TvQuran

٢٠٠٨-٠٦-٠٦

عزومه واعتراض

العزومه


اولا انا عزماكوا جميعا علي اكلة حمام محشي ، ياريت تقبلوا العزومه وتشرفوني في مطبخ بيلا مطبخنا
وتدوقوا الحمام وتقولولي رايكم

هو الموضوع بدأ لما نور ( فضفضات نور ) طلبت مني اني اكون ضيفه عندهم في المطبخ واعمل طبخه من صنع اديا ، وطبعا بما اني من عشاق الطبخ من زمان اوي ماترددتش ووافقت و علي طول عملت الحمام
وقررت اني اعزمكم عليه عشان تقولوا رايكم

البوست هاينزل انهارده ( الجمعه 6/6 ) ان شاء الله وده كويس لان البنات كلهم هايبقوا مشغولين في اللقاء بتاع خيخه ومش هايلحقوا يطبخوا فا تفاديا للخناقات الزوجيه -اللي ربنا يبعدها عننا يارب -هايرجعوا يلاقوا الاكل جاهز وكله تمام التمام :-)

يلا مش عاوزه لكاعه كلكم علي
هناك بس بلاش تتكربسوا فوق بعض الحمام كتير والحمد لله وانا شايله لكل واحد نصيبه
------------------------------------

الاعتراض

انهارده بافتح المدونه لقيت تعليق غريب جدا علي بوست فائض فقر

حد باسم اتحاد المدونين المصريين سايبلي تعليق بيقول فيه الاتي :


اتحادالمدونين المصريين يقول...

اخى الفاضل

اختى الفاضلة

عضو اتحاد المدونين المصريين

انصحك بالتواصل مع موضوع لحمايتك مما

قد يوقعك تحت طائلة القانون ونحن نعمل

لمصلحتك وحمايتك ..

فى انتظارك بمدونة الاتحاد ولك كل الشكر

نعمل من اجلك ولوجه الله
--------------
اختنا الفاضلة
اين شعار الاتحاد ؟

05/06/2008 10:03:00 ص


بصراحه يا جماعه ماخبيش عليكوا انا استغربت جدا ، قلت هو انا اشتركت معاهم دول امتي ، يمكن غلطوا ولا حاجه والتعليق ده كان رايح لحته تانيه واتحط هنا بالغلط

ماطولش عليكوا ، مشيت مع اللينك ورحت المدونه اللي باعته التعليق علي البلوج سبوت ( اصلي طول عمري اعرف ان المدونه التابعه للاتحاد ده موجوده علي مكتوب )
المهم رحت هناك وقعدت ادور يمين شمال علشان اشوف قايمة الاعضاء اللي بيقولوا عليها دي واشوف اذا كان اسمي مكتوب ولا ده تشابه اسماء

بس فعلا لقيت اسمي هناك وكمان بلينك المدونه
بصراحه يعني اتنرفزت جدا ، اشتركت امتي ان شاء الله ، ولا استمارة العضويه اللي محطوطه علي يمين المدونه هناك دي انا مليتها امتي بس ، يمكن نومني مغناطيسيا وخلوني مليتها وانا ماعرفش ، ولايمكن بتتملي تلقائي لاي حد يدخل هناك ؟؟؟ مش عارفه

كل اللي انا فاكراه ان الاستاذ حسن توفيق اللي المفروض الاعضاء ( اللي انا منهم يعني ) انتخبوه عشان يبقي ريسهم كان دخل هنا مره زمااااااان وساب تعليق ودعوه للاطلاع علي المدونه الخاصه بالمشروع بتاعهم وكانت علي مكتوب ، وزي اي حد بيدخل عندي ويسيب تعليق لازم اروح اشوف مدونته واقرا فيها شويه واسيب تعليق ( دلوقتي ماعتدش فاضيه اصلا اني اعمل كده او حتي ارد علي التعليقات اللي عندي هنا اعذروني )
وكل اللي قلته في التعليق هناك كلمتين مجامله لا قلت عاوزه اشترك ولا دياولوا

بس هو ده اللي حصل مش اكتر ولا اقل
حد بقي يقولي انا اشتركت امتي ولا قلت لحد انا عاوزه اشترك

رحت هناك وسبت التعليق ده


خمسة فضفضة يقول...

