2008-01-10

رز بلبن وأشياء اخري

كل سنة والجميع طيبين سنة هجرية سعيده عليكم
زي ما ماما ربنا يديها الصحه عودتنا دايما اول يوم في السنه الجديده لازم ناكل رز بلبن علشان تبقي سنه بيضه بلون اللبن ، عملته امبارح اول مارجعت من الصيدليه ،السنه دي قررت اني اعمل كميه و ادوق كل صحابنا ،
و يارب مايقطعهالنا عاده ويجعل كل ايامنا لبن
، السنة الجديدة بدأت والخيرجه معاها الدنيا مابطلتش مطره امبارح ليل ونهار

**اول طوبة انهارده وبدأت ايام البرد الحقيقي " برد طوبة يخلي الصبية كركوبة "
افتكرت اغنية عفاف راضي روح يا برد طوبة

روح يا برد طوبة للدبة الدبدوبة
و ابعد عن حبيبي و كل اللي في سنه
امشي امشي عنه روح للدبة نَااانو
دي تخيييييييييييييينة وتستحمل عنه

يا عيني علي التخان هما هايستحملوا ايه ولا ايه بس؟؟؟؟

** حبيت اظبط نتيجة الطقس في
ال igoogle
حاجه غريبه اوي لفتت نظري ضمن البلاد الموجوده في الطقس لقيتهم مش جايبين المنصوره وطنطا ....عادي ، بس الغريب انهم فاكرين وادي النطرون والفرارفره !!! للدرجه دي الشهره عالميه ووصلت جوجول كمان

**جبت لابن اخويا سمسم اللي لسه ماكملش 3 سنين عربيه لعبه جميله جدا مارضيش ياخدها وقالي لا مش عاوز عربيه انا عاوز تكتك
حد يعرف حته بتبيع تكاتك لعبه
:-D

** بقلب فالمدونات كالعاده ، مدونه تشيلني ومدونه تحطني ، لينك يوديني ولينك يجيبني ، لقيت ناس عاملين مسابقه لافشخ حد بيستخدم النت ، بصراحه في الاول ماعرفتش يعني ايه افشخ ، بس فهمت انها حاجه مش ولابد ، المهم ان المدونه هنا الحمد لله مش من ضمن المدونات اللي كانت مترشحه للجايزه

** مش مصدقه اننا بقينا 10 يناير ، ياخبر ابيض علي الايام اللي بتجري جري ،مش بيلحق اليوم يبدأ وفجأه تلاقي العشا بتأذن واليوم خلاص ، سرعة تعاقب الايام والسنين من علامات اقتراب الساعه ، يوم ورا يوم وسنة ورا سنة عمرنا بيتسرسب من بين ادينا واحنا مش حاسين ،
اللهم أرزقنا قبل الموت توبة وعند الموت شهادة وبعد الموت جنة ونعيما


ماتنسوش صيام التاسع والعاشر من محرم ، الخميس والجمعه الجايين ان شاءالله


83 comments:

Desert cat يقول...

كل سنة وحضرتك طيبة يا دكتورة
وربنا يديم عاداتك
اختى الكبية لما كانت فى مصر كانت معودة ولادها برضه اول كل سنة هجرية تعمل لهم رز بلبن وافتكرتها اول لما قريت موضوعك
اما ماما اللى يبارك لى فيها مأكلانى إمبارح سبانخ شوفتى فرق العادات
بالنسبة للمطر انا بموت فى الجو ده وبحب جدا امشى تحت المطر ... من شوية كان عندى دكتور بيكتب سى فى وبيقولى الجو برد اوى حاجه لا تطاق قولت له سمحت مش تقول كدا انا بموت فى الجو ده وبحب اوى المشى تحت المطر ... قال طيب لما يجى لك برد ده عنوان الصيدلية بتاعتى ..
كل سنة وحضرتك واسرتك بالف خير

مصطفى السيد سمير يقول...

كل سنة وانتي والجميع طيبين

دنيتى الجميلة يقول...

كل سنة وانتى طيبة يا حبيبى حلوة اوى فكرة الارز باللبن وهتكون ان شاء الله عادتى مع اولادى علشان انا بحب الذكريات الجميلة والتفائل ادام الله عليكى نعمة الوالدة واعطاها الله الصحة والعافية

الطائر الحزين يقول...

اعزك الله
كل عام وانت بخير

المنصورة وطنطا مش على الخريطة

ما احنا حظنا دوما كدة


تحياتى

لماضة يقول...

كل سنه وحضرتك طيبه يا دكتوره فضفضه
بس اول مره اعرف حكاية الرز بلبن دى احنا متعودين نعمل فطير
:)
وكمان smsm عنده حق عربيات ايه الى كانو بيضحككوا علينا بيها هههههه
انا هقلب السوق على تكتك واجيبهوله ان شاء الله

من القلب يقول...

كل سنة و انتى طيبة
و سنة سعيدة عليكى يا رب وابيض من الرز بلبن

فعلا الناس التخان بتستحمل البرد اكتر بس فى الصيف بقى الله يكون فى عونهم

اظن جوجل بتهتم اكتر باماكن السياحة

بالنسبة للتكتك هاتى عربية و موتسيكل و خدى بادى العربية و ركبيه على الموتسيكل :))

طيب مش كنتى تقولى على مكان المسابقة علشان نتفرج

سرعت الوقت من علامات يوم القيامة .. ربنا يرحمنا يا رب

نهياوية يقول...

