TvQuran

٢٠٠٨-٠٧-١٣

33



ماشى في طريقي وشايف السنة ورا السنة بتجري


وكل عام بيروح بياخد معاه حتة من عمرى


سمعت قلبي اللي بيعد الثواني من ورا صدري


صرخ وقال من غير مايسمع كلامي أو يطيع أمري


بتجري ليه يازمن، مش لسه على الرحيل بدري**

الاحد اللي فات (6 - 7) كان عيد ميلادي ال 33 ، يااااااااااااه حاسه اني بقالي كتير اوي عايشه ،
و من زمان اوي عندي احساس اني مش هاعدي ال 35 ( يعني باقيلي سنتين ) ، الاحساس الرهيب ده بيتملكني بشده كل ما تقرب ذكري ميلادي و
دايما بحاول اطرد الهاجس ده ومافكرش فيه كتير
بس ياتري استعديت كويس لمقابلة ربنا ، يا تري كفة الحسنات هي اللي زايده ولاّ ........ لا قدر لله غير كده
باتخيل نفسي وانا واقفه بين ايديه جل وعلي وبيحاسبني علي كل اللي عملته في حياتي وبيسألني عن كل لحظة عشتها وعملت فيها ايه
الواحد بيحاولي يراعي ربنا في كل افعاله واقواله بس اكيد الامر ما يسلمش من بعض الذنوب ومافيش انسان كامل ( الكمال لله وحده ) وبحاول دايما اني اعجل بالاستغفار والتوبه والعوده الي الله
ربنا يفغر للجميع ويتقبل توبتنا
" اللهم اغفر لي ما مضي من ذنوبي ، واعصمني فيما تبقي من عمري ، وارزقني اعمالا زاكية ترضي بها عني ، وتب علي انك انت التواب الرحيم "


--------------------------------------

بقالي اسبوع عندي دور انفلوانزا رهيب (ربنا يستر ومايقلبش بحاجه تانيه ) ، اخدت كل انواع الادوية من مسكنات ومضادات حيويه ومضادات التهاب غيرالاعشاب لحد ما بقيت صيدلية متنقله لوحدي وبرضو مافيش فايده ، حتي المخدر الموضعي مش مأثر في التهاب الحلق

فعلا صدق اللي قال " برد الصيف احد من السيف "

ادعولي اخف بقي




------------------------------------------

**الابيات دي لبيكار

52 comments:

•√أريـ السمر ـج√• يقول...

كل سنة و انت بالف خير و سعادة

و ان شاء الله لك طولة العمر على طاعة بأذن الله و تتمي ال 135 مش 35

و الف سلامة من البرد

دمتى بكل الخير

شــــمـس الديـن يقول...

اولا كل سنة و انت طيبة


دي هواجس عيد الميلاد زي ما بسميها

و هقوللك زي ما ببيقولولي
باب النجار مخلع ... دكتورة و عيانة !!! يا عيب الشوم :)

يا ربي كل دا اخدتيه ؟؟؟ طيب عليكي بالوصفة البلدي بطلتين كبار تاكليهم و تنامي و راس توم تقشريها و تفرميها مع اللبن و تاخديها هي كمان ... معلش استحملي الريجة و لكن المفعول اكيد

تحيا الطب الشعبي !

Mahmoud البطراوى يقول...

كل سنه وانتى طيبه وربنا يبارك لك فى عمرك ويزيدك كل يوم قربه له

بفتكر جدا مقوله للامام الذهبى بعد ترجمه سعد بن معاذ رضى الله عنه فى سير اعلام النبلاء بيقول
كانك ياهذا تظن ان الفائز لايناله هول فى الدارين ولاروع ولاالم ولاخوف سل ربك العافيه وان يحشرنا فى زمرة سعد ا.هـ

اللهم انى اسألك العافيه وان تحشرنا فى زمره سعد

عين فى الجنة يقول...

باب النجار مخلع
drink hot fluids
take aspirin
rest in bed
بس خلاص ، وسلامتك الف سلامة

دكتور حر يقول...

وعملتيلي فيلملما بقول اختنا الكبيره

:))))))))

ربنا يكرمك ويبارك في عمرك
ويستخدمك لنصرة دينه


قولي آمين

FaceMoon يقول...

كل سنة وانتى طيب ويارب السنة دى تبقى احلى واحلى
وثانيا الف سلامة عليكى معلش من الجو الغريب اللى احنا فيه دة
تحياتى

بنت الصالحين يقول...

هههههههههههههههههههه

شهر العظماء برده

اصل شهر سبعه ده شهر العظماء
ههههههههههههههههههههه


انا مولوده 4/7

وبهاء اخويا 8/7

وعلشان كده بنعتبر ان يومميلادنا 6/7
علشان يبقي في النص


ربنا يجعل عمرك كله في طاعه الله



والف سلامه عليكي

kochia يقول...

كل سنة وانتي طيبة
وان شاء الله كل سنة تمر عليكي بالصحة وبالسعادة
ويمكن تاريخ الميلاد وذكراه بتخلي الواحد يفكر عمل ايه في اللي فات وهيعمل ايه في اللي جاي

التذكرة كويسة مش وحشة
تحياتي لك
وسلامتك

روح يقول...

