدي الجميع

سبحان الله في طريق العوده من الروضه الي الفندق حسيت ان المسافه طويله وان المشوار متعب فانا برجع من باب 25 لباب 7 يعني تقريبا كيلو او اكتر مشي ، مع اني لسه رايحه نفس المسافه و ماحسيتش باي تعب وكأن قبر الرسول صلي الله عليه وسلم زي مغناطيس بيشدك ليه وبيسهل عليك خطواتك وبيخليك مش حاسس ببعد المسافه

و دا كان نفس الاحساس اللي كنت باحس بيه في طريق الذهاب والعوده من الكعبة








عدة لقطات من داخل الروضة الشريفه


تاني يوم نظمولنا رحله لمزارات المدينة الساعه 7 صباحا ، مسجد قباء ومسجد ذو القبلتين وجبل احد ومطبعة المصحف الشريف
اما البقيع فاده كان علي بعد امتار قليلة من الفندق فقالوا اللي عاوز يزوره يروح لوحده

ده مسجد ذو القبلتين واللي فيه تم تحويل القبله من بيت المقدس للكعبه ، والمسجده ده هو الوحيد اللي اتصلت فيه صلاه واحده علي القبلتين ، لاحظوا في الصوره القبه والمدنه دول هما القبلتين


مسجد ذو القبلتين


القبلة الحالية للمسجد اتجاه الكعبة المشرفة بمكة المكرمة

القبله القديمه في اتجاه بيت المقدس وتمت ازالتها ووضعوا مكانها رمز فقط


ومن اشهر المزارات هو جبل احد وجمبه جبل الرماه ومقبرة شهداء احد وعليه نتذكر موقعة احد العظيمه ومقولته الشهيره صلي الله عليه وسلم " احد جبل يحبنا ونحبه "

وكمان " أثبت أحد إنما عليك نبي وصديقٌ وشهيدان " يقصد سيدنا ابو بكر وسيدنا عثمان وسيدنا عمر رضي الله عنهم


مشرف الرحله قال انه تم تصوير قمم جبل احد بالاقمار الصناعيه ووجد انها متشابكه وتكتب كلمة محمد رسول الله بصراحه كنت اول مره اسمع كده ومش متأكده من صحة الكلام ده

جبل احد

مقابر شهداء احد



و رحنا مسجد قباء وده كان اول مسجد بني في الاسلام وصلاة ركعتين فيه بتعدل عمره

قال صلى الله عليه وسلم " صلاة في مسجد قباء تعدل عمرة"

وبصراحه هي دي الحاجه الوحيده اللي خلتني اروح المزارات مع المجموعه خصوصا ان ماكنتش نمت تقريبا بقالي يومين


مسجد قباء































رحنا كمان مطبعة المصحف الشريف بس اتغظت جدا ومشرف الرحله بيقول ان الدخول للرجال فقط والنساء يمتنعون ؟؟؟!!!!!ومش قادره احدد سبب لده لحد دلوقتي ، اعتقد ان لو كان بأديهم كانوا منعوا الستات من دخول كل الاماكن حتي الكعبه والحرم النبوي







وفي المطبعه دي بيدوا لكل زايرهديه مصحف المدينه من الحجم والقراءة اللي يختارها ومش اكتر من واحد


قعدنا في المدينة حوالي اسبوع وصلينا صلاة جمعه واحده يوم 19 رمضان، صليتها في الساحه اللي اعتقد ان درجة حرارتها كانت تتعدي الخمسين مع انهم كانوا بيقولوا اربعين ،فضلت الآية الكريمه " قل نار جهنم اشد حرا لو كانوا يفقهون " تتردد جوايا و افتكرت يوم القيامه والحر الشديد اللي فيه والعرق اللي ممكن يوصل لحد الاعناق ،واقعدت ادعي يارب اظلنا بظلك يوم لا ظل الا ظلك واللهم اوردنا علي حوض نبيك محمد صلي الله عليه وسلم و اسقنا من يد الشريفه شربة ماء لا نظمأ بعدها ابدا


تاني يوم ( السبت عشرين رمضان ) توجهنا لابيار علي عشان نحرم ونصلي ركعتين الاحرام ونتوجه لمكه لاداء مناسك العمره

ودي هايبقي ليها موضوع منفصل ان شاء الله


-----------------------------

الصور كلها من تصوير زوجي ماعادا الصوره الخارجيه لمسجد قباء والصوره الخارجيه للمسجد النبوي


---------------

عن عمرة رمضان احدثكم "2"


عن عمرة رمضان احدثكم "3"


15 comments:

الفقيرة إلى الله أم البنات يقول...

