2007-04-17

بفلوسي يا كلاب


معروف طبعا ان شبكة المحمول الثالثه اشترتها شركه اماراتيه ، وبالتالي هاتكون بنكهه خليجيه ، وافتكاسات جديده علي مصر والمصريين
زمان ايام ام نبيل وحودافون ( علي راي استاذنا جعان ) ، كان الواحد يروح يشتري الخط وهو وحظه بقي يطلعله اي رقم والسلام ، او لو يعرف حد في شركة المحمول ممكن انه ياخد رقم مميز ، وكانا نلاقي الناس اللي بيبيعوا الخطوط معلقين يفط ان عندهم ارقام مميزه كنوع من الدعايه
اما دلوقتي فالحال اتغير ، وبقي فيه تسعيره للارقام دي ، آل ايه بيقولك رقم فضي ورقم ذهبي ورقم ماسي ورقم مش عارف ايه .. وكل نوع وله تسعيره اقلها 10 جنيه للخط الفضي اللي فيه رقمين متشابهيين
ووصل سعر الخط اللي كل ارقامه متشابهه ( 0114444444) ل50 الف جنيه علي ماسمعت

مش بنقول شبكه جديده بنكهة خليجيه ، ماهي بدعة الارقام المميزه دي ما طلعتش علينا الا من الخليج في البلاد التي تجري من تحتها الآبار ، مثلا في السعودية لما عملوا مزاد علي الخطوط المميزه وصل سعر بعضها لمليون ريال ...ماهو اللي معاه قرش محيره يجيب حمام ويطيره
الحمد لله اننا في مصر لسه ماوصلناش للدرجه دي ، مع اني اعتقد انها آتيه لامحاله

الشركه الثالثه في موقها علي الانترنت بتعلن للعملاء المنتظرين يعني ، انهم ممكن يختاروا رقمهم بكل حريه وكله بفلوسه ، و الحمد لله مافيش اي تصنيفات طبقيه برجوازيه للعملاء ولا كوسه ولا وسايط ....اللي يدفع يشيل ، سواء بقي ابن امير ولا سواق حمير ، كله امام الشركه سواء واللي يلحق يشيل

اللي يضحك في الموضوع ، اني لما دخلت علي موقع الشركه علشان اشوف ايه الحكايه ، وقلت اشتريلي كام رقم كده من اللي هما اهم ينفعوا للزمن ... بس للاسف ، لقيت كل الخطوط الغاليه اللي فيها من 4 ارقام متشابهه وانت طالع ، كلها خلاص اتحجزت ، وماعادش الا كام رقم كده من بتوع الحساله وعامة الشعب اللي مافيهمش الا رقمين او تلاته بس متشابهين ( بـ 10 ، 50 جنيه )
للدرجه دي الاقبال كان رهيب علي الحجز ، دا الحجز بدأ من كام يوم

لما الشبكه تشتغل رسمي نفسي اتصل بصاحب الرقم ابو 50 الف جنيه واسأله كان عليه من ده بايه ...؟؟؟؟؟

بس ياخوفي لا يرد عليا ويقولي ......انتوا مالكوا ...... بفلوسي ياكلاب


47 comments:

أحمد سلامة يقول...

كنت بلف على اي رقم موبايل يقابلني عشان اشوفه مميز ولا لا
لأنه ببساطه 99،9 % من الارقام هتلاقي فيه حاجه مميزة
رقمين متشابهين على رقمين متسلسلين على صفر يمين و واحد شمال
كان ليا واحد صاحبي رقمه مكانش ليه اي علاقه ببعضه وكان نفسي اخده منه باي طريقه انشالله لو هدفعله عشـيين جنيه مره واحده لاني كنت شايف ان ده اكتر رقم مميز قابلته وممكن اضحي بمبلغ زي ده عشانه
التميز ليس ان تكون مختلفا ولكن ان تكون غير قابل للتكرار
تحياتي

mohandat يقول...

السلام عليكم
احب اقول لسعادتك اني حجزت خط فضي
بس مش علشان رخيص
بس كان فيه ثلاث اربعات
لاقيتو فرصه

----------------
بالنسبه للخط ابو ملايين كان الخط ابو تسع ستات
واشتراه امير
طبعا مين قده معاه تسع ستات مره واحده
اي واحد فينا الشرع محلله اربعه بس
كركركركركركركركر
--------------------
تصدقي انا كنت هكتب عن الموضوع ده
بس انتي سبقتيني
تحياتي يا دكتوره
وتاجك محفوظ متقلقيش
تحياتي
ومتنسيش يوم الخميس بالليل

خمسة فضفضة يقول...

