TvQuran

٢٠٠٧-١١-٢٩

مافيش مقارنه

شوفوا الفيديو ده




الاعلان ده بيتذاع في التليفزيون البريطاني من فترة ، مش جديد يعني

اكيد للوهله الاولي هاتفتكروا انه مجرد كمبيوتر جرافيك
بس في الحقيقه ان كل ده حقيقي مش جرافك ومافيهوش خدع سنيمائيه ، وبيستخدموا فيه اجزاء حقيقية من العربيه اللي بيتم الاعلان عنها
Honda Accord
الاعلان ده بيعتبر اكتر اعلان اتشاف علي النت لحد دلوقتي
واستغرق تصويره 3 اسابيع واتعاد اكتر من 500 مره لحد ماوصلوا ان كل حاجه فيه اشتغلت مظبوط ،
يعني 3 اسابيع علشان يطلعوا دقيقتين عرض علي الشاشة !!!......يا صبرهم
وكالة الاعلان اللي عملته
Wieden & Kennedy
نزلت دي في دي بالميكينج بتاع الاعلان ، الجزء بتاع الشكمان بس هو اللي اتاخد علي لقطتين

كمان ماتتخضوش لما اقولكم انه اتكلف 6 مليون دولا بس ...يا بلاااااش
ووكالة الاعلان اقسمت ان عمرها ماهاتعمل حاجه زي كده تاني

يمكن في ناس تشوف ان الاعلان ده ممل ومافيهوش حاجه تشجع علي شرا العربيه ، يعني مش بيعرض مميزات المنتج اللي بيعلن عنه ، علي العكس بشوفه قمه في الابداع والصبر والاتقان

وانا بتفرج عليه افتكرت اعلانات التليفيزيون المصري واللي بقت ولا الفيديو كليب في زمانه
دا غير اعلانات الشحاته اللي علي كل لون ، من اول مستشفي 57357 وذوي الاحتياجات الخاصه لحد ايتام الصعيد اللي مش لاقيين بطانيه تحميهم من برد الشتا

واعلانات الضرايب مصلحتك اولا
اللي تعلي الضغط

واعلانات عزو باشا و مصانعه بتاع الحديد اللي كل الناس فيها فخورين بنفسهم

ولا اعلانات القراءة للجميع وماما سوزان

ومش عاوزه اتكلم بقي علي اعلانات مساحيق الغسيل ،اللي بتديني احساس ان البلد كلها مليانه بقع وعاوزه تنضف

والسمنه الصناعي اللي بطعم البلدي وتحدي


ولا اعلانات اوعي يفوتك القطر دي البلد بتتحرك ( من امتي )، اللي تحسسك ان الشغل في المصانع مرطرط والشباب متبطرين عليه ، هما كانوا لقوا شغل في اي حته وقالوا لا ، دا انا اعرف خرجين هندسه وألسن وسياسه واقتصاد بيشتغلوا في اشغال المعمار علشان مش لاقيين شغل في حته تانيه


صحيح مصر فيها عقول مبدعه احسن من بره بكتير اوي ، ويقدروا يعملوا حاجه زي كده واحسن ميت مره

بس قدمنا فتره طويله اوي علي مانوصل ان حاجه زي دي تتعمل للاعلان عن منتج مصري ، لان العيب مش في قلة العقول المبدعه العيب في حاجات تانيه كتير مش من ضمنها المستهلك

67 comments:

عصفور المدينة يقول...

اتفرجت على الفيديوهات ولحقت أول تعليق كمان

عصفور المدينة يقول...

باحس لما باشوف المذيعين المصريين أو الإعلانات المصرية إنها إنتاج الاتحاد الاشتراكي حتى لما بيحبوا يطوروا حاجة يحاولوا يغشوها أو يقلدوها مع إن المبدعين موجودين ولكن نظام المحسوبيات لا يسمح لهم أصلا باستخدام الكفاءات
وتحسي إن المذيعين من زمن آخر وحتى الاصطلاحات المستخدمة بتبقى ساذجة ودارجة يعني فيه سمة معينة كدة ما قدرتش اعبر عنها غير بكلمة الاتحاد الاشتراكي


بخصوص إعلان الظائف فعلا فيه فكرة وموجودة وبتتنفذ ان المصانع بتبعت الوظائف اللي عنده لاتحاد الصناعات واتحاد الصناعات بيستقبل طلبات التوظيف ولكن هذا في إطار التغطية على مشكلة موجودة مشكلة البطالة ومحاولة إلقاء تبعتها على الشاب نفسه إنه قاعد ع القهوة والشغل كثير والبلد بتنضرب في الخلاط وهو بيلعب شطرنج طبعا فيه كدة لكن الأغلبية بتدور على شغل وحفيانة

برضه موضوع مستشفى السرطان ده توزيع لمسئولية علاج مرضى السرطان على الشعب الكادح اللي بيخدع ويدفع جنيه على جنيه وفي النهاية لا يتلقى المرضى معاملة ولا علاج يليق وهذه سيرة محزنة لعل من احتك بها يعرف الحال

وبعدين المستفز إن ييجي يقولك لمينا كثير ولسة عايزين نلم أكثر

عصفور المدينة يقول...

بما إني بقى هنا لوحدي حاحط تالت تعليق
:D
نسيت أقول الدي إس إل عمل فرق معاكي ما شاء الله

AHMED SAMIR يقول...