السلام عليكم ورحمة الله وبركاته

ايه يا جماعه التهريج ده
ممكن اعرف انا اشتركت معاكوا امتي ولا ابديت حتي استعداد للاشتراك

هو مش انتوا برضو عندكوا استمارة عضوية شايفاها علي جنب المدونه اهو

ممكن بقي حد يقولي انا مليت الاستماره دي امتي ولا وافقت علي العضويه معاكوا امتي

مش معني اننا زمان اوي سبت تعليق في المدونه اللي علي مكتوب يبقي خلاص كده قلتلكم تشركوني معاكوا

معلش ارجو انكوا تشطبوا اسمي من القايمه مش عاوزه انول الشرف ده ومش عاوزه حد يحميني ، هاتحموني من ايه
،الحامي هو الله

معلش انا اسفه ليكوا جدا بس العضويه ماتبقاش كده بالغصب


سلام

05 يونيو, 2008 08:52 م


ودي صورة التعليق كمان عشان لو اتمسح بالغلط ولا حاجه

ومن موقعي هذا احب اقول اني مش معاهم خااااالص

والله ولي التوفيق

:-)


49 comments:

جمعاوى يقول...

أول تعليق

إيه يا دكتور ....هم يعنى البات بس اللى بيعرفوا يطبخوا لامؤاخذه ..!!!!!



لا برده ما إحنا لنا فى الموضوع ..و الواحد مش راضى يطع باللى عنده علشان ما يحرجش الزملاء ..!!


أما عن موضوع الإتحاد ....فكك منه

هوندا يقول...

اولا مبروك لانضمامك للمطبخ ههههههههه

ثانيا بالنسبه للموضوع الخنيق ده كانت احمد الشقيرى كتب بوست عنه قبل كده ،تقريبا مش لاقيين حد يشترك فبيقفشو اى حد هههههههههه روقى كده طالما سبتى رد خلاص وسيبك منهم

Mafrousa يقول...

مطبخ؟ يا فضفضه مطبخ؟
وحمام كمااان .....طيب انا مش رحت الميعاد بتاع خيخه و لو اني حموت واروح

بس كله طلع منفعه اروح آكل حمام براحتى و همه لسه مش موجودين ههههههههه سلاااام

-------------------------------------------
بالنسبه للاعتراض ..انا موفقاكي مليون فى الميه فى اللى عملتيه....
اللي يعيش ياما يشوف...و اللى يموت حيشوف أكتر هههههههههه حاجه تفرس

khobayb يقول...

أكل ؟

حمام ؟

أحمدك يا رب

فين رابط المدونة ؟
فين رابط المدونة ؟

آه أهوه ..

السلام عليكم

عصفور المدينة يقول...

يا دكتورة أعصابك دول عايشين دور كبير أوي برضه جالي حاجة زي كدة بس اكتفيت بالابتسام

آفاق الحرية يقول...

السلام عليكم

والله انا بكتب البوست وقت الغداء
فممكن افكر واجي
ههههههههههههههه
بالنسبة لموضوع الاتحاد ده فنفضي وريحي دماغك
خليكي في الحمام هو ده اللي بقيلك
هههههههههه
تحياتي

وجهة نظري يقول...

كل إلي أعرفهم معترضين علي الإتحاد دا، وعلي أي قيود أو تحجيم.

إنما توصل لدرجة إنهم يحطوا إسمك معاهم بالعافيه، يبقوا طبعا بيهزروا ووراهم حاجه مش طبيعيه.

أنا عملت بانارات تتحط في السايدبار حطيتهم في تدوينه عندي، لو تحبي خدي إلي يعجبك منهم.

تحياتي ليكي.

... يقول...

هههههههاي
اولا بالنوسبة للعزومة انا هاجي هاجي لأن أي حاجة بجناحات ممنوعة في بيتنا ودة فرمان عثمانلي لما جالي نقرس من اللحمة ونورت من فوسفور السمك 'دة في حالة تواجدهم ههههه' ولهذا أنا في أمس الحاجة حتي للتذكر وماتعرفيش الصورة اللي فوق دي عملت فيا إية .. قلبي هفهف كدة والله
أما بالنوسبة للكيان العجيب دة 'عجبني أوي تعليق فكك منه' فعلللا فكك منه .. الحقيقة كان نفسي ورا اللينكات واعدي الجبال علشان اتفرج واقهقه براحتي بس أنا عالموبايل يعني الصفحة بالشئ الفولامي 'عشان تعرفي غلاوتك' بس طبعا انت اتصرفت صح وياريت اطلب منك طلب رفيع :ياتري لقيتي اسمي هناك .. احسن اكون انضميت انا كمان واقع تحت تائلة الكانون هههههه

Ahmed Mubarak يقول...
أزال المؤلف هذا التعليق.
Ahmed Mubarak يقول...

