TvQuran

٢٠٠٩-١٠-١٨

عودة علي طول الحياة


بوست جديد في علي طول الحياه

يارب يعجبكم




بلا عنوان


٢٠٠٩-٠٩-٢٠

عيد سعيد عليكوا


كل سنة وانتم طيبين

عيد سعيد وربنا يتقبل منكم صالح الاعمال

ويارب نكون جميعا من الفائزين يوم الجائزة الكبري يوم لا ينفع مال ولا بنون الا من اتي الله بقلب سليم


وحشتوووووووووني


ماتنسوش السته البيض


٢٠٠٩-٠٨-٠٢

لغز الكشك المسكون



من سنتين المحول اللي بيتي تابعه له اتحرق وحرق الدور الارضي للبيت اللي جمبه


ايامها قعدنا حوالي يومين ونص من غير كهربا ولكم ان تتخيلوا شهر يوليو من غير تكييف ولا مروحه ولا حتي شوية مية ساقعه


طبعا علي وجه السرعه اتحركت كل الجهات المعنيه وتم السيطره علي الحريق اللي كان ممكن جدا يعمل كارثه مروعه


وتم تغيير المحول والكشك بحاله

ورجعت الكهربا الحمد لله لقواعدها سالمه

بس طبعا ماكانش فيه مانع انها تقطع ساعه ولا اتنين كل فتره طويله لما يكون فيه اصلاحات في المنطقه او تركيب اسلاك جديده عادي

من شهرونص وبالظبط يوم الجمعه 26 يونيو الساعه 4.5 العصر كشك الكهربا فرقع والمحول اللي جواه اتحرق

وانقطعت الكهرباء 36 ساعه متواصله لحد الساعه 2 من فجر الاحد


تخيلوا اليومين دول عشناهم ازاي في عز الحر الرهيب ده


و بقي حالنا يصعب علي الكافررجعنا تاني للعصور الوسطي اللي منور شمعه واللي شايل لمبة جاز


قمة الاستهتار واللامبالاه من الجميع

وبقي عادي عندهم يسيبونا بالساعات من غير كهربا ومش مهم الحاجات اللي في التلاجات تبوظ

ولا الناس تموت من الحر يعني هما كانوا من بقيت اهالينا

ولا الطلبه يسقطوا واحنا مالنا حد قالهم يتعلموا من اصله

والناس من الحر هجت في الشوارع لحد الفجر

البيت اللي قصادنا كان فيه عريس جديد قضي ليلة العمر علي ضوء الشموع اهي رومانسيه برضو هههههه


حد هايقولي عادي ان المحول يتحرق بسبب الاحمال الزياده في الصيف خصوصا ان المنطقه عندنا اتغيرت جدا عن الاول البيوت زاد عددها وزاد ت ارتفاعاتها ، و المكيفات بقت شئ عادي جدا في البيوت بعد ما كانت من النادر وبالتالي ده كله سبب احمال زياده

اللي مش عادي بقي هو اللي حصل بعد كده

اول لما الكشك اتحرق حاولوا انهم يصلحوه وخلاص من غير ما يغيروا حاجه وبعد حوالي 3 ساعات نجحت محاولاتهم

بس مافيش ربع ساعه وفرقع تاني
فضلوا بقيت اليوم يحاولوا بس من غير امل
وقرروا انهم يستنوا لتاني يوم ويستعينوا بخبرا اجانب ههههه
اقصد خبراء من شبكة الكهربا الرئيسيه

وفعلا جه الفريق الاجنبي وقرر انه لازم المحول يتغير
وتم الاتصال بالجهات المسئوله واستيراد محول جديد من الشبكة الرئيسيه مع فريق العمل الخاص بيه

والمحول في الطريق انفجرت عجلة العربية النقل اللي شايلاه وتعطلت علي الطريق اكتر من 3 ساعات

ولما وصل المحول لارض المعركه اقصد مكان الكشك قعدوا يركبوا فيه اكتر من 5 ساعات واول ما بدأوا يشغلوه عمل قفله ويقال ان اجزاء منه اتحرقت وماعدتش تنفع خالص

وتم تغيير المحول لتاني مره في اقل من 24 ساعه واول ما بدأ يشتغل حصلت قفله تانيه وعطل المحول الجديد
وفضل العمال يحاولوا انقاذ ما يمكن انقاذه بس من غير فايده


ولولا ان الناس كانت محوطاهم من كل ناحيه كانوا مشيوا وسابونا نبات يوم كمان من غير كهربا

وفضلت المحاولات لحد ما جه الفرج الساعه 2 فجرا ورجعت الكهربا

وحمدنا ربنا علي نعمته وفضله اللي دايما مش بنقدرها الا لما تروح مننا

وقلنا خلاص محول جديد بقي مين ادنا وخلاص وداعا لانقطاع الكهربا ولكن عشم ابليس في الجنه

مافيش اسبوع الا وبتدأت الكهربا تقطع بشكل يثير الاعصاب

بالساعتين والتلاته وشويه شويه بقوا خمسه او ست ساعات

واخيرا من يومين كانوا 12 ساعه



المهم ان كل اللي يجي يصلحه يحتار مش عارف يلاقي العيب فين ودايما بيصلبه ويمشي
ولولا ان الناس بتحاصر الفني لحد ما يخلص كان قفل الكشك ومشي وسابنا من غير كهربا

الفني قبل الاخير فكرنا باسماعيل ياسين لما كان بيصلح الطياره وكل اللي يقابله يرميه لحد ما بقي هيكل من غير موتور

اهو الفني ده قالولي انه كان بيعمل كده اي حاجه في سكته مش عجباه يرميها

ولحد حالا ماحدش عارف السبب في الاعطال المستمره دي

هل يا تري الكشك ده مسكون وفيه عفاريت هي اللي بتعمل كده

ولا الفني مش بيفهم حاجه اصلا

ولا الاجهزه اللي بيجيبوها غير مطابقه للمواصفات وبتتورد بمناقصات مشكوك فيها

ولا احنا اللي نيتنا مش صافيه عشان كده بيحصلنا كل ده



حاليا الحمد لله بقالنا يومين والوضع مستقر

دعواتكم




٢٠٠٩-٠٧-٠٤

لم اجد متعتي القديمه


اتنقل بين المحطات لاجد بالصدفه ملخص لمباريات قبل النهائي لبطولة ويمبلدون ،واكتشف بعد عدة سنوات من انقطاعي عن متابعة التنس اني بالكاد اعرف اسماء اللاعبين

