TvQuran

٢٠٠٧-٠٨-٣١

day off


الاسبوع اللي فات اخيرا زوجي اخذ اسبوع اجازته السنويه واللي المفروض اننا بنقضي نصه في الاسكندريه والنص الثاني في راس البر بس للاسف بسبب الانشغال الشديد وعدم وجود حد ثقه نسيبله الصيدليه ما قدرناش نروح في اي حته
بالعافيه قدرنا نخطف يوم في وسط الاسبوع نروح فيه بورسعيد
واللي المفروض اننا بنروحها كل سنه في شم النسيم بس برضو ما رحناش السنه دي ، مع اني باستني اليومين دول من السنه للسنه

بورسعيد ليها في قلبي مكانه كبيره جدا جدا ، يمكن لان عائلة امي كانوا عايشين هناك وتم تهجيرهم بعد 67 ، رسمت ليها صور في خيالي من حكايات خالاتي وجدتي وازاي الفتره دي من حياتهم علي الاقل بالنسبه لي كانت عامله زي الحلم
كنت دايما افتكر حكاياتهم ايام شبابهم وطفولتهم في بورسعيد ، والبحر اللي كان قاسم مشترك في كل حاجه بيعملوها
لما كانوا ينزلوا يصطادوا الجمبري ، والسمك اللي جدي كان بيصطاده من علي كوبري الجميل

وازاي لما اتنقلوا لبورفؤاد وكانوا ساكنين في دور ارضي علي البحر وفي يوم صحيوا لقوا كل حاجه عايمه علي وش المايه اللي كانت مغرقه البيت

وخالتي اللي كانت رايحه تجيب الفطار يوم ضرب المدمره ايلات ادام سواحل بورسعيد والانفجار اللي حصل خلاها ترمي طبق الفول من الشباك وتنط فيه

ذكريات جميله ليهم ايام ما كانوا عايشين هناك ، ولحد ما اضطروا انهم يرجعوا بعد 67 لمسقط راس جدي اللي هي بلدنا الحاليه ، وبالرغم من انه رجع لشغله فيها بعد كده الا انه ما خدش العيله معاه وفضل لوحده هناك ومابيجيش الا اجازات قصيره لحد ما طلع علي المعاش

يمكن علشان كده لما بروح بورسعيد باحس اني خرجت بره الزمن ورجعت تاني لقبل 67 ،
وبالرغم من كل ده الا ان بورسعيد برضو بلد تستحق الاحترام بجد ،كل حاجه هناك تجبرك علي احترام البلد ، الشوارع نظيفه والناس بتعاملك ببشاشه و اي حد مستعد انه يساعدك في اي حاجه انت عاوزها بصدر رحب

واكتر حاجه عجباني هناك هي الجوامع الجميله اوي والنظيفه اوي اوي فوق العاده
حاجه هزتني اوي من جوايا المره دي وانا هناك ، بنت تقريبا 18 او 19 سنه منتقبه ، كانت بتصلي جمبي الظهر في جامع التوفيقي ، البنت ما بطلتش عياط من اول الصلاه لاخرها ، اتمنيت من كل قلبي اني ابقي في خشوعها وقربها من الله

حسيت السنه دي وانا ماشيه في الثلاثيني اني ماشيه في بكين ، كل المنتجات صنع في الصين ، الحاجه الوحيده اللي ناقصه ان البياعين كمان يبقوا صينيين
الله يكون في عون البورسعيديه لما يلغوا المنطقه الحره اواخر السنه الجايه ، مش عارفه هايعملوا ايه

طبعا ما ينفعش حد يروح بورسعيد وما ياكلش سمك ، زي كل سنه رحنا الكاستن واديناها اكلة سمك وجمبري متينه ،
و انصح اي واحد عاوز ياكل سمك بحق وحقيقي يروح بورسعيد ، مع كامل اعتذاري للاسكندرانيه (:
بجد السمك هناك له طعم تاني ، يمكن اسلوب التقديم والحفاوه والكرم الزايد بيديله طعم احسن

اكتر حاجه مش بتعجبي في البورسعيديه هي كرههم الشديد اوي للاهلي ودي الحاجه اللي متهيألي ان عمرها ما هاتتغير ليه مش عارفه ، وطبعا عمرنا ما ننسي اليافطه الشهيره بتاعة " بورسعيد مش بتحبك يا اهلي "



بس بصراحه كان يوم رائع وكنت بتمني انه يطول اكتر من كده


66 comments:

يا مراكبي يقول...

