2008-10-06

رجعنا


السلام عليكم ورحمة الله وبركاته

اولا كل سنة وانتم طيبين يارب يكون العيد كان عيد سعيد عليكوا واستمتعتوا بكل لحظه فيه

الحمد لله رجعت من العمره وحشتوني جدا جدا ، و وحشتني المدونه اوي

مع كل التعب بس كانت ايام من امتع ايام العمر وإن شاء الله احكيلكوا علي كل حاجه بالتفصيل الممل بس محتاجه انام سنه او يمكن سنتين :))))


الواحد كان منعزل عن العالم وعن اخباره وبعد ما رجعت اتصدمت بعدد كبير اوي من الاخبار المؤلمة وعدد من الكوارث اللي ربنا يحفظنا ويحفظ بلدنا من شرها

اكتر خبر آلامني هو خبر وفاة العلامة الشيخ / ابراهيم شحاته السمنودى عالم القراءات الجليل ، طبعا عند الناس المتخصصين في علوم القراءات والتجويد الاسم ده له وزنه و معروفة قيمته كويس ، الله يرحمه ويسكنه الفردوس الاعلي مع النبيين والشهداء والصديقين وحسن اولئك رفيقا
ومع ان بوفاة شخنا الجليل نزل الاسناد ( بخصوص القراءات الشواذ ) في الدنيا درجة ، وبالرغم من ان تقريبا كل مشاهير القراء في مصر والعالم العربي اخدوا الاجازه علي ايد الشيخ ابراهيم ، الا ان خبر وفاته مر مرور الكرام ولم يتحدث احدهم عنه ولا يشير اليه من قريب او بعيد ، الا بعض المنتديات المتخصصه في علوم القراءات ، ولم اجد من كتب عنه حرف الا جريدة الرياض هنا

ممكن تقروا سيرته الذاتيه هنا

تخيلوا ان الكويت جمعت مؤلفاته وطبعتها في مجلد مش المفروض ان مصر هي الاحق به من اي دوله اخري؟؟؟؟
رحمه الله تعالي ، عاش في الدنيا مبخوس حقه ولم يقدروه حق قدره واعتقد انه لو كان في اي بلد تانيه كانت هاتكون له معامله احسن من كده بكتير ،

رحمه الله وابدله دارا خيرا من داره واهل خير من اهله وجمعنا به في جنات العلي


ان شاء الله هاشارك في يوم كلنا مع ليلي
يوم 19 اكتوبر بس مش عارفه ليه المدونه الرئيسيه واقعه والبلوجسبوت بيقول لم يتم العثور عليها ، لحين اشعار آخر انا معاكوا ان شاءا لله وهابعت الميل وربنا يسهل ويتم العثور علي المدونه قبل 19 اكتوبر


كل سنة وانتم طيبين بكره ..امممممممممم.....قصدي انهارده 6 اكتوبر

واسيبكوا بقي عشان انام اصلي ماعدتش شايفه قدامي

تصبحوا ، قصدي صباح الخير


سلااااااااام



38 comments:

لماضة يقول...

حمد الله على السلامه يا دكتورة
يارب يتقبل منكم صالح الاعمال ويكرمك
كل سنه وانتي طيبه

فعلا المدونة واقعه وفيه مشكله حصلت وهاك
وان شاء الله يكون فيه موقع جديد

صباح الفل

Hunikal يقول...

حمدالله على السلامه

الطائر الحزين يقول...

حمدا لله على السلامة
عمرة مقبولة ان شاء الله

تقبل الله منا ومنكم صالح الاعمال

عالمى ازرق يقول...

حمدلله على سلامتك
ربنا يجعلها عمره مقبوله بأذن الله
ويكتبهالنا قريب ان شاء الله

كل سنه وانتى طيبه

kafrawy يقول...

حمد الله على السلامه يا دوك
وكل سنه و انتى طيبه

رفقة عمر يقول...

