لا دا مش قرار مجلس الامن بخصوص قضيه عربيه ،
دا قرار وزير الصحه بخصوص حبس الصيادله ،
ماتستغربوش !!!! ايوه حبس
هايحبسونا
فالاستاذ الدكتور حاتم الجبلي في قراره الوزاري
رقم 542 لسنه 2007 الخاص بتعديل القرار الوزارى رقم 213 لسنه 1998 قرر انه ها يتم حبس اي صيدلي لمدة عام وغرامة ٥٠ ألف جنيه، إذا ثبت وجود مستحضرات ومستلزمات طبية غير مسجلة في صيدليته وكمان غلق الصيدليه لمدة سنه يعني ترخيصها هايتلغي
ماهو فيه قرار تاني ان الصيدليه اللي تقفل سنه كامله ترخيصها يتلغي
يعني ابقي قاعده في صيدليتي لا بيا ولا عليا الاقي اللي داخل يفتش وبعدين يجرني من قفايا علي السجن
واحد محترم يقولي طيب انتو ليه تبيعوا حاجات مش مرخصه في صيدلياتكم ؟؟؟؟؟
دا المثل بيقول امشي عدل يحتار وزير الصحه فيك
ارد انا بقي و اقوله ، يا سيدي الفاضل مستحضرات ومستلزمات دي بتشمل كل حاجه في الصيدليه غير الادويه ، وفيها حاجات كتير اوي مش مرخصه
كمان حاجات تانيه كتير مستورده وملهاش بدايل في السوق المصري
لو قلنا سيبنا من مستحضرات التجميل ومزيلات العرق والبرفانات طيب مافيه حاجات تانيه واهم بكتير
حد يقولي شاف مره كيس قطن مرخص ولا بكرة شاش مرخصه او حتي علبة بامبرز ولا علبة مناديل او فرشة سنان مرخصه ؟؟؟؟
طيب حد شاف مستلزمات العمليات من قساطر وكانيولات وخيوط وحقن اسباينال انتاج مصري ولا مسجله في وزارة الصحه ؟؟؟؟
والمعضله اللي مش لاقيلها اي حل ان فيه حاجه تابعه لوزارة الصحه اسمها لجنة التحليل الدوائي دي اللي بتوافق علي استيراد المستلزمات الطبيه والادوية من بره وبتدي تصريح دخولها من الجمارك والضرايب ، معني كده انها مطابقه لمواصفات الوزاره ، وكمان بموافقة الوزير نفسه
يعني وزير الصحة بيسمح بدخول أدوية ومستلزمات لمصر غير مسموح بتداولها بالصيدليات وبعد كده يطلع قرار بحبس اللي يتاجر فيها ؟؟بالله عليكم ده اسمه كلام ؟؟ هاتدخل من اصله ليه ؟؟؟علشان نتفرج عليها ؟؟ ولا تتباع في السوبر ماركت؟؟
طيب ما الوزارة تسجل اي مستلزمات موجوده في السوق ، او حتي يا جماعه تسجل اللي هي عاوزاه وبعدين تبعتلنا نشره بالحاجات اللي نتعامل فيها ، واللي يخالفها يتعاقب ويبقي كده الوزاره عداها العيب وازح
كمان ليه الصيدلي دايما هو الحيطه المايله بتاعهم واللي دايما حطينه في وش المدفع ، مايروحوا يفتشوا علي مكاتب المستلزمات اللي ماليه البلد وبتبيع الحاجات دي علي عينك ياتاجر من غير اي رقابه ، ماهي دي المنبع اللي الصيادله بيجيبوا منه ، ولا سايبين الحمار ويتشطروا علي البردعه
فيه حاجه تانبه كمان ( الوزير ده شكله مستقصدنا ) ، السنه اللي فاتت الوزاره رفعت اسعار 92 صنف من الادويه المهمه (منها ادوية ضغط وسكر يعني حاجات من بتاع الناس الغلابه) بحجة ايه ان المواد الخام غليت وان الشركات دي يا ولداه بتخسر ( معظم الادويه اللي غليت كانت شركات انترناشونال )