من زمان وانا موضوع اعلانات بلاد برة دي بتستهويني
بحب جدا اتفرج عليها بتكون اعلانات مبتكرة ومش متوقعة
ودايما الاعلان بتلاقي فيه مفاجأة..وممكن جدا انك تلاقي المنتج ماتقالش غير في اخر الاعلان وساعات كتير مابيتقالش انما بيتكتب ع الشاشة اسم المنتج في نهاية الاعلان
طبعا مش هقارن علشان المقارنة ممكن تؤدي الى جلطات وسكتات دماغية وكدة
بس يكفي المقارنة بين الاعلان دة وبين اعلان لبان سمارة القديم
يا شمارة يا شمارة.....فاكراه؟
تحياتي واحتراماتي

تــــ(حـنة)ــــر يقول...

هو بجد اكتر من رائع
ويخلى الواحد يحط وشه فى الأرض من الكسوف
تحياتى يا دكتور
تمر حنة

عمر محمود يقول...

بجد حراااااااااااااام
والله العظيم يا جدعان عندنا طاقات
إمتى تطلع وتشوف النور
حرااااااام عليكى يا حكومة سيبى الطاقة تطلع أحسن تنفجر

Unknown يقول...

عندك حق حقيقى اعلانات تجيب الضغط
اعرف واحد بيقولوا عليه اخويا خريج هندسة بترول وتعدين السويس اول دفعته
راح اشتغل فى بنزينه عشان البلد تتحرك
ههههه
حسبى الله ونعم الوكيل
موضوع جميل

بنت الصالحين يقول...

ياااااااااااه
مين يقدر يقول ان الاعلان ده ممل
اه يافضفضه ممكن يكون ممل بس دول اللى مش بيفهموا واللى عايزين اعلانات صابون ومسحوق الغسيل
اما بقى اللى بيفهموا صح هما اللى متحسرين دلوقتى اما شافو الاعلان ده
انا دايما بحب الادفيرتايزينج ومهتمه بيه وده برده ناتج عن دراسه

بس اعلان رووووووووووووعه بجد
باذن الله نعمل زيه واحسن منه
بس فين واللى بينتجوا وبيحطوا فلوسهم مش بيحطوها الا فى الكلام الفارغ

قرفونا الله يهديهم

بجد بوست رائع ومدونه اروع

محمد العدوي يقول...

الفرق بين الاعلان دا واي اعلان في التلفزيون المصري هو الرفق بين اي مستشفى هناك واي مستشفى هنا هو الفرق بين اي فيلم هناك وأي فيلم هنا .. يمكن هو الفرق كمان بين التعامل مع مفردات الحياة هناك وهنــا ..



شكرا على اني استمتعت بهذا الإعلان .. كثيرا .

يا مراكبي يقول...

إعلانات في مصر؟ هو إحنا عندنا إعلانات في مصر؟ الإعلانات زي أي حاجة .. علم وفن وهندسة .. وإحنا عندنا أبعد ما يكون عن تطبيق الثلاثية دي .. فتلاقي الفهلوة والفكاكة ومشي حالك

مشي حالك يا دكتورة

قال إعلانات مصرية قال

mohand يقول...

السلام عليكم

ايه دا بقي
هو انا معلقتش امبارح؟

والله كنت فاكرني علقت امبارح

شكلي هيست يا دكتوره
شوفيلي حاجه للزهايمر بقي


حضرتك قولتي ما فيه الكفاية
مفيش مقارنه

ومتنسيش ان التخصص مهم قوي

يعني العالم دي
لما تحب تعمل جزئية مثلا محتاجه ميكانيكي
تجيب واحد متخصص
مش فهلوه وخلاص
حتي لو كان من اي دولة تانيه

تحياتي يا دكتورة

http://kasperb4.blogspot.com/ يقول...

ايه ده
!!!

الفيديو تحفة
مش ممكن

http://kasperb4.blogspot.com/ يقول...

الأعلانات المصرية
؟؟

ألاقيش عندك حاجة ضد الترجيع
:D

لا مؤاخذة يعني
ههههههههه

محمد عبد الغفار يقول...

هو الفرق بين الأحتراف والفهلوة

اما الشغل فى المصانع مرطرط والشباب بيتبطر عليه فدى حقيقة

لو بطلنا نحلم نموت يقول...

حاجه في منتهي الروعه بصراحه
وحاجه تشل اوووووووي
وتحسسنا ان احنا بلد ...........

بس ليه احنا عندنا اعلانات في منتهي الروعه والدقه

ميلودي تتحدي الملل

واحنا مش عارفين نتحدي ميلودي

Unknown يقول...

احنا عايشين في الليفت

سها السباعي يقول...

لما اعمل الحاجة اعملها صح .. اعملها باخلاص .. اعملها باتقان
وده مش موجود هنا الا من رحم ربي

تحياتي

سها السباعي يقول...
أزال المؤلف هذا التعليق.
سها السباعي يقول...

بخصوص الشغل انا موافقة تمتما ان الواحد يشتغل اي شغلانه شريفة بدل القعده حتى لو معاه دكتوراه
ولولا اني مربوطة بالبيت والعيال ما كنتش قعدت
لكن برضة ما نظلمش الشباب اللي يتعرض عليه شغل 10 ساعات في اليوم ب 300 جنيه وهو هيركب مواصلات بس باربعه جنيه في اليوم وعايز ياكل لانه مش هيقعد 10 ساعات منغير اكل وعايز يلبس ( يلبس بمعنى يتكسي مش يبس ماركات)
احسبوها بقى
صحيح الشغلانه هتجيب شغلانه واللي يسعى ربنا يسعى معاه
لكن ما تنكروش ان مستوى الاجور مختلف تماما عن مستوى الاسعار
بالشكل ده هيصرف على الشغل
واصحاب الاعمال عايزين يكسبو الى اقصى درجة
مين يقول ان مدرسة تاخد 6 حصص في اليوم طول الاسبوع وبعدين يدوها 120 جنيه
على الاقل المرتب يساوي المجهود
تحياتي

رينـــــــــــا يقول...