فبتوقف التليفيزيون عن اذاعة مباريات التنس توقفت عن متابعته الا بالصدفه


كان التليفيزيون المصري يواظب سنويا علي عرض 2 من البطولات الاربع الكبار او Grand Slam ( رولان جاروس و ويمبلدون ) ، وكنت اجد متعه كبير جدا وانا اتابع المباريات التي قد يراها البعض ممله
ولكن الراحل عادل شريف باسلوبه المميز جدا في التعليق وتشبيهاته الجميله ومعلوماته الغزيره استطاع ان يحول رياضة الاغنياء الي رياضه شعبيه يتابعها اغلب المصريين ويحفظون اسماء اللاعبين واللاعبات وينتظرون مبارياتها كما ينتظرون مباريات كرة القدم

مارتينا نافرتيلوفا - مونيكا سيليز- شتيفي جراف - بيت سامبراس - بوريس بيكر - ايفان لندل

اسماء كنا نحفظها عن ظهر قلب ونعرف تاريخ كل منهم ومشواره مع البطوله
كنا نتابعهم بشغف وننتظر لنعرف هل تستطيع شتيفي ان تثأر لهزيمتها من مونيكا ام ان البطوله هذا العام ستذهب الي مارتينا
هل ستؤثر اصابة مونيكا في مشوارها ام انها ستستعيد مستواها
وهل سيستطيع بيت سامبراس ان يرد ضربات ارسال بوريس بيكر ( بوم بوم ) الساحقه الماحقه ام انه لن يصمد امامها
من سيكون المصنف الاول عالميا وهل ستؤثر الهزيمه علي تصنيف اي من اللاعبين

كنت انبهر بالجمهور الكبير الذي يحرص علي المتابعه من الملعب وهدوئهم الشديد ، وتأنقهم الذي يشعرك انها حفلة اوبرا وليست مباراة رياضية
ومن جديه وانضباط الفتيه والفتيات الصغار المتطوعين لجمع الكرات ومعاونة اللاعبين في حمل الملابس او اي مساعده اخري ، وحماسهم الشديد بالرغم من صغر دورهم ، يطمحون يوما ليكونوا مكان هذا اللاعب او تلك اللاعبه

حوالي 20 عام مضت اختفت اسماء وظهرت اخري و تضاعفت قيمة الجوائز مرات ومرات

ومنذ فتره طويله وبوفاة عادل شريف توقف التليفيزوين المصري عن اذاعة بطولات التنس او متابعة اخبارها اللهم الا من خلال ملخص لايتعدي ثواني في النشرات الاخباريه

لم يعد احد يهتم ، او لاسباب مادية ربما توقفت المباريات ،انتقلت الي القنوات الرياضية المشفره في عالم لم يعد به شئ مجاني

تابعت نهائي الويمبلدون اليوم بين سيرينا وفينوس ويليامز ، ابحث عن بعض المتعه او علي الاقل بعض من عبق الماضي الجميل
، تطورت اللعبه كثيرا ،وحتي اسلوب البث التليفيزيوني واعادة الكرات - خاصة المشكوك في صحتها -تطور جدا

ولكني لم اجد متعتي القديمه

٢٠٠٩-٠٧-٠٢

اديني عمر وارميني في البحر

٢٠٠٩-٠٦-١٣

اللهم لا تؤاخذنا بمافعل السفهاء منا / تحديث


تحديث

مش قلتلكوا اكيد هايضحوا بالكومبارس عشان الابطال يعيشوا

واخيرا تم تحديد ادوار البطوله واليكم التفاصيل في حالة توافر تطعيم ضد انفلونزا الخنازير

هنا :


التطعيم ضد أنفلونزا الخنازير للقيادات فقط

يعني اهم حاجه القيادات والشعب في ستين سلامه بقي يصرف نفسه بنفسه ، هما كمان هايشيلوا همه ولا يحاولوا يحافظوا عليه
دا حنا حتي كسرنا ال70 مليون وداخلين علي التمانين بقلب جامد واهو حتي يبقي علاج فعال للقنبلة السكانيه الموقوته


---------------------------------------------------------

فيه تصريح لمنظمة الصحه العالميه بيقول ان "الدول التي استطاعت مواجهة «سارس» و «أنفلونزا الطيور»، تبدو أكثر قدرة على مواجـهة أنفلونزا «أتـش1 أن1»."

طيب تفتكروا مصر قدرت تواجه انفلونزا الطيور ولا بقينا احنا وهي زي الاخوات و بقي زيها زي البلهارسيا وفيروس سي وكل الامراض الجميله اللي متوطنه مصر


يبقي هاتيجي علي انفلونزا الخنازير يعني


ما هو احنا كده طول عمرنا شعب مضياف وبيحب يرحب باي حد غريب وياخده بالاحضان وبوسه من هنا وبوسه من هنا


وبالتالي ماعتقدش ان حكومتنا الموقره هاتقدر تتصدي لانتشار المرض ، وممكن جدا لا قدر الله ينتشر بصوره اكبر من اي بلد تانيه ( ولسه انفلونزا الطيور خير شاهد علي كلامي )


ارجع واقول ربنا يخيب ظني ولاوني ومن اول ما بدأت اخبار انفلونزا «أتش1 أن1» الشهيره بانفلونزا الخنازير وانتشرت الاخبار عن اجراءات الحجر الصحي وحذر التجول وعزل البلاد اللي فيها الوباء وانا حاسه ان الوباء ده لو جه مصر هايحصلنا زي ماحصل في فيلم Out Break بتاع داستن هوفان ومورجان فريمان فاكرينه؟؟


الفيلم اللي فيه قرد جاي علي مركب من افريقيا نقل فيروس قاتل لمدينه امريكيه وعشان يتخلصوا من الخطر قررت الاداره الامريكيه انها تضرب البلد دي بالقنابل الحارقه وتخلص بدل وجع الدماغ بالظبط زي ما اتعملت مع الوباء اول ظهوره في افريقيا في الستينات


