TvQuran

٢٠٠٨-٠٣-٢٥

البيت بيت ابونا "تحديث "




مقتل وإصابة 3 مصريين برصاص طاقم سفينة أمريكية بقناة السويس

هي حصلت ، البيت بيت ابونا والغُرب يجوا ويقتلونا

لما كانت بتحصل علي الحدود كانوا بيسكتونا بكلام من عينة ان دي رصاصه طايشه ، والعسكري ماكانش يقصد ، وان ده كان خطأ بس مأساوي شويه واسرائيل تعتذر وينكفي علي الخبر ماجور وكان الله بالسر عليم

المره دي هايقولوا ايه ، ماهو ما ينفعش تتقيد ضد مجهول ولا الحادثه تبان خطأ من اصله ، وكمان مش منطقي انهم يقولوا ان اللي عمل كده مجنون او هربان من الخانكه زي ما بيحصل دايما ، وهل الاعتذار في الحاله دي ممكن يتقبل ونعديها ولا .......؟؟؟؟؟؟؟؟

تفتكروا مصر ها تلم الحلفا بتوعها ويقوموا جميعا قومة رجل واحد علي امريكا وياخدوا حق الناس دي ، ولا هانطنش كالعاده ، ولا هانكتفي باعتذار وكام دولار تعويض

طيب تفتكروا قيمة التعويض هاتكون اد ايه ؟؟؟؟

وهو ده مش يدخل تحت بند الارهاب ولا له اسم تاني ؟؟
------------------------

تحديث

آخر نكته اتقالت في الموضوع علي لسان المتحدث الرسمي للخارجية الامريكية :


"سفيرنا يعمل الآن مع مسؤولين كبار في الحكومة المصرية، لفهم طبيعة ما حدث"

مشيراً إلى أن مشاورات السفير هناك تنصب على

"التأكد من أن ذلك لن يتكرر ثانية"

طيب سيادته ماقلناش يقصد ايه باللي مش هايتكرر مره تانيه هل إطلاق السفينة الأمريكية النار على قوارب الصيد المصرية، أم اقتراب القوارب من السفن الأمريكية؟؟؟؟؟


٢٠٠٨-٠٣-٢٠

يوم يتيه على الزمان صباحه ومساؤه



بك بشر الله السماء فزينت **** وتوضعت مسكا بك الغبراء

يوم يتيه على الزمان صباحه **** ومساؤه بمحمد وضاء






اللهم ارزقنا حبك وحب حبيبك محمد , وحب أحباب حبيبك محمد
و
صلي وسلم وبارك عليك يا سيدي يا رسول الله


٢٠٠٨-٠٣-١٣

كل سنة وأنتِ حبيبتي

مدونتي حبيبتي انهارده بتطفي اول شمعه ليها


كل سنة وانتِ طيبه يا مدونتي يا حبيبتي

كل سنة وأنتِ لقلبي مصدر النور

كل سنة وأنتِ لروحي مصدر الفرح

كل سنة وانتِ ماليه عليّ الدنيا

عدت سنه بحالها واحنا مع بعض بقيت خلاص ماقدرش استغني عنها ابدا ، من خلالها اتعرف علي احلي ناس ، واحلي صحبه ، اتعرفت علي افكارهم ، معتقداتهم ، قراءاتهم ، قناعتهم ، اثروا فيا كتير ويمكن اكون اثرت فيهم شويه وماعدتش اقدر استغني عن حد فيهم

رجعت قريت كل اللي كتبته في السنه اللي فاتت ، يمكن ماتكونش حاجات حلوه اوي يمكن يكون فيها موضوعات خلت ناس تاخد موقف ضد المدونه عموما وترفض الدخول هنا مره تانيه ، يمكن فيها موضوعات ضحكت ناس وموضوعات ابكت ناس ، يمكن كان فيها حاجات ساذجه ومش علي المستوي المطلوب ،