السلام عليكم
بجد يا صبرهم ويادقتهم
وياحرقه دمى من اعلانات المصريه تحديدا فى القنوات المصريه عااااااااااا

البنت الشلبية يقول...

سلام عليكم
ازيك يا دكتورة
طبعا مفيش وجه مقارنة بين اعلاناتنا واعلاناتهم
هما هناك بيدو كل حاجة حقها
هنا بقى مش عايزين يتعبوا ولا يدو فرصة لغيرهم يشتغلو ويتعبو
اقول ايه ولا ايه
هوا صحيح الاعلان بتاع البطالة ده حقيقى
بيقولو لو خريج ومش لاقى شغل اتصل على رقم معين
قولت اتصل يمكن الاقى ونسيت
مش عارفة يا اترى هلاقيلى شغلانة محترمة!!!
مأظنش
======
سلام

مهندس مصري بيحب مصر يقول...

إعلان تحفة رائع بجد
ربنا يكرمك انك خليتي الواحد يشوفه

أما القطر اللي بيتحرك فربنا يستر و ما يدوسشي علينا

أنا بطلت أتفرج على التلفزيون المصري من سنة تقريباً من ساعة ما دخلت وصلة الدش المركزي
كده انضف و أحسن

Unknown يقول...

استاذتنا
وش مفيش مقارنه
هنا مثلا تلاقي اعلان عن ثلاجه
المفروض يجيبوا مواصفات الثلاجه او اي حاجه تعبر عنها لا تلاقي عندنا جايبين شكل الثلاجه وواحده ست واقفه ترقص جنبها او تفتح الثلاجه تلاقي واحده ست جواها وعماله تغني
او تلاقي عيل اهبل انااسف عنده بتاع 25 سنه وماشي ببسكوته او علبه عصير عمال يغيظ اصحابه
حاجه تحرق الدم فعلا
احنا عندنا افكار ومواهب بس مين يطلعها
وجزاكم الله خير

شــــمـس الديـن يقول...

الموضوع كلة عبارة عن منظومة كاملة متكاملة

هما فعلا متقدمين ... و الكلمة دي مش من فراغ لما تتقال ... لما بتتقال بيبقي فعلا عن انهم عايشين في منظومة اولا و اخيرا تحترم و تقدر قيمة الانسان ... و بتربي الانسان و بتخلي عقلة يعمل و علشان كدا كل الناس بتحترم عقليات بعض ... اي نعم فيه سلبيات , لكن السلبيات الطبيعية ... اللي بتكون الاستثناء و الاساس ماشي صح ...


عامة مش بحب اقارن لان المقارة اساسا غير عادلة لعدم التكافؤ

بس سيبك ... الاعلان دماغ و انا من زمان بحب الالعاب الميكانيكية اللي بتتابع مع بعض

Unknown يقول...

هاتي شاي يا دكتورة

بصي يا ستي، هاقولك على حاجة غريبة شوية
انا واخد بكالوريوس في التسويق، فعندي مشكلة أصلا مع الاعلانات اللي حضرتك بتتكلمي عليها
ومسالة الابداع مش في الإعلان بس في حاجات كتير

رغم المدونة الابيض والاسود بتاعتي، اللي بتتكلم على الماضي، إلا غن كل شغلي في الدراسات المستقبلية، ولما شفت الإعلان عند حضرتك ضحكت وهأقولك ليه
اولاً: تصدقي إنك استفزيتيني لدرجة إني هأقعد واتكلم .. بس المرة دي مش باتكلم على الماضي .. تعالي نبدأ .. بس لو التعليق ماكفاش هأكمل ف تعليق تاني
محسوبك فاضي ساعتين

أولاً: ايه اللي يمنع إننا نعمل إعلان زي ده؟
الاجابة حاجات كتير اوي
أولها مشاكل فكرية عندنا في طريقة تفكيرنا وتعاملنا مع ظواهر ربنا الطبيعية .. وأهمها تعاملنا مع الزمن
احنا تعاملنا مع الزمن تعامل غريب جداً وعارف انك بتقولي ايه علاقة الزمن باعلان هوندا

الزمن عبارة عن تلات مربعات لو حضرتك عاوزة ترسميهم علشان نكمل الشرح
تلات مربعات جنب بعض
المربع الأول: الماضي
المربع التاني: الحاضر
المربع التالت: المستقبل

احنا عندنا اول مشكلة في التعامل مع المربع الماضي، إننا مش بنقدر نشوف الماضي إلا بالكلمات الكبيرة، زي احنا بتوع الأهرامات وإحنا الفراعنة العظام، او حتى الماضي الإسلامي، هتلاقي كلمات الأناشيد الإسلامية مليانة بكلام زي
ملكنا هذه الدنيا القرونا
وأخضعها جدود خالدونا
ودي كلمات هاشم الرفاعي

يعني بنتكلم على الماضي بشكل أسطوري جميل، من غير ما ندور جوة أنفسنا هنتعلم من الماضي ده ايه
خلينا اكمل في التعليق اللي الجاي

Unknown يقول...

