2008-01-01

بقينا في 2008


كنت متخيله اني هانزل مالبيت انهارده الاقي الدنيا متغيره و الحياه بقي لونها بمبي

ليه لأ والنهارده اول يوم في 2008

وخلاص كسرنا شادر قلل ورا 2007 وراحت غير مأسوف علي شبابها في ستين الف دا........سلامه

خرجت الصبح وكلي امل اني مالاقيش طابور العيش بتاع كل يوم قدام الفرن اللي جمبنا ،او حتي الاقيه قل شويه

ليه لأ احنا بقينا في 2008

واني مالاقيش الحفره اللي علي اول الشارع لما افتكروا فجأه بعد ما سفلتنا الشارع علي حسابنا ان المكان ده المفروض يبقي فيه تفتش لماسورة الميه الام

ليه لأ احنا بقينا في 2008

كان نفسي الاقي وشوش الناس اتغيرت ،واتشال من عليها هموم الدنيا ، رجعوا يضحكوا زي زمان ونزلوا طاجن ستهم من علي راسهم

ليه لأ احنا بقينا في 2008


بس للاسف ، مالاقيتش اي حاجه حصلت

طابور العيش هوه هواه ويمكن زاد شويه ، والناس صوتها عالي وبيتخانقوا علشان مش راضيين يدوهم اكتر من جنيه عيش

الحفره لسه موجوده وبقت عمله زي التل الصغير ويمكن يكون ارتفاعها زاد عن امبارح شويه

والناس ماشيين مش داريين بالدنيا كل واحد سرحان في حاله ، ولسه كل واحد محافظ علي الطاجن بتاع سته

واللي زاد كمان في البيت اللي جمب الصيدليه واحد اتخانق مع مراته وشفت اهلها بيشدوه علي المأذون اللي جمبنا ، ربنا يستر ومايكنش طلقها
طب كانوا يستنوا لبكره حتي لو مجامله لاول يوم في 2008

فتحت التليفيزيون علي القناة الاولي المصريه لقيتهم جايبين تقرير عن احتفالات راس السنه ،
والناس فرحانه وبترقص في الشوارع ولابسين طراطير ومعاهم زمامير وآخر فرفشه ، والست المذيعه بتقول هذا وتنعم دول العالم بالامن والسلام ، استبشرت خير

بركاتك يا 2008

رحت اتأكد من الجزيره لقيت الدنيا زي ماهي ، قتل و حرب ودم في كل مكان
ضرب ناري عشوائي علي الحجاج في غزه ، ومواجهات بين فتح وحماس ، تفجيرات في بغداد ، وحالة وفاة بانفلونزا الطيور في الدقهلية ، وتصاعد العنف في دارفور

امال الست المذيعه كانت بتتكلم علي انهي عالم ده ، يمكن بقي عالم تاني مش تبعنا ، يمكن قصدها علي الشنزليزيه ولا التايمز سكوير ولا حتي شارع الحمرا في بيروت ...يمكن......ربنا هو الاعلم باللي في النفوس

خلاص بقينا في 2008 ياتري ايه اللي مخبياهولنا ، ياتري هاتبقي احسن من اللي قبلك ؟؟؟؟ الحال هايفضل زي ماهو، ولا هايسوء اكتر ؟؟؟؟
الدعم هايتشال ولا هايفضل ؟؟؟؟؟
الحكومه هاتتغير ولا هاتفضل كابسه علي نفسنا ؟؟؟؟
الناس هاتفضل تعمل مظاهرات واعتصامات ولا هايعملولهم اللي هما عاوزين ؟؟؟؟؟
هايفرجوا عن المعتقلين ولا هايزودوا عددهم ؟؟؟؟
هايجي علينا اكتوبر واحنا بنحتفل بالضربه الجويه الاولي ولا هانغير علي حاجه تانيه ؟؟؟
هاناخد كأس افريقيا ولا هانطلع من الدور الاول ؟؟؟
الاهلي هاياخد الدوري والكاس ولا ربنا ممكن ينفخ في صورة الزمالك ؟؟؟

صفحاتك لسه جديده ، فاضيه ماكتبناش فيها حاجه ، ياتري هانكتب ايه ، وباي لون

هانحقق اللي احنا عاوزينه ولا هاتيجي علينا اللي بعدك واحنا لسه محلك سر







101 comments:

mohand يقول...

السلام عليكم
يا سلام اول تعليق
طيب نبعت المعلومتين دول ونتكلم بعد كده

علي فكره في حاله وفاة تانيه في دمياط
يعني حالتين
والرقم ارتفع تقريبا ل38
مش متذكر بالظبط
ومجلس الشعب رفض سحب الثقة من الحكومة

نبعت بقي

mohand يقول...

طيب كويس
نتكلم بقي
بصي يا دكتوره
السنين مش هتغيير اللي بيحصل او اللي هيحصل
احنا بنقدر نغيير
ومعتقدش ان بابا نويل مثلا نزل بعصي سحرية يرش السعادة علي الناس ليلة رأس السنه

زي ما بيضحكوا علي الاطفال
في اوربا والعالم كله

تحياتي وخلي عندك نظرة تفاؤل
لسه في امل
انا متاكد
اوقات بفقده بس برضه لسه في

عصفور المدينة يقول...

الكوارث والابتلاءات لا تعرف ميزة للرقم 1/1

البنت الشلبية يقول...

كل سنة وحضرتك بخير يا دكتورة
وبصراحة انا حاسة انها مش فارقة كتير السنة دى من الى قبلها

ربنا يسعدك يارب

DR.HAMAS يقول...