واحد هايقولي عادي ماكل حاجه في البلد غليت اشمعني يعني الدوا ؟؟
طيب يا محترم لما السعر يزيد يبقي علي الكل ، اشمعني التأمين الصحي ، بالرغم من وجود كراسة مواصفات وتسعيره للادويه اللي بتتورد ، اشمعني بقي ال 92 صنف دول يتوردو بره الكراسه دي وبخصم يعدي ال50 % ؟؟؟
يعني الشركات دي هاتخسر من الصيدليات ومش هاتخسر من التأمين ؟؟
واللي زاد وغطي ان التامين فتح منافذ بيع للادويه ، والمنافذ دي غير مرخصه و حاطين عليها اسم «الصيدليات التجارية» وبيشغلوا فيها ناس مش صيادله وكمانالادوية فيها بتتباع باسعار اقل من الموجود في الصيدليات العاديه
معني كده ان نفس الدوا هايتباع باكتر من سعر ، وكل محافظه بسعر
نقابتنا ( اللي هي نقابة الصيادله يعني ) ردا علي الكلام ده قررت انها تقاضي هيئة التأمين الصحي وربنا يسهل و يدينا ويديكم طولة العمر
كمان فيه جمعيه عموميه يوم الجمعه بنطالب فيها الوزير بالغاء القرار الظالم ده وبنعلن الاحتجاج عليه ، وممكن يوصل الموضوع لاضراب عام من كل الصيادله وغلق للصيدليات لحد ما يشوفولهم حل ؟؟
يعني يا جماعه اللي عاوز اي دوا او حاجه تانيه من الصيدليات يلحق يجيبها قبل مانقفل :-)
-----------------------------------------
تحديث
ظروفي ما سمحتليش اني احضر الجمعية العموميه ، بس من بعض الاصدقاء عرفت آخر الاخبار
الحلول اللي اقترحتها الجمعيه العموميه الطارئة
1/اقاله وزير الصحة المصري بعد ما ثبت اهدارة للمال العام
2/تطبيق نفس قانون المستلزمات والادويه الغير مرخصه علي الطبيب
معاقبه الطبيب اللذي يقوم بكتابة ادوية غير مرخصه بوزارة الصحه لمرضاه بنفس العقوبه ( ولا الطبيب ملاك )
3/انشاء الهيئة العليا للدواء تابعة لرئيس الجمهوريه وتكون خاصه بشئون الدواء والصيادلة بعد ان اثبت وزراء الصحة تحاملهم علي الصيادلة وانكار دورهم وتشبسهم بالدواء لمصالح اقل ما يقال عنها انها شخصيه
كما وافقت الجمعيه العموميه علي اعطاء مجلس النقابه الضوء الاخضر لاتخاذ الاجراءات القانونيه لشطب الدكتورة رئيسه التفتيش الصيدلي واصرت جموع الصيادلة الممثلين للجمعيه العموميه علي شطبها بدون تحقيق بعد محاوله طلب احد اعضاء النقابه التحقيق معها اولا الا ان الجمعيه رفضت رفضا قاطعا فكيف نحقق مع مفتشه ولا اقول صيدلانيه بعد شطبها من النقابه ساهمت في وضع قانون لحبس الصيدلي لاجل منصب الادارة المركزيه
وطالبت النقابه جموع الصيادله الاتفاف حول نقابتهم فهي الجهة الوحيدة المهمومه بحل مشاكل الصيادلة وعدم التقليل من دورها فلكل جهة سلبياتها وايجابتيها
هذا وقد امهلت الجمعيه وزارة الصحة اسبوعا لالغاء القوانين المخربه لمجال الصيدله او التصعيد المستمر وبالتدريج من جهة النقابه
دعوااااااااااااااتكم
