TvQuran

٢٠٠٨-٠٦-٢٧

بين السما والارض


منذ حوالي سنتين في فندق قاعود بالاسكندريه تعطل بنا المصعد امام احد الادوار
كان يستقل المصعد معي انا وزوجي رجل معه زوجته وابنه علي ما يبدو ، يومها استطعت ان امتنع عن الضحك بصعوبه بالغه فلقد اخذ الولد والسيده في الصراخ والعويل

هانموت يا مامي

خليهم يفتحو الباب يامامي

انا مخنوق يابابي

ثم أخذت السيده تضرب الباب بيدها وهي تصرخ بهستيريا وتتنفس بصعوبه و تمسك بحنجرتها كالمخنوقه (تقريبا عندها فوبيا الاماكن المغلقة )

اما انا وزوجي فاستطعنا منع الضحك بصعوبه شديده وانا اهمس له
" فاكر فيلم بين السما والارض بتاع صلاح ابوسيف "

لم يكن الموضوع يستدعي كل هذه الضجه لان المصعد اساسا قد تعطل امام احد الادوار بمعني انه اذا ساءت الامور الي اقصي درجه فبضربة بلطه يمكن كسر الباب واخراجنا بكل سهوله
فلن
نحتاج ان نحطم احد الحوائط ولن نحتاج الي المطافي وبوليس النجده وفرق الانقاذ الدولية :) ،وفوق كل هذا فالفتره لم تتعدي العشر دقائق بعدها عاد المصعد للعمل وكأن شيئاً لم يكن


تذكرت هذا الموقف مؤخرا وانا اشاهد فيلم بين السماء والارض علي احدي الفضائيات

الفيلم الذي يعتبر من افضل مئة فيلم عربي بالقرن العشرين ،لمخرجه الرائع رائد الواقعيه صلاح ابوسيف ، يضع المجتمع بأكمله داخل مصعد معطل ما بين السماء والارض
و يعرض لنا
الفهلوه الاستهتار واللامبالاه ، ويصور لحظات الضعف الانساني ، وردود افعال النفس البشرية عند الاحساس بالخطر والتيقن من قرب الأجل ،وكيف يعتزم الجميع التوبة الصادقة والعمل الصالح والعزم على عدم العودة ثانيا نادمين علي اخطائهم التي ارتكبوها دون وازع من الضمير،ويأملون ان ينجيهم الله من محنتهم و يجزمون انهم قد تعلموا الدرس جيدا واستخلصوا العبر من حماقاتهم وأخطائهم الماضية
تمر عليهم الثواني ببطء وهم في انتظار مهندس الصيانه الغائب ، يموت احدهم ويولد آخر


و بعد ان يُفَرِجَ الله كربهم يتضح ان امامهم الكثير ليتعلموا من اخطاء الماضي


اعتقد واننا بعد مرور حوالي نصف قرن مازلنا نعاني من نفس السلبيات والعيوب التي احتواها مصعد صلاح ابوسيف المعطل ، وارانا جميع داخل نفس المصعد المعلق ما بين السماء والارض نحتاج الي مهندس الصيانه الذي اخشي ان ياتي بعد نفاذ الاكسوجين ووفاة الركاب


٢٠٠٨-٠٦-١٥

هي كده


حياتنا عامله زي فصول السنه ،مش ثابته علي حال...مره شتا و مره صيف و مره خريف
اما الربيع فده الفصل الوحيد اللي بيجي فجأة ومن غير مقدمات ، واحنا بس اللي ممكن نتحكم في ميعاده

ممكن في وسط زمهارير الشتا تلاقي يومين احسن من الربيع
وفي عز الحر نسمة برد تفوت علي القلب تقوله عواف

وعلي طول الايام ناس بتيجي و ناس بتروح ، ناس بتتلاقى و ناس بتتفرق

ناس بالها رايق وناس الهم ماليها ، ناس بتتولد و ناس بتموت

بتمر قدام عنينا
زي شريط سنيما ملون علي ابيض واسود - وساعات بتبقي سنيما صامته - مابيفضلناش منها غير ذكريات , شوية صور و طراطيش كلام


و اهي ماشيه


الدنيا كده ..الدنيا كده
على ده و ده

الدنيا كده

ناس تتهنى وناس تتمنى
وناس مفارقه كده زي حالنا
وادينا عايشين ، وادينا ماشين
ان كان راضين او مش راضين
و بايدينا ايه ؟ ح نعمل ايه ؟


الدنيا كده

ياسلام يادنيا ياسلام عليكي
العمر كله لعبه في ايديكي
بتجمعينا و توفقينا

وف عز ما احنا بتفرقينا

بتفرقينا يادنيا
وادينا ماشين وادينا عايشين
ان كان راضين او مش راضين
بايدينا ايه ؟ ح نعمل ايه ؟


الدنيا كده **








---------------------------------------------

علي الهامش

انهارده ولد صغير داخل يطلب تباشير
قلتله بيبقي في المكتبه يا حبيبي


اصلي عاوز تباشير طبي
برضو في المكتبه

طبي ...طبيييييييييييييييييييي
هاتلاقيه في المكتبه
فضل متنحلي شويه باستغراب وبعدين خد بعضه ومشي

:)))))
عشان مايبقاش كله ضرب ضرب ،قلت اضحكوا معايا


----------------------



** اغنبة سمير سعيد


٢٠٠٨-٠٦-٠٦

عزومه واعتراض

العزومه


اولا انا عزماكوا جميعا علي اكلة حمام محشي ، ياريت تقبلوا العزومه وتشرفوني في مطبخ بيلا مطبخنا
وتدوقوا الحمام وتقولولي رايكم