حاجة مشوقة بجد .. تصدقي يا دكتورة إني عمري ما رحت بورسعيد أبدا؟

أفتكر مرة واحدة كان عندي 4 سنين أو 5 سنين رحنا مع الوالد والوالدة الله يرحمها وكان لسه فعلا آثار الحرب موجودة

بس الإعلام بيبرز صورة مختلفة تماما عن أهل بورسعيد .. غير اللي إنتي بتحكيه على فكرة

خمسة فضفضة يقول...

السلام عليكم ورحمة الله وبركاته

اهلا بك يا باشمهندس ،كل سنة وانت طيب

اكيد انت عارف ان الاعلام بتاعنا لو حب يشوه حاجه بيشوهها ولو حب بجمل حاجه برضو بيجملها ، واكيد بتقصد فيلم ابو العربي

من رايي ان كل الكلام اللي بيتقال عن البورسعيديه ده مش صح
بالظبط زي اللي بيتقال عن الصعايده


خالص تحياتي

محمود الدوح يقول...

بجد انا نفسى الف مصر حتة حتة
وان شاء الله لما يجى الدور على بورسعيد هكلمك تقوليلى على البرنامج اللى هعملة هناك
عشان شكلك حافظاها جامد

محمد عبد الغفار يقول...

مكنتش اعرف انك متجوزه ربنا يسعدكم ويهنيكم ويرزقكم بكل خير

لا يتحدث احد عن بورسعيد وانا موجود بعد اذنكم يعنى عشان زمان قالوا لجحا بلدك فين قالهم اللى منها مراتى

حكايه المنطقه الحره دى بقى احسن قرار اتاخد هيحولهم لبلد منتج بدل هيضطروا يشتغلوا اخيراً اصل البورسعيدى مبيشتغلش وده بإعترافهم شخصياً لو معاه فلوس الغدا والعشاء وفطار بكره يقفل ويبطل شغل غي بقى خبتى معاهم فىالشغل

هما فعلاً متخصصين فى السمك احسن بلد تعمل سمك وده بيرجع لأنهم عارفينالطريقه المثلى لعمل كل نوع مش اى حاجه فى اى حاجه كل نوع له طريقه ده كمان كل حجم فى النوع الواحد له طريقه

السنه الجايه بقى اشوفك هناك فى شمك النسيم عشان كل سنه بردو بقى هناك

عصفور المدينة يقول...

بارك الله لك في جميع أوقاتك وشكلي كدة حاروح بورسعيد بس بعد العيد بقى
السنة دي فشلت إن آخذ أي يوم أجازة ورحت اسكندرية أنا والأولاد بعد المغرب في يوم قضيت الليل هناك ورجعنا الصبح وكان جميل جدا

يعني الحال من بعضه

Tamer Nabil Moussa يقول...

اجازة سعيدة

ربنا يوفقك

تحياتى

الفقيرة إلى الله أم البنات يقول...

انا لما قرأت التدوينه بتاعتك قلت يبقى العيب فى الجازة السنه دى كلها مضروبه
مش عارفه محدش السنه دى من اللى اعرفه او اقرأ له إلا ويشتكى من عدم التصييف بس الاجمل ان بورسعيد القاسم الاعظم فى جميع الاعتذارت
السنه دى كان نفسى اسفر بورسعيد...حبا" فى التغير
مش عاوزة اسافر الساحل الشمالى بكرهه وعلشان ابعد عنه خالص اتجت فى الجهه الأخرى
وبرضه منفعش
مش عارفه مين اللى عينه مدوره قر السنه دى على معظم المصريين
على فكرة...بتعجبنى مدونتك جدا" واغيب وارجع اقرأها
مميزه....عندك اوميجا 3.6.9
لو مش عندك عارفه سعرها كام....؟
جد مش هزار
ام البنات عاوزاها لإحدى البنات
ورود ليك ..معندش سمايلز

مجهول يقول...

السلام عليكم ورحمه الله وبركاته
ااااااااااه
ذكريات ذكريات يا دكتورة

في كل مكان الواحد ليه فيه حكاية وذكري بيحب يرجعلها تاني

انا ساعات بسافر بورسعيد والاسماعيله بسافرها كتير فعلا زي ما قلتي جو جميل وودي اوي تحسي انه بعيد عن تلوث المدنية والزحمة ووجع القلب

السمك هناك تحفة بس للاسف مليش تقل عليه بس مفيش احلي من سمك اسكندرية
عموما كلها سمك

الناس هناك طيبين اوي وملقتهمش فشارين يعني زي ما نسمع عنهم
ابو العربي
هم اه جدعان شوية زيادة عن اللزوم بس طيبين زي اغلب شعب البلد دي
...........
بالنسبة للتلاتيني
لو تفتكري تحذيري بتاع
انهم قادمون

مش قلتلكوا الصين جايين خلاص
هههههههههههه
.......
حكاية الاهلي بأه

لا تعليق
بما اني زملكاوي متعصب من معسكر البيت الابيض الغربي

بس صراحة حشجعكوا الماتش بتاع اسيك
رمضان بأه وكل سنة وانتي طيبة
رغم ان
مجهول مش بيحبك يا أهلي
هههههههههههههه

دمتي بخير وتقبلي تحياتي

mraghy يقول...

السلام عليكم و رحمة الله و بركاته
تصدقي يا دكتوره ان الكل بيشتكي انه مش عارف ياخد اجازه السنه دي
الظاهر عليها سنه كبيسه
ههههههههههههههههههههههههههههههه
عموما اهو يوم احسن من بلاش
حتى اسألي الاستاذه اماني
احيي حضرتك علي اسلوبك الشيق

البنت الشلبية يقول...

سلام عليكم
ازيك يا دكتورة على فكرة انا من عشاق بورسعيد زورتها آخر مرة من سنتين لكن عمرى ما بنسى اليوم ده كان ممتع جدا جدا واستمتعت بيها جددا
وطبعا لانى زملكاوية فبعتبر اهل البورسعيد دول اهلى وبحبهم لاننا والاسماعيلية متفقين على حب واحد هوا حب الزمالك وكرهنا للاهلى

ويارب تكونى بالف صحة وسلامة
سلام

Ma 3lina يقول...

بورسعيد جميلة جدا و رايقة اوى لا زحام و لا حاجة

وجوها كمان معتدل و فيها اماكن كثير للفسح دا غير المعدية

بالنسبة للاهلى فا انا برده مش بحبه بس عادى يعنى


شفتى الصيدلية بتعمل فينا ايه لا اجازات و لا حاجة

معلش تتعوض ان شاء الله

بنت القمر يقول...

اختى الحلوة
من مزارات بورسعيد الحلوة التمشيه على ممر دليسبس وقضيت فيها اجازة حلوة بعد تانويه عامه ودا يجي من 40 سنه
هههههههههه
وركوب المركب الى بور فؤاد تحياتى وعقبال الاجازة الجايه

القلم السكندري يقول...

انا بقي يا دكتورة داخل اعلق علي صورة كل يوم

العيب من المصور اكيد

بيوت مصر كلها سليمة مية مية

والمهندسين المدني بالذات اكتر ناس عندهم ضمير ولا في مهندسين غشاشين ولا فشلة ولا كانوا بينقلو الشيتات من صغرهم ولا كلام من ده

وبعدين انتي عمرك سمعتي عن عمارة وقعت في مصر؟؟؟



تحياتي

mohand يقول...

السلام عليكم

شغال طوال البوست اقول ازاي
دول مش بيحبوا الاهلي

دول جمهور متعصب زياده عن اللزوم

دايما بيشتموا ويسبوا

لاقيتك كاتباها في الاخر


وعموما مصر كلها احسن ناس


انا كل يوم بعدي اهوه وبرش ميه وبحط الكرسي وبقعد قدام المدونه ارحب بالزائرين

حتي اساليهم

متنسيش المرتب بقي

:P:P:P:P
تحياتي

أحمد سلامــة يقول...