حمدا لله على سلامه حضرتك
دعواتك لا تنسينا من الدعاء
ورحم الله الشيخ السمنودى اول مرة اسمع عنه
عمره مقبوله ورمضان مقبول اللهم امين

صبرني يارب يقول...

حمد على السلامه يا دكتوره وكل سنه وانتى طيبه
وعمره مقبوله يارب وعقبال الحج ان شاء الله

ونورتينا من جديد

ونروح نشوف ايه موضوع مع ليلى عشان مش فاهمه حاجه لسه

amr يقول...

حمد الله على سلامه حضرتك

تقبل الله منك ان شاء الله

فى انتظار الجديد

خالص تحياتى

Sherif يقول...

عودا حميدا وعمرة مقبولة

كل سنة وانت لله اقرب
ولفعل الخير اقدر
حقق الله حلمك
وتقبل صالح عملك

مصــــري يقول...

حمد الله علي السلامة يا دكتورة.
ويارب نكون لطشنا في دعوة كده ولا حاجة.

صارت عادة في بلادنا ألا نهتم بكل من يقول كلام الله وكلام الرسول.

رحم الله شيخنا الكريم.

عمرة مقبولة ان شاء الله.

أسامة

ياسمين حميد يقول...

عمرة مقبولة بإذن الله
وإن شاء الله تعودي لنا العام القادم وأنتِ "الحجة فضفضة"

الله يرحمه ويسكنه فسيح جناته، فعلاً لم أسمع بإسمه إلا الآن مع خبر موته

مهندس مصري يقول...

الله يرحمه و يجازيه عن القرآن خير الجزاء
و الف مبروك على رجوعك بالسلامة
و ربنا يتقبل منك
دعيتي لي و لا نسيتي يا دكتورة
:)

عصفور المدينة يقول...

تقبل الله والحمد لله على سلامتك

ورحم الله الشيخ وأهل القرآن هم أهل الله وخاصته

kochia يقول...

حمدا لله علي السلامة
وربنا يتقبل منك عمرتك ان شاء الله
وعقبال الحج

بت خيخة وأى كلام يقول...

كنتي فى عمرة؟

حمدالله على سلامتك يا فضفضة
انا افتكرتك واخدة اجازة تدوينية فى رمضان
ماكنتش اعرف انك سافرتي عمرة
يارب تكوني مانستناش فى الدعاء

كل سنة وانتى طيبة يا حبيبتى

اختك خيخة

وميض ابتسامة يقول...

الحمد الله على سلامة الوصول

ولعلك فى احسن حال

اللهم تقبل منك قيامك وصيامك وصلاتك ودعائك وعمرتك ..آمين

واللهم عظم اجر عالمنا الجليل فى الآخرة واسكنه فسيح جناتك ..آميم

نورت مصر والمدونة

والسلام عليكم ورحمة الله

عاشقة القمر يقول...

حمدلله علي السلامه الف مبروك العمر وعقبالنا يارب
ان شاءالله ماتكوني نيستنا من دعوات

عمره مقبوله ان شاءالله
ورحم الله الشيخ السمنودى وجعلواه مع الشهداء والصدقين
كل عام انتي بخير
تقبل الله مننا ومنكم

ojg يقول...

تقبل الله منك
وعقبالي
:)
نامي يا ستي وارتاحي بس ماتطوليش قوي
عايزينك تحكيلنا بالتفصييييييييل
وألف حمدالله على سلامتك

كوارث يقول...

سلامو عليكم
حمدلله على السلامه أولاً وربنا يتقبل العمرة
بالنسبة للشيخ السمنودي فانا كمان اتصدمت بالخبر
كان علامة فعلا الله يرحمه
إجازة مشاري راشد في قراءة القرىن الكريم كانت من الشيخ السمنودي أصلاً !
ادانا هدية غالية فعلا
الله يرحمه ويسكنه الجنه

قلب مصرى يقول...

حمداً لله على السلامة وعمرة مقبولة إن شاء الله

nasimlibya يقول...

