TvQuran

٢٠٠٧-٠٤-٠٣

تحيا اوضِة الفِيران .....تحيا االفَلَكَه


ايوه فعلا هي اوضِة الفِيران الشهيره اللي كلنا عارفينها
وهي برضو الفَلَكَه بتاعة زمان ايوه هي
تحيا اوضِة الفِيران .....و تحيا االفَلَكَه ده اللي اكتشفته بريطانيا مؤخرا

وزارة التعليم البريطانيه كانت زيها زي كل دول العالم لغت الضرب في المدارس ،وده بدوره ادي الي انفلات التلاميذ بطريقه مش معقوله بالظبط زي ما بيحصل عندنا الايام دي، كمان كان من حق الطلبه انهم يرفعوا قضايا تعويض علي المدرسه والمدرس اذا اتعرضوا للضرب
ده خلي زمام الطلبه البريطانين يفلت ومبقاش حد يعرف يكلمهم ، لدرجة انه طلع شعار بيقول
"لا أسمح لك بإملاء رغباتك علي"
الكلام ده طبعا موجه من التلاميذ للمدرسين ( ياربي هما بيتكلموا علي مصر )
المهم ان الوزاره قررت انها تعيد للمدرس هيبته وتسمحله بالضرب بس طبعا في حدود معقوله ، مش كده وبس ، صلاحيات المدرس مش جوا المدرسه بس ، لا كمان بره المدرسه ،في المولات التجاريه والاتوبيسات ، لدرجة ان المدرس من حقه انه يصادر التليفون المحمول بتاع الطالب لو شاف انه بيستخدمه استخدام غلط
كمان لقوا ان اوضِة الفِيران دي ليها تأثير السحر ، فسمحوا للاساتذه باحتجاز التلاميذ اثناء اليوم الدراسي او بعده لعدد غير محدد من الساعات وبدون ما اهلهم يوافقوا

ياريت بقي وزارة التعليم عندنا تتعظ من الكلام ده وتحاول انها تعيد النظر في موضوع الغاء الضرب من المدارس
طبعا انا مش مع الضرب لمجرد الضرب ، ولا الضرب بفترا ، لأ ....العصي فقط لمن عصي
زمان علي ايامنا ، كان المدرس ده بالنسبة لينا حاجه كبيره اوي ومكناش نقدر نقله بم ، وقبل الجيل بتعنا بفتره طويله كان المدرس هو دراكولا اللي كل التلاميذ بيترعبوا من مجرد ذكر اسمه ، وبالرغم من كده كان الطلبه بيطلع من بينهم عباقره ومبدعين ، والامثله علي كده كتير ، اما دلوقتي فالحال لا يسر عدو ولا حبيب

19 comments:

يا مراكبي يقول...

ولو إني بعيد ومش متابع لكن أنا متهيألي إن لسة الضرب موجود في مدارسنا .. لكن الإحترم للكبير سواء كان مدرس أو لأ بقى مشكلة شعب .. وشكلة أخلاق شعب

جوة المدرسة .. وبرة المدرسة

خمسة فضفضة يقول...

السلام عليكم ورحمة الله وبركاته

اهلا بحضرتك يا مراكبي
من فتره طويله ايام ما تولي حسين كامل بهاء الدين الوزاره اصدر قرارات بالغاء الضرب
وتم سحب العصيان من المدرسين وتحذيرهم بعدم الضرب ، واذا كان لسه بيحصل فا ده يعتبر انه غير قانوني ولو اي ولي امر بلغ النيابه المدرس بيتشرد

وده اللي خلي الطلبه يفلت عيارهم و المدارس بقت بزرميط ( وآسفه علي اللفظ بس هو الوحيد المناسب )

وعلي راي حضرتك عدم الاحترام للكبير بقت آفه بره وجوه المدرسه

اسعدني مرورك ونورت المدونه

mohand يقول...