كل عام وانت بخير والي الله اقرب
ربنا يخلي ماماتك يارب
طب مش تعزمينا علي الارز باللبن
انا بمووووووت فيه

عصفور المدينة يقول...

كل عام وأنت بخير
بارك الله فيك وما تزعليش من جوجل أنا مش زعلان منهم
:)


أول أمس أحضرت مفكراتي الصغيرة لل‘وام التسع الماضية وجلست أقلب فيها ورأيت أحداثا مر عليها أربع سنوات كنت أظنها العام الماضي

مبرمج حر يقول...

الله على أغنية عفاف راضى .. انا بحب الاغنية دى جدا .. اول مرة اسمعها كان فى اخر امتحان ليا فى الكلية .. وكان فى نص شهر 6 مش فى طوبة .. وكنت جبت اخرى ووصلت لاقصى درجات الاكتئاب ومخنوق خنقة .. بس لما سمعتها فى الراديو قعدت اضحك ولقيت نفسى مبسوط .. أغنية حلوة

كل سنة وانتِ طيبة وبخير , ودايما بتعملى رز بلبن كل أول سنة

بثينــــــة يقول...

كل سنة وانت طيبة يا دكتورة
حلوة حكاية الرز بلبن دى
السنة الجاية باة
:)
معلش سؤال بس
امال العاشوراء بتتعمل امتى؟
ياريت تقوليلى علشان اختك ضايعة فى الحاجات دى
يعنى فقدت احساسى بالمواسم من بعد وفاة والدتى الله يرحمها
ولولا فكرونى كنت مش هاعمل فتة فى العيد
:)

كل سنة وانت طيبة تانى

عصفور المدينة يقول...

دكتورة أنا جيت تاني وكنت خايف مبرمج حر يسبقني بالتعليق ده
كتبت في جوجل سيرش
weather tanta egypt

لقيت إنه وضع
Add to iGoogle
وبالتالي تقدري تضيفيها رغم إنها مش موجودة في المدن

حاولت المنصورة مش عرفت يظهر مش موجودة

خمسة فضفضة يقول...

السلام عليكم ورحمة الله وبركاته

قطة الصحراء

كل سنة وانت طيبه

هههههههه ، يعني مامتك بدأت لكم السنه بغوامق ، ليه بس كده

انا بقي مش بحب الشتا خالص بس بحب المطر في حد ذاته
يلا اهي كلها ايام ربنا

ربنا يسعد ايام يا قطه ويبعد عنك نزلات البرد وسنينها


نورتيني

خمسة فضفضة يقول...

السلام عليكم ورحمة الله وبركاته

مصطفي سمير

وانت طيب والي الله اقرب وعلي طاعته ادوم

خمسة فضفضة يقول...

السلام عليكم ورحمة الله وبركاته

دنيتي الجميله

اللهم آمين

وانت طيبه يا قمر وباذن الله تكون سنه سعيده عليكي

ويارب يجعل الايام كلها ذكريات سعيده وتفاؤل وامل

نورتيني

خمسة فضفضة يقول...

السلام عليكم ورحمة الله وبركاته

الطائر الحزين
كل سنة وانت طيب

هما شالوهم من علي الخريطه ؟؟؟

طيب هانعمل ايه بقي قليل البخت

منور يا استاذنا

خمسة فضفضة يقول...

السلام عليكم ورحمة الله وبركاته

لماااضه
اهلا اهلا ايه النور اللي مالي الدنيا ده

كل سنة وانت طيبه يا عسوله
وايه بقي حكاية الفطير دي
فطير بسمنه وسكر ولا فطير بلبن ولا مشلتت
:-D
والله كانت عربيه روعه دي بنزين تانكر وبرضو ماعجبيتوش
مستنياكي تجيبي التكتك الواد عيد ميلاده قرب


سلام

خمسة فضفضة يقول...

السلام عليكم ورحمة الله وبركاته

من القلب

وعليكي يا قمر وان شاء الله تحققي كل امانيكي فيها

ياعيني علينا يا تخان حلوين في الشتا بس بنسيح في الصيف
، وادي النطرون والفرافره مش اماكن سياحيه اوي للدرجه دي

حلوه فكرة تصنيع التكتك دي ، يمكن اجربها

بالنسبة للمسابقه اصل المدونه اللي عهاملاها بصراحه كانت فيها الفاظ مش ولابد ومارضيتش اعملها اعلان واذي عنيكي بالكلام البذئ ده

ربنا يرحمنا ويرزقنا حسن الخاتمه

نورتيني

خمسة فضفضة يقول...

السلام عليكم ورحمة الله وبركاته

وانت طيبه والي الله اقرب وعلي طاعته ادوم

اللهم آمين ويخليكي كل الامهات والابهات لولادهم

ايه ده هو انت ماخاتيش طبق دا في التلاجه علي ايدك اليمين وانتي داخله المدونه
مين اللي خلصه؟؟؟

DR.HAMAS يقول...

ربنا يكرمك أختنا الكريمة

كل عام و أنتى إلى الله أقرب

و على طاعته أدوم

الصراحة مبحبش الرز بلبن

لو لبن لوحده ماشى

عاوزة تمزجيه بحاجة أوك

ممكن شاى بلبن
ممكن كاكاو بلبن
ممكن قهوة باللبن

طبعا هتقوليلى ايه دخلك انت؟
و انا قلت انى عملتهولك

ماشى يا دكتورة ماشى

على العموم هعتبر نفسى كلت و شبعت و خلصت

يلا مش مهم

أما بالنسبة لخواطرك الجميلة

اولها عن البرد و المطر و اللذى منه
و طوبة و زلطة و هكذا

فبصراحة انا بكره الجو ده جدا
ربنا يعديه على خير

أما التخان طبعا
فهما اللى مش هيحسوا بالبرد
محوشين دهون تحت الجلد مدفيهم

مش هنحسدهم بقة
لحسن تعليقك بيقول انك منهم
يلا مش معضلة

الموضوعات اللى فى الوسط بتاعت التكاتك مليش تعليق عليها طبعا

أما حكاية العمر بيتسرسب

فده شئ حقيقى
و مقلق جدا


و شكرا لتذكيرك لينا بصوم التاسع و العاشر

ربنا يتقبل مننا جميعا يا رب


جزاكم الله خيرا



د.حمـــــــاس

خمسة فضفضة يقول...

السلام عليكم ورحمة الله وبركاته

نهياويه
معلش نسيت اكتب الاسم ، ردي عليكي اللي فوق د/ حماس علي طول

خمسة فضفضة يقول...

السلام عليكم ورحمة الله وبركاته

باشمهندس عصفور

وحضرتك طيب يا فندم والي الله اقرب وعلي طاعته ادوم

خلاص طالما حضرتك مش زعلان انا كمان ش زعلانه
:-D

ايوه فعلا الواحد فيه حاجات كتير يحس انها حصلت امبارح وهي بقالها 5 او حتي 10 سنين

ضفت طنطا علي الطقس متشكرين حضرتك مش عارفين نودي الجمايل دي فين
وفعلا دورت علي المنصوره او حتي الدقهليه مالاقيتش يلا بقي ماهو فيه دمياط مش مشكله

شكرا ومنورني يارب دايما

خمسة فضفضة يقول...

السلام عليكم ورحمة الله وبركاته

مبرمج حر

وانت طيب وفي سعاده يارب ،
ايوه باعمل الرز بلبن اول كل سنة هجرية عشان زي ما ماما بتقول تبقي سنتنا لبن
:-D


اغاني الاطفال بتاع عفاف راضي كلها روعه وتحس انها بتدي روح بهجه كده
حاول كمان تسمع سوسه كف عروسه و هم النم ياروحي

خمسة فضفضة يقول...

السلام عليكم ورحمة الله وبركاته

بثينه ( حلم سابقا )

وانت طيبه يا بثبث ويارب تبقي سنه سعيده عليكي وعلي العيله

خلاص اتفقنا السنه الجايه ان شاء الله ناكل الرز بلبن عندك
قلتي ايه ؟

الله يرحم مامتك ، ويصبرك علي فراقها

عاشوره يا ستي بتتعمل يوم عاشوره اللي هو عشره محرم يعني يوم الجمعه الجايه ان شاء الله
عارفه الطريقه ولا اقولك عليها
:-D


كل سنه وانت طيبه

خمسة فضفضة يقول...

السلام عليكم ورحمة الله وبركاته

د/ حماس

كل سنه وانت طيب والي الله اقرب وعلي طاعته ادوم

في حد مش بيحب الرز بلبن ، عموما ماعلينا
خلاص يبقي ليك عندي شوب لبن طازه وبالهنا والشفا

انا زيك مش بحب البرد ابدا ولا الشتا عموما والحبسه بتاعته متهيالي لو طول شويه هايجيلي اكتئاب الحمد لله

مش عاوزين ار ولا حسد ، ماشاء الله ماشاء الله
بس لعلمك انا بتكتك في البرد وبيجيلي رينود سيندروم كمان

ايه انت مش بتركب تكاتك ولا ايه

ربنا ييسرلنا الخير ويارب نقضي ساعات العمر في طاعه

ماتنساش تصوم

جزانا الله واياك خير

نورتني

فرنسا هانم يقول...

كل سنه وانتى يا دكتوره
وعام هجرى سعيد
انابحب جدا الرز ابو لبن
واولما اقريت التدوينه ريقى جرى
ورحت اجيب ملعقه لقيتك كلتى الطبق كله
يلا بالهنا والشفا
اما التوكتوك اللعبه
خلاص بعد مانتى نزلتى التدوينه دى
الصين شمت خبر
وعلى طول
التكاتك اللعبه هتملى البلد
الصينيون معندهمش ياما ارحمينى
اى حاجه بيعملوها
سلامى يا قمر
ولو عملتى رز بلبن تانى ابقى خلى طبق لخالتك فرنسا

ام البنات يقول...

كل سنه وانت طيبه يا حبيبتى
ان شاء الله السنه القادمه متحققه كل آمانيك ...وتكونى كمان لقيت اماكن التكاتك
فكرتينى با أمى رحمها الله وبارك فى عمر امك يا رب
السنه دى نسيت اعمل رز باللبن
ولكن ان شاء الله سأتذكر عمل العاشوراءكل سنه وانت بخير يا حبيبتى

MerMaid يقول...

خمسة فضفضة

بصي يا قمرنا

بجد شكل مدونتك تحفة ده اولا

وانتي كمان عسل جدا ماشاء الله بجد
وعندك ولاء فظيع للعائلة
ده اللي انا لاحظته
و مدونتك التانية كمان جميلة
-------------------------------
هاتي بقي اتنين جنيه قصاد الكلمتين دول
ههههههههههههههههه
كل سنة وانتي طيبة يارب
اوكي
فكريني اصوم التاسع والعاشر
:))

الي لقاء قريب
:))

daktara يقول...

صور
درائعة
في
صورة
بالف
تابعها

بحبك يامصر يقول...

كل سنه وانتى طيبه ويارب السنه الجديده تكون افضل من اللى فاتت ويارب تعدى على المسلمين من غير ما بلد مسلمه تتعرض للاحتلال تانى.....ويارب الاراضى المسلمه المغتصبه ترجع لينا وتتحر

لا للسكوت يقول...

هوة لازم رز بلبن ينفع تعمليلى حاجة تانية كاكاو أو أى حاجة غير الرز بلبن ..

كل سنة وانت الى الله اقرب وعلى طاعته ادوم وربنا ينفع بيكى ويعز بيكى الاسلام والمسلمين ..

دى اول زيارة ليا عندك بس هكررها دايما لان مدونتك بجد جميلة ولذيذة ربنا يتقبل

بالنسبة للجو ده ربنا يعديها على خير

اتمنى تشرفينى فى مدونتى المتواضعة ..مع خالص احترامى ودعائى لكى بكل الخير ..اختك خديجة عبدالله

Mohamed A. Ghaffar يقول...

الشتاء فصل تبقى ، مبحبوش

Hadota .. حـدوتة يقول...

عام سعيد
وكل سنة وانتى بكل خير وسعادة

ربنا ميقطعلكيش عادة ابدا

بالنسبة للتكاتك ههههههه معرفش والله بس اكيد لو لقيت مش هعزه علي سمسم ههههه ربنا يخليهولكم يااارب

السؤال بقة .. وانتى بتدورى فى جوجل ملقتيش شبرا
:D

تحياتى
وكل سنة وانتى طيبة تانى

لحظة يقول...

كل سنه وانت طيبه
حلوة قوي فكرة الرز بلبن في اول السنة
وانا باحب العاشورا كمان
والمطرة كانت اجمل حاجة حصلت في اول يوم
الحمد لله
خير

دكتور حر يقول...

دكتوره

التدوينه دي أحسن ما تعبر عن اسم المدونه
خمسه فضفه

ربنا يعود عليكي الأيام بخير

وجميله حتة التكتك دي
البيئه بتفرق برضه

دمتي بكل خير

مصعب يقول...

سنتك بيضا إن شاء الله
وكل سنة وانتى طيبة

š-σ-я-š-α-я-α-α يقول...

السلااااام عليكممم

دكتورة فضفضة انا بس حبيت اسلم عليكى وبعتذر انى مقصرة معاكى

وكل سنة وحضرتك طيبة

حلوة اوى فكرة الرز بلبن دى إن عيشنا السنة الجاية نبقى نعمله

وجزاكى الله خيرا على التذكرة بالصيام

السلام عليكم

محمد فوزي آل ربيع يقول...

لأ ، عارفة يا دكتورة، بصراحة عجبتني حكاية الرز باللبن دي، بجد فكرة مبتكرة

بالمناسبة هوا شهر طوبة بينكتب كدة ولا طوبى و لا طوبا لأني شفتها بكذا املاء قبل كدة فمش متأكد

بالنسبة للتكتك فقول لسمسم إنو يا حبيبي البتاع دا مضر جداً بالحياة و بلاش يطلب منه كتير يعني، ثم إنه إذا مصر يعني يبقى يستنى لما الصين تعرف التكاتك و تبدأ تعملها لعبة بإذن الله، حالياً في سكوتر بس ينفع؟

أه على فكرة أنا عرفت المدونة اللي انتي بتقولي عليها دي و كلمة فشيخ مش شرط إن معناها يكون سافل زي ما انتي متصورة إذ أنها مرات تستخدم كهزار بمعنى حاجة غريبة لدرجة تعجز أو حاجة تخليك منبهر أو عايز تضحك جامد، طبعاً مش عايز أشير إن النماذج اللي كانت محطوطة هناك هيا فعلاً من النماذج التي ينطبق عليها الشروط فعلاً و لا أتوقع إن مدونة زي مدونة حضرتك ممكن تدخل المسابقة لأنها ببساطة مدونة كويسة و عاقلة

على كل حال، إحنا بقينا 13 يناير و الدنيا ماشية تمام و فل أهه ، عادي يعني يا دكتورة طول عمرنا بنسمع كلمة الأيام بتجري دي ببساطة لأننا مش واعيين لحياتنا و مبنحسش إن إحنا عشنا يومنا كله زي ما المفروض نعيشه بسبب مسؤوليات كتيرة طبعاً

تحياتي

مفيش رز بلبن؟ --طفاسة بقى

عاشقه الفردوس يقول...

دكتوره فضفضه


ربنا يجعل ايامك كلها سعاده وطاعه

ربنا يجعل ايامك كلها ابيض من اللبن


بس ايه ده ماما مش بتعمل رز بلبن خلاص هخليها تعملنا

متغيرة شوية يقول...

كل سنة وانت طيبة
وبالهنا والشفا ، منك لله جوعتيني وأنا صاحية الصبح لسا مفطرتش كده

أ،ا رأييي ابن اخوكي تحوشي وتجيبيله تكتك حقيقي علشان تأمني مستقبله

Tamr7na يقول...

كل سنه وحضرتك طيبه و بالف خير
صدقى انا اول مره اسمع حتة الدبدوبه بتاع برد طوبه .. بس عسل قوى
***************************
سورى على عدم زيارتى لحد دلوقتى لمدونتك التانيه بس احب اقولك انها عامله اثر حلو عند المدونين ... بس انا لسه مدخلتهاش علشان عايزه اشوفها بمزاج
تحياتى ليكي

يا مراكبي يقول...

الله يخليكي يا دكتورة فتكريني معاكي لو لقيتي التوكتوك اللعبة .. إحجزيلي معاكي تلاتة للأولاد .. هأحاسبك عليهم ما تخافيش

خمسة فضفضة يقول...

السلام عليكم ورحمة الله وبركاته

فرنسا هانم

وانت طيبه يا خالتو ويارب تكون سنة سعيده عليك

ايه ده انتي مالحقتيش طبق ، دا انا كنت مخبياهولك في الرف التحتاني في التلاجه ، مين الوحش اللي كله ، دا كان عليه اسمك
خلاص ليك عليا اعملك واحد تاني وابعتهولك علي لمدونه عندك

بالنسبه للتكتك خلاص انا هاستني الصين لحد ما تعمله وابقي اشتريه

احلي سلام لاحلي فرنسا

خمسة فضفضة يقول...

السلام عليكم ورحمة الله وبركاته

ام البنات

وانت طيبه يارب والبنات بخير
ويارب يحقق اماني الجميع
وخلاص فرنسا هانم قالت لبتوع الصين يبقي اكيد ان شاء الله هالاقيها في السوق قبل السنه الجايه

خلاص ان شاء الله ناكل عندك العاشوره ماتنسينيش بطبق من اديكي الحلوه

خمسة فضفضة يقول...

السلام عليكم ورحمة الله وبركاته

MerMaid

انت اللي قمر يا قمر
مرسي اوي علي ذوقك اللي ما يتقدرش بفلوس مش تقوليلي 2 جنيه
:-D
كل سنة وانت طيبه ويارب افتكر افكرك بتسعه وعشره

سلام يا قمر

خمسة فضفضة يقول...

السلام عليكم ورحمة الله وبركاته

دكتره

ربنا يخليك وشكرا علي ذوقك
كل سنة وانت الي الله اقرب وعلي طاعته ادوم

خمسة فضفضة يقول...

السلام عليكم ورحمة الله وبركاته

بحبك يا مصر

كل سنة وانت طيب
ويارب يجعلها سنة خير وامان علي الجميع
آمين

خمسة فضفضة يقول...

السلام عليكم ورحمة الله وبركاته

لا للسكوت

اللي انتِ عاوزاه يا قمر بس بنقول رز بلبن يعني علشان تبقي سنه بيضا علينا كلنا ان شاء الله

كل سنة وانت طيبه
نورتيني في اول زياره ويارب كده دايما علي طول ودايما المدونه تعجبك وياريت كمان تزورينا في الفرع التاني " علي طول الحياة "


ان شاء الله اجيلك علي طول

تحياتي

خمسة فضفضة يقول...

السلام عليكم ورحمة الله وبركاته

محمد عبد الغفار

وانا كمان مش بحبه

كل سنة وانت طيب
لحقت الرز بلبن ولا كان خلص
:-D

خمسة فضفضة يقول...

السلام عليكم ورحمة الله وبركاته

حدوته

وانت بخير ياعسوله ويارب تبقي سنه سعيده عليكي
ويارب مايقطع لحد عاده

خلاص لو لقيتها ابقي بس قوليلي بتتباع فين وانا اروح اشتري علي طول

لا مالاقيتش شبرا تخيلي ، حد ينسي الصين الشعبيه ..هههههه

كل سنة وانت طيبه

خمسة فضفضة يقول...

السلام عليكم ورحمة الله وبركاته

لحظه

وانت طيبه يا جميله
الرز بلبن ده تراث واخدينه من جدتي عن جدتها عن جدتها
:-D
والعاشوره كمان لو عملت هابعتلك طبق بس انت قوليلي علي العنوان

فعلا المطره كانت حلوه بس البرد والطين اللي بعدها مش حلو خالص مالص

نورتيني

خمسة فضفضة يقول...

السلام عليكم ورحمة الله وبركاته

دكتور حر

ما انا مسمياها خمسه فضفضة علشان كده افضفض براحتي وماحش يقولي حاجه
:-D
ربنا يجعلها ايام خيرعلينا كلنا


بيئة ايه يا فندم ، احنا هانخبط في الحلل ولا ايه
هههههههه
دا الواد شايف حاجه غريبه عليه عاوزها تبقي عنده ، اصلا مش بيركب تكاتك خالص بيركب عربية ابوه


مش عاوزه اقولك ابوه لما كان في سنه كان عاوز عربية ايه

بلاش فضايح



نورتني

خمسة فضفضة يقول...

