2008-12-29

غزه ...احنا آسفين




آسفه اني مش قادره اساعدتكم و مش قادره امد ايدي ليكم




آسفه بالنيابه عن كل العرب اللي واقفين عاجزين وكل يوم بيزدادوا عجز علي عجز




آسفه ان ما فيش في ايدينا حاجه نعملها الا الدعاء والتضرع ان ربنا يزيح الغمه




آسفه مع اني لو مكانكم اكيد ما كنتش هاقبل الأسف






2008-12-25

اكشفه اغطيه ...انا حره


ايوه دا وشي وانا حره فيه اكشفه ،اغطيه،اعمل اللي انا عاوزاه ، بالظبط بالظبط زي ما بيدوا الحريه لاي حد انه يكشف او يغطي حاجات تانيه

ايوه حره طالما حريتي دي مش هاتضر اي حد ولا تأذي اي حد وكل انسان حر يختار طريقة حياته زي ما هو عايز

الناس ليل ونهار وفكل حته صدعولنا دماغنا بالكلام عن الحريه اللي عاوزنها تبقي متاحه للجميع ،

حتي الشواذ عاوزين يبقي ليهم حريه في اي ممارسات بيعملوها ،

و البهائيين عاوزين يعترفوا بدينهم اللي مش دين اصلا ويدوهم الحق في حرية ممارسة طقوسهم والدعوه لدينهم
حتي الملحدين اللي بيشتموا في كل المقدسات ليل ونهار في ناس بتنادي بحريتهم

طيب اشمعني بقي لما تيجي واحده تقول انا هاغطي نفسي وهاحاول اتشبه بامهات المسلمين ولو في حاجه بسيطه اللي هي النقاب ، وهاتكون نيتي الخالصه هي المحاوله الجاده للتقرب ولو سنتيمترات قليله من ربنا


ليه تلاقي الحوار اتحول من النقيض للنقيض ، مهاجمه عمال علي بطال ونعت بابشع الصفات ومحاولات من كل الناس اللي بينادوا بالحريه انهم يحدوا من حريتها في اختيار ما ارتضته لنفسها مهما كان صح ولا غلط

هو مش ده برضو داخل ضمن نطاق الحريه الشخصيه اللي بيقولوا عليها ؟؟؟ ولا هي الحريه بتتجزأ ولا طالما الموضوع له علاقه بالاسلام يبقي لا والف لا ونلاقي الكل اصابتهم الاسلاموفوبيا ؟؟؟؟

ليه نلاقي الناس عماله تهاجم المنتقبات والمحجبات ، وتربط بينهم وبين التخلف عن ركب الحضاره ، يعني بلدنا مش هاتلحق ركب الحضاره الا اذا خلعت السيدات حجابهم ؟!!!!!!!!!

بيقولوا صلحوا اخلاقكم قبل ما تصلحوا مظهركم الاول.... طيب وفيها ايه يعني لو عملنا الاتنين مع بعض ؟؟

ناس بتقول ان كتير من المنتقبات والمحجبات واخدين الموضوع مجرد شكل خارجي ومظهر امام الناس وبس و ان ده تسطيح للاسلام في شوية مظاهر زي النقاب واللحيه ، اقولهم افرضوا ......احنا مادخلناش في قلوب حد ولا كشفنا عن العلاقه اللي بينه وبين ربنا شكلها عامل ازاي ؟؟

كل الكلام اللي فوق ده بيتقال ويتردد في كل حته وكتير اوي من الاشخاص اللي بيقولوا انهم بيدعوا الي التحضر والرقي و بيستغلوا كل اللي اتعلموه في مهاجمة النقاب والحجاب بطرق غير حياديه وفيها تعصب وكيل بمكيالين
، واللعب بالالفاظ وتحوير في الكلام ، وتصيد اشياء من وجهة نظرهم انها اخطاء ، وده عادي واتعودنا عليه وخدنا مناعه منه وماعدش بيهمنا

بس اللي مش عادي واللي فعلا ما ينفعش يحصل ان كلام زي ده يكون صادر من وزارة الاوقاف المصريه راعية الازهر أعلي مؤسسة دينية اسلامية في مصر والعالم

ماينفعش ان المؤسسات الدينيه يصدر عنها مثل هذا الهراء

أيوه النقاب مش فرض ولكن معظم العلماء اعتبروه فضل تحاول به احدانا ان تزداد عفه وتقرب الي الله ، صحيح ترك النقاب ليس بذنب ولكن الاخذ به ليس بكبيره تستحق العقاب ، ولا هو بدعه نخاف علي الدين منها ، ولا بيسبب نص المفاسد اللي بتسببها حاجات تانيه ووزارة الاوقاف ومن قبلها الازهر ساكتين عنها ومطنشين وعامين ودن من طين والتانيه من عجين ولو حبيت اعددها مش هالحق اخلصها قبل السنه الجايه

ليه بس النقاب هو اللي صدرت ضده الكتب لتهاجمه ونعتته انه مجرد عاده بدويه مستورده من الصحراء ، الأزهر اللي عاش عمره يقول أن النقاب فضل وليس فرض أصبح فجأة عادة سيئة وليس عبادة



وليه بس النقاب هو اللي اتعملت عشان الحد من انتشاره 900 قافله هاتلف المحافظاتو اتكلفت 10 مليون جنيه من ميزانية وزارة الاوقاف ، ويوم ما يدوروا علي 10 ألاف جنيه عشان ترميم معهد ازهري هايتهد فوق رؤوس الطلبه تبقي الميزانيه لا تسمح ؟؟!!!!


لحد امتي هاتفضل سياسة الكيل بمكيالين موجوده وهانفضل نناقش المواضيع علي طريقة لا تقربوا الصلاه ؟؟ ولحد امتي هانفضل نهاجم مظاهر الاسلام والعوده الي الله ؟؟ ولحد امتي الحديث الديني هايكون تحت رحمة السياسة ولخدمة اهداف سياسية بحته ؟؟؟ لحد امتي هانفضل كده ؟؟؟

يمكن كتير منكم قبل البوست ده ماكانش يعرف اني منتقبه ، لكن الحمد لله انا ارتدي النقاب من حوالي سنتين ، ومش حاسه اني مختلفه يعني عن اي حد حواليا ، ولا حاسه اني حاطه قفل علي دماغي ولا ان عندي بدل المخ حاجه تانيه ماركة باتا 45

ولا معلقه المشانق لحد ، ولا بقعد في المواصلات اخوف الناس من عذاب القبر ، ولا ما سكه كرباج اجلد بيه اي واحده مش محجبه ، ولا باذن فودان غير المنتقبات عشان ينتقبوا ، ولا خبيت سلاح في هدومي ودخلت سرقت بنك وروعت امن المواطنين ، ولا العيال الصغيره لما بتشوفني بيتسرعوا ، ولا ماشيه اعيس في الارض فسادا ولا شايفه اني ارهابيه

و لما بابص لنفسي في المرايه مش باشوف كيس زباله ومربوط من فوق، باشوف انسانه عاديه جدا زي اي واحده تانيه ، انسانه كل اللي تتمناه رضا المولي عز وجل مش اي حد تاني

في الاخر ما عنديش الا الآية الكريمة :

( فأما الزبد فيذهب جفاء وأما ما ينفع الناس فيمكث في الأرض كذلك يضرب الله الأمثال‏ )

صدق الله العظيم

تضامنا مع مدوني تونس ــــ يوم التدوينه البيضاء

التدوينة البيضاء








ActionNoteBlanche
يوم التّدوينةالبيضاء
ActionBlankPost





معاً ضد سياسة الحجب في تونس



2008-12-17

اغني خمسين عربي


اصدرت مجلة ال arabian business الصادره في دبي قائمة 2008 لاغني خمسين شخصية عربيه



واللافت للنظر هذا العام هو الخسارة الهائله لكثير من الاثرياء العرب ( خصوصا اول عشره في القائمة) بسبب الازمه الاقتصادية العالميه
وكان السؤال الاهم هذه المره فلان خسر اديه مش كسب اد ايه، وطبعا كان اكثر من تأثر هو الوليد ابن طلال اللي فقد من ثروته اكتر من 4 مليار دولار بس برضو لسه بيحتل قمة القائمه كاكثر شخصيه عربيه ثراء بثروة تقدر ب 17.08 مليار دولار


كمان اللافت للنظر خروج بعض الاسماء اللي اتعودنا علي وجودها في راس القائمه زي عائلة الراجحي السعوديه اللي كانت بتحتل المركز الثاني في تصنيف 2007 و اللي ادي تفكك افرادها وانفراد كل واحد منهم بنصيبه من الثروه الي خروجهم من القايمه ويادوب لحق
محمد الراجحي المركز الخمسين باستحواذه علي 1.1 مليار دولار بس من ثروة العائله وده هو الحد الادني لدخول التصنيف

وعائلة الحريري اللبنانيه بعد انفصال افرادها و
انخفاض اسعار الاسهم وقيمة الاراضي في لبنان احتلت مراكز متأخره بعد ماكانوا بيحتلوا المركز الثالث في ترتيب السنه اللي فاتت ،

فاحتل
سعد الحريري المركز ال 31 ب 2.6 مليار دولار

بينما احتل
بهاء الحريري المركز ال 33 ب 2.3 مليار دولار

أيمن الحريري المركز 36 ب 2.1 مليار دولار

وكانت السيده الوحيده في القائمة الكويتيه
سعاد الحميضي واللي بتحتل المركز ال 26 بثروه تقدر ب 3 مليار دولار


اغني عشر شخصيات عربيه :


الوليد بن طلال 17.08مليار دولار( السعودية )


ناصر الخرافي9.6 مليار دولار( الكويت )


معن الصانع 9.3 مليار دولار (السعودية )


محمد بن عيسى الجابر 8.8 مليار دولار ( السعودية )


محمد العمودي 8.8 مليار دولار (السعودية )


عبد العزيز الغرير 7.8 مليار دولار( الامارات)


عائلة بن لادن 7.2 مليار دولار ( السعودية )


عائلة العليان 7.2 مليار دولار ( السعودية )


عائلة كانو 6.1 مليار دولار ( البحرين)


سعيد خوري 6 مليار دولار ( فلسطين)



اما المصريين فمبدأش ظهورهم في القايمه الا في المركز ال 23 واحتلته عائلة ساويرس ب 3.2 مليار دولار بأول ظهور ليهم في قايمة الاغنياء العرب

ويليه في المركز ال 34 محمد شفيق جبر ب 2.2 مليار دولار( كان السنه اللي فاتت في المركز 30)

ثم يليله أحمد عز في المركز ال 46 بثروه تقدرب 1.5 مليار دولار( تقدم مركز عن تصنيف العام الماضي )