يبقى احنا بنتكلم على اماضي من غير ما نفكر هنتعلم من الماضي ده ايه .. ودي أول حاجة ترديد الكلام من غير فهم
الحاجة التانية: إننا لما بنتكلم على الماضي بنحب دايما نظهر الماضي إنه كان زي الفل، وإنا أجدادنا لم يخطئوا في حياتهم
عاوزة تضحكي على حاجة، والدتي قرات إحدى التدوينات .. وقالتلي كده برضه يا أحم تقول علي إني كنت بالبس قصير
قلتلها ودي فيها ايه مش دي الحقيقة
احنا عاوزين نبص للماضي بنظارة الحقيقة + نظارة التعلم .. ليه بقى عشان نقدر نطلع جيل، ما يغلطش نفس الأخطاء اللي أحنا بنغلطها، لكننا لا نفعل ذلك، اقصد لا نتعلم من الماضي ولا من دروسه وبالتالي لما ييجي الحاضر بنكون لم نكون الخبرة المجتمعية، أو اللي بيسموها (حكمة الشعوب).
ده التعامل مع الماضي، التعليق الجاي التعامل مع الحاضر.. استحميلني بقى عشان فاضي

Unknown يقول...

التعامل مع الحاضر، بيحتاج مننا إن احنا دايما نتعلم أول حاجة إن الحاضر اللي إحنا عايشينه ده، هو خطوة للمستقبل، وبالتالي لازم نتعلم إزاي ناخد نفسنا من مربع الاحتراق الذاتي اللي عايشين فيه
هاتيلي حد في الدنيا لا يشتكي واقعه،
طيب الشكوى لن تغير شئ من الواقع، اومال نتعامل إزاي
لازم نكون اتربينا من البداية خالص على اننا عندنا القدرة على معرفة ذواتنا، حتى لو كنت إنسان بسيط، بس لما بيكون عندي القدرة على إني اعرف الإيجابيات اللي عندي، والسلبيات اللي جوايا بالتالي، باكون عارف كويس جدا، إيه نقاط القوة ونقاط الضعف اللي عندي، فلما يواجهني الواقع بمتطلباته أقدر اكون جاهز بنقاط القوة بتاعتي، واواجه الواقع بيها
يعني عاوز أضرب مثال، واحد زي المبدع عمار الشريعي
نقاط القوة اللي عنده ربنا ادهاله، وربنا سبحانه وتعالى، وهب لكل واحد فينا نقاط قوة كتيرة، اشمعنى عمار الشريعي استطاع يستفيد من نقاط القوة دي
ليه دايما بنحس إن الناس اللي أبدعت هي ناس عندها حظ، ليه ما نكونش احنا اللي مادورناش على اللي جوانا وطلعناه

لذلك هتلاقي الناس دايما بتشتكي من الحاضر، وماحدش يقدر يلوم عليها، كل اللي بتكلم عليه حاجة كده زي بأتمنى يارب الناس تكون كده

باتمنى الناس ما تكونش ردفعليين، يعني إذا حصلت حاجة، فأنا اقول آه خمسة فضفضة هي السبب، لا عصفو المدينة، لأ ده صباغ، ليه ما أكونش انا السبب
ليه انا ما أقعدش أفكر في نفسي وفي اللي ربنا إدهولي من إمكانيات، واستخدمها في الوصول لهدفي ، بشرط إن الهدف ده يكون حلال، وشوية شروط تانية مش محلها دلوقتي
المهم ، خلينا بقى في المستقبل في التعليق اللي جاي

Unknown يقول...

جينا للمستقبل، شمس الدين في التعليق اللي قبلي قات إنها مشكة منظومة كاملة وده حقيقة

شوفي يا ستي

هو صناعة المستقبل بتتم ازاي، -مع خالص مودتي لكل واحد هيقولي المستقبل بايد ربنا لأنها بديهية عندي- انا باتكلم التخطيط للمستقبل وده اسمه صناعة المستقبل

أول خطوة في صناعة المستقبل هو وجود حلم للمستقبل ده، طيب هو إحنا عندنا حد قاعد بيحلم للمستقبل؟
يمكن آه .. يمكن لأ ..مش عاوز اجاوب

طيب القدرة على الحلم دي بتيجي منين؟

من القدرة على التخيل
طيب إحنا عندنا حد عنده قدرة على التخيل؟

برضه يمكن آه .. يمكن لأ .. مش عاوز اجاوب

طب التخيل ده بيجي إمتى
أيوة ده السؤال بقى

بيجي لما نكون بنعمل أجيال حرة، غير مقيدة

احنا أول كلمة بتتقال لينا اسمع كلام ماما واسمع كلام بابا، وبنعمل كده
وفي المدرسة ممنوع النقاش مع مدرس، عليكي إنك تحفظي المنهج علشان تسطريه في كراسة الإجابة آخر السنة

ويمكن أهلنا وأحنا رايحين الامتاحانات يدعولنا الدعاء الامتحاني المأثور: يارب اللجنة تكون خفيفة
ومش عارف ايه علاقة اللجنة الخفيفة بإن الطالب يجاوب أو لأ.. بس بلا إرادة، وفي اللاوعي عندنا بيكون في حاجة بتقولنا، إننا مش هننجح إلا إذا كان فيه حد تاني له دخل في الموضوع
اللي وضع الأسئلة
اللي كان بيراقب
اللي كان بيصحح