مش معقوله يا مراكبي
في مراكبي ميروحش بورسعيد
انا مرة وانا في تالتة اعدادي باين كنت هناك وصاحب محل العاب رياضية سالني اذا كنت اهلاوي ولا زملكاوي
طبعا كنت صغير ومفهمتش قصدو وقلتله زملكاوي
شخط فيه وصرخ وقاللي مفيش هنا حاجة اسمها اهلى وزمالك هنا تنساهم والا انت حر
ووشة احمر وكان هياكلني
وانا ايش عرفني انا يعني
الله يرحمك يابورسعيد
سيبك
كل سنة وانتي طيبة ورمضان كريم

مهبول ومهبوله يقول...

لو قالتي ايه علي بورسعيد لا يمكن اتخلي عن اسكندريه
حرام عليكي ايش جاب لجاب

اسكندريه ياحياتي انتي

مبهول

مؤمنه يقول...

السلام عليكم ورحمة الله وبركاته
حلو الذكريات وبورسعيد فعلا بلد تستحق الاحترام ايحنا عندنا دكتوره فى الكليه من بورسعيد ايه رأيك ما توصيها علينا شويه
دومتى بخير أختى العزيزه
والسلام عليكم ورحمة الله وبركاته

تــــ(حـنة)ــــر يقول...

سلام عليكم ورحمة الله و بركاته
ازيك يا جميل
شوفى بقى
انا يمكن مروحتش بورسعيد غير و انا صغيرة ... يعنى افتكرها شوية
بس مدام فى مصر يبقى اكيد زى العسل
المهم .. اجازة سعيدة
و تحياتى
تمر حنة
اه .. على فكرة انا نزلت البوست الجديد
عايز اشوف تعليقك بجد .. يهمنى كتير

المهـ إلي الله ـاجر يقول...

نورتي بورسعيد أختنا الفاضلة أنتي وزوحك الفاضل


وبورسعيد في إنتظاركم دائما

kafrawy يقول...

ربنا يخلى

ايامكم كلها فرح


انا ممكن اجى اقف الصيدلية

بدلكم

وشوفى هاتدفعى كام

هههههههههه

سلام بقى

الراقـــص مع الذئـــــاب يقول...

السلام عليكم ورحمة الله وبركاته
دكتورتنا الكبيرة
كل سنة وانتي طيبة
علي فكرة انا كمان بمووووووت في بورسعيد ولما بروح هناك علي الطرح مببقاش عاوز امشي
بورسعيد واسماعيلية والسويس ليهم طابع خاص اوي
تحس فيهم بأصالة وشجن...الناس بتستغرب اوي من حبنا لبلدنا
بس يمكن عشان اهلينا اتهجروا وشافوا ويلات الحرب وحكاوي تمسكهم ببيوتهم وقت التهجير وبكائهم وهما اطفال وهما ماشين وسيبين البلد خلانا نحب البلد ديه اوي ونتمسك بيها
انا بحب بورسعيد اوي...واكتر حاجة بتخليني احبها انهم مش بيحبوا الاهلي زينا كدا :p

بورسعيد مش بتحبك يا اهلي...وإسماعيلية كمان

كل سنة وانتي طيبة يا دكتورة

سلام

ahmed mefrh يقول...

الانسان ميرتحش الا لما يروح مكان بيلاقى نفسه فيه ....... يحس انه روحه بتترد فيه من تانى

اجازه سعيده على انها قصيره

عمر عاشق القرآن يقول...

الحمد لله انك عرفتى تخطفيلك يوم واحد off
فيه ناس مش بتعرف خالص !

صاحب البوابــة يقول...

كل عام وأنتم بخير

يهل رمضان من بعيد

حاملاً لي أحلى الذكريات دائماً

أصدق العبرات حتماً

أخلص العبادات دوماً

لرمضان عندي مكانة خاصة

ولكم أنتم أيضاً

يا أحبابـــي

فكل عام وأنتم بخير

وأنتم إلى الله أقرب وعلى طاعته أدوم

رينـــــــــــا يقول...

السلام عليكم ورحمه الله وبركاته
كل عام وانت اللى الله اقرب وعن المعصيه ابعد ان شاء الله
كل عام وانتم با الف خير

Aardvark EF-111B يقول...

يظهر ماحدش متهني بأجازة السنه دي, لكن ممكن تسرح و تركب حصان خيالك, دجلن دجلن دجلن دجلن
مدونه جميله

Unknown يقول...

