TvQuran

٢٠٠٨-٠٥-٠٢

يمامة بيضا

اغنية يمامة بيضا واحده من اجمل الاغنيات التي كنا نغنيها في فريق كورال المدرسه و مركز الشباب

لا اعرف تحديدا ما الذي جعلها
تقفز فجأه الي ذاكرتي ولكن اعتقد ان زوج الحمام الابيض الرائع - الذي كان يتبادل القبلات علي سطح الجيران- له دور كبير في ذلك ، اسبوع واكثر ولحنها يملؤني ، بادندن بيها في الرايحه والجايه


اشعر بنشوه وسعاده بالغه وانا ادندن لحنها العذب الجميل ،
يوميا بعد العصر اخرج الي الشرفه لأرقب زوج الحمام الابيض وهو يهم عشقا غير عابئ بالدنيا من حوله وكأن الكون اختصر في هذه المساحه الصغيره التي تضمه

تزداد نشوتي اكثر عندما يهب نسيم خفيف من مزارع الفاكهة القريبة
محمل برائحة الزهور ،
فانسي العالم من حولي وانسي نفسي ايضا واعود الي هناك ، الي حجرة الموسيقي في المدرسة الابتدائية ،و ادندن

يمامة بيضا ومنين اجيبها
طارت يا نينه عند صاحبها

و علي الرغم من كونها قديمه جدا- من اغاني منيرة المهدية - إلا إن كلمات يمامة بيضا غايه في الرقه

تحكي عن بنت صغيره تعشق يمامه لونها ابيض ( في الاغنيه الاصليه يمامه حلوه ) ، تراها فتأ
خد قلبها ثم تطير بعيداً بلا عوده ، فضلت ان تكون بصحبة البلبل الذي اسرت قلبه هو ايضا واراد ان يتعلم لغتها

تحكي لنا مشاعرها من خلال اغنيه في منتهي العذوبة والرقة

يمامة بيضا ومنين أجيبها
طارت يانينه عند صاحبها

وخدها البلبل وطار وياها
قصده يانينة يعرف لغاها

شعرها يهفهف وعلي ترفرف
وأنا بدي أعرف مطرح ماهيا

شعرها أصفر حلو ومضفر
ماشيه تتمخطر قلبي عشقها

طارت في قصري إمبارح العصري
و صاحبها المصري طالع يجبها

جم يخطبوها مني ويخدوها
ويسجلوها في الحقانية

البلبل خدها وطار وياها
بده يانينة ياعرف لغاها

يمامة حلوة ومنين أجبها
طارت يانينه وقلبي هواها




84 comments:

فرنسا هانم يقول...

تحياتى يا دكتوره
انا بحب الاغنيه دى جدا
وكنا بناخدها زمااااااااااااااان برضه ايام المدرسه فى الابتدائى
ولكن كان فى تغير عندنا فى كلماتها
يعنى الكوبليه بتاع البلبل
كنا بنغنيه
وخطفها البلبل وطار وياها
اصله يانينا يعرف لغاها
يمكن مدرس الموسيقى عندنا غير شويه فيها
تحياتى لكى

كاميليا بهاء الدين يقول...

أغنية جميلة أوى

لحنها فى منتهى الروعة
وسهل جدا
كنت باعزفه زمان برضو فى فريق الموسيقى

يااااااه كانت أيام جميلة

تحياتى

صحفية روشة يقول...

تالت كومنت
هههههههههههههه
والله الاغنيه دى ظريفة اوى
انتى وفرنسا عارفينها
مكنتش على جيلى خالص
:) تحياتى
__________________________________
ميفوتكش البوست الجديد (شيوخ على ما تفرج)
__________________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية

رئـــــيسـة حزب الأحلام يقول...

اغنية جامدة اوى بحبها وكلماتها جامدة

خمسة فضفضة يقول...

السلام عليكم ورحمة الله وبركاته

اهلا فرنستي الغاليه ايه النور دا كله

تقريبا زمان كانت المدارس كلها بتغني نفس الاغاني
مش مشكله التغيير في كلمه ولا اتنين انت عارفه اصلا ان فيه تغيير في الكلمات كتير اوي عن الاصل بتاع منيره المهدية
وشايليين كوبليهات بحالها وحاطين غيرها
حتي التمبو اسرع من الاصل


نورتني يا قمر

Unknown يقول...

يا خبر
تصدقي بقى اني لسه اول امبارح وانا في الصيدليه
منزلاها وقاعده اسمعها
الاغنيه دي بالذات

خمسة فضفضة يقول...

السلام عليكم ورحمة الله وبركاته

كاميليا

صحيح كانت ايام جميله وعمرها ما تتعوض تاني

منوراني ويارب دايما

خمسة فضفضة يقول...

السلام عليكم ورحمة الله وبركاته

صحفية روشه

ايه النور دا كله اللي ملا المدونه

معلش اغنيه عواجيزي شويه بس بترجعني لايام جميله جدا

ان شاء الله ازورك واشوف البوست اللي اكيد هايكون جميل

سلام

خمسة فضفضة يقول...

السلام عليكم ورحمة الله وبركاته

رئـــــيسـة حزب الأحلام

دا انت من جيلنا بقي
كنتوا بتغنوها في المدرسه ؟؟


نورتيني

خمسة فضفضة يقول...

السلام عليكم ورحمة الله وبركاته

لماضه

كده تبقي بصره يا مرمر
هههههههههه

انا كمان لسه لقياها انهارده مع اني بادور عليها بقالي فتره

بس اكتشفت ان ابلة الموسيقي كانت عامله تعديل رهيب في الكلمات مش كده

منوراني يا رورو

دكتور حر يقول...