جميل أوى كلامك عن آمالك فى 2008

بس حسيت من كلامك انك فاكرة 2008 سحر نزل من السما

و هينشر موجاته فوق الصفراء على فرن العيش و الناس اللى بتتزاحم

و على حفرة شارعكو

و على اللى عايزين يطلقوا ... يقوموا يتجوزوا كمان مرة

----------

القصة أكبر بكتيييييييييير

القصة إن فيه رحلة طويلة من التغيير لازم تحصل

ولازم كم من الناس يشيل الفكرة و يدافع عنها

و يموت كمان عشان يحققها و يسترخص حياته

الموضوع كبييييييييير

أكبر من ليلة رأس السنة

و من تغيير اسم العام إلى 2008 بدل 2007

الفرق رقم

مش حاجة جوهرية

الحاجة الجوهرية ان النفوس تتغير

و العقول تتنضف

و الواقع يتصلح

---------------

فيه ناس فى وادى تانى و دول بتوع السهرات الراقصة بتاعت القناة المصرية

بذمتك يا دكتورة يا مثقفة .. حد يفتح قناة مصرية فى الأيام دى ؟؟

ليه ؟؟؟؟؟؟

ناقصين عكننة ؟
و لا ناقصين أخبار مزيفة و ضحك على عقولنا ؟؟

يلا بقة
هسامحك المرة دى

بس يا ريت متتكررش

ههههههههه

عشان بس احنا قرايب
انتى صيدلة و أنا طب بشرى

يعنى بتجمعنا فسيولوجى و هستولوجى و فارماكولوجى حبة مواد عبيطة كدة يعنى مش أزمة

عشان كدة بس هسيبك المرة دى

إنما المرة الجاية لا ممكن أبـــــــدا


ههههههه


يلا أسيبكو على خير

و كل سنة و أنتى إلى الله أقرب و على طاعته أدوم


معلش أنا بتكلم كتير

سلام عليكو

د.حمــــــــــاس

رفقة عمر يقول...

انا بصراحه داخله 2008 وانا بااقول ياساتر
انا بجد ما صدقت ان 2007 خلصت ربنا يعدى 2008 على خير بجد
يمكن يكون فيه امل

محمود الدوح يقول...

اولا عجبتنى الصورة بتاع السنتين

وبعدين انا كنت فاكرك بتحلمى يا دكتورة فى الاول
بحسبك لسة نايمة

بس اللى انا حاسة من 08 انها هتبقى سنة تغير جذرى

لان عام 07 كان عام الغضب

و2008 عام التغير باذن الله

ومتسأليش تغير اية

ام البنات يقول...

مهو الاتنين اللى بيشوفواالشئ صاحب الوجهين
الاتنين صادقين
انت شفتى الدنيا من عندك من عند الناس الطبعيين فلقيتها زى ماهى
والمذيعه اللى ملونه شايفه الدنيا بتعاتك بس من عندها...فشايفه طابور العيش ...ناس برتقص
شايفه الحفره ترامبولينا للسيارات
اختراع جديد فالناس مبسوطه
والراجل ومراته اللى بيتخانقوا...
بيمثلوا دور كوميدى فى فيلم
دكتورة...
مش هيتغير العالم الا بينا
والناس اللى مش عارفه ومش قادره كثيير
والنزول الى شارع مأساة
كتبت علينا...


نسأل الله ان يرزقنا ايمان ويزيدناوصبر ورضا

Mustafa Şenalp يقول...

very nice a blog :)

الطائر الحزين يقول...

اهم من تحقيق ما نريد
نعرف الاول ماذ نريد

ايه انتى زعلانة

مش بتزورينا خالص

تحياتى

الربان يقول...

تحياتي

كل سنه و انت بألف خير....كل سنه و قد تحققت كل امنياتك الطيبة...كل سنه و مصرنا الحبيبة بألف خير و سلام...

تحياتي

أحمد رفعت يقول...

انا برده لما صحيت من النوم يوم 1-1 لاقيت وشى زي ما هو ,,,

واضح ان السر فينا مش في التاريخ ..

عامك سعيد

إنـســـانـة يقول...

انا من رأيي يا فضفوضتى يا جميلة اننا نقفل الأجندة بيضة كدة زى ماهي وندخل ننام احسن

اهى الاجندة تنفع لما عيل من العيال يجيله نفس يذاكر ولا حاجة
:D

ومش عارفة ليه عندى احساس والله اعلم يعنى ويارب ما يبقى بجد .. اننا حنوصل ل2080 واحنا زي ماحنا .. لالالا ممكن نبقى فى الأسواء مش عارفة

المهم ربنا يستر ويارب اللى جاي يكون احلى وربنا يخلف ظنونا فى البلد العجيبة دى

سيبك انتى

هابي نيو ييييييير

وابقى حطى بابا نويل على باب الصيدلية بقا ههههههههههه

محمد الجرايحى يقول...

أختى الفاضلة
السلام عليكم ورحمة الله وبركاته
كل عام وأنت بخير
وإن شاء الله يكون عاماً جديداً فى كل شئ
ونخرج من هذه الحالة من السكون والركود

ومبروك التصميم الجديد

بارك الله فيك وأعزك
أخوك
محمد

مروة الزارع يقول...

وحشاااااااااااااانى

كل سنة وانتى طيبة الاول

عارفة انى مقصرة فى حقك بس غصب عنى

ياستى خلى عندك أمل

ممكن كل حاجة تتغير

على 2500 كدة

lol

كفراوى يقول...

لاسف يا دكتورة

احنا ف 2008

الفاتح الجعفري يقول...

ربنا يجعله عام خير علي الاسلام والمسلمين
ومعلش احنا في مصر الروتين بقي وكده لسه 2008 مدخلش واقف علي بوابه الجوازات هيدخل 2012 ان شاء الله اجراءات بقي وروتين
وان شاء الله عام يجعله الله شاهد لنا لاعلينا

أميرة ويلز يقول...

