2008-02-12

حرام علينا حلال عليهم


لسه وزير الصحه بيمارس سياسة الكيل بمكيالين

اكيد فيه كتير منكم عارفين ان وزير الصحه احد اكبر المساهمين في مستشفي دار الفؤاد اللي مش بيحلي للرئيس وكبار رجال الدوله والفنانين العلاج الا فيها
واللي يا ما اتعملها دعايه اعتقد انها مجانيه في العديد من الافلام السنيمائيه ( مش هاننسي التجربة الدنيماركيه )

المستشفي دي يا ساده بتبيع لمرضاها ادوية غير مرخصة بوزارة الصحه

مع ان الوزير لسه مطلع القرار ايها بتاع الادوية والمستحضرات الغير مرخصه واللي ناوي يحبس بيه الصيادله ويغرمهم 50 الف جنيه لو واحد فيهم اتجرأ وباع سرنجة غير مرخصة

بس نقابتنا ماسكتتش
وقدمت بلاغ للنائب العام ، اقروا التفاصيل

هنا في المصري اليوم


56 comments:

الطائر الحزين يقول...

ايوة فعلا

حرام على بلابلة الدوح حلال للطير من كل جنس

تحياتى

ياسر مدني ...دينامو الإخوان يقول...

بعد طووووووووووووول غياب
الحمد لله عودة للتدوين عبر دينامو الإخوان

أتمني التواصل بلا إنقطاع

لماضة يقول...

هو ده الكلام
والله عيب بجد اللى بيعملوه ده
انا متغاظه عاوزه اعض حد

جمعاوى روش طحن يقول...

إديلوا على دماغه

خليه يفوق

only spot يقول...

تصدقى لسه قاريه الموضوع ده من ساعه وافتكرتك على طول والله
يلى اللهم اضرب الظالمين بالظالمين واخرجنا منهم سالمين
ربنا بجد ينتقم منهم عشان ظلمهم وفسادهم فاق الحد
تحياتى ليكى

أنونيمس يقول...

انا من ساعة ما قريت الخبر وانا مستمخ اوي م الصيادله ومبسوووووط
سعيييييييييييييد

دماغ جامده اللي عمل الحكايه دي

محمد فوزي آل ربيع يقول...

تمام يا افندم

حد يمسكني مسدس ف ايدي بس و أنا أروح أقتله و اللي يحصل يحصل، العالم دي ما ينفعش معاها غير انك تقتلهم

محمود الدوح يقول...

مالك ومال الدوح يا طائر

فعلا حلال للطير من كل جنس

ازيك يا دكتورة بقالى كتير مجتش
بس غصب عنى

nonoymm يقول...

حسبي الله ونعم الوكيل معلش
مفيش الا الاعتصامات هي اللي نافععة اليومين دول
حتى بفكر الم ستات البيوت واعمل اعتصام انا كمان في الشارع
ايه رايكم يا ستات
ربنا يعينا كلنا

مصطفى السيد سمير يقول...

الطب أكتر المهن إنسانية في العالم
عشان كدة الاتجار بيها أكتر الجرايم حقارة

عموما دة مش جديد

يا مراكبي يقول...

نصيحة

إشتري أسهم في شركة دار الفؤاد وخليكي من المساهمين

الفاتح الجعفري يقول...

ازي حضرتك يادكتوره
والله اللي بيزعل الواحد ان اهم وزارتين هما الاسوء في مصر
الصحة والتعليم
ولاعزاء للاعداء والمفسدين
وجزاكم الله كل خير

ahmEd_H يقول...

عادى يعنى
بتحصل فى احسن المستشفيات
حنشوف بقى سيادة الوزير حيعمل ايه
وحنشوف النائب العام حيعمل ايه

شكرا على المشاركة

بت خيخة وأى كلام يقول...

لا بقى ماحدش يجى جنب مستشفى دار الفؤاد
المستشفى دى
واخدة عيلتى مقاولة
خالى اتعالج فيها
وامى اتعالجت فيها
واخويا اتعالج فيها
لما بقينا معروفين فى المستشفى
باسم انها حقا عائلة دار فؤاداية
وانا ناوية اصيف فيها السنة الجاية باعتبار انها اقرب مكان ليا فى اكتوبر
اما بالنسبة للموضوع اللى انت كاتباه
احب اقولك
ان ربنا على الظالم والمفترى وابن الحراااااااااام
تحياتى ليكى يا فضفضة
اختك خيخة

شريف طلال يقول...