كل سنة وانتي طيبة
وشفاكي الله وعفاكي
وربنا يكرمك
وبلاش الافكار دي
اتركيها لله
اتمني زيارتك وتواصلك
تقبلي تحياتي

مهندس مصري بيحب مصر يقول...

كل سنة و حضرؤتك طيبة يا دكتور
و سلامتك الف سلامة
:)

فاتيما يقول...

ليه يا فضفوضة كدا ؟؟
دا الواحد بييجى عندك ياخد جرعة تفاؤل و يروح
كل سنة و إنت طيبة و يا ستى متخافيش كدا اختك عدت ال35 و ما زالت حية ترزق اهو و اكتر من كدا و يزيح ربنا
يعنى طبعاً القلق دا طبيعى بس ربنا كبير قوى و رب قلوب يعنى عارف نيتك و بعدين الشيطان فى اوقات بيبقى شاطر قوى و بيغلبنا هنعمله إيه يعنى ربنا يسامح على أى خطأ مدام غير مقصود
و لو مقصود رحمته واسعة
سلامتك من البرد
جدتى الله يرحمها كانت دايما تقول المثل دا
خلى بالك من روحك بقى عشان نركب الناقة و نشرخ على ال35 بصحة كويسة
كل سنة و إنتى طيبة يا عزيزتى

قوس قزح يقول...

كل سنة وانتى طيبة و عقبال 100 سنة


كلنا بيجى لنا احساس الموت ده
و اعتقادى دايما انى هدخل الجنة برحمة ربنا مش باعمالى بس

انا عندى امل فى ربنا كبير

سلامتك الف سلامة
لما انتى تبقى مش عارفة تخفى .. احنا نعمل ايه طيب !!!

تحياتى

الطائر الحزين يقول...

كل عام انت بخير

اللهم لا تقبضنا اليك الا وانت راض عنا

زنجبيل


شفاك الله وعفاك

محمد عبد الغفار يقول...

33 سنه من كام يمكن لسه ادهم مرتين ربنا يعينك على الى جاى

ربنا يشفيكى ، جربى متاخديش دواء هتخفى على طول

Empress appy يقول...

كل سنه وانتى طيبه يا قمر وانا بعت لكى على الفيس بؤؤ اوعى تقولى موصلش دا انا رحت وجيت وجيت ورحت لما دخت وبعت لكى الكارت هههههههه

والف سلامه عليكى من البرد

جهاد خالد يقول...

اولا الابيات المنتقاة جميلة ورائعة بحق

ثم جميل وصادق ما نفضتِ هنا من الهواجس والمخاوف
ولا أخالكِ باذن الله الا مغفورا لكِ ما قدمتِ فان الله عز وجل لا يمل من الاستغفار حتى نمل
ومادمتِ تعجلين بالتوبة والاستغفار فإن الله غافر لكِ باذنه تعالى

صدق من قال بأن الموت خير واعظ!!

أطال الله عمركِ وبارك في عملكِ وغفر زللكِ واقال عثرتك

واللللللللللف مليون سلامة عليك يا جميل

اسال الله العظيم رب العرش العظيم ان يشفيكِ ويعافيكِ

mohra يقول...

كل سنه و انتى طيبه و عقبال 100 سنه مش 35 بس
الف سلامه عليكى بس ازاى يجيلك برد ..ده الدنيا حر موووووووت

ana ga3an يقول...

الف مبروك
ويتربي في عزك
وبالرفاء و البنين

الا البوفية امتي

رئـــــيسـة حزب الأحلام يقول...

كل سنه وانتى طيبه ويارب يعيد عليكى الايام بخير
وألف حمد الله على السلامه
تحياتى لكى

Jana يقول...

كل سنة وانتى بخير وسلامة
سبقتك من اربع شهور ومحصليش كده ..عندى امل اوصل لل36
هههههههه
يابنتى ده سن النضج ...
كل سنة جديدة اعدى قولى كده ..لحد ان شاء الله ما توصلى ل 99 ..قوليلهم ده النضج اللى على الآخر ..انا حاخلع بقى عشان بحبه نص سوا
ههههههههههههههه

الف سلامة عليكى
انفلوانزا!!؟؟
انتى طيرتى العصافير اللى عندك ولا لسه؟؟؟
اشربى عسل ابيض بليمون مضافا اليه القليل جدا من زيت الزيتون 3 مرات فى اليوم
وربنا يعينك
وامتنعى عن الذهاب الى الصيدلية لفترة حيث تقمصتها روح الانتى بيوتك التى تتعارض مع الوصفة التحفة دى
:)

HeLsiNG يقول...

كل سنة وانتى طيبة

يا رب تخفى بسرعة وتبقى حياتك الباقية كلها فى طاعة الله :)

bastokka طهقانة يقول...

سلامتك يا دكتورتنا اية بقى باب النجار مخلع و لا اية؟
جميل قوي الدعاء بتاعك ده ربنا يوفقك و يسعدك دايما


اوروفوار

صباح الخير يا مصر يقول...

خمسة فