2009-06-13

اللهم لا تؤاخذنا بمافعل السفهاء منا / تحديث


تحديث

مش قلتلكوا اكيد هايضحوا بالكومبارس عشان الابطال يعيشوا

واخيرا تم تحديد ادوار البطوله واليكم التفاصيل في حالة توافر تطعيم ضد انفلونزا الخنازير

هنا :


التطعيم ضد أنفلونزا الخنازير للقيادات فقط

يعني اهم حاجه القيادات والشعب في ستين سلامه بقي يصرف نفسه بنفسه ، هما كمان هايشيلوا همه ولا يحاولوا يحافظوا عليه
دا حنا حتي كسرنا ال70 مليون وداخلين علي التمانين بقلب جامد واهو حتي يبقي علاج فعال للقنبلة السكانيه الموقوته


---------------------------------------------------------

فيه تصريح لمنظمة الصحه العالميه بيقول ان "الدول التي استطاعت مواجهة «سارس» و «أنفلونزا الطيور»، تبدو أكثر قدرة على مواجـهة أنفلونزا «أتـش1 أن1»."

طيب تفتكروا مصر قدرت تواجه انفلونزا الطيور ولا بقينا احنا وهي زي الاخوات و بقي زيها زي البلهارسيا وفيروس سي وكل الامراض الجميله اللي متوطنه مصر


يبقي هاتيجي علي انفلونزا الخنازير يعني


ما هو احنا كده طول عمرنا شعب مضياف وبيحب يرحب باي حد غريب وياخده بالاحضان وبوسه من هنا وبوسه من هنا


وبالتالي ماعتقدش ان حكومتنا الموقره هاتقدر تتصدي لانتشار المرض ، وممكن جدا لا قدر الله ينتشر بصوره اكبر من اي بلد تانيه ( ولسه انفلونزا الطيور خير شاهد علي كلامي )


ارجع واقول ربنا يخيب ظني ولاوني ومن اول ما بدأت اخبار انفلونزا «أتش1 أن1» الشهيره بانفلونزا الخنازير وانتشرت الاخبار عن اجراءات الحجر الصحي وحذر التجول وعزل البلاد اللي فيها الوباء وانا حاسه ان الوباء ده لو جه مصر هايحصلنا زي ماحصل في فيلم Out Break بتاع داستن هوفان ومورجان فريمان فاكرينه؟؟


الفيلم اللي فيه قرد جاي علي مركب من افريقيا نقل فيروس قاتل لمدينه امريكيه وعشان يتخلصوا من الخطر قررت الاداره الامريكيه انها تضرب البلد دي بالقنابل الحارقه وتخلص بدل وجع الدماغ بالظبط زي ما اتعملت مع الوباء اول ظهوره في افريقيا في الستينات


تخيلوا الفيلم اللي انتاج سنة 1995 بيعكس صوره مشابهه الي حد كبير جدا عن الوضع الحالي ، نفس الاحداث تقريبا :

فيروس قاتل كان موجود في فتره ماضيه ( نفس الفيروس كان موجود سنة 1918 وقضي علي حياة ضعف العدد اللي مات في الحرب العالمية الاولي ،ورجع تاني مرتين سنة 57 وسنة 1968 )


كمون لفتره طويله تخيل الجميع معاه ان الخطر زال ثم عوده وبقوه للقضاء علي عدد اكبرمن الاول


انتقال الوباء عبر الحدود


عائل وسيط من الحيوانات ( في الفيلم كان القرد دلوقتي الخنازير وسبحان الله الاتنين تشريحهم وصفاتهم قريبه جدا من الانسان )


في الفيلم كانوا قادرين بمنتهي البساطه انهم ينتجوا لقاح مضاد للمرض بس اختاروا الحل الاسهل وهو ضرب المدينه بالقنابل الحارقه ، وكان فيه شبهة تواطء ومش عاوزين يساعدوا باي معلومات متوفره عندهم ، حاليا برضو فيه اشاعات ان المرض ده من انتاج معامل امريكيه بتعمل علي تطوير وانتاج اسلحه بيلوجيه ،وتردد شائعات بتقول انه ممكن جدا انتاج مصل للمرض ان ماكانش فعلا موجود بس مستنيين يخلصوا مخزون التاميفلو


ومن المؤكد طبعا زي كل مره ان كفة المصالح الاقتصاديه هي اللي هاتكسب خصوصا ان الشركه المالكه لحقوق الملكيه للتاميفلو هي شركة جيلاد اللي بيرأسها رامسفيلد وزير الدفاع السابق لامريكا ، وهي الشركة اللي أعطت حقوق تسويق وبيع التاميفلو لشركة روش السويسرية

وكمان تأكيدات كتير من المتخصصين ان الفيروس ده استحاله يكون ظهر كده لوحده من غير تدخل البشر ( اقروا التقارير اللي في اخر البوست فيها تفاصيل مرعبه ) وانهم عملوا كده عشان يصرفوا مخزون التاميفلو ويطلعوا من الازمة الاقتصادية العنيفه اللي هما فيها