حرام علينا حلال عليهم زى ما أنتى قولتى
فكرتينى بفيلم الجزيره لما محمود ياسين قال للسقا
احنا لما نبيع الأفيون نبقى تجار مخدرات
و لما الحكومه تبيعه فى الصيدليات يبقى دواء
و احنا لما نبيع حته سلاح نبقى تجار سلاح
و ألى يبيع الف حته سلاح يبقى وزير
هههههههههههه
موضوع جامد و انا قرأت موضوع المصرى اليوم
شكراً ليكى
تحياتى

بحبك يامصر يقول...

الفساد خلاص بقه سمه من سمات نظامنا

ahmed a.aziz يقول...

السلام عليكم مبروك الشكل الجديد للمدونه

lionking

الراقص مع الذئاب يقول...

السلام عليكم

حسبنا الله ونعم الوكيل
علي فكرة انا اساساً مش مستريح لوزير الصحة دا من الاول خالص

الانسان بيبان من اول لقطة كدا
دا شخص مش مريح


بس انتي متشغليش دماغك يا دكتورة

كل التصريحات ديه والقوانين كلام في كلام


هو انتي مش من مصر برضو ؟؟؟

فرنسا هانم يقول...

حرام والله اللى بيحصل ده حرام
ولا دار الفؤاد بنت البطه البيضه
وباقى الصيدليات ولاد البطه السودا
ربنا معاكم
ولو سعادته نفذ القرار ده
هنلاقى الادويه فى سوق الخضار

أطباء يقول...

السلاام عليكم ورحمة الله

الحركة دي مع انها حلوة بس مفرووض كانت تبقى في حااجة تانية غير القراار لانه كده اعتبروا موافقين على القرار
وده اللي عمله الوزيير انه رحب بالقرار ولأنه مش هيقدر يرجع فييه
كانت مفروض تبقى في حاجة تانية غيير القرار ده
ومع اان الصيادلة جدعان وعاجبني بس لازم يحسبوا الاول خطواتهم رايحة فيين

m5m يقول...

انتى عارفة..

جوز أختى والدته تعبت فنقلوها دار الزفت دى...بعد ماكانت داخلة على رجليها ركبوها أمراض الدنيا و معاملة من أقذر مايمكن رغم انهم لهفوا من ولادها فوق ال 100 ألف جنيه..وفى الأخر..الله يرحمها بقى
.......
دى بوتيكات يا دكتورة مش مستشفيات

شيكابلا يقول...

معلش يا دكتورة تفتكرى وقف تنفيز القرار وقتى ولا هيتطبق ف السر؟ ولا اية النظام عجبنى تناولك جدا للموضوع وخصوصاالقرار542 انة مش من ضمن قرارات مجلس الامن

خمسة فضفضة يقول...

السلام عليكم ورحمة الله وبركاته

الطائر الحزين

يا استاذي مش حرام علي بلالبله بس دا حرام علي اي حد وكل حد واي حاجه علي ارض البلد دي انها تفتح بقها بنص كلمة

خمسة فضفضة يقول...

السلام عليكم ورحمة الله وبركاته

ياسر مدني

حمد الله علي السلامه

خمسة فضفضة يقول...

السلام عليكم ورحمة الله وبركاته

لماضه

طبعا عيب وناس ماعندهاش دم

عندك وزير الصحه اهه عضي براحتك :-)

خمسة فضفضة يقول...

السلام عليكم ورحمة الله وبركاته

جمعاوي روش طحن

يارب يفوق
بس شكله كده مش ناوي

خمسة فضفضة يقول...

السلام عليكم ورحمة الله وبركاته

only spot
اللهم آمين

يارب خلصنا من كل الظلمه المفتريين

نورتيني

خمسة فضفضة يقول...

السلام عليكم ورحمة الله وبركاته

انونيمس

ربنا يبسطك كمان وكمان

خمسة فضفضة يقول...

السلام عليكم ورحمة الله وبركاته

محمد فوزي

لا الموضوع ما وصلش للدرجة دي

هدي نفسك مايستهلوش تروح فيهم في داهية

بنت القمر يقول...

زي كل حاجه في الحياه مكيالين
الظلم بقا شيمه انسانيه اصيله يا عزيزتي

shreef يقول...