والله انا عشت معاكم المعاني
والاحاسيس الحلوه
بتاع الاوصاف

لكن كنتي ابعتيلنا رابط ليها ولا حاجه

نعيش معاكم


ربنا يكرمك وتروقينا دايما يا ضاكتوره

تحياتي

الفقيرة إلى الله أم البنات يقول...

خمسه فضفضه
بصراحه انا سمعتها فى احد افلام الثلاثيه
وكنت بغنيها لمريم بنتى وهى صغيرة
تقريبا ده سبب انها طلعت أهلاويه
ياريتنى ما غنيتها لها
بجد كلمات جميله
فضفضه...وحشتينى
قريب ان شاء الله انزل جزء من المطحونه...تصورى الزحمة فى الوقت مش مخليانى عارفه اكتب حاجه
وكمان الدايل اب الرخم ده...ربنا يستر ..الفاتورة هتفضحنى
بس مش عارفه اعيش من غير الناس اللى بحبهم
ربنا يرضيك ويراضيك يارب

بنت الصالحين يقول...

ايه الرومانسيه دي


ماشي يافضفض

سلام ياقمر

فاتيما يقول...

للأسف مكنوش بيغنوها عندنا فى المدرسة كانوا بيغنوا أغانى وطنية مملة و سخيفة و زهقنا منها
و لحسن الحظ مكنش ليا مكان بينهم كنت بحب على الحجار كان لسه طالع يادوب بيقول على اد ما حبينا
إنتى رومانسية خالص بقى و عندك حنين للماضى زى حالاتى و الظاهر حالاتنا كلنا
كل ما الحاضر يضيق علينا و يعكننا نهرب من نكده على إمبارح يمكن نصفى و نعرف نعيش
تحياتى يا حبيبتى يا يمامة بيضا

محمد عبد الغفار يقول...

برنامج الموسيقى العربية للدكتوره رتيبه الحفنى على القناه الأولى الخميس من كل اسبوع الساعه الثامنه

اله يرحمه

غير معرف يقول...

اغنية جميلة
ورقيقة
يمكن عشان كدة روحك مقدرتش تسيبها اسبوع بحاله

شــــمـس الديـن يقول...

اول مرة اسمع الاغنية دي كانت في فيلم حرب الفراولة بتاع يسرا ...

و مكنتش اعرف ابدا انها لمنيرة المهدية

اكيد علي فكرة هي من قبل منيرة دي تراث

بدليل ان كل واحد بيغنيها بمذاجة و بتتغير من مكان لاخر

و الله كويس ان كان فيه علي ايامك يا فضفضة اغاني انا الكورال لحقتة لما كنت في اولي حضانة بس :)

اهو ده عيبه يقول...

فعلا الاغنيه جميلة جدا
وبيتهيالى مفيش حد مش عارفها

الطائر الحزين يقول...

عمرى ما شفت يمامة بيضا ابدا

كلها حمرا

آفاق الحرية يقول...

هههههههههههههههه
ايه الحلاوة ده يادكتورة
يمامة بيضا مرة واحدة
يااااه
رجعتينا لعصر الطفولة والمدارس
كانت ايام حلوة

أبو خالد يقول...

السلام عليكم ورحمة الله و بركاته
الدكتوره الفاضلة
أختيار جميل رقيق
كانت زمان نسمعها فى الراديو
دائما و تقريبا يوميا
تصورى يا دكتورة كنا زمان نسمع
أكثر مما نرى ..فكانت الأذن حساسة
و كانت الأذاعة لها تقاليد ثابتة
مثال قرآن الثامنة و بعده نشرة الأخبار و كله يدخل ينام
و بابا شارو ..ياه
و لما فتحوا التليفزيون
ماما سميحة و كورال الأطفال
..أرجعت لى صور فى الذاكرة
جزاك الله خير..

mohand يقول...

السلام عليكم

وانا كمان فاكرها من ايام حفلات المدرسة بس مش حافظها كلها كده


تحياتي

Jana يقول...

الله عليكى
اغنية يمامة بيضا ..وانا هويت لسيد درويش من احلى واجمل الاغانى القديمة واللى ليا معاهم ذكريات حلوة
كنت باستنى د. رتيبة الحفنى مخصوص عشانهم

بس ايه التفرقة دى ؟؟اشمعنى انتى ؟؟
انا كنت باغنى فى الكورال ...مصر التى فى خاطرى ..ولما نروشن يعنى نغنى ..يا ماما ياما ياماتى

الله يكرمك
ايييييييييييه
فكرتينى بايام حلوة

غير معرف يقول...

خمسة فضفضة

تعرف انى اول مرة اسمع عنها انهاردة بس بجد حلوة قوى

اللى انا اعرفها بقة بتقول يمامة بيضة لفلفت فوق راسى

معرفش دى تبقة تبعها ولا

لكن ميرسى لكى وتحياتى

خمسة فضفضة يقول...

السلام عليكم ورحمة الله وبركاته

دكتور حر

ربنا يخليك يا محمد ومايحرمنيش من ذوقك

الحمد لله انك اتبسط

----------
ام البنات
حبيبة قلبي الغاليه وحشاني موت

ومعلش مقدره ظروفك ربنا يسهل وتقدري تدخلي دي اس ال قريب

طيب مش كنت تغنيها لكل البنات لعل وعسي نقدر نقضي علي المد الزمالكاوي في العيله عندكم
:-)

ممكن تزوريني طبعا علي الفيس بوك ودي صفحتي
http://www.facebook.com/profile.php?id=752051806

منوراني

-----------

عاشقة الفردوس

شويه من نفسي يا شوشو واهو حاجه حلوه في وسط ميت حاجه مش ولابد
الحمد لله

منوراني يا قمر

صاحب المضيفة يقول...