السلام عليكم
بوستي اللي بعد بعد القادم بتكلم فيه بقي عن تأثير السينما في كل شئ في حياتنا
طبعا دي نقطه من اللي هناقشها
بس انتي لو تعرفي ان كل طفل مثلو الاعلي بهجت الاباصيري
ولا مرسي الزناتي
هتعرفي اننا خلاص بقينا في زمن صعب
وطبعا من العوامل التانيه
طغيان المدرسين واتجاههم للدروس الخصوصية
انتشار وتفشي الدراسه منازل
وكل الطلبه اللي اعرفهم في ثانوي حاليا بيعملو كده
و.............و..............

ربنا يهدينا ويهديهم
اخبار سعادتك ايه؟
مهند المصري
الباحث عن الحقيقة

خمسة فضفضة يقول...

السلام عليكم ورحمة الله وبركاته

اهلا وسهلا بيك يا مهند
الحمد لله انا كويسه وشكرا علي سؤالك
-------------

انت تعرف ان مدرسة المشاغبين دي كانت ممنوعه في التليفيزيون لفتره طويله جدا قبل ما يسمحوا بعرضها تاني وده لانهم اكتشفوا التاثير المدمر ليها علي التلاميذ اللي كانوا بيقلدوا الشله اياه وويعملوا كل اللي بيعملوه


اما بقي مصيبة الدروس الخصوصيه اللي خلت الطلبه يحسوا انهم امتلكوا الاساتذه بفلوسهم فدي محتاجه اكتر من بوست لمناقشتها

mohand يقول...

طيب ابقي زوري مدونتي واقرئي اخر موضوعاتي اتمني سماع رأيك

أحمد العربي يقول...

يا سلام الموضوع فعلا خطير بجد المدرسة هيبتها ضاعت ولو موضوع الفلكة واوضة الفيران هايرجع هيبة المعلم والتعليم وعلي الرغم من انها طريقة غير سليمة لكن نص العما ولا العما كلة ...يعني انا مرة شفت في مدرستي الثانوي 3 طلاب بيشربوا سجاير مع مدرس المجال الصناعي !!!!!
والله كانوا قاعدين في حجرة النشاط الصناعي ومنونين ع الاخر

BinO يقول...

طبعاً موضوع الغاء الضرب نهائياً في التربية ادي لنتائج عكسية
العقاب المعنوي المقنن افضل الحلول ويبدأ من سن معين
اما الضرب فهو للأطفال اللي ميستوعبوش العقاب المعنوي و برضه بحدود
حادث الضرب غير عادية
رغم ان في تلاميذ بيزودوها
بس النوع ده الأفضل عزله
بدلاً من تدمير نفسية جيل

غير معرف يقول...

بس تعرفي يا فضفضة

أنا أعتقد الكلام دة ينطبق على إبتدائي و إعدادي بس
لأن ف ثانوي بتبدأ مرحلة الإدراك و النضج عندنا و ساعتها لما المدرس يضرب بيبقى سلوك مش كويس على نفسية الولد بعدين
إنما أنا ف إعتقادي إن المدرس ف ثانوي هوا اللي بيفرض إحترامه على الطالب دا إذا كان هوا عايز كدة لكن قوليلي أي إحترام هيبقى للمدرس و هوا بيدي دروس خصوصية؟

الحل عندي إن التعليم يرجع بفلوس زي زمان و بالمجان للمتفوقين و يزودوا رواتب المدرسين الغلانين دول عشان ما نذطرهمش للدروس الخصوصية و بعدين نقول لية الطلبة ما بتحترمش أساتذتها؟

تحياتي

الدبور يقول...

نظرة موضوعيه للموضوع
ايام ما الضرب ماكان موجود كان في مدرسين مجرمين بتضرب علي الفاضي و علي المليان و
وكانت منهم مجموعه بتضرب اللي مش بياخد درس عندهم و ده احدي اشكال الارهاب اللي بيمارسوة علي الاطفال في السن اللي بيبتدي فيه تكوين شخصيته
اما الغاءوة فهو سبب انفلات في تصرفات التلاميذ مستغلين عدم قانونيه الضرب في المدراس
هو ممكن يكون الضرب موجود بس بحدود

تحياتي
الدبور

الراقـــص مع الذئـــــاب يقول...

