TvQuran

٢٠٠٨-٠٦-١٥

هي كده


حياتنا عامله زي فصول السنه ،مش ثابته علي حال...مره شتا و مره صيف و مره خريف
اما الربيع فده الفصل الوحيد اللي بيجي فجأة ومن غير مقدمات ، واحنا بس اللي ممكن نتحكم في ميعاده

ممكن في وسط زمهارير الشتا تلاقي يومين احسن من الربيع
وفي عز الحر نسمة برد تفوت علي القلب تقوله عواف

وعلي طول الايام ناس بتيجي و ناس بتروح ، ناس بتتلاقى و ناس بتتفرق

ناس بالها رايق وناس الهم ماليها ، ناس بتتولد و ناس بتموت

بتمر قدام عنينا
زي شريط سنيما ملون علي ابيض واسود - وساعات بتبقي سنيما صامته - مابيفضلناش منها غير ذكريات , شوية صور و طراطيش كلام


و اهي ماشيه


الدنيا كده ..الدنيا كده
على ده و ده

الدنيا كده

ناس تتهنى وناس تتمنى
وناس مفارقه كده زي حالنا
وادينا عايشين ، وادينا ماشين
ان كان راضين او مش راضين
و بايدينا ايه ؟ ح نعمل ايه ؟


الدنيا كده

ياسلام يادنيا ياسلام عليكي
العمر كله لعبه في ايديكي
بتجمعينا و توفقينا

وف عز ما احنا بتفرقينا

بتفرقينا يادنيا
وادينا ماشين وادينا عايشين
ان كان راضين او مش راضين
بايدينا ايه ؟ ح نعمل ايه ؟


الدنيا كده **








---------------------------------------------

علي الهامش

انهارده ولد صغير داخل يطلب تباشير
قلتله بيبقي في المكتبه يا حبيبي


اصلي عاوز تباشير طبي
برضو في المكتبه

طبي ...طبيييييييييييييييييييي
هاتلاقيه في المكتبه
فضل متنحلي شويه باستغراب وبعدين خد بعضه ومشي

:)))))
عشان مايبقاش كله ضرب ضرب ،قلت اضحكوا معايا


----------------------



** اغنبة سمير سعيد


62 comments:

Mafrousa يقول...

الكلام جميل و الاجمل الولد اللي دخل يدور على تباشير طبى فى صيدليه
ههههه
ان جيتي للحق ماهو اسمه طبي....يبقى لازم يكون فى صيدليه مش مكتبه
هههههههههه

مصــــري يقول...

بس ايه الحكمة دي.

تحس إنك كبرتي كام سنة كده.

والولد ده نموذج ممتاز للتلميذ المصري.

تقبلي مروري
أسامة

Empress appy يقول...

ياااااااا على حكم الحياه فعلا بجد ده اللى بيحص وحلو قوى تشبيهك لينا او حياتنا بالفصول دى والله بعد كلام ما فيه حاجه تتقال
انما الولد ضحكنى مووووووت بجد ههههههههه

بنت الصالحين يقول...

ايه الكلام العسول ده


هههههههههههههههههههه
الولد ده شربات


يااااااه ع العسل

بحب العيال اللمضه اوي

... يقول...

زي ما يكون تخاطر
كنت هاكتب حاجة كدة بس من وجهة نظر مختلفة
اكتب وللا خلاص بأة
حتي الكتابة اللي الواحد بيتفك بيها بيكسل يعملها
إييية ..خريف بأة
‏_‏_
الولد الصغنن دة فكرني لما كنت صغننة ييجي سبعة وتلاتين سنة ورحت أشتري كرنب .. بالكيلو

الطائر الحزين يقول...

ربيع العمر

ساعات الذكاء الزيادة بيضر صاحبه
ولد ذكى

المـــفـــــــقــــــــوعـــــة مــرارتـهــا يقول...

الواد عنده نظرية برضه
لازم تحطي طباشير طبي في الصيدلية عشان شكلنا مايبقاش وحش قدام العيال الصغيرة

غير معرف يقول...