تخيلوا الفيلم اللي انتاج سنة 1995 بيعكس صوره مشابهه الي حد كبير جدا عن الوضع الحالي ، نفس الاحداث تقريبا :

فيروس قاتل كان موجود في فتره ماضيه ( نفس الفيروس كان موجود سنة 1918 وقضي علي حياة ضعف العدد اللي مات في الحرب العالمية الاولي ،ورجع تاني مرتين سنة 57 وسنة 1968 )


كمون لفتره طويله تخيل الجميع معاه ان الخطر زال ثم عوده وبقوه للقضاء علي عدد اكبرمن الاول


انتقال الوباء عبر الحدود


عائل وسيط من الحيوانات ( في الفيلم كان القرد دلوقتي الخنازير وسبحان الله الاتنين تشريحهم وصفاتهم قريبه جدا من الانسان )


في الفيلم كانوا قادرين بمنتهي البساطه انهم ينتجوا لقاح مضاد للمرض بس اختاروا الحل الاسهل وهو ضرب المدينه بالقنابل الحارقه ، وكان فيه شبهة تواطء ومش عاوزين يساعدوا باي معلومات متوفره عندهم ، حاليا برضو فيه اشاعات ان المرض ده من انتاج معامل امريكيه بتعمل علي تطوير وانتاج اسلحه بيلوجيه ،وتردد شائعات بتقول انه ممكن جدا انتاج مصل للمرض ان ماكانش فعلا موجود بس مستنيين يخلصوا مخزون التاميفلو


ومن المؤكد طبعا زي كل مره ان كفة المصالح الاقتصاديه هي اللي هاتكسب خصوصا ان الشركه المالكه لحقوق الملكيه للتاميفلو هي شركة جيلاد اللي بيرأسها رامسفيلد وزير الدفاع السابق لامريكا ، وهي الشركة اللي أعطت حقوق تسويق وبيع التاميفلو لشركة روش السويسرية

وكمان تأكيدات كتير من المتخصصين ان الفيروس ده استحاله يكون ظهر كده لوحده من غير تدخل البشر ( اقروا التقارير اللي في اخر البوست فيها تفاصيل مرعبه ) وانهم عملوا كده عشان يصرفوا مخزون التاميفلو ويطلعوا من الازمة الاقتصادية العنيفه اللي هما فيها


اما اكتر حاجه قلقاني هي ان الاستخدام المفرط والغير مقنن للتاميفلو ممكن يسبب نتائج عكسيه والفيروس يتحور ويبقي حتي التاميفلو زي قلته ،ودي فعلا الحاجه اللي انا خايفه منها جدا لان الناس هنا في مصر بتتعامل مع الادويه باستهتار كبير وخصوصا المضادات الحيويه اللي بيعتبروها زي البونبوني وده اللي اتسبب في ان عدد كبير جدا من الادويه ماعدش فعال زي الاول


في آخر Out Break وفي آخر اي فيلم خصوصا لو هوليوودي لازم ينجوا الابطال حتي لو اصيبوا بالف طلقه ولو جالهم الف مرض قاتل ،

في الحقيقه احنا مش ابطال الفيلم وماننفعش ابطال اي فيلم ، احنا بالكتير اوي ممكن نكون الكومبارس اللي بيموتوا عشان الابطال تعيش


فهل ياتري هايضحوا بينا عشان الابطال يعيشوا ؟؟؟ واختيار الابطال هايكون علي اي اساس ؟؟

وهل ياتري ممكن نوصل لمرحلة يضربونا بيها بالقنابل عشان يقضوا علي الوباء اللي اتفشي فينا ويحموا العالم من شرورنا ؟؟؟


ربنا يستر والحكومه المره دي تخيب ظننا وتقدر تتعامل مع الموضوع باسلوب ناجح وتحاول تتخلي ولو مره واحده عن اسلوبها المعهود من العك والكروته والاستسهال وكله تمام يا فندم


ياريت تقروا المقال ده للاستاذ محمد المخزنجي بس مش عاوزه حد يقلل ولا يصاب باي هلع ولاخوف من اي حاجه خدوا الامور عاااااااااااادشي كلنا في الاول والاخر هانموت دا حتي كده ممكن تتكتبلنا الشهاده ونخش الجنه


إنفلونزا المحافظين الجُدُد..والقدامى أيضا


ولو لسه فيكوا نفس ممكن تقروا التحقيق اللي عمله موقع ايلاف علي جزئين


فيروس هجين وفساد شركات تصنيع الأدوية وأزمة مالية

تحالف انغلو –اميركي تسبب بنشر إنفلونزا المكسيك


اللهم ارفع مقتك وغضبك عنا


اللهم عافنا واعفو عنا


اللهم لا تؤاخذنا بمافعل السفهاء منا





٢٠٠٩-٠٥-٢٩

السواقة ادب ...مش لفة دركسيون





حلم غريب كان دايما بيتكرر معايا كتير، يمكن فيه اختلاف بسيط في الاماكن او بعض الاحداث بس الخط الرئيسي في الحلم واحد مش بيتغير ابدا
باحلم دايما اني باسوق عربيه بالليل( مع اختلاف نوعها او مكان تواجدها ) ومش عارفه اتحكم في اتجاهها ولا سرعتها ولا حتي عارفه اوقفها وبيتملكني احساس رهيب اني اكيد اكيد لازم في الآخر هاخبط في اي حاجه والعربيه ها تتدمر وانا كمان اكون في خبر كان بس الحمد لله بصحي قبل ما ده يحصل
مش عارفه بالظبط ايه دلالة لحلم ده
بعض المفسرين بيقولوا ان قياده السياره ترمز للتحكم في الحياة ومافيها من صراعات مع النفس وهموم الحياه وان فترة الجلوس فيها هي فتره مؤقته او انتقاليه من حياة الشخص ده
معني كده اني في مرحله من حياتي مش عارفه اتحكم فيها خالص ولا اخد اي قرار صحيح ولا حتي قراراتي مؤثره في خط سير حياتي !!!!