هو الموضوع بدأ لما نور ( فضفضات نور ) طلبت مني اني اكون ضيفه عندهم في المطبخ واعمل طبخه من صنع اديا ، وطبعا بما اني من عشاق الطبخ من زمان اوي ماترددتش ووافقت و علي طول عملت الحمام
وقررت اني اعزمكم عليه عشان تقولوا رايكم

البوست هاينزل انهارده ( الجمعه 6/6 ) ان شاء الله وده كويس لان البنات كلهم هايبقوا مشغولين في اللقاء بتاع خيخه ومش هايلحقوا يطبخوا فا تفاديا للخناقات الزوجيه -اللي ربنا يبعدها عننا يارب -هايرجعوا يلاقوا الاكل جاهز وكله تمام التمام :-)

يلا مش عاوزه لكاعه كلكم علي
هناك بس بلاش تتكربسوا فوق بعض الحمام كتير والحمد لله وانا شايله لكل واحد نصيبه
------------------------------------

الاعتراض

انهارده بافتح المدونه لقيت تعليق غريب جدا علي بوست فائض فقر

حد باسم اتحاد المدونين المصريين سايبلي تعليق بيقول فيه الاتي :


اتحادالمدونين المصريين يقول...

اخى الفاضل

اختى الفاضلة

عضو اتحاد المدونين المصريين

انصحك بالتواصل مع موضوع لحمايتك مما

قد يوقعك تحت طائلة القانون ونحن نعمل

لمصلحتك وحمايتك ..

فى انتظارك بمدونة الاتحاد ولك كل الشكر

نعمل من اجلك ولوجه الله
--------------
اختنا الفاضلة
اين شعار الاتحاد ؟

05/06/2008 10:03:00 ص


بصراحه يا جماعه ماخبيش عليكوا انا استغربت جدا ، قلت هو انا اشتركت معاهم دول امتي ، يمكن غلطوا ولا حاجه والتعليق ده كان رايح لحته تانيه واتحط هنا بالغلط

ماطولش عليكوا ، مشيت مع اللينك ورحت المدونه اللي باعته التعليق علي البلوج سبوت ( اصلي طول عمري اعرف ان المدونه التابعه للاتحاد ده موجوده علي مكتوب )
المهم رحت هناك وقعدت ادور يمين شمال علشان اشوف قايمة الاعضاء اللي بيقولوا عليها دي واشوف اذا كان اسمي مكتوب ولا ده تشابه اسماء

بس فعلا لقيت اسمي هناك وكمان بلينك المدونه
بصراحه يعني اتنرفزت جدا ، اشتركت امتي ان شاء الله ، ولا استمارة العضويه اللي محطوطه علي يمين المدونه هناك دي انا مليتها امتي بس ، يمكن نومني مغناطيسيا وخلوني مليتها وانا ماعرفش ، ولايمكن بتتملي تلقائي لاي حد يدخل هناك ؟؟؟ مش عارفه

كل اللي انا فاكراه ان الاستاذ حسن توفيق اللي المفروض الاعضاء ( اللي انا منهم يعني ) انتخبوه عشان يبقي ريسهم كان دخل هنا مره زمااااااان وساب تعليق ودعوه للاطلاع علي المدونه الخاصه بالمشروع بتاعهم وكانت علي مكتوب ، وزي اي حد بيدخل عندي ويسيب تعليق لازم اروح اشوف مدونته واقرا فيها شويه واسيب تعليق ( دلوقتي ماعتدش فاضيه اصلا اني اعمل كده او حتي ارد علي التعليقات اللي عندي هنا اعذروني )
وكل اللي قلته في التعليق هناك كلمتين مجامله لا قلت عاوزه اشترك ولا دياولوا

بس هو ده اللي حصل مش اكتر ولا اقل
حد بقي يقولي انا اشتركت امتي ولا قلت لحد انا عاوزه اشترك

رحت هناك وسبت التعليق ده


خمسة فضفضة يقول...

السلام عليكم ورحمة الله وبركاته

ايه يا جماعه التهريج ده
ممكن اعرف انا اشتركت معاكوا امتي ولا ابديت حتي استعداد للاشتراك

هو مش انتوا برضو عندكوا استمارة عضوية شايفاها علي جنب المدونه اهو

ممكن بقي حد يقولي انا مليت الاستماره دي امتي ولا وافقت علي العضويه معاكوا امتي

مش معني اننا زمان اوي سبت تعليق في المدونه اللي علي مكتوب يبقي خلاص كده قلتلكم تشركوني معاكوا

معلش ارجو انكوا تشطبوا اسمي من القايمه مش عاوزه انول الشرف ده ومش عاوزه حد يحميني ، هاتحموني من ايه
،الحامي هو الله

معلش انا اسفه ليكوا جدا بس العضويه ماتبقاش كده بالغصب


سلام

05 يونيو, 2008 08:52 م


ودي صورة التعليق كمان عشان لو اتمسح بالغلط ولا حاجه

ومن موقعي هذا احب اقول اني مش معاهم خااااالص

والله ولي التوفيق

:-)


٢٠٠٨-٠٦-٠٢

جديد في علي طول الحياه


شخصيات من زمن فات



ابراهيم ، سحر ، نجاة


ايه حكايتهم وعملوا ايه


وازاي حياة دكتور ابراهيم اتغيرت لما غير مكانه في الاتوبيس











اعرفوا التفاصيل في التدوينه الجديده




علي طول الحياة




القرآن الكريم