سبحان الله
يمكن أنا دلوقت مهمومة شوية يعنى عندى يومين شتا كده إن شاء الله يعدوا على خير و ييجى الربيع
ورغم إن الكلام ممكن يخلينا نخاف عشان مفيش استقرار لكن بيدينا أمل إن لو فيه حاجة بتؤلمنا هتروح و هتييجى السعادة بفضل الله إن مع العسر يسرا إن مع العسر يسرا
مدونتك الأفضل من وجهةنظرى جزاك الله خيرا ووفقك لما يحب و يرضى و وجعل دائما من كلماتك عونا للآخرين
حتى قصة الولد الصغير رسمت البسمة على شفاه حزينة ولله الحمد
صيدلة القاهرة 98

جنّي يقول...

الحياة ترسم أحيانا لوحة سريالية .. لا يستطيع فهمها إلا من اعترك الحياة واعتركته ..

كلماتك وتعبيراتك جميلة ..

الولد له كل الحق في طلبه .. فللأسف بعض الصيدليات تحولت إلى مايشبه البقالة لبيع البامبرز والشامبو ..
فما المانع من وجود طباشير حتى ولو غير طبي ..

Ahmed Kamal يقول...

متهيألي يا دكتوره إنتي ماخدتيش بالك إنه عايزه طبي

صباح الخير يا مصر يقول...

خمسة فضفضة
*********
اقول لحضرتك حاجه و تصدقينى؟..انشاء الله هاتصدقينى :) انا فعلا شوفت كل فصول السنه فى يوم واحد وده حصل لما كنت بالجابون غرب افريقيا على خط الاستواء كان الدنيا بتمطر و برق و رعد وانا لابس فانله حمالات و حران و عرقان بسبب ارتفاع نسبة الرطوبه بالجو و برغم كل ده استمتعت بزيارتى لها فقد كانت الطبيعه جميله رغم كل ذلك..سبحان الله
اما عن موضوع الاغنيه

الدنيا كده ..الدنيا كده
على ده و ده
اقول
الحمدلله على الحال وانا راضى
الحمدلله ف الحاضر و ف الماضى
الحمد لله عل المليان وعل الفاضى

ااما عن الموضوع الاخير
فالواد كان عنده حق :)

تحياتى

بطوط حبوب يقول...

ههههههههههههههه
هو الطباشير الطبى
الطبيييييييييييي
فى المكتبه امال فى الصيدليه بيبيعوا ايه
هههههههههههه

عجبنى اوى حكايه اننا الى بنتحكم فى معاد الربيع دى
مؤمن بيها جدا

محمد حلمي مخلوف يقول...

يا اخت خمسه انا حاسس انك زعلانه مني لما قلت ان المدونيين تنقصهم الثقافة بس انا قلت الكلام ده لأني بحب المدونيين ونفسي يكونوا احسن ناس ويطردوا انصاف الموهوبيين من الساحة

صاحب المضيفة يقول...

جامدة بجد بتاعت الطباشير دي


رايقة فعلا


ادي العيال ولا بلاش


ههههههههههه


تحياتي

mostafa rayan يقول...

عندك حق يا دكتورة ربنا يخرجنا من الدنيا دي علي خير

عاشــــــ النقاب ـقــــة"نونو" يقول...

هههههههههههههههههههههه
دة على الولداللذيذ
الدنيافعلا كدة
مالك ياجميل لعله خير
تحياتي

^ H@fSS@^ يقول...

بصي انا مش حعلق غير على موضوع الولد
بصراحة فطست من الضحك
و زمايلي في الشغل بصوا عليا و قالوا مالها المجنونة دي
تخيلت منظره و هو متنحلك
لووووووووول

غير معرف يقول...

ليه فيه طباشير طبى وآخر غير طبى ؟

الولد معذور فعلا ..

هو الطباشير الغير طبى يختلف فى ايه ؟ وآسف لعد معرفتى بالفرق ..

tarek alghnam يقول...

الله عليكى
ماشاء الله على الكلمات التى لامست القلب والوجدان
بوست رائع
تقبلى تحياتى
ودمتى بحفظ الله
واتمنى التواصل الدائم

مـحـمـد مـفـيـد يقول...

طبعاً مش طبي
انتوا بقي اللي معندكوش
:))))))

WAMA Global Store يقول...

slamo 3lekom

محمد فوزي يقول...