الله عليكي يا دكتورة


ذكرتينا بالذي مضى

دائما كانت أيام الطفولة من أرق الأيام وأحلاها


دمت بسعادة وهنا

خمسة فضفضة يقول...

السلام عليكم ورحمة الله وبركاته

فاتيما

كلنا عندنا حنين للماضي ده اللي اكتشفته من اللف علي المدونات ، واصلا يا طمطم الحال اليومين دول هو اللي بيخلينا نحن دايما للماضي

احنا كمان كنا بنغني اغاني وطنيه خصوصا بتاع ام كلثوم بس كمان كان في اغاني من دي زي يمامه وقمر له ليالي وغيرها

سلام يا قمر

-----------

محمد عبد الغفار

ايوه الله يرحمه ويحسن اليه ، هي الدكتوره رتيبه لسه عايشه ولا الله يرحمها هي كمان ؟؟؟


----------

مصطفي السيد سمير

يمكن بس الاكيد عشان هي بتفكرني باحلي ايام

نورتني

--------

اهو ده عيبه

تقريبا كلنا كنا بنغنيها زمان عشان كده تلاقي معظمنا فاكرها

سلام

خمسة فضفضة يقول...

السلام عليكم ورحمة الله وبركاته

شمس الدين

تصدقي اول مره اخد بالي انها اتغنت في حرب الفراوله

بس ماعتقدش انها اتغنت قبل منيره المهديه

هو الكورال لغوه بعد الحضانه ولا ايه ، انا فاكره كان في اخر كل سنه بيبقي في حفله كبيره جدا لكل فرق الموسيقي لكل المدارس الابتدائيه علي المسرح الكبير بتاع نادي الشباب
بس مش عارفه لسه ولا خلاص لغوها

منورانهي يا شموسه

خمسة فضفضة يقول...

السلام عليكم ورحمة الله وبركاته

الطائر الحزين

فعلا لما كنت بادور علي صوره للموضوع قريت ان النوع ده من اليمام نادر جدا جدا ويكاد يكون غير موجود
بس خد بال حضرتك ان الاغنيه الاصليه بتقول يمامه لوه مش بيضا

منورني


-------------

آفاق الحريه

ربنا يخليك شكرا علي ذوقك
الحمد لله انها كانت ايام حلوه
:-)
منورني

---------

ابو خالد

وعليكم السلام ورحمة الله وبركاته

جزانا الله واياكم كل الخير

ايوه فاكره الراديو كنا بنعرف الساعه من البرامج مش من اننا نبص للساعه ، كل برنامج كان له ميعاده المحدد اللي عمره ماكان بيتغير

بس انا مالحقتش بابا شارو كنت علي ايم عمو حسن وابله فضيله

والصبح كان في فونتاستيكا علي الشرق الاوسط بتاع ايناس جوهر

وكانت الحكايات الغير مرئيه بتخلينا نشغل خيالنا ونشوفها احسن من لو كانت متصوره
خصوصا الصور الغنائيه بتاع البرنامج العام زي عوف الاصيل والندورما وعواد باع ارضه

نورتني

خمسة فضفضة يقول...

السلام عليكم ورحمة الله وبركاته

مهند

تلاقيك ماكنتش بتحفظ بضمير
هههههه

سلام

---------

jana

تقريبا يا جنة كانت فيه حاجات كلنا بنعملها زي بعض في نفس الوقت
فاكره يا واش يا واش يا مرجيحه

احنا برضو كنا بنغني الاغاني الوطنيه دي وياماما يا اما يا مامتي

بس كان في كمان يمامه بيضه وقمر له ليالي وغيرها من اغاني التراث دي

وومش عاوه اصدمك بقي واقولك اننا كنا بنغني اغنيه اسمها بابا حسني يا بابا حسني
وكان فيها برضو كوبليه عن ماما سوزان
بس بالله عليكي خليها بيني وبينك اوعي حد يعرف احسن اتجرس وسط المدونات
هههههههههههه

نورتيني يا قمر

----------------

نبض الاسكندريه

اصلها من زمان واكيد انت من الجيل الجديد
احنا بقي عجزنا خلاص
اييييييييييه دنيا هاناخد زمنا وزمن غيرنا
هههههههههه


بس انا اول مره اسمع يمامه لفلفت فوق راسي دي يمكن تكون هي بس حاصلها تعديل

مش عارفه بالظبط



شكرا علي مرورك الجميل

نورتيني

خمسة فضفضة يقول...

السلام عليكم ورحمة الله وبركاته

صاحب المضيفة

صح ايام عمرها ما هاتتعوض ابدا

دمت انت ايضا في سعاده وهنا

سلام

سابرينا يقول...

علأقتي باليمام بدأت من قريب
فعلأكائن في منتهي الجمال والرقة!

mostafa rayan يقول...

مش عارف يا دكتورة اقولك ايه
هي الكلمات حلوة بس اعتقد اننا جيل ( انا وانت وبقية المدونين اننا جيل ما بعد الأغنية بكثير ) فكيف تؤثر فينا
انا لا اشعر مثلك نحوها بحنين للماضي فهي ليست ماضي لي علي كل حال
ارجو ألا تغضبي من كلماتي ولكن هذا انطباعي عنها
تحياتي لكي ولرقة مشاعرك التي تبدو واضحة جدا من خلال كلماتك

خمسة فضفضة يقول...

