2008-11-04

عن عمرة رمضان احدثكم "3"

فوجئت عند عودتنا ان للنساء مكان مخصص غير الرجال ، مع ان في الحج كنت باصلي عادي بجوار زوجي وفي اي مكان حتي صحن الكعبة مش عارفه ليه اشمعنا رمضان وايه الفرق؟؟
قعد ادور علي اماكن السيدات لقيتها ورا جدا جدا ومش ممكن ابدا اقدر اشوف الكعبه ، اما المكان المخصص في الصحن فمستحيل اني الاقي فيه مللي فاضي الا اذا كنت هبات هناك ،
سلمت امري لله وفقدت الامل في رؤية الكعبة الا بعد الصلوات
المهم اتضحلي زي ماقلتلكم المره اللي فاتت ان ده احسن للخشوع والتركيز والتدبر في الصلاه وكمان باقدر اقعد الوقت اللي انا عاوزاه من غير ماحد يقولي يلا نروح

ولان الدنيا كانت ولا يوم الحشر كنت باروح الحرم من قبل صلاة العصر لبعد صلاة التراويح ، وارجع تاني علي التهجد لحد الضحي ، والحمد لله كنت باقدر الاقي مكان فاضي ودي برضو ميزه انك تكون لوحدك فابتقدر تتحشر في اي مكان مهما كان صغير ، وسبحان الله زي ما يكون ربنا بيوسع الارض للمصليين

استمرت اعداد الناس في ازدياد مستمر مع اقتراب رمضان من نهايته خصوصا مع اقتراب ليلة سبعه وعشرين ، تقريبا تضاعف العدد ، وشفت بعيني ناس بيتوا في الحرم من قبلها بيوم عشان يقدروا يلاقوا مكان


ليلة 27 كانت يوم الجمعه وده معناه ان فيه صلاة جمعه و عشان تلحق مكان في الحرم علي الاقل خالص تروح من الساعه 10 الصبح وده طبعا كان مستحيل لاني ببقي لسه مروحه حوالي 7 الصبح ، ففضلت اني انام واخد راحتي استعدادا للقيام والتهجد ، خصوصا ان صلاة الجمعه مش فرض اساسي للنساء زي الرجال

حصلت حاجه عكننت عليا في اليوم ده ، انا رايحه عادي جدا زي كل يوم الحق اصلي الظهرفي الحرم ،
مش عارفه الاقي مكان او بمعني اصح ماحدش راضي يقعدني جمبه وكل ما تسال حد يقولك محجوز ( اكننا في سينيما ...اه والله )

الاماكن كلها فاضيه بس مافيش ولا مكان !!!!!، وفاضل نص ساعه علي العصر وعاوزه اصلي الظهر ، فاجأة لقيت حد بيقول حسبنا الله ونعم الوكيل فيكم منكم لله ، واحده الناس برضو مش راضيين يقعدوها ، استأذنت من واحده اني اصلي بس وامشي الحمد لله طلعت ذوق وسمحتلي بالصلاه
حوالي 45 دقيقه مش عارفه اقعد طب هاعمل ايه لو خرجت دلوقتي استحاله الاقي مكان بره وهايبقي مصيري الشارع ؟؟؟؟

قلت بس مابدهاش الواحد لازم يبقي شرير شويه ، واول مكان فاضي لمحته قعده فيه فرضت عليهم سياسة الامر الواقع وقلتلهم والله العظيم ما انا قايمه هو كل واحده حاجز لتلاته اربع اما يبقوا يجوا ربنا هايسهل...بس وسبت اللي يتكلم يتكلم وقعدت اقرأ سورة الكهف

اتضحلي بعد كده ان الحاجه اللي جمبي كانت حاجزه مكان لبنتها وبنت بنتها اللي ماتعدتش سنة عشان تنيمها فيه ، بقي ده بالله عليكم يرضي ربنا ؟؟؟ وتعرقوا الصف ده زاد عليه حوالي 4 وكان مكفينا برضو

الليله دي كانت مختلفه تماما عن كل الليالي اللي قبلها ، صحيح هو مش شرط تكون ليلة القدر ، بس مش عارفه ليه كان فيه احساس داخلي بيقولي دي ليلة القدر ......!!!!!!!