المهم إنه أي حد غيرنا

لما نكبر شوية، ونشتغل، يبقى اكيد الراجل الكبير المدير اللي في شغل هو اللي فاهم أحسن مننا، ونتمنى من جوانا إننا نكون مديرين، علشان يبقى عندنا ناس كتير، ونقول لبتاع الشاي هاتلي شاي يا بني ، واذا حد سال علي قوله في اجتماع

ولما نكبر ونبقى متدينين، فإحنا مستنين الفتوى من الشيخ، في كل كبيرة وصغيرة، عشان كل حاجة مش هنعرف نعملها إلا اذا خدنا رأي الشيخ،
مع خالص مودتي لكل اللي ناوي يسبني بسبب الكلام ده، بس الدكتورة قات خمسة فضفضة، وأنا اعتبروني واحد بيهرتل في الكلام

يبقى عندي سلطة الأب والأم، وغزاي تم استخدامها، انا عاوز افرق بين التربية اللي تتطلع أولاد أحرار وعندهم استقلالية، ودي اسمها تربية
وبين الأوامر والتسلط الأبوي، اللي يطلع عيال تقدر تعمل اللي هي عاوزاه لما سلطة الأب تغيب
وبعدين سلطة المدرس في المدرسة
والمدير في العمل
والشيخ في الجامع وعلى الفضائيات

ودائماً في انتظار من يأخذ لنا القرار ومن يفكر بالنايبة عنا
وبالتالي لما تقولي لحد تعالى نحلم ببكرة، يكون الاجابات اللي حضرتك بتشوفيها بتاعت الحاضر المضغوط

وبالتالي: لا فيه تخيل، ولا حلم، يعني مفيش ابداع .. بتكلم على العموم مش في الحالات الاستثنائية

وإذا ماكنش فيه ابداع، فمين يصنع الحضارة؟
والحضاة في الأصل هي الشئ النافع اللي ينفع الناس، وانا ضد مقولة عاوزين نعيد حضارتنا، لأن الحضارات لا تعاد، نكمل في التعليق الجاي

غثاء السيل

Unknown يقول...

دورة الحضارات بتمشي بطريقة عشوائية منتظمة
عشوائية يعني مش ممكن حد يتوقع بكرة هتكون فين؟
النهاردة في الصين مع الحضارة الصينية
بكرة في مصر مع الفرعونية
بعده في اليمن
بعده في الشام مع الفينقيين
بعده عند المسلمين
بعده عند الغرب
بعده الله أعلم
دي الحركة العشوائية للحضارة
اومال منتظمة ازاي
لأن الحضارة ناموس من نواميس الله في الكون، لا تحابي ولا تجامل
لا تحابي مسلمين، ولا غير مسلمين
دي قوانين ربانية
الحضارة مع القوة بس خلاص دي المعادلة
والضعيف يدور حوالين القوي

يعني النواة في الذرة ارتباطها العنصري قوي، والالكترون اربتاطه العنصري ضعيف، فتلاقي الالكترون عمال يدور في حركة عشوائية حوالين النواة القوية .. ده في الذرة اللي بنقول عليها اصغر حاجة

في المجموعة الشمسية
الشمس قوية وتقريبا ثابتة، بس الكواكب بما فيهم الرض أضعف منها، وبالتالي بيدوروا حواليها

ده قانون ربنا في الكون، عشان الناس تتعلم السعي والحركة، وتكون قوية.. وحتى الإسلام العظيم لما يعلمنا نكون أقوياء .. دائما يقرن مع القوة .. الرحمة والعفو .. والمغفرة والتسامح
عشان ماحدش ييجي يقول دين قوة وبس، قوة إعمار للكون ونفع الناس

لما ربنا سبحانه وتعالى يقول: فأما الزبد فيذهب جفاء واما ما ينفع الناس فيمكث في الأرض

شوفي اللفظ القرآني الدقيقي
ما ينفع الناس
كان ممكن القرآن يقول ما ينفع المسلمين أو المؤمنين
لأ ما ينفع الناس كل الناس

السيارة الهوندا تنفع الناس، وتسويقها ينفع الناس

وأحنا بنقول عاوزين نرجع حضارتنا
زي ما قلت الحضارات مش بترجع
لكن الحضارات بتتبني من جيد
خليني أكمل في التعليق اللي بعد كده
وأول ما تزهقي مني قوليلي اعمل ديليت لكل التعليقات

Unknown يقول...

يبقى مفيش حاجة اسمها اعادة حضارة
يبقى فيه صنع حضارة

أحد أهم أدوات التخطيط الإستراتيجي هو أداة التخطيط بالسينارويهات المستقبلية
يعني اتخيل سيناريو معين هيتعمل، واحط اكتر من سيناريو
يبقى عندي
plan A
plan B
plan c

وأكون مستعد لكل الاحتمالات اللي ممكن تحصل في المستقبل، واتخيلها

مش ألبس وش العبيط وأقولك مش عارف هو احنا عندنا في تربيتنا حاجة زي كده؟

الغرب بيعمل أفلام خيال علمي مستقبلية، هي دي بتتعمل علشان خاطر شباك التذاكر والجمهور عاوز كده
ولا دي سيناريوهات مستقبلية حقيقية