صابرينا

اهلا وسهلا منوراني ويارب دايما
انت بداتي تربي يمام قريب ولا ايه

---------

مصطفي ريان

لا طبعا اغضب يعني ايه ، دا رايك واكيد لازم تقوله
والاختلاف في الراي لا يفسد للود قضيه

شوف يا سيدي مش قصدي يعني اني كنت باقعد اسمعها من الست منيره المهديه ودندن وراها ولا انها عملتي حنين للماضي ورحعتني مثلا لمسرح الازبكيه والجوقه بتاع منيره بتردد وراها الكلمات الجميله

ركز في كلامي هاتلاقيني قايله اننا كنا بنغنيها في فرقة كورال المدرسه ومركز الشباب وكانت من ضمن الاغنيات اللي بندخل بيها المسابقات ، وبما ان كلامها جميل زي ما انت شايف وكمان اللحن اجمل واجمل كانت لازم تفضل معلقه معايا العمر ده كله ولعلمك مش هي بس لا في كام اغنيه كده علي طول تلاقيني بدندن بيهم زي يمامه بيضا و قمر له ليالي ، وليه يا بنفسج والدنيا ريشه في هوا وياواش ياواش يامرجيحه
واغاني سيد درويش كلها ودي الاغاني اللي كنا بنتعلمها من مدرسة الموسيقي في الابتدائي وكمان في مركز الشباب
دا غير ان الراديو كان بيذيع الاغاني دي دايما

مش عارفه اذا كان وصلك قصدي ولا لا


سلام

حزلووووقه يقول...

يمامه بيضا ومنين اجيبها

من عند الراجل بتاع العصافير

:)))


حلوة اوي يافضفضه

فكرتينا بزمان اللي مشوفتهش بس سمعت عنه


سلامي

حزلووووقه

semsem111 يقول...

الله
رجعتينا للزمن الجميل

ايام ما كان فى يمام
وايام ما كان اليمام ابيض
وايام ما كان فى نينه

اما الان
فاعتقد ان انفلونزا اليمام اقصد الدجاج
جعلت امتلاك يمامة فوق السطوح جريمة

المشكلة الاكبر انه لم يصبح لدينا سطوح
انما هو تجمع سكنى وتجاري معا

الكارثة الاكبر ان اليمامة لو فرضنا ان احنا سربناها فى الدس مش ممكن يفضل لونها ابيض
يومين والسحابة السودا هتخلى لونها هباب

المشكلة الاكبر بقى
ان نينه نفسها ومنى عينها انها تتلم على اليمامة
او حتى البطة
اياكش حتى العرسة
علشان تذبحها وتسلقها
وتمشى لها يومين بدل ما العيال يموتو من الجوع

اما الذى لم يكن فى الحسبان
انه على فرض ان احنا سربنا اليمامة
واقنعنا نينة انها متدبحهاش
وحطينا لليمامة فير اند لفلي علشان تقتح بشرتها
المشكلة ان اليمامة هتكون قرفانه وزمقانة(جديدة زمقانة دى )
ومعندهاش اي استعداد للحب ولا للبوس
وكل اللى ممكن تقوله اليمامة لينا
(جاتكو نيلة غميتو نفسنا الله يغم نفسكم )

على كل فى اغانى احدث ممكن نغنيها

مثلا
غراب اسود وتقيل
مرمى ومعفن فى النيل

او
الفار بيلعب فى عبي يا اما

او حتى
الجاموسة الجاموسة
بحبك يا منيل وهات بوسة
وهكذا

سمسم
المدون اللى لسه بكيسه
http://yasemsem.blogspot.com/

الربان يقول...

تحياتي

بالفعل الاغنية كلماتها رقيقة و بسيطة
و تدخل القلب...و كلماتها لها معانٍ.

طبعا احنا في المدرسة لم نكن نغنيها..
كان مدرس الموسيقي رحمه الله يصر علي ان نغني اغنية( دقت ساعة العمل الثوري..بكفاح الاحرار...)...و طبعا كنا بنهرج و نمرح...و قفشات شبابية..


اشكرك انك ذكرتينا بأغنية رقيقة تغسل
الاذن من كراكيب العغناء المعاصر.

تحياتي و تقديري

رينـــــــــــا يقول...

ياااااااااااااا
الاغنيه دى بحبها جدا
فعلا رقيقه جدا
احساسيس جميله بجد

يا مراكبي يقول...

يا خبر

إيه اللي رجعك ورا قوي كده لأيام منيرة المهدية؟


إرجعي لميلودي وزووم علشان ما تتخلفيش عن العصر

هو فيه يمام اليومين دول؟

جنّي يقول...

الحمام واليمام من الطيور الجميلة الرقيقة والنظيفة والمسالمة .. ويرتبط كل من الذكر والأنثي ببعضهما بشكل جنوني .. كنت أربي الحمام منذ صغري وكنت أحب أراقبه كما فعلتي تماما وكنت اتعجب عندما أرى الذكر يطعم أنثاه في فمها كأنه استمع لقول النبي صلى الله عليه وسلم : ( ولست تنفق نفقة تبتغي بها وجه الله تعالى إلا أجرت بها , حتى اللقمة تجعلها في في (فم) امرأتك )صحيح مسلم ..
وتعجبت أكثر من ذكر حمام ماتت أنثاه فرفض التزاوج وظل على حالته حتى مات .. فهل مات من شدة الحزن عليها ؟
المهم ربنا يسعدك دايما وإن شاء الله بشرة خير ..
تحياتي
said

Omar... [ خروشات ] يقول...

اختيارك رائع يا دكتور

زمن جميل

اغنية بديعة

صوت شفاف

رمزية لكل شىء جميل


مشاء الله على اختيارك ا تذكرك للزمن الجميل


" يمامة بيضا "

غمضت عنيا و سمعتها الان

الف شكر

Doba يقول...