بس نحاول نرضى , بس نحاول نرضى

محمد حلمي مخلوف يقول...

يا ريت تزوري المدونة بتاعتي يا خمسه علشان احس انك مش زعلانه مني

أمل فتحى عزت يقول...

اسعدنى المرور بمدونتك وأتمنى لك التقدم والمزيد من الاهداف النبيلة


كما أدعوك لزيارة مدونتى والتى محتواها


تعالوا نسافر المسافات الى زمن من المحبة لاينتهى


كما أدعوك لقرأة قصتى


(بكل لغات العالم أحبك)

ابو صهيب ( الجمعاوي الاصيل)سابقاً يقول...

موضوع جميل

وهكذا هي الحياه

واللي يعيش ياما يشوف

غير معرف يقول...

ماشاء الله بوست جميل

ربنا يوفقك يااارب

والولد ده تلميذ نجيب

:)

محمد فكري يقول...

توبيك جميل بجد :)
وعجبني كمان الولد بتاع التباشير الطبي ده
هههههههه
شكراً :)

šσяšαяαα يقول...

ايييييييون هى كدا وماينفعش تكون غير كدا لانها خلاص اتعودت على كدا وتجيبها كدا تجيلها كدا هى كدا وكدا وكدا واى حاجة تبع كدا تبقى كدا

اكيد كرهتينى وكرهتى الكاف والدال والالف
لانهم حروف كلمة كدا:)


وحشتينى جدا يافضفوتى ويارب دايما اشوفك بخير كدا:)

šσяšαяαα يقول...

بس على فكرة صحيح
الولد ماغلطتش هو جاى للمكان السليم لانه الطباشير طبى امال يعنى هيطلبه منين
كان المفروض يغروا اسمه لطباشير مكتبى عشان يروحو يجيبوه من عند مكتب السجل المدنى

هو ايه التخاريف دى
مااااعلينااا

Bongo يقول...

السلام عليكم

متبقاش حياة لو مبقتش الاربع فصول
و مفيش انسان بيستقر علي فصل واحد طول حياته
شوية برد و شوية حر :D

اما بالنسبة للولد فعنده حق يا فضفضة بس انتي اللي مش واخده بالك انه بيقولك طبىىىىىى :D

snohe يقول...

صديقتى
مدونتك جميله

خاطبة المدونات يقول...

نريد متطوعون لإنجاح فكرة المدونة
ومن يجد في نفسه حب الخير فليتفضل
elkhatbah60@yahoo.com

آفاق الحرية يقول...

ههههههههههههه
طباشير طبي في الصيدلية
طب والله فكرة
مشروع يكسب كويس
ههههههههه
بس مشاشاء الله
حكمة اليوم ده ولا ايه
هههههههههه

مدحت محمد يقول...

هههههههههههههههههههههه


موضوع تباشير طبى ده هلكنى من الضحك

ههههههههه

أم فريده يقول...

يا ستى انتى زعلانة لية المفروض ان الطباشير طبى ودة مكان بيتباع فية كل حاجة للطب نظرية برضة لا بس ولد عسل

بس انا عايزة اسالك ازاى بنتحكم فى ميعاد الربيع يعنى لما اكون عايزة ربيع بيجى
تشبيهك حلو اوى

تحياتى ليكى

صالح سعيد يقول...

هى الدنيا كده
فى لحظه تريحك
وكتير بتجرحك وكتير بيبقى الالم بيتك ومطرحك
دى كلمات كنت كاتبها وانا فى اولى ثانوى معرفش كنت بموت فى الاغانى الحزاينى ساعتها
المهم ان البوست جميل كعادتك
واتفق معك فى كلامك
لانه صدق من قال
دوام الحال من المحال
تحياتى يا جميل

الباحث عن الحقيقة يقول...

مره كنت ماشي
بصيت لقيت واحد شاب ميل عليا وقالي الدنيا كده
يوم صيف يوم شتاء مش ثابته على حال
استغربت اوى منه
حسيت انه عبيط
بس كلامه مش عبيط

يلا حصل خير
وبعدين بيقول لحضرتك
تباشير طبي
طبييييي
بس تعرفي انه اتصرف صح
يعني اللى قاله يروح يشتري تباشير طبي مقالش منين
فهو اجتهد
وعرف ان طبي يعني من بتوع القوطه والخضار
فعلشان كده جه عندك
سيبك منه
اديني انا كيلو بصل علشان النشادر خلص

blue-wave يقول...