بس في الاول والآخر مدونتي يعني انا ، وبتعبر عني انا مش حد تاني

قبل ما اعمل مدونة كانت ليا متابعات مستمره لعدد كبير جدا من المدونات ، و قبل خمسة فضفضة بفتره طويله كانت ليا مدونة علي مكتوب مش عارفه ليه مانسجمتش معاها ولا مع مدونات مكتوب عموما ،و حتي لما بتبقي المدونه لواحد مصري ماحسيتش فيها بالنكهه المصريه اللي بلاقيها علي بلوجر

المنتديات اللي كانت اماكني الاولي علي النت خلاص ماعدش ليها مكان علي خريطتي وحتي من قبل ما افتح المدونه ، الا بعض الزيارات المتفرقه لمنتديات صيدلانيه كنت مشتركه فيها بقوه من فتره ، بس مش عارفه ليه فقدت احساس الألفه اللي كنت بحسه معاها ، يمكن لانها اتشعبت لاقسام عده ، يمكن عشان الوجوه اتغيرت ...؟؟؟؟

بس اقدر اقول اني لقيت اللي بادور عليه في المدونات ، اللي بقت بالنسبه لي متنفس جيد جدا ونافذه واسعه تطل علي فضاء كبير اقدر من خلاله اني استمر في الكتابه بالشكل اللي انا عاوزاه وفي المواضيع اللي انا عاوزاها بدون قيود ولا شروط انتساب ،
وحتي لو كانت الكتابه دي مجرد عبث ورغي مافيش منه فايده و ماتهمش حد الا اللي كاتبها ، ابوح بالكلام اللي يجي علي بالي واتكلم براحتي
في المدونات لقيت حاله من الألفه الغريبه وكتير من الحريه
واجمل مافيها هو رحله الاستكشاف اليوميه لمدونات ناس جديده ، عوالمهم وافكارهم ، روحهم اللي بيخطوها جوا تدويناتهم
ناس من كل صنف ونوع ليها اتجاهات وافكار وقناعات مختلفه بيستقبلوني يوميا في بيوتهم الافتراضيه ،
وبستقبلهم عندي علي الرحب والسعه ، وانا حاسه انهم عاوزين يتابعوني فعلا مش داخلين يسيبو تعليق يزود عدد مشاركاتهم وخلاص

عاوزه اشكر ناس كتير اوي كانوا جنبي طول عمري التدويني القصير ده

البنت الشلبيه الزملكاوية الجميله اللي كانت اول حد يعلق عندي

مهند المصري الباحث عن الحقيقة والراقص مع الذئاب كابتن محمد اللي كانت بدايتنا في التدوين سوا تقريبا

وطبعا صرصاره الشهيره بساره

وقبل اي حد ابو يحيي باشمهندس عصفور المدينه اللي باعتبره اب روحي لمعظمنا (معلش هانكبرك شويه يا ابو يحيي ) اللي عمره ما اتأخر عن اي سؤال او مشوره وكان نعم العون في مواقف كثيره جزاه الله خير عننا جميعا

دا غير الناس الجميله اللي عرفتهم بعد كده وحسيت انهم عيلتي الكبيره

ابو فداء "يوميات عيل مصري "

فرنسا هانم

باشمهندس ماعلينا

د/ ماعلينا

بثبوثه او حلم سابقا

الاستاذ محمد عبدالغفار

رينا

عالمي الازرق

جهينه اللي بقالي كتير مقصره معاها

العائشه في الاحلام

خيخه

بنت القمر

سمراء النيل

طعمه

ضاكتور خالد

كلبوزه اللي وحشانا بقالها فتره

طهقان وطهقانه

استاذ جعان

حدوته

حفصه

الطائر الحزين

محمد فوزي ال ربيع

د/ لمااضه

دكتور حر

خالو احمد

شاهي

دوبا

د/ احمد فؤاد مع نفسه

رامي برويد

غاده عاوزه تتجوز

ام البنات

المراكبي

كوكو الكميل

فاطيما
.
.
.
.
.