جزاكي الله خيرا يا دكتورة
دا اللي نفسي فيه
هيبة المدرسة ترجع زي زمان
كانت صحيح معتقل نازي بس كان في التزام واحترام
هل كان ممكن طالب يسقط منطلونه ويلبس حلق في في نخيرة والا شفته....
هل كان ممكن واحد يطول شعره ويعمله ضفاير
والا يقدر يقول للمدرس بم؟؟
دلوقتي الطالب بيضرب المدرس ويروح يولع في بيته ويرفع عليه ضقية رد شرف كمان

عارفة يا دكتورة واكيد انتي لحقتي ايام فتحي سرور...الراجل دا كام ظابط التعليم في مصر بمعني الكلة

الكلام كتير اوي يتقال في الموضوع دا....وعاوز رغي كتير
جزاكي الله خيرا علي فتحة
وياريت نتعظ وحاجة تتغير بدل المهازل ديه
سلام

خمسة فضفضة يقول...

السلام عليكم ورحمة الله وبركاته

احمد العربي
هي دي آخرة التسيب الموجود اليومين دول في كل المدارس من اول الحضانة لحد الجامعه

اهلا بحضرتك نورتني واسعدني مرورك

خمسة فضفضة يقول...

السلام عليكم ورحمة الله وبركاته

BinO
اهلا بيك منور المدونة

صحيح نظريا ان العقاب المعنوي احسن
بس لما نيجي للتطبيق العملي هانلاقي ان الكلام ده مش نافع اصلا والطلبه عيرها فلت
قولي كده امثله علي العقاب المعنوي
مثلا حرمان من الحصه او رفد من المدرسه لمده محدده او حتي التذنيب علي الحيط ، كل الساليب دي اثبتت فشلها
انا مش مع الضرب بفترا اللي يخرج جيل معقد ، لا يكون بدرجات معقوله تؤدي الغرض المطلوب وبس مش اكتر
لان ممكن من كتر الضرب الطلبه جسمهم بينحس وميهمهمش من اي عقاب

اسعدني مرورك وتعليقك يا باشمهندس

خمسة فضفضة يقول...

السلام عليكم ورحمة الله وبركاته

محمد فوزي آل ربيع

اهلا بيك يا محمد
في رايي ان الضرب في ثانوي مهم قبل حتي الابتدائي والاعدادي
وزي ماانت قلت انا المدرس هو اللي بيفرض احترامه علي الطلبه
طيب نعمل ايه بقي لو كان في طلبه عيارها فالت ومش محترمه من اصله وفاكرين نفسهم خلاص كبروا حتي علي اهلهم والمدرسين بتوعهم
دول في رايي الضرب هو الحل معاهم وبرضو ارجع اقول مش ضرب بفترا ضرب في حدود المعقول ، لما الواحد من دول يعرف انه لو غلط ها يتهزأ وينضرب قدام زمايله اكيد ها يلايمها من الاول ويحترم نفسه

اما بقي موضوع الدراسه بفلوس ده ، ما تقلقش في اتجاه دلوقتي من الدوله انها تبدا تلغي مجانية التعليم بالتدريج لحد ما يبقيث زي زمان "( دي اللي سمعته من فتره )
وتحسين مرتب المدرسين اهم بقالهم فتره بتكلموا علي الكادر اللي ها ينزلوه علي مرتبات المدرسين علشان تزيد
بس بيني وبينكم كده حتي لو مرتب المدرس وصل لالف جنيه في الشهر استحاله انه يبطل دروس خصوصيه ممكن يكون بيدخله منها اكثر من 10000 جنيه شهريا ؟( علي فكره الرقم ده في القاهره والاسكندريه ممكن تضربه في 10 خصوصا لو كان مدرس ثانوي )
انا اعرف مدرسين واخدين اجازة بدون مرتب من المدارس الحكوميه علشان يتفرغوا للدروس الخصوصيه

من الآخر كده العمليه التعليميه في مصر عاوزه معجزه علشان ينصلح حالها
سواء بقي من جانب الطلبه او المدرسين

شكرا علي مرورك

خمسة فضفضة يقول...

