TvQuran

٢٠٠٧-٠٤-٢٩

الامير هاري


الامير هاري هو الابن الاصغر للاميره ديانا والامير تشارلز ولي عهد انجلترا ويعتبر الثالث في ترتيب ولاية العهد
ايه بقي حكاية الامير هاري ده ......؟؟؟؟؟
هي حكايه مش ممكن ويستحيل انها تحصل عندنا الا في الاحلام والخيالات وبس

الامير هاري عنده 22 سنة و تخرج هذا العام من اكاديمية ساندهيرست العسكرية، وسيصبح هاري اللي هايحمل رتبة الملازم الثاني قائدا لفريق من 11 مجندا واربع دبابات خفيفة اللي سيعمل ضمن وحدة الاستطلاع المدرع و من المتوقع انه يخدم الشهر القادم في العراق لمدة 6 شهورمع كتيبة " البلوز والرويالز "

الامير هاري بقي ما راحش لباباه ولي العهد ولا لتيته ملكة انجلترا وقالهم الحقوووووووووني وقعد يعيط ، ويخبط رجليه في الارض علشان مش عاوز يروح العراق
اللي حصل انه قال«اذا لم يسمح لي بالانضمام الى وحدتي في اية منطقة قتالية، فساتخلى عن البزة العسكرية»
اي والله قال كده هددهم بالاستقاله من الجيش اذا لم ينضم الي وحدته في اي حته سواء العراق بقي او افغانستان ولا حتي بلاد الواق الواق



عمنا توني بلير لما سمع كده قالك هو كمان ايه : "
نه سيكون من دواعي سروري لو أراد ابني الخدمة في العراق "

حبايبنا في العراق بقي بيستعدوا استعداد مختلف تماما لاستقبال الامير كما يليق بيه ، فقامت الميليشيات العراقية علي مختلف انتمائتها- سواء شيعه او سنة - بتوزيع
صور الأمير هاري علي المجموعات المسلّحة التي تتحضر لرصد كل حركاته اول ما يوصل ، ونشروا مخبرين داخل الثكنات العسكرية البريطانية للتبليغ عن تحركاته علشان يقدروا انهم يخطفوه ويضغطوا بيه علي الحكومه البريطانية لسحب قواتها من العراق

صحيفة الصنداي تايمز قالت ان هاري ها يبقي محظوظ لو ذهب للعراق وعاد من هناك بعد ان يكون فقد اذنيه فقط

ولسه الجدل قائم في انجلترا حول ذهابه الي العراق من عدمه ، ولكن الي الآن فهاري ذاهب الي العراق


مش قادره اتخيل الموقف ده حاصل عندنا وواحد كده من ولاد كُبارات البلد - مش هانقول ثالث وريث للعرش - داخل الجيش ...وايه كمان رايح يخدم في العراق علي الخط الامامي للجبهه وضرب النار والقتلي يوميا بالآلاف والتفجيرات التي تأتي من حيث لا يعلم احد ...........يا نهار ابييييييييييييييض ، اكيد ده عمره ما ها يحصل الا في الاحلام




٢٠٠٧-٠٤-٢٧

رجعت ايام الصيفية


النهارده بداية التوقيت الصيفي

كل سنة وانتوا طيبين

في ناس كتير جدا مش بيحبوه وبيقولوا انه بيقلل ساعات نومهم و الدكاتره النفسيين مش مع التغيرات المستمره في التوقيت وبيقولوا انها بتخلي الانسان مش قادر انه يظبّط ساعته البيولوجيه وده ممكن يخلي بعض الناس في حالة اضطراب مزاجيه وعصبيه ،بيغضبوا بسرعه وما بقدروش يسيطروا علي انفعالاتهم

بالرغم من كل ده انا باعشق التوقيت الصيفي ، ومع ان لسه بدري اوي علي بداية الصيف رسمي بس بدايته عندي مرتبطه بتغيير الساعه
النهار بيطول والليل صحيح المفروض انه بيقصر بس السهر بيزيد علشان كده بيجيلي احساس ان حتي الليل اطول من الشتا