يمكن ...!!!؟؟؟؟

كذب المنجمون ولو صدفوا

وبما ان كل الناس بقوا مفسرين للاحلام وكل واحد بيفسر علي مزاجه انا كمان هافسر اشمعني انا يعني

وتفسيري للحلم هايكون مختلف لان ماحدش يعرفني كويس اد ما انا اعرف نفسي :

اولا اعتقد ان السبب الرئيسي في الحلم ده اني كل ماروح الملاهي واركب العربيات الكهربا مش باعرف اتحكم فيها ولا اسوقها كويس وبتفضل ماشيه في اتجاه واحد او تلف في دواير ومش باعرف اوقفها ابدا الا لما تقف لوحدها :)

تاني حاجه اني دايما باصاب بدوار الحركه لما اركب اي عربيه وبيجيلي غثيان شديد حتي من ريحة البنزين

كمان كمية الحوادث الرهيبه اللي كل يوم نسمع عنها دا غير عدم التزام السواقين في كل حته واللي بيعمله سواقين التكاتك والميكروباصات في الناس سواء اللي راكبين ولا اللي ماشين

والفوضي الرهيبه اللي في كل شوارع مصر المحروسه واللي ماتشجعش حد ابدا انه يغامر باعصابه ويركب او يسوق عربيه

كل ده كون في عقلي الباطن عقده وشنيطه من العربيات وكرهتها من كل قلبي

وخلاني رافضه لفكرة تعلم السواقه اللي زوجي بيلح بيها عليّ اليومين دول

واكيد اكيد هو سبب رئيسي من اسباب الحلم الغريب ده

ايه رايكم في التفسير ده بالذمه مش منطقي و بيعتمد علي اسباب واقعيه
ومش المفروض اني من هنا ورايح اشتغل في التفسير

ولا هو الشيخ سيد احسن مني :)




٢٠٠٩-٠٥-٠١

تخاريف مصريه جداُ


خنازير خنازير ...اووووووووووعي وشك


ايام انفلونزا الطيور سمعنا عن الناس اللي جالها رعب من الطيور اللي مربياها وسمعنا عن واحد من كتر الخوف رمي الكتاكيت اللي فمزرعته في الشارع وبقت الناس تجري والكتاكيت تجري وراها


تفتكروا بمناسبة انفلونزا الخنازير **ممكن نلاقي حد من اللي بيربو خنازير من كتر خوفه من العدوي يرمي خنازيره في الشارع


يا تري هايبقي ايه الوضع ساعتها خصوصا ان الخنازير مش بتعرف تجري كويس :))



--------------

مع اني مبسوطه ان الخنازير هاتتباد من مصر لان شكلها مقرف وخلتني بقيت مقروفه من اللحمه يععععععععععع

بس تفتكروا باعدامهم للخنازير كده خلاص طمنوا الناس ....يمكن

لكن مع الاسف الكارثه هاتفضل قائمه ومافيش خطوة اهم واكتر ايجابيه اتاخدت زي مثلا الارشادات الصحيه لكيفية التعامل مع المرض او التعامل مع اي حد مشتبه في اصابته بيه مثلا حمله زي بتاع الاخ شعبولا والست انتصار
مافيش اي اجراءات احترازيه في المستشفيات ولا في حالة طوارئ في اي مستشفي في اي حته ولا دورات للدكاتره عشان يقدروا يتعاملوا صح لو حصل حاجه لا قدر الله

مافيش الا تشديد الرقابه علي المواني والمطارات ودي في رايي مش كفايه لان ممكن جدا المرض يجي من جوا مش من برا
وربنا يستر بقي
------------------------

خبر كان علي الصفحه الاولي للاهرام يوم الاربعاء اللي فات بيقول ان إنفلونزا الخنازير تحدث أزمة بين المجلس والحكومة وان سرور يحمل الحكومة المسئولية كاملة إذا لم تستجب لتوصيات المجلس بإعدام الخنازير شهاب يناشد المجلس منح الحكومة فرصة لعرض حلولها

ياسبحان الله الحكومه والمجلس طول عمرهم سمن علي عسل ولا حدش قدر ابدا يزعلهم من بعض تقوم تجي شوية خنازير لا راحت ولا جت توقع بينهم بالشكل ده وكمان يسيحوا لبعض علي صفحات اكبر جريده حكوميه

بركاتك يا انفلونزا الخنازير ، صحيح يا خوانا يوضع سره فأقذر خلقه

---------------------------

**الفيروس الموجود دلوقتي مش انفلونزا خنازير ده عباره عن ميكس من انفلونزا طيور علي خنازير علي انفلونزا بشرية وحصل نتيجة دخول فيروس انفلونزا الطيور لداخل جسم الخنازير وتحوره للشكل اللي ممكن يتنقل من انسان لانسان

******************************


إشاعات اشاعات اشاعات .......... بيقولوا فيه عصابات بتخطف في البيبهات


بقالنا حوالي اسبوع او اكتر مافيش سيره الا عن خطف الاطفال الرضع وسرقة اعضاؤهم
كل يوم اسمع نفس الحكايه مع تغيرات طفيفه ونقلا عن كذا حد
المهم ان الموضوع كله بيدور عن ان ام الطفل تكون في مكان ما ( الوحده الصحيه ،المستشفي ، قدام الفرن ، فعيادة دكتور..الخ )

ويتم استبدال ابنها او بنتها بطفل آخر بحيله ساذجه جدا (مثلا يكون ابناه بيعيط فاتقوم الخاطفه تقولها طيب خدي ابني اهو نايم وساكت وانا اسكتلك ابنك ) ومافيش ثانيه تختفي الخاطفه بالطفل لتكتشف الام بعد كده ان الطفل اللي معاها مقتول وبطنه مفتوحه ومافيهاش اي اعضاء


انا خلاص زهقت وكل شويه حد يجيلي يحكي نفس الحكايه والناس مافيش وراها الا نقل الكلام واضافة مايلزم عشان الحكايه تبقي اكثر اثاره وشوية شويه تبقي حكايه تانيه خالص مالهاش علاقه بالحقيقه



******************************


صدق اللي قال الاطفال احباب الله .......عااااااااااااااا



بافتح الصيلية يوم الجمعه عشان كل الدكاتره اجازه ، قاعده في امان الله وقدامي المج بتاعي و مافيش تاتو علي دراعي وبشرب النسكافيه 3 ×1 ومعاه بسكويت اولكر والمسائل آخر تمام
تدخل واحده معاها ابنها وزي ما انتوا عارفين الاطفال احباب الله ويادوب علي ما ادَوّر اجيبلها اللي هي عاوزاها الاقي الواد قلب المج وتعلو وجهه ضحكه خبيثه.... نياه نياه نياه