السلام عليكم ورحمة الله وبركاته

الدبور
اهلا بحضرتك يا دكتور

هو ده اللي انا بقوله ، الضرب في حدود المعقول وكمان يكون فيه رقابة علي المدرسين علشان مايبقاش الموضوع علي حسب المزاج
المشكله الكبيره بقي ان كل واحد في البلد دي مش بيشتغل بما يرضي الله الا لو كان عليه رقيب ، يعني البلد كلها هاتبقي رقباء علي بعض، ومش هايفضل حد علشان يشتغل لان كل الناس شغلتها انها تراقب بعض ...ههههه
من الآخر يعني تجيبها كده تجيلها كده هي كده
بس الواحد بيتكلم علشان يفضفض ويشيل من علي قلبه بدل مايجراله حاجه

حسبي الله ونعم الوكيل في كل واحد ضميره مش هو الرقيب عليه و كل واحد مش فاكر ان مافيش اعلي من ربنا علشان يكون رقيب عليه

خمسة فضفضة يقول...

السلام عليكم ورحمة الله وبركاته

الراقص مع الذئاب

اهلا بيك يا باشمهندس

لا ابداماكانتش معتقل نازي ولا حاجه بس كان فيه رهبه وهيبه كده للمدرس
كنا بنحس ان المدرس ده قاعد فووووق اوي في برج عالي وانه حاجه كبيره اوي ما كناش نقدر نقوله بم ، كانت فيه هاله من الاحترام تحيط بالمدرس ولمدرسه ماكنش حد يقدر يغلط في مدرسيه ولا حتي في زمايله داخل المدسه لانه عارف ان المدرس مش ها يفوتهاله
اما بدات الزمم تخرب وطبعا المدرس بشر وزمته برضو قابله للخراب ، كل حاجه بدات تبوظ ، وبدأ الضرب بفترا وعلي اسباب تافهه وده اللي خلي الوزاره تلغي الضرب في المقام الاول لانها مش واثقه في زمة المدرسين بتوعها، تاني حاجه علشان النظريات اللي بتتكلم علي الصحه النفسيه للطلبه وكلام من ده يعني

المهم لما الضرب اتلغي بدأنا نشوف الاهوال داخل اسوار المدارس ، ومناظر طلبه مش رايحه مدرسه لا دي رايحه حته تانيه، مربين شعرهم ولابسين لبس غريب ، علي ايامي كانوا بيعدوا يشوفوا اظافرنا واللي يلاقول اظافره طويله شويه كان بيتعاقب ،

الطلبه دلوقتي بقوا شايلين سنج ومطاوي وغيرها من المهازل
عارف من سنتين عندنا هنا في مدرسة الصنايع الثانوي واحد موت واحد زميله في طابور الصباح بمطوه قرن غزال ويقال ان السبب كانت خناقه علي بنت

اما ايام فتحي سرور فعلا كانت المدرسه ممسوكه بايد من حديد
، لحقته بس الحمد لله اتغير وانا في اولي ثانوي ، يعني قبل امتحان الثانويه اللي كان علي ايامه دايما بيبقي مذبحه للطلبه،
بس بصراحه مستوي الطلبه زمان كان اعلي من دلوقتي يجي عشرميت مره واعتقد ان فيه جزء كبير من الفضل يرجع للضرب

شكرا علي مرورك
ونورتني

Great wishes يقول...