تغيير الساعه مرتيط عندي باغاني ام كلثوم ، كنت دايما اذاكر في اوده بتطل علي الشارع وقدامنا كان في قهوة عم "ابو دلال" - هو اسمه كده - اللي كان مع بدايات شهر خمسه وتغير الساعه يبدأ يشغل ام كلثوم كل يوم بعد العصر من حوالي الساعه 6 من اذاعة ام كلثوم ( ده كان اسمها الدارج عندنا)
كنت اقعد اذاكر خاصة في الثانويه علي صوت الست ، وشمس المغربيه داخله من الشباك ونورها معكوس علي الكتب ، بصراحه كان جو اكثر من رائع ويفتح النفس للمذاكره

كمان تغيير الساعه مرتبط عندي بالذهاب كل يوم قبل المغرب لبيت جدتي وقضاء وقت جميل معاها و مع خالاتي
و القعاد في البلكونه وقزقزة لب البطيخ
و مكتبة الثقافة اللي بتطل علي النيل و كنت باروحها كل يوم بعد العصر



وطبعا راس البر اللي كانت من الحاجات المقدسه عندنا كل سنه

ذكريات جميله اوي لو قعدت اعد فيها مش هاقدر اخلصها
التوقيت الصيفي بيمثلي الانطلاق والحريه اللي بيبقوا في الصيف

انا فعلا بحب التوقيت الصيفي وياريت تكون السنة كلها صيف وتوقيت صيفي




٢٠٠٧-٠٤-٢٢

من اجل مدونات نظيفة ..3


اكرر شكري العميق لكم جميعا علي تجاوبكم الجميله مع فكرة

من اجل مدونات نظيفة

وبناء علي اقتراحاتكم ، عن اللوجو والكلمة اللي المفروض اننا نضعها ككلمة افتتاحية مميزة للمدونات النظيفه في محركات البحث

فقد اجتمعنا علي ان تحتوي الجمله علي كلمة نظيفة او نظيف وعلي ان لا تتكون الجمله من عدد كبير من الكلمات حتي لا تتوه وسط محركات البحث
مثلا
" مدونة نظيفة "
او
" انا ادون بنظافة "

او اي شئ من هذا القبيل



اما اللوجوهات فيوجد اكثر من واحد يمكنكم الاختيار من بينها :














----------------------------------------


من تصميم الفنان احمد عبد العزيز




نفس التصميم ولكن شفاف
The image “http://s162.photobucket.com/albums/t257/details_adv/th_stop3.png” cannot be displayed, because it contains errors.





---------------------------------------------

تحديث:


الاستاذ محمد عبد الغفار طلب حجم اصغر من اللوجو الاول والرابع








-----------------------------------

تحديث :

بناء علي آراءكم تم ازالة البانر اللي صممه د/ خالد من ضمن الشعارات الخاصه بحملة من اجل مدونات نظيفة

------------------------------------


تحديث 2

قامت الاخت طعمة بتصميم الشعار التالي





شكرا جزيلا لاختنا طعمه






٢٠٠٧-٠٤-٢١

من اجل مدونات نظيفة ....2


متشكره ليكم اوي اوي اوي ، ومش قادره اوصفلكم اد ايه سعادتي بالاستجابه السريعه دي لاقتراحي ، وان شاء الله اللي احنا بنعمله ده يكون نواه لحمله كبيره اوي واسعه بين المدونين ، ويكون بدايه لتجمع كبير اوي من كل المدونين النضاف اللي ما يرضيهمش كل الاسفاف والبذائات اللي بقت موجوده فكل حته ، وان شاء الله نجني ثماره في اقرب وقت

و بناء علي اقتراح من عصفور المدينة اننا نحط كمان كلمة او جمله افتتاحيه لكل المدونات النظيفه واللي يحب اصحابها انهم يدونوا بنظافه ، بحيث انها تظهر خلال البحث علي اي محرك مثلا جوجل

لذلك ياريت ياجماعه نبدأ نقترح الجمله او الكلمه دي ، وان شاء الله اي حاجه هانستقر عليها نحطها في واجهة المدونه

كل اللي يحب يشاركنا ياريت يحط اقتراحه للجمله دي في كومنت

وشكرا ليكم علي اهتمامكم الجميل اوي ده


٢٠٠٧-٠٤-٢٠

من اجل مدونات نظيفة


اكيد العنوان يبدو للوهله الاولي غريب ، ولكن لو حاولنا ان نقرأه مره اخري فمن الممكن ان يصل الينا معناه
هل توجد مدونات نظيفة ومدونات غير ذلك ، ايوه يا جماعه في النوعين دول من المدونات ، وللاسف المدونات غير النظيفة بقت كتيييييييييييره جدا ، و كل يوم عددها بيزيد وريحتها فاحت لحد ماخلاص ماعدناش قادرين نسكت اكتر من كده