فكرتينى بالمدرسة على طول وايام الحفلات والمسرح ولما كنا بنقعد نغنيها ونعيد فيها ايم جميلة قوى

سبحان الله
ربنا بعتلك يمامتين حلوين تتأمليهم وتجيبلنا حاجة حلوة قوى من الايام الجميلة اللى سابتنا خلاص

عارفة انا افتكرت دلوقتى ريحة شجرة منجه عندنا فى المدرسة كانت مخليه للمدرسة كلها ريحة مميزة

اشكرك
تحياتى
هبة

دنيتى الجميله يقول...

جميل جدا تذكر ايام زمان والماضى الجميل
ايام الدراسه والاصدقاء والانشاد والحفلات
فكرتينى بأيام الدراسه الحلوه بس مكناش بنغنى هذه الاغانى
بس كنا بنغنى ونفرح
تحياتى لكى

غير معرف يقول...

العزيزة خمسة فضفضة

دعوت لك فى الكعبة بأن يصلح الله لك الحال .. ويرزقك من أوسع الأبواب .. ويحفظك من كل شرّ

اللهم تقبل دعاء

عاشــــــ النقاب ـقــــة"نونو" يقول...

اشاركك حبهامن زمااااااااااان اوي كنت غنيتها في حفلة في المدرسة فعلا عذبة وكلها رقة
زيك كدة يا احلى دكتورة
تحياتي

المـــفـــــــقــــــــوعـــــة مــرارتـهــا يقول...

انا طول عمري اسمع الاغنية دي ومش فاهمة كلماتها اوي بس بحبها
اذيك ياجميل

Ahmed Al-Sabbagh يقول...

الاغنية حلوة اوى

على فكرة انا من عشاق الكلمات الجميلة

واغانى الزمن الجميل

واضح كدة ان ذوقك عالى اوى

تحياتى لكى

احمد

غير معرف يقول...

قد ايه مشاعرك رقيقة .. الاغنية على بساطتها رائعة المعانى ..

هل لازال يحيا هذا الزمن ؟

طالما هناك من يستشعره ويستحضره .. اعتقد ذلك

Princesa ... WHiSPeR يقول...

ياااااااااا فكرتينى باللذى مضى
من زمان اوى وانا ماسمعتش الاغنيه دى

بنت القمر يقول...

اولا الموضوع ليه شقين والشق الاول انه في وقت ما كانوا بيعتبروا الست منيرة المهديه
ست وسلطانه
لانها تمتلك تختا
ورغم ان مش كل اغانيها بتلك الرومانسيه
وكانت بتقبح احيانا
الا انها احيانا كانت بتقول كلام جميل
اما الشق التاني اللي يبسألوا عن اليمام الابيض
اليمام اللي بيعشش علي بلكونه جارتنا المسافرة رصاصي ورقبته فيا تشبيحه لون
ولكن يعني هو اليمام كان بيتخطب ويروح الحقاينه؟؟
جت علي انها بيضا
ياللهوي علي الدقه بتاعه الشعب المصري
لما يفتح دماغه
(((:
سلام يا رومانسيه

.:.-=- ELGaZaLy-=-.:. يقول...

الاغنية جميلة اوى....


انا سمعتها زمان بس انا علاقتى بالكروال كانت مختلفة شوية...

فكرتينى بايام جميلة تحياتى

صبرني يارب يقول...

تصوري انا باحب الاغنيه دي كنت باقول من احترم الاغنيات الى غنتها الست دي اصل كان لها اغاني فله يعنى .

بس انا كنت باغني بقى فى حفلة المدرسه اخر مره اشتركت فيها

مصر هى امي نيلها هو دمي

زمان ايام ما كانت الاغاني الوطنيه بتغنى لمصر مش لاسم النبى حارسه
تحياتي لكى ولجوز الحمام بتاع الجيران وبساتين الفاكهه

ضيفينى عندك يومين يا بنتى وحياتك اشم شويه اصل انا باشم هنا عادم سيارا بس وساعات حرق قش الرز وساعات تانيه منيله ريحة يوريا من مصنع سماد طلخا .
جو صحي موووووووووووت .

بس انا عندي جوز حمام معشش على المكيف بره بس مش بافتح الشباك عشان ما اعملوش قلق
بس بافكر لو طلع حمام صغير ابقى اخده اكله اصل انا متوحشه هههههههههههههههههه

2ensan wnsan يقول...

لا انا مسمعتهاش الاغنيه القديمه دي بصراحه بس سمعت اغنيه على نفس اللحن بتاعها اكيد من كلمات جمال بخيت والحان عمار الشريعي وغناء علي الحجار ونهى عمار اغنيه فعلا جميله

خمسة فضفضة يقول...

السلام عليكم ورحمة الله وبركاته

حزلوووقه

انتي اللي حلوه وقمر با حزلووقه

سلام
--------------

سمسم 111

ايه يا ابني التشاؤم دا كله
لا خليك متفائل ان شاء الله ربنا مش هاينسانا ابدا
واكيد هايرجع اليمام يعشش فوق سطوحنا ويغرد لنا واحنا نغنيله يمامه بيضا

سلام
-----------------

الربان
اهلا بك يا استاذي العزيز

اكيد الاغاني دي كانت ايام الثوره وعبد الناصر
احنا كمان كنا بنغني اغاني وطنيه بس مثلا مصر التي في خاطري ، ووقف الخلق

نورتني

---------------

رينا

انت اجمل يا رينا
اخبارك ايه انشاء الله بخير
منوراني يا قمر

-----------------------

يا مراكبي

ازيك يا باشمهندس
فقريه بقي تعملي ايه مش عارفه اواكب العصر والموضه
ولا باعرف اتفرج علي ميلودي اللي فيها اوووول اينجيليش اووول ذا تاييييم

منورني

---------------

جني

ربنا يخليك ويسعد ايام

فيه كتير اوي من الطيور والحيوانات ارحم علي يعضها من البني ادمين

منوراني

خمسة فضفضة يقول...