حمد الله ع السلامة واجازة سعيدة

وكل سنة وانتى طيبة يا دكتورة

:)

Bossy يقول...

السلام عليكم ورحمة الله وبركاته

ازيك يا دكتوره

خساره بجد انك مجتيش راس البر كنتي هتنوريها

كل سنه وانتي طيبه
ورمضان كريم

كلبوزة لكن سمباتيك يقول...

حمدا لله على السلامة
موضوع لذيذ انا حسيت اني سافرت معاكي و عجبني قوي خروجك عن الزمن و ذكريات التهجير
انا حبيت بورسعيد من كلامك عنها
الا هم حيلغوا السوق الحرة هناك لية؟
و الناس اللي شغلتها البيع و الشرا هناك حيعملوا اية؟
ربنا كريم
تحياتي

خمسة فضفضة يقول...

السلام عليكم ورحمة الله وبركاته

محمود الدوح
ان شاء الله ربنا يحقق لك حلمك وتلف مصر
وابقي حط بورسعيد في الاول صدقني هاتتمتع جامد


تحياتي

خمسة فضفضة يقول...

السلام عليكم ورحمة الله وبركاته
ا/ محمد عبد الغفار

تخيل متجوزه وبقالي كمان عشر سنين ...خلاص بقي يلا حسن الختام ....ههههه

يمكن صحيح فيهم ناس متبلين زي ماقلت بس الغاء المنطقه الحره ده هايشرد 90% من اهالي البلد ، ربنا يكون في عونهم
اما السمك فعند حق مافيش حد بيعرف يتعامل مع انواع السمك بحرفنه زي البورسعيديه ، اول ماتجوزت جوزي بقي مبهور بالطرق المختلفه لعمايل السمك واللي كان اول مره يسمع عنها ، طبعا كنت متعلماه من امي وجدتي ربنا يديهم الصحه

ان شاء الله ، اشوفك هناك في شم النسيم بيبقوا احسن يومين خصوصا انهم هايرجعوا احتفالات اللمبي تاني


كل سنه وانت طيب

تحياتي

خمسة فضفضة يقول...

السلام عليكم ورحمة الله وبركاته

باشمهندس عصفور

متشكره اوي وبارك الله فيك

ياريت تروح بورسعيد ياباشمهندس بجد ها تتمتع انت والاولاد

من سنتين عملت زيك كده رحنا اسكندريه الصبح ورجعنا تاني يوم الصبح ومانمناش خالص وهي دي ميزة اسكندريه انها مش بتنام

كل سنة وانت طيب

تحياتي

خمسة فضفضة يقول...

السلام عليكم ورحمة الله وبركاته

تامر نبيل

شكرا علي زوقك،ربنا يوفقك وكل سنة وانت طيب

تحياتي

خمسة فضفضة يقول...

السلام عليكم ورحمة الله وبركاته

ام البنات

شكلها كده اجازة مضروبه حد باصص لنا فيها ...ههههه

مبسوطه اوي اني اتعرفت علي مدوناتك وكمان ان مدونتي المتواضعه دي عجبتك ياريت تبقي ضيفه دائمه

كل سنة وانت طيبه


تحياتي

خمسة فضفضة يقول...

السلام عليكم ورحمة الله وبركاته
مجهول

بس بجد مش بورسعيد والاسماعيليه ليهم نكهه احلي بكتير من اسكندريه ، دا كفايه الهدوء والجو الجميل
وفوق كل ده تحس ان السمك هناك اجمل بكتير و بيتعمل بحرفنه عاليه اكتر من الاسكندريه ميت مره

اما حكاية الفشر دي تهمه باطله الاعلام المصري والافلام هما اللي طلعوها
------------
وزي مابتقول انهم فعلا قادمون ان ماكانوش خلاص جم
ههههههه
-------

ازاي يعني مجهول مش بيحب الاهلي دا كل مصر بتحب الاهلي
لا كده ازعل منك

عموما ياسيدي زي ماقلت احنا في ايام مفترجه سماح المره دي

كل سنة وانت طيب

كراكيب عادل يقول...

انا بحب مدن القناة كلها مش عارف لية بحب عادتهم واسلوبهم

وفعلا اكلت من ايديهم احلي سمك

كل سنة وانتي وعائلتك بخير

ورمضان كريم

أمــانــى يقول...

