2007-12-10

عدت سنة !!



{ وأتموا الحج والعمرة لله } (البقرة:196).

كل سنة وانتم طيبين

من سنه و زي انهارده (3 ذو الحجة ) كانت اول مره احضن الكعبة المشرفه بعيني
بجلالها وعظمتها ، ملاني احساس مش عارفه اوصفه ، يمكن احساس، خشوع ، خضوع ، طمأنينه ، رهبه واحساس بقشعريره ماليه الجسم كله
اول مره اطوف حواليها والمسها بايدي ، اول مره رجلي تخطي علي رخامها الابيض الجميل ،
اول مره اشرب من زمزم واسعي بين الصفا والمروة


احساس عمري ماهانساه في حياتي اول ما عيني وقعت عليها ، و اصوات التلبيه والتكبير من كل الحجاج حواليا في كل مكان تملا الكيان بالخشوع
عالم اشكال والوان من كل الدنيا لافرق بينهم الابالتقوي ، اكتر من 3 مليون حاج ، اللي بيلبي واللي بيصلي
واللي بيقرا قرآن واللي رافع اديه بالدعاء ، وبالرغم من كده كنت حاسه اني لوحدي اللي هناك ، بطوف وباسعي وباصلي ومافيش حواليا حد ، استغربت من كل اللي كانوا بيقولوه عن ان الحج بيبقي زي يوم الحشر "واكيد هو كده " ، يمكن دلوقتي لما باشوف الحجيج في التليفيزيون مش باصدق انهم كانوا بالعدد ده وان الدنيا كانت زحمه كده يمكن علشان كنا بنقضي معظم الوقت في الحرم ،

والله ماكنتش حاسه الا اني لوحدي وان ربنا قريب اوي وان مافيش بيني وبينه حجاب ،
نسيت انا مين وجايه منين و كنت ايه ، كل اللي فكرت فيه اني هنا جوا الحرم وبين ايدي الرحمن ، هنا علي الارض اللي شافت بداية الرساله ، الارض اللي خطي عليها المصطفي صلي الله عليه وسلم ،
هنا شال الحجر الاسود بايده الكريمه ورفعه لمكانه ، هنا كسر كل الاصنام اللي كانت موجوده وهو بيقول جاء الحق وزهق الباطل ان الباطل كان زهوقا
وهنا علي جبل الصفا طلع وجمع الناس واعلن فيهم رسالته الخالده ليوم الدين ،
هنا كان بيصلي ويسجد ويطوف

ياااااه مش قادره اتخيل ان عدت سنه ، مش قادره استحمل اني اكون هنا بعيد اوي عن الكعبه وكل الحجاج دول هناك بيؤدوا الفريضه ، مش عارفه هاعمل ايه يوم عرفات ...هاقدر استحمل انه يعدي علينا كده من غير ماكون هناك

نفسي اطير واروح معاهم ، البي و اسعي واطوف وأقف علي عرفات و بعدها ازور قبر المصطفي صلي الله عليه وسلم

حج الحجاج إلى مكة،،،،،،،والقلب يهفو إلى الكعبة

يالهف النفس على التوبة ،،،،،،والعودة للطهر وللعفة

يارب
ماتحرمنيش وسائر المسلمين منالزياره مرات ومرات



56 comments:

عصفور المدينة يقول...

تقبل الله
وأسأل الله ألا يحرمنا زيارة بيته ما أحيانا

مين اللي في الصورة؟

عصفور المدينة يقول...

بس صحيح عايز أقولك العمرة أمتع من الحج في التمتع بالكعبة

لكن الحج فيه مناسك أكثر وكلها متعة
مش عارف حد رأيه زي رأيي؟

خمسة فضفضة يقول...

السلام عليكم ورحمة الله وبركاته

باشمهندس عصفور

تقبل الله منا ومنكم

مش عارفه الصوره دي من البي بي سي

---------
زوجي بيقول برضو زي حضرتك ان عمرة رمضان بالذات امتع بكتيراوي من ناحية الصلاة والتهجد والتراويح ، وايمانياتها اعلي من الحج
بس مناسك الحج في حد ذاتها ممتعه جدا انك تفضل تتنقل من مكان للتاني وكل واحد فيهم ليه شعائر خاصه بيه وفي كل مكان تقعد تستشعر ان نبينا الحبيب كان هنا وكان بيعمل كده ، وابونا ابراهيم كان هنا وكان بيرمي الجمرات زينا ده لوحده احساس تاني خالص

سمعت واحد من الشيوخ بيشبه التنقل ده بحياة الانسان اللي مايلبس انه يستقر علي هيئة معينه حتي يتبدل به الحال لاخري وهكذا حتي يعود الي بارئه


عموما ان شاء الله احنا ناويين العمره السنه الجايه ربنا يكتبهالنا يارب ونكون مع حضرتك صحبه واجرب واحكم بنفسي

تحياتي

ام البنات يقول...

يارب ماتحرمنيش وسائر المسلمين من
الزياره مرات ومرات


دكتورة يارب اسأل الله ان يرزقنى عمرة او حج الحمد لله ظروف البنات دلوقتى ان شاء الله تسمح
اسأل الله ان يأذن لنا بالزيارة

mohand يقول...

السلام عليكم

كل سنه وانتي بالف صحه وخير
وان شاء الله تتكرر وتروحي تاني باذن الله

ويرزقنا يا رب

الراقص مع الذئاب يقول...

السلام عليكم
تقبل الله منكي يا اختاه
ورزقك زيارتها اعواما مديدة
اللهم ارزقنا حج بيتك الكريم
اشتاق الي زيارة بيت الله
ادعوا لي

السلام عليكم

إنـســـانـة يقول...

الله

يارب ارزقنا يارب

عصفور المدينة يقول...

لا يا دكتورة الإيمانيات في الحج أكثر طبعا عارفة عرفة ولا المشعر الحرام ولا العودة ممن الرمي كنت باكون متأثر جدا في العودة من الرمي بالذات أحس إني كنت في مهمة وراجع

سبحان الله
لكن فعلا كنت أقصد يعني الحرم أو الكعبة مش بتاخدي راحتك معاهم زي أي وقت تاني

ويا سلام لو العمرة تكون في موسم فاضي بس سبحان الله زمان غير دلوقت أنا بابص على الكعبة وأقول إزاي كنت باقعد هنا واسند ظهري على الكعبة ودلوقت بالمسها بطلوع الروح
أول مرة زوجتي تروح عمرة أخدتها عشان افرجها على الحرم من الدور التاني العساكر طردونا لأنه كان خالي تماما ومغلق تخيلي لا يمكن يكون فيه وضع زي كدة دلوقت

مرة عملت عمرة كنت بالمس الحجر الأسود كل شوط دلوقت أصبح مجرد لمس الحجر مهمة صعبة احتاجت إلى دعاء واستعداد وكفاح

هيجت أشواقنا إليها يادكتورة

انسااااااااانة يقول...

يااااااااااه الحج , بجد يا رب الواحد يحج قبل ميموت

و جزاكم الله خير

موجة يقول...

حقيقي قدرت تنقليني من بيتنا لمكة
بوست جميل
ربنا يبلغنا الحج يا رب اجمعين
خالص تحياتي

المهـ إلي الله ـاجر يقول...

اللهم بلغنا جميعا حج البيت مرات عديدة ورزقك وزروجك الحج والعمرة إن شاء الله

يوميات عيل مصري يقول...

كل سنة وانت طيبة يا دكتورة والسنة الجاية إن شاء الله أنت والدكتور تكونوا هناك على عرفات

ربنا يجعلهالك بعودة إن شاء الله
ويجعلك شوقك لها، أجر بها

ياااه
عدت 15 سنة انا كمان على الحج

ربنا يتقبل منك

أمــانــى يقول...

ربنا يتقبل منك ويكرمك بالزيارة التانية ويكرمنا بالزيارة ياااااااااااااارب آمـــــــــــين

A.SAMIR يقول...

ان شاء الرحمن السنة الجاية تكوني في مكة بأذن الله
وممكن كمان قبل السنة الجاية بالعمرة ان شاء الله
ربنا ينولها لك
تحياتي

رفقة عمر يقول...