علي راي محمد الراقص مع الذئاب :
اشتري رابسو ..اشتري اريال ....نضف مدونتك يا تسيبنا وترحل


طيب ايه هو مفهومنا او مفهومي انا الشخصي عن المدونات الغير نظيفه ...؟؟؟
من وجهة نظري المدونات الغير نظيفه هي المدونات اللي تلاقي فيها كلمات بذيئه وسباب اكتر من اي حاجه تانيه ، كلام ممكن يكون بقي عادي عند كتير اوي مننا ، بس برضو لسه في ناس اكتر الكلام ده بيضايقهم و ويتعبهم ،ناس بتحاول انها تدون بنظافه وبدون اثارة مشاعر الاشمئزاز عند غيرها
للاسف المدونات دي في منها اللي مشهور جدا واللي زواره بالآلاف يوميا ، وده اللي بيشجعهم يستمروا بنفس الاسلوب ، لان ما فيش حد قالهم .......لا
.....STOP

صحيح في مدونين كتير قبلي اتكلموا عن موضوع الشتائم والبذائات ده، بس للاسف ماحدش فيهم حاول يعمل حاجه ايجابيه ، كل الحكايه مجرد بوست او 2 و بعد فتره بيقدم ويتنسي وكأنه لم يكن

لفيت كتيييييييييير اوي في المدونات علي مختلف انتمائاتها ، لاحظت ان فيها لوجوهات كتير اوي لحاجات كتير
مثلا ، اللي بيدون من اجل الحريه واللي علشان الاقصي واللي مدون بلا حدود واللي ضد التعذيب ....وغيرهم وغيرهم

طقت في دماغي اني ليه مابقاش بدوّن ضد السباب والبذائات .....؟؟؟؟؟؟
واعمل انا كمان لوجو بكده و بالتالي هايفضل دايما موجود في واجهة المدونة وعمره ما هايتنسي، كمان اخدت راي بعض المدونين ( مهند ، ومحمد ، صرصاره ، نوثنج تو لوز) و شجعوني علي الفكره واتحمسوا ليها ، وكمان قالولي علي بعض الشعارات


بصراحة يا جماعة انا ما صدقت ، ماجاليش نوم الا لما عملت شعارين كده علي ادي
هما دول :



الشعار الاول :

لا تؤذنا بكلامك البذئ




Photo Sharing and Video Hosting at Photobucket


------------------------

للشعار الثاني :

مدونون .....ضد الشتائم والسباب



Photo Sharing and Video Hosting at Photobucket
-----------------------------

ياريت تساعدونا في حملتنا ضد المدونات غير النظيفة
وياريت اسمع رايكم ، اكيد فيكم كتير ممكن يعملوا شعارات احسن من كده

-----------------------------------------

تحديث
بناء علي طلب صرصاره هانم ده لوجو عليه كلمة curses
بدلا منimprecation

Photo Sharing and Video Hosting at Photobucket
-------------------------------------------------------

٢٠٠٧-٠٤-١٧

بفلوسي يا كلاب


معروف طبعا ان شبكة المحمول الثالثه اشترتها شركه اماراتيه ، وبالتالي هاتكون بنكهه خليجيه ، وافتكاسات جديده علي مصر والمصريين
زمان ايام ام نبيل وحودافون ( علي راي استاذنا جعان ) ، كان الواحد يروح يشتري الخط وهو وحظه بقي يطلعله اي رقم والسلام ، او لو يعرف حد في شركة المحمول ممكن انه ياخد رقم مميز ، وكانا نلاقي الناس اللي بيبيعوا الخطوط معلقين يفط ان عندهم ارقام مميزه كنوع من الدعايه
اما دلوقتي فالحال اتغير ، وبقي فيه تسعيره للارقام دي ، آل ايه بيقولك رقم فضي ورقم ذهبي ورقم ماسي ورقم مش عارف ايه .. وكل نوع وله تسعيره اقلها 10 جنيه للخط الفضي اللي فيه رقمين متشابهيين
ووصل سعر الخط اللي كل ارقامه متشابهه ( 0114444444) ل50 الف جنيه علي ماسمعت