أختى الحبيبة
كـل رمضان وانتى بخير وياااااارب يكون رمضان سعيد عليكى ويكون فيه الخير كله يااااااارب آمـــــــين

AHMED SAMIR يقول...

بورسعيد مدينة جميلة بس اسوأ ما فيها ضباط الجمرك
مش علشان حاجة بس علشان من كتر تعاملهم مع البضايع اصبح الناس عندهم عبارة عن بضاعة مش بشر من لحم ودم
تحياتي ليكي

خمسة فضفضة يقول...

السلام عليكم ورحمة الله وبركاته

مراغي

شكلها كده فعلا كل اللي اعرفهم ماحدش اتهني باجازته السنه دي

وعلي رايك الحمد لله اني عرفت الحق يوم

شكرا علي ذوقكوكل سنة وانت طيب


تحياتي

خمسة فضفضة يقول...

السلام عليكم ورحمة الله وبركاته

البنت الشلبيه

بورسعيد عشاقها كتير اوي ، واي حد بيروح هناك لازم يتمتع اكيد

ايوه ياستي ماهو الزمالك هناك فرخه بكشك
بس برضو الاهلي عمهم وحابس دمهم ...هههههه


كل سنةوانت طيبه

تحياتي

خمسة فضفضة يقول...

السلام عليكم ورحمة الله وبركاته

د/ مرام

كل سنه وانت طيبه

زعلتني اوي ..باه كده مش بتحبي الاهلي

عاوزه اقولك حكمه قالوها في وصف الصيدليه : الصيدليه سجن بابه مفتوح

عموما ان شاء الله تتعوض قريب

تحياتي

خمسة فضفضة يقول...

السلام عليكم ورحمة الله وبركاته

بنت القمر

بالظبط كده ، شكله حفظاها انت كمان

بس اسمها المعديه مش المركب

ان شاء الله تكرري الزياره لان بجد سنه عن سنه بتحلو اكتر


كل سنة وانت طيبه


تحياتي

خمسة فضفضة يقول...

السلام عليكم ورحمة الله وبركاته

القلم السكندري

مش كده برضو ما انا كنت بقول نفس الكلام ..هههههه

كل سنة وانت طيب

خالص تحياتي

خمسة فضفضة يقول...

السلام عليكم ورحمة الله وبركاته

مهند


صحيح مش بيحبو الاهلي ولا بيطيقوا سيرته ، بس ما يمنعش اني بموت في بورسعيد

ايوه كده عاوزاك تحطها في عنيك ..ههههه ، وابقي نزل المشاريب للزوار طول شهر رمضان علي حسابي .....هههههه

وماتخافش ان شاء الله المرتب والحوافز والبدلات واللذي منه ...حقك بالكامل محفوظ ....ههههههه


كل سنة وانت طيب يامهند وان شاء الله تحقق كل احلامك ويارب يسعد ايامك

تحياتي

خمسة فضفضة يقول...

السلام عليكم ورحمة الله وبركاته

د/احمد سلامه

معلش بقي اكيد باشمهندس المراكبي هايزورها قريب

انت زملكاوي يادكتر ..ازاي كده ،

في ايه ياجماعه هو كل اللي داخلين يعلقوا لحد دلوقتي زملكاويه ، ...لا دا انا كده هافتكر ان الزمالك هو نادي الاغلبيه

بس علي فكره خط القناه كله عندهم الزمالك ده بيتهم التاني

كل سنة وانت طيب يا دكتور

تحياتي

خمسة فضفضة يقول...

السلام عليكم ورحمة الله وبركاته

مهبول ومهبوله

صحيح اسكندريه مافيش بعد كده
بس صدقوني خط القناه كله وخصوصا بورسعيد ليهم نكهه تانيه خالص
القناه والمعديه والمراكب اللي رايحه جايه قدام عنيك والممشي بتاع دليسيبس وشارع طرح البحر وغيرها من الاماكن الجميله
بجد روعه

والسمك هناك الذ الذ بكتير
انا جربت السمك في اسكندريه ، عند قدوره اللي بيقولوا انه اشهر مطعم سمك هناك ، والله مايجيش حاجه جمب بتاع بورسعيد

عموما دا ما ينفيش اني برضو بحب اسكندريه

كل سنة وانت طيبين

تحياتي

خمسة فضفضة يقول...