والست مامته ولا فدماغها مانكرش انها عملت نفسها بتساعدني ومافيش ثانيه خدت اللي هي عاوزاه ومشيت

وطبعا لاقلت حاجه ولا اتنفست مع اني كنت عاوزه اخلص علي الواد ومامته في خبطه واحده بس اعمل ايه لازم الواحد يتمالك اعصابه مع الناس وياريت يحطها في تلاجه من بليل للصبح
في الاخر انا اللي ادبست في التنضيف لان الولد اللي بينضف اجازه وخد عندك يا مواطن ساعه تنضيف من فوق ومن تحت والدفاتر اللي علي المكتب والتليفون وكووووووووول حاجه حتي الارض مسحتها والله








٢٠٠٩-٠٤-١٤

wall- E



اعشق افلام الانيميشن ، وخاصة عندما تكون لديزني
فيلم انيميشن ، لديزني ومعامل بيكسار ، حاصل علي اوسكار افضل فيلم رسوم متحركه ، عندها يجب عليك ان تشاهده بلا تردد


wall- E هو رائعة ديزني لعام 2008 ، فيلم مختلف تماما عن اي افلام كرتون شاهدتها من قبل فهو لا يقدم قصه مباشره تحتوي علي حكمه او موعظه في نهايتها ، بل هي قصه من وجهة نظري تحمل رؤية فلسفيه عميقه تجعلك تفكر في حياتك وجدوي ما تفعله فيها


قد يري البعض ان wall- E - مقارنة بافلام ديزني الاخري خاصة Ratatouille - قد يراه البعض مملا خاصة في النصف ساعه الاولي ، ولكني لا اعتقد ذلك فانت امام ويللي لا تستطيع المقاومة ياخذك معه منذ الدقائق الاولي حتي نهاية الفيلم دون ان تشعر


تدور احداث الفيلم بعد 7 قرون او اكثر من الان ، تحكي عن هذا الروبوت الذي يعيش وحيدا علي كوكب الارض ، لا يرافقه احد الا صرصور صغير ، وظيفته في الحياه والتي لا يتقن غيرها هي جمع النفايات وكبسها لمكعبات صغيره تسهل عملية التخلص منها وهذا بالمناسبة هو اختصار كلمة wall-e والتي تعني ( Waste Allocation Load Lifter- Earth)


غادره الجميع ونسوه علي سطح الكوكب الذي بات مهجوراً ، وبالرغم من انتهاء الغرض من وظيفته الا انه مازال يتابع عمله بكل جد ونشاط لا يبالي الوحده ولا يشعر بالملل ، يتابع كبس النفايات يوميا وينتقي منها ما يروق له اوما يري ان له منفعه

في احد الاركان له بيته الخاص يحتفظ فيه باشيائه الثمينه، كما يحتفظ ايضا ببعض شرائط الموسيقي والرقص والتي يستمتع بها بعد انتهاء عمله اليومي وتعتبر متعته الوحيده في الحياه

رتيبه هي حياة ويللي وتتشابه ايامها ، ولكن ياتي ذلك اليوم محتلف عندما هبطت عليه eve من السماء ، هذا الروبوت الابيض الجميل ذات العيون الزرقاء ، انزلتها مركبة فضاء لعمل بعض الابحاث علي الارض



يقع في حبها ويحاول التودد اليها ويريها مقتنياته الثمينه ولكنها لا تبالي به وتستمر في مهمتها التي جاءت من اجلها

يريها اهم مقتنياته وهي نبته صغيره عثر عليها ذات يوم بين النفايات عندها تنتبه ايفا وتاخذ النبته لداخلها ثم تصمت و يختفي بريق عينيها ولا تستجيب لأية محاوله منه

يحاول ارضائها باي شكل يغني لها ويرقص ، يحضنها ، يمسك يدها، ياخذها في رحله بحريه ويرسم لها قلوب علي الاشجار ، يحميها من المطر ويظلل عليها من الشمس ولكن لا حياه لمن تنادي


تعود مركبة الفضاء لتأخذ ايفا وتعود من حيث اتت فيصعق ويللي فكيف يحدث هذا بعد ان اصبح لحياته معني ، يتابعها باصرار ويتعلق علي جسم المركبه ليصل مع ايفا الي وطنها الذي نكتشف انه مدينه مبنية في الفضاء يعيش فيها آلاف البشرالذين هجر اجدادهم الارض منذ مئات السنين

بشر ترهلت اجسادهم ولم يعودوا قادرين علي الحركه بسبب اعتمادهم الكلي علي الروبوتات والتكنولوجيا حتي في ابسط الاشياء واكثرها خصوصيه كتصفيف الشعر واستبدال الملابس وحلاقة الذقن ، بشر اصبحو عبيد للروبوتات لا يستطيعون العيش من دونهم


يلاحظ ويللي ان لايفا اكثر من تؤام لهم نفس الشكل واللون ولكنه يعرف ايفا وكيف لا وهي حب حياته ، يظل بجوارها ويتلصص علي ما يحدث لها ،

عندما يتم اكتشاف ان ايفا تحمل نبته بداخلها تحمل فورا الي القائد المسؤل عن المدينه الفضائيه ، وعندها نعرف انه آن الاوان ليعود سكان المدينه الي الارض التي هجروها منذ اكثر من 700 عام بسبب التلوث والاوبئه والتي جعلت من الارض مكان غير صالح للعيش فيه


يعرف كبير الروبوتات بالامر ولا يروقه ذلك فبالعوده للارض لن تكون له اهميه ولن يكون هو المتحكم كما الان ، يحاول بكل جهد ان يمنع هذه العوده مره باخفاء النبته ومره بارسال ويللي وايف الي الفضاء خارج المدينه ليتخلص منهم ومره اخري بمحاولة تحطيم ايف و ويللي
واخيرا يحدث قتال عنيف بينه وبين القائد الذي ينتصر في النهاية بمساعدة ايف وويلي ليعود الجميع الي الارض