السلام عليكم ورحمة الله وبركاته

مصعب

يارب سنة بيضا علينا كلنا

كل سنة وانت طيب والي الله اقرب وعلي طاعته ادوم

خمسة فضفضة يقول...

السلام عليكم ورحمة الله وبركاته

صرصاره

اهلا اهلا ايه الخطوه العزيزه دي

كل سنة وانت طيبه
وخلاص بقي هانستني الرز بلبن بتاعك

جزانا واياك بس ماتنسيش الصيام

مع السلامه يا قمر

خمسة فضفضة يقول...

السلام عليكم ورحمة الله وبركاته

محمد فوزي

كل سنة وانت طيب
لا مبتكره ولا حاجه دا تراث يابني من ايام جدة جدة جدتي
بس يمكن بقي الاجيال الجديده هي اللي نسيته
-----
خلاص هاقول لسمسم عمو محمد بيقولك بلاش تكاتك علشان صحتك
:-D
وآدينا مستنيين الصين
-------------
المسابقه بتاعة افشخ دي عارفه انها كانت هزار بس مش معني كده انهم يقعدوا يتريقوا علي خلق الله بالمنظر ده ، ممكن يكون فيه ناس تفكيرها كده مش معناها اني اقعد استهزأ بيهم للدرجه دي تعرف ان واحد منهم عمل جوار علي الماسينجر مع واحد من المترشحين للجايزه ،حوار ينطبق عليه ظاهره فيه الرحمة، وباطنه من قبله العذاب
ابقي روح اقراه وشوف الصور اللي حطينها معاه ، والدليل انهم عاملينها للتريقه علي خلق الله ان اللي فاز بالجايزه مضايق منهم جدا ، ابقي روح اقرا الكومنت
صحيح والواد بتاع الويكيبيديا ده تحفه وموتني انا شخصيا من الضحك بس مش المفروض يعملوا معاه كده

ولعلمك بقي مش شرط ان الشخص يكون بيضحك مهم كانوا حاطين ضمن الترشيحات ناس كويسه جدا زي دكتور خالد ، والصارم الحاسم واحمد قره وبتاع مقارنة الاديان ده مش فاكره اسمه
يعني ممكن جدا الاقيني انا كمان معاهم او حتي انت شخصيا ما تضمنش ، ونفسي اعرف انطباعك هايكون ايه لو كنت ضمن الترشيحات وقعدوا يتريقوا عليك كده ؟؟؟
هاتبقي فرحان؟؟؟

عن نفسي كنت هابقي زعلانه جدا لان دول ناس فاضيه مش لاقيين الا خلق الله يتريقوا عليهم

----------

ربنا يعينا ونقضي ايامنا كلها في طاعه ويختم علينا برضو بالطاعه ويرزقنا الجنه
آمين

--------
الرز بلبن خلص استني بقي اما اعمل غيره ، ولا ابعتلك طبق عاشوره يوم الجمعه
:-D

نورتني يا محمد وماتبقاش تغيب كده تاني


سلام

خمسة فضفضة يقول...

السلام عليكم ورحمة الله وبركاته

عاشقة الفردوس

اللهم آمين
ويارب تكون سنة سعيده عليكي وعلي كل حبايبك

واتفضلي طبق رك بلبن وبلاش تتعبي مامتك

منوراني

خمسة فضفضة يقول...

السلام عليكم ورحمة الله وبركاته

سلمي صلاح "متغيره شوية "
كل سنة وانت طيبه
فرحت جدا بالزياره الجميله دي ويارب تنوريني دايما
هافكر في موضوع التكتك الحقيقي ده واهو تبقي حاجه الواد يعتمد عليها بعد ما يتخرج ومايلاقيش شغل

منوراني

خمسة فضفضة يقول...

السلام عليكم ورحمة الله وبركاته

تمر حنه

وانت طيبه يا قمر
بجد اول مره تسمعيها ، دي من زمان اوي
يمكن بقي ماكانتش بتيجي علي ايامك وانت صغيره

------
انا اللي آسفه عرفه اني مقصره ، بس والله انا كذا مره اروح عندك اقرا وحاجه تشغلني اقوم اخرج من غير تعليق

هاستناكي في المدونه التانيه اقراي علي اقل من مهلك وقولي لي رايك

سلام يا قمر

خمسة فضفضة يقول...

السلام عليكم ورحمة الله وبركاته

يا مراكبي
بس الاقيه وانا اجيبلك عشره هديه من عندي للولاد

كل سنة وانت طيب والي الله اقرب وعلي طاعته ادوم

أحمد سلامــه يقول...

اولا كل سنة وانتي طيبة يا دكتورة
جعله عام يسر عليكي وعلى المسلمين اجمعين باذن الله
وثانيا كل سنة وانا طيب عشان ان اعيد ميلادي السنادي كان 1 طوبة
:)
شفتي البرد
واجمل حاجة بقى حكاية الرز بلبن دي
مية مية بصراحة
اصلي مدمن حلويات بصراحة
:)

الربان يقول...

تحياتي

كل سنة و حضرتك بألف خير...و دائما في سعادة و راحة بال....راحة البال نعمة لا يضاهيها نعمة ...رزقنا الله جميعا راحة البال.