من حوالي 8 سنوات دخلت فيلم اسمه
Enemy of the state
لويل سميث

الفيلم بيحكي عن واحد بيزرعوله خلية في كعب جزمته عشان يراقبوه بيها
والناس كانت بتعتبر ده خيال علمي
من 8 سنين بس

وتبدأ الأقمار الصناعية تراقبه في الشوارع
بالله عليكي هو جوجل إيرث مش بيعمل اكتر من كده

يا شيخة ده انا بقيت خايف انشر هدومي في البلكونة للناس تشوفني وتبقى فضيحة في الكون كله

طيب السيناريوهات دي دي بتصنع ايه، بتصنع فكر واستفزاز للتفكير، ووضع احتمالات، وبالتالي ,..بيحصل تحرير للعقول

منظومة كاملة زي ما قالت شمس
سينما بتخدم على مجتمع بقوة السينما الجبارة، واحنا لسة بنسال هو الدراما حلال ولا حرام

ومدرسة بتربي ابداع
وبيت بيربي على الحرية والاستقلالية والقدرة على أخذ القرار

آخر حاجة
عارفة الحديث الشريف اللي في نهايته
ولكنكم غثاء كغثاء السيل

مش عارف ليه بيجي ف بالي دايماً لما بلاقي أب بيربي أبنه على الخوف، مش الاحترام

وام بتعمل نفسها بتربي بنتها على الاحترام، فتهتم بشكل الطرحة بتاعت الحجاب على رأس البنت، ومش مهم رأس البنت نفسها فيها ايه؟

لما ألاقي الناس ، قاعدة مستنية الفتوى من الشيخ في كل كبيرة وصغيرة، وحياتهم متوقفه على اجتهاد الراجل، والمسالة بقت عجز اكتر منها تدين

لما أشوف شاب قرفان من حياته، وربنا اداله خمسين طريقة وطريقة عشان يكون له مكان تحت الشمس

لما اشوف شباب زي الورد، بياكلهم السمك، في البحر، شهداء

بس أرجع وأقول .. إن دي أمة مش بتموت
وبتصحى تاني .. بس المهم .. على ايد أي جيل

عاوزة جيل، لا يعرف التشاؤم
شايف بكرة كويس وقادر يسحب له حساب، حتى لو كان مش موجود في بكرة

عاوز جيل عنده صبر لا يكل ولا يمل

جيل عنده قدرة على تعليم غيره، والتعلم من الماضي والتعامل بحرفنة مع الحاضر

شكلي طولت .. بس عاوز اقولك يا دكتورة انت استفزتيني، وخدتي الساعتين اللي كانوا عندي راحة، ويارب دايما تعملي كده

بس أوعي تكوني حاجة تانية غير مبشرة بالخير، لن الناس محتاجة الل يبشرها واللي يعلمها وياخد بايديها من غير تكبر ولا تعالي

والله العظيم الناس جواه مخزون حضاري فظيع، بس عاوزينه يطلع بقى،
آخر تعليق اللي جاي وخلاص أروح

Unknown يقول...

على فكرة قصة إنشاء مصنع هوندا غاية في الصبر والتحمل
كمان شوية اكتبها

zordeak يقول...

wooooooooooooow

ذهوول فظيييع

الناس دى مش طبيعية

عرفو يعملوها ازاى دى

انا مش عايز اقولك بجد مقفلتش بقى من اول الاعلان من الذهول طبعااا

لازم اقفله دلوقتى قبل ميدخل فيه اى حاجة بتطيير

تحياتى

:D

دنـيـا محيراني(ايناس لطفي يقول...

هو ده الفرق بين شعوب منتجه و شعوب مستهلكه عشان كده هما دول العالم الاول و احنا العالم الاخير
تحياتي

عصفور المدينة يقول...

قرأت تعليقات أحمد واستمتعت بها جدا

خمسة فضفضة يقول...

السلام عليكم ورحمة الله وبركاته

دكتور احمد ابو فداء

ياخبر ابيض هو انا ممكن ازهق من الكلام الجميل ده
هو حد يطول انه ياخد محاضرة تنمية بشريه خصوصي ، اهلا بيك طبعا وكنت باتمني ان التعليق يطول اكتر
ومعلش بقي اني اخدت الساعتين الراحه بتوعك ، ويارب كده دايما استفزك علشان تطلع الكلام احلو ده استمتعت بيه جدا واستفدت جدا جدا ،
وبجد تعليق مش عاوز تعليق عليه ، مش لاقيه حاجه تتقال اكتر من كده

خمسة فضفضة يقول...

السلام عليكم ورحمة الله وبركاته

باشمهندس عصفور

دايما كدا منورني، ودايما كده سباق الي الخير يارب

--------------

اسلوبهم الساذج ده كان السبب في رد فعل للناس اول ما مشروع الكيبل المركزي او وصلة الدش دخلت ولقوا بديل احسن من اللي معروض ماعدش حد بيعبر قنوات التليفيزيون المصري ولا بيفتحها من اصله

و من اساليب الغش في الدعايه كمان لما بيحبوا يغلوا حاجه من غير ماالناس تاخد بالها ، يصغروا حجم العبوه ومايذودوش السعر ، ولو قالوا علي حاجه انهم طوروها يغيروا شكل العلبه من بره وخلاص
مشكلتهم انهم فاكرين ان المستهلك هنا عبيط و ساذدج وسهل ينضحك عليه
مايعرفوش اننا بنعديها بمزجنا


-----------------

اه فعلا الدي اس ال عامل احلي شغل ، المفروض كنت دخلته من زماااااان

يلا قدر الله وماشاء فعل

خمسة فضفضة يقول...