مش عارف اقول ايه بصراحة .. ده تهريج فعلا .. واتحاد مش شايف له داعي .. والادهى انه بيضم الناس ليه بالعافيه

سيبك منه .. انتي عملتي الصح ..



تحياتي

http://kasperb4.blogspot.com/ يقول...

تصدقي يا دكتور ان حكاية الاتحاد دي تضحك بجد
انا روحت زرت مدونتهم ولقيتها تقريبا مهجورة من التعليقات
وحاطيين اسامي ناس كتير ف قايمة الأعضاء اغلب الظن انه تم اضافتهم بنفس الطريقة اللي اضافو بيها مدونتك

Bella يقول...

ح تنوري المطبخ بالحمام المحشي ياست الكل
وانت سابقة بتنويرك للمطبخ بالوصفات والاقتراحات والبدائل الجميلة

اما بالنسبة للاتحاد ماخبيش عليكي لما لقيتك بتقولي انهم كتبوا اسمك وانت اصلا لم تشتركي قلت يالهوي

اروح اشوف احسن يحطني معاهم من غير مناسبة

بس الحمد لله مالقيتش اسمي معاهم

ولا لقيت اسمك يابثينة ماتخافيش

بس لقيت مدونين تانيين مش عارفة لو مشتركين فعلا ولا اسمهم محطوط بالعافية

بس فعلا عالم غريبة قوي قوي

احنا ناقصين قيود كيانات هلامية وحركات وحبشتكانات

ايه الهم ده بس

انا ح اروح يااختي المطبخ استنى الحمام اول مايخرج علشان الحق نصيبي وهو سخن

الحمام لايُقاوم خاصة لو بالفريك

ههههههههههههههههه

قال اتحاد قال

بنت القمر يقول...

فضفضه
اولا تنوري المطبخ وصحابه يا افندم
انت الاسطي واحنا التلامذة
============
بالنسبه للاعتراض انا رحت ورا اللينك وملقيتش قائمه المشتركين لكن هما لسه سايبين التعليق بتاعك كتر خيرهم
:)
بالنسبه للناس اللي كانت عاوزة تشترك وهما رفضوا تفتكري مين
اول ما عرفنا الموضوع ده من احمد شقير تفتكري هو اللي ما رضيوش يدخلوه؟؟!!
:)
طب انا كمان مش معاهم يبقا هما اللي رفضوا دخولي
وبعدين برضه مصلحوش كلمه بلوجر باتنين جي
:(
يمكن اشاور عقلي وادخل
وبعدين اللي وصل للقايمه بتاعه الاعضاء لاني معرفتش اوصلها يقولي
اسمي فيها ولا لأ؟؟!!
ويبقا كتر خيره ولا هما رفعوا القايمه وخفوها
بس شفتي الحته بتاعه اذا جاءكم فاسقا بنبأدي؟؟!! جامده
انا ملقيتش حد من اي تيار لحد دلوقت قال انه مرحب بالفكرة
يا تري مين اللي بيفتري عليهم؟؟!!
ها اقعد جنب بيلا استني الحمام
سلام

مـحـمـد مـفـيـد يقول...

هو انتي كنتي معاهم
طيب

Bella يقول...

انا دخلت من شوية ولقيت في اللينكات لينك بقائمة الاعضاء

دوري كويس يابنت القمر
تلاقيكي بس ماكنتيش مركزة من استعجالك على اكلة الحمام

هههههههههههههههههه

معلش

مش مشكلة انا بصيت واسمك انت وبثينة مش موجود
هو اسم فضفضة بس اللى هناك

بس لقيت عندهم مشاركات كتيرة فيها موضوعات تخص مدونين تانيين يعني زي اخبار نزول كتاب مدونات مصرية للجيب
وكمان خبر عن خطوبة مدونة

وهكذا يعني

ح تلاقي اللينك موجود

rtrcbh يقول...