وبعده يأتي
طلعت مصطفى في المركز ال 48 متقدم عن العام الماضي بمركز واحد وثروته تقدر ب 1.5 مليار دولار

واخيرا يأتي فايز صاروفيم يحتل المركز 49 بثروه قدرها 1.4 مليار دولار ( السنه اللي فاتت كان في المركز 42)



قائمة 2008

قائمة 2007

عقبالكم جميعا

2008-12-06

يارايحين للنبي الغالي هنيالكم وعقبالي



ياريتنى كنت وياكم
واروح للغالى وازوره
وابوس من شوقى شباكه
وقلبى يتملئ بنوره
واحج واطوف سبع مرات
والبى واشوف منى وعرفات
واقول ربى كتبهالى
يارايحين للنبى الغالى
هنيالكم وعقبالى
هنيالكم وعقبالى






كل سنه وكلكم طيبين وحج مبرور لكل الحجاج
وربنا يوعدنا جميعا بالوقوف علي عرفات صحبه العام القادم


2008-12-04

نفحات ربانية



" أَلَمْ يَعْلَمُواْ أَنَّ اللّهَ هُوَ يَقْبَلُ التَّوْبَةَ عَنْ عِبَادِهِ وَيَأْخُذُ الصَّدَقَاتِ وَأَنَّ اللّهَ هُوَ التَّوَّابُ الرَّحِيمُ "


من احب السورة الي قلبي سورة التوبة ، اتلوها فاشعر بقوة روحانية وشحنه ايمانيه تملأ قلبي ، و بنور يتجلي وتخلل الروح وينساب فيها


حينما تسبح روحي في الملكوت الرباني، اشعر بحلاوه ولذه ليس لها مثيل ، وأبدأ في التفكر بالآيات الكريمة التي تأمرنا بالامتثال لاوامر الله ورسوله صلي الله عليه وسلم ،



" قل إن كان آباؤكم وأبناؤكم واخوانكم وأزواجكم وعشيرتكم وأموال اقترفتموها وتجارة تخشون كسادها ومساكن ترضونها أحب إليكم من الله ورسوله وجهاد في سبيله فتربصوا حتى يأتي الله بأمره والله لايهدي القوم الفاسقين "


عندما قرات هذه الآية لاول مره دمعت عيناي وتعجبت لمن يقرأها ثم يتخاذل عن نصرة دين الله في كل مكان ،




" قل لن يصيبنا إلا ما كتب الله لنا هو مولانا وعلى الله فليتوكل المؤمنون "


اسلم بانه مهما كان الامر فلن يصيبني الا ما كتب الله لي ،
وادعو الله ان يرضني بما قضي لي ويعافيني فيما ابقي حتي لا احب تعجيل ما اخر ولا تأجيل ما عجل




"فرح المخلفون بمقعدهم خلاف رسول الله وكرهوا أن يجاهدوا بأموالهم وأنفسهم فى سبيل الله وقالوا لا تنفروا فى الحر قل نار جهنم اشد حرا لو كانوا يفقهون "



التأني والتحليق في رحاب الأيات ينقلني الي قلب الاحداث هناك عندما بدأ الحبيب في التجهيز لغزوة تبوك ، في اشد ايام حرا وتخلف عنه من تخلف وساقوا له الحجج والاعذار واتعجب كيف استطاعوا ان يكذبوا علي الحبيب ويرغبوا بانفسهم عن نفسه و
اشعر بنداء الله لنا وهو يحذرنا من العذاب وينذرنا ان نار جهنم اشد حرا ثم يبشرنا بالمغفرة والرحمة





" وآخرون اعترفوا بذنوبهم خلطوا عملا صالحا وآخر سيئا عسى الله أن يتوب عليهم إن الله غفور رحيم "


اتمني علي الله ان يتوب علينا فهو الغفور الرحيم





وتتوالي الآيات وتزداد السكينه ويزداد القرب من الله والتحليق في رحابه

اعيش مأساه الثلاثه اللذين خلفوا وأشعر بفرحتهم عندما ياتيهم العفو الرباني
واتمني ان كون ممن يعفو عنهم الله ويدخلهم برحمته في عباده الصالحين



" وعلى الثلاثة الذين خلفوا حتى إذا ضاقت عليهم الأرض بما رحبت وضاقت عليهم أنفسهم وظنوا أن لا ملجأ من الله إلا إليه ثم تاب عليهم ليتوبوا إن الله هو التواب الرحيم "




ثم تختم السوره باجمل الآيات واقربها الي قلبي


" لقد جاءكم رسول من أنفسكم عزيز عليه ما عنتم حريص عليكم بالمؤمنين رءوف رحيم "
" فأن تولوا فقل حسبي الله لا اله إلا هو عليه توكلت وهو رب العرش العظيم "






حسبي الله لا اله الا هو عليه توكلت وهو رب العرش العظيم



الصورة من فليكر

2008-11-25

شط اسكندريه يا شط الهوا

يوم السبت شدينا الرحال علي عروس البحر الابيض



صحيح اني حاولت بشتي الطرق اننا نشرخ علي بورسعيد بدل اسكندريه
بس للاسف باءت كل المحاولات بالفشل الذريع

مع اعتذاري لكل الاسكندرانيه انا باتمتع اكتر في بورسعيد
المعديه وبورفؤاد والسوق وشارع طرح البحر والكاستن

ده مايمنعش ان اسكندريه ليها سحرها الخاص وخصوصا في الشتا وهي فاضيه بتبقي رااااااااائعه

حاولت اصور شوية بس ياريت الصور تعجبكم



شوفوا الكورنيش فاضي ازاي


مارحنتاش القلعه بس رحنا متحف الاحياء المائيه عشان سمسم ابن اخويا
كان عاوز يشوف نيمو علي الحقيقه

طبعا ماشفش نيمو بس شاف حاجات تانيه ، واصلا المتحف كله ماخدش ربع ساعه

بس كان زحمه موت وكله رحلات مدرسيه لان السبت اجازة المدارس



دي القلعه طبعا :))




بعض احواض السمك جوا المتحف


لفينا شويه علي الكورنيش وفي بحري ورحنا للشيخ وفيق طبعا ،
ومحطة الرمل والمنشيه واشترينا شويه حاجات وهريسه من عند احمد حسنين

ولاننا مرتبطين بمواعيد شفتات الصيدليه كنا في البيت علي الساعه عشره، صحيح مشينا بدري اوي بس كان يوم جميل جدا وكلنا الحمد لله اتبسطنا وعلي راسنا طبعا الاستاذ سمسم

---------------
تحديث

تم التصحيح يا جماعه معلش والله هي غلطات مطبعيه من السرعه لا اكثر لاني كنت باكتب البوست في الصيدليه وماراجعتش عليه بعد ما نشترته ، وطبعا دي من المعالم اللي ماينفعش حد يغلط فيها





2008-11-21

في مصر طبعا







طالما مش بتعرفوا تكتبوا انجليزي ، بتكتبوه لييييييييييييييييييه ؟؟

بتحطوا نفسكوا في مواقف بااااااااااااااااااااايخه

2008-11-19

الطبعة المميزة / تحديث


الراجل ده باحبه وباحترمه وبقدره جدا جدا

و برنامجه الطبعه الاولي علي قناة دريم من اجمل البرامج واكثرها جرأه علي شاشة الفضائيات ، باحرص اني اتابعه باستمرار مع انه دايما بيسبب لي اكتئاب وباحس اننا رايحيين علي المجهول وان طريقك مسدود مسدود مسدود يا ولدي


تحس وانت بتتفرج علي المسلماني انك قاعد قدام ابن بلد اصيل ، من نبت ارض مصر الطاهره اللي لسه فيها ناس بيخافوا عليها وبيحبوها بجد

اسلوبه شيق جدا في عرض الموضوعات ومناقشة الاخبار ، بيحاول يوصل بالمعلومه مهما كانت صعوبتها لمستوي المواطن البسيط جدا اللي عمره ما قرا جرايد ولا راح مدارس

من متابعتي لبرنامجه فهمت مواضيع كتير اوي ما كنتش اعرف عنها اي حاجه ، ومواضيع تانيه كان كلها غموض بسبب التعتيم الاعلامي للحكومه

احترمته جدا جدا لما قرر من فتره ان البرنامج ماعدش هايناقش ولا يتابع ولا يجيب سيرة طلعت مصطفي وسوزان تميم ، مع ان الموضوع ده بالذات فاتح شهية الفضائيات اليومين دول علي الآخر، حسيت انه فعلا وبجد مش عاوز يضيع وقته ولا وقت المشاهد في مواضيع هايفه ملهاش اي لازمه وانه يركز احسن علي الموضوعات الجاده اللي تهم الناس


كمان احترمت فيه انه بيتعامل بصدر رحب مع اي حد يبعتله تعقيب او اعتراض علي حاجه قالها في حلقات سابقه ، زي موضوع فضيله مطلقة الملك السابق احمد فؤاد واللي عمل معاها حوار ادعت فيه انها ماتزال علي زمة احمد فؤاد اللي بدوره بعت تكذيب للكلام ده ، وفعلا ذاع الرساله واجري مكالمه تليفونيه مع احمد فؤاد اعتذرله فيها عن الخطأ ده وحكي نصها في البرنامج


كمان لما قال ان مصر مافيش فيها اي برنامج فضاء ولا بتسعي لكده لما جاله تكذيب من رئيس مركز بحوث الفضاء ما اتكسفش انه يذيع الكلام ده ويعرف الناس ان فعلا مصر ليها برنامج فضاء بس المشكله ان الاعلام الحكومي مش فاضي للحاجات المهمه وفاضي بس للتفاهات وبالتالي ماهتمش ان مصر اطلقت مؤخرا بتعاون اوكراني قمر صناعي جزء كبير منه مصنع بايدي مصريه


بيناقش ويحلل كل حاجه حوالينا و يقول للاعور انت اعور في عينه حتي لو رئيس الوزراء نفسه ، اعتبره اجرأ مذيع حاليا علي الساحه المصريه ( طبعا يسبقه حمدي قنديل بس برنامجه بيذاع من دبي مش من مصر )


ومع انه مش فوتوجينيك ولا بيستظرف زي بعضهم
الا انه بيتميز عن اي مقدم برامج آخر انه دارس وفاهم ( حاصل علي بكالوريوس اقتصاد وعلوم سياسية من جامعة القاهره ) ومش مجرد واحد شكله حلو طالع يقرا كلمتين في جرنال ويمشي ، ولا واحد بيستخف دمه ويحرقلنا دمنا بإفيهات سخيفه مالهاش اي لازمه ، ولا بيحاول انه يحابي لحد ويمشي مع الموجه


