TvQuran

٢٠٠٨-٠١-٢٤

إن جالك الغصب ..خده بالرضا





لا ياسيدي الرئيس لم يكن قرارك ،و لم تكن مبادرتك ، الحصار الجائر طوال هذه الايام السابقه ، لم يحرك فيك ساكنا ، لم يدفعك لتأمر بفتح معبر رفح ولو حتي لادخال احتياجات الحياة الاساسية من اغذية وادوية ووقود
انت فقط طبقت سياسة ان جالك الغصب خده بالرضا
فقط لتحفظ ماء وجهك ووجهنا امام العالم

قسوة الحصار يا سيدي هي التي ولد ت الانفجار

اهل غزة اخرجو انفسهم لا يوجد فضل لاحد في هذا الفك الجزئ للحصار
لم يساعدهم احد ، لم يبالي بهم احد
وقف العالم ليتفرج علي نزيف غزه ولم يحرك احدهم ساكنا ، الجميع وفي مقدمتهم كل الزعماء العرب يغطون في نوم وسبات عميق

واني لاتعجب من هؤلاء ..كيف لهم ان يناموا ملء جفونهم والدمار والقهر والاذلال يفتك بغزه ليل نهار


فكان قرار التفجير وإقتحام الحدود ، ليخرج اهل غزه الي العالم بعد اغلاق للمعبر دام اكثر من سبع شهور وبعد ان استفحلت الأزمة الإنسانية و فشلت الحياة بشكل تام وتعطلت جميع المرافق الحيوية وخدمات المستشفيات ، بعد ان توقف ضخ المياه النظيفه للمنازل وانقطعت الكهرباء وغرقت الطرقات في مياه المجاري

من يري مشاهد تدفق الناس الي رفح والعريش له ان يتخيل حجم المعاناه ففي اقل من نصف يوم تدفق اكثر من مائة الف فلسطيني وبعض الروايات تقول انهم نصف مليون

لا اجد الكلمات التي اصف بها بعض التجار الذين استغلوا الموقف وضاعفوا اسعار البضائع وعلي رأسها لبن الاطفال ، بعض السلع تضاعف سعرها الي 200 % خصوصا الوقود

فقط اقول لهم ولكل الحكام العرب اتقوا الله في هؤلاء الجوعي المحاصرين



--------------------------------

تحديث

اتعجب بشده من موقف كل الدول العربيه التي مازالت تغط في نوم عميق

لليوم الثالث علي التوالي مازال المعبر مفتوح وانباء تقول بقرب اغلاقه علي منتصف اليوم ، وللاسف لم تتحرك اية دولة عربيه خاصة الدول الثريه في الخليج ، لم يتحرك احد منهم لارسال بعض المساعدات لهؤلاء الجوعي الذين اتوا علي الاخضر واليابس في مدن شمال سيناء ومدن القناه ايضا

اتعجب واتساءل اين هي الاموال العربيه اين دعم الامراء والملوك العرب لماذا لم تصل مساعدات الي الآن لاستغلال الفرصه قبل اغلاق المعبر
؟




٢٠٠٨-٠١-٢٠

فقرة اعلانية



وسط العتمه ضي بوست جديد في " علي طول الحياة "

أقروه وقولولي رايكم

٢٠٠٨-٠١-١٧

وجوه



هل يستطيع شخص ما ان يفعل مثله ، ان يحمل معه وجوه عده يختار ما يظهر منها وما يخفي ، ان يغير ويبدل وجهه ليتناسب مع ما يحيط به من ظروف

الوجهه الجاد الحازم في العمل ، حيث الاوامر والنواهي والصوت العالي الهادر وهذه التكشيره التي لا تفارقه ابدا

والوجه المرح البشوش مع الاهل و الاصدقاء ، حيث اوقات الصفاء والمرح والضحكه التي يسمعها القاصي قبل الداني

والوجه المحايد الذي لا يحمل اية تعابير تذكر ، سلبي الاتجاه لا يشعرك بردود افعال ،حيث يتصنع الحكمه فلا يظهر رضا ولا سخط ، فرح ولا زعل فقط يصغي باهتمام