اولا الصيام بالنهار كان سهل جدا والدنيا مع كل الزحمه تحسها مش حر ولا كتمه زي كل يوم

مع دخول الليل وصلاة المغرب هلت علينا نسمات بارده جميله جدا مش عارفه اوصفها ،

السما كانت صافيه ( كنت بصلي في الدور التاني وشيفاها )

مع دخول الليل اكتر كانت النسمات بتزيد وبقت عامله زي رياح خفيفه جايه من جميع الاتجاهات ، وكأن الحرم - اللي كان في الايام اللي فاتت نار - اتركب فيه تكييف مركزي ، حسستني ان الملايكه رايحه جايه حوالينا والنسمات دي بسببهم
قال صلي الله عليه وسلم " إن الملائكة تنزل في هذه الليلة فيكونون أكثر من عدد الحصي "

نشاط رهيب دب فيا فاجأه ، كنت تقريبا باجري عشان الحق اروح الفندق وارجع لصلاة التهجد من غير اي تعب

كنت حاسه بفرحه شديده في صلاة التهجد ، ولذه رهيبه مع دعاء الشيخ السديس

كل علامات ليلة القدر المتعارف عليها كانت موجوده ، ومكانش احساسي لوحدي لا دا كان شعور جماعي

" اللهم انك عفو كريم تحب العفو فاعفو عنا "

بعد انتهاء التهجد كان الزحام خف شويه وقدرت انزل للصحن امتع عيني بالنظر للكعبه ، وصليت الفجر والضحي هناك وكان من اجمل الايام اللي صليت فيها



ليلة 29 ختم القرآن

كنت فاكره ان اقصي زحام ممكن يكون موجود هو ليلة 27 لكن اتضح بعد كده ان العدد تضاعف ليلة 29، الكل بيمني نفسه انه يحضر ختام القرآن ويستمع الي دعاء القنوت و يتوجه الي الله بكل كيانه وذرات قلبه ، ويتمني من الله انه يكون دعاء مستجاب و صيام وقيام متقبل
كنت باسمع السور الاخيره من جزء عم وكأني اول مره اسمعها ،

"اذا جاء نصر الله والفتح...... "

" تبت يدا ابي لهب وتب ..."

" قل هو الله احد..."

"قل اعوذ برب الفلق ....."

"
قل اعوذ برب الناس ..."

ويبدأ الدعاء ويدخلني فدنيا تانيه ، تملاني الرعشه ،افكر في الذنوب واتعهد امام الله بالتوبه النصوحه ، تنساب الدموع لعلها تغسل كل الذنوب ، احس اد ايه انا ضعيفه وذليله احتاج الي الله ، اقف علي بابه وارفع اكفي بالدعاء وكل امنياتي انه يستجيب دعائي ولا يردني خائبه ،

ينتهي الدعاء و ماينتهيش املنا في العفو والمغفره ، وماتنتهيش دموع الحزن علي فراق رمضان وفراق بيت الله الحرام وارضه الطاهره

كانت آخر صلاة هي صلاة التهجد ليلة 29 ( يارب لا تحرمنا الزياره مرات عديده و ازمنة مديده ) ، لاننا قررنا نقدم معاد السفر ليوم 29 رمضان بدلا من 4 شوال بسبب بعض الظروف اللي جدت في شغل زوجي واللي حرمتنا من خمسة ايام زياده في رحاب الله

الحمد لله العوده كانت سهله جدا جدا وتأكيد الحجز علي التذاكر خلانا نسافرفي مواعيد مظبوطه ومن غير تأخير

-----------

حبة حاجات صغيره :