السلام عليكم ورحمه الله وبركاته

ذكرتينى بمن وجدت أصواتهم وكانوا أكثر من ثلاثين باللجنه الانتخابية التى بها مصوتين لصالح المرشح المعروف طبعا

المشكله مش فى تصوتهم هو اختياهم ماشى وحقهم الطبيعى ماشى
هما احرار ماشى
المشكله بس انهم أموات
امـــــــــــــــــــوات

يبقى أنتخبوا امتى وازاى

هو نفس ماحدث معك هم اشتركوا لك هم اعلم بمصلحتك
هم الحكومة يعلمون كل شىء
اتعرفى اكثر من الحكومة ؟؟؟؟

والسلام عليكم

صاحب المضيفة يقول...

بعيد عن الطبخ والأكل والذي منه


شكلك كده طباخة ماهرة يا دكتورة

ربنا يكرمك

لكن الموقف التاني ده هو اللي بجد بايخ وجديد


مش تسيبي حقك أبدا

وربنا يكرمك يارب




تحياتي

مجداوية يقول...

السلام عليكم
أراك على خير أختى الكريمة
عميق شكرى وامتنانى واحترامى
واسمحى لى اعود لقراءة قصصك الماتعة فى المدونة الاخرى بين الحين والاخر

والسلام عليكم ورحمة الله وبركاته

جنّي يقول...

السلام عليكم

أنا أكتب الآن ولعابي يسيل حمام ومحشي كمان ..
بالنسبة لموضوع الاتحاد هذا اسلوب ابتزازي وتهديد مرفوض وهم أصلا لا يستطيعون حماية أنفسهم ..

تحيتي

said

Empress appy يقول...

لاااااااااا لااااااا اوعي تقولي ما هما من قبل عملوا ليه تهنئه بخطوبه بس اعترضت انا هروح ادور على اسمي كويس انك لفتي انتبهنا
شكرا على الحمام اصل اللعب فى اجتماع البنات النهارده جوعني خالص بس كان يوم حلو قوي كان نفسى تبقي موجوده

... يقول...

بعد اذنك يا فضفضة أحب اشكر بيللا لأنها تعبت لي ودورت علي اسمي
ميرسي يا بيللا
مردودة لك ان شاء الله
ربنا يخليكي يا قمر

Unknown يقول...

لآ انا عاا الحمام بتاعي و معاه سلطه و بيبسي

و ايه حكاية الاتحاد ده الواحد يلحق نفسو و يحط الشعار بدل مايعتقلوني و انا مش هاستحمل قلم

هي كل حاجه في البلد دي غصب ولا ايه

تحياتي

صحفية روشة يقول...

جوعتينا

عاشــــــ النقاب ـقــــة"نونو" يقول...

السلام عليكم
الحمام مقبول وتسلم الايادي
اما الاتحاد فدة مش مقبول حاليا لحد ما افهم ايه دة
تحياتي

دكتور حر يقول...

نعم
نعم
نعم



عزومة من غير أكل ولا بحلقة


يفتح الله


وعلى راي جمعاوي عن الاتحاد

فكك منه

Ahmed Kamal يقول...

فضفضة إنتي شفتي الإتحاد ده فيه حاجات غريبة جدا ، أنا دخلت على لينك حاطينه لمشروع قانون التدوين ، و حسسني إني لازم أقدم في قلم الأرشيف بمصلحة التدوين علشان أقدر أتعين على درجة كويسة عندهم ، و بعدين الموضوع كبير جدا و فيه لجان تحقيق ، و لو غيرت حاجة على المدونة و ماقلتش ممكن تتحول لمجلس تأديب ... إيه ده؟

و بعدين حقك تحتفظي بمكانك في الاتحاد ، ده إنتي بكره تحفي علشان حد يرضى يدخلك ، بص بيقولوا إيه:
"إن هذا المشروع بمجرد الموافقة عليه من قبل مجلس إتحاد المدونين المصريين و التصديق عليه من قبل غالبية الأعضاء سيكون ملزما بقوة القانون العرفي، و سيكون الأداة التنظيمية لأعضاء لجان الإتحاد و مقرريها و سيتم نشره في كافة المواقع ذات الصلة و توزيع نسخ منه على دور النشر و المؤسسات الإعلامية و كذلك الوزارات و الهيئات و الجهات الرسمية ذات العلاقة .."

شهاب الأزهر يقول...