السلام عليكم ورحمة الله وبركاته

مؤمنه

فعلا بلد تستحق كل الاحترام

بالنسبه للدكتوره بتاع بورسعيد اكيد كويسه معاكم زي كل البورسعيديه ، مش كده ولا .....

ربنا يوفقك وينجحك من غير وسايط

كل سنة وانت طيبه

تحياتي

خمسة فضفضة يقول...

السلام عليكم ورحمة الله وبركاته

تمر حنه

طبعا طالما في مصر تبقي تحفه ....(:

كل سنة وانت طيبه

ان شاء الله اروح اقرأالبوست واسيب تعليقي


تحياتي

خمسة فضفضة يقول...

السلام عليكم ورحمة الله وبركاته

المهاجر الي الله

بورسعيد منوره باهلها

كل سنة وكل البورسعيديه طيبين

تحياتي

خمسة فضفضة يقول...

السلام عليكم ورحمة الله وبركاته

كفراوي

ربنا يسعد ايامك انت كمان

وماشي يا سيدي موافقه تقف بدالنا ، ايه رايك تاخد شفت الصبح طول شهر رمضان
وعموما مش هانختلف علي الفلوس ...ههههه

كل سنة وانت طيب

تحياتي

خمسة فضفضة يقول...

السلام عليكم ورحمة الله وبركاته

باشمهندس محمد الراقص مع الذئاب

كل سنة وانت طيب
اكيد مش هايكون فيه تفسير زي لحب اهل القناه الشديد
لبلادهم زي اللي انت قلته ده

انت كمان داخل تقول مش بحب الاهلي ....عاااااااااااااااااا
انت كلكم عليا ولا ايه ...ههههه

طيب يا سيدي ماهو الزمالك بيتكوا التاني

عموما برضو الاهلي فوق الجميع


كل سنة وانت طيب

مع السلامه

خمسة فضفضة يقول...

السلام عليكم ورحمة الله وبركاته

ابو مفراح

فعلا لما تكون في مكان بتحبه مع ناس بتحبها بتحس بسعاده مافيش زياه

كل سنة وانت طيب


تحياتي

خمسة فضفضة يقول...

السلام عليكم ورحمة الله وبركاته

مشروع بطل

الف حمد والف شكر ليك يارب

كل سنة وانت طيب

خمسة فضفضة يقول...

السلام عليكم ورحمة الله وبركاته

صاحب البوابة
كل سنة وانت الي الله اقرب وعلي طاعته ادوم
اللهم بلغنا الجنه برمضان

تحياتي

خمسة فضفضة يقول...

السلام عليكم ورحمة الله وبركاته

رينا
وحشاني جدا جدا


كل سنة وانت طيبه وان شاء الله نكون جميعا من عتقاء النار في رمضان


تحياتي

خمسة فضفضة يقول...

السلام عليكم ورحمة الله وبركاته

Aardvark EF-111B

تصدق كلهم قالوا كده برضو
يظهر حد عينه مدوره بصلنا في الاجازات

شكرا علي زوقك نورتني

كل سنة وانت طيب

خمسة فضفضة يقول...

السلام عليكم ورحمة الله وبركاته

انسانه

الله يسلمك يا جميله وكل سنة وانت و كاميكاز طيبين

تحياتي

خمسة فضفضة يقول...

السلام عليكم ورحمة الله وبركاته

بوسي

الحمد لله انت اخبارك ايه
معلش بقي ملحوقه ان شاء الله السنه الجايه

عموما كمان راس البر باروحها في اي وقت يوم او اتنين كده خطف وارجع ده لانها قريبه مني ، وكمان حفظاها حته حته اكتر من بلدي نفسها
بصراحه بعد التعديلات الاخيره اللي اتعملت هناك جمالها زاد كتير اوي

كل سنة وانت طيبه

تحياتي

خمسة فضفضة يقول...