1- السنه دي كان الائمة في صلاة القيام الشيخ عادل الكلباني والشيخ ماهر المعقلي ، حسيتهم اقل بكتير اوي من الشيخ السديس والشيخ الشريم ، او يمكن عشان متعودين ان صلاة الحرم تبقي السديدس والشريم مش عارفه ؟؟؟بس كل الناس كان عندهم نفس الاحساس ده ، السديس والشريم بيقدروا يخلوك تندمج في الصلاه اكتر وكانوا بيصلوا بينا التهجد وبالرغم من طول الركعات ماكنش التركيز بيروح


2- الستات فمساجد مصر هما الستات في المسجد النبوي والحرام هما برضو الستات في مساجد بلاد الواق الواق ، مافيش نظام ولا هدوء ولا بيهتموا باي تعليمات ، ونفس الحاجات اللي خلتني ماصليش التراويح في مساجد مصر موجوده زيها بالظبط في الحرمين الشريفين


3- كل حد بيفتي في اللي يعرفه واللي مايعرفوش وساعات بتبقي فتاوي غلط وبيضل بيها كتير وراه ، خصوصا الستات والمصريات بالذات نازلين فتاوي في الصغيره قبل الكبيره ، المفروض في الاماكن دي ومع اختلاف الجنسيات والمذاهب المفروض ان كل واحد يخليه في نفسه ومايحاولش انه يفتي من غير لازمه


4- الناس مش مهتمين بنظافة المكان اللي بيبقوا موجودين فيه واي حد ممكن جدا انه يشرب في كوبايه ويرميها علي طول ايده او يرمي اي حاجه في اي حته ولا اكنه في الحرم ( شفتهم بعيني ) ولولا ان عمال النظافه شغالين علي قدم وساق كان الوضع هايبقي سئ جدا ، يمكن في الحرم النبوي الوضع محكوم شويه اما الكعبه لانها كبيره ومفتوحه فحدث ولا حرج


5- معظم المصريات هناك بيقدموا مثال سئ عن مصر ، الصوت العالي والاهتمام بالاكل والتكالب علي الحاجات اللي بتتوزع ،
اما الاية الكريمة (( ياأيها الذين ءامنوا اذا قيل لكم تفسحوا في المجالس فأفسحوا )) ولا اكنهم سمعوها قبل كده ، واستحاله ان واحده مصريه تتفسح في المجالس ،وكان الامر بيوصل لدرجة الشكل والتراشق بالالفاظ ،والله الجنسيات التانيه لما تحاول تقف جمبهم كانوا بيتفسحوا الا المصريات ، كأنهم قاعدين فبيتهم مش بيت ربنا


6- ممكن جدا تكون في وسط الصلاه وتلاقي اللي جمبك بعد ما كبر ودخل في الصلاه قاعد يعمل حاجات مالهاش اي علاقه بالصلاه وفجأة يقول الله اكبر ويركع معاك عادي جدا ، والناس بتعمل حاجات كتير غلط زي الصلاة في اوقات الكراهه خصوصا ساعة الشروق بالظبط ، وممكن يكونوا نايمين ويقوموا يصلوا من غير وضوء ، غير حركات جوا الصلاه نفسها مش مظبوطه زي الركوع الغير صحيح وغيره
المصريين هما تقريبا الجنسيه الوحيده اللي تحسها محافظه علي الصلاه زي صفة صلاة الرسول صلي الله عليه وسلم وتحس ان خشوعهم في الصلاه اكتر من اي جنسيه تانيه



7- ماء زمزم وما ادراكم ما ماء زمزم ، غذاء وشفاء و دواء ولما شرب له ،مش هاعرف اوصف طعمه بس كفايه اقولكم اني لما رجعت عانيت اكتر من اسبوع علي ما رجعت تاني اتعود علي مية مصر مع اني مش بشرب من مية الحنفيه
وعلي فكره طعم ماء زمزم لما بييجي هنا مش بيبقي زي اللي هناك ، دا حتي طعمه في الكعبه وهو طالع مباشرة من زمزم غير طعمه بعد نقله للمدينه المنوره