السلام عليكم ورحمة الله وبركاته

خروشات عمر

ازيك يا استاذ عمر سامحني اني مقصره معاك اليومين دول

شكرا علي ذوقك وكلماتك الرقيقه
نورتني

----------

دوبا

ازيك يا هبه
اخيرا لقيت حد كان بيغنيها ايام المدرسه
ماكانوش يمام دول كانوا حمام

العفو يا حبيبتي ودايما يارب منوراني

-----------------

دنيتي الجميله
عندك حق مش مهم الاغنيه ايه المهم نفرح

منوراني
------------------

استاذ شريف
ربنا يخليك يارب انك افتركتني ويارب يتقبل منك صالح الاعمال ويستجيب لدعواتك

-----------------
nonoymm
عاشقة النقاب

ازيك انت يا قمر ان شاء الله بخير
سلام

إبـراهيم ... يقول...

إزيك يا فندم
أنا كنتش أعرف الأغنية دي ، بس عرفتي تنقليني لحالتها 100%
تحياتي ...........

أمـا طلبي بقى، فهو كيف ترين التدوين، والمدونين، وده موضوع بسيط عندي :)
تحياتي
وماتبقيش تغيبي كثير

الباحث عن الحقيقة يقول...

الله فكرتينا بزمان
اغنية رقيقة جدا وجميلة
متشكرين يا اربعة فضفضة ..ولا انتي لقيتى الواحد اللى ضاع منك ولا لسه ولا ايه

مـحـمـد مـفـيـد يقول...

الله
وكنتي زمان مطربه
:)

Abd-Alrahman يقول...

الاغنية بجد جميلة
انا كنت بسمعاها من ماما

بوست جميل اوي اوي
شكرا علي زيارتك الي فاتت الي كانت الاولي
ياريت تكرريها في بوست جديد
عايز اشوف رايك فيه

عبدالرحمن

bastokka طهقانة يقول...

جميلة فعلا
رومانسية غائبة عن عالم البحث فيه عن لقمة العيش اصبح الغاية و الهدف

اوروفوار

(احمد سكر ) يقول...

يااااااااه

رجعتينا 20 سنه لورا

ايام ابتدائى لما كنا بنغنى الاغنيه دى

تصدقى انا هنزلها دلوقتى من ع النت

واسمعها

الواحد بيحس ان الزمن رجع بيه

تحياتى

احمد سكر

صيدلانيه طالعه نازله يقول...

saifbasha
اغنيه جميله و رايقه و تدل على جمال زمانهاوحلاوته
اعتقد كمان ان ظروفنا متنفعش ليها الاغنيه دى خااالص دلوقت لاننا محتاجين مهدئات اكتر من كده عشان نقدر نهدى

soosa el-mafroosa يقول...

كنت بغنيها زمان في كورال قصر الثقافة بتاعنا

و الله فعلا أغنية جميلة

mostafa rayan يقول...

السسلام عليكم
ازيك يا دكتورة
اود ان اشكرك بشدة لأنك وضعتي لينك تدوينة
( دعاء شاب من العهد المباركي عندك )
انتي فرحتيني النهاردة مرتين
مرة لما زوتيني وعلقتي علي الموضوع ومرة تانية لما اضفتي الموضوع عندك
اشكرك بجد
انتي انسانة جميلة

الـسـيـدة نـون يقول...

يابنت اللذينا يا فضفضة
انا بعشق الاغنية دى
وكنت دايما برضه بدندن بيها
بس ماكنتش اعرفها كلها
يمكن هما السطرين الاولانيين وخلاص على كدة
اتبسطت اوى انك كتبتى كلمات الاغنية
انا هاعملهم كوبى وبيست عندى
وهادور عليهم يمكن الاقيها على اى موقع اغانى
هابقى اعملها داونلود

شكرا ليكى علشان فكرتينا بحاجة حلوة
اختك خيخة

مجداوية يقول...

السلام عليكم

يااااه انا بقالى كتير مجتش هنا ,,سامحينى اختى الكريمة

طبعا لازم تلاقى اليمام ولا هم هنا ولا الدنيا فى دماغهم
لا نزل لهم علاوة 30% ولا الأسعار ولعت ولا عنده يمام صغير يوديه المدارس
ولا عنده عربية بنزينها غلى
هم يا دوبك الجناحين وهوبا طيران تتوكل على الله تروح خماصا وتعود بطانا

سبحان الله العظيم

ده مش نق عليهم ولا نفسى أكون يمامة أنا بجد سرحت فى الصورة الجميلة اللى نقلتيها
وصدق الله العظيم اذ يقول
لقد خلقنا الانسان فى كبد

تحياتى وتقديرى اختى الكريمة

smraa alnil يقول...

انا بقي مش كنت اعرفها خالص غير لما كبرت وسمعتها في الموسيقي العربية
ويحبها اوي
خصوصا بتوزيع هادي

فعلا بتخلي الواحد في حاله غريبة

في اغنية تاني بقي جامدة جدا
اسمها البحر بيضحك ليه وانا نازلة ادلع املي القلل
للشيخ امام

حلوة جدا جدا جدا
بتخليني في حالة بقي مش عايزة اقولك

خالد كامل يقول...