مش بنقول شبكه جديده بنكهة خليجيه ، ماهي بدعة الارقام المميزه دي ما طلعتش علينا الا من الخليج في البلاد التي تجري من تحتها الآبار ، مثلا في السعودية لما عملوا مزاد علي الخطوط المميزه وصل سعر بعضها لمليون ريال ...ماهو اللي معاه قرش محيره يجيب حمام ويطيره
الحمد لله اننا في مصر لسه ماوصلناش للدرجه دي ، مع اني اعتقد انها آتيه لامحاله

الشركه الثالثه في موقها علي الانترنت بتعلن للعملاء المنتظرين يعني ، انهم ممكن يختاروا رقمهم بكل حريه وكله بفلوسه ، و الحمد لله مافيش اي تصنيفات طبقيه برجوازيه للعملاء ولا كوسه ولا وسايط ....اللي يدفع يشيل ، سواء بقي ابن امير ولا سواق حمير ، كله امام الشركه سواء واللي يلحق يشيل

اللي يضحك في الموضوع ، اني لما دخلت علي موقع الشركه علشان اشوف ايه الحكايه ، وقلت اشتريلي كام رقم كده من اللي هما اهم ينفعوا للزمن ... بس للاسف ، لقيت كل الخطوط الغاليه اللي فيها من 4 ارقام متشابهه وانت طالع ، كلها خلاص اتحجزت ، وماعادش الا كام رقم كده من بتوع الحساله وعامة الشعب اللي مافيهمش الا رقمين او تلاته بس متشابهين ( بـ 10 ، 50 جنيه )
للدرجه دي الاقبال كان رهيب علي الحجز ، دا الحجز بدأ من كام يوم

لما الشبكه تشتغل رسمي نفسي اتصل بصاحب الرقم ابو 50 الف جنيه واسأله كان عليه من ده بايه ...؟؟؟؟؟

بس ياخوفي لا يرد عليا ويقولي ......انتوا مالكوا ...... بفلوسي ياكلاب


٢٠٠٧-٠٤-١٦

I've been tagged

جالي تاج من الباشمهندس ما علينا

ولاني لما بيكون ورايا حاجه مش بعرف اعمل الا هي ، ولازم اخلصها الاول
كمان علشان ماابقاش مديونه لحد

وبسبب حالة الافلاس الفكري اللي انا فيها بعد دور البرد المتين اللي قعد معايا اسبوع بحاله
قررت اني اتوكل علي الله واجاوب التاج واللي يحصل يحصل


منه لله بقي اللي كان السبب



section 1
--------------------------



last beverage?
لبن سادة

ِlast phone call ?
لحماتي ، عاشت حره مستقله

last instant message ?
لباشمهندس ماعلينا

last cd played ?
قرآن الحرم 1427

last time u cried ?
مش فاكره

last text message ?
لواحده صاحبتي ماشفتهاش من ايام الجامعه

Section 2 - Have You Evers
--------------------------------------------

dated someone twice?
لا

hv u evers been cheated on ?
زمان

kissed someone & regretted it?
لا طبعا

lost some one special?
اكيد

been depressd ?
احيانا بس بيكون لفترات قصيره اوي

been drunk and threw up?

انتو بتجيبوا الاسئله دي منين

Section 3 - List 3 Favorite Colors
-------------------------------------------

الاحمر والاخضر والازرق


Section 4 - This month have you
-------------------------------------------------------

Made a new friend?
ايوه هنا علي النت

Fallen out of love?
لا

Laughed until you cried?
كتييييييييييير

Met someone who changed your life?
للاسف لأ

Found out who your true friends were?
مش الشهر ده ، من زمان

Is there something you want to tell someone?
ايوه فيه بس مش هاقولم عليه

Would you kiss anyone on your top friends?
لا

How many people on your top friends do you know in real life?
تلاته

How many kids do you want to have?
اللي يجيبوا ربنا كويس

Do you have any pets ?
حاليا لا ، بس زمان كان عندي عصافير
وسلاحف ، وساعات كنت بربي دود قز

Do you wanna change your name?
لا ، انا اسمي عاجبني كده

What did you do for your last birthday?
ولا حاجه ، خروجه كده علي الماشي انا وزوجي أ اتغدينا بره ، ولفينا شويه علي المحلات واشتري لي هديه ، وبس خلاص كل سنة وانتوا طيبين

What time did you wake up today?
انهارده بالذات صحيت بدري الساعه 9 الا ربع علشان انا اللي هافتح الصيدليه واول ما فتحت البلوج اتصدمت بالتاج ده