السلام عليكم و رحمه الله و بركاته ,,

قرأت ردود حضرتك على التعليقات و اللى وضحتى فيها ان الضرب اتمنع من المدارس نتيجه لخراب الضمائر و عدم ثقه الوزاره فى تصرفات الاساتذه .. و مش عارفه ايه اللى ممكن يرجع الضرب دلوقتى .. هل صلاح الضمائر مثلا و التقوى اللى انتشرت و عمت البلاد و العباد ... مع احتارمى الكامل لرأى حضرتك .. لكن لا اعتقد ابدا فى جدوى الضرب ..لا فى بريطانيا و غيرها بشكل عام و لا فى مصر بشكل خاص جدااا

بجد صعب قوى دلوقتى يكون فى مدرس يحتذى بيه او قدوة ..و بقول الكلام ده و انا لسه مودعه مقاعد الدراسه من عهد قريب و عارفه ان الامور بتنحدر من سئ لاسوء بسرعه الصاروخ

و على فكره مع ان الضرب اتمنع قانونا ..الا انه لسه معترف بيه .. و لسه فى ضرب ..اقصد فى تشريد .. انا ممكن اقولك مثلا على اخويا اللى كان بيرجع من المدرسه كل يوم و التانى بعين وارمه او ودن بتنزف او عياط متواصل

من ناس بيطلق عليهم مدرسين جزافا .. مش عاوزة اظلم الكويس فى السكه لكن الغالب الاعم فى المهنه مش اصحاب رسالات بل ناس مجموعهم رماهم على كليات التربيه او الاداب فى اشيك الاحوال و مع انعدام المواهب و الامكانيات كان التدريس هو النتيجه النهائيه

على فكره انا ليا اساتذه على علاقه طيبه جدا بيهم لغايه النهادره و فى بينا صداقه و اخوه كبيرة .. و عمره ماكان الحب ده بسبب العصا بتاعتهم ..
بل بسبب التسامح و التفهم و الحزم الملئ بالاحترام للنفس و للآخر .. الاستاذ القدوة اسطورة تانيه ..ممكن انسج عنها حكايات .. لكن مش سليط اللسان او طويل اليد او صاحب العقد النفسيه ..

انا اذكر انى زرت اخويا الصغير مره فى مدرسته الابتدائيه بناءا على طلب استاذه كثير الشكوى ... و بعد ما استمعت الى كل شكواه

مقدرتش امنع نفسى انى اقوله هو لما كان اخويا بياخد درس عند حضرتك ..كنت بمنع اى حد يعاقبه و دايما تقول هو محدش بيعمل مشاكل غيره و لا ايه ؟؟
و بعد ماساب الدرس بقى هو المتهم الاول عن اى شغب فى الفصل ... يعنى فى الحالتين الطالب بيشاغب ..لكن المشاكل اللى كانت بتتعالج بالرفق من اجل عيون الدرس الخصوصى اصبح حلها واجب بالضرب بعد ان امتنع اخويا عن حضور دروسه ..........!!!

اخيرا .. اسفه جداا لانفعالى فى الكتابه و اسفه اكتر .. فعلا انت لا تستطيع ان تملى
رغباتك عليا بعصاك ..و ربما تستطيع
ان تمتلكنى تماما بعقلك و سلكوك الطيب

و دمتى بخير

عالمى ازرق يقول...

طيب مين اللى ممكن يعرف المدرس حدود الضرب
يعنى فى حالات فعلا بتحتاج لضرب - وعلى فكره الضرب فى المدارس موجود - بس احيانا المدرس بيخلى الضرب وسيله عقابه الاولى لانها اسهلهم
مشكله الاحترام بتكمن فى شخصيه وتعامل المدرس
يعنى انا كنت بحترم كتير مدرسين ولاحد فيهم بيستخدم الضرب كعقاب
المدرس فقد احترامه اما فقد دوره كقدوه
افتكر وانا فى ثانوى كان عندنا مدرسه بتحكيلنا كانت بتغش ازاى وهى فى الامتحانات
وفيه امثله من دى كتير
اللى بيستخدم وسيله العقاب لاسباب شخصيه زى الدروس وغيرها
صدقينى الاحترام مش بينبع من وسيله ردع تأديبي قد ما بتفرضه قوه شخصيه المدرس واحترامه لنفسه قبل اى شيء
معلش على الرد المتأخر

خمسة فضفضة يقول...