السلام عليكم ورحمة الله وبركاته

د/ احمد سمير

بلاش تقارن احسن وربنا يعافيك ويبعد عنك شر الجلطات والسكتات
:-D

---
اه فاكراه الاعلان طبعا ، دا كان قمة في الابداع
:-D

خمسة فضفضة يقول...

السلام عليكم ورحمة الله وبركاته

تمر حنه

وانا داخله البلوج اقول ايه النور دا كله ، الاقي تمر حنه هنا ،منوراني

ماتزعليش نفسك ، ان شاء الله قريب يبقي عندنا احسن منه

خمسة فضفضة يقول...

السلام عليكم ورحمة الله وبركاته

محمود عمر
احنا فعلا عندنا طاقات كتيره مكبوته

بس في موضوع الاعلانات ده بالذات الحكومه ملهاش دعوه
الغلط هنا راجع علي شركات الدعاية والاعلان والشركات اللي بتعلن عن منتجاتها وبتوافق علي ظهور اعلاناتها بالطريقه الهايفه دي

نورتني

خمسة فضفضة يقول...

السلام عليكم ورحمة الله وبركاته

لماضه

هندسة بترول واشتغل في بنزينه طب كويس كويس ، اهي حاجه ليها علاقه بتخصصه
وكمان البنزين مهم علشان عملية تحريك البلد
هههههههه
منوراني

خمسة فضفضة يقول...

السلام عليكم ورحمة الله وبركاته

عاشقة الفردوس

ان شاء الله ، ونلاقي صاحب المنتج اللي مايحطش فلوسه الا في الحاجه اللي تستاهل

متشكره اوي علي ذوقك
نورتيني

خمسة فضفضة يقول...

السلام عليكم ورحمة الله وبركاته

دكتور محمد العدوي

بتقارن بين المستشفيات ..مافيش مقارنه

وكلامك صح هو فعلا فرق في مفردات الحياة
ممكن تقرا تعليق ابو فداء ( عيل مصري ) هاتلاقيه شارح النقطه دي بالتفصيل

----------
العفو ، ويارب دايما منورني

خمسة فضفضة يقول...

السلام عليكم ورحمة الله وبركاته

يامراكبي
للاسف الفهوله والفكاكه بقت سمه سايده في الناس واللي مايعملش كده يسموه عبيط
وادمنا فتره طويله اوي علشان يطلع جيل مافيهوش العادات السيئه دي

وساعتها هانعمل احسن حاجه في الدنيا وماحدش هايعرف يحصلنا

ولحد ماده يحصل هاحاول اني امش حالي
:-D

نورتني

خمسة فضفضة يقول...

السلام عليكم ورحمة الله وبركاته

مهند

ياعيني عليك ، دانت كنت كويس وعقلك يوزن بلد
شفت الخطوبه عملت فيك ايه ، وخلتك نساي و جالك زهايمر علي صغر
ههههههههه
------
اكتر حاجه موديانا في داهية هي الفهلوه
ربنا يعافينا منها ..آمين

نورتني

خمسة فضفضة يقول...

السلام عليكم ورحمة الله وبركاته

محمود

هههههههه
فيه برمبران ينفع

خمسة فضفضة يقول...

السلام عليكم ورحمة الله وبركاته
استاذ محمد عبد الغفار

هي الفهلوه دي اللي موديانا في داهيه

وشغل المصانع
فه حاجه يمكن تكون هي دي اللي بتنفر الشباب من الشغل ان صاحب المصنع بيبقي عاوز ياخد كل اللي هوه عاوزه من العماله باقل اجر ممكن
يعني بيطلع عينهم بالملاليم بتاعه فاعشان كده يمكن يكونوا مش بيوافقوا يشتغلوا في المصانع
وارجع واقول انت ادري بحكم عملك

موجة يقول...

عندك حق
هو ده حال اعلامنا للاسف

ody911 يقول...

البلد بتتحرك فعلا

بس فى أتجاه الهاوية







عااااااااااااادى بقة
ياكش تولع
أودى

عالمى ازرق يقول...

انا بيستفزنى جدا اعلان القطر
وحاسه انهم فرحانين بيه قوى
بس برغم كده فيه اعلانات كويسه مع انها قليله
وكمان فيه من الاعلانات المكتوبه بالشوارع الرائع جدا
احنا محتاجين نتطور فى حاجات كتير قوى مش بالاعلانات بس

خمسة فضفضة يقول...

السلام عليكم ورحمة الله وبركاته

حواديت وحكاوي

معلش هدي اعصابك واستحمل ان شاء الله نقدر نتحدي ميلودي والملل اللي عملاهولنا
ايام ما مات اشرف مروان كنا مستريحين منها

خمسة فضفضة يقول...

السلام عليكم ورحمة الله وبركاته

محمد صبحي

اللهم اجعلنا عايشين في الرايت و من اصحاب الرايت
:-D

خمسة فضفضة يقول...