اما انتى غريبه بجد
قالك طبى يجيبه منين يعنى؟
المستشفى؟))
تحياتى بجد

صيدلانيه طالعه نازله يقول...

بما ان الحياه فصول يبقى الولد مغلطش اما جه يسأل على طباشير عندك فى الفصل بتاعك
عرفتى انك ظلمتى الولد

أم أحمد المصرية يقول...

اختي العزيزة خمسة فضفضة
وحشتيني من فترة و لم نتزاور قلت اخد انا الثواب و ازورك الاول :) لقيت كلام جميل يعبر عن حالة وجدانية
يارب دايما ربيع علي طول بس دون رياح الخماسين :)
اما حكاية الولد فزي العسل بصفتي مدرسة كن افضل تقولي له يشتري و ايت بورد و ماركر افضل من الطاشير حتي لو طبي:)))))))

Maha Shahen يقول...

فعلا الدنيا كدا
ربنا يسعدك على الاحاسيس الملغبطه اللي سببتيها جوايا دى بقى
وربنا يقويكى علي الناس الغريبه اللي قبلتيها في شغلك واللي لسه هتقابليها تشجعى , بكره ياما نشوف
تقبلى تحياتى

حلم الحرية يقول...

هههههههه
طب والله ولد دماغه نضيفه
دماغه عالية فعلا
ما هو يا جماعة برضة التباشير الطبي المفروض يكون فين غير في الصيدلة

ده مش عيب الولد اللي سال
ده عيب الصيدلية اللي مش بتوفر كل الحاجات الطبية

يعني التباشير الطبي وللا كروت ميناتل انهي اولي ان الناس تدخل تسال عليه في الصيدلات


تشبيهاتك عميقة اووووي
حسيتها بتتكلم عني

دمتي مبدعة

صبرني يارب يقول...

دوام الحال من المحال

ويوم لك ويوم عليك

بس حلوه حكاية الطباشير الطبي دي عجبتنى موووووووت

هما ليه سموه طبي ؟؟؟
ليه مشوار طويييييييل فى طرق تصنيع الطباشير ا لطبي .
والمفروض انه اسمه طباشير بلا غبار

سبهللة يقول...

هو انتوا كلكم ادباء
ايه الحكاية بئى؟؟
كل ما ادخل مدونة طبيب ولا صيدلى الاقى اديب
اسلوبك هايل وتشبيهاتك حقيقة جدا
وكله كوم والطباشير الطبى دة كوم تانى
تحياتى ليكى

حنين.. يقول...

هههههههههه طبعا البوست جميل لكن الاجمل الولد اللى طلب منك طباشير...... بس ان ان شاء الله هبقى ابله انشا ء الله ان ان ااشتغلت قصدى انى لاقيت شغل وهبقى ابعتللك طلابى....... بروشته فيها طباشير طبى, بس علفى فكره انا فاكره انو كان على ايامنا الطباشير الطبى دا بردوا

دكتور حر يقول...

انا استعرت منك اسلوبك من على طول الحياة

والكلام اللي في البوست ده

يرسخ نظرتك وتعايشك فيها

والولد ده جدع والله انه حاول يفكر

احسن من غيره كتير


تحياتي الخالصة

عين ضيقة يقول...

على فكرة الصورة حلوة جدا

على فكرة كمان

جربى تعيشى الشتا على طول السنة كده مش الربيع


تحياتى

نبض اسكندرية يقول...

اة والله ما شين يا دنيا وراضيين

انتى كمان ارضى بقة وادينا احلى ما فيكى يا دنيا

كلام دائما بيريح مش عارفة لية؟

دمتى بخير وخالص تحياتى

خمسة فضفضة يقول...