ازيك يا دكتور اعتقد انهم رجعوا في كلامهم بالنسبة للقرار ده تقريبا لسه قاري الخبر ده امبارح تقريبا يبدو ان القابة بتاعتكوا شايفة شغلها او يمكن تلاقيهم اكتشفوا ان الحوار ده هيضرهم اكتر ما يفيدهم علشان كدا رجعوا في كلامهم..اكيد انتي هتقوليلنا على الاسباب الحقيقية بصفتك في المجال ده مش كدا ؟

ana ga3an يقول...

كل يبكي علي ليلاة
الصيادلة
و الدكاترة
و المهندسين
والصحفيين
و السباكين
و المنجدين
وانا و انت

ربنا يعين الجميع

صوت من مصر يقول...

حرام علينا
حرام على اهالينا
حلال ليهم حلال لكل الى عايز يكسب وخلاص
ياعم الحاج وزير الصحه افتكر انى بحط جل مكتوب عليه مرخص من وزاره الصحه

أحمد سلامــة يقول...

م شعرف اشمعنا الدوا بالذات اللي فيه كمية المشاكل دي في مصر
يعني كل حاجة يها مشاكل
بس الدوا بالذات بحس انه اسوا ما يمكن تقديمة من خدمات للمصريين
حاجة غريبة جدا

خمسة فضفضة يقول...

السلام عليكم ورحمة الله وبركاته

محمود الدوح

ولا يهمك كلنا ، انت تنور في اي وقت

خمسة فضفضة يقول...

السلام عليكم ورحمة الله وبركاته

nonoymm

ههههههه
علي رايك نلم الستات ونعمل اعتصام ، مش كفاية ان ازازة الزيت عدت العشره جنيه

حسبنا الله ونعم الوكيل

خمسة فضفضة يقول...

السلام عليكم ورحمة الله وبركاته

مصطفى السيد سمير

عندك حق واحنا عندنا ناس محترفين تجارة في آلام وحياة البشر

منهم لله

خمسة فضفضة يقول...

السلام عليكم ورحمة الله وبركاته

يا مراكبي
طيب ماتعرفش بيتباعوا فين والسهم بكام ؟؟
:-)

خمسة فضفضة يقول...

السلام عليكم ورحمة الله وبركاته

الفاتح الجعفري

الله يسلمك ، جزانا واياكم ان شاءالله



هي الصحه والتعليم بس اللي فاسدين ؟؟؟

هوه فيه وزارة فيكي يا مصر مش فاسده

ربنا يصلح الحال و يطلعنا منها علي خير

خمسة فضفضة يقول...

السلام عليكم ورحمة الله وبكاته

ahmEd_H

عادي الموضوع ها يتكوس زي كل مره

وعادي يعني ماحنا اكيد في مصر

ربنا يستر

خمسة فضفضة يقول...

السلام عليكم ورحمة الله وبركاته

بت خيخه
ههههههه
العيله كلها زباين هناك
دا انتوا من عِلية القوم بقي واحنا مش عارفين

منوراني يا خوخه

خمسة فضفضة يقول...

السلام عليكم ورحمة الله وبركاته

شريف طلال

العفو

بس علي فكره احنا مش بنبيع افيون في الصيدليات دا مورفين
:-)
بس طبعا بيبقي في اضيق الحدود وكمان ليه اجراءات خاصه جدا لصرفه
وانا شخصيا ماباجيبهوش في صيدليتي علشان وجع الدماغ

خمسة فضفضة يقول...

السلام عليكم ورحمة الله وبركاته

بحبك يا مصر

كل الفاسدين منهم لله

خمسة فضفضة يقول...

السلام عليكم ورحمة الله وبركاته

الفنان احمد عبد العزيز

ايه فينك من زمان

متشكرين دي شهاده اعتز بيها

منورني

خمسة فضفضة يقول...

وعليكم السلام ورحمة الله وبركاته

الراقص مع الذئاب

ولا انا وحياتك، منه لله وحسبنا الله ونعم الوكيل فيه

ايوه صح هي مش هاتطبق بحذافيرها انا فاهمه بس هاتبقي ورقه في ايد الفاسدين للضغط بيها علينا عند اللزوم ، وهايبقي باب للمرتشين يزودوا بيه دخلهم علي حسبنا

ربنا يستر ، اهو الوزير قرر تاجيل العمل بالقرار لحد مايو 2009

نورتني ياباشمهندس

خمسة فضفضة يقول...