السلام عليكم ورحمة الله وبركاته


د/ احمد سلامه
حللت اهلا ونزلت سهلا


كلامك صح 100 % بس للاسف منين نجيب ناس لمعناة الكلام يتلوه

خمسة فضفضة يقول...

السلام عليكم ورحمةالله وبركاته



ههههههههههه
هو انت طلعت منهم يامهند
وكمان رقمك فيه 3 ارقام زي
بعض ... وبعشره جنيه بس ...ماحدش هايعرف يكلمك بعد كده ....ههههه


------------

معلش بقي سبقتك ، خيرها في غيرها

اوك ياعم الباحث عن الحقيقه التاج محفوظ والزعل مرفوض
ان شاء الله يوم الخميس هاتلاقيني معاكم


سلام

SoRsaRaa يقول...

اييييه دا اناااا اهلاوى صميم
اول مادخل كدا الاقى تى شيرتات خضرااا
دى خيااااااااااانه عظمى لاتغتفر

وبعدين احنا هنتبطر عالنعمه اللى فادينا ليه

مالها الخطوط اللى معانا بس
هو صحيح الشبكه مطلعه عينى بس برضو لازم الواحد يكون عنده ولاء ووفاء وزكى وابوسريع


انا بأعلن احتاجى الرسمى على الشركه دى

بس لو ممكن يعملوى خط بعيد ميلادى انا ممكن اغير رأيي:)

وانتى بقى هستناااكى فى الحفله احسن انا متوصية بيكى اوى بعد الهديه:)

ody911 يقول...

هههههههههههههههههههههه


غالبا دة إللى هيحصل


وعلى رأيك يجعلوا عامر

ولا أقولك

عادى بقة

أودى

سكتم بكتم يقول...

عندما يشتري التميز بالفلوس مش بالمجهود والشغل قولي علي البلد السلام ,,,والسلام ختام

كراكيب عادل يقول...

فية اغلي بكتير من 50 الف

انا بقول ان دة مسكين بجد الي يعمل في نفسة كدة مسكين مش معندوش فلوس
لا لا مش شرط بيكون مسكين في شخصيتة

عندة نقص ما عايز يكون متميز بالعافية مش بالعلم ولا بالاخلاق ولا بحب الناس لا برقم مميز يا عيني علي التميز

بس سؤال لو جالك رقم من دول هترفضية ؟؟؟ انا عن نفسي لو لقيتة هاخدة بس هبيعة لواحد من عينة الاخ دة هههههههههه

أمــانــى يقول...

الســلام عليكم
على راى المثل اللى معاه قرش محيره يجيب حمام ويطيره
ايه هما المصرين خلاص كلهم هيغيروا على اتصالات ياعينى
موضوع ممــتاز ومتميز
عايزة اقولك على حاجة فى سرك بس عارفه ايه اللى خلينى ادخل المدونة عندك البنت الامورة دى هى انتى
:D

عالمى ازرق يقول...

تعرفى انا اول ماقريت الموضوع قولت هتقولى موضوع الارقام والمزايدات عليها ده مش هينفع فى مصر
يمكن بسبب فارق المستوى الاقتصادى بيننا وبين الدول الخليجيه
وكمان بالحجز ..انا حسيت ان اليومين اللى فاتوا كنت فى المكسيك
بس يعنى هتفرق ايه الرقم حلو او لا وهل يستاهل - من وجهه نظره - يتدفع فيه خمسين الف جنيه مثلا

كلام لوجيك يقول...

انا عاوز أقولك على حاجه يادكتورة بخصوص موضوع الأرقام المميزة هنا فى الخليج
وخاصة فى الامارات فى امارتى ابوظبى ودبى حيث امضيت هناك سنتين من اعجب مايكون
تلاقى المواطن من دول شاري السيارة بمائتي الف درهم وشاريلها رقم مميز بحوالى نص مليون درهم او اكثر
يعنى رقم اللوحة ضعف ثمن السيارة مرتين او تلاته
وبعدين مش على قد الرقم بس
لون اللوحة كمان مهم جدا
يعنى اللى عنده لوحة حمراء رقم 333
افضل من اللى عنده لوحة خضراء بنفس الرقم
والحكومة بتستغل شغف المواطنين هناك بالارقام المميزة بإنها بتعمل مزادات عليها والارقام بتوصل للملايين