حمد الله على السلامه
عمرة مقبوله إن شاء الله
اشعلت الشوق فى قلبى
والله لما قرأت ما كتبتى عدت اتذكر ايام عمرتى الاولى منذ حوالى شهرين
وكلماتك عن الزيارة والصلاة فى الروضه
قالت لى إحدى صديقاتى السعوديات
ان الروضه من ناحية النساء فقط اول صف من السجاده
ولان النساء غير ملتزمات ورايت بعينى ما كتبتى..وكنت احاول اساعد البعض حتى لا يدهسوا...اذن باقى السجاده الخضراء ليست الروضه
ولكنى صليت وانا احسبها كذلك فقالت لى خفت عليك ان قلت لك انها أول صف يصيب مكروه من الزحام
حبيتى..انا كنت خجلانه من ما تصنعه السيدات هناك وخاصة العراقيات والايرانيات....كانوا يدفعونا دفع وكادوا ان يعبروا خلالنا
واكثر نساء طيبه وغلب المصريات
واشدهم العراقيات والايرانيات ثم الهنود
كنت اود ان اكتب تدوينه عن تأملات فى رحلة العمرة ولكن جاء الحبيب رمضان فلم استطيع
ويوما سأمتبها واقوم بوضع الصور التى التقطها هناك
واخبرك كيف هم لطفاء الباكستنياتوما تفعله بعض المصريات



حبيبتى حمد لله عودتك سالمه
والعام القادمه يرزقنا واياك وكل مشتاق

~*§¦§ Appy §¦§*~ يقول...

ربنا يتقبل منك يا رب
وعقبالى ادعيلى بتمناها بجد
اوى
حسستينى بيها وعنيه دمعت
كمان مبروك اللوك الجديد حلو اوى

خمسة فضفضة يقول...

السلام عليكم ورحمة الله وبركاته

حبيبتي ام البنات

ربنا يكتبهالنا يارب مرات ومرات ونبقي صحبه ،ومايحرمناش من الزياره ابدا ماحيينا

اول مره اسمع موضوع ان الروضه هي بس من اول صف ،بس انا سألت المشرفه شاورتلي علي عمود كده وقالتلي من اول هنا ، حتي قلتلها دي امانه هاتتسألي عليها يوم القيامه زعلت جدا وقالتلي وانا هاكذب عليكِ ليه ؟؟؟

عموما ربنايتقبل من الجميع يارب

عارفه وبرضو سمعت ان حجر اسماعيل الجزء اللي من الكعبه هو اللي قدام بس ، وبرضو كنت صليت ورا علي اساس ان الستات المفروض يبقو خلف الرجال
بس ان شاء الله لو ربنا كتبهالي تاني هاحرص علي اني اصلي قدام وان شاء الله اخلي زوجي يقف خلفي


نورتيني وكل سنة وانت طيبه

خمسة فضفضة يقول...

السلام عليكم ورحمة الله وبركاته

آبي الجميله

اللهم آمين وربنا يتقبل من الجميع

كل سنة وانت طيبه يا قمر ويارب يكتبلك العمره والحج وينولك كل اللي تتمنيه

نورتيني

بنت القمر يقول...

الف الف مبروك
مبسوطه انك مبسوطه
وعقبال الحج
كويس انك لاحظتي التحيز ضد الستات
وكويس انك لحقتي الروضه
ولعلمك السعوديين بيكسبوا بالهبل من الحج والعمرة مش زي ما بيشيعوا بيصرفوا عليه
شوفي انتي فلوس الاتوبيسات والفنادق والضرايب والمطاعم والحركه في السوق وغيره
بقي انتي رحتي اشتكيتي منهم للرسول يا اختي كنتي دعيتي لنفسك
ده انا لو رحت عندي لستتتته طلبات كنت ها ادعي بيها يا رب تكوني افتكرتينا بدعوة هناك
حمد الله علي سلامتك وانزلي بقي بالجزء التاني واحداث الرحله

انكسارات .. احمد البوهى يقول...

ما شاء الله
ــ
والله والله اول ماقريت عنوان البوست حسيت انى عايز اروح اعمل عمره حالا
ــــ
ربنا يتقبل منك يارب

وميض ابتسامة يقول...

كنت انتظر هذا المقال عن زيارتك للعمرة وبعد الحمد الله على سلامتك احب اقول انى استمتعت بوصفك وشرحك وتعليقك وتحديدا زيارتك للمدينة ولن تندهشى اذا علمت ان مشاعرك تجاه المدينة هى مشاعر معظم من زاروها ..مشاعر الامان والاطمئنان والرغبة الملحة بقضاء ماتبقى من العمر فى رحاب رسول الله (صلى) ومسجده

اللهم اوعدنا مرات ومرات لزيارة الكعبة ومسجد رسول الله (صلى)
آمين

Nagdi يقول...

hi,
i was also there i think in the same time like u , but i missed that u write how generous was the peaple of Medina
thank u very much
Nagdi

مهندس مصري يقول...