وبالمناسبة حاولت قناة المحور انها تستنسخ الطبعه الاولي فاطلع برنامج ممسوخ اسمه الصفحه الاخيره لا لون ولا طعم ولا رائحه


احمد المسلماني عمل لفتره في مركز الاهرام للدراسات السياسيه والاقتصادية ، وحاليا هو المستشار الصحفي للدكتور احمد زويل وبيكتب في المصري اليوم

خايفه جدا يحصل معاه زي اللي حصل مع حمدي قنديل لحد ما يزهق ويمشي هو كمان


عاوزه اقولكم اني كان نفسي اكتب الكلام ده من زمان اوي وكل ما انوي الاقي ناس كتير كاتبه عنه وقايللين اللي عاوزه اقوله ،بس حتي لو الموضوع هايكون مكرر ماكنش ينفع ماقولش اني باحترم الراجل ده وبقدره جدا



N.B :


اكتشفت وانا بدور علي صوره للبوست ان في ناس عاملينله جروب علي الفيس بوك
هنا

وان له صفحه علي الويكيبيديا

هنا


ممكن تقروا شويه من مقالاته


هنا



وبعض المدونين كتبوا عن البرنامج

EMERALD.OASIS

احمد المسلماني


اسكندراني

الطبعة الاولى “برنامجي المفضل” والاستاذ احمد المسلماني


------------------------------------

تحديث


لقيت الحوار الجميل ده عملاه مجلة الشباب مع المسلماني اقروه هايعجبكم ان شاء الله

هنا



2008-11-18

أتمني لو



أتمني لو كانت الأحلام الجامحه

خيولا بريه باجنحه بيضاء

امتطي إحداها وأهرب
مع الريح

تحت ستار الليل علي مرأي من النجوم


أرقص مع القمر وأحلق فوق السحاب

تاركتا خلفي الحزن وكل الهموم


2008-11-09

قهوة سادة وشيكولاته غامقة



ابحث عنك في كل مكان ، في عيون البشر من حولي اسأل عنك فلا اجد رد

اركض خلف طيفك انادي حتي يبح صوتي فلا اسمع الا الصدي

يفوق الشوق حدود صبري ، يكبلني ، يدميني ، ويمزقني الي اشلاء

كلما حاولت الفرار تعيدني الذكري .


كيف لي ان انساك وانت حولي في كل مكان ؟؟؟؟؟


قلبي يابي الاستمرار وانت عنه بعيد ، لقد كنت الدنيا وآخر المدي

برحيلك سكن الحزن روحي وبدونك اشعر بالغربه و احلامي تابي الا ان تأخذني اليك


ايامي صارت انتظارا لقدومك.... فلما طال البعاد ؟؟


أتذكر روحك الاخاذه ،اتذكر ضحكاتك ، اتذكر جلساتنا الصباحيه

صوت فيروز وفنجان القهوة


اتذكر كلماتك " القهوة الساده ماتنفعش الا بحتة شيكولاته غامقة " ،

تهديني علبه فأدمنها مع القهوة الساده و صوت فيروز

احن اليك ، الي صوتك ابتسامتك ولون عينيك

حاجة بي تدفعتني الى ان احادثك ... اشعر بأنك ستسمعني ... وتفهم ما اقولة لانك دائما هكذا

وكالعاده تعيدك الاحلام اليّ ، اشكو اليك قسوة الايام بدونك

تتعهد انك ستبقي الي الابد و
لن تغادر يوما


في الصباح وحيده أنا ، أسمع فيروز ، أصنع القهوة الساده ، وأأكل الشيكولاته الغامقة

علي سطح الفنجان اري وجهك مبتسما ، اشتم رائحتك في قطعة الشيكولاته،


تختصر المسافات وتعود اليّ






فأخبرك أني









فعلا اشتاق اليك


-----------



بعدك على بالي ياقمر الحلوين يازهر بتشرين ياذهب الغالي

بعدك على بالي ياحلوا يامغرور ياحبق ومنتور على سطح العالي

مرق الصيف بمواعيدو و الهوى لملم عناقيدو

و ما عرفنا خبر عنك يا قمر و لا حدا لوحلنا بإيدو

بتطل الليالي و بتروح الليالي
و بعدك على بالي


2008-11-06

إن غدا لناظره قريب



ياتري العالم هايكون شكله ايه بعد 20 يناير 2009 ؟؟



ياتري الناس متوقعين من اوباما اكتر من اللي يقدر يعمله ؟؟


ياتري فعلا هايكون فيه تغيير في سياسة امريكا الخارجيه تجاه العرب ومشاكلهم بعد توليه السلطة رسمي ؟؟


هل توقعاتنا له وللي يقدر يقدمهولنا كعرب بترتفع إلى مستويات غير واقعية وبعيدة المنال؟



تضاربت الآراء بين مؤيد ومعارض ، عدد لا بأس بيه شايف انه ماسخم من ستي الا سيدي ، وناس تانيه شايفينه هو بطلهم المرتقب وناس تالته مش هاممها ولا تابعوا الموضوع من اصله بيفضلوا التركيز علي مشاكلنا الداخليه احسن



بيني وبينكم احسن حاجه حصلت لحد دلوقتي ان خلاص العالم كله وانا اولهم هانرتاح من كابوس مزعج اسمه جورج دابليو بوش ، فإلي مزبلة التاريخ ، ويمكن تكون الفرحه الكبيره اللي العالم قابل بيها فوز اوباما لان بوش هايمشي في الف ........



ونرجع تاني نسأل:

هل فعلا باراك حسين اوباما هو الامل اللي كل العالم مستنيه ؟؟




إن غدا لناظره قريب


2008-11-04

عن عمرة رمضان احدثكم "3"

فوجئت عند عودتنا ان للنساء مكان مخصص غير الرجال ، مع ان في الحج كنت باصلي عادي بجوار زوجي وفي اي مكان حتي صحن الكعبة مش عارفه ليه اشمعنا رمضان وايه الفرق؟؟
قعد ادور علي اماكن السيدات لقيتها ورا جدا جدا ومش ممكن ابدا اقدر اشوف الكعبه ، اما المكان المخصص في الصحن فمستحيل اني الاقي فيه مللي فاضي الا اذا كنت هبات هناك ،
سلمت امري لله وفقدت الامل في رؤية الكعبة الا بعد الصلوات
المهم اتضحلي زي ماقلتلكم المره اللي فاتت ان ده احسن للخشوع والتركيز والتدبر في الصلاه وكمان باقدر اقعد الوقت اللي انا عاوزاه من غير ماحد يقولي يلا نروح

ولان الدنيا كانت ولا يوم الحشر كنت باروح الحرم من قبل صلاة العصر لبعد صلاة التراويح ، وارجع تاني علي التهجد لحد الضحي ، والحمد لله كنت باقدر الاقي مكان فاضي ودي برضو ميزه انك تكون لوحدك فابتقدر تتحشر في اي مكان مهما كان صغير ، وسبحان الله زي ما يكون ربنا بيوسع الارض للمصليين

استمرت اعداد الناس في ازدياد مستمر مع اقتراب رمضان من نهايته خصوصا مع اقتراب ليلة سبعه وعشرين ، تقريبا تضاعف العدد ، وشفت بعيني ناس بيتوا في الحرم من قبلها بيوم عشان يقدروا يلاقوا مكان


ليلة 27 كانت يوم الجمعه وده معناه ان فيه صلاة جمعه و عشان تلحق مكان في الحرم علي الاقل خالص تروح من الساعه 10 الصبح وده طبعا كان مستحيل لاني ببقي لسه مروحه حوالي 7 الصبح ، ففضلت اني انام واخد راحتي استعدادا للقيام والتهجد ، خصوصا ان صلاة الجمعه مش فرض اساسي للنساء زي الرجال

حصلت حاجه عكننت عليا في اليوم ده ، انا رايحه عادي جدا زي كل يوم الحق اصلي الظهرفي الحرم ،
مش عارفه الاقي مكان او بمعني اصح ماحدش راضي يقعدني جمبه وكل ما تسال حد يقولك محجوز ( اكننا في سينيما ...اه والله )

الاماكن كلها فاضيه بس مافيش ولا مكان !!!!!، وفاضل نص ساعه علي العصر وعاوزه اصلي الظهر ، فاجأة لقيت حد بيقول حسبنا الله ونعم الوكيل فيكم منكم لله ، واحده الناس برضو مش راضيين يقعدوها ، استأذنت من واحده اني اصلي بس وامشي الحمد لله طلعت ذوق وسمحتلي بالصلاه
حوالي 45 دقيقه مش عارفه اقعد طب هاعمل ايه لو خرجت دلوقتي استحاله الاقي مكان بره وهايبقي مصيري الشارع ؟؟؟؟

قلت بس مابدهاش الواحد لازم يبقي شرير شويه ، واول مكان فاضي لمحته قعده فيه فرضت عليهم سياسة الامر الواقع وقلتلهم والله العظيم ما انا قايمه هو كل واحده حاجز لتلاته اربع اما يبقوا يجوا ربنا هايسهل...بس وسبت اللي يتكلم يتكلم وقعدت اقرأ سورة الكهف

اتضحلي بعد كده ان الحاجه اللي جمبي كانت حاجزه مكان لبنتها وبنت بنتها اللي ماتعدتش سنة عشان تنيمها فيه ، بقي ده بالله عليكم يرضي ربنا ؟؟؟ وتعرقوا الصف ده زاد عليه حوالي 4 وكان مكفينا برضو

الليله دي كانت مختلفه تماما عن كل الليالي اللي قبلها ، صحيح هو مش شرط تكون ليلة القدر ، بس مش عارفه ليه كان فيه احساس داخلي بيقولي دي ليلة القدر ......!!!!!!!