السلام عليكم ورحمة الله وبركاته

فرنسا هانم

ربنا يستر يا خالتو
دعواتك معانا

خمسة فضفضة يقول...

و عليكم السلام ورحمة الله وبركاته

هاقول لحضرتك احنا مش ضد القرار جمله وتفصيلا ، ولا احنا كل همنا نبيع ونكسب وخلاص مهما كان مصدر الادويه والحاجات اللي بنبيعها
لا مش كده خالص
ماشي عاوزين يطبقوا قرار زي ده ، اولا يبقي علي الكل
ثانيا ينزلولنا قوايم بالادوية اللي نتعامل فيها والادوية الغير مرخصه واحنا نتجنبها
وبعد كده اللي يخالف يبقي ياخد علي دماغه
مش يطلعوا قرارات عشوائية كده وخلاص
زي بالظبط ما ياخدوا واحد مابيعرفش يعوم ويرموه في البحر ويقلولوه اتفضل وارينا هاتوصل الشط ازاي

خمسة فضفضة يقول...

السلام عليكم ورحمة الله وبركاته

محمد m5m

ولا حصلت البوتيكات و حياتك

خمسة فضفضة يقول...

السلام عليكم ورحمة الله وبركاته
شيكابالا

شوفي يا قمر هو السيد وزير الصحه اجل التنفيذ الي مايو 2009
وبيقولوا انه بيع حاليا قوائم بالادوية غير المرخصه ( مش عارفه هايعرفها ازاي ) مع ان المفروض انه يعمل قوايم بالمرخص
المهم ، العالمين ببواطن الامور بيقولوا ان ده مجرد مسكن وقتي علشان الازمه ماتنفجرش في وش الحكومه اللي اصلا مش ناقصه اعتصامات واضرابات
وان الوزير هايطبق القرار بالتدريج وعلي مراحل من غير ما الصيادله تحس ( بس علي مين احنا صاحيين وفايقينله )
ناس تانيه بقي بتقول ان القرار ده هايفضل ورقة ضغط تحت ايد الحكومه ( يعغني لا هو متطبق ولا هو ملغي ) تستخدمه ضد الصيدله لو اي حد فيهم حب يلعب بديله ( مع ان والله ماحدش فينا عنده ديل ولا حاجه )

انا بقي بادعي ربنا ان الحكومه كلها تتغير قبل مايو 2009 وتيجي ناس تانيه عاقله كده وفاهمه وتطبق قرارات معقوله

ادعي معايا


نورتيني

خمسة فضفضة يقول...

السلام عليكم ورحمة الله وبركاته

بنت القمر

اصل الحكومه عندنا ماشيه علي مبدا ان المساواه في الظلم عدل
وبالتالي مش سايبه حد ما بتظلموش

نورتيني

خمسة فضفضة يقول...

السلام عليكم ورحمة الله وبركاته

شريف

لا لسه مالغهوش ، بس اجلوا العمل بيه لحد مايو 2009

ياريت تقرأ ردي علي شيكابالا في الحكاية بالتفصيل

ربنا يسترها معانا


نورتني

خمسة فضفضة يقول...

السلام عليكم ورحمة الله وبركاته

استاذ جعان

يارب ربنا يعينا علي الظالم والمفتري وابن الحرام

خمسة فضفضة يقول...

السلام عليكم ورحمة الله وبركاته

صوت من مصر

مافيش حاجه حلال للشعب في البلد دي

بالنسبة للجل
ايوه الحاجات مكتوب عليها مرخص بس اوقات كتير اوي مش بيبقي الترخيص صحيح وبيبقي مجرد رقم وخلاص

هما بقي عاوزين كل الحاجات تترخص علشان يلموا من وراها فلوس

خمسة فضفضة يقول...

السلام عليكم ورحمة الله وبركاته
د/ احمد سلامة

مافيش حاجه عدله لو دققنا في كل حاجه هانلاقي بلاوي

بس علشان احنا قريبين من مجال الادوية حاسين بكده

نورتني

koukawy يقول...

تفتكري مش واخد باله
او عملوا كده في غفله من امره
هههههههههه

Wael Galal يقول...

مش بس الأدوية يا دكتورة
اللي يدور ياما يلاقي

اسألوا عن العمليات الكبيرة و الكثيرة جدا اللي اتعملت في دار الفؤاد على نفقة الدولة , و كأن دار الفؤاد هي المستشفى الرسمي للدولة
شوفوا فلوس الغلابة بتروح فين

القرآن الكريم