وياريت الكلام ده على ارقام السيارات والتلفونات بس
الكارثة انهم بيدوروا على رقم حساب بنكى مميز
زي مثلا
0120120000012
مش عاوز اقلب دماغكم اكتر من كده لإن الواحد مفقوع خلقة

ويسألون لماذا لا يتقدم العرب؟؟
نحن نتقدم فقط فى توافه الامور
فى نهاية كلامى
أشكرك على اثارة مثل هذا الموضوع المهم
مع خالص مودتى
اسامة

شــهــروزة يقول...

أهو دة بقا اللىينطبق عليه لفظ
محدث نعمة
ناس لاقية فلوسها تحت رجليها
بتتعبى فى براميل
اللهم لا حسد ولا حئد طبقى ولا موجتوماعى ولا حاجة
لكن لما الواحد بيشوف حاجات زى دى
بيلعن أبو اليوم اللى بقا فيه حادى البعير...مالك للبير والبرميل
واللى زلاد أصول زينا
متمرمطين عندهم و كمان اية؟؟
فقرانين

وعجبى

kaed يقول...

طب و اللى معهوش موبايل أصلا يعمل إية

R.R يقول...

السلام عليكم
دى اول مره اعرف المعلومات دى هو الدستور الجديد نزل والخير جيه معاه ولا ايه

ياستى ماله حودافون اهو شغال

تحياتى لكى

R.R يقول...

نسيت اقلك
انا كمان بتغاظ من ارقام العربيات اللى بتتباع
واما سالت حد ايه اللى هيستفيدوه من ده قالى اهو الناس تعرف انه مهم ومحدش يوقفه فى اشاره وكلام من بتاع اختراق القوانين ده
هى دى طبعا الجدعنه
ربنا يهدى

koukawy يقول...

هههههههههههههههههههههههه
علي رأيك بفنوسي يا كناب ؛
البلاد العربيه و خاصة الخليج بيمتازوا بالاسراف و البزخ الفظيع الشنيع
يعني الخمسين الف دول كان بني بيهم دار ايتام و لا مستشفي و لا جوز بيهم حد محتاج و لا حججه و لا طلعه عمره
هنلاقي ولا كتير بس مين يسمع

Tamer Nabil يقول...

ههههههههههه

ايوة هيقول ليكى كدة فلوسة بقى انتىى شغلة نفسك لية


انا شايف ان حكاية الارقام دى عبيطة واللى يربط نفسة بيها ويدفع كل الفلوس دى عشان رقم اسمة المييز عبيط

والمستفاد اولاا واخيرا الشركة

تحياتى

خمسة فضفضة يقول...

السلام عليكم ورحمة الله وبركاته

صرصاره هانم
اهلا بالناس الاهلاوي الجامدين

ومالوه يا حبيبتي اعلني كل اللي انت عاوزاه ولا يهمك ،الاعلانات هنا ببلاش ...ههههه

عموما لو عاوزه رقم بتاريخ ميلادك اكيد هاتلاقي بس انت خشي اكتبي تاريخ الميلاد واعملي سيرش وان شاء الله يطلعلك الرقم

ان شاء الله ها كون في الحفله

تحياتي

خمسة فضفضة يقول...

السلام عليكم ورحمة الله وبركاته

اودي

ايه النور ده ، نورك غطي عالكهربا


يعني اكيد ده اللي هايحصل
مافيش خيارات تانيه

عموما عادي بقي ماحنا خلاص اتعودنا

تحياتي

خمسة فضفضة يقول...

السلام عليكم ورحمة الله وبركاته

سكتم بكتم

اهلا بيك
للاسف في ناس عندها ايمان ان بفلوسها ممكن تشتري اي حاجه مهما كانت

وهما دول اللي كل البلاوي بتيجي من وراهم

منورني

خمسة فضفضة يقول...

السلام عليكم ورحمة الله وبركاته

الفنان عادل
اهلا وسهلا

ايوه طبعا عندهم نقص وبيحاولوا يداروه بالحاجات الهايفه دي ،هدوم ماركه ، عربيات غاليه ، ارقام مميزه ...وغيرها من الحاجات اللي تخليهم يحسوا نفسهم مميزين
في العاده الناس اللي زي دول يا اما محدثين نعمه ، يا اما فاشلين في حياتهم

عموما لو جالي رقم من اياهم طبعا هاخده ، وها عمل عليه مزاد اكيد هالاقي كتير اوي عاوزينه وباي سعر ، ماهو رزق الهبل علي المجانين

تحياتي

خمسة فضفضة يقول...