اولا كل سنة وانتى طيبة

بس الدنيا مابتتغيرش بين يوم وليلة ولا عشان احنا فى 2008

زى ماكانوا بيصورولنا زمان ان لما ندخل فى الالفية التالتة العالم هيطور والدنيا كلها هتتغير

لا 2008 ولا 2010 حتى

متشائمة شويتين انا اصل مافيش اى بادرة امل تبعث ع التفاؤل

بحييكي وشكرا على الزيارة

شيكابالا يقول...

السلام عليكم ورحمة اللة وبركاتة
كل سنة وحضرتك طيبة ويا رب تكون 2008 سنة خير عليكى وعلى كل الناس

عاشقه الفردوس يقول...

فضفض يافضفوض

ايهيافضفضه ياحبيبتى ربنا يكرمك انتى علشان طيبه وقلبك ابيض فاكره ان الدنيا هتتغير

على فكره مش الدنيا الى بتتغير دى الناس هى اللى بتتغير بس للاسف للاسوء
للاسف
يارب ييجى اليوم اللى نلاقى فيه الناس اتغيرت للاحسن
اتمسكت بدينها
اتمسكت باخلاقها
بقيمها
باحترامها لبعضها


يااااااااااااااااااااااه
يارب تكون سنه جديده سعيده

فرنسا هانم يقول...

يا دكتوره
انتى نسيتى حاجه
كانت ممكن كل الحاجات دى تحقق فعلا لو 2008 وافق اول يوم فيه يوم الاربعاء
لكن فرقت بنط
وده اللى ضيع الدنيا
انا سمعت ان الحكومه
كانت هتنزل حصص الدقيق زى الاول واكتر
والمواصلات هتفضى والشوارع هتتسفلت على حساب الحكومه
وكل واحد دفع مليم هياخدوا
والحفر هتتردم
وبكار هيرجع تانى
والدعم هيزيد
لكن الحكومه
يا عينى
اتفاجئت يوم الكريسماس
ان اول 2008 يوم الثلاثاء
فلغت الموضوع

يا مراكبي يقول...

إن شالله تيج 2009 أو 2010 برضه هتكون أسوأ من اللي قبلها .. سنة الحياة بقى

ياللا .. حبة تفاؤل مني كده في أول السنة الجديدة

MerMaid يقول...

كل سنة وانتي طيبة يا جميلة يا رب

نورتي المدونة بتاعتي

:)))

اتمني بجد بجد تيجي دايما

:))

أخف دم يقول...

ازيك يا دكتورة
كل سنةو انتى طيبة والسنة الجاية تبقى أحسن للعالم كله .. للعالم بتاع الجزيرة مش بتاع صباح الخير يامصر
وكل سنة وانتى طيبة انتىو الأسرة ويارب تبقى احسن سنة ليكى وتحققى كل طموحاتك
وعندى فكرة لموضوع الجزيرة وصباح الخير يامصر
لو مزاجك حلو وعايزة يفضل حلو اتفرجى على الجزيرة الأول وخديلك كام طلقة وشوية دم ع الصبح وبعدين اقلبى على صباح الخير يامصر هتلاقى الجو زى الفل وانك كنتى بتحلمى وخلاص وهتعيشى اليوم زى العسل
ولو مزاجك وحش وعايزاه يبقى وحش اكتر اتفرجى على صباح الخير يامصر وبعدين اقلبى على الجزيرة خديلك كبايتين دم وشوية اعتقالات ومجازر ع الماشى وروحى صيدليتك معززة مكرمة
وكل سنة وانتى طيبة مرة تالتة

Mohamed A. Ghaffar يقول...

لا يغير الله ما بقوم حتى يغيروا ما بأنفسهم

Dr Emad يقول...

ممكن نتغير؟
مش عارف
بس
كلنا بنقول يارب

الراقص مع الذئاب يقول...

السلام عليكم
ازيك يا دكتورة
كل سنة وانتي طيبة
غريبة اوي يا دكتورة انتي كنتي عشمانة انه 2008 يبقي غير 2007 و و2006 و1826 ؟؟
بس الحمد لله بدايته كانت معايا غير بداية 2007 خالص
كانت احسن واكثر تفاؤول والحمد لله وبدايتها كانت خير

علي المستوي الشخصي بس
معرفش بقي علي المستوي الاقليمي والعالمي

سيبك انتي كل سنة وانتي طيبة والسنة اللي إن شاء الله الحفرة تنسد ومتبقاش عاملة زي التل (جت ازاي حفرة زي التل انا مش عارف) وميبقاش في طابور عيش ولا إنفلونزا الطيور ولا قوة حفظ سلام لدارفور

سلام يا دوك

مطرح ما ترسى....دقلها يقول...

فعلا 2007 دى كانت سنة جامدة

انا كتبت عنها بوست .. عن ذكرياتى فيها ..
وعن اكتر حاجات اثرت فينا كمصريين..
وكمان عن اكتشافات عظيمة اكتشفتها فينا وكأنى اول مرة اكتشفها..

عموما طبعا .. البوست بتاعك ارقى اكيد..
اتمنالك التوفيق ..
تحياتى

مهندس مصري يقول...

فكرتيني لما كنا عيال صغيرة و كان فيه درس في منهج القراءة بيتكلم عن مصر و العام في القرن الحادي و العشرين
كانوا مخلينا نتخيل ان القرن الواحد و العشرين هو المستقبل الي حيحل كل المشاكل
أنا على المستوى الشخصي في البيت و الشغل السنة بدأت بمشاكل متلتلة و ربنا يستر
أما على المستويات الأكبر فالدنيا كلها من سيئ الى أسوأ
:(

ma_3alina يقول...

مش متشائم والله

بس ياريت يا دكتورة تحتفظي بالبوست ده ل 2009 ول2010 و 2011 ...