السلام عليكم ورحمة الله وبركاته

واحده مفروسه

انت اللي جميله يا جميله

اعمل يه بس الواد زكائه كان معدي اوي ماعرفتش اجاريه

:)))

-------------

مصري

هههه كام سنه اد ايه يعني

الواد ده نموذج لكل حاجه بايظه في البلد

نورتني

-------
ابي الجميله

الف سلامه عليك يا قمر من الموت

منوراني

-------------

عاشقة الفردوس


ربنا يخليك يارب دا انت اللي عسوله

الواد ده مش لمض ،دا عنده ربع ضارب
:)))))))))))
------

بثينه

واحنا نيجي في سيادتك ايه يافندم
اكيد انت هاتكتبيها بطريقه اكتر ابداع من كده
مستنين البوست بتاعك

حلوه حكاية كرنب بالكيلو ده
والكيلو طلع بكام

هههههه

-------------

الطائر الحزين

فكرتني ببرانامج ربيعالعمر اللي كان بيجي زمان في التليفيزيون

زكي ايه بس دا شكله كان شارب حاجه مدوخاه
ههههههههههههه



------------

المفقوعه مرارتها

عندك حق انا اللي غلطانه والواد كان عنده حق ..

هههههههههههههه


-----------------

غير معرف

ان شاء الله تكون حياتك كلها ربيع في ربيع واكيد هما يومين وهايعدو
شكرا علي ذوقك وكلامك الجميل

علي فكره انا كمان دفعة 98 بس مش صيدلة القاهره

-----------------


جني

شكرا علي ذوقك ،
ما يتهيأليش ان في انسان بيعيش ويموت وهو فاهم المعني الحقيقي للحياه

عندك حق بالنسبه لتحولالصيدليات الي بقاله والله بيجلي ناس بيسالوا عن حاجات غريبه

فعلا الصيادله هما اللي عملوا كده في نفسهم



منورني جميعا

خمسة فضفضة يقول...

السلام عليكم ورحمةالله وبركاته


احمد كمال

ايوه طبي .....طبيييييييييييييييي
:)))))))))))


------------
صباح الخير يامصر

ايوه طبعا اصدق خدنا النوعيه دي من الجو في الجغرافيا ايام المدرسه

وطبعا الرضي اهم حاجه الواحد لو راضي هايشوف كل حاجه حلوه

منورني

-----------

بطوط
طبعا لا التباشير مش في الصيدليه اللي موجود هو البشاوره اللي طبعا بتكون طبيه

هههههههههههه

------------

محمد حلمي مخلوف

والله مش زعلانه ولا حاجه
دا انا كنت نسيت الموضوع
معلش اعذرني اذا ماكنتش زورتك بسبب الانشغال الشديد

منورني

-----------

صاحب المضيفه

يا اهلا يا اهلا باحسن ناس

ربنا يرزقك بعيال من العينه دي
ونشوف ساعتها هاتعمل ايه
ههههههههههه

---------
مصطفي ريان


اللهم آمين

------------

نونو

الحمد لله انا بخير بس والله مشغوووله جدا
فاعذريني ان كنت مقصره في حقك شويه

سلام


------------

حفصه

الف بعد الشر عليك من الفطسان يا جميل

ما تتصوريش الواد فضل واقف يجي خمس دقايق علي ما استوعب انه من المكتبه مش من الصيدليه
نورتيني يا قمر

---------------------------

شريف

استاذي الفاضل اهلا بك منورني

الطباشير الطبي ده بيبقي غير بتاع الوزاره وبيتميز انه بيبقي ناعم ومش بيطلع غبار كتير وبالتالي بيحفظ علي صدر واصابع اللي بيستخدمه عشان كده سموه طبي

دمت لنا


---------------

طارق الغنام

شكرا علي ذوقك

منورني ويارب تتوالي زياراتك الجميله

سلام

------------

محمد مفيد

اعمل ايه بس صيدليه اي كلام مش بتوفر طلبات العيانين بتوعها

هههههه
منورني

-------------------
احمد عبد العزيز

وعليكم السلام ورحمة الله وبركاته

---------------

محمد فوزي

عندك حق اهم حاجه الرضا

----------------

محمد مخلوف
والله مش زعلانه

-----------

امل فتحي

اهلا بيك نورتي مدونتي المتواضعه ويارب دايما
ماشاء الله مدونتك رائعه وان شاء الله ازرك دايما

سلام

-----

الجمعاوي الاصيل

اللي يعيش ياما يشوف واللي يدون يشوف اكتر

منورني
----------------------


حسام يحي

ربنا يخليك شكرا علي ذوقك

ربنا يوفقنا اجمعين

سلام

خمسة فضفضة يقول...