8- ليلة 27 كان فيه مجموعه من شوية ناس مهميين ( تقريبا وفد سياسي ) جايين يعملوا عمره ، شفتوا التشريفه اللي بتبقي فشوارع القاهره ، هي بالظبط كانت في شارع اجياد وعربيات بوليس 4x4 وسارينه وحرس وطني ، كنت رايحه الحرم عشان التهجد ، لقيتهم بملابس الاحرام نازلين من السلم الكهرباء المقابل للقصر الملكي و فوقهم حرس وتحتهم حرس ، استغربت جدا من ناس رايحه تقابل ربنا طمعا في العفو والمغفره ومحتاجه لحراسه ، طيب فين الخشوع وفين الخوف من ربنا وازاي هايطوفوا ويسعوا وحواليهم كل الحراسه دي ، (علي فكره شكلهم كان مدي علي مصريين )
المهم اني حسبنت عليهم واشتكيت ساعتها كل الظلمه لربنا وهو العالم والمطلع


9- معاملة الستات في الكعبةوحشه جدا جدا ، ومش عارفه ليه ماكنوش بيسمحوالنا نصلي في اماكن كتير مثلا زي السطح ولا حتي نطوف عليه ( مع انه في الحج عادي ) كمان ممنوع علي الستات انهم يصلوا في المنطقه الامامية من حجر اسماعيل واللي سمعت انها بس هي اللي من ضمن الكعبه ، واكتشفت ان منطقة الروضه عند زيارة الستات مش هي الروضه وانهم بيفرشولنا سجاد اخضر في حته غير الروضه الحقيقيه ، وبيذلونا اصلا علي ماندخلها ،
وكمان مافيش ستات بتدخل مطبعة المصحف الشريف !!!،
وزي ماقلتلكم في اول جزء انه لو باديهم ماكنوش دخلوا الستات حته خالص ولا حتي الكعبه والحرم النبوي
عموما ان اشتكيتهم زي ماقلتلكم رسول الله صلي الله عليه وسلم

الميزه الوحيده لكونك ست في السعوديه ان العربيات بتقفلك لوكنت بتعدي الشارع خصوصا لو منقبه ، ولو قعدتي علي اي كرسي في اي حته استحاله يقوموكي الا اذا قومتي بمزاجك ان شالله بعد سنه..... بس كده :)))



10- المصريين بيشتروا كميات رهيبه من حاجات ملهاش اي لازمه وموجود زيها هنا وارخص ، وتلاقي الواحد منهم راجع ومعاه خمسميت شنطه غير الناس اللي بيبقي معاهم زكايب ضخمة الحجم ، غير مية زمزم بالجراكن ، تصدقوا ان فيه واحد كان معاه 90 كيلو وزن زايد ولولا انهم السنه دي ماحسبوش اي حد علي الوزن الزايد كان اتخرب بيته :)))))
و شوفوا احلي مهازل علي سير الشنط في مطار القاهره
في احد المحلات ومن كتر عدد المصريين و الكميات الكبيره اللي عمالين يشتروها البياع الهندي قعد يقول بصوت عالي ( عمار يا مصر ) ههههه
بالنسبه لي ماكانش معايا غير شنتطين هاند باج صغيرين بس وتقريبا ماشتريتش حاجه تذكر ، والحمد لله اللي عافانا من هذا الابتلاء



كل سنة وكلكم بخير ويارب يكتبلنا جميعا العمره والحج مرات ومرات ولا يحرمنا زيارة بيته الحرام ما حيينا آمين

عن عمرة رمضان احدثكم "1"


عن عمرة رمضان احدثكم "2"



16 comments:

مهندس مصري يقول...

معلش
هما المصريين علطول كده في عمرة رمضان

مش عارف اعلق على ايه و لا ايه
:)
بس موافق حضرتك في كل الملاحظات اللي ذكرتيها

عمرو يقول...