السلام عليكم ورحمة الله وبركاته

اماني

اهلا بيك

شكلهم كده ، وكمان كام يوم هايعلنوا اغلاق الشركتين التانيين

للاسف مافيش اكتر من الهيافه في البلد دي

------------
لا ياستي مش صورتي هو انا حلوه كده ....هههه، بس انا حصلي زيك كده اول ما شفتها ماقدرتش ما حطهاش صوره للبروفيل
تحياتي

خمسة فضفضة يقول...

السلام عليكم ورحمة الله وبركاته

عالمي الازرق

منوراني

ماعدش في حاجه مش حاصله في البلد دي ، اي حاجه ممكن تحصل مهما كانت

والناس الهايفه اللي معاها فلوس مش عارفه توديها فين يامكترهم


تحياتي

خمسة فضفضة يقول...

السلام عليكم ورحمة الله وبركاته

استاذ اسامه

اهلا وسهلا

الحاجات اللي زي دي في الخليج بالخصوص كتيييييييييييير اوووووووووي

ولو نعوز نعدها ممكن نعد يويمن تلاته نقول فيهم
فاخلينا ساكتين احس حفاظا علي المرارة و مستويات السكر والضغط

دول يا عمي ناس بعد ماكانوا زي ما حضرتك عارف بين يوم وليله لقوا نفسهم من اغني اغنياء العالم ، فلازم تحصلهم لوسه



شكرا علي مروك مع خالص التحية

خمسة فضفضة يقول...

السلام عليكم ورحمة الله وبركاته

شهروزه

اهلا وسهلا

ما تقلبيش علينا المواجع الله يخليكي

خلينا صابرين

تحياتي

خمسة فضفضة يقول...

السلام عليكم ورحمةالله وبركاته

قائد

اهلا بحضرتك

ادفع الاول وبعدين اشتكي......هههههه


تحياتي

خمسة فضفضة يقول...

السلام عليكم ورحمة الله وبركاته

د/ رانيا

اهلا وسهلا

دي بس البدايه استني انت عليه لما يتم كام شهر كده
لسه الخير جاي ..هههه

منتشره اوي حاكية ارقام العربيات اللي انتي حكيتي عنها دي ، وفعلا بتاثر في عساكر المرور ، خصوصا بقي لو صاحب العربيه حاطط نسر ولا ميزانين جنب الرقم وياسلام لو حاطط كاب ولا معلق بدلة ظابط في الكنبه اللي ورا ، لو موت الف واحد ما حدش هايوقفه


تحياتي

خمسة فضفضة يقول...

السلام عليكم ورحمة الله وبركاته


كوكو الكميل
منورني يا عسل

تقولي لمين ومين يسمع ومين يفهم


حسبنا الله ونعم الوكيل

خمسة فضفضة يقول...

السلام عليكم ورحمة الله وبركاته

تامي نبيل
اهلا بحضرتك

بقي كده يعني مش ممكن يقفل السكه فوشي وخلاص.....ههههه

طبعا المستفيد الاول والاخير هي الشركه اللي بتبيع رقم ما يسواش عشره جنيه ب 50 الف جنيه
وهي دي اكيد من اساليب الدعايا كمان علشان تسحب العملاء من الشركتين التانيين بدعوي التميز يعني
يلا رزق الهبل عالمجانين

تحياتي

SaSo يقول...

اول يوم ف الحجز,بيتهىءلى مصر كلها كانت اونلاين بتحجز ارقام,زى يوم عيد الحب كده مصر كلها كانت بتتكلم ف التليفون عشان عرض ساويرس.سهل اوى استنتاج سلوك الشعب المصرى
تحضرنى حكايه ف موضوع الارقام المميزه ده.مره كنا قاعدين انا ووحده صاحبتى وقالتى تفتكرى الرقم ده ممكن يكون بتاع مين
0123456789
؟
قولتلها بسيطه تعالى اما نشوف.وروحنا اقرب كابينه مينتال-هو انا هبله عشان اكلمه من موبايلى ده اكيد راجل تقيل وهيخربيتى- واتصلت رد عليا واحد قالى :مين معايا؟
قولتله انت اللى مين "بروح امك" عشان يبقى معاك رقم زى ده,بس مقولتوش بروح امك قولتله كلمه تانيه تتعلق بامه بردو
الراجل قالى انتى سافله قليله الادب وقفل-تقريبا ده اخره ف الشتيمه-
ومعرفتش بردو بتاع مين

علا يقول...