بتذلوا الناس اللى زينا يعنى ولسه
لم ينعم عليهم بعد بزياره الاماكن الجميله دة والشوق يقتلهم
ربنا يرزقنا ويرزقك اللهم امين يارب العالمين

Jana يقول...

السلام عليكم

يمكن تكون أول مرة اكومنت عندك
لكنها مش اول مرة استمتع بقراءة تدويناتك
بس مع الروحانية العالية اللى فى التدوينة دى بالذات ماقدرش ماعلقش
عندك قدرة جميلة على الوصف تنقل الواحد من مكانه للحرم..
ماليتينا شوق وحنين جارف..وكأنه ناقصنا

تحياتى على تدوينة رائعة

Desert cat يقول...

كل سنة وانتى طيبة
وربنا يرزق جميع المسلمين بزيارة رحابه الطاهره
تحياتى

ابو مفراح يقول...

اسأل الله سبحانه و تعالى ان يلحقنا بالحجاج و ان يكتبنا منهم فى العام و القادم و يا بخت من زار الكعبه بصراحه
تحياتى ابو مفراح

مهندس مصري يقول...

هيجت أشواقنا
أنا ما حجتش غير و أنا عيل صغير مرتين و أنا 4 سنين و 5 سنين بس ما يسقطش حج الفريضة
نفسي فيها قبل ما أموت
ربنا يكتبها لنا يارب

smraa alnil يقول...

رنا يكتبهالك تاني يارب
ويكتبهالنا جميعا

بجد نفسي فيها اوي عشان نفسي اتولد من جديد

كل سنة وانتي طيبة وان شاء الله السنة الجاية نكون كلنا علي جبل عرفات يارب

يا مراكبي يقول...

ده إحنا دفعة واحدة بقى

http://yamarakby.blogspot.com/2007/01/blog-post.html#links

http://yamarakby.blogspot.com/2006/12/blog-post_24.html#links

عمر بوك ستورز يقول...

كل ما تقرؤه تحت سقف واحـد

بجد بجد ... زرورنـا تجدون ما يسركم
قائمة كبيرة من شتى الكتب وبأسعار لا تقبل المنافسـة
أقل الأسـعار

بين أيديكم

Omar... خروشات يقول...

بعودة ان شاء الله

ربنا ينعم على جميع المسلمين بزيارة بيته الحرام

hend...hanady يقول...

يارب ماتحرمنيش وسائر المسلمين منالزياره مرات ومرات
امين يارب
وكل سنة وانت طيب عيد سعيد ان شاء الله على الامة المسلمة جمعاء

نـــــــازك الملائكـــــــة يقول...

ماشاء الله ..عرفتى تنقلي احساسك ليا..
ربنا يكرمك وينعم عليكى بحج اخر..ويتقبله منك..امييييين..كلنا ان شاء..
:)

دكتور حر يقول...

من ذاق عرف

هكذا قالوا

وقال ربنا عز في علاه

وإذ جعلنا البيت مثابة للناس

مثابة
أي يعشق العودة له من زاره

جزيت خيرا ووفقنا الله واياك للتمتع بزيارته مرات عديده واعواما مديده

أشكرك على زيارتك ويا ريت تنورينا على طول

محمد فوزي آل ربيع يقول...

أنا عايز أروح مكة أنا كمان

عااااااااااااا

مليش دعوة

أُكتب بالرصاص يقول...

متفق معاك تماما

احساس ما بعده أحساس

وخصوصا رؤية الكعبة لاول مرة

تقبل الله منا ومنك

وبعودة إن شاء الله

WhatEver?!!! يقول...

صحيح انا زرتها وانا عندى 4 5 سنين
بس بجد احلى زكريات

انشاء الله كلنا نتجمع هناك السنة اللى جاية

الجمعاوي الاصيل يقول...

تقبل الله منا ومنكم سائر الاعمال

وانا اتفق مع عصفور المدينة

التمتع بالكعبة افضل في العمرة علشان

مبيبقاش في زحمة

لكن الحج ابقى قابلني لو وصلت اصلاً

للكعبة

وكل عام وانتم الى الله اقرب

أمــانــى يقول...