اما اكتر حاجه قلقاني هي ان الاستخدام المفرط والغير مقنن للتاميفلو ممكن يسبب نتائج عكسيه والفيروس يتحور ويبقي حتي التاميفلو زي قلته ،ودي فعلا الحاجه اللي انا خايفه منها جدا لان الناس هنا في مصر بتتعامل مع الادويه باستهتار كبير وخصوصا المضادات الحيويه اللي بيعتبروها زي البونبوني وده اللي اتسبب في ان عدد كبير جدا من الادويه ماعدش فعال زي الاول


في آخر Out Break وفي آخر اي فيلم خصوصا لو هوليوودي لازم ينجوا الابطال حتي لو اصيبوا بالف طلقه ولو جالهم الف مرض قاتل ،

في الحقيقه احنا مش ابطال الفيلم وماننفعش ابطال اي فيلم ، احنا بالكتير اوي ممكن نكون الكومبارس اللي بيموتوا عشان الابطال تعيش


فهل ياتري هايضحوا بينا عشان الابطال يعيشوا ؟؟؟ واختيار الابطال هايكون علي اي اساس ؟؟

وهل ياتري ممكن نوصل لمرحلة يضربونا بيها بالقنابل عشان يقضوا علي الوباء اللي اتفشي فينا ويحموا العالم من شرورنا ؟؟؟


ربنا يستر والحكومه المره دي تخيب ظننا وتقدر تتعامل مع الموضوع باسلوب ناجح وتحاول تتخلي ولو مره واحده عن اسلوبها المعهود من العك والكروته والاستسهال وكله تمام يا فندم


ياريت تقروا المقال ده للاستاذ محمد المخزنجي بس مش عاوزه حد يقلل ولا يصاب باي هلع ولاخوف من اي حاجه خدوا الامور عاااااااااااادشي كلنا في الاول والاخر هانموت دا حتي كده ممكن تتكتبلنا الشهاده ونخش الجنه


إنفلونزا المحافظين الجُدُد..والقدامى أيضا


ولو لسه فيكوا نفس ممكن تقروا التحقيق اللي عمله موقع ايلاف علي جزئين


فيروس هجين وفساد شركات تصنيع الأدوية وأزمة مالية

تحالف انغلو –اميركي تسبب بنشر إنفلونزا المكسيك


اللهم ارفع مقتك وغضبك عنا


اللهم عافنا واعفو عنا


اللهم لا تؤاخذنا بمافعل السفهاء منا





20 comments:

محمد عبد الغفار يقول...

هى موته ولا أكتر

MaNoOoSh يقول...

والله يا خوفي من كدة
الفيرس شكله هيعجبه الحال ومش هيمشي من هنا وهيغني انا مبسوط كدة.. انا مرتاح كدة

عمرو يقول...

طيب و بعدين ؟؟
يعنى أيه العمل ؟؟
أكيد طبعا اللى يعرف ظروف البيئه المصريه و سلوكيات المصريين حيدرك طبعا مدى خطورة الموقف لو تمكن الفيروس لا قدر الله ..
ربنا يستر و بأمن على دعائك من كل قلبى ..

نعكشة يقول...

اية كمية التفاؤل الرهيبة دية


ربنا يعافينا

هما هيعملوا اللي عليهم

واحنا نعمل اللي علينا
مفرووض يوعوا الناس بطريقة متهولش الامور

خير خير

قل لن يصيبنا إلا ما كتبه الله لنا

سلام عليكِ

أخـــ مسلمة ـــت يقول...

في مصر
ان لم تمت غرقا أو حرقا أو بانفلونزا الطيور او السرطان او فيروس سي , هتموت من حرقة الدم

ماعتقدش الناس بقي بيفرق معاها مرض أو موت
العيشة اللي عايشينها أصلا الموت أفضل منها

أما عن الحكومة
ايدك منها والأرض

D:

أحمد سعيد بسيوني يقول...

قل لن يصبنا إلا ما كتب الله لنا

تعددت الأسباب والموت واحد

Ahmed Talk يقول...

ربنا يستر علينا

ستيته حسب الله الحمش يقول...

بلد تعاني فساد مستشري في كافة القطاعات
بلد اللي فيها يا ناس سيئة تحب الأذية
او ناس سلبية لا تجيد الا مصمصة الشفاه
او ناس شاطرة تديها نقد وهي بتشد الجوزة في الغرزة

في نفس الوقت احنا خير امة ومصر بها خير اجناد الأرض وان شاء الله ها يخرج منها اللي ها يحرروا فلسطين ويستأصلوا شأفة اليهود

لما تحطي المعادلتين على بعض تعرفي ان فيه حاجة

ونسأل الله ان يرحمنا بدعوة رجل صالح تُرحم الأمة بدعائه

تحياتي

يا مراكبي يقول...