ربنا يتقبل و بعوده با حاجه اٍنشاءالله بس أدعى لنا نبقى معاكى يا رب
بيعجبنى وصفك البسيط المدهش اللى مش معقد و لا مزوق لكنه دقيق و وافى
بمناسبة الناس اللى بيعملوا حاجات لا تمت للصلاه بصله فحصل قدامى موقف فى الكعبه كل ما أفتكره أضحك من قلبى و ابكى برضو من قلبى بصى أثاء صلاة الفجر كنت فى تانى صف قدام الكعبه و تانى واحد فى الصف جه شخص معدى من قدامنا فخبط عن غير قصد اللى بيصلى على يمينى خبطه عاديه يعنى خفيفه فراح ضربه بالبوكس فى وشه و كمل صلاه عادى خالص هههههههههه
ربنا يغفرلنا و يغفر لك و يتقبل منك عمرتك أنتى و زوجك اٍنشاءالله

صاحب المضيفة يقول...

تعليقاتك في محلها وشفت منها هناك قبل كده فعلا

ربنا يعافينا


لكن الحق يقال ان السعوديين فعلا جبارين في حكاية النظام الرهيب اللي في الحرم


ربنا يهديهم كده على طول ويفضلوا بنفس النظام ده


تحياتي وعمرة مقبولة

(أم البنين) يقول...

ما شاء الله
أسأل الله أن يبارك لك ويتقبل منك أختي

محمد ابراهيم يقول...

ربنا يتقبل منك العمرة
بجد من اوصافك لرحلة العمرة الواحد نفسه يطلع بجد مع انه لسه بدري بس بجد نفسي اطلع من كتر الاحداث الحلوة الي بتقوليها
تقبل الله منك
تحياتي
محمد

رفقة عمر يقول...

استمتعت جدا من سرد حضرتك للرحله
المفروض فعلا يكون فيه مكان مخصص للنساء فقط لان ليا واحده صحبتى اتعرضت لتحرش من رجال اسيويين وسعودين وهى داخل الحرم وفى رمضان
وكمان اشتكت من موضوع الحجز ومره واحده سعوديه زقتها من الصف لانها وقفت جنبها لان المكان محجوز
للاسف هما مش عارفين ان البلد الحرام ليس فيه رفس ولا فسوق ولاجدال والسيئه فيه مضاعفه زى الحسنه بالظبط
ربنا يهدينا للصواب ويرزقنا زياره بيته الحرام
وتقبل الله منكم اللهم امين على فكرة انا كمان حسيت ان ليله القدر كانت ليله 27 مع انى قضيتها فى البيت بس كان عندى نشاط وخشوع غير عادى
جزاك الله الجنه اللهم امين

اقصوصه يقول...

البوست جدا جميل

عمره مقبوله

وعقبالنا يا رب

استمتعت بالتدوينه

اصرار أمل يقول...

تقبل الله طاعتكم ؛ ولا حرمكم أجرها ...
ياللــــــه !
ذكرتيني بمكة ؛ وبالحرم ؛ وبشعوري الدائم بافتقادهما ...
وانتي بتحكي كأني شايفة الصور أمامي ؛
وكأني شايفة واحدة كانوا مانعينها تصلي عند مقام اسماعيل فبتقول : ربي قال ماأصلي هنا ؟ طيب ليش تمنعونا ؟
بس بجد العمال اللي في الحرم دول - ماشاء الله تبارك الله - برغم كل اللي الناس بتعمله تلاقي الحرم نظيف أول بأول .
الحرم : ما أحلى كل شيء فيه !
وما أبهى كل شيء فيه !
اللهم ارزقنا عمرة قريبة ...
يارب بس ماتكونيش نسيتينا في الدعاء ..
تقبل الله طاعتك ...

~*§¦§ Appy §¦§*~ يقول...

ربنا يتقبل منك بس فعلا غريبه الستات دى اوى
وميصحش يعنى الناس لازم تروح كل اللى فى بالها ربنا وبس ايه شاغلين نفسها باماكن وحجز وحركات غريبه
ربنا يكتبها ليه بس يا رب من غير حد ما يقولى محجوز اصل ساعتها اخنقه وهفتكرك يا دكتورة ههههههههه

الربان يقول...