وكل اللي حتعمليه تغيري الأرقام والصورة بس

:D

CresceNet يقول...

Gostei muito desse post e seu blog é muito interessante, vou passar por aqui sempre =) Depois dá uma passada lá no meu site, que é sobre o CresceNet, espero que goste. O endereço dele é http://www.provedorcrescenet.com . Um abraço.

shreef يقول...

و الله يا دكتور ما اعتقدش ان 2008 هتكون مختلفة كتير عن اللي قبليها هوا مش يأس بس هوا ده الاحتمال المتوقع حدوثة لان مفيش مؤشرات تبشر بالخير و الدليل على كدا طوابير العيش و الحفرة لأ حفرة ايه اقصد الحفر اللي بتملى شوارعنا و اللي زي ما تكون لابسة طقية الاخفاء بالنسبة للمسؤلين دا اذا كانوا مسؤلين اصلا..عموما اتمنى بجد ان يكون في تغيير حقيقي و الا هتفضل الناس شايل هموم الدنيا كلها على اكتافها و يجيلها اكتئاب اكتر ما هي مكتئبة اصلا..عموما يا رب تكون سنة سعيدة عليكي و على كل الموجودين و كل المصريين و الناس في الدنيا كلها..آمين..يلا سلام

سها يقول...

انا من كتر ما بيتكلموا وبيحتفلوا بنهاية سنة وبداية سنه
بيتهيالي انهم هيحطوا جدار بين السنتين
ويبقى اللي على ناحية السنه اللي فاتت فيه العذاب
واللي على ناحية السنه الجديده فه الرحمة

كان مرة واحد قال قبل سنه 2000
هو ايه حكاية الالفية الجديده اللي لازم نلبس ونقعد نستناها؟
واهي عدت 7 سنين على بدء الالفية
ودخلنا في اتامن
وعمالين نتدحدر

ايميلي في البروفايل
لو تكرمتي تبعتيلي المقالات اللي بعتها الاستاذ احمد عيل مصري
يبقى كتر خيرك واكون ممنونه
لو ماكانش فيها تكليف يعني
شكرا

دنــــيــــــا مـحـيـرانـي يقول...

ربنا يستر و خالينا متفائلين شويه يمكن تحصل المعجزات
كل سنه و انتي طيبه

جمعاوى روش طحن يقول...

إبتديت أول السنة الجديدة

بإمتحان


شفتى الهنا


لا و ايه


إمتحان



Electordaynamic & Countum

هى إسمها كده


كتبت ف ورقة الإجابة لحد ما خلصت و مفيش مكان أكمل



رئيس الكنترول قالى

الحكومة جايبة لكل طالب ورقة واحده


اكتب ف الجلادة


كتبت و أنا أسخر من نفسى


أول يوم ف

2008



أكتب ف الجلاده

و ياريته يعجب الدكتور

تحياتى و دمتم بخير

محمد فوزي آل ربيع يقول...

لأاااااااااااااااا

دي ألفين و سبعة كانت سنة جميلة جداً و مش طبيعية، أهم حاجة إنها ما كانتش طبيعية، كانت دايماً متغيرة

ftafeet يقول...

اولا كل سنه وانتى طيبه مع انها جايه متأخره كام يوم

وان شاء الله هاتبقى سنه احسن من اللى قبلها
مافيش حاجه بتفضل على حالها ويارب يحقلك كل اللى بتتمنه ان شاء الله

على فكره حلو اوى البلوج بتاعك

مدونة الدفاع يقول...

السلام عليكم ازى حضرتك يا دكتوره
ايه ده هو احنا بقينا فى 2008 محدش قالى
معنى كده بقى ان اجيب نتيجه جديده ولا بتاعت السنه اللى فاتت تنفع ؟؟؟؟؟؟؟الا صحيحهو احنا بقينا فى 2008 بالتقويم بتاع الحكونمه ولا هى لها تقويم خاص بيها ؟ اكيد لها تقويم خاص بيها لانها متعرفش اننا بقينا فى 2008 ويمكن احنا بس الى بقينا فى 2008 والحكومه لسه مجتش يمكن حصلها حاجه اخرتها والغايب حجته معاه
وكل سنه وانتوا طيبين على بال ما الغايب ربنا يكرمه ويجيلنا
الا بالمناسبه هاتجيلنا فين؟؟احسن تيجى وماتلقيناش عموما خلينا متاخرين وماشيين واحده واحده احسن نتوه منها ولا حاجه

zordeak يقول...

كل سنة وانتى طيبة

انا شايف فى عينك نظرة تفاؤل

مش واخدة بالك ولا ايه

احنا فى مصر يا عبلة


:D

يعنى كل الحاجات دى احلام يبدو انها لن تتحقق الا على جثثنا

كل سنة وانتى طيبة

وبكرة احسن ان شاء الله

:)

نهى منير يقول...

سنة جديدة سعيدة على كل الحبايب
بـــاى

مروة الزارع يقول...

صباح الفل الأول

انا داخلة اقولك انى فهمتى قصدى فى اخر تدوينة غلططط

خشى شوفى التحديث وقوليلى رأيككككككك

مستنياكى

شقاوة شعب يقول...

الامل دايما موجود

لكن عمر الدول والاحداث العالمية مش بيقاس بالايام ولا بالشهور
ده سنين طويلة وعقود
فالتغيير لازم هيحصل ... وان شاء الله مسيرك تصحى يوم تلاقى كل اللى نفسك فيه اتحقق والاحوال انصلحت
لكن قبل اليوم ده لازم يسبقه ايام كتير فى جهد كبير مبذول مننا عشان نتغير
ونغير فى اوضاعنا

تحياتى
شيماء

bos bos يقول...