:) معلش.. اللي يدون ياما يشوف

YHYيــوســف الـمصـرى يقول...

السلام عليكم

ازيك يا دكنورة
بقالى كتير مجتش هنا واول ما أجى الاقى حمام والله جوعتنيى يا دكتورةههههههه

اها صحيح .. مش انا اشتغلت فى الادوية :) يعنى لو عوزتى اى دوا ناقص ولا حاجة ابقى قوليلى .. هو اها انا لسة جديد فى الليله دى ومش فاهم اوى لسة فيها... بس متقلقيش .. اى حاجة انا فى الخدمة :)

يلا بقى سلام هروح اقرا البوستات الى فاتتنى :)
تحياتى

اتحادالمدونين المصريين يقول...

ناسف ونعتذر عن هذا الخطا غير المقصود

فعلا نحن لا نستحق ان تكون بيننا فى الاتحاد

نشكر لك كرم اخلاقك ...تم تصحيح الخطا

وحذف اسمكم من بين الاعضاء ...

^ H@fSS@^ يقول...

اوببببببببا يا فضفضة يعني حتى هنا كمان فيه تزوير انتخابات؟؟
و تسلميهم بطاقتك ليه بس يا شابة؟؟
كويس انه شافك انك مش اهل لانك تكوني مواطنة معاهم و شالك

والله انتي كده فاتك الميري و ترابه و قرفه كله على بعضه

غير معرف يقول...

طب مش عيب كدة أروح ألاقي صور حمام و أنا مش واكل من امارح بالليل و مكسل أعمل أي حاجة

بالنسبة للجماعة دول بتوع الإتحاد فسيبك منهم خالص، أصلاً هما عاملينها شعل موظفين بجد، تخيلي التدوين اللي هوا طلع أصلاً حاجة شخصية ملهاش دعوة بالسياسة قاموا خلوها نقابة و عايزين يحموا المدونين قال

الأنكى إنهم عاملين رسوم اشتراك، تخيلي مدى التناكة وصلت معاهم لفين؟

يعني ممكن جداً كانوا يروحوا يرفعوا عليكي قضية عشان مدفعتيش الخمسة و تلاتين جنيه اللي عاملينها اشتراك دي

بجد دول ف عالم تاني

دا كان في حوار طويل أوي عن العالم دي قرأته عند أحمد شقير و آبي و حفصة
لأ حاجة بجد ابداع يعني

تحياتي يا دكتورة

عين فى الجنة يقول...

اول مرة اجى الاقى حمام محشى واعتراض يعنى الواحد مالحقش يتمتع بمنظر الحمام المحشى
اصل العالم دى بيتهيأ لها اننا حنريل ننضم ليهم ، معلش خديهم على قد عقلهم

انا مبسوط من مدونتك

وشكرا

حمادة زيدان يقول...

والله الاتحاد ده اى حد بيروحلهم المدونة بتاعتهم بيروحوا لازقين فيه زى الجرادة

أنا عملوا معايا كدة بردوا

نسيت أعرفك

أنا حمادة زيدان

ونفسي اكل حمام

غير معرف يقول...

أنا أعرف اعمل مكرونة جميلة جدا .. بس ماعرفش اعمل حاجة غيرها

ليكى حق طبعا فى مسألة الاتحاد ..

صوت من مصر يقول...

ممكن اعمل فول او بطاطس صوابع اوك ؟

صوت من مصر يقول...

نسيت اقولك وحشنى كلامك جدا ؟

نبض اسكندرية يقول...

الحمد لله انا جالتى دعوة بس

لكن يا عزيزتى هونى على نفسك

فى الاخر كل دة تهييس وكلام فاضى بجد

المهم يعنى الناس اللى قاعدة فى اسكندرية ملهاش نصيب فى الحمام ولا اية بقة؟

محمد حمدي يقول...

الف هنا وشفا على الوجبه الجميله يا دكتور

اما بالنسبه لموضوع المدونين المصريين ده الصراحه انا شفت اعتراضات كتير عليهم ومحدش عاجبه الحال ده .. ايه الناس الى بتكلم باسم الناس دى .. ثانيا عاش التدوين حرا مستقلا وبعيدا عن اى محاوله للقولبه او خلق جمعيه او نقابه له

حلم الحرية يقول...