وعليكم السلام ورحمة الله وبركاته

Great wishes
اهلا وسهلا بكي

في جزء كبير من كلامك انا مقتنعه بيه ، وان فعلا في مدرسين بيفتروا في الضرب

بس المشكله ان لما تم الغاء الضرب علي الاقل قانونا او من وجهة نظر الوزاره ، واصبح اي مدرس حتي لو يلمس تلميذ عنده ممكن ان يتعرض للسحل والتشريد ، ومن هنا نمي داخل الطلبه احساس انهم ممكن يعملوا اي حاجه وما حدش يقدر يكلمهم لانهم بمجرد شكوي بسيطه حتي لو كانت كدب وافتري ممكن يشردوا المدرس

انا زي ما حضرتك قريتي في الردود ، مش عاروزه يعني الضرب يبقي عمال علي بطال ولا يبقي ضرب بافتري وضرب موت

لا فقط عند اللزوم وفي اضيق الحدود وبدرجه كافيه كعقاب ، حتي علي الاقل يعرف الطالب انه لو اخطأ هايتعاقب ، مش يبقي المدرس واقف عاجز قدام الطلبه حتي وهما غلطانين

عندنا هنا فيه طلبه بتروح المدرسه بسنج ومطاوي والمدرسين ماعدوش قادرين عليهم لان ماعدش فيه تربيه ولا عقاب فعال للطفل لا في بيته ولا في مدرسته ، كل طالب بيعمل اللي هوه عاوزه
لو في اساس سليم من الاول ما كنش دا بقي الحال
وطبعا لا انكر ان فيه مدرسين ضمايرهم ماتت وبيعاملوا الطلبة بناء علي الدروس الخصوصيه
بس برضو في ناس لسه عندها ضمير

انا فقط اطلب ان تكون :

العصا لمن عصي
ومش عمال علي بطال
وان يكون هناك بعض الرقابه علي تطبيق ده في المدارس

تحياتي

خمسة فضفضة يقول...

السلام عليكم ورحمة الله وبركاته

اهلا وسهلا عالمي الازرق في اي وقت

صحيح قوة شخصية المدرس ليها عامل كبير في احترام الطلبة لمدرسهم ، احنا زمان كنا بنموت في جلدنا من مجرد نظرة عين ولا شخطه
ما ينفعش خالص ان المدرس يتباسط مع الطلبه لدرجة انه يقولهم انه كان بيغش ايام المدرسه ما هو ده اكيد هايكون له دور كبير في سقوط المدرس من نظرهم

بس احيانا في طلبه ما بتجيش الا بالضرب ، دول بقي اللي انا بطلب انهم فعلا يتعاقبوا بالضرب
ويكون ضمير المدرس هو الرقيب عليه ، هاتقوليلي ان الضماير ماتت قدام التكالب علي جمع فلوس الدروس الخصوصيه ، هاقولك كلام صحيح ونسبه مش قليله فعلا من المدرسين كده ، بس لسه في نسبة تانيه اكبر بكتير عندها جزء من الضمير ، والوزاره بدورها تحط برضو مراقبين للموضوع ده ، ويكون فيه مكان لتلقي شكاوي الطلبه عن الضرب اللي بافتري او غير المبرر بس بشرط يكون تحقيق عادل ومافيش فيه ظلم لكلا الطرفين
عارفه ان الكلام ده وردي شويه بس اهو الواحد بيتمي ان ده يتحقق


وزي ماقلت في رد سابق

الواحد بيتكلم علشان يفضفض ويشيل من علي قلبه بدل مايجراله حاجه

حسبي الله ونعم الوكيل في كل واحد ضميره مش هو الرقيب عليه و كل واحد مش فاكر ان مافيش اعلي من ربنا علشان يكون رقيب عليه


تحياتي

القرآن الكريم