يا خبر انتى كنتى متخيلة انك هتصحى او يوم فى السنه تلاقى تغيير دى كانت تبقى معجزة
لو تفتكرى أحنا كل سنه نقول السنه الجاية هتكون أحسن والسنه اللى بعدها نفس الكلام
جايز فيه ناسى بتحصل لهم احداث سعيدة على المستوى الشخصى وناس لا
ولكن على المستوى العام الحكاية زادت عن حدها قوى

بت خيخة وأى كلام يقول...

اولا
انا بتلخبط ماعرفش لحد دلوقتى لزومه ايه اكتر من مدونة لشخص واحد
وببقى مش عارفة اجى المدونة هنا ولا اروح مدونة على طول الحياة
بالنسبة لموضوع البوست
انا شايفة
انه ممكن يكون فى تغيير فردى
يعنى هتلاقى نفسك انتى اكيد فى نهاية السنة دى هيكون حصللك تغيرات ومافضلتيش محلك سر
هتلاقى عند كل شخص لو قعد يقول انا زى النهاردة السنة اللى فاتت غير السنة اللى قبل اللى فاتت
اكيد بيحصل تغيرات فى حياتنا
لكن على المستوى العام
بنحس ان احنا محلك سر
يعنى هتلاقى ان طابور العيش مازال موجود وهتلاقيه انه كان موجود من ايام اجدادنا
والحفرة هتلاقيها موجودة وهتلاقى الحروب مازالت شغالة وهتلاقى ناس بتموت وناس بتتولد وناس بتسافر وناس بترجع وتحسى ان الدنيا زى ما هى
لكن الاكيد ان الناس مش زى ما هما اكيد من جواهم اوى من معاميق معاميقهم هتلاقيهم اتغيروا
فيه ناس بتتغير للاحسن
وناس بتتغير للاسوء
وفى ناس بتتغير لكدة شوية ولكدة شوية
لكن صعب انك تلاقى اى انسان بتعدى عليه سنة وبيفضل زى ما هو لازم هيكون فيه نسبة تغيير
وتحياتى ليكى
سلام
اختك خيخة

بحبك يامصر يقول...

السلام عليكم
ان شاء الله يا دكتوره التغيير جاى بس التغيير مش بيحصل بين يوم وليله هو صحيح الحكايه طولت بس لسه ما انش الاوان وربنا عند حسن ظن عبده به وان شاء الله عندنا حسن ظن بالله انه هيبعتلنا التغيير
بس التغيير له ثمن لازم الكل يدفعه لازم نشارك فى التغيير كلنا لازم نتقدم ناخد حقوقنا لازم ولازم ولازم حاجات كتيره

خمسة فضفضة يقول...

السلام عليكم ورحمة الله وبركاته

مبروك علي اول تعليق
ليك عندي هديه دستين مناديل وعلبة ادامين لزوم انفلوانزا الطيور
:-D

وادينا متفائلين وان شاءالله القادم يكون احسن

خمسة فضفضة يقول...

السلام عليكم ورحمة الله وبركاته

باشمهندس عصفور
ولا 1/2 ولا1/3 ولا ليها توقيت
ربنا يسترها معانا

خمسة فضفضة يقول...

السلام عليكم ورحمة الله وبركاه

البنت الشلبيه

وانت طيبه يا عسوله وان شاء الله ربنا يستر والسنه دي ماتكونش زي اللي قبلها

نورتيني يا شوشو

خمسة فضفضة يقول...

السلام عليكم ورحمة الله وبركاته

د/ حماس
عارفه بس اهو الواحد قال يبدأ السنة الجديده بالامل يمكن لعل وعسي
وادينا بنغير في نفسنا ومستنيين التغيير في كل حته بفارغ الصبر

بالنسبه للتليفيزيون هو تليفيزيون الصيدليه كده لو طفيته ورجعت ادته تاني جيب اول قتاه ...معلش بقي من العصر الحجري
اعمل ايه بقي بس ماتقلقش انا قلبت القناه علي طول

كل سنة وانت الي الله اقرب وعلي طاعه ادوم

نقطة مية يقول...

كل سنة و انت طيبة و يا رب عام سعيد عليكي..اما مصر فلها الله لان مصايبها مبتوقفش..ربنا يستر والله
نورتيني بزيارة مدونتي المتواضعة
تحياتي

خمسة فضفضة يقول...

السلام عليكم ورحمة الله وبركاته

رفقة عمر

علي رايك الحال بيسوء يوم بعد يوم
فعلا ربنا يسترها معانا

خمسة فضفضة يقول...

السلام عليكمورحمة الله وبركاته

محمود الدوح
ربنا يكرمك اتفضل الصور والمدونه كلها تحت امرك
كلامك فكرني بايم السادات
عام الحسم
وعام كذا وعام كذا
ربنا يستر ويكون التغيير اللي مستنيينه للاحسن

تحياتي

خمسة فضفضة يقول...

السلام عليكم ورحمة الله وبركاته

ام البنات
ايه النور اللي هل علينا ده ، كل سنة وانت طيبه انت والبنات وابو البنات
ويارب اللهم استجيب لدعائك اللهم زدنا صبر وايمان ورضا

منوراني

خمسة فضفضة يقول...

السلام عليكم ورحمة الله وبركاته

Mustafa Şenalp
THANK YOU

خمسة فضفضة يقول...

السلام عليكم ورحمة اله وبركاته
الطائرالحزين
الحمد لله كلنا عارفين احنا عاوزين ايه
المهم الناس اللي فوق هما اللي يعرفوا الشعب عاوز ايه

مش زعلانه ولا حاجه ، هو انا اقدر
بس انا باجي اقرا واحاول اعلق مش بلاقي كلام خالص يناسب الموضوع فاباخد بعضي من سكات وبمشي
عموما اوعدك اني ان شاء الله ابقي باعلق دايما

نورتني

خمسة فضفضة يقول...

