بفلوسي يا كلاب

معروف طبعا ان شبكة المحمول الثالثه اشترتها شركه اماراتيه ، وبالتالي هاتكون بنكهه خليجيه ، وافتكاسات جديده علي مصر والمصريين
زمان ايام ام نبيل وحودافون ( علي راي استاذنا جعان ) ، كان الواحد يروح يشتري الخط وهو وحظه بقي يطلعله اي رقم والسلام ، او لو يعرف حد في شركة المحمول ممكن انه ياخد رقم مميز ، وكانا نلاقي الناس اللي بيبيعوا الخطوط معلقين يفط ان عندهم ارقام مميزه كنوع من الدعايه
اما دلوقتي فالحال اتغير ، وبقي فيه تسعيره للارقام دي ، آل ايه بيقولك رقم فضي ورقم ذهبي ورقم ماسي ورقم مش عارف ايه .. وكل نوع وله تسعيره اقلها 10 جنيه للخط الفضي اللي فيه رقمين متشابهيين
ووصل سعر الخط اللي كل ارقامه متشابهه ( 0114444444) ل50 الف جنيه علي ماسمعت

مش بنقول شبكه جديده بنكهة خليجيه ، ماهي بدعة الارقام المميزه دي ما طلعتش علينا الا من الخليج في البلاد التي تجري من تحتها الآبار ، مثلا في السعودية لما عملوا مزاد علي الخطوط المميزه وصل سعر بعضها لمليون ريال ...ماهو اللي معاه قرش محيره يجيب حمام ويطيره
الحمد لله اننا في مصر لسه ماوصلناش للدرجه دي ، مع اني اعتقد انها آتيه لامحاله

الشركه الثالثه في موقها علي الانترنت بتعلن للعملاء المنتظرين يعني ، انهم ممكن يختاروا رقمهم بكل حريه وكله بفلوسه ، و الحمد لله مافيش اي تصنيفات طبقيه برجوازيه للعملاء ولا كوسه ولا وسايط ....اللي يدفع يشيل ، سواء بقي ابن امير ولا سواق حمير ، كله امام الشركه سواء واللي يلحق يشيل

اللي يضحك في الموضوع ، اني لما دخلت علي موقع الشركه علشان اشوف ايه الحكايه ، وقلت اشتريلي كام رقم كده من اللي هما اهم ينفعوا للزمن ... بس للاسف ، لقيت كل الخطوط الغاليه اللي فيها من 4 ارقام متشابهه وانت طالع ، كلها خلاص اتحجزت ، وماعادش الا كام رقم كده من بتوع الحساله وعامة الشعب اللي مافيهمش الا رقمين او تلاته بس متشابهين ( بـ 10 ، 50 جنيه )
للدرجه دي الاقبال كان رهيب علي الحجز ، دا الحجز بدأ من كام يوم

لما الشبكه تشتغل رسمي نفسي اتصل بصاحب الرقم ابو 50 الف جنيه واسأله كان عليه من ده بايه ...؟؟؟؟؟

بس ياخوفي لا يرد عليا ويقولي ......انتوا مالكوا ...... بفلوسي ياكلاب