السلام عليكم ورحمة الله وبركاته

محمد فكري

ربنا يخليك

نورتني لاول مره ويارب دايما تتكرر الزيارات

-------------------

صورصارتي

ازيك يا ساره والله يابنتي وحشاني وواحشني تعليقاتك الجميله
فينك من زمان

منوراني

------------

بونجو

عندك حق هانس بالملل والركود ،لازم يكون فيه حركه وتغيير كل شويه
واكيد ماحدش بيثبت علي حال

اما الولد فان شاء الله اوفره التباشير الطبي الطبيييييييييييييييييي
ههههههههههه

سلام

------------------

snohe


ربنا يخليك
شكرا علي ذوقك

------------------
خاطبة المدونات

حلو المشروع جده
ربنا يوفقكم

----------------
آفاق الحرية

خلاص ايه رايك تشاركني ونفتح فاترينه خاصه للحاجات الطبيه اللي من عينه التباشير الطبييييييي

هههههههههههه

منورني

--------------------

مدحت محمد

الحمد لله اني قدرت ارسم البسمه علي وشك ولو للحظات قليله

نورتني

---------------------
دعوة للحب


مش زعلانه بس مزبهله
ههههههههه ...حلوه مزبهله دي

بنتحكم في ميعاد الربيع باننا نحاول دايما مانلقيش بال للدنيا ونؤكد لانفسنا انها زايله وان مافيش حاجه فيها تستاهل اننا نشيل الهم ولا نزعل ،ودايما نبقي حاشين من جوانا اننا كويسين وانا لسه قادرين علي الشغل والعطاء

شكرا علي مرورك

سلام


-----------------

صالح السعيد

حلو اوي الشعر ده
لا دا انت من يومك بقي فنان

منورني

---------------------

الباحث عن الحقيقه

ههههههههههه

ماشي يا سي الباحث
عبيط عبيط بس يعيش
هههههههه

وكمان بقينا بتوع قوطه وخضار
دا احنا اترقينا اوي

ههههههه

عموما برضو نورتني


-------------------------

blue-wave


لا يا فندم يجيبه من وزارة الصحه
:))))))))))))))

نورتني

أميرة محمد محمد محمد يقول...

الولد اللي زي العسل اللي دخل عندك فصيح جدا وبجد عنده حق هم مسميينه طبي ليه
من الافضل ان نعيش الحياه بايمان ورضا مادام مفروض علينا عيشها
علي الاقل نستفيد بحاجه

خمسة فضفضة يقول...

السلام عليكم ورحمة الله وبركاته

صيدلانيه
اهلا اهلا بزمايل المهنه الواحده
اكيد بيعدي عليك من النوعيه دي كتير

واكيد يعني عارفه الاحساس بتاعنا في الحالات دي بيبقي عامل ازاي
بغض النظر عن الفصول خاااااااااالص

:)))))

نورتيني


-----------------------

ام احمد

اهلا اهلا اهلا بام احمد الغاليه

مش عارفه اودي وشي منك فين
اعذريني والله دوامة الشغل وخداني ماتعرفيش ازاي

ربنا يبارك فيك ويارب حياتك تبقي ربيع علي طول

اما الولد فاماكنتش عارفه اقوله ولا كلمه لاني كنت ماسكه نفسي من الضحك بالعافيه وعاوزاه يمشي عشان اضحك براحتي

ههههههه

نورتيني

-----------------

نور شاهين

ربنا يخليك وتقبل منك

ومعلش اذا كنت لخبطلك الاحاسيس جواكي
بس اعمل ايه هي الدنيا كده

منوراني

------------

حلم الحرية

هههههههههههه

فعلا نضيفه علي الآخر وفاضيه كمان مافيهاش حاجه خالص

هههههههههههههه

منورني

---------------------------------


صبرني يارب

اهلا اهخلا منوراني يا فندم
اخبارك ايه
وايه حكاية التباشير اللي بلا غبار دي معاك
مش تحكيلنا كده بالتفصيل