سها

فعلا احنا حاليا بنفتقد الاتقان في الصنعه
عارفه حاجه ضحكتني امبارح جدا ، زوجي جايب انر وير كتونيل من بتاع التصدير تخيلي مكتوب عليه ايه ..؟؟؟

MADE CAREFULLY IN EGYPT
قعدت اضحك والله معني كده ان فيه حاجات تانيه مش معموله بعنايه او ان الناس بره واخدين عننا فكره اننا مش بنعتني بصناعتنا

حاجه تزعل مش كده
-------
ونظريتك بالنسبة للشغل في المصانع صحيحه جدا ، اصحاب العمل دايما عاوزين ياخدي اقصي مجهود من العامل وباقل سعر وانا شفت ده بعيني في كذا حته

اما مرتبات الحكومه فحدث ولا حرج ما تكفيش مصروف يد لطالب في الجامعه مش هانقول تفتح بيت وتعيش اسره

نورتيني

خمسة فضفضة يقول...

وعليكم السلام ورحمة الله وبركاته

رينا

احسن حل اعملي زي معظمنا اقلبي اول ماتلاقي فيه اعلانات
ولا تحرقي في دمك ، احنا عايزينك

نورتيني

خمسة فضفضة يقول...

وعليكم السلام ورحمةالله وبركاته

البنت الشلبيه

الله يسلمك انت ازيك عامله ايه

اه بيقولوا انه صحيح بس انا ما جربتش ولا سمعت عن حد جرب
اقولك جربي وقوليلنا ايه الاخبار
:-D

سلام

خمسة فضفضة يقول...

السلام عليكم ورحمة الله وبركاته

مهندس مصري

ربنا يستر يارب اصله واخد في وشه ومش داري بحد

احسن حاجه عملتها انك بطلت القنوات الارضي دي خالص ، ريحت دماغك

ولاون الاعلانات اياها ورانا ورانا فين مانروح

نورتني

خمسة فضفضة يقول...

السلام عليكم ورحمة الله وبركاته
الفاتح الجعفري

الله يفتح عليك كمان وكمان
هي دي فعلا السياسه المتبعه في اغلب الاعلانات ان ماكانش كلها

ربنا يعافينا ويرحمنا

تحياتي

خمسة فضفضة يقول...

السلام عليكم ورحمة الله وبركاته

شمس الدين
اعتقد ان الدكتور احمد " يوميات عيل مصري " رد علي كلامك بما فيه الكفايه وماسبليش مجال لتعليق تاني
فياريت تقري تعليقاته

نورتيني

سلام

خمسة فضفضة يقول...

السلام عليكم ورحمة الله وبركاته

د/ احمد فؤاد

الف سلامه عليك من الذهول

اقفل بقك بسرعه اصل فيه حاجات كتير بتطير اليومين دول
:-D

نورتني

خمسة فضفضة يقول...

دنيا محيراني

لا معلش احنا قبل الاخير

:-D
يارب يدينا الصحه لحد مانشوف بلادنا اتقدم وبقت احسن بلاد في الدنيا كلها

تحياتي

خمسة فضفضة يقول...

باشمهندس عصفور
وانا كمان استمتعت جدا جدا

خمسة فضفضة يقول...

السلام عليكم ورحمة الله وبركاته

موجه
مش الاعلام وبس دي كل حاجه عاوزه اعادة نظر مننا واعادة بناء باسلوب وطريقه صحيحه ، بعدها ممكن نوصل لمستوي من التقدم اكتر بكتير من اللي وصلوله

خمسة فضفضة يقول...

السلام عليكم ورحمة الله وبركاته

اودي
نورتني بس بالله عليك بلاش ياكش تولع دي
خليها اياكش تعمر علي راي باشمهندس عصفور المدينه

وان شاء الله تعمر ونشوفها احسن بلد في الدنيا كلها

و يبقي عادي بقي

خمسة فضفضة يقول...

السلام عليكم ورحمة الله وبركاته

عالمي الازرق

زي مافيه الحلو فيه الوحش في كل حاجه بس المشكله ان الوحش اكتر بكتير اوي وباين علي الوش

ربنا يعينا ونقدر نقضي علي كل حاجه وحشه في حياتنا

نورتيني ، اخبارك ايه دخلت مدونتك امبارح وقريت الموضوع بس مالحقتش اعلق سامحيني

تحياتي

أحمد سلامــة يقول...

طبعا اعلان رائع
ولو حتى كان جرافك
كفايه الفكرة الممتازة
مشمستاهله كلام
ولو تعرفي اللينك بتاع الاعلان الديفيدي يا ريت تكتبيه

بالنسبة للاعلانات المصرية
دي مصيبة تانية محتاجة ضغط دم ممتاز واعصاب حديد للحديث عنها
:)
ربنا يصبرنا

ابو صهيب ( الجمعاوي الاصيل)سابقاً يقول...

فعلاً

الواحد لم بيشوف الحاجات دي بيتحصر

على الحال اللي احنا اصبحنا فيه

فلقد اصبحنا شعوب مستهلكة وحسب

حسبنا الله ونعم الوكيل

ننتظر زيارتكم في مدونة ميخا

مدحت محمد يقول...

الاعلان جامد جدا جدا جداااااااااااا

mostafa rayan يقول...

طبعامعاكي ان احناعندناعقول ممكن تعمل حاجات زي كدة ويمكن احسن هي مش واخده حقهايمكن لأن المسؤلين في مصر بيهتموا انهم يدوا الفرصة لناس موهوبة في الرقص والكورة
لكنا الأدب او العلم لايشغل بال حكومتنا كثيرا او قليلا في الحقيقة
لكن الحاجة اللي لازم نقف قدامها حكاية انهم حاولو 500 مرة دي الناس
دي عندها صبر ومش بتيأس من اول مرة زينا ويمكن دة الفرق اللي بينا وبينهم

القرآن الكريم