اولا الصيام بالنهار كان سهل جدا والدنيا مع كل الزحمه تحسها مش حر ولا كتمه زي كل يوم

مع دخول الليل وصلاة المغرب هلت علينا نسمات بارده جميله جدا مش عارفه اوصفها ،

السما كانت صافيه ( كنت بصلي في الدور التاني وشيفاها )

مع دخول الليل اكتر كانت النسمات بتزيد وبقت عامله زي رياح خفيفه جايه من جميع الاتجاهات ، وكأن الحرم - اللي كان في الايام اللي فاتت نار - اتركب فيه تكييف مركزي ، حسستني ان الملايكه رايحه جايه حوالينا والنسمات دي بسببهم
قال صلي الله عليه وسلم " إن الملائكة تنزل في هذه الليلة فيكونون أكثر من عدد الحصي "

نشاط رهيب دب فيا فاجأه ، كنت تقريبا باجري عشان الحق اروح الفندق وارجع لصلاة التهجد من غير اي تعب

كنت حاسه بفرحه شديده في صلاة التهجد ، ولذه رهيبه مع دعاء الشيخ السديس

كل علامات ليلة القدر المتعارف عليها كانت موجوده ، ومكانش احساسي لوحدي لا دا كان شعور جماعي

" اللهم انك عفو كريم تحب العفو فاعفو عنا "

بعد انتهاء التهجد كان الزحام خف شويه وقدرت انزل للصحن امتع عيني بالنظر للكعبه ، وصليت الفجر والضحي هناك وكان من اجمل الايام اللي صليت فيها



ليلة 29 ختم القرآن

كنت فاكره ان اقصي زحام ممكن يكون موجود هو ليلة 27 لكن اتضح بعد كده ان العدد تضاعف ليلة 29، الكل بيمني نفسه انه يحضر ختام القرآن ويستمع الي دعاء القنوت و يتوجه الي الله بكل كيانه وذرات قلبه ، ويتمني من الله انه يكون دعاء مستجاب و صيام وقيام متقبل
كنت باسمع السور الاخيره من جزء عم وكأني اول مره اسمعها ،

"اذا جاء نصر الله والفتح...... "

" تبت يدا ابي لهب وتب ..."

" قل هو الله احد..."

"قل اعوذ برب الفلق ....."

"
قل اعوذ برب الناس ..."

ويبدأ الدعاء ويدخلني فدنيا تانيه ، تملاني الرعشه ،افكر في الذنوب واتعهد امام الله بالتوبه النصوحه ، تنساب الدموع لعلها تغسل كل الذنوب ، احس اد ايه انا ضعيفه وذليله احتاج الي الله ، اقف علي بابه وارفع اكفي بالدعاء وكل امنياتي انه يستجيب دعائي ولا يردني خائبه ،

ينتهي الدعاء و ماينتهيش املنا في العفو والمغفره ، وماتنتهيش دموع الحزن علي فراق رمضان وفراق بيت الله الحرام وارضه الطاهره

كانت آخر صلاة هي صلاة التهجد ليلة 29 ( يارب لا تحرمنا الزياره مرات عديده و ازمنة مديده ) ، لاننا قررنا نقدم معاد السفر ليوم 29 رمضان بدلا من 4 شوال بسبب بعض الظروف اللي جدت في شغل زوجي واللي حرمتنا من خمسة ايام زياده في رحاب الله

الحمد لله العوده كانت سهله جدا جدا وتأكيد الحجز علي التذاكر خلانا نسافرفي مواعيد مظبوطه ومن غير تأخير

-----------

حبة حاجات صغيره :


1- السنه دي كان الائمة في صلاة القيام الشيخ عادل الكلباني والشيخ ماهر المعقلي ، حسيتهم اقل بكتير اوي من الشيخ السديس والشيخ الشريم ، او يمكن عشان متعودين ان صلاة الحرم تبقي السديدس والشريم مش عارفه ؟؟؟بس كل الناس كان عندهم نفس الاحساس ده ، السديس والشريم بيقدروا يخلوك تندمج في الصلاه اكتر وكانوا بيصلوا بينا التهجد وبالرغم من طول الركعات ماكنش التركيز بيروح


2- الستات فمساجد مصر هما الستات في المسجد النبوي والحرام هما برضو الستات في مساجد بلاد الواق الواق ، مافيش نظام ولا هدوء ولا بيهتموا باي تعليمات ، ونفس الحاجات اللي خلتني ماصليش التراويح في مساجد مصر موجوده زيها بالظبط في الحرمين الشريفين


3- كل حد بيفتي في اللي يعرفه واللي مايعرفوش وساعات بتبقي فتاوي غلط وبيضل بيها كتير وراه ، خصوصا الستات والمصريات بالذات نازلين فتاوي في الصغيره قبل الكبيره ، المفروض في الاماكن دي ومع اختلاف الجنسيات والمذاهب المفروض ان كل واحد يخليه في نفسه ومايحاولش انه يفتي من غير لازمه


4- الناس مش مهتمين بنظافة المكان اللي بيبقوا موجودين فيه واي حد ممكن جدا انه يشرب في كوبايه ويرميها علي طول ايده او يرمي اي حاجه في اي حته ولا اكنه في الحرم ( شفتهم بعيني ) ولولا ان عمال النظافه شغالين علي قدم وساق كان الوضع هايبقي سئ جدا ، يمكن في الحرم النبوي الوضع محكوم شويه اما الكعبه لانها كبيره ومفتوحه فحدث ولا حرج


5- معظم المصريات هناك بيقدموا مثال سئ عن مصر ، الصوت العالي والاهتمام بالاكل والتكالب علي الحاجات اللي بتتوزع ،
اما الاية الكريمة (( ياأيها الذين ءامنوا اذا قيل لكم تفسحوا في المجالس فأفسحوا )) ولا اكنهم سمعوها قبل كده ، واستحاله ان واحده مصريه تتفسح في المجالس ،وكان الامر بيوصل لدرجة الشكل والتراشق بالالفاظ ،والله الجنسيات التانيه لما تحاول تقف جمبهم كانوا بيتفسحوا الا المصريات ، كأنهم قاعدين فبيتهم مش بيت ربنا


6- ممكن جدا تكون في وسط الصلاه وتلاقي اللي جمبك بعد ما كبر ودخل في الصلاه قاعد يعمل حاجات مالهاش اي علاقه بالصلاه وفجأة يقول الله اكبر ويركع معاك عادي جدا ، والناس بتعمل حاجات كتير غلط زي الصلاة في اوقات الكراهه خصوصا ساعة الشروق بالظبط ، وممكن يكونوا نايمين ويقوموا يصلوا من غير وضوء ، غير حركات جوا الصلاه نفسها مش مظبوطه زي الركوع الغير صحيح وغيره
المصريين هما تقريبا الجنسيه الوحيده اللي تحسها محافظه علي الصلاه زي صفة صلاة الرسول صلي الله عليه وسلم وتحس ان خشوعهم في الصلاه اكتر من اي جنسيه تانيه



7- ماء زمزم وما ادراكم ما ماء زمزم ، غذاء وشفاء و دواء ولما شرب له ،مش هاعرف اوصف طعمه بس كفايه اقولكم اني لما رجعت عانيت اكتر من اسبوع علي ما رجعت تاني اتعود علي مية مصر مع اني مش بشرب من مية الحنفيه
وعلي فكره طعم ماء زمزم لما بييجي هنا مش بيبقي زي اللي هناك ، دا حتي طعمه في الكعبه وهو طالع مباشرة من زمزم غير طعمه بعد نقله للمدينه المنوره


8- ليلة 27 كان فيه مجموعه من شوية ناس مهميين ( تقريبا وفد سياسي ) جايين يعملوا عمره ، شفتوا التشريفه اللي بتبقي فشوارع القاهره ، هي بالظبط كانت في شارع اجياد وعربيات بوليس 4x4 وسارينه وحرس وطني ، كنت رايحه الحرم عشان التهجد ، لقيتهم بملابس الاحرام نازلين من السلم الكهرباء المقابل للقصر الملكي و فوقهم حرس وتحتهم حرس ، استغربت جدا من ناس رايحه تقابل ربنا طمعا في العفو والمغفره ومحتاجه لحراسه ، طيب فين الخشوع وفين الخوف من ربنا وازاي هايطوفوا ويسعوا وحواليهم كل الحراسه دي ، (علي فكره شكلهم كان مدي علي مصريين )
المهم اني حسبنت عليهم واشتكيت ساعتها كل الظلمه لربنا وهو العالم والمطلع


9- معاملة الستات في الكعبةوحشه جدا جدا ، ومش عارفه ليه ماكنوش بيسمحوالنا نصلي في اماكن كتير مثلا زي السطح ولا حتي نطوف عليه ( مع انه في الحج عادي ) كمان ممنوع علي الستات انهم يصلوا في المنطقه الامامية من حجر اسماعيل واللي سمعت انها بس هي اللي من ضمن الكعبه ، واكتشفت ان منطقة الروضه عند زيارة الستات مش هي الروضه وانهم بيفرشولنا سجاد اخضر في حته غير الروضه الحقيقيه ، وبيذلونا اصلا علي ماندخلها ،
وكمان مافيش ستات بتدخل مطبعة المصحف الشريف !!!،
وزي ماقلتلكم في اول جزء انه لو باديهم ماكنوش دخلوا الستات حته خالص ولا حتي الكعبه والحرم النبوي
عموما ان اشتكيتهم زي ماقلتلكم رسول الله صلي الله عليه وسلم

الميزه الوحيده لكونك ست في السعوديه ان العربيات بتقفلك لوكنت بتعدي الشارع خصوصا لو منقبه ، ولو قعدتي علي اي كرسي في اي حته استحاله يقوموكي الا اذا قومتي بمزاجك ان شالله بعد سنه..... بس كده :)))



10- المصريين بيشتروا كميات رهيبه من حاجات ملهاش اي لازمه وموجود زيها هنا وارخص ، وتلاقي الواحد منهم راجع ومعاه خمسميت شنطه غير الناس اللي بيبقي معاهم زكايب ضخمة الحجم ، غير مية زمزم بالجراكن ، تصدقوا ان فيه واحد كان معاه 90 كيلو وزن زايد ولولا انهم السنه دي ماحسبوش اي حد علي الوزن الزايد كان اتخرب بيته :)))))
و شوفوا احلي مهازل علي سير الشنط في مطار القاهره
في احد المحلات ومن كتر عدد المصريين و الكميات الكبيره اللي عمالين يشتروها البياع الهندي قعد يقول بصوت عالي ( عمار يا مصر ) ههههه
بالنسبه لي ماكانش معايا غير شنتطين هاند باج صغيرين بس وتقريبا ماشتريتش حاجه تذكر ، والحمد لله اللي عافانا من هذا الابتلاء



كل سنة وكلكم بخير ويارب يكتبلنا جميعا العمره والحج مرات ومرات ولا يحرمنا زيارة بيته الحرام ما حيينا آمين

عن عمرة رمضان احدثكم "1"


عن عمرة رمضان احدثكم "2"



2008-10-30

عن عمرة رمضان احدثكم "2"



يمكن اكون اتأخرت اوي في الجزء التاني من الكلام عن رحلة العمره ، بس كل حاجه محفوره جوايا ،
كل حركه ونفس وكل احداث العمره ، فقط مجرد اني اسرح شويه في الايام الجميله دي احس انها زي شريط السينيما اللي بيتعاد وبيتعاد ولا يمكن ابدا يتنسي حتي لو عدت الف سنة ،

نفس المشاعر والاحاسيس اللي كانت هناك بترجع ونفس الجو الروحاني الجميل بحس انه لسه حوليا ،