What were you doing at midnight last night?
كنت نايمه ، في العادي انا ليا وصلتين نوم من حوالي 9 او 10 بلليل للساعه 1 ، وبعدين من الساعه 7 او 8 الي الساعه 12 الضهر
بس في ايام بلخبط النظام ده شويه بس

Name something you CANNOT wait for?
مش حاجه معينه ، اصلا ماعنديش صبر اني استني علي اي حاجه

Last time you saw your father?
من حوالي 27 سنة

What is one thing you wish you could change about your life?
عاوزه اظبط مواعيدي شويه ، بمعني اعيد ترتيب جدولي اليومي وتقليل النوم شويه

What are you listening to right now?
سورة الصافات في قناة المجد للقرآن

Have you ever talked to Tom?
مين توم ده ...هههههه
، في العاده مش بحب اتكلم مع كل من هب ودي ،بس طبيعة شغلي في الصيدليه بتفرض عليا كده ، لازم اتكلم مع كل اللي بيدخلوا الصيدليه ، واحيانا ببقي مضطره اني اتكلم مع اي حد يوقفني علشان يسألني علي حاجه او يطلب مني حاجه


Have you ever talked about someone behind their back?
ايوه ونفسي ابطل الخصله الغبيه دي

What’s the last piece of clothing you borrowed from anyone?
عمري ما اخدت هدوم من حد ، علشان بتقرف ، تاني حاجه علشان اقرب واحده ليا في السن من قرايبي اصغر مني في السن ب 5 سنين ، وطبعا استحاله اني اخد هدوم من حد غريب

Who’s getting on your nerves right now?
حمااااااتي

Most visited webpage?
جوجل

Coke or Pepsi ?
الاثنين ولا انت بخيل

Mac or PC?
PC


طبعا دلوقتي المفروض اني امرر التاج ده لحد
بس مش عاوزه حد يدعي عليا ، علشان كده ياجماعه اللي عاوز يجاوب يجاوب ولا يهمه ولا مش عاوز يجاوب معلش علشان خاطري اعصر علي نفسك لمونه وجاوب
ونخص بالذكر :
مهند الباحث عن الحقيقه

محمد الراقص مع الذئاب

وصرصاره هانم

والاستاذ احمد يا مراكبي


واي حد نفسه في التاج ده يتفضل يجاوب
----------------------------------------------------

تحديث :
ايه حكاية التاج الغريب ده ، رحت ازور ميمو لقيتها بعتاهولي بردو

عموما انا جاوبته اهه واي خدمه يا ميمو هانم





٢٠٠٧-٠٤-٠٨

دهب .....ياقوت ....مرجان ....دولارات ....احمدك يارب



منذ اواخر 2006 الي الآن وكلما فتحت الايميل الخاص بي اجد رسائل تنبيه عن الفوز بجائزه كبري من الدولارات من المفترض اني قد فزت بها في احدي السحوبات التي اجرتها جهة ما ، علي سبيل المثال لا الحصر
ال BRITISH INTERNATIONAL LOTTERY
وال EURO AFRO ASIA SWEEPTAKES LOTTERY INTERNATIONAL
وال Microsoft Award ، و الYAHOO PROMOTIONS ONLINE
حتي اليانصيب التي اجرته شركات بي ام دبليو والكوكاكولا
و احدي المقاهي ( كوستا كوفي ) التي لها موقع علي الانترنت وايضا احدي شركات التبغ بالرغم من اني لست بمدخنه ولا اشرب القهوة الا نادرا...!!؟؟


وعادة ما تكون الجائزة مبلغ مالي ضخم مثلا 500000 جنيه استرليني او 100مليون دولار امريكي او ماشابه ذلك من الارقام التي يسيل لها اللعاب ، و تجعل الفرد يطير في دنيا من الاحلام


فجأة وحتي بدون ان اشترك في اي من هذه السحوبات اصبحت من المحظوظين وربحت الجائزة الاولي ، لا اعرف كيف هذا وانا التي لم اربح في اي مسابقه حاولت الاشتراك فيها ، حتي الجوائز الفوريه داخل اكياس الشيبسي و علب اللبان لم يكن لي نصيب في اي منها ،وكأني الآن قد هبط علي راسي الحظ الموجود في الدنيا كلها وجعلني افوز في كل هذه المسابقات دفعه واحده