شكرا و جزاك الله خيرا علي تذكيرك لنا بصوم يوم عاشوراء...التاسع و العاشر..
أو العاشر و الحادي عشر من المحرم...تقبل الله منا جميعا صالح أعمالنا.

دمتي بألف خير...
تحياتي

خبيب يقول...

هههههههههه

تكتك ؟؟

ما شاء الله عليه

---

الحاجة الملحوظة فعلا سرعة الايام الرهيبة

لدرجة المفروض يخلوا رأس السنة الهجرية أسبوع كده ولا حاجة

يدوبك نلحق نأجز

Doba يقول...

ياطنط
ياطنط
ام الداكتورة

انا هبة ام يوسف
ممكن طبق رز بلبن لو سمحتى

كل سنة وانتو طيبين وبخير وسعادة
والدنيا برد قوووووووووى

بقينا كركوبات صغيرين
الواد يوسف عنده برد يا داكتورة
اديله ايه ياختشى يسعدك ويريح بالك

وش بيضحك وسقعاااااااااان

تحياتى
هبة

صالح سعيد يقول...

ازيك يا دكتوره
وكل سنه وانتى طيبه
ويا رب تحققى كل احلامك فى السنه الجديده
بس على فكره رغم اننا فى طوبة لكنى بحب الشتا لانه ارحم بكتير من الصيف خصوصا اننا عندنا ناموس ياكل الزلط
ربنا يكفينا شره اصله بييجى على السيره
سعيد بزيارتك ومنتظر رايك فى البوست الجديد
ارق تحية

هبههههووب يقول...

ربنا يجعل ايامك كلها ارز بلبن وتبات ونبات
و2008 تكون احلى من الى فات
سلام مؤقت

بنوتة من وسط البلد يقول...

والله يا دكتورة انا بشوفك كتير ومع ذلك دى اول مرة ازورك واعتذر فعلا انى ما شفتش مدونتك اللذيذة من زمان


تحياتى وكل سنة وانتى طيبة

لسه فاضل رز بلبن ؟؟؟؟؟

sofinqoraso يقول...

أولاً مبسوطة إن انا كمان وانا بقلب ولينك يجيبنى ولينك يودينى جيت عليكى

كل سنة وانتى طيبة وكويسة وجميلة وأمورة وإن شاء الله تبقى سنة ابيض من أى سنة

وسمسم بجد سكر ربنا يخليه لباباه ومامته بس بصراحة انا لسه مسمعتش عن تكاتك لعبة بس أكيد هيخترعوها

أضايقت أوى من الألفاظ الشائعة اللى الناس بتستخدمها وهى بتحمل أقبح المعانى يعنى ... حاجة تقرف الصراحة

الوقت بقى يفوت هوا وياريت اللى عايز يعمل حاجة بجد ميأجلهاش

تحياتى ليكى وكل سنة وانتى طيبة

am.zaid يقول...

كل سنة وانتى طيبة يادكتورة مع انها متاخرة بس معلش بقى
واكيد طبعا الرز باللبن خلص
ما علينا
ربنا يجعل السنة احلى من كل سنة
وتحققى اللى نفسك فيه ان شاء الله
ان شاء الله مش هيكون اخر تعليق عندك


ويعدى شهرين البرد دول على خير

دمت بكل خير

بت خيخة وأى كلام يقول...

حلوة اوى الاخبار المقتطفة دى
حكاية الرز بلين دى فعلا عادة عند كل الناس لكن للاسف انا زفت فى موضوع الطبيخ ده ومعملتش رز بلبن
بس المفروض ان لما انزل عند ماما هتعملى هى رز بلبن
ربنا يسعد اوقاتك يا فضفضة
وكل سنة وانتى طيبة
اختك خيخة

أمير الهدوء يقول...

بجد كلامك راااااااااااااائع

وإن شاء الله نصوم يوم عاشوراء

بس طلب صغير منك ومن الجميع

إدعوا لإخوننا في فلسطين

وتاني حاجه الرز باللبن كان حلو ولا.......

هههههههههههههههه
ههههههههههههههههههه

تحياتي
:)

خمسة فضفضة يقول...

السلام عليكم ورحمة الله وبركاته

د/ احمد سلامة
كل سنة وانت طيب والي الله اقرب وعلي طاعته ادوم

وعقبال ميةسنه تعيشها كلها في سعاده وطاعه ان شاء الله

انت جيت متأخر الرز بلبن خلص ...ههههه
فيه دفعة جديده بتتعمل اول مايجهز هابعتلك طبق



نورتني

خمسة فضفضة يقول...

السلام عليكم ورحمة الله وبركاته

الربان

كل سنة وانت طيب ويارب ينعم علينا جميعا براحة البال والسعاده

يارب تكون حضرتك افتكرت تصوم ، عارفه انه ممكن كمان 10 و 11 بس اهو بقي جرت العاده اننا نصوم 9 و10
الحمد لله بس ربنا يتقبل

منورني

خمسة فضفضة يقول...

السلام عليكم ورحمة الله وبركاته
خبيب

عيال آخر زمن تعمل ايه بقي

هههههههه

ايوه الايام بقت بتجري جري
ربنا يرحمنا ويرزقنا حسن الخاتمه

خمسة فضفضة يقول...