:))))))

-----------------------------------

سبهلله علي الآخر

مش للدرجه دي يا فندم
دي حاجه علي ادنا كده


منوراني ويارب دايما

سلام

--------------------

حنين

خلاص ان شاءالله هاستني الروشتات
متتاخريش اصثلالشغل اليومين دول مش ولا بد

:))))))))

منوراني

--------------
دكتور حر

هو صحيح حاول يفكر بس شطح شطحه جامده اوي
:)))))))))))))

منورني


-------------

عين ضيقه

اتفضلي يا فندم اوصلهالك لحد باب المدونه

وعلي فكره بقي مش باحب الشتا
ومع اني بابقي هافطس في الصيف من الحر بس مش باحب الشتا

منوراني


-----------------

نبض الاسكندرية


ايه النور اللي هل علينا ده

الحمد لله ان الكلام ريحك

عارفه بالرضا كل حاجه تبقي تمام والواحد يرتاح باله ومايشيلش الهم


سلام

خمسة فضفضة يقول...

السلام عليكم ورحمة الله وبركاته

اميره محمد

اهلا بيك منوراني

سموه طبي يا ستي لانه مش بيطلع غبار يسبب حساسيه في الصدر ولا بيسبب خشونه في جلد الاصابع بس كده

سلام

كلبوزة لكن سمباتيك يقول...

ادي حال الدنيا يوم ناس فوق و يوم تحت
يوم فرحان و يوم زعلان
ربنا يخرجنا منها على خير
تحياتي

بيتنا القديم يقول...

و بايدينا ايه ؟ ح نعمل ايه ؟
.
.
.
اللهم لك الحمد حمداً

كثيراً مباركاً فيه

ملئ السموات والارض

وملئ ما شئت من شئ بعد

(:

رفقة عمر يقول...

عجبنى قوى موضوع التباشير الطبى دى جديدة والله

غير معرف يقول...

يعني الواد عيز طباشير طبي، هيجيبه منين؟ من المستشفى؟ طبعاً لأ لأن المستشفى للحالات الطارئة فقط و هوا عايزة للميس بكرة، فطبيعي هيروح الصيدلية يعني

هنا يظهر السؤال، ليه ما راحش عيادة؟ لأنو العيادات الخاصة مصاريفها غالية طبعاً

طول عمري بقول إن التحليل المنطقي بيوضح حقائق كتيرة مدفونة

bedo يقول...

سلام عليكم
انا اول مرة ادخل مدونة حضرتك ما شاء الله جميلة وفعلا حياتنا مش بتمشي على وتيرة واحدة وده فعلا شئ حقيقي حتى في نفسية الانسان مش دايما مبسوط ومش دايما زعلان وبالنسبة للواد الصغير قولى له الله يرحم الطباشير الجير اللى كان بيحرق ايدينا انا كنت شغال مدرس وعارف
منتظر تشريفك مدونتي بعد اعادة فتحها
بيدو
www.shahdalkalam.blogspot.com

كلام وخلاص يقول...

هى المشكلة ان الربيع بخيل اوى بيجى كل فين وفين المشكلة الاكبر بجد انه لما بيجى بنفضل مش مصدقين انه ربيع ونعافر مع نفسنا عشان نقنعها واول ما نبدأ نصدق بيكون مشى وجاء مكانه اى فصل تانى شتاء ببرودته صيف بخنقته خريف بكأبته ساعتها برضه بنتأكد ان الى فات ده والله كان ربيع

أمل فتحى عزت يقول...

السلام عليكم بكل الحب والاحترام


ادعوك لمتابعة الحلقة الرابعة من حكاية عمى رمزى وعم عمارة فى الحارة


تعالوا نسمع ونشوف العفاريت بتقول ايه عن الحارة
*********************
يازائرة الحارة لقد كتب التاريخ اسمك فى دايرة الحارة

مع خالص تحياتى

aya يقول...

كلامك مظبوط بش مش علي طول احنا الي بنتحكم في الربيع
بس الولد الي دخلك الصيدليه ده تحفه بصحيح

القرآن الكريم