هي كده المحطات المهمه في حياة الانسان لا يمكن تتنسي مهما طال الزمن نرجع لكلامنا ،

وصلنا ليوم السبت عشرين رمضان

تم التجمع الساعه 9 صباحا للتوجه لميقات اهل المدينه اللي هي ابيار علي ( ذي الحليفة )
ودي منطقه بتبعد عن المدينه في اتجاه مكه حوالي 30 او 45 دقيقه بالاوتوبيس ،

موجود فيها جامع كبير متوفره فيه اماكن كتير جدا ونضيفة جدا للاغتسال والوضوء للناس اللي نوت الاحرام

طبعا كنا اغتسلنا في الفندق والرجال ارتدوا ملابس الاحرام وجهزنا نفسنا علي مجرد وضوء وصلاة ركعتين الاحرام ونية الاحرام

خلعت النقاب،اتوضيت وصليت ركعتين الاحرام ونويت نية الاحرام بعمره

" لبيك اللهم عمرة وان حبسني حابس فمحلي حيث حبستني"

لبيك اللهم لبيك ، لبيك لا شريك لك لبيك ، ان الحمد والنعمة لك والملك ، لا شريك لك "

طول الطريق من الميقات لمكه واحنا مابطلناش تلبيه ، كلمات بسيطه خلت الواحد حاسس انه طاير في السما عاوز الوقت يعدي ونوصل بقي وتحضن عنينا الكعبه ونطوف ونصلي

شويه شويه بنقرب من مكه ودقات قلبنا بتزيد ، مش عارفه ليه حسيت ان الطريق طول علي غير العاده ؟ يمكن من الترقب والانتظار ،


واحنا علي مشارف مكه اذن المغرب فوقفنا في استراحه خارج حدود الحرم فطرنا واتوضينا وصلينا المغرب والعشاء جمع تقديم
بعدها كملنا الرحله الي خير بقاع الارض ودقات الفلب بتعلي والشوق بيزيد ،
ماكنتش حاسه باي حاجه حواليا ولا بلساني اللي شغال تلبيه كان كل همي اني اشوف الحرم وامتع عنيا بيه ،

وفعلا بعدشوية شفت نوره من بعيد وشويه شويه بانت المآذن علي مرمي البصر
مش عارفه اوصفهولكم ازاي ،

كان عباره عن بقعه نور كبيره اوي في وسط مساحه شاسعه من الضلمه ، سبحان الله فعلا هنا مركز الكون ، الكعبة المشرفه


وصلنا الفندق وكانت صدمه انه بعيد عن الحرم ( حوالي ربع ساعه مشي سريع ) بس اتضح بعد كده ان دي كانت حاجه كويسه ( وعسي ان تكرهوا شيئا وهو خير لكم )صدق الله العظيم


يادوب رمينا الشنط ونزلنا جري عشان نتمم مناسك العمره وياسبحان الله المسافه ماخدتش اكتر من 5 دقايق ،
كانت روحنا سبقانا لهناك وكنا بنطوي الارض طي عشان نوصل ،


قبل ما تظهر مآذن الحرم كان صوت الشيخ ماهر المعقلي في تاني عشر ركعات من التراويح بيزلزل كيانا ، خلاني عاوزه اطير لحد هناك اقف ادام الكعبه واصلي معاهم



واخيرا وصلنا دخلنا من باب الملك عبد العزيز واول ما تقع عنيك علي الكعبه مش عارفه ايه اللي بيحصل كل الكلام بيروح وكل الادعيه اللي انت محضرها بتتبخر ومش بتبقي عارف تقول ايه الا بس اللي ربنا عاوزك تقوله واللي بيخليه يجري علي لسانك من غير ما تحس


"اللهم زد هذا البيت تشريفاً وتعظيماً وتكريماً ومهابة وأمناً، وزد من شرفه وكرمه ممن حجه أو اعتمره تشريفاً وتكريماً وتعظيماً وبِراً"
"اللهم هذا حرمك وأمنك، فحرمني على النار، وأمني من عذابك يوم تبعث عبادك، واجعلني من أوليائك وأهل طاعتك."

ويُقال ان اول دعاء ليك عند اول رؤية للكعبه بيبقي مجاب


ماكنتش واخده معايا اي كتاب للادعيه ، باحس ان ده تكلف زايد وانه بيفقد الواحد خشوعه وبيخليه مش مركز في الجو الروحاني اللي حواليه ، واصلا لم يثبت عن الرسول عليه الصلاة والسلام انه كانت له ادعيه مخصوصه لكل شوط من الطواف

استلمنا الحجر الاسود بايدينا

" باسم الله والله أكبر إيمانا بالله وتصديقا بما جاء به رسول الله صلى الله عليه "


وبدانا علي بركة الله السبع اشواط ،وعلي الرغم من الزحام الشديد الا ان ربنا كان ميسرها جدا والحمدلله ،
في كل شوط كنا بنقدر نلمس الكعبه والركن اليماني وحتي الملتزم ، وكان ممكن اننا نوصل للحجر بس لان عليه رجاله كتير ماحبيتش اني ازاحم بينهم لان ده منهي عنه


بعد الطواف بتصلي ركعتين سنة الطواف المفروض خلف مقام ابراهيم او في اي حته لو ماكانش متيسر ده بسبب الزحام

الحمد لله قدرنا نصلي اربع ركعات في حجر اسنماعيل واللي بيعتبر جزء من داخل الكعبه اللي يصلي فيه اكنه صلي في الكعبه نفسها
{ مش بقولكم ربنا كان ميسرها :-D }

خلصنا الطواف وركعتين سنة الطواف رحنا شربنا من مية زمزم المتوفره في كولمانات وحنفيات في كل حته بالحرم ودعينا ربنا انه يجعلها عمره مقبوله ،

بعدها توجهنا للسعي ، واللي بقي اسهل اكتر والزحمه فيه قلت كتير اوي عن الاول بسبب التوسعه اللي خلته اد السابق مرتين ونص ، بس لسه مش مكيف وحر جدا ، كنا في كل شوط بنشرب من زمزم وده كان بييسر علينا كتير اوي

وبكده الحمد لله ادينا مناسك العمره وماكانش فاضل غير التحليل بقص الشعر ، طبعا كانت صلاة التراويح خلصت قلنا نستريح شويه ونمتع عنينا بمنظر الكعبه والنور اللي بيشع منها ( سبحان الله كمية الإضاءه الموجوده تخليك ليل نهار تحس ان صحن الكعبه مشرق بضياء رباني مالوش مثيل )


نوينا نرجع تاني عشان صلاة التهجد ولو حتي نلحق ركعتين والوتر بس بسبب الزحمه الشديده اللي خلت زوجي يقعد حوالي ساعه عشان يحلق ماقدرناش نرجع الا بعد انتهاء التهجد


لما رجعنا عرفت ان النساء ليهم مكان مخصص غيرمكان الرجال وكان ده آخر يوم ارافق فيه زوجي في الذهاب الي الحرم ، كان كل واحد بيروح ويجي لوحده ، ولعلمكوا ده كان احسن للخشوع والتركيز ، مش هاتبقي مشغول بحد ولا بتكلم حد الا ربنا




----------------
كنت ناوية ان الموضوع يكون علي جزئين فقط ، بس كده البوست هايطول اوي فانخليها 3 اجزاء

انتظروني
المره الجايه

هاحكيلكوا عن ليلة
27
وختم القرآن في ليلة 29

وان شاء الله مش هاتأخر



-------------------

عن عمرة رمضان احدثكم "1"

عن عمرة رمضان احدثكم "3"


2008-10-26

أضغاث أحلام


بالامس حلمت حلم غريب للغاية ، حلمت ان ادارة الصيدله ستجعل تكليف الصيادله الجدد في المناطق النائيه جدا مثل الواحات والوادي الجديد وسيوه ومناطق اخري في قلب الصحراء لم يسمع عنها بشر ، ليست بها اية امكانات فقط وحده صحيه

رايتني اقبل هذا التكليف وانا في قمة السعاده
( المفروض اني قمت بألغاء التكليف منذ حوالي عشر سنوات) واقرر ان اذهب الي واحه اسمها غريب ( نسيته بعد ان استيقظت ) عندما استفسرت من الموظف المسئول عنها قال انها ربما تقع بجوار واحة الخارجه في اقصي الجنوب ، ولكن عما قليل اتضح انها بجوار الاسكندرية ( ذُكر العنوان ولاكني لا اذكر الا الاسكندرية )

الغريب اني في الحلم كنت قد فتحت صيدليتي الخاصه ( المفروض اني فتحتها بعد سنتين من تخرجي ) و قررت ان اتركها لمن يديرها حتي اقبل التكليف وانتقل الي هناك انا وزوجي الذي لم يقتنع كليا بالامر خوفا علي الصيدليه ولكني اقنعته ولو حتي مجرد سنة كتجربه


لم نكن غير 5 او 6 صيادله ارادو قبول التكليف في هذه المناطق ، والمفروض ان لكل منا عهدته الخاصه من الادويه ولكنهم قرروا ان يعطوني ايضا عهدة الاجهزه والمعدات الطبيه بالوحده وبالطبع لم اقبل ذلك وحدثت مشاده مع الموظف المختص الذي تراجع اخيرا

في الحلم كنت سعيده ولم يكن يقلقني الا انني عندما اذهب الي هناك سأجد مشاكل في توفير المياه التي اتناولها بشراهه خصوصا في الصيف ( ممكن اشرب 6 او 7 لتر في اليوم ) ، اما الكهرباء فلم اهتم انها ممكن ان لا تتوفر باستمرار بل كنت اتمني ان تنقطع للأبد

كنت سعيده اني سابتعد تماما عن المدينه بتلوثها وضوضائها وهمومها واذهب الي هناك ، الي واحه في قلب الصحراء حيث الصفاء والهدوء والطبيعه الخلابه والناس مازالت علي الفطره

لا اعرف علي وجه الدقه ما الذي دفع بعقلي الباطن لانتاج مثل هذا الحلم ،

اهي رغبتي الدفينه بامتلاك مزرعه بعيده عن العمران في مكان ما لا تصل إليه أية مظاهر للتكنولوجيا ، وفيها اكتفاء ذاتي من كل شئ حتي الكهرباء تنتجها طواحين هواء والمياه تاتي من بئر جوفي عميق ، بها كل انواع الحيوانات والزروع

استيقظ فيها بعد الفجر وانام بعد العشاء ، لا تليفيزيون ولا انترنت ولا اية اخبار مزعجة عن ازمة اقتصاديه عالميه او توريث الحكم او سرقه ونهب وفساد في كل مكان ، لا يعنيني من العالم الا هذه القطعه من الارض التي اعيش عليها انا واسرتي ، لا يهمني الا ان يكون الله سبحانه وتعالي راضٍ عني