السلام عليكم ورحمة الله وبركاته

دوبا
طبق واحد بس
اتفضلي تلاته اربعه ، ولا اقله خدي الحله كلها اهي ماتغلاش عليكي



كل سنة وانت طيبة يا هوبا

الف سلامه علي يوسف من البرد ،م اديله حاجه للبرد ...ههههههه

سلام يا قمر

خمسة فضفضة يقول...

السلام عليكم ورحمة الله وبركاته

صالح سعيد

الله يسلمك وكل سنة وانت طيب

لا ياشيخ الناموس له وسايل كتير تقدر تقاومه بيها اما البرد فايخلي الواحد مش قادر يتحرك من كتر التكتكه ومابينفعش معاه حاجه

نورتني

خمسة فضفضة يقول...

السلام عليكم ورحمة الله وبركاته

هبههههووب

اللهم آمين
كل سنة وانت طيبه
نورتيني

خمسة فضفضة يقول...

السلام عليكم ورحمة الله وبركاته

بنوته من وسط البلد

نورتيني بالزياره لاول مره ويارب دايما وشكرا كتير علي ذوقك وكلامك الحلو ده

اخدتي رز بلبن ولا ملحقتيش
:-D
كل سنة وانت طيبة

خمسة فضفضة يقول...

السلام عليكم ورحمة الله وبركاته

sofinqoraso

كل سنة وانت طيبه

وانا اللي مبسوطه ان حظي الحلو وصلك عندي وعرفني علي المدونتين الحلوين بتوعك

سمسم ياستي ....هههه ..عيال آخر زمن مش يحمد ربنا اني جبتله حاجه لا كمان بيتامر

الواحد بيتضايق جدا من الحاجات دي خصوصا لو كانوا واخدين الموضوع من باب التريقه علي الناس مع ان ربنا نهانا عن كده وقال ولا يسخر قوم من قوم

ربنا يجعل كل اوقااتنا في الطاعه ويسعد ايامك يارب

سلام ياقمر وكل سنة وانت الي الله اقرب وعلي طاعته ادوم

خمسة فضفضة يقول...

السلام عليكم ورحمة الله وبركاته

ام زيد

كل سنة وانت طيبه ويارب يسمع من بقك وتبقي ايامنا كلنا كلها سعاده وهنا وطاعه

ويارب يعدي فعلا البرد علي خير

هاعمل دفعه جديده من الرز بلبن قوليلي الميل بتاعك ابعتلك طبق

ههههه

نورتيني

خمسة فضفضة يقول...

السلام عليكم ورحمة الله وبركاته

بت خيخه

نونا ازيك اخبارك ايه

طب كنتي قوليلي انك مش عارفه تعمليه وانا اقولك علي الوصفه او حتي ابعتهولك لحد البيت
ربنا يسعد ايامنا كلنا
كل سنة وانت طيبه وشريف وهاني طيبين

خمسة فضفضة يقول...

السلام عليكم ورحمة الله وبركاته

اميرالهدوء

الله يكرمك ، دا انت اللي رائع

الرز بلبن كان جميل هو انت مالحقتش طبق ؟؟؟

عموما هاحجزلك في الدفعه الجديده

هههههه

يارب انصر اخوانا في فلسطين واظهرهم علي عدوهم ،


سلام

الشريف / جمال طة يقول...

فضيحــــــــــــــــــــــــــــــة بالسعـــــــودية


مــــــــن المجتمــــــــــــــع الدولــــــــــــــــــــى



الـــــــى الملك / عبدالله بن عبد العزيز (خادم الحرمين ) بابا الفاتيكان بيسلم عليك ويقولك عيب رجعوا للمسلم حقه

وملكــة بريطانيا بتقولك عيب خلوا عندكم شوية ديمقراطيـــة وحقوق انســـــــــان مش انتم بتقولوا انكم مسلمين أعطوا المسلم حقه

أما الرئيس الأمريكى بوش بيسلم عليك وبيقول لك خلص المشكله ديه ورجع للمصرى جميع حقوقه وهو مش عايز يتكلم فى الموضوع ده تانى

أما الكونجرس ألأمريكى يقول لك احنا متابعين قضية المواطن المصرى ولن نتخلى عنه حتى يأخذ جميع حقوقه

أما ألأمين العام للمنظمة الدوليه لحقوق الانسان يقول لك الشكاوى منكم يوم عن يوم بتزيد وسوف نضطر لرفع ألأمر الى ألأمم المتحده ومجلس ألأمن للنظر فى فرض عقوبات اقتصادية عليكم قد تصل الى تجميد أرصدتكم فى خارج السعودية بعد خصم جميع حقوق المواطن المصرى وخاصة انه بيقول انه مسلم زيكم


برجاء الاطــــلاع وشكرا

http://gamal51.blogspot.com/

http://anameshm3ahom.blogspot.com/2007/12/blog-post_11.html

http://kalam3eal.blogspot.com/2007/12/blog-post.html

mostafarayan يقول...

انت حدطيب قوي كل سنةوانت طيبة

غير معرف يقول...

تدروون مافهمت شي الخرااابيط


النت مترووس رز باللبن بس انا اخترت هذا قلت عشان الطبخات اللي وياه طلع خراااطي
خراااطي


شالخرااابيط


صج اي شي واااي

القرآن الكريم