كل عيد وانتي طيبة
عمرة مباركة ومقبولة يارب وان شاء الله كل رمضان وانتي بالحرم تصلي وتدعي قولي امين

بثينــــــة يقول...

حمدا لله علي سلامتك يا فضفوضة
تصدقي أنك جيتي علي بالي كتير أوي في رمضان .. بعيد حتي عن التدوين كنت بافتكر الصورة وكلام قلتيه وأقول يارب يرجعك بالسلامة وتكوني بخير وربنا يتقبل منك
بجد وحشتيني جدا جدا
غريب أمر التدوين دة بيربطنا ببعض زي ما تقولي من جوة
بس أجمل ما فيه إنه خلاني أعرف حد زيك
نورتي

بحبك يامصر يقول...

ربنا يتقبل ان شاء الله
وربنا يرحم الشيخ الجليل

sakayar يقول...

السلام عليكم ورحمة الله وبركااااته
اهيء اهيء
اهيء
اهيء اهيء
والله والله معلش بقى
بقالي كتير مجتش ودخلت وعلقت
بس والله والله بقرأ كل المواضيع والله
بس منقطع أصلا .. يعني بكتب بوست واطلع جرري من البلوجر مش بدخل أعلق حتى غير فين وفين

ندخل بقى ف الموضوع
أولاً تقبل الله منكم يارب يتقبل العمرة - على فكرة خطيبتي كانت لسه بتعمل عمرة ف نفس الوقت - ويارب يجعلكم من المغفور لهم ويكتبهالنا
ثانياً تقبل الله منكم رمضاااان وكل عام وانتم بألف خييير
ثالثاً فوجئت بخبر الشيخ من على مدونتك فعلاً الخبر ولا حد اتكلم عنه أو قليل اللي اتكلم عنه للدرجة اللي تخلي الواحد مش عارف حاجة فعلا ... ربنا يتقبل منه ويجعل أعماله الصالحة مقبولة وفي ميزات حسناته
ومرة تانية كل عام وحضرتك بألف خير بمناسبة عيد الفطر و6 أكتوبر بقى حيتان ف الجو أسود ع الرمل وحاجات تانية كتير
السلام علييييكم

كاتب مصري يقول...

كل سنة وانت طيبة وحمد لله ع السلامة يا سيدتي
أنتظرك دوما
كل ودي

صاحب المضيفة يقول...

عودا حميدا ويارب نكون نلنا من جانب الدعوات ولو الشيء اليسير


ورحم الله السيخ الفاضل وأسكنه فسيح جناته وأخلف فينا مثله يارب


تحياتي

mostafa rayan يقول...

مبروك العودة
وربنا يتقل منك ورحم الله الشيخ الجليل
بخصوص كلنا ليلي هل ياتري هيتكلمو بطريقة ان الرجل والمرأة شريكان في المجتمع وكل منهم يكمل الأخر ولا هيبقي نفس الكلام المعاد من عشرات السنين ان الرجل وحش وظالم المرأة الغلبانة الضعيفة ؟

الدفاع يقول...

حمدلله على سلامتك يا دكتوره وربنا يتقبل منكم ان شاء الله
تحياتى

Jana يقول...

عمرة مقبولة ان شاء الله
وحمدا لله على سلامتك ..انتى وحشتينا اكتر
صحيح اللى سمعته عن اللى حاصل فى الحرم !؟؟ والتجديدات والتوسيعات
طب الفنادق اللى كانت جنب الحرم عملوا فيها ايه؟

رحم الله الشيخ السمنودى
بالكاد كنت اسمع الاسم ولا اعرف عنه الكثير للاسف ولسوء حظى وتقصيرى
ربنا يباركلك على ما وضحتيه

تحياتى فضفضة

سبهللة يقول...

بجد يا بختك بالعمرة
ربنا يتقب منك ويرزقنا العمرة زيك
انا مجرباها وعارفة متعتها بس نفسى اجربها فى رمضان ربنا يسهل ان شاء الله والسنة الجاية انا ناويها
كل سنة وانتى طيبة
وتقبل الله منك صيامك وقيامك وقرآنك وجعلك من عتقائه

بركاوى يقول...