نظرية المؤامرة هنا غير مستبعدة تماما .. ومش هنا وبس . ده في كل الأمراض اللي من النوع ده زي انفلوانزا الطيور كمان

مش مستبعد أبدا ان الفيروس ده صناعة امريكية وانهم طوروه عشان تحقيق مبيعات عالية للدواء

زي بالظبط شركات البرمجيات العالمية اللي بتنشر الفيروسات الكومبيوترية عشان تبيع الأنتي فايرس

نكهة مغربية يقول...

ربنا يستر علينا
و يحفظ كل الدول الاسلامية و العربية من كل شر

راسبوتين يقول...

والله ما بتفرق معانا أنفلونزا طيور أنفلونزا خنازير
الخوف كله من انفلونزا الفساد واللى اصبحت مرض مستوطن ومالوش مصل
شكرا أرجو قبول مرورى

nody يقول...

ايه ده
يعنى هما ممكن يضحوا بالشعب علشان الحكومه تعيش؟
طب لما يضحوا بالشعب
يجيبوا منين شعب تانى يستعبطوه ؟؟؟

beautiful mind يقول...

ابتسم انت في مصر

يعني ببساطه ارخص حاجه ممكن تلاقيها في مصر هي ارواح الناس الغلابه

وزي ما قال اخونا محمد عبد الغفار

هي موته ولا اكتر

تقبلي تحياتي

حلم بيعافر يقول...

هتعدى هتعدى
وهى دى يعنى اول مرة
متخافوش والله
المصرى بيهضم اى حاجة
اللى يخلينا بناكل فول من يوم ماتولدنا
مش هنقدر نستحمل فيروس زى ده؟

جريدة الصباح العربي يقول...

انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التالي
arabicsabah@yahoo.com
كما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء ... تابعونا على جروب الجريدة
http://www.facebook.com/group.php?gid=78080770039
انتظرونا قريباً في الاسواق
تحياتي
الصباح العربي

د على الزيات يقول...

بخبرتى المحدودة كطبيب بيطرى سابق اقدر اقول ان موضوع انفلونزا الخنازير موضوع قديم ومبالغ فيه والموضوع كله مصالح احنا درسنا انفلونزا الطيور والخنازير وايضا الخيول من سنين قبل كده بالاضافة الى اننا لو فكرنا فى عدد المرضى وانتشار المرض هانعرف
انه فيروس ضعيف ولو فكرنا ان عقار علاج انفلونزا الطيور هو نفسه عقار علاج انفلونزا الخنازير هانعرف انهم متشابهين من ناحية التركيب يا جماعة شركة العلاج هى شركة رامسفيلد ال صدعنا بحديثه عن مختبرات العراق المحمولة جوا وبحرا وبرا علشان يبرر نهبه ... الموضوع مش مؤامرة لكنه عملية نصب محكمة ونفس الكلام ال قالوه عن انفلونزا الطيور وخلانا دمرنا صناعة الدواجن فى مصر هو نفس الكلام ال قالوه عن انفلونزا الخنازير وبكره هانسمع عن انفلونزا الخيول Equine flu وساعتها نقضى على سلالة الخيول العربية الاصيلة ... لازم نفكر وندرس قبل ما ناخذ اى اجراء ... وما تخافوش الشمس عندنا مرعبة تسيح الحديد مش فيروس بيموت بغسل الايدى بالصابون

ولكم خالص تحياتى
دعلى الزيات

الفقيرة إلى الله أم البنات يقول...

اللهم حوالينا لا علينا
لا ندرى اين المفر
اللهم انا نلوذ بك من ما قدرته علينا ونلجأ لرحمتك من عقابك

وميض ابتسامة يقول...

المدهش فى الموضوع ان الاجراءات الوقائيةالمطروحة لن تقى شعبنا الطيب الحبيب من شبح التعرض لمثل هذا الوباء حيث ان درجة الوعى الصحى لدينا تكاد تكون معدومة .. فما زلنا نركب مجبرين المواصلات العامة ونصلى فى الجوامع ونسخر من مستخدمى الماسك .. ونعطس فى وجوه الآخرين وننتظر ان نسمع يرحمكم الله ...
وربنا يستر علينا

مصطفي فؤاد رجب يقول...

لازم يضحوا بالشعب عشان الجنين ( قيادات الشعب و الوزراء و الرئيس طبعا )يعيش وأحنا عادي مش فارقه عندهم عيشين زي ما ميتين ربنا يرحمنا برحمته

دكتور مهندس جمال الشربينى يقول...

عزيزتى الصيدلانية من أرض المحروسة
رمضان كريم
قلمك رائع وفكر بعيد كل البعد عن فكر الفقر ولقد أقتبست مقالك للمناقشة فى منتدى أبناء مصر
WWW.MISRSONS.COM
دكتور مهندس جمال الشربينى
خبير تحليل المشاكل من جذورها
ومفكرا ولكننى فقير لله عز وجل وغنى به سبحانه وتعالى

القرآن الكريم