اللافت للنظر في رسائل التهنئة هذه انها جميعا تشترك في شئ واحد ، وهي انها تطلب من الفائز الذي هو انا ان يرسل جميع بياناته الي جهه معينه وتشمل هذه البيانات الاسم بالكامل والسن والعنوان ورقم التليفون وتاريخ الميلاد والوظيفه وغيرها من المعلومات الشخصيه جدا عن الفائز ومن الممكن ان يكون من بينها رقم حسابه في البنك
وهذا ما يجعلها مثيره للريبه والشك في مدي حقيقتها ، فقد سمعت كثيرا عن النصب عبر الانترنت عن طريق رسائل كهذه و من خلال رد الضحيه ( الفائز ) علي فحوي الرساله فانه بذلك ربما يكون
قد اوقع نفسه في الفخ
لذا دائما وابدا يكون مصير هذه الرسائل معي
وحتي من قبل ان افتحها هو زر delete

كذلك هناك رسائل التسول والتي يخبرك صاحبها انه يحتاج مبلغ من المال لاجراء عملية كبيره لشريك حياته او ابنه وطبعا هذا بعد ان يصدع راسك بقصه مثيره للشفقه عن علاقة الحب التي بينهما او عن ان هذا الطفل قد جائهم بعد عناء سنين

آخر رسائل النصب هذه ، رساله وصلتني يوم 1 ابريل ( بعد فتحها ايقنت ان لها علاقه بكذبة ابريل )
فهي رساله من احد الموظفين في بنك بجنوب افريقيا يطلب مني ان اشاركه في عملية نصب علي البنك الذي يعمل فيه ، باختصار شديد احد كبار العملاء والذي يمتلك حوالي 12000مليون دولار وشوية فكه قد توفي هو وجميع اقاربه في حادث طائره ويريدني ان ادعي انني من اقاربه علي ان آاخذ 40 % من المبلغ وهو يأخذ 50 % اما ال 10 % الباقيه فسوف تخصم كمصاريف ادارية ......يابلاش


صحيح وكما ذكرت ان جميع هذه الرسائل لا التفت اليها ويكون مصيرها الالغاء الفوري ليقيني التام انها مجرد رسائل للنصب ليس اكثر الا انها دائما ما تأخذني الي دنيا من الاحلام لاتخيل نفسي وقد ربحت فعلا هذا المبلغ الضخم من المال وماذا عساي ان افعل به وما هي اول الاشياء التي اود ان اشتريها فور تسلمي النقود ، والي اي مدي ستتغير حياتي وهل سأكون سعيده
وغيرها من الافكار التي تمحي من ذهني فور الضغط علي زر
DELETE


٢٠٠٧-٠٤-٠٦

يوم اليتيم



بلا سقف او جدران .....
بلا مأوي او حنان ...
مات الشوق فيّ....
وحيدا.....
كقطعة حلوي يتهافتون عليها يوم العيد
كي يقتلوها ....حبا
كـ....كتاب ...كـ ....رواية
يقرؤها ....ثم يرجعوها للمكتبة
ليتني الموت ...لأقتل جسدي .....
واكتب علي جثتي ....
عاش يتيما
مات يتيما
ودفن يتيما
فهل يبعث يتيما ...؟؟؟



هل ياتري لا يستحق منا اليتيم سوي يوم واحد في العام للاعتراف بواجبنا نوحه ، كي نتذكره ونشعره انه مازال موجود في الدنيا ، وان هناك من يفكر فيه
كثيرا من الناس يتعامل مع واجبه نحو الايتام فقط من الناحية المادية ، يكتفي فقط بمبلغ شهري يدفعه الي احدي الجمعيات التي تكفل الايتام ، ويعتقد في نفسه انه بذلك قد كفل يتيم ولكنه ينسي اننا لو دفعنا كل اموال العالم ليتيم واحد فقط فلن يعوضه ذلك عن فقد والديه او احدهما وينسي ان الله تعالي يطالبنا ليس فقط بالكفاله الماديه ولكن ايضا
دفع المضار عنه، وجلب المصالح له،و الإحسان إليه ومراعاة الجانب النفسي له.
ذُكر اليتيم في القرآن 23 مره لنشعر بمدي اهمية رعاية اليتيم ولا ننسي واجبنا المتجدد نحوه

( وَاعْبُدُوا اللَّهَ وَلاَ تُشْرِكُوا بِهِ شَيْئاً وَبِالْوَالِدَيْنِ إِحْسَاناً وَبِذِي القُرْبَى وَالْيَتَامَى وَالْمَسَاكِينِ ) النساء36