كـل سنة وانتى طيبة وبالف خير وعافية يارب آمـــــين واعاده الله علينا وعلى الامة الاسلامية بالخير واليمن والبركات

سها يقول...

كل سنه وانت طيبه
ويارب يحقق لك امنيتك
وانا معاك
انا لسه ما حجتش
ادعيلي ربنا يرزقني الحج
وانت معايا

مدونه انا بحبك يا مصر يقول...

وكل عام وانت بخير بمناسبه العيد الاضحى
وتقبل الله منا ومنكم
احمد الجيزاوى

البنت الشلبية يقول...

كل سنة وحضرتك طيبة يا دكتورة وربنا يتقبل منا جميعا صالح الاعمال

بيتنا القديم يقول...

جيت اقولك كل سنة وانت طيبة
ويارب يارب تكوني بخير وسعادة
لا تنس فقيراً او يتيماً او محتاجاً في هذا العيد..
لا تنس ان تبادري بالصلح مع من تخاصمين
لا تنس قريب او قريبة بزيارة في العيد
لا تنس كف مرفوع ولسان يستغفر وعين تدمع..مع الله في هذا العيد
تك كير
(:

كفراوى يقول...

يارب يادكتورة يارب

كل سنة و انتى طيبة

عالمى ازرق يقول...

ربنا يكتبهالك تانى ياجميله
كل سنه وانتى طيبه
وعيد سعيد عليكى وعلى الامه الاسلاميه كلها بأذن الله

دمتِ بخير

daktara يقول...

كل عام وانتم بخير
اوعوا تتقلوا من لحم العيد
اللحم حسب الاسعار الحالية فيه سم قاتل
عيد سعيد

انظر حولك
د. خالد عزب

فرنسا هانم يقول...

السلام عليكم
كل سنه وانتى طيبه
ويارب تتكرر تانى
اختى العزيزه
بجد
بحبك فى الله
جزاكى الله كل خير
نقلتينى من بيتى لافضل مكان على وجه الارض
كل عام وانتم بخير

رينـــــــــــا يقول...

السلام عليكم ورحمه الله
كل سنه وانتى با الف خير يارب
والسنه الجايه فى عرفات قولى امين

الراقص مع الذئاب يقول...

السلام عليكم
تقبل الله منا ومنكي اختي الكريمة
اعاد الله عليكي ايام الخير اعواما عديدة وازمنة مديدة

يوميات عيل مصري يقول...

دكتورة
كل سنة وانت بالف خير
احمد

Ahmed Al-Sabbagh يقول...

كل عــام وأنتم بخير

عـــيد سعـــيد

أعــادة الله عليكم بالخير والبركــات

تحياتى

YHYيــوســف الـمصـرى يقول...

السلام عليكم ورحمة الله وبركاته
............................
كل سنة وانتى طيبة وعيد سعيد عليكى وعلى كل المسلمين
ربنا يكرمك وتتكرر تانى ويكتبها لكل مسلم يا رب

تحياتى

نور الأزهر يقول...

يارب لاتحرمنا زيارة بيتك الكريم

شقاوة شعب يقول...

happy feast
full of meat
friends meet
relatives greet
clothes gdeed
money bel3abeet
afrah w zagharit
w tarabatateeeet

كل سنة وانتى طيبة بمناسبة عيد الاضحى المبارك اعاده الله جميعا باليمن والبركات

رائع احساسك ونقلك لصورة كلنا بنتمنى نراها رأى العين
ويارب السنة الجاية نتقابل على جبل عرفات

ودى كانت اول زيارة لمدونتك الرقيقة وان شاء الله ماتكونش الاخيرة


تحياتى
شيماء

ŞoŖśậŖấầ يقول...

عدد من سعى ولبى وطاف بالبيت
يعطيك ربى السعادة وكل ماتمنيت
وعيدك مبارك:)

وان شاء الله ربنا يرزقك بزيارة البيت الحرام تانى وجميع المسلمين يااااارب

لماضة يقول...

جميل احساسك يا دكتوره جسمى قشعر وعيونى دمعت
يارب ارزقنا وجميع المسلمين زيارة بيتك المحرم
كل سنه وحضرتك طيبه ويعود عليكى الايام بخير
فين العيديه بقى
عاوزه حته لحمه

بت خيخة وأى كلام يقول...