السلام عليكم ورحمة الله وبركاته

الربان

حمد الله علي السلامه
كل سنة وانت الي الله اقرب وعلي طاعته ادوم

تحياتي

خمسة فضفضة يقول...

السلام عليكم ورحمة الله وبركاته
احمد رفعت

انت كمان اظاهر دي ظاهره عامه ولا ايه

كل سنة وانت طيب

خمسة فضفضة يقول...

السلام عليكم ورحمة الله وبركاته

انسانه

تصدقي فكره واهي تنفع الاجيال القادمه
:-D
ربنا يستر

نورتيني يا يويو ازيك كاميكاز

خمسة فضفضة يقول...

السلام عليكم ورحمة الله وبركاته
استاذ محمد الجرايحي

ان شاء الله يا استاذي العزيز
الله يبارك فيك وكل سنة وانت طيب

خمسة فضفضة يقول...

السلام عليكم ورحمة الله وبركاته
مروه الزارع

وانت طيبه يا مرمر

هو احنا فيه حليتنا الا الامل يامرمر

ان شاء الله مانوصلش ل 2500 يمكن علي 2499 كل حاجه تبقي تمام

خليكي متفائله

:-D

خمسة فضفضة يقول...

السلام عليكم ورحمة الله وبركاته

كفراوي

للاسف

خمسة فضفضة يقول...

السلام عليكم ورحمة الله وبركاته

الفاتح الجعفري

يارب اللهم آمين
عاوزين نلحق نشوفله واسطه يخلصوه بسرعه خليه يلحق يجي قبل 2010

خمسة فضفضة يقول...

السلام عليكم ورحمة الله وبركاته

اميرة ويلز

ان شاء الله يكون آخر الضلمه دي نور ويارب مايكونش لسه فاضل كتير

نورتيني

خمسة فضفضة يقول...

السلام عليكم ورحمة الله وبركاته

شيكابالا

وانت طيبه يا شيكو ، عاجبك كده اهو الاهلي خرج من الكاس بفي بالذمه ده اسمه كلام 2008 تعمله فينا
:-D

خمسة فضفضة يقول...

السلام عليكم ورحمة الله وبركاته

عاشقة الفردوس
يارب يكون اليوم ده قريب وما يطولش الوقت بينا واحنا بنستناه

كل سنة وانت الي الله اقرب وعلي طاعته ادوم

نورتيني

خمسة فضفضة يقول...

السلام عليكم ورحمة الله وبركاته

فرنسا هانم
ايه الخطوه العزيزه دي ، شربتي حاجه ولا لسه

شوفي يا خاله احنا ضغطنا عليه بكل قوتنا انه يوافق اربع بس مرضاش وراسه والف سيف لايجي تلات

ابن اللذينا شكله كده متواطء مع الحكومه
:-D

خمسة فضفضة يقول...

السلام عليكم ورحمة الله وبركاته

باشمهندس مراكبي

ايه كل التفاؤل ده
خلي شويه للسنه الجايه
:-D

خمسة فضفضة يقول...

السلام عليكم ورحمة الله وبركاته
ميرميد
وانت طيبه ياقمر
ان شاء الله اجي علي طول ، انت عسوله ومدونتك عسوله زيك
نورتيني

خمسة فضفضة يقول...

السلام عليكم ورحمة الله وبركاته

اخف دم

اهلا اهلا يا اشرف والله فرحت اوي لما لقيت تعليقك وسط التعليقات
كل سنة وانت طيب
واقولك بقي انا هاريح دماغي لاهاشوف العالم بتاع الجزيره ولا بتاع صباح الخير يامصر
وهاشرب اللبن واغسل سناني وانام

نورتني وكل سنة وانت طيب

خمسة فضفضة يقول...

السلام عليكم ورحمة الله وبركاته
محمد عبد الغفار

صدق الله العظيم
وآدينا بنحاول نغير من نفسنا

خمسة فضفضة يقول...

السلام عليكم ورحمة الله وبركاته

د/عماد
يارب
كل سنة وانت طيب

خمسة فضفضة يقول...

السلام عليكم ورحمة الله وبركاته

باشمهندس محمد الراقص مع الذئاب

الحمد لله انها كانت كويسه بالنسبه لك يارب تفضل كده للآخر

كل سنة وانت طيب ويارب السنه دي تحقق كل امانيك

شوف ياسيدي الحفره اللي عامله زي التل دي ايه ،بيحفروا وبيرموا اللي بيطلع علي جوانب الحفره وكمان بنوا اوده حوالين ماسورة الميه الام ورمو بواقي الطوب والرمل برضوا علي جوانب الحفره فبقت عامله زي التل الصغير تطلع عليه تلاقي في وسطه الحفره اللي بقت اوده سقفها مفتوح والمفروض يجيبولها غطا زي بتاع البلاعات بس ماحصلش وبقالها علي كده حوالي شهر
و طبعا الحفره مش بتبقي تل الا فيين ....ايوه شاطر ....في مصر ام العجايب
:-D

كل سنة وانت طيب كمان مره

نورتني

خمسة فضفضة يقول...

السلام عليكم ورحمة الله وبركاته
مطرح ماترسي دقلها

ما انابقول كده برضو كانت جامده آخر حاجه الهي لا يرجعها
:-D

شكرا علي ذوقك
كل سنة وانت طيب نورتني

خمسة فضفضة يقول...

السلام عليكم ورحمة الله وبركاته

مهندس مصري
كتب الوزاره دي باحس انها دايما جايه من كوكب تاني وبتتكلم عن ناس تانيين خالص
ربنا يهديهم

ان شاء الله ربنا يسترها معاك ويعديها علي خير السنه دي وتبقي كويسه والمشاكل دي كلها تكون حاجه عارضه

كل سنه وانت طيب

خمسة فضفضة يقول...