ولكن ويلي يخرج من المعركه شبه محطم ، ياخذونه معهم الي الارض يدلهم صديقه الصرصور علي مكان بيته الخاص والذي يحتوي علي معدات لتصليحه ، يعود ويللي للعمل ولكنه فاقد للذاكره تحاول ايفا معه ولكنه لا يستجيب لها ولا يتذكر شئ ، تمد اصابعها لتمسك يده ، وتتفاجأ بان بريق عينيه قد عاد وانه استطاع ان يتذكرها


تنساب الموسيقي ويرقص الجميع فرحا بالعوده الي الارض ، التي يبدأوا في زراعتها واعادة اعمارها


ثم تنساب اغنية الفيلم الرائعه "Down to Earth"علي تترات النهاية








ينتهي الفيلم ولا ينتهي التفكر ، افكر في الحياه وكيف هي ، فنحن نلهث يوم بعد يوم لجمع الكثير من الاشياء التي نعتقد باهميتها ولكنها بدون الحب والامان والصحبه الطيبه لا تعدو كونها كتله من النفايات التي لا قيمة لها




نحول ارضنا الي مستودع كبير للقمامه والمهملات ولا نجد مكان لنعيش ونحب فيه ،



نسير في عالم فارغ الا منا ، كل فرد معزول في كبسولته الخاصه لا يبالي بمن حوله ،يسير علي منهج محدد لتحقيق طموحاته التي لا تنتهي بل تتضاعف يوم بعد يوم


افكر في التكنولوجيا التي بدأت بالفعل تتحكم في حياتنا واصبحنا عبيدا لها ، ولا نستطيع الاستغناء عنها ، ويوما بعد يوم اخشي ان نتحول لنسخ كربونيه من شخوص الفيلم البدناء المصابين بهشاشة العظام بسبب قلة الحركة ،و يعلوا عقولنا الصدا ونعاني من غباء متناهي بسبب قلة التفكير



وفي خضم هذه الحياه الالكترونيه ننسي الرومانسيه والمشاعر الرقيقه ننسي اننا كنا في يوم من الايام بشر نحمل بين الضلوع قلوب نابضه بالحب والحياه


انصحكم بمشاهدة wall-e فهو بالفعل يستحق ذلك


٢٠٠٩-٠٣-٢٣

عملية بتر







صعبة دائما البدايات ومحيرة ايضا ، ولان الانطباعات الاولي تدوم ،والجواب بيبان من عنوانه ،فمن اصعب الاشياء ان تجد بداية مناسبه ومدخل يأخذك بسلاسه وتشويق الي نهاية الكلام




[1]

عندما يفارقنا عزيز ونتيقن تماما انه رحل بلا عوده واننا لن نراه ثانياً او نضمه الي صدورنا ، لن نسمع صوته او نري ضحكته،

لحظتها لا يكون في مقدورنا فعل اي شئ ، يشل التفكير، تضطرب النفس ،نعجز عن التعبير ويفارقنا الكلام ، يجسم الحزن علي الصدور و لا تبقي الا لغة الدموع .......فما اقساها من لحظات

فتخيلوا معي ان هذا العزيز ليس الا احد اعضائنا الحيويه ، تخيلوا فراق قدم او يد ، ذراع او ساق او حتي مجرد اصبع واحد

اعتقد انه اصعب انواع الفراق ، ان تفارق جزء من جسدك وانت علي قيد الحياه ،

تراه ملفوف امامك في كفنه الابيض تنظر اليه النظره الاخيره بالم ويحترق قلبك حسره ثم تواريه التراب لتعيش مدي الحياه بدونه ،

تتمني ان يعود يوما ولكن هيهات فقد فارقك الي الابد ،تحاول استخدام اجهزة تعويضيه ولكنها لا تكون بنفس الكفاءة ،
تنظر الي مكانه الخالي بحسره ولا تستطيع ان تفعل شئ


إن ما قدرتش تضحك . ما تدمّعش ولا تبكيش
وإن ما فضلش معاك غير قلبك
إوعى تخاف !!
مش هاتموت .. هاتعيش


[2]

يتردد طبيبك وتتوه منه الكلمات ولا يجد بدايه مناسبه لاخبارك بقرار من وجهة نظره هو الأسلم

كيف يفعل ؟

اينظر مباشرة الي عينيك ويخبرك ان عدم اكتراثه بالحاله وعدم قدرته علي وصف الدواء المناسب هي السبب

ام يلقي عليك باللوم ، فانت المهمل الذي لم ينتظم في علاج السكري حتي تفاقمت الحاله ،

ام هي زوجتك التي لم تهتم بنظامك الغذائي ؟؟

لابد له ان يفعل ذلك باي شكل فهو بحاجه لتوقيع شخص ما بالموافقه ؟؟

واخيرا يحسم امره و يخبرك بلا شفقه انه قرر بتر جزء من ساقك، فقط ليحافظ علي بقية جسدك وينقذ حياتك

الا يعلم انه ليس قرار بقطع الساق بل قرار بانهاء حياة اسره كامله وليس جزء من ساق انسان


وإن سألوك الناس .. عن ضي جوا عيونك ما بيلمعش
ما تخبيش ..قولهم العيب مش فيا
ده العيب في الضي !!


[3]

تستقبل الخبر بذهول ، يأبي عقلك ان يصدقه ، تحدثك نفسك ان طبيبك قد جُن ، و يرفض الجميع التوقيع علي شهادة الوفاة المسماه بالموافقه علي اجراء عملية بتر

تلوذ بالفرار وتلجأ للاحتماء ببيتك فهو اخر حصونك المنيعه ،تحاول ان تقنع نفسك انك بخير وانها ازمة كغيرها وباذن الله ستمر ،

تعيد ترتيب اوراقك لعلك تستطيع انقاذ ما يمكنك انقاذه ،

تبحث عن حل وتجوب عتبات الاطباء كالمجذوب الذي يجوب اضرحة اولياء الله الصالحين باحثا عن بصيص نور ،

يخبرونك جميعا انه لا امل ... فتصطدم بجدار اليأس والعجز ، تبحث عن مخرج فلا تجد

تتفاقم الحاله ويمتد الورم الي ما فوق الركبه ، وعندها تعترف بفشلك وتقرر توقيع شهادة وفاة ساقك ،