كلك لم ينساه المصطفي صلي الله عليه وسلم اعظم يتيم في هذه الدنيا

وقال رسول الله صلى الله عليه وسلم :
"أنا وكافل اليتيم فى الجنة كهاتين , وأشار بإصبعيه السبابة والوسطى"


وشكا رجلا إلى النبي صلى الله عليه وسلم قسوة قلبه، فقال: امسح رأس اليتيم، وأطعم المسكين.
(رواه أحمد بإسناد حسن)


في رايي كفالة اليتيم لا تتم بالاموال فقط ولكن يجب ان نشعره انه احد افراد العائله ، نشاركه طعامه احلامه وآلامه ، حتي ولو ليوم واحد في الاسبوع او الشهر وليس فقط في يوم اليتيم حتي نعالج احتياجه النفسي لان يكون فرد في اسره يشعر بحنانها


٢٠٠٧-٠٤-٠٤

عصفور



عصفور جناحه ريشة فضه وريشه نور
وعشه عود من تمر حنة وعود بخور
وعوده ناحل مالضنا بين الطيور
ممنوع يغني غنوته ....ممنوع يغني غنوته

الا اذا


وهكذا وهكذا الدنيا غابة ومنتزه

والصقر طايح في الفضا زي القضا
فارد جناحه عالمساكن والفضا
كل الطيور بتبصله بعين الرضا
رقص الجواري للملوك .....رقص الجواري للملوك
يا حبذا


وهكذا وهكذا الدنيا غابة ومنتزه



-------------------------

الكلام ده مش من تاليفي وما عرفش مين اللي كاتبه
بس حباه وحاسه انه واقعي جدا

٢٠٠٧-٠٤-٠٣

تحيا اوضِة الفِيران .....تحيا االفَلَكَه


ايوه فعلا هي اوضِة الفِيران الشهيره اللي كلنا عارفينها
وهي برضو الفَلَكَه بتاعة زمان ايوه هي
تحيا اوضِة الفِيران .....و تحيا االفَلَكَه ده اللي اكتشفته بريطانيا مؤخرا

وزارة التعليم البريطانيه كانت زيها زي كل دول العالم لغت الضرب في المدارس ،وده بدوره ادي الي انفلات التلاميذ بطريقه مش معقوله بالظبط زي ما بيحصل عندنا الايام دي، كمان كان من حق الطلبه انهم يرفعوا قضايا تعويض علي المدرسه والمدرس اذا اتعرضوا للضرب
ده خلي زمام الطلبه البريطانين يفلت ومبقاش حد يعرف يكلمهم ، لدرجة انه طلع شعار بيقول
"لا أسمح لك بإملاء رغباتك علي"
الكلام ده طبعا موجه من التلاميذ للمدرسين ( ياربي هما بيتكلموا علي مصر )
المهم ان الوزاره قررت انها تعيد للمدرس هيبته وتسمحله بالضرب بس طبعا في حدود معقوله ، مش كده وبس ، صلاحيات المدرس مش جوا المدرسه بس ، لا كمان بره المدرسه ،في المولات التجاريه والاتوبيسات ، لدرجة ان المدرس من حقه انه يصادر التليفون المحمول بتاع الطالب لو شاف انه بيستخدمه استخدام غلط
كمان لقوا ان اوضِة الفِيران دي ليها تأثير السحر ، فسمحوا للاساتذه باحتجاز التلاميذ اثناء اليوم الدراسي او بعده لعدد غير محدد من الساعات وبدون ما اهلهم يوافقوا

ياريت بقي وزارة التعليم عندنا تتعظ من الكلام ده وتحاول انها تعيد النظر في موضوع الغاء الضرب من المدارس
طبعا انا مش مع الضرب لمجرد الضرب ، ولا الضرب بفترا ، لأ ....العصي فقط لمن عصي
زمان علي ايامنا ، كان المدرس ده بالنسبة لينا حاجه كبيره اوي ومكناش نقدر نقله بم ، وقبل الجيل بتعنا بفتره طويله كان المدرس هو دراكولا اللي كل التلاميذ بيترعبوا من مجرد ذكر اسمه ، وبالرغم من كده كان الطلبه بيطلع من بينهم عباقره ومبدعين ، والامثله علي كده كتير ، اما دلوقتي فالحال لا يسر عدو ولا حبيب

القرآن الكريم