السلام عليكم ورحمة الله وبركاته

باشمهندس ماعلينا

اخيرا لقينا واحد مش متشائم
اهلا بك في نادي المتفائلين للابد
:-D

خمسة فضفضة يقول...

CresceNet
مش فاهمه حاجه

يارت حد يترجم يا جماعه

خمسة فضفضة يقول...

السلام عليكم ورحمة الله وبركاته

شريف
كل سنة وانت طيب

يارب يسمع من بوقك ربنا
تكون سنه سعيده علينا كلنا وعلي كل المصريين

خمسة فضفضة يقول...

السلام عليكم ورحمة الله وبركاته

سها
كل سنة ووانت طيبه ، ويارب يكون فيه تحسن ولو بسيط في 2008 نتمني علي الله انها ماتكونش في وحاشة 2007

ان شاء الله ابعتلك الايميلات حالا

نورتيني

خمسة فضفضة يقول...

السلام عليكم ورحمة الله وبركاته

دنيا محيراني
ان شاء الله ربنا هايستر
و خالينا متفائلين اما نشوف اخرتها ايه

كل سنة وانت الي الله اقرب وعلي طاعته ادوم

خمسة فضفضة يقول...

السلام عليكم ورحمة الله وبركاته

جمعاوي روش طحن

الله يكون في عونك وعون كل الطلبه
فكرتني باوراق الاجابه اللي فعلا عمرها ماكانت بتكفي

كل سنة وانت طيب وان شاء الله السنه اللي جايه تكون مافيهاش امتحانات

خمسة فضفضة يقول...

السلام عليكم ورحمة الله وبركاته

محمد فوزي آل ربيع

فعلا ماكانتش طبيعيه ، كانت رخمه زياده عن اللزوم
ههههههه
الظاهر كده ان معهد البترول لسه مأثر عليك
نورتني وكل سنة وانت طيب

خمسة فضفضة يقول...

السلام عليكم ورحمة الله وبركاته

فتافيت

وانت طيبه يا فتفوته

ان شاء الله يارب يسمع من بقك ربنا

شكرا علي ذوقك
نورتيني

خمسة فضفضة يقول...

السلام عليكم ورحمة الله وبركاته

مدونة الدفاع
كل سنةوانت طيب يا استاذ اسامه حمد الله علي السلامه ايه الغيبه الطويله دي

طبعا الحكومه ليها تقوميها الخاص انت عاوزها تبقي زي عامة الشعب كده وتدخل معاه 2008
الحكومه بتاعنا لسه عايشه في سنة 1008 وقدامها ياما علي ماتفوق ماللي هيا فيه
وآدينا مستنين ربنا يسهل وتوصل وماتوهش
بس حد يبقي يقولنا هانقبال فين اصلي مش عارفه


نورتني

خمسة فضفضة يقول...

السلام عليكم ورحمة الله وبركاته

zordeak

د/احمد فؤاد

في عنيا انا ؟؟؟ شفتها امتي دي دانا لابسه نظاره ومش باين من عنيا حاجه
:-D
كل سنة وانت طيب
خليك متفائل

خمسة فضفضة يقول...

السلام عليكم ورحمة الله وبركاته

نهي منير

كل سنة وانت طيبه يا عسوله
نورتي مدونتي المتواضعه ويارب دايما

خمسة فضفضة يقول...

السلام عليكم ورحمة الله وبركاته

مروة الزارع
رحت يا ستي وسبت تعليقي هناك
يارب ماتكونيش زعلانه

خمسة فضفضة يقول...

السلام عليكم ورحمة الله وبركاته

شقاوة شعب
يارب يكون اليوم ده قريب
قولي آمين

كل سنة وانت طيبه يا شوشو
نورتيني

خمسة فضفضة يقول...

السلام عليكم ورحمة الله وبركاته

بوس بوس

تقولي ايه بقي خيالي المريض صورلي كده
:-D
وقلت نبتديها بشوية تفاؤل علي الصبح
بس للاسف الواقع اللي احنا فيه ده ماتنفعلوش شوية تفاؤل ، دا عاوز معجزه علشان يتغير
ربنا يسترها ويكون قريب

كل سنة وانت طيبه

نورتيني

خمسة فضفضة يقول...

السلام عليكم ورحمة الله وبركاته

بت خيخه

طيب استني خدي نفسك مالمشوار الاول داخله فيا شمال علي طول كده
:-D

شوفي يا ستي هنا هو الاساس اما هناك بقي مش هاتبقي كتابه بانتظام ممكن مرتين في الشهر ودمتم وده علشان ماكنتش عاوزه حكايات الصيدليه تتوه وسط الحاجات التانيه
ولما ان شاء الله انزل بوست هناك هابقي اعمل اعلان هنا علشان ماتتعبيش
قولتي ايه ؟؟
------
الحمد لله فيه طبعا تغيرات كتير حلوه حصلتلي السنه اللي فاتت كفايه اني حجيت و عملت البلوج ةواتعرفت علي احسن ناس زيكم
وطبعا ندعي ربنا ان التغيير للاحسن يشمل كل حاجه في البلد مش الامور الخاصه بتاعنا وبس

كل سنة وانتي طيبه

خمسة فضفضة يقول...

السلام عليكم ورحمة الله وبركاته

بحبك يا مصر

ان شاء الله ويارب يكون قريب
بس ياريت مايغلوهوش علينا زي ما كل حاجه غليت

كل سنة وانت طيب

خمسة فضفضة يقول...