وكل الناس الحلوه اللي مدوناتهم عندي علي الريدر و بتابعهم واعلق عندهم وحتي اللي بقرأ بس مش
باسيب تعليق ( ماحدش يزعل لو نسيت اسمه )
اشكركم جميعا علي انكم خلقتولي العالم الافتراضي الجميل ده ، و اللي انا عايشه فيه ايام من اجمل ايام حياتي ، و بتواجد فيه اكتر من اي حته تانيه

ربنا يخليكم ليا جميعا


كل واحد ياخد حته من التورته اللي فوق دي بس ماتحفوش




ّلَمّا تدبل عيون المها


في البدايةلم تكن صلتي بها تتعدي السلام عليكم وعليكم السلام فهي تعمل في السيبر المجاور ، جذبتني اليها ابتسامتها الخلابه ووجهها الطفولي الملائكي شديد البراءة وجمالها الآخاذ ، تبتسم لي كلما رأتني


شعرت تجاهها بالاعجاب والحب الشديد فروحها خفيفه و طريقتها في التعامل راقيه

عمرها لا يتجاوز الثامنه عشر حصلت لتوها علي دبلوم تجاره ثم قررت ان تكمل دراستها في معهد عالي سنتين ، علي امل ان تلتحق بالجامعه بعد ذلك



دي كانت مها




لو عاوزين تعرفوا الحكايه







اقروها في علي طول الحياة




٢٠٠٨-٠٣-٠٧

التاج ده جاني ...ورب العرش نجاني


التاج ده بتاع احمد الصباغ طبعا امة لا اله الا الله خلاص جاوبته ، والمفروض اني اكون جاوبته من زماااان اوي بس نعمل ايه في الكسل
برضو التاج ده مررهولي ناس كتير اوي من اللي جاوبوه قبل كده ومش هاذكر اسامي عشان مانساش حد ويزعل مني

نبدأ بسم الله الرحمن الرحيم


هل توافق على حذف خانة الديانة من البطاقة الشخصية ؟

لا طبعا ، وانا احذفها ليه يعني خايفه حد يعرف اني مسلمه
وبعدين الناس اللي خايفيين لا يتم اضطهادهم بناء علي الديانه ، عاوزه اقولهم انه لما مواطن بيكون واقف في طابورالعيش وبيتهزأ ولا بينضرب او حتي بيتقتل مش بيطلبوا منه بطاقته علشان يعاملوه علي اساس دينه
واما بيروح يشتري حاجه يلاقيها اغلي الطاق اربعه مش بيعملولوا خصم لما يطلع بطاقته ويكون مكتوب فيها مسلم
ومافيش حاجه اسمها اضطهاد بناء علي خانة الديانه اللي في البطاقه معموله عشان حاجات تانيه زي مثلا عقود الزواج مش عشان يضطهدوا الناس بيها

عموما ماتقلقوش احنا كلنا مضطهدين حتي العيال اللي لسه في اللفه ولسه ماطلعوش بطاقة رقم قومي وفيها خانة الديانه



ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

احيانا باحس انهم مرضي واحيانا باحس انهم معقدين نفسيا يمكن يكون فيه جزء منهم محتاج فعلا لعلاج نفسي وكتير منهم الكبر واخده والشيطان عامل احلي شغل معاه ومش مخليه حاسس بعظم المعصية اللي هوه بيرتكبها

بس انهم يتمادوا في الخطأ وهما عارفين مليون في الميه انه خطأ وكمان يجهروا بيه ويحاولوا انهم يظهروا بمظهر البرئ اللي مش عامل اي حاجه خالص وان دي حياتهم وهي كده ومش هايغيروها يبقي لا طبعا مافيش هنا حاجه اسمها حرية شخصية
لانهم باعترافهم بجهرهم بالمعصيه بيعرضوا المجتمع ككل للعقاب الرباني لاننا واقفين عاجزين عن انزال العقاب اللي نصت عليه الشرائع السماويه في الحالات اللي زي دي

هل توافق على الاعتراف بالمثليين
لا طبعا لان كده ابقي موافقه ضمنيا علي اللي بيعملوه
وماليش اي اصدقاء منهم