انا بالفعل مش شايفة ايه المتعة او النشوة ان أرقام تليفوني تبقى كلها شبه بعضها؟ عشان يتحفظ بسهولة؟ طيب و هو حد أصلا بيحفظ أرقام موبيلات؟ ماهي كلها متسجلة ع الموبيل.. و لا عشان الناس تقول واااااااااو.. دي بت روشة خالص؟ طيب يا ترى وااااااااااو دي بت روشة خالص دي تمنها كام؟.. ربنا يشفي.

خمسة فضفضة يقول...

السلام عليكم ورحمة الله وبركاته

اهلا سوسا

نورتي البلوج والبلوجات اللي جمبه

دا لحد دلوقتي الموقع علي طول تلاقيه تقيل و كل شويه يقولك حاول في وقت آخر بسبب الضغط

اصل الناس الهايفه مافيش اكتر منها

بس والله حركه جريئه منكم انكم فعلا تتصلوا بالرقم اياه ، متأكده ان الراجل ماقلوكوش بفلوسي ياكلاب ......هههههههه


تحياتي

خمسة فضفضة يقول...

السلام عليكم ورحمة الله وبركاته


علا
اهلا وسهلا
تقولي ايه بقي ناس كل تفكيرها في رقم الموبايل وماركته ورقم العربيه وماركة النظاره ...وغيرها من الهيافات
وعلي رايك ربنا يشفي

منوره

الراقص مع الذئاب يقول...

السلام عليكم ورحمة الله وبركاته

ابن جاحا قاله يا ابا علمني الهيافة
قالوه تعالي في الهايفة واتصدر

ابو 50 الف جنيه دا راجل ولا مؤخذه هايف

انا عموما حجزت ارقام في الشركة الجديدة بس كلها مفهاش الطمع ومحدش قرب منها
الاول كان لست الحبايب بتاريخ ميلادها
اظن يعني سنة 58 مفهاش الطمع ومفهاش روشين كتير عشان يحجزوا كل الارقم اللي فيها 1985
والرقم التاني كان بتاريخ ميلادي
17/1/82 وبرضو مفهوش الطمع بس تعبني شوية عقبال من عرفت الاقي توليفة في التاريخ موجودة

المهم ان كل رقم منهم ب 10 جنيه
اهو نجرب الشبكة الجديدة مدام ام نبيل وحودافون هيمدوا الصلاحية لمدي الحياة
ومدام معرفتش اشتغل فيها زي ما كنت بحلم وانا في الكلية اول ما عرفت ان في شبكة تالتة هتفتح ومعرفتش عشان خدمة الوطن يبقي اجبلي فيها خط ...اتمحك فيها يعني

سيبي الناس تعيش يا فضفضة

واللي يلاقي دلع وميتدلعشي يبقي راجل مش كويس

استودعك الله

خمسة فضفضة يقول...

السلام عليكم ورحمة الله وبركاته


الباشمهنديز محمد ..منور يا فندم

حتي انت يا بروتــ.....اقصد يا راقص مع الذئاب ، انت اتعديت من مهند ...هههه


خلاص يا سيدي ها سيب الشعب يعيش بما ان دي رغبت الاخيره قبل دخول الجيش

وادلعوا براحتكوا ، وان فاتك الشغل في الشبكة التالته يبقي اتمرغ في ترابها وكله فدي الوطن ...ههههه

مع السلامه تروح وتيجي بالف سلامه

وسمعني سلام خلي السلاح صاحي

smraa alnil يقول...

انتي سمعتي عن الرقم اللي كله 666666
واتباع بعشر ملاييين درهمم
يعني مش غريبة

حسيبي الله ونعم الوكيل
انا بقي رقمي فيها ارقام ورا بعض
عشان اللي مش بيعرف يحفظ يعد ورا بعض

وحش يعني

:))))

gohayna يقول...