تحياتي
اولا تقبل الله منكم العمرة...و جعلها
في ميزان حسناتكم و ثقل موازينكم.

ثانيا...لو كل انسان حب لاخيه ما حب لنفسه ...لافسح المجال لاخيه عن حب و طاعة....يقول الله تعالي في سورة المجادلة:

" يَأَيّهَا الّذِينَ آمَنُواْ إِذَا قِيلَ لَكُمْ تَفَسّحُواْ فِي الْمَجَالِسِ فَافْسَحُواْ يَفْسَحِ اللّهُ لَكُمْ وَإِذَا قِيلَ انشُزُواْ فَانشُزُواْ يَرْفَعِ اللّهُ الّذِينَ آمَنُواْ مِنكُمْ وَالّذِينَ أُوتُواْ الْعِلْمَ دَرَجَاتٍ وَاللّهُ بِمَا تَعْمَلُونَ خَبِيرٌ ".

لننظر جميعا الي جزاء التفسح..ان يفسح الله لنا...اللهم اجعلنا من عبادك الذين تفسح لهم في دنياهم واخراهم...

نحن بحاجة الي تنقية سلوكياتنا و اخضاعها لاوامر و نواهي رب العالمين...

كما اود ان اضيف ان صبر المؤمن علي هذه
الاثام...هي ان شاء الله في ميزان جسناته
و مثاب عليها.

تحياتي وحمدا لله علي سلامتكم.

راجى يقول...

مقبولة ان شاء الله

ـ-ـ- أحمد عبد العدل-ـ-ـ يقول...

ربنا يكرمك يادكتورة .. يتوصفى بشكل جميل جداً
عارفة بقالى كتير عاوز أكتب عن المهازل اللى بتحصل فى الحرم بس الموضوع عاوز تركيز منى شوية
الناس اللى بتتحرك كتير فى الصلاة معظمهم سعوديين رغم مواظبتهم على الصلاة الا انها من غير خشوع ظاهرى خالص والله أعلم بالضمائر - عكس المصريين تماما-
ربنا يبارك لك ويتقبل منك ويرزقك العودة مرات كثيرة للحرم ويتقبل منك فى كل مرة

bastokka طهقانة يقول...

ما شاء الله ربنا يتقبل و يعيدك الى الحرم المكي اعوام عديدة و يبلغك رمضان ازمنة مديدة

اوروفوار

وميض ابتسامة يقول...

سلام الله عليك ورحمته وبركاته

اسعدنى للغاية تتبع رحلة العمرة من خلال وصفك الرائع ..وساءنى موقف السيدات من حجز اماكن فى بيت الله وكأنها سيما على رأيك واسعدنى تحديك لتلك السخافات واصرارك على الجلوس بدون استأذان..فهذا اقل مايمكن فعله
اما عن سلبيات الرحلة وموقف بعض المصريين تحديدا ..فندعوا الله لهم بالهداية وازعجنى للغاية تشريفة المهمين اياهم فى بيت الله ..وكأنهم سيلاقون ربهم بتشريفة يوم الحساب ..موقف استفزازى واشاركك حسبنا الله ونعم الوكيل فى امثالهم.. ايا كانوا
عموما دعينا من تلك المنغصات واتمنى من الله ان يتقبل منك مناسكك ودعائك وعمرتك ..وان تكون بعودة ان شاء الله
اللهم آمين

mostafa rayan يقول...

ربنا يتقبل منك يا دكتورة ويكتبها لنا كلنا

أُكتب بالرصاص يقول...

تقبل الله

متأخرة شوية
بس لسه حالا قاري الموضوع
وفكرتيني بالذي مضى

احلة اوقات ولا بعكر صفوها إلا المناظر المؤذي اللي اجملتيها في موضوعك

المرة الجاية

أمانة عليك

ماتنينسنيش من الدعاااء

القرآن الكريم