تسلم جسدك لطبيبك الاول وليفعل ما يفعل

لا يتبقي لك الا الصلاه والدعاء فتسلم امرك لله الذي لا ينسي من ذكره ولا يخيب من دعاه


وأنا مش عاشق ضلمة ولا زعّلت الضي
مسير الضي لوحده هايلمع
ومسير الضحك لوحده هايطلع
ما بيجرحش ولا يئذيش


٢٠٠٩-٠٣-١٣

فضفضة في Kg2





باكتب البوست ده انهارده وانا في منتهي السعاده ،زي انهارده من سنتين بدأت اكتب اول كلمه هنا و انهارده خمسة فضفضة بتتم سنتين بحالهم ، تخيلوا سنتين وانا هنا بينكم ، عمري ما كنت اتخيل اني ممكن افضل مواظبه علي الكتابه كل الوقت ده خصوصا اني ملوله جدا وبازهق بسرعه بادين ليكم وللمدونه انكم خليتوني اقضي امتع واحلي اوقات بازوركم وتزوروني فيها،

وبأكد لكم اني انهارده بعد سنتين مختلفه تماما عني قبل ما افتح مدونه ، اسلوبي اتغير ونظرتي للدنيا اتغيرت وعرفت حاجات كتير جديده ، وارتبطت بناس حلوين ورسمتلهم صوره جميله في خيالي وزي ما السنه اللي فاتت اتعرفت علي ناس جميله السنه دي كمان اتعرفت علي ناس اجمل واجمل (من غير ذكر اسامي عشان محدش يزعل:) )



ومن الحاجات الحلوه اللي حصلتلي خلال السنه دي انه نزلي بوست في العدد التاني من كتاب مدونات مصريه للجيب ، البوست كان من مدونتي التانيه علي طول الحياه اللي بقيت مقصره جدا في حقها وبقالي كتيييييييييييييييير ما كتبتش فيها مع ان في حكايات كتير اوي عاوزه اقولها بس المشكله ان الكتابه هناك بتبقي عاوزه وقت فاضي كبير وبال رايق جدا عشان اقدر افتكر كل الاحداث لاني باكتب من الذاكره لحكايات سمعتها خلال عشر سنين ربنا يعني وارجع اكتب هناك تاني اوعدكم بس انتوا ادعولي



انهارده وانا بابدأ اول يوم في السنه التالته من عمري التدويني اتمني السنه دي اني اكون عند حسن ظنكم جميعا ويارب مايحرمنيش منكم كلكم وتفضلوا دايما انتو وخمسة فضفضة منورين عليا حياتي

٢٠٠٩-٠٣-١١

منطقة مغلقة





http://www.closedzone.com



الفيلم من إخراج مخرج الرسوم المتحركة الإسرائيلي يوني جودمان واللي رُشح لأوسكار أفضل فيلم أجنبي عن فيلم الانيميشن "فالس مع بشير"



ومع ان الفيلم مدته ماتزيدش عن دقيقه ونص الا انه من غير كلام بيقول حاجات كتير اوي وبيوصف مدي العذاب والعزله اللي فيها الفلسطنيين في غزة وبيصورهم زي العصفور المحبوس جوا قفص مش عارف يرفر ويطير بحريه




اتفرجوا عليه ان شاء الله يعجبكم


---------------------


شكرا تفاتيفو




٢٠٠٩-٠٣-٠٨

ماليش دعوة ياما انا عاوزه حلاوة


حلاوة زمان عروسة حصان
وآن الاوان تدوق يا وله


ماليش دعوة ياما .....انا عاوز حلاوة
ماليش دعوة ياما ....يوه بطل داناوه
ماليش دعوة ياما.... حلاوة حلاوة


حلاوة زمان عروسة حصان


تعالى لعمك ....وشوف الحلاوه
وعيط لامك ....عشان الحلاوه
وعكر فى دمك..... عشان الحلاوه

ان الاوان ودوق ياوله


فاكرين الاغنيه دي -بصوت محمد قنديل وكلمات صلاح جاهين- كل ما باسمعها بافتكر المولد علي طول والحلاوه العروسه المتزوقه بمراوح من ورق الكوريشه - اللي اختفت و
مع ان المناسبه مصريه خالصه الا انه حل محلها عروسه صيني متزوقه بالتل ليها عيون زرقه وشعر اصفر !!!! بالظبط زي ما حصل مع فوانيس رمضان وسجاجيد الصلاه والسِبَح وحاجات تانيه كتير - وبافتكر كمان الحصان الاحمر ابوفارس رافع سيفه و اللي اختفي برضو في ظروفه غامضه

اكيد كلكم اليومين دول من غير عياط ولا دبدبه فالارض غرقانين فالحلاوه ، سمسمية علي حمصيه علي فولية ...الخ -اللهم لا حسد - لو تلاحظوا ان كل احتفالاتنا كمصريين مرتبطه بالاكل مع اختلاف الاكلات طبعا ، وكما لكل مقام مقال فلكل احتفال اكلته المخصوصه [ الا كفتة الرز فادي بتتعمل فكل المناسبات مش عارفه ليه :) ]

" يوسف عوف في واحده من حلقات ساكن قصادي اتكلم علي النقطه دي بطريقه ساخره جدا ووصف تحول سيده اجنبيه من عود البان الي شجرة جميز بعد زواجها بمصري واستقرارها بمصر واتباعها عاداتنا في الاحتفال بالاكل والاكل للاحتفال "

اتعودنا نحتفل بالمولد باكل الحلاوه وركوب المراجيح ولبس الطراطير الملونه واللعب بالعروسه والحصان وبعد كده نكسرهم وناكلهم ، والموكب اللي بيلف البلد من اولها لآخرها ويستقر عند الصاري - بقالي اكتر من عشر سنين ماشفتوش بعد ما سبت بيت امي اللي الموكب بيعدي من جمبه - كنت باحب اوي شكل العربيات المتزوقه وخصوصا اللي علي شكل جامع صغير ،ومنظر الناس وهما فرحانين وكتير منهم بيوزعوا كوبايات شربات او لبن علي اللي رايح واللي جاي اما في الارياف فكان اعيان البلد بيدبحوا ويفرقوا اللحوم علي الفقراء والمساكين