ربنا يتقبل
تقبل الله منا ومنكم صالح الأعمال
ويجعل كل أعمالكم خالصة لوجهه

ـ-ـ- أحمد عبد العدل-ـ-ـ يقول...

حمد الله على السلامة يافندم وعمرة مقبولة ان شاء الله ..
طبعاً مش غريبة خالص ان محدش يجيب سيرة الشيخ السمنودى - أنا لا أعرفه بالمناسبة - لكن كانت فعلاً تبقى غريبة لو جابو سيرته .. يكونش عمرو دياب مثلاً ولا حاجة؟ حمد الله على السلامة

عاشــــــ النقاب ـقــــة"نونو" يقول...

حمد الله على السلامةوتقبل الله وكل عام وانتم الى الرحمن اقرب

خمسة فضفضة يقول...

السلام عليكم ورحمة الله وبركاته


ربنا ما يحرمنيش منكم جميعا
وكل سنةوانتم بخير وسلام

والله المدونه والناس الحلوه اللي علي البلوجر كانوا علي طول علي بالي وكل ماشوف حاجه اقول لنفسي افتكري التفاصيل عشان تكتبيها علي البلوج

وكتير منكم كان بيجي علي بالي
وبالنسبة للدعاء طبعا دعينا كتير اوي لكل المسلمين وللي بالي بالكو كمان دعيناله بالصلاح والهدايه والعمل علي نصرة الاسلام والمسلمين وان ربنا يصلحله حاشيته ويوفقه لاختيار الاصلح منهم
ولما الامام كان بيدعي لولاة الامر كنت بركز معاه اوي وخلي نيتي موجهه ليه بالذات وبالخصوص
ولما كان بيدعي علي اللي ظالمين المسلمين برضو كنت بركز في ناس معينه وبتخيلها قدامي وبتخيل اللي عاملينو فينا ربنا ياخدهم ويتقبل منا دعائنا يارب قولوا آمين

ربنا يتقبل منا ومنكم صالح الاعمال ويرزقنا دايما العمل بما يحبه ويرضاه

سلام

المستنصر بالله يقول...

عودا حميد وعمره مقبوله ان شاء الله
كل عام وحضرتك بخير

تحياتى لحضرتك

إبـراهيم ... معـايــا يقول...

الأول : تقبل الله منَّا ومنكم، بس ماينفعش تنامي بعد رحلة مهمة قوووووي زي دي ، بصراحة لاااازم تحكي لنـا وبالتفصيــل الممل ،،،

وثانيًا : إن كان ع الكوارث فربنا يصبرنا ، إنتي عارفة بقى بلدنا وتبقى أنتا أكيييد ف مصـر !!! ربنا يستــر بجد

ثالثًا : في انتظـــارك

كلمة حق يقول...

الف حمد الله على السلامة يا دكتورة وربنا يتقبل منك ورحم الله شيخنا الجليل وأسكنه فسيح جناته... أبو خيرى

Beram ElMasry يقول...

للمرة الثانية تضعى تعليق فى مكان قديم انا اتجدد كل ثلثاء وللمرة الثانية اكتشفة بالصدفة
الاخوة الاعزاء
السلام عليكم ورحمة الله
بناء على رغبة الكثير من الاصدقاء المدونين ، وفى مقدمتهم الاخ الدكتور توكل مسعود ، فى تغير اصم مدونتى من ( المدهول ) الى اسم اخر يليق بمحتوى المدونة ، وانطلاقا من طبيعتة الغيورة على اصدقائه ، ومن الاسماء المعروضة ( كرباج سودانى ) وقد وقع عليه اختياؤى ، وصار هذا اسم المدونة الجديد
لااختلاف فىالمحتوى ولا تغير فى موعد كل جديد وهو يوم الثلاثاء
لكم كل الحب والاحترام

القرآن الكريم