ام حلقة الامس من الطبعه الاولي لاحمد المسلماني والتي تحدث فيها عن نية الحكومه في بيع الاف الافدنه في توشكي وسيناء لمستثمرين عرب واجانب ، وتسائل لما لا يتم تمليكها لشباب يستصلحها ويعيش فيها فتُحل ازمة البطاله ونحمي الارض من اية اطماع

لا اعرف ...!؟؟؟

بعد ان استيقظت من نومي كنت في غاية النشوة وسعيده بهذا الحلم واردت له ان يتحقق ......فقلت اشرككم معايا




2008-10-23

العيب في النظام

تقريبا كان فيه عدم توافق بين النظام الجديد للتعليقات ( اللي بيظهر صفحة التعليقات اسفل البوست ) والتمبلت بتاعي عشان كده صفحة التعليقات ماكنتش بتفتح ، ومش عارفه ازاي هو اتظبت علي الخاصيه دي لوحده

وفوجئت بايميلات بتقولي
ليه التعليقات مقفوله

مش انا السبب والله العيب في النظام .....:-D


تم تدارك الموقف الحمد لله ...ههههه



ودلوقتي التعليقات بتفح عادي ، وممكن تشاركوا معانا في ثورة الطعمية


ثورة الطعمية



ارفعوا ايديكم عن اكلاتنا

بقالي 3 ايام كل ما افتح قناة فتافيت ( ايوه القناه المتخصصه في الطبخ ) الاقي الاعلان ده وبيتعاد في اليوم ولا ميت مره في فقرات البرومو اللي بين وفي وسط البرامج

بيجيبوا اكله معينه من الاكلات العربية مثلا الطعميه والتبوله والحمص والبقلاوه ....الخ ، وفي الخلفيه اغنيه ممكن تكون ليها علاقه بالاكله

وبعد كده يجيبوا الجمله دي

" ارفعوا اياديكم عن اكلاتنا "

وبعدين


" الم يكفيهم الاستيلاء علي ارضنا ، هاهم الآن يحاولون الاستيلاء علي حضارتنا واطباقنا "
فادي عبود
رئيس جمعية الصناعيين اللبنانيين

حملة فتافيت لمساندة الصناعيين اللبنانيين


وبس خلاص من غير اي اشاره لاي تفاصيل تانيه


بصراحه يا جماعه انا قلقت جدا ، ياتري ايه اللي حصل ، مين اللي عاوز يسرق اكلاتنا و خصوصا ان ساندويتش الطعميه بقي بجنيه وفيه الطمع ،
يمكن واحد جعان وعاوز ساندويتش ولا حتة بقلاوه ، وبجد شكلهم في الاعلان يجننوا ويجروا الريق ويحرضوا علي السرقه :))

المهم قلت ادور في موقع فتافيت يمكن الاقي حاجه مفيده مالاقيتش الا الصوره اللي فوق دي ، اروح يمين شمال مافيش حاجه

اسكت ....؟؟؟؟؟؟ ، لا طبعا رحت موقع جمعية الصناعيين اللبنانيين وبرضو مافيش اي خبر
قلت آخد لفه علي النت يمكن اعرف ايه الحكاية ، لقيت ايه ...خير اللهم اجعله خير

بيقولوا ان اليهود بعد ما سرقوا كل حاجه عندنا ونسبوها لنفسهم من اول الارض والمقدسات والهرم ولحد الخمسه وخميسه ..واحنا ساكتين

وبعد ماقالوا ان المسجد الاقصي مبني فوق معبد سليمان ولازما وحتما ينهد عشان يبنوا المعبد وشغاليين حفر تحت المسجد ....واحنا ساكتين

وبعد ما نسبوا كل حضارة الفراعنه ليهم ..واحنا ساكتين

وبعد ما سمموالنا الالكل والشرب وملوا اللبد بالمبيدات المسرطنه ( منه لله يوسف والي ) ....واحنا ساكتين

وبعد ما دخلوا ودنسوا الاقصي الشريف من كام يوم ، ومنعوا المصليين من الدخول ..... واحنا ساكتين

وبعد كل القتل والترويع اللي بيعملوه في الفلسطينيين كل يوم ...واحنا ساكتين

وبعد ما كل شويه يضربوا جنوب لبنان ، ويهددوا سوريا .....واحنا ساكتين

بعد ما سرقوا الارض والعرض ....واحنا ساكتين


ساكتين و مشغولين بمشاكلنا الداخليه والخلافات اللي بينا وبين بعضنا واللي كل مدي بتزيد( فتح وحماس ، حزب وطني واخوان ، سنة وشيعه يمين ويسار......الخ )
مشغولين بقضايا تافهه ومالهاش لازمة ( الحضري وعبد الواحد ،سوزان وهشام ، طلعت وجمال السادات ...الخ )


وبعد اما سرقوا كل حاجه و مالاقوش حاجه تانيه يسرقوها قرروا انهم يسرقوا الاكلات العربيه وينسبوها لنفسهم ويبقي ليهم فيها حق الملكية الفكريه وحقوق الطبع محفوظه وكده يعني

يعني عشان اعمل ساندويش طعميه لازم آخد منهم اذن والا ابقي باتعدي علي حقوقم الفكريه ، بالظبط بالظبط زي ما عملوا مع الاقصر ...... فاركين



المشكله هنا في ايه ، ان احنا ساكتين عن كل الحاجات دي ، واما جم يقربوا من الاكل اتكلمنا ، وقامت ثورة الطعميه المباركه بقياده قناة فتافيت الباسلة

صحيح عض قلبي ولا تعض رغيفي :)))



بالنسبه لي شايفه ان للحمله دي بعض الحق فقط اذا كانت بتعتبر ان اكلاتنا زي ارضنا و مافيش فرق بين واحد سرق شبر من الارض او ساندويتش طعمية
وان تراثنا وفلكلورولنا ولبسنا وارضنا جزء واحد لا يتجزء ومش من حق اي حد انه يسرق حاجه فيهم وينسبها لنفسه



اما غير كده فلا






2008-10-19

آه يا ليلي



عندما قررت ان اشارك في يوم ليلي الثالث احترت عن ماذا اكتب ، وعن اي مشكله تواجهها ليلي اتحدث ، وهل اختار شئ محدد اتحدث عنه وافرد له موضوع كامل ام اتحدث عن حياتنا ككل ...اقصد حياة ليلي ككل وما يواجهها من مشكلات في البيت والجامعه والعمل وفي كل مكان
وما تعانيه احيانا من اضطهاد فقط لانها انثي ،و نظرة المجتمع الدونيه لاسباب لا يد لها فيها

فهي مهما كانت مجرد انثي ولا ينبغي لها ان تخرج عن الإطار الذي وضعه لها المجتمع نساؤه قبل رجاله ،واذا سولت لاحداهن نفسها ان تخرج عن هذا الاطار فالويل كل الويل

هل اتحدث عن مشاكل الزواج والطلاق والعنوسه وونظرة المجتمع ليلي في الثلاث حالات ،

ام عن مشاكل العمل وماتعانيه من تسلط مدرائها والكلمة الدائرة علي الالسنة " مش انتو عاوزين مساواه خلاص ماتشتكوش "

ام عن عدم التقدير - بل احيانا التحقير - الذي تلاقيه اي ليلي نجحت وتميزت في مجالات مكتوب عليها للرجال فقط ،

ام عن فرض انواع معينه من التعليم عليها فقط لكونها انثي وحتي اذا كان باختيارها فلقد ترسخ في ذهنها من قديم الاذل انه " انتِ بنت والبنت مسيرها في الآخر لبيت جوزها " وبالتالي تُقرر الا تبذل مجهود اكبر في اي شئ سوي الاهتمام بجمال وجسد وشعر هذه الانثي اللي مسيرها لبيت زوجها

ام اعود الي الوراء قليلا وابدأ الحديث عن مشكلة ليلي منذ امها الاولي حواء ، والتي وصموها بالكذب والافتراء انها السبب في خروج آدم من الجنه بالرغم من أن آيات القرآن صريحه " وعصى آدم ربه فغوى " اي انه هو من عصي ، وظلت المسكينه تحمل خطيئته ومن بعدها بناتها وبنات بناتها الي يومنا هذا

لم استقر علي شئ من كل ذلك ، ولكني وجدت فيها ضالتي ، هي بالفعل نموذج مثالي ان احكي عنه وعما تعانيه ، انها احدي قريبات زوجي
هي الابنه الكبري لاب مهندس ميسور الحال من اصول ريفيه ، وام ايضا من اسرة ميسورة الحال تحمل شهادة متوسطه وتعمل بالحكومه

منذ ان كانت طفله لم تهتم الام سوي بجمال بنتها وشعرها الناعم الطويل ، والرجيم القاسي حتي تحصل علي جسد مانيكان ، واحدث خطوط الموضه والماكياج ...الخ

فشبت علي اعتقاد راسخ في ذهنها منذ الصغر ،بانه ينقصها الكثير وانها بلا كينونه الا بوجود رجل تحمل اسمه فالرجل دائما هو الاصل والمرأه مجرد فرع لايمكنه ان يعيش بلا اصل ، ولا اهمية لها بدون رجل تحمل اسمه وذريته ، فلم تهتم بالدراسه واكتفت بشهادة دبلوم فني ، وعاشت تحلم بهذا بفارس مغوار تحمل اسمه و يكتمل به كيانها ، لم تهتم بكونه طويل او قصير ، ابيض ام اسود ، متعلم ام جاهل ، المهم انه راجل والسلام

و كالعادة كانت والدتها تأخذها في كافة المناسبات بعد ان تكون قد البستها الجديد وزينتها كما نقول علي سنجة عشره ، لعل وعسي تراها احداهن وتختارها عروسا لابنها ، ولانها في الاصل جميله فلم يطل الانتظار كثيرا ، وسريعا ما تقدمت لخطبتها اكثر من سيده تتمناها زوجا لابنها ، ولكن والدها إختاره هو لها ، ولما لا وبه كل مواصفات العريس اللقطه

له عمل ثابت وتجاره ايضا كما انه في الاصل ميسور الحال ، ورث شقه في منزل والده ويستطيع تجهيزها في اقل من شهر وفوق كل هذا فهو جارهم ...اذن علي بركة الله ، وبالطبع لم تبدي هي ولا والدتها اي اعتراض وكانت الكلمة الشهيره ...اللي تشوفه يابابا