وكان كتير من الناس بيقيموا سرادقات امام منازلهم لذكر الله والقاء التواشيح الدينيه وحكايات السيره العطره ومدح الرسول عليه الصلاة والسلام


افتقدنا كل ده وفضلت بس الحلاوه ، وحتي الحلاوة التقليديه اللي متعودين عليها من سنين بدات تقل وتحل محلها اصناف تانيه غريبه واسماء اغرب باسعار اغرب واغرب ، خايفه كمان سنه ولا اتنين تختفي الحلاوة هي كمان او تيجلنا مستورده من الصين




٢٠٠٩-٠٢-٢٨

عودة الشتاء الضال



اكره الشتاء-اكتئاب ،برودة ،حبس إجباري - ولكن اعشق المطر ويملأني بهجه وسعاده


"الدنيا بتشتي ... وأروح لستي....تعمل لي فطيرة ...تحت الحصيرة....اخدها واجري ....اكُلها و انام تحت الحَمَام "

اغنية طواها النسيان -كما فعل باشياء عديده- كانا دوما نتغني بها ونحن نلهو تحت الامطار ، سمعتها اليوم من بعض الاولاد ، اخذني الحنين ، سرحت في الماضي البعيد عندما كنا مجموعه من البنات والاولاد نلعب ونجري ونغني باعلي صوت بلا قيود ولا حدود ، راودتني نفسي ان اقف معهم تحت المطر واغني كما اعتدت ان افعل ولكني اكتفيت بالمشاهده و الاستمتاع عن بعد


فلاااااااااااش باك


المشهد الاول

نهار خارجي - شمس مشرقه وجو جميل

هو : الحمد لله الشتا السنه دي عدي بسرعه ، وأهو قرب يخلص علي خير

هي : شتا ؟؟!! شتا إيه؟؟!! هو السنه كان فيه شتا !!!
السنه دي الشتا كان واخد اجازة عارضه

المشهد الثاني
ظهر خارجي - رياح مثيرة للاتربه وجو خانق

هو : لازم امشير يعملها زي عوايده ماينفعش ابدا يعدي كده من غير زعابيبه

هي: اوحش حاجه التراب ده يارب شوية شتا يصفوا الجو


المشهد الثالث

امطار غزيره بلا انقطاع - رعد - برق


المشهد الرابع

ليل داخلي - نشرة 9

مذيع النشرة الجوية

تستمر درجات الحرارة أقل من معدلاتها بقيم ملحوظة ليسود طقس بارد نهاراً شديد البرودة ليلاً هذا وتتكاثر السحب الممطرة على شمال وشرق البلاد حتى شمال الصعيد تكون رعدية أحياناً والرياح شمالية غربية نشطة مما يزيد الإحساس ببرودة الطقس ، وتستمر الامطار لليوم الثالث علي التوالي
واليكم درجات الحرارة بالتفصيل :.......................



هو : نقيتي فيها اهو الشتا قطع الاجازة وجه يمضي حضور وانصراف مع بعض




٢٠٠٩-٠٢-١٧

حتما آت



بين ضياء الشمس
ابحث وافتش
عن احلامي
عن كلماتي
عن ايام باتت منسية
عن انسان

عند مغيب الشمس
اسال اتقصي
عن ضحكاتي
عن حكاياتي
عن سنوات كانت وردية
عن دفء وحنان

ليل صباح ابحث
في اوراقي في جنباتي
بين حطامي
لا يوجد الا احزان

ابحث عن وجه يشبهني
عن شخص يعرفني
عن فارس ينقذني
ولكن شح الفرسان

انفضوا جميعا من حولي
انشغلوا بمال وبلهوِ
تركوني اصارعه وحدي
صياداً لا يعرف رحمه

يقتل
يذبح
يحرق
يسلخ

مثخنة بجراحي
اصرخ
وانادي لا اسمع ردا


تركوني اعاني آلامي
وانفضوا جميعا من حولي

ولكني ابدا لم ايأس

ظل الامل يراودني ان اجده
و سيأتي يوما
فارس بحصانٍ ابيض
ساقص عليه حكاياتي
وسيمحي عني احزاني
وسترجع معه ضحكاتي
ويزول الخوف والقهر

هو حتما آت

٢٠٠٩-٠٢-٠٢

غير المحطة



انهارده قررت اغير المحطه

قررت ابعد عن اي حاجه تعكنن وادي النكد اجازه مفتوحه

هاحاول اترفع عن المشاكل ، وارمي الإحباطات وري ضهري

مش هاتفرج علي قناة الجزيره ولا اشوف الاخبار اللي تعلي الضغط ، اقولكم مش هاشوف تليفيزيون خالص

هافتح الراديو علي اذاعة الشرق الاوسط وهامشي بخفه ودلع ، بس اكيد الدنيا مش هاتكون هي الشابه ولا انا الجدع


هادخل المطبخ و اعمل كيكة فواكة وعصير فراوله باللبن

هاقري مجلة ميكي جيب واضحك من قلبي علي بطوط وعم دهب وارجع للايام الجميله


هادور علي حد قريب او بعيد احاول ادخل علي قلبه الفرحه


هابص انهارده للدنيا بنظره ورديه وهاشوف النص المليان من الكبايه ومش هافكر في بكره


اكيد يعني يوم في الشهر هايكون افيد للصحه ومش هايضر

وانتو كمان حاولوا ت
غيروا المحطة ولو يوم في الشهر


٢٠٠٩-٠١-٢٥

حيرة



اعتادت ان تقرأ كتيب التعليمات بعنايه فائقه

كانت تهتم بأدق التفاصيل ، تضع كل شئ في الحسبان وتطبق الخطوات بدقة لتحصل علي افضل نتائج

و دائما ما كانت تحصل عليها ، و لم تخفق أبدا

هذه المره وقعت في حيره شديده ، قرأت كتيب التعليمات مرارا وتكرارا ، حاولت كثيرا أن تغير في الطريقة وتعدل من الاسلوب

ولكن النتائج لم تكن بالضرورة كما توقعت لها ان تكون

وأخيرا تقر أنها وإلي الآن لم تعرف الطريقه المثلي للتعامل معه ، وتحتاج لأضعاف أضعاف ما مضي لتتمكن من ذلك ، وتخشي أن لا تصل أبدا إلي نتائج مُرضيه



القرآن الكريم