بسم الله ما شاء الله ... اسلوبك ماهوش حل ... انا معرفش الأغنية دى ... بس اللى عجبنى أكتر اسلوبك ... بجد فكرتينى بأيام ما كنت بقرا ... الله يرحمها أيام جامدة ... المهم بقى علشان مطولش عليكى ... استمرى و هتابعك على طول ان شاء الله ...

عاشــــــ النقاب ـقــــة"نونو" يقول...

جيت اسلم واطمن

Jana يقول...

فينك يا دكتور ؟؟ مشغولة عنا فين؟؟
اوعى تكونى لسه سرحانة وبتغنى يمامة بيضا
:))
ليكى تاج يا كميل ... يهمنى اعرف احلامك
تعالوا زورونا
D:

nado يقول...

الله عليكى عيشتينى للحظات لزمن كان نفسى اعيشه ماتتصوريش انا بعشق الاغنيه دى اد ايه .... رغم انى ماعرفش اسمك لكان حاسيت انك قريبه قوى منى

FOrty يقول...

اكيد اغنيه ناعمه و رقيقه بس مش عارف حاسس انها فقدت كتير من تاثيرها بعد موضوع انفلونزا الطيور اول ما بتقولى حمامه افتكر الوباء و شكل الفراخ الميته
على كل حال خلى دواء التام فلو يبيع و اهه كله اكل عيش ليكم

E.S.L.A.M يقول...

حلو قوي البوست دة
تحياتي ليكي

Mafrousa يقول...

فضفوضتى...تصدقى انا بدندن كتير بالموسيقى بتاعة الاغنيه ديه
بس عمرى ما ركزت فى كلماتها
كلماتها حلوه و ليها معانى كتيره
تحياتى ليكى

كراكيب عادل يقول...

السلام عليكم

ازيك يا دكتورة

انا بحب جداا اجمع الحجات القديمة دي وبفضل اسرح في ايامهم جدااا

وعلي رائ مراكبي هو فية يمام الايام دي

علي ما اعتقد بقي فية غربان وبس

مروة الزارع يقول...

الله عليكى دى بجد من اكتر الاغانى اللى انا بحبها بجد انتى عسولة جدا ذوقك يجنن

محمد حمدي يقول...

تحياتى على البوست الجميل

بس بصراحه انا الاغنيه دى بتحسسنى بإكتئاب مش بسعاده او فرح .. مش عارف هل ده شعور عند ناس تانيه ولا انا بس الى متفرد فى الشعور ده

بس تحياتى على احساسك العالى فى البوست

خمسة فضفضة يقول...

السلام عليكم ورحمة الله وبركاته

مفقوعه مرارتها

اهلا بيك يا سوسو انا الحمد لله انت ازيك
عارفه اكيد فيفي هي السبب
يارب تكون لوقتي بقت واضحه
:-)

---------

خالو احمد
الحمد لله ان الاغنيه لقت استحسان كتير منكم
ولقيت كتير عارفينها مش انا بس

انت اللي ذوقك عالي يا خالو
مانتحرمش من زياراتك الجميله

-------------

العزيز شريف

حمد لله علي السلامه
اكيد مازال هذا الزمن يحي في قلوب محبيه

نورتني

-------------------

whisper TaNgOoO

منوراني
كويس اني فكرتك باللذي مضي بس يارب يكون كويس

-----------
بنت القمر
ايوه ليها اغاني عيب خالص بس ههههههههه
احنا مالناش دعوه بيها خلينا في الرائعه يمامه بيضا

بالنسبه لليمام عندك حق والله ناس دكيكه صحيح :-)

بس علي فكره اصل الاغنيه يمامه حلوه مش بيضا عشان مانظلمش الست منيره

سلام يا قمر

--------------
الغزالي

علاقتك كانت مختلفه ازاي يعني

ياريت تنور المحكمه
:-)
فرحت اوي انها عجبتك

----------

صبرني يارب

يومين بس يا قمر تعالي علي طول احنا قريبين من المنصوره تلت ساعه بس
تعالي وخليكي اد ما انت عاوزه

انا كمان فيه عصافير معششه علي التكييف في البلكونه ومزهقني بس سيباهم


---------------

واحد انسان ونسان

مش عارفه اللي انت بتتكلم عنها
تقصد اللي كانت في مسرحية يمامه بيضا بتاع علي الحجار ؟؟

اصلا الكلمات اللي مكتوبه دي فيها تعديل كتير اوي علي الاصل يمكن تكون انت سمعت الاصل

سلام

خمسة فضفضة يقول...

السلام عليكم ورحمة الله وبركاته

ابراهيم معايا

اهلا اهلا بكبير المغامير قبلي وبحري

ها وياطري عجبتك ولا لأ


ان شاء الله اروح اعلق علي الموضوع
اعذرني لاني مش فاضيه خالص اليومين دول

---------------

الباحث عن الحقيقه

العفو حضرتك
ايوه لقيته كان واقع تحت السرير

:-)

--------------

محمد مفيد

لا مش اوي كده دا كورال يعني كله كان بيغني مع بعضه وماحدش باين

-----------------

عبد الرحمن ونور

ربنا يخليك ومايحرمنيش من ذوقك
اخبار امتحاناتك ايه ؟؟؟

يلا خلص بقي اصلي مش لاقيه صيادله يشتغلوا معايا خالص ومحتاسه في الصيدليه

ان شاء الله ازورك فورا

-----------

طهقانه

اهلااااااااااااااااااااااااااااااا
ايه الغعيبه الطويله اوي دي يا بنتي كنت فين ؟؟؟؟
اهو الواحد بيحاول بريك كل ما تسمح الظروف

منوراني

-------------

احمد سكر

مش كده
ايوه باحس اننا رجعت كل السنين دي لورا لما بسمع حاجه من زماااااان ما سمعتهاش