تقبل الله يا دكتورة
انا كتبت عن عمرة رمضان عندي برضه و مليتها صور
بس عمرة الداخل بتكون 3 ايام بس و اغلبهم سفر في الاتوبيس فمبنلحقش نستمتع زيكم كده
إستمتعت بكل كلمة كتبتيها و منتظر ارجع للأماكن الطاهرة دي في الحج ان شاء الله
و بالنسبة لجبل احد حضرتك ممكن تشوفيه على جوجل ايرث
صورته على ما انا فاكر عادية و مفيهاش اي كتابة
:)
تقبل الله منك و من زوجك يا دكتورة

Gannah يقول...

تقبل الله منك واعادك الى مكة والمدينة مرات ومرات
الصور رائعة بارك الله فى زوجك
اما عن الروضة ففعلا سلوكيات السيدات بتخلى الواحد زعلان جدااا
والزحام الشديد بيخلى الاستمتاع بالروضة يقل
انا نفسى مرة اروح وادخل من مكان الرجال
بصراحة هما مستمتعين جدااا بالروضة
الحمد لله وبارك الله فيمن اشرف على التوسعة وفى المهندس المصرى الذى الهمه الله هذا التصميم الرائع
تقبلى تحياتى

عصفور المدينة يقول...

تقبل الله منكم

ولكن هل كتبت ذلك هناك أم أنك ظظلت مستحضرة تلك الأحاسيس

mostafa rayan يقول...

جزاك الله خيراعلى هذا الوصف الرائع
تقبل الله منك ومن زوجك ورزقنا جميعا هذه الزيارة فهي احب مكان يمكنان يراه الأنسان ويشاهده
تحياتي لك ودمت بكل الخير

دعاء مواجهات يقول...

الف حمدلله ع سلامتك ياقمر

وربنا يتقبلمنك ياارب

انا كما ن مشتاقهاوى اروح تانى
ونفسى اوى تكون فى رمضان

سلام

غير معرف يقول...

بسم الله الرحمن الرحيم
أختي العزيزة ساءني حديثكم عن المملكة بهذة الطريقة..
أسألك بالله هل ما تكسبه مصر من السياحة يعادل مدخول المملكة من الحج؟
و مع ذلك هل تنفق مصر على آثارها ما تنفقه المملكة على الحرمين؟
لا أتحدث من باب المنة ولكن من باب تشرفنا بوجود الحرمين في بلادنا..
أختي هل لاحظت برودة الرخام في صحن الحرم المكي في عز الصيف؟
هل لاحظت جمال الزخارف في الحرمين؟
هل لاحظت المظلات؟ المراوح؟
هل من المعقول أن يصلي في ذلك المكان 3 ملايين مصلي في يوم واحد وأن لا يكون هناك بعض الأخطاء؟
أختي هل فكرتي في أن منعكم من دخول المطبعة كان بسبب كون موظفيها من الذكور؟ ولرغبتهم في عدم الاختلاط منعوا النساء؟
منعوكم من دخول مطبعة يمكنكم مشاهدة العمل فيها عن طريق التفاز !
أختي في حال أخطأ بعض الأفراد يجب أن لا تعمم على باقي الناس
هل شاهدت موائد الافطار في الحرم النبوي؟
هل شاهدت السيدات السعوديات وهن يوزعن طبخ ايديهم على المصليات بكل بهجة و محبة.
أخني نحن نعي معنى وجود أقدس بقاع الأرض في بلادنا و صدقيني "صفي قلبك من ناحيتنا وانتي تحبينا"
صدقيني
و عمرة مقبولة ان شاء الله

غير معرف يقول...

الحاج ابو الهيثم للعلاج بالقران الكريم لعلاج جميع الامراض المصتعصية مشاكل الطلاق مشاكل التاخر عن الزواج مشاكل التاخر عن الحمل سواء كانت هذه الامراض ناتجة عن اعمال سحرية او امراض عضوية والامراض المستعصية مثلا سرطان الراس سرطان الفم تكسر في الصفالح الد موية الجلطة العقم عند الرجال والنساء الام المفاصل الام الظهر لمزيد من الاستفسار يرجي زيارة موقعن او الاتصال بنا عبر الارقام التالية 0020162720790 او عبر الايميل
ham.ed82@yahoo.com او الحاج ابو الهيثم اwww.aboualhaitham.com
اما با النسبه لرجال الاعمال من خلال الرؤيا والبحث هناك مفاجات كثير وكثير جدا بمشئة الله نشرح الصدور وتسير العقول وتثلج القلوب وتنجح الاعمال فكل ما يريد معرفة المفاجات يتصل بنا الحاج ابو الهيم
0020102588311

القرآن الكريم