السلام عليكم ورحمة الله وبركاته

سمباتيك
اخبارك ايه حمد الله علي السلامه
صدقيني ولو رحتي هناك هاتحبيها اكتر
عارفه بورسعيد في ازهان الناس مرتبطه بالتسوق والمشتريات وبس
بس اللي يعرفها علي حقيقتها مش ممكن يفوت سنه مايروحش هناك

ايوه هايلغوا المنطقع الحره السنه الجايه ، ليه..؟
هما بيقولوا علشان الجات واتفاقيات التجاره والكلام الحمضان ده بس اعتقد انه افتري زي بقيت الافتري الموجود في البلد ، ومصالح للحيتان الكبار اللي كل همهم المكسب ومش مهم البني ادمين

ربنا يكون في عونهم

كل سنة وانت طيبه

خمسة فضفضة يقول...

السلام عليكم ورحمة الله وبركاته

الفنان عادل

تقريبا كلنا بنحبهم زي ماقال الراقص مع الذئاب يمكن علشان مكانتهم في قلوبنا بسبب المعاناه اللي عانوها ايام الحرب

كل سنة وانت طيب و الله اكرم

تحياتي

خمسة فضفضة يقول...

السلام عليكم ورحمة الله وبركاته

اماني

وانت طيبه يا قمر
وان شاء الله رمضان سعيد علينا كلنا

تحياتي

خمسة فضفضة يقول...

السلام عليكم ورحمة الله وبركاته

دكتور احمد سمير

بس عارف اليومين دول متساهلين جدا يمكن حاسين بالبلد والبياعين الغلابه فابيتساهلوا علشان الناس تيجي

كمان مع العربيات الملاكي من زمان وهما كويسين

اما البيجو والاجره بيصعبوها شويه علشان تجار الشنطه مع انهم خفوا اوي اليومين دول

خالص تحياتي وكل سنة وانت طيب

koukawy يقول...

انا مارحتش غير مره واحده من سنتين و قعدت تلات ايام بس مش ناويه اكررها
لأني الحقيقه زهقت و مكنتش مبسوطه خالص رغم اني كنت في الشوارع طول اليوم و شفت البلد كلها تقريبا بس مش عارفه مستمتعتش
و بالنسبه للسمك انا اصلا مش بكله فمش عارفه حلو و لا لأ

زحل الفلكي يقول...

جيت متأخر اوي
في بوست تبعنا اوي

حعلق من الاخر للأول وهي ان البورسعيديه بيكرهوا الاهلي

وجهة نظر تحترم علشان شايفين ان الاهلي نادي حكام ونادي الحكم اصلا
وتاني حاجه شايفين ان عدم تشجيع المصري يعتبر اخلال بالانتماء للبلد

انا مختلف في النقطتين دول انا وكثير من البورسعيديه
وفيه اهلاوية وزملكاوية وناس بتشجع جميع الاندية في بورسعيد ولكن الغالبية العظمي تشجع المصري بالجاااامد اوي

نيجي بقا لباقي البوست وبصراحة
انتي وصفتي بلدي بشكل فرحني جدا ان فيه ناس بتحب بلدي زي مبحبها
بورسعيد بلد جميله ومريحة
يعني مثلا عندنا ممكن تدي 3 مواعيد في ساعة وتخلصيهم

ممكن تنزلي تشتري طلبات البيت وترجعي في اقل من نص ساعة

يعني انواع من الانجاز
واه كمان مثلا اغلى تاكسي هنا الي بيجيبك من اخر الدنيا لأول الدنيا تديله 3 جنيه ويبقا فرحان اوي
الميكروباص ب ربع جنيه من اي حته لأي حته

يعني حاجه لذيذة اوي والحمد لله

لما تيجي في شم النسيم الجاي ان شاء الله اكيد حتلاقي شغل اجمل في بورسعيد

وتنوري بورسعيد يا دكتورة

ومعلش اني جيت متأخر اوي

مدحت محمد يقول...

رحلة سعيدة يادكتور
على فكرة بورسعيد محافظة رائعه اوى
انا رحتها مرتين بس طول حياتى
وكلهم السنة دى الحقيقة
رغم انها متبعدش عنى كتير على نفس الخط
اما حكاية كره البورسعيدية للاهلى
فمعتقدش
ده اتجاه البورسعيدية كلهم
لانى كنت ايام الجامعه
ليا زمايلى بورسعيدية كتير اوى اهلاوية
وكل سنة وانتى طيبة

غير معرف يقول...

اجازه سعيده ودايما مع بعض ان شاء الله

القرآن الكريم