انا عصافير بطني بتصوصو

ريحة الاكل مالية المدونة وشكلك طباخة ملهاش حل

عايزين هدية وجبة مع كل تعليق

اما موضوع الاتحاد
ولا تزعلي نفسك
ولا يكون عندك فكرة
وزي ما قال احد المعلقين
اللي يدون ياما يشوف

مجهول يقول...

حمام علي الصبح
تقيل أوي علي معدتي وممكن اروح فيها
هههههههه
ربنا يكرمك
ممكن ابقا ادخل تاني
علي الغدا ان شاء الله
.....
الموقف التاني
عجيب وغريب وطريف وظريف
ومش فاهم يعني ايه اتحاد مدونين مصريين
اصلي كنت غايب فترة
الدنيا بتتطور حواليا
هههههه

Asmaa mahaba يقول...

اولا
انا عاوزه الحمام مجسد يعنى مش صوره والا دى كدا عزومه مركبيه
موضوع الاتحاد دا
بصراحه انا مش عارفه ايه هو ولا سمعت عنه قبل كدا بس فى سؤال هو شىء مضر بالصحه ولا حاجه:))
لو مضر متدخليش فيه لو عادى نفضى وسيبك منهم
تحياتى ليكى سومه_87

Tamer Nabil Moussa يقول...

انا بحب البسلة ههههه.

الاتحاد دة يروح يتمام ننة عمرك شوفتى اتحاد ياعمل وناس تترشح لية من غير ما نعرف وكمان مدونتك دخلت الاتحاد بالعافية ناس مخها ضارب

سيبك منهم

تحياتى

-_- يقول...

صيف سعيد ليك و للكل

ادم المصرى يقول...

هههههههههههههههههههههههههه

بوست غريب بس جامد جدا ايه الكمديا دى مطبخ واضافه بى العفيا وبلطجه

ههههههههههههههههههههههههههه

بس على فكره انا طبيخ جامد جدا واحسن طباخين العالم رجاله متشكرين يا برنسس اتمنا زيارتك

الراقـــص مع الذئـــــاب يقول...

السلام عليكم ورحمة الله وبركاته

ايه الصورة اللي تجوع ديه
مفيش حاجة علي اخوكي الغلبان اللي مقضيها تيك اواي وتونة واندومي

وبعدين ايه حكاية الاتحاد دا
وهيحموكي من ايه؟؟
لالالا انتي متسكتيش
انتي تلمي شوية رجالة من بتوعنا وتروحي تكسري المدونة بتاعتهم
ياه يا دكتورة ...متكبري دماغك ونفضي
المدونات مليانة إعلانات

روقي كدا وابعتيلي جوز حمام من اللي في الصورة ديه

david santos يقول...

Excellent work!
Happy weekend.

بنت الصالحين يقول...

ههههههههههههههههههههههههههههههه


يالهوتي لاكون زيك عملو معايا كده
لا لا لا
مش كل الطير يتاكل لحمه
طبعا باستثناء الحمام اللي عملتيه يعني


بس حلو رد جمعاوي فكك منه
هههههههههههههههههه



بس تصدقي حاجه تخوف لاني مره قريت توينه برده عند ممممممممممممممممم نسيت هبقي افتكر واقولك
بس علي فكره كويس انك عملتي كده لاني هعمل زيك فكرتيني وهدخل اشوف اه لانها قوانين وحاجات كده مش ناقصه نكد بقي


سلام ياقمر

Bongo يقول...

ايه العزومة الجميلة دي يا دكتور :D

شطورررة .. يلا منتظرين بقية ابداعاتك المطبخية ..

بخصوص الموضوع بتاع الاتحاد , فأنا سمعت كمية شكاوي فظيعة منه .. فكك و متضايقيش نفسك خالص :)

سلام

mostafa rayan يقول...

طبعا بشكرك علي اكلةالحمام وارجو اراسال نصيبي منه
بخصوص بقي المدونة دي فان طبعا معاكي في رأيك وطبعا الأتحاد دة ماحدش عارف اتعمل امتي وكمان دة ضد فكرة التدوين انه يكو في حرية للجميع لكن بقي ريس وكدة فلاء انا ماليش ريس لا رئيسهم المنتخب - مع كامل احترامي وتقديري الكامل له - ولا غيره انا ريس نفسي وكل مدون ريس نفسه
وشكرا انك اثرت الموضوع دة

القرآن الكريم