TvQuran

٢٠١٤-٠٢-١٩

كارثة سانت كاترين


كارثة سانت كاترين






كارثة كلنا عشناها علي اعصابنا طول اليومين  اللي عرفنا فيهم اخبار المفقودين في وادي جبال بسانت كاترين

كلنا كنا بندعي من قلبنا ان ربنا ينجي ناس مانعرفهاش من محنة وقعوا فيها ويردهم لاهلهم سالمين


كعادة تويتر الناس كلها بدأت تدلي بدلوها ويقولوا رأيهم  فاللي بيحصل وفي طرق الانقاذ ومخاطر تسلق الجبال واهمال الشباب وتقاعس الدولة .....الخ ..وده مايطلق
عليه بلغة اهل تويتر "هري" 

من يومين وانا بتابع في صمت ماقلتش ولا كلمة ولا اي تعليق عن الموضوع لان6  سنين علي تويتر وخصوصا آخر سنتين علموني ان معظم الهري بينزل علي فاشوش وان نسبة الكلام الصحيح فيه بتبقي قليلة 
خصوصا لو فيه طرف متحامل علي طرف

خلال اليومين دول تمت المتاجرة بالحكاية والتهويل والافورة الغير معقولة 
الكل بيوظف الحكاية لمصلحته 

سواء نشطاء لقوا فرصتهم في شتيمة الحكومة والجيش وظروف البلد ...الخ





 او اخوان لقوا ضالتهم في  لوم الجيش واعتباره مقصر ومابيعملش حاجة غير مطاردتهم وحبسهم

علي شوية شماتة في الانقلابيين اللي اتبطروا علي الرئيس الصالح مرسي العياط


لاحظوا كمية الرتويت والفيفوريت

وطبعا مانسيوش يحاولوا ينسبوا الضحايا ليهم باي شكل كعادتهم 




مع شوية صعبانيات  عشان الصورة تبقي حلوة 


او صحف وبرامج توك شو ماصدقوا يلاقوا حاجة يولولواعليها ويمارسوا هوايتهم في التسخين 



الموضوع مافيش حد يختلف انه كارثة ومأساة بكل المقاييس وانه فيه تقصير واستهتار من النظام

وعلي الجانب الآخر

استهتار وتقصير من منظمي الرحلة اللي سمحوا للشباب بالهايكينج فالمنطقة دي فالوقت ده من السنة


ده احد منظمي الرحلة من اماكن تريب ,لاحظوا التاريخ يوم الاتنين بليل

واستهتار واهمال من الضحايا في عدم اتخاذ الاحتياطات اللازمة لرحلة زي دي 

دا غير اهمال زمايلهم في التبليغ عن فقدهم لاكتر من يوم( فقدوا السبت وتم الابلاغ عصر الاحد)



الدليل بلغ متأخر وبالتالي الخبر علي ما وصل محافظة جنوب سيناء ومنها للجيش كان خد يوم ونص

وافورتهم في المبالغة في تقصير الدولة والولولة علي تويتر والفيسبوك ان الجيش رافض يطلع طيارات انقاذ لان الضحايا مصريين
وانه اتقالهم التصريح كمان 10 ايام











وبعد ما اتضح كذب الرواية دي كانت انتشرت بسرعة البرق واتعمل عليها بنارات ومعلقات شجب واستنكار وولوله


ايوة فيه اهمال واهمال جسيم من الدولة فكل ما يتعلق بحياة المواطن المصري اللي تعتبر ارخص حاجة في البلد دي وايوه اما بيتعرف ان الضحايا مصريين بيبقي فيه تكاسل وبطء في الاستجابة 
المنظومة بايظة ولا انتوا ناسيين اننا ثورنا عليها مرتين في 3 سنين 
بس الامانة تقتضي ان اللي بينقل كلام يقول الحقيقة  لاننا اما بنكتشف كذبه بنفقد تعاطفنا معاه ومرة في مرة مش هانصدقه بالمرة
















الامانة تقتضي انك تقول ان المعلومات اول ما وصلت للجيش اتحرك بكل الامكانيات المتاحة ليه واللي يقدر يستخدمها

دي شهادة يقال انها لاحد المسعفين



احتمال كبير افراده كانوا غير مدربين بالشكل الكافي علي النوع ده من الازمات  ولكنهم اتحركوا وفي جو زي ده ومكان زي ده بافراد وطيارة وبمعاونة البدو اللي كان ليهم الدور الاكبر بحكم معرفتهم بطبيعة المكان 

نيجي لردود افعال مجموعة تانية كانت بتوضح موقف انساني من احط المواقف مشابه تماما "لايه اللي وداها هناك"
الناس دي ماعنديش اي كلام اوصفهم بيه الصراحة 







واخيرا انهاردة بعد ماتم انقاذ 4 شباب احياء والعثور علي ال4 جثث الخاصة بالضحايا منهم محمد رمضان الله يرحمه اللي كلنا كان عندنا امل انهم يلاقوه حي ولكن قدر الله وماشاء فعل 





ده بيان القوات المسلحة التفصيلي لكل اللي حصل







 

وهو متطابق في اجزاء كتير منه مع الشهادات الموجودة فوق وبالتالي انا مصدقاه

وأخيرا 

الموضوع كله زي ماقلت تم استغلاله من جانب كل الاطراف اسوأ استغلال
وفي الاخر هاتفضل مرارة الفراق وفقد الاحبة لاهل واصحاب المتوفين  وبس 
وبالباقي هاينسوهم كالعادة ويدوروا علي قضايا جديدة يتاجر بيها
الله يرحمهم ويتجاوز عن سيئاتهم ويغفر لهم ويصبر اهلهم وحبايبهم وكل اصدقائهم
































القرآن الكريم