والله هما مش خسرانين حاجه

هما بيلعبو علي طيبه قلب الشعب دا وساذجتخ

عرفين انه بيحب يبعزق فلوسه في كلام فاضي ومش مهم ممكن يشحت بعدها المهم رقم تلفونه يبقي وزي رقم عربيته يبقي زي رقم محلول الجفاف الي خده في مستشفي وهو صغير علشان كله يتطابق

واللع احنا الي عملين كدا في روحنا

تحياني يا جميله

Sampateek يقول...

ههههههههه
اصلا العنوان فكرني بمحمد صبحي و ضحكني
طيب شوفلي بيعة لرقمي

فيه 65556

يطلعله بكام اليومين دول؟

:)))
خليني اطلع لي اسبوع شرم

سلامي

خمسة فضفضة يقول...

السلام عليكم ورحمة الله وبركاته
اهلا وسهلا يا انوج

وحش ...؟؟مين اللي قال كده ، داانت يا سمرا تعتبري كده من الطبقه الارستقراطيه ..هههههه، وماعدناش هانعرف نكلمك

ايوه انا سمعت عنه الرقم ابو 6 ستات ده ، ناس مش عارف تودي فلوسها فين ...جتنا نيلا فحظنا الهباب علي راي قاسم السماوي ...ههههه


تحياتي

خمسة فضفضة يقول...

السلام عليكم ورحمة الله وبركاته

د/ جيهان اهلا وسهلا فينك يابنتي ماجتيش امبارح ليه ، الحفله كانت نقصاكي


السذاجه دي والبحث عن اي شضئ يخليهم يحسوا بالتميز هي الحاجات اللي بيلعب عليها بتوع الدعايا علشان يحققوا من وراها اعلي مكسب

الكارثه بقي ان ناس كتير بتساعدهم علي كده

تحياتي

خمسة فضفضة يقول...

السلام عليكم ورحمة الله وبركاته

سمباتيك

ياويلكم ياويلكم

ايه النور الجامد ده

بصي خلي الرقم معاكي شويه سعره هايبقي في السما ، كام اسبوع كده واعملك عليه مزاد ، ومش بس تروحي شرم
لا هاتلفي العالم في 200 يوم

واللي يكلمك انت عارفه بقي هاتقوليله ايه ....بفنوسي ياكناب ......هههههه


تحياتي

ana ga3an يقول...

يا دكتور
من قبل ان تعلن الشركة
عن بدء خدمة حجز الارقام علي النت
وتم حجز اكثر من 185 الف خط تلفون
وذلك في اسبوع واحد فقط
ما اكدبش عليكي انا خط رقم منهم
بس توحفة و صغنن و شبة بعضة
بني ادم عينة فارغة حقيقي
ميملاش عينة الا كروت الشحن

خمسة فضفضة يقول...

السلام عليكم ورحمة الله وبركاته

استاذ اسلام

اهلا وسهلا منورني

مبرووووووووووووك علي الرقم
قولنا بقي دفعت فيه كام

بس اوعي تكون انت صاحب الرقم اللي فيه 7 اربعات

حنان شلبي يقول...

والله معك حق وجد انا بايدك الف بالمية وفعلا هاد الشي عامل متل الطوفان والمشكلة انو بناخد من بعض الاشياء التافهة والغير مفيدة وناسيين العلم والتقدم
اصلا هالشي مو عبالنا احنا العرب كفاية علينا ارقام التلفونات

الطائر الحزين يقول...

السلام عليكم ورحمة الله
المهم هو الربح والتربح حتى ولو على اجساد العرايا حتى ولو على قوت الناس حتى ولو على هامات الغلابة
انتى عارفة ساكتب قريبا فى مدونتى معنى الحلم وما وصل ايه هذا المفهوم من انحطاط
عموما شكر الله لك التوضيح لكن يا ليت لنا قلوب نفقة بها وعقول تعى

خمسة فضفضة يقول...

السلام عليكم ورحمة الله وبركاته

حنون

اهلا وسهلا
ايوه ما فيش اكتر من التفاهات في بلادنا العربيه
والمشكله انها دايما بتاخد اهتمام كتير اوي من الناس
والله لو اهتمينا بالحاجات المفيده عشر اهتمامنا بالكلام الفاضي كان حالنا ها يتغير 180 درجة
نورتيني

خمسة فضفضة يقول...

وعليكم السلام ورحمة الله وبركاته

الطائر الحزين
للاسف فعلا كتير اوي من الشركات مش بيهمها الا الربح والربح فقط مهما كانت الوسيلة
نورتني

القرآن الكريم