هل تعتقد بوجود إضطهاد للمسيحين فى مصر ؟

يا اخوانا احنا كلنا مضطهدين بل علي العكس لما واحد مسيحي بيجراله حاجه بيلاقي اللي يقف وراه اما المسلمين مالهومش ديه


من هو الشخص الذى تختارة لرئاسة مصر ؟
هو مش حد بعينه
عاوزه واحد يكون ليه كاريزما يلم الناس حوليه ويحلم لهم احلام صعبه ويحققها ، يحبهم ويخاف عليهم ، عنده حكمه ودهاء ، عنده هدوء وعقلانيه يقدر يتغلب بيهم علي اي مشكله تقابله
واسع الصدر وعنده طولة بال ، حازم مع الاعداء يقدر يجيبلنا الحق من بق الاسد نفسه ، قوي في الحق يقدر يقول للغوله في وشها انتِ عينك حمرا
حنين علي الشعب وكفاية الاسية اللي بنشوفها بقالنا 56 سنة

إذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟
ناس كتير اوي علماء وحكماء وادباء وشباب
بس هاطلب من كل واحد يقدم اقرار بكل الفلوس اللي بيمتلكها وهو داخل الحكومه هوه وقرايبه لحد الدرجه الثانيه ، و طبعا مراته وعياله
وقبل ما يمشي برضو نفس الاقرار ولو كسب مليم واحد هو او عيلته مالهومش حق فيه هايتصادر فورا
وكمان هايكون فيه وزن شهري لكل وزير واي واحد هايزيد وزنه عن حد معين هايترفد فورا

لو فزت في الانتخابات ان شاء الله يعني مش هامنع حد انه يشارك المهم يكون بيستحق المشاركه دي وعنده اللي ممكن يقدمه للشعب


فى رأيك الشخصى .. ما هى أفضل مدونة على بلوجر قمت بزيارتها ؟

كتير اوي ماشاء الله البلوجر مليان بالفطاحل

للذكور فقط : أيهما تفضل كزوجة .. امرأة عاملة ، أم ربة منزل ؟

الحمد لله انا انثي او كده بتقول البطاقه :-) يبقي كده السؤال ده ملغي

للإناث فقط : هل توافقين على الزواج من رجل مطلق ؟

انا الحمد لله متزوجه يبقي السؤال ده كمان ملغي :-)


اذا تزوجت وأنجبت ولدين وبنتين .. أى الأسماء تحب أن تسمى ؟

اريج ، سهيلة ، محمود ، عبد الله

هل تعتقد أن توريث الحكم فى مصر . . سيتم فعلا أم لا ؟

توريث مش توريث اونكل جمال هايجي يعني هايجي ، سموها بقي توريث ، سموها حاجه تانيه مش مهم

فى رأيك الشخصى : ماهو أفضل إنجاز للحكومة ؟ وما هو أسوأ عمل قامت به ؟

افضل ........مش لاقيه حاجه

اسوأ ...طيب انت فاضي ولا وراك حاجه ؟؟؟اصل الموضوع كبير




ثم لمن تمرر هذا التاج ؟

اعتقد اني آخر حد يجاوب التاج ده وبكده مافيش حد ممكن امررهوله


٢٠٠٨-٠٣-٠٣

لسة الأماني ممكنة



اتمني ان اتجاوز حدود عالمي
احلق عاليا في سماء الدنيا
افتح بابا علي الحياة و شباكا يطل علي البحر
أشرع نافذة الأحلام الموصدة دائما
ازرع شجرة ياسمين في شارع احلامي
وعليها ارسم وردة حمراء وقلبا يخترقه سهم
اطارد الفراشات ارقص بين الازهار
اقطف نجمات المساء ، واسرق ضوء القمر
يملؤني عبق الياسمين بالنشوة ،
يجعلني اسمو واترفع عن حزن وهموم لا تحصي
تلمس يدي سماء الحريه
و اصل لاركان الدنيا الاربع .



القرآن الكريم