ولم تنقضي ايام العسل الا وتكتشفت انها تزوجت رجل عديم الشخصيه متذبذب لايستطيع اتخاذ قرار حتي في ابسط امور حياته الا بعد الرجوع الي السيده والدته ، ويوما بعد يوم تيقنت انها لم تتزوجه هو بل تزوجت من والدته ، وان جميع خيوط حياتها هي وزوجها في يد حماتها التي لم تقصر في لعب دور الحماه كما صورته السنيما العربيه
فلا تسطيع ان تشتري شئ الا بعد اذن حماتها ولا تسطيع ان تخرج الا بأذنها ولا تزور والدتها الا بأذنها حتي الاكل فلا تستطيع ان تطبخ اي صنف الا بعد موافقتها
تستيقظ من نومها و قبل ان تقوم بانهاء الاعمال المنزلية الخاصه بها تهبط الي شقة حماتها في الدور السفلي لتبدأ عمليات التنظيف والتلميع والكنس والمسح والغسيل والطبيخ ، تلافيا لغضب الحاكم والناهي بامر البيت ، والا ستغضب الحماه وبالتالي زوجها وتصبح حياتها جحيم

اشتكت لامها نصحتها ان تتحمل حتي تسير الحياه ...دي كلها حاجات بسيطه وياحبيبتي اعتبريها زي مامتك

يوما بعد يوم زادت المشاكل خاصة ان زوجها لم يكن يفي بكافة احتياجات المنزل بالرغم من انه ميسور الحال ، وعندما اشتكت لابيها قرر ان يعطيها مصروفا شهري معتبرا انها مازالت في بيته ولم تتزوج

بعد عدة شهور ظهرت عليها اعراض الحمل ومع كل التعب والعمل في بيتين -ولا شغاله فليبينيه - حدثت مضاعفات خطيره كانت نهايتها اجهاض الجنين الذي كان ذكر ، وكأنها كانت نهاية العالم ، اصبحت حياتها لا تطاق بسبب معاملة الحماة التي ازدادت سوءا مع السلبيه المتناهيه من جانب الزوج

مرت الايام والشهور ولا توجد اية بشائر لحمل جديد ، طافت علي جميع اطباء النساء والولاده بلا جدوي ، الجميع يقول انت سليمه ولكنها الحاله النفسيه

واخيرا وبعد حوالي عام ونصف ظهرت بوادر الحمل الجديد ، و الكل ينتظر ان تبشرهم بنوع المولود ، ولما تيقنوا انها انثي كانت الطامه الكبري ، كثرت المضايقات والمشاكل ، ولم تسلم من لسان حماتها ولا زوجها في كل مناسبه يتذكرون انها وبعد كل هذا الوقت لم تحمل في رحمها الا مجرد انثي و يسمعونها من المنقي خيار


لم تستطع ان تتحمل وتركت لهما الجمل بما حمل وعادت الي بيت ابيها لا حول لها ولا قوة ، و تصورت ان بالطلاق ستنتهي جميع آلامها
لم تكن تعلم ان بحملها لقب مطلقة ستحمل علي جبينها وصمة عار وستقاطعها كل السيدات وتغلق في وجهها كل الابواب وتشير اليها كل اصابع الاتهام ولا ترحمها السنة الناس وسيُحملها الجميع مسئولية هذا الطلاق

وجدت نفسها في الرابعة والعشرين من العمر تحمل لقب مطلقة وعلي يدها رضيعه لا حول لها ولا قوة ، انعزلت عن العالم ، انزوت في غرفتها القديمه هي ورضيعتها التي لم يحاول طليقها ان يراها ولا يختار لها اسما وكأنها ليست ابنته

كانت تذبل يوما بعد يوم ، ولم تخرج مما هي فيه الا عندما طرق بابها رجل يريد ان يتزوجها ، لم تفكر في شئ ، كان مدرسها ايام المدرسه لم تلتفت الي انه يكبرها ب 12 سنة ، ولا انه لا يمتلك ما يؤهله ان يتحمل مسؤلية بيت واسره ،لم تشعر هي واهلها الا انه المنقذ الذي سيخرجها مما هي فيه ، فوافقت في الحال ، وتم الزواج باسرع وقت ،

لم يتكلف مليما ، منحه ابوها شقه في منزله كما ان الاثاث موجود من الزيجه الاولي ، حتي الطعام كان يتكفل به الاب ، ولم يبخل عليه باي شئ خاصة وهو يراه يعامل ابنته افضل معامله ويتعامل مع ابنتها معاملة الاب واستطاع ان يخرجها من حالة الحزن والكآبة التي كانت عليها
لم يكن عريس الغفله ينفق مليم واحد في المنزل ولا علي زوجته ،
ولكن تأتي دائما الرياح بما لا تشتهي السفن بعد فتره من الزواج ظهرت النوايا الحقيقة لهذا الزوج المحب الولهان ، وانقضي زمن الكلام المعسول وظهرعلي حقيقته ، اثقل كاهلها بطلباته التي لا تنتهي وتتزايد يوما بعد يوم ،

هو يطلب وامها تنفذ دون علم والدها فهي لا تريد ان تحمل ابنتها لقب مطلقة للمره الثانيه في اقل من سنتين خصوصا انها قد رزقت بطفلة اخري من هذا الزواج ، بعد فتره علم الوالد بما يحدث من وراء ظهره وعندها قرر ان يقف وقفه حازمه معه ، طالبا منه ان يتحمل مسئولية بيته كامله ، ولا يرهقهم بعد ذلك باية طلبات
عندها خلع قناع الحمل الوديع ، وقرر انه طالما سيتحمل المسئولية فليكن ذلك في منزله هو وليس منزل والد زوجته ، وطلب منها ان تلحق به في منزل والده في بلده مجاوره ، لتعيش معه هو واخوه وامة وابيه في شقه واحده ، او في غرفه حقيره فوق السطوح
اي يخيرها بين ان تكون فلبينيه مره ثانيه او تعيش في غرفه عشة الفراخ انضف منها

طبعا لم ترضي بذلك ، وحاولت ان تطلب الطلاق ولكن والدها كان لها بالمرصاد ، رفض بشده واخبرها ان مبدأ الطلاق مرفوض وانه لا يتحمل ابدا كلام الناس اذا حملت لقب مطلقة للمره الثانيه ، وانها يجب ان تتحمل هذا الوضع حتي يهدي الله زوجها ويرجع الي صوابه ...هو انت يعني قاعده في الشارع ؟؟!!

هذه المره لم تنعزل عن العالم ولم تنزوي في غرفتها بل لجأت الي الله واصبحت ترتاد الدروس الدينيه في المسجد القريب ،وفي بعض المساجد الكبري ، تعلمت التجويد وقرات في بعض كتب الفقه ، ثم ارتدت النقاب وعملت بحضانه اسلاميه بجوار المنزل ، وشيئا فشيئا تحولت الي فقيهه و محفظة قرآن ولا مانع من بعض الدروس الدينيه و الفتاوي احيانا!!!!!!!!!!!!!


ومازالت في منزل والدها تنتظر ان يهتدي زوجها او يقضي الله امرا كان مفعولا


هذه هي حكايتها كامله ،
حكاية حقيقية لم ازد عليها ولا انقص ، انها نموذج حي ليلي التي تعاني من القهر والقمع والافكار البالية والتربية الخاطئة ، ليلي التي يدور محور يومنا عنها ونحاول ان نبحث لها عن مخرج من هذا الباب المفتوح علي دنيا واسعه بها الكثير من الحواجز والضغوط والقيم البالية


برجاء المشاركة فى إستطلاع الرأى الخاص بالإناث أو الذكور






--------------------------------------


ملحوظة / عاوزه اوضح اني طبعا ضد اللي هي اتحولتله في الآخر، مش ضد انها تلبس نقاب ولا ترتاد الدروس الدينية دي حريتها الشخصيه ، بس ضد انها تتحول لفقيهه وعالمه لمجرد انها قرت كام كتاب في الفقه والدين ، وعاوزه اقول كمان ان الظروف السيئه اللي الناس بتعيشها سواء ستات او رجاله وبتخليهم يتوجهه لربنا ويقربو منه خلت ناس كتير اوي يعملوا كده ويمتهنوا الفتوي والدروس الدينيه وهما ماعندهمش العلم الكافي اللي يؤهلهم لكده ودي هي المصيبه اللي حاصله اليومين دول واللي بتكون سبب كتير من البلاوي اللي بنشوفها ، عموما ده مش موضوعنا خالص بس يمكن اتكلم عليه في بوست منفرد







2008-10-16

عن عمرة رمضان احدثكم "1"




كانت من اجمل الايام اللي عشتها علي الاطلاق ، متعه مابعدها متعه ولا يمكن ان يضاهيها شئ
مع كل الحر والزحام والمسافات الطويله ، بس كان نفسي تطول بعدد سنين العمر وما تنتهيش ابدا ، كنت حاسه اني جوا حلم جميل مش عاوزه اصحي منه ابدا

حصلت شوية حاجات اخرت سفرنا لقرب نص رمضان بعد ماكان المفروض اننا نسافر قبل كده بشويه ،بس الحمد لله حجز التذاكر ومواعيدها كان مظبوط بالثانيه ومحصلناش اللي بنسمع عنه من ركنه في المطار باليوم والاتنين ودي الحاجه اللي كنت خايفه منها جدا بعد اللي سمعت انه حصل السنة اللي فاتت

وصلنا المدينه قرب اذان المغرب احساس غريب اول ما تخرج من باب المطار وتحضن عينيك مدينة رسول الله صلي الله عليه وسلم ، تحس ان روحه عليه الصلاة والسلام موجود حوليك في كل حته ، في وشوش الناس اللي علي طول بتقابلك بالابتسامه ، في الهوا ولون السما، في صوت الاذان، في شكل المسجد النبوي الرائع بساحاته الواسعه ومآذنه الجميله

بتحس شعور بالهدوء والصفاء والسكينه ، شعور بالسلام والامان .....من الآخر كده شعور مش قادره اوصفه

اول ماوصلنا الفندق وشفنا شكل الحرم اللي كان علي بعد خطوات ماقدرناش نصبر حطينا الشنط ونزلنا جري عشان نلحق نصلي المغرب قبل اذان العشاء


اول ما تدخل المسجد النبوي بتشعر برهبه فظيعه وقشعريره ماليه جسمك كله ، عنيك تدمع وضربات قلبك تزيد لما تحس انه عليه الصلاة والسلام شايفك وسامعك وحاسس بكل حاجه بتعملها

طبعا المسجد كان زحمه جدا جدا ومافيهوش موضع لقدم ، وتتعجب من كمية الاجناس المختلفه الموجوده ، ايرانيين وجنوب شرق آسياويين وباكستانيين وهنود واتراك وحتي انجليز دا غير الجنسيات العربيه اللي كان اكترهم المصريين اللي يحسسوك انك دخلت مسجد في القاهره مش في المدينه :)))))))
وسبحان الله اللي جمع بين كل الناس دول علي كلمة لا اله الا الله محمد رسول الله

الحمد لله قدرت اني الاقي مكان صغنن كده جمب شوية سيدات فلسطينيات علي ما اعتقد صليت فيه المغرب وقعدت استني العشاء والتراويح ، وياسبحان الله فعلا ربنا بيوسع الارض للمصلين ، المكان ده بصلي في اده تلات اربع مرات في البيت :))))


يلفت نظرك اول ماتدخل الحرم النبوي جمال العماره الداخليه وزخرفة الاعمده الكتيره ، والقباب المتحركه اللي بتقفل وتفتح في اوقات معينه والنجف والثريات الرائعه


وكمان منطقة المظلات الموجوده في بعض اجزاء من الساحه ( امام القبه الخضراء ) وداخل الحرم نفسه فيه منطقة مكشوفه بتفتح بالنهار وتغلق بالليل ( بتشبه الشمسيات العادية بس بالكهرباء وفيه مشروع دلوقتي لتعميمها علي كل ساحة الحرم النبوي وبناء مثلها في صحن الكعبة كمان )
دا غير الارضيات الرخام الناصع البياض سواء داخل الحرم او في ساحاته ، كنت بزداد فخر لما كنت ببص لكل ده وانا عارفه ان اللي اشرف علي التوسعه والبناء الجميل ده شيخ المعماريين واستاذ الاجيال الدكتور مهندس محمد كمال اسماعيل المصري الجنسيه ، ويمكن تنبهروا لما تعرفوا ان مساحة الحرم النبوي الحاليه مع ساحاته بتعادل مساحة المدينة المنوره علي ايام الرسول صلي الله عليه وسلم





المظلات الكهربائية

بعد صلاة التراويح اول يوم وصولنا وبالرغم من كم الارهاق اللي كنا عليه الا اننا ماجلناش نوم من كتر الفرحه مجرد ساعتين تلاته وبعدهم نزلنا عشان صلاة الفجر وما قدرتش اصبر علي زياره حبيبي رسول الله صلي الله عليه وسلم ، سألت علي مواعيد الزياره للنساء فعرفت انها بتبقي من الساعه 7.5 صباحا حتي الساعه 10 صباحا ، بعد كده عرفت انها كمان من الساعه 12 مساءا بعد صلاة التراويح وده كان معاد لسه جديد وبدأوا يطبقوه السنه دي بعد ما الملك عبدالله قرر ان الحرم النبوي زي الكعبه مايتقفلش اربعه وعشرين ساعه


القبة الخضاء واسفلها قبر الرسول صلي الله عليه وسلم

صليت الفجر وفضلت في المسجد لحد بعد الشروق بتلت ساعه عشان اصلي الضحي وبعدها انطلقت لزيارة اشرف خلق لله ، مكان الدخول كان بعيد بس كله يهون

الدخول بيكون من باب عثمان ابن عفان ( باب رقم 25 ) يتم اولا تجميع النساء خلف بوابات خشبيه بتقسم الحرم وبتفصل النساء عن مكان الرجال بعد فتره بيفتحوا البوابات دي عشان نوصل لساتر من القماش يفصلنا عن الروضه امامه يتم تقسيم النساء علي حسب الجنسيه ، كل بلد او منطقه مع بعض
بعدها المفروض انهم يفتحوا الستاير دي عشان ندخل عند الوضه الشريفه بس برضو بيبقي فيه فاصل من قماش ابيض بينا وبين قبرخير المرسلين صلي الله عليه وسلم

واللي اعرفه انه من حوالي 3 او اربع سنين الستاره دي ماكانتش بتبقي موجوده

زعلت جدا لما فضلوا مقعدينا اكتر من ساعه ونص علي ما فتحولنا ندخل الروضه بسبب الزحام الرهيب وتدافع الستات وصوتهم العالي وعدم التزامهم بالتعليمات ، بس اللي خفف من زعلي شويه ان اول مافتحوا كان من ناحية المصريين لانهم كانوا الاكتر التزام
المهم اني اشتكيتهم لرسول الله واشهدته عليهم وعلي الذل اللي بيذلوهولنا لحد ما يخلونا نوصله ونسلم عليه ونصلي بجواره:))

اخيرا وبعد عناء قدرت اني اوصل لحد السجاجيد الخضراء اللي هي علامة اني بكده موجوده داخل الروضه وكانت المشكله الكبري ان الاقي ولو خمسه مللي عشان اصلي ركعتين في الجنه (( مابين بيتي ومنبري روضه من رياض الجنه))

وماتعرفوش ازاي سبحان الله زي ماتكون الارض انشقت عن مساحه صغيره جدا صليت فيها وكنت باسجد بين اقدام الستات وعلي اجسامهم بس الحمد لله صليت ،

احساسك وانت في الروضه احساس فوق الوصف مش بتبقي حاسس بنفسك ولا بالدموع وهي نازله من عنيك ومش عارف توقفها ، ومع كل الزحمه اللي حواليك بتبقي حاسس انك لوحدك واقف بين يدي رسول الله صلي الله عليه وسلم وبتناجيه وتسلم عليه وهو بيرد عليك السلام (ما من أحد يسلم على إلا رد الله على روحى أرد عليه السلام) واقف في المكان اللي شهد نزول الوحي واللي فيه كان رسولنا الحبيب بيضع لبنات هذه الامه
هنا تم التخطيط الاعظم الغزوات واكبر الفتوحات ،هنا كان الصحابه بيلتفوا حول رسول الله صلي الله عليه وسلم لما كان بيحطلهم اسس وتعاليم دينهم
هنا حصلت معظم الاحداث اللي بنقراها في آيات القرآن ، هنا ثاني اعظم مكان علي وجه الارض بعد الكعبة المكرمة
وهنا تم بناء خير امة اخرجت للناس

بس اللي دايقني فعلا هما الستات اللي ماكانوش مراعيين حرمة المكان ولا عظمة صاحب المكان والتدافع اللي كان حاصل والصوت العالي ، وكانهم مش حاسين انهم فعلا في حته من الجنه ولا بين يدي رسول الله صلي الله عليه وسلم
مش عارفين ان (إن حرمته صلي الله عليه وسلم ميتا كحرمته حيا) ربنا يهدينا ويهدي الجميع

سبحان الله في طريق العوده من الروضه الي الفندق حسيت ان المسافه طويله وان المشوار متعب فانا برجع من باب 25 لباب 7 يعني تقريبا كيلو او اكتر مشي ، مع اني لسه رايحه نفس المسافه و ماحسيتش باي تعب وكأن قبر الرسول صلي الله عليه وسلم زي مغناطيس بيشدك ليه وبيسهل عليك خطواتك وبيخليك مش حاسس ببعد المسافه

و دا كان نفس الاحساس اللي كنت باحس بيه في طريق الذهاب والعوده من الكعبة








عدة لقطات من داخل الروضة الشريفه


تاني يوم نظمولنا رحله لمزارات المدينة الساعه 7 صباحا ، مسجد قباء ومسجد ذو القبلتين وجبل احد ومطبعة المصحف الشريف
اما البقيع فاده كان علي بعد امتار قليلة من الفندق فقالوا اللي عاوز يزوره يروح لوحده

ده مسجد ذو القبلتين واللي فيه تم تحويل القبله من بيت المقدس للكعبه ، والمسجده ده هو الوحيد اللي اتصلت فيه صلاه واحده علي القبلتين ، لاحظوا في الصوره القبه والمدنه دول هما القبلتين


مسجد ذو القبلتين


القبلة الحالية للمسجد اتجاه الكعبة المشرفة بمكة المكرمة

القبله القديمه في اتجاه بيت المقدس وتمت ازالتها ووضعوا مكانها رمز فقط


ومن اشهر المزارات هو جبل احد وجمبه جبل الرماه ومقبرة شهداء احد وعليه نتذكر موقعة احد العظيمه ومقولته الشهيره صلي الله عليه وسلم " احد جبل يحبنا ونحبه "

وكمان " أثبت أحد إنما عليك نبي وصديقٌ وشهيدان " يقصد سيدنا ابو بكر وسيدنا عثمان وسيدنا عمر رضي الله عنهم


مشرف الرحله قال انه تم تصوير قمم جبل احد بالاقمار الصناعيه ووجد انها متشابكه وتكتب كلمة محمد رسول الله بصراحه كنت اول مره اسمع كده ومش متأكده من صحة الكلام ده

جبل احد

مقابر شهداء احد



و رحنا مسجد قباء وده كان اول مسجد بني في الاسلام وصلاة ركعتين فيه بتعدل عمره

قال صلى الله عليه وسلم " صلاة في مسجد قباء تعدل عمرة"

وبصراحه هي دي الحاجه الوحيده اللي خلتني اروح المزارات مع المجموعه خصوصا ان ماكنتش نمت تقريبا بقالي يومين


مسجد قباء































رحنا كمان مطبعة المصحف الشريف بس اتغظت جدا ومشرف الرحله بيقول ان الدخول للرجال فقط والنساء يمتنعون ؟؟؟!!!!!ومش قادره احدد سبب لده لحد دلوقتي ، اعتقد ان لو كان بأديهم كانوا منعوا الستات من دخول كل الاماكن حتي الكعبه والحرم النبوي







وفي المطبعه دي بيدوا لكل زايرهديه مصحف المدينه من الحجم والقراءة اللي يختارها ومش اكتر من واحد


قعدنا في المدينة حوالي اسبوع وصلينا صلاة جمعه واحده يوم 19 رمضان، صليتها في الساحه اللي اعتقد ان درجة حرارتها كانت تتعدي الخمسين مع انهم كانوا بيقولوا اربعين ،فضلت الآية الكريمه " قل نار جهنم اشد حرا لو كانوا يفقهون " تتردد جوايا و افتكرت يوم القيامه والحر الشديد اللي فيه والعرق اللي ممكن يوصل لحد الاعناق ،واقعدت ادعي يارب اظلنا بظلك يوم لا ظل الا ظلك واللهم اوردنا علي حوض نبيك محمد صلي الله عليه وسلم و اسقنا من يد الشريفه شربة ماء لا نظمأ بعدها ابدا


تاني يوم ( السبت عشرين رمضان ) توجهنا لابيار علي عشان نحرم ونصلي ركعتين الاحرام ونتوجه لمكه لاداء مناسك العمره

ودي هايبقي ليها موضوع منفصل ان شاء الله


-----------------------------

الصور كلها من تصوير زوجي ماعادا الصوره الخارجيه لمسجد قباء والصوره الخارجيه للمسجد النبوي


---------------

عن عمرة رمضان احدثكم "2"


عن عمرة رمضان احدثكم "3"


القرآن الكريم