انت عدت عليكى سنة
انا عدت عليا يجى اتناشر سنة
حجيت وانا عندى تمنتاشر سنة
كان سنة 1996 فى شهر ابريل او مايو
لسه فاكرة الايام دى زى ما تكون امبارح
لسه فاكرة اول ماشوفت الكعبة
ولما اتخرست وماقدرتش اقول اى حاجة
ولما بدات اتكلم بقيت مش عارفة اقول اى حاجة ولا ادعى بأى شئ كل اللى نزل عليا انى قعدت اقول يارب يارب يارب يارب يارب يارب يارب يارب
واقدت اعيط اعيط اعيط اعيط
لسة فاكرة الراجل العجوز اللى كان رايح يحج مشى علشان مش معاه فلوس ياخد اى مواصلة
ولما السواق اللى احنا راكبين معاه ركبه جنبه وساق وباب العربية مفتوح علشان ماكنش معانا مكان الراجل يقعد فيه تانى
لسه فاكرة الاتنين الافارقة الطوال جدا اللى عديت مابين رجليهم راسى كانت جاية عند ركبهم
وكانوا شايلين الحامل بتاع الناس اللى مايقدروش يتحركوا وكان عليه واحدة ست كبيرة
لسه فاكرة لما رحت المسجد النبوى ورحت نطيت من فوق السور اللى محطوط حوالين القبر
والست الحارسة قالتلى كدة ممنوع ارجعى تانى قلتلها بس انا عايزة اسلم على رسول الله قالتلى
القى السلام وانتى برة ماينفعش تعدى السور ده
لسة فاكرة لما كنت فى المسجد النبوى وخدت مصحف من هناك ولقيت مكنوب فيه الى كل من يقرا فى هذا المصحف ارجو الدعاء لهالة بنت عزة بان يرزقها الله بالخلف الصالح
لسة فاكرة لما كنا فى الحرم الشريف وواحد مات
وكل اللى فى المسجد صلى عليه تخيلى اكتر من مليون واحد صلى على الراجل ده
ياااااااااااه
اد كدة ربنا بيحبه
تخيلى كلنا قريناله الفاتحة وكلنا دعيناله ان ربنا يغفرله
لسه فاكرة يوم الوقوف بعرفات واد ايه كان زحمة ومع ذلك الكل كان مستحمل بعضه
كان نفسى اوى اتوه من اهلى وافضل قاعدة هناك على طول
يارب اوعد كل مشتاق لزيارة بيتك
وانا معاهم يارب
كل سنة وانتى طيبة يا فضفضة وعقبال ماتحجى تانى وتالت وعاشر وانا معاكى
كل سنة وانتى طيبة
اختك خيخة

خمسة فضفضة يقول...

السلام عليكمورحمة الله وبركاته

متشكره لكم جميعا علي التعليقات الجميله دي
وكل سنه وانتم طيبين ويارب تحققوا كل اللي تتمنوه
ويارب تكونوا كلتوا اللحمه وانبسطوا في العيد

ويارب يرزق كل مشتاق حده الي بيته الحرام
ومايحرمناش جميعا من الزياره والصلاه في الكعبه ومسجد الرسول صلي الله عليه وس

Ma 3lina يقول...

انا اتفق مع استاذ عصفور ان العمرة ممتعة لان المناسك قليلة و الوقت اطول عن الحج

اللهم ارزقنا حج بيتك الكريم ان شاء الله

david santos يقول...

Hello, my friend,
Good posting, thank you.

I wish you a good end of 2007 and a good year of 2008.

من القلب يقول...

كل سنة و انتى طيبة
و يارب تتكرر لك الزيارة الشريفة و يكرمنا بها

الربان يقول...

تحياتي

كل سنة و انت طيبة...و نسأل الله الا يحرمنا من زيارة البيت و الحج ما أحيانا...

تحياتي و تقديري

mostafarayan يقول...

كل مااستطيع ان اقوله ان اقول علي دعائك الأخير امين يارب استجب

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

القرآن الكريم