نورتني لاول مره ويارب دايما

-----------------

صيدلانيه طالعه نازله

صحيح الوقت بقي صعب اوي بس مش شرط عشان نهدي نستخدم مهدئات
صدقيني حاجه زي الاغنيه دي او غيرها ممكن تهدينا وتخرجنا بره الزمن

بس جربي

سلام

-----------------

سوسا المفروسه

ايه النور دا كله
انت كمان كنت في فريق الكورال
بصره
:-)

------------

مصطفي ريان

العفو مش محتاجه شكر
مدونتك فعلا من المدونات المحترمه جدا واللي تستحق الزياره
ومن اول ما عرفتها وانا حطاها في الريدر


------------

بت خيخه
طيب كويس بقي اني كتبتها كامله عشان تعرفي باقي الكلام

ويارب تلاقيها بجد هادخلك في حاله حلوه جدا

منوراني

--------------

مجداويه
وعليكم السلام ورحمة الله وبركاته

اهلا بيك في اي وقت ، اناكمان مقصره معاكم كلكم بس والله مش بايدي

ويارب نكون كلنا زي اليمام مش شايللين هم حاجه ولا عندنا مشاكل

منوراني

---------------

سمراء

ايه الخطوه العزيزه دي
ماتغيبيش عننا تاني

نزلت اغنية الشيخ امام ومن وقتها مش بابطل اشغلها
عندك حق تحفه وبدخل الواحد في حاله حلوه اوي مش عارفه اوصفها

نورتيني

خمسة فضفضة يقول...

السلام عليكم ورحمة الله وبركاته

مهيج الجماهير

شكرا علي ذوقك واهلا بيك منورني دايما

---------

nonoymm
ربنا مايحرمنيش منك نونو الحمد لله انا بخير بس مشغوله شويه
ادعيلي

------------

jana

موجوده اهه يا جميل بس الصيدليه واخداني اوي اليومين دول
ادعيلي الاقي صيدلي

اوك يا قمر ان شاء الله اجاوب التاج في اقرب وقت

سلام

-------------

نادو

ربنا يخليكي يا نادو علي كلامك الجميل
منوراني

---------------

OverForty

علي فكره يقال ان الحمام من اكتر الطيور مقاومة لانفلوانزا الطيور
وبالرغم من الوبا الا ان الاغنيه مازلت جميله

وعموما علي رايك كله مكسب
:-)

--------------------

اسلام

ربنا يخليك شكرا علي ذوقك

سلام
----------------------

واحدة مفروسة

اديني كتبتلك الكامات عشان تركزي

نورتيني

-------------

الفنان عادل

الله يسلمك يا فنان اخبارك ايه

انت هاتصدق كلام المراكبي ، لافيه يمام ماتفقدش الامل ودور عليه كويس هاتلاقيه ان شاء الله

منورني

----------------

مروة الزارع

اهلا بعروستنا الحلوه الف مبروك يامرمر
ايوه كده ارجعي نوري التدوين من تاني

شكرا علي ذوقك يا قمر

منوراني

---------------

محمد حمدي

شكرا علي ذوقك وكلامك الجميل
بس ايه حكايه الاكتئاب دي ليه كده ؟
يمكن ليك معها ذكريات مش كويسه


منورني جميعا

حاول تفتكرنى يقول...

لا اعتراض على ابداع زمان

مدونتك راقية فعلا

تحياتي

Spacetime يقول...

السلام عليكم ..
هو اية أبسط مستحضر طبى يمكن انتاجة ؟
بس

mohamed ibrahim يقول...

لا مؤاخذة يا كاتبة المقال
انتي مواليد كام ؟
بمعني اصح
عندك كام سنة
الاغنية دي اول مرة اسمع عنها و انا عندي 18 سنة

تحياتي
محمد

Ameen Roshdy يقول...

الاغنيه فعلا غايه في الرقه والاحساس لحنا وكلاما ..

والشكر لكاتبة المقال

ولكن احب ان الفت النظر ان الاغنيه كما يغنيها الفلاحون لها معني اخر غير الذي ذكرته الاخت الكاتبة.

فهذه الاغنيه تتحدث في الحقيقه عن رجل اضطره واحد من ذوي النفوذ ان يطّلق امرأته لكي يتزوجها هو (كما في فيلم الزوجه الثانيه .. وفي الواقع ستجد لحن الاغنيه في خلفية الفيلم طوال الوقت) .. والاغنيه هي نحيب هذا الرجل المغلوب علي امره لاضطراره ان يترك زوجته ..
وهذا واضح جدا في الجزء الذي يقول
-----------
طارت في قصري إمبارح العصري
و صاحبها المصري طالع يجبها

جم يخطبوها مني ويخدوها
ويسجلوها في الحقانية
-----------
(والحقانيه هي وزارة الحقانيه مشيرا الي تسجيل عقد الزواج)

وأنا لا احب ان افسد معني الاغنيه علي الاخت الكاتبه .. والتي لابد ان تكون ما زالت تتذكره منذ الصبا حيث كانت تغني الاغنيه في كورال المدرسه .. ومن المفهوم ان مدرسة الموسيقي اضطرت الي شرح معني الاغنيه بهذه الطريقه الرقيقه (البنت الصغير التي تري الحمامه وتحبها في حين ان الحمامه تفضل ان تكون مع البلبل) لما في المعني الحقيقي من قسوه لا تتناسب مع سن الاطفال الصغار .. ألا انني اتمني ان تغير الاخت الكاتبه شرحها للاغنيه حتي لا تفقد معناها الحقيقي عند القراء ...

مع الشكر والاحترام

القرآن الكريم