السلام عليكم ورحمة الله وبركاته

نقطة ميه

وانت طيبه يا عسوله وان شاء الله تكون سنه سعيده عليكي وعلي مصر وعلينا كلنا

انت اللي منوراني ويارب دايما

تليفزيون ملون يقول...

ماهو للأسف الموضوع مش مجرد فرق ايام ولا حته سنه .. الموضوع اعمق بكتير ... احنا محتاجيت وقت كبير نعالج فيه كلاكيع فى بلدنا تركمت عبر اجيال .. مجتمعا و حكوما ...

بس الواحد بيأمل خير برده .. و رغم كل شىء ..

مبرمج حر يقول...

:)

انا فاهم كويس رصدك للتناقض بين الواقع اللى مش عايز يتغير , وبين الكلام الوردى المعسول فى التليفزيون مثلا لكن
2007
كسنة زى أى سنة بيبقى ليها وجهين .. وجه على مستوى الشخصى ووجه على المستوى العام .. المستوى العام طبعا يقرف ويورث الاحباط اللامحدود .. لكن على المستوى الشخصى مش بيبقى كلها وحشة اوى .. هتلاقى فى احداث حلوة واحداث وحشة
هتلاقى حزن وفرح .. هتلاقى مكسب وخسارة .. هتلاقى اوقات تفاؤل وأوقات تشاؤم .. هتلاقى فيه منحنى طالع ونازل .. وممكن تلاقى الاوقات السعيدة فيها أكتر بكتيييييييير من الاوقات الكئيبة .. احنا متفقين على ان 2007 على المستوى العام والمحلى والدولى مش حلوة خااااااالص .. لكن 2007 أو اى سنة غيرها مش فيها المستويات دى بس , فيها مستويات تانية مهمة جداً لتقيمها كسنة .

تحياتى ليكى
:)

Ma 3lina يقول...

نعيب الزمان و العيب فينا

يالا ماا علينااا

كائن نورانى يقول...

العيب فى مين يا زمن والا الغلط فى مين؟

العيب علينا وفينا ولادى غلطة مين؟


العيب مش فى 2007 ولا حتى 20020

العيب فينا

هقلك كدا على مشهد

عندنا فى جامعة المنصورة

دكتور تم اعتقاله من منزله الساعه 2 بعد نص الليل


وهو كمان ساكن فى مساكن الجامعه

تعرفى كان الموضوع هيوصل ل6 شهور اعتقال

رئيس الجامعه دخل فى الموضوع واساتذة الكلية كلهم قالو لو لم يتم الافراج عنه صباح غدا

سيتم اعتصام فى الجامعه ولن تعقد
امتحانات نصف العام

ووقفو وقفة جامده جدا

تعرفى ايه اللى حصل

تم الافراج عنه الساعه 12 الضهر تانى يوم

دا بس اكبر دليل اننا احنا اللى خايبين

بس فى امل الناس بدات تفوق

وربنا يسهل وتبقى الحياة بمبى بقى زى ماكنتى متخيلة انك هتشوفيها فى 2008

اللهم لا تسلط علينا بذنوبنا من لا يخافك ولا يرحمنا

تحياتى لسعادتك يا فندم

وينكى يقول...

كل سنه وانتم طيبين
وحبيت أعزمكم على حفل افتتاح دار الكتب بتاعت صاحب البوابه , زميلنا البلوجرى الفظيع
ودا هايكون يوم الخميس 10 يناير الساعه 6 مساءا فى مكتبة البلد , 31 شارع محمد محمود بالتحرير
عاوزين تواجد مكثف هناك
مستنيينكواااااااااااا

د/اجدع بنوته يقول...

ياااااارب تكون سنه سعيده عليكى وتحققى كل اللى بتتمنيه

ومش انتى بس لا وكل العالم

معتقدش ان حاجه م اللى انتى بتقوليها دى هتتحق لا حروب هتقف ولا حفر هتتردم ولا مأذون هيبطل شغل .... هتفضل هموم الناس ومشاكلهم ماشيه زى ماهى

بس تفتكرى لوصبحنا الصبح لقينا كل حاجه جميله ونضيف جدا والحياه بمبى زى مابتقولى تفتكرى هتستمتعى بالحياه دى

همومنا ومشاكلنا بتسيب فينا بصمه وبتنحت ف شخصياتنا معالم بتثقلها اكتر

انا عن نفسى محبش اعيش ف المدينه الفاضله

لو تحبى انتى نحجزلك ع اول مكوك فضائى رياحلها ..

وانا واثقه انك كمان متحبيش

وان شاء الله الاهلى اللى هياخد الدورى والكاس والككزروله كمان ..

وياااااااااااارب كفايه حروب وقتل ودم ونشوف ولاول مره ف حياتنا حمامة السلام بترفرف

وف الاخر اقولك هابى نيوووووو ييرررر

مصطفى السيد سمير يقول...

كل سنة وانتي طيبة دايما

رينـــــــــــا يقول...

السلام عليكم
يا سلام سا دكتور لو مع كل سنه جديدة تتغير الدنيا
دى كانت تبقى حاجة كدا محصلتش واكيد هى مش هتحصل
السنه اللى فاتت هى السنه الجديدة ولا جدييييييييييييييد

دنيتى الجميلة يقول...

كل سنة وانتى طيبة بمناسبة العام الهجرى الجديد1429 ادام الله عليكى وعلى زوجك واسرتك السعادة والهناء وكتب لكى الحج والعمرة

Omar... [ خروشات ] يقول...

يسلام يا دكتورة؟

كل توقعاتك كانت صح...... وعندك حق فيها باستثناء حاجة واحدة بس ....... ناقص حضرتك تضيفى فى رقم السنةالرقم 1 بعد رقم 2 من الشمال

و يدينا و يديكم طولة العمر بقى


كل سنة وحضرتك طيبة

القرآن الكريم