يخرج من جعبته الوجه الذي يراه مناسب ليرسم صورة وردية للمديرالحازم أو الزوج الحنون أو السيد الحكيم
غير آبه باحاسيسه وأمانيه ورغباته ، بعذاباته وآلامه التي يحملها في اعماق اعماق روحه ، و التي لا يستطيع ان يضع حد لها

ففي الوقت الذي يشعرنا فيه ان لا شئ يحدث ، تتسلل تلك الآلام والرغبات التي لا حدود لها من مكانها الخفي ،
تتحول الي وحش لا يستهان به لتغتاله ببطء وتميته بهدوء


وعندها فقط تستطيع ان تري وجهه الحقيقي بملامحه الطفوليه البريئه وابتسامته الهادئه الخلابه


٢٠٠٨-٠١-١٠

رز بلبن وأشياء اخري

كل سنة والجميع طيبين سنة هجرية سعيده عليكم
زي ما ماما ربنا يديها الصحه عودتنا دايما اول يوم في السنه الجديده لازم ناكل رز بلبن علشان تبقي سنه بيضه بلون اللبن ، عملته امبارح اول مارجعت من الصيدليه ،السنه دي قررت اني اعمل كميه و ادوق كل صحابنا ،
و يارب مايقطعهالنا عاده ويجعل كل ايامنا لبن
، السنة الجديدة بدأت والخيرجه معاها الدنيا مابطلتش مطره امبارح ليل ونهار

**اول طوبة انهارده وبدأت ايام البرد الحقيقي " برد طوبة يخلي الصبية كركوبة "
افتكرت اغنية عفاف راضي روح يا برد طوبة

روح يا برد طوبة للدبة الدبدوبة
و ابعد عن حبيبي و كل اللي في سنه
امشي امشي عنه روح للدبة نَااانو
دي تخيييييييييييييينة وتستحمل عنه

يا عيني علي التخان هما هايستحملوا ايه ولا ايه بس؟؟؟؟

** حبيت اظبط نتيجة الطقس في
ال igoogle
حاجه غريبه اوي لفتت نظري ضمن البلاد الموجوده في الطقس لقيتهم مش جايبين المنصوره وطنطا ....عادي ، بس الغريب انهم فاكرين وادي النطرون والفرارفره !!! للدرجه دي الشهره عالميه ووصلت جوجول كمان

**جبت لابن اخويا سمسم اللي لسه ماكملش 3 سنين عربيه لعبه جميله جدا مارضيش ياخدها وقالي لا مش عاوز عربيه انا عاوز تكتك
حد يعرف حته بتبيع تكاتك لعبه
:-D

** بقلب فالمدونات كالعاده ، مدونه تشيلني ومدونه تحطني ، لينك يوديني ولينك يجيبني ، لقيت ناس عاملين مسابقه لافشخ حد بيستخدم النت ، بصراحه في الاول ماعرفتش يعني ايه افشخ ، بس فهمت انها حاجه مش ولابد ، المهم ان المدونه هنا الحمد لله مش من ضمن المدونات اللي كانت مترشحه للجايزه

** مش مصدقه اننا بقينا 10 يناير ، ياخبر ابيض علي الايام اللي بتجري جري ،مش بيلحق اليوم يبدأ وفجأه تلاقي العشا بتأذن واليوم خلاص ، سرعة تعاقب الايام والسنين من علامات اقتراب الساعه ، يوم ورا يوم وسنة ورا سنة عمرنا بيتسرسب من بين ادينا واحنا مش حاسين ،
اللهم أرزقنا قبل الموت توبة وعند الموت شهادة وبعد الموت جنة ونعيما


ماتنسوش صيام التاسع والعاشر من محرم ، الخميس والجمعه الجايين ان شاءالله


٢٠٠٨-٠١-٠١

بقينا في 2008


كنت متخيله اني هانزل مالبيت انهارده الاقي الدنيا متغيره و الحياه بقي لونها بمبي

ليه لأ والنهارده اول يوم في 2008

وخلاص كسرنا شادر قلل ورا 2007 وراحت غير مأسوف علي شبابها في ستين الف دا........سلامه

خرجت الصبح وكلي امل اني مالاقيش طابور العيش بتاع كل يوم قدام الفرن اللي جمبنا ،او حتي الاقيه قل شويه

ليه لأ احنا بقينا في 2008

واني مالاقيش الحفره اللي علي اول الشارع لما افتكروا فجأه بعد ما سفلتنا الشارع علي حسابنا ان المكان ده المفروض يبقي فيه تفتش لماسورة الميه الام

ليه لأ احنا بقينا في 2008

كان نفسي الاقي وشوش الناس اتغيرت ،واتشال من عليها هموم الدنيا ، رجعوا يضحكوا زي زمان ونزلوا طاجن ستهم من علي راسهم

ليه لأ احنا بقينا في 2008


بس للاسف ، مالاقيتش اي حاجه حصلت

طابور العيش هوه هواه ويمكن زاد شويه ، والناس صوتها عالي وبيتخانقوا علشان مش راضيين يدوهم اكتر من جنيه عيش

الحفره لسه موجوده وبقت عمله زي التل الصغير ويمكن يكون ارتفاعها زاد عن امبارح شويه

والناس ماشيين مش داريين بالدنيا كل واحد سرحان في حاله ، ولسه كل واحد محافظ علي الطاجن بتاع سته

واللي زاد كمان في البيت اللي جمب الصيدليه واحد اتخانق مع مراته وشفت اهلها بيشدوه علي المأذون اللي جمبنا ، ربنا يستر ومايكنش طلقها
طب كانوا يستنوا لبكره حتي لو مجامله لاول يوم في 2008

فتحت التليفيزيون علي القناة الاولي المصريه لقيتهم جايبين تقرير عن احتفالات راس السنه ،
والناس فرحانه وبترقص في الشوارع ولابسين طراطير ومعاهم زمامير وآخر فرفشه ، والست المذيعه بتقول هذا وتنعم دول العالم بالامن والسلام ، استبشرت خير

بركاتك يا 2008

رحت اتأكد من الجزيره لقيت الدنيا زي ماهي ، قتل و حرب ودم في كل مكان
ضرب ناري عشوائي علي الحجاج في غزه ، ومواجهات بين فتح وحماس ، تفجيرات في بغداد ، وحالة وفاة بانفلونزا الطيور في الدقهلية ، وتصاعد العنف في دارفور

امال الست المذيعه كانت بتتكلم علي انهي عالم ده ، يمكن بقي عالم تاني مش تبعنا ، يمكن قصدها علي الشنزليزيه ولا التايمز سكوير ولا حتي شارع الحمرا في بيروت ...يمكن......ربنا هو الاعلم باللي في النفوس

خلاص بقينا في 2008 ياتري ايه اللي مخبياهولنا ، ياتري هاتبقي احسن من اللي قبلك ؟؟؟؟ الحال هايفضل زي ماهو، ولا هايسوء اكتر ؟؟؟؟
الدعم هايتشال ولا هايفضل ؟؟؟؟؟
الحكومه هاتتغير ولا هاتفضل كابسه علي نفسنا ؟؟؟؟
الناس هاتفضل تعمل مظاهرات واعتصامات ولا هايعملولهم اللي هما عاوزين ؟؟؟؟؟
هايفرجوا عن المعتقلين ولا هايزودوا عددهم ؟؟؟؟
هايجي علينا اكتوبر واحنا بنحتفل بالضربه الجويه الاولي ولا هانغير علي حاجه تانيه ؟؟؟
هاناخد كأس افريقيا ولا هانطلع من الدور الاول ؟؟؟
الاهلي هاياخد الدوري والكاس ولا ربنا ممكن ينفخ في صورة الزمالك ؟؟؟

صفحاتك لسه جديده ، فاضيه ماكتبناش فيها حاجه ، ياتري هانكتب ايه ، وباي لون

هانحقق اللي احنا عاوزينه ولا هاتيجي علينا اللي بعدك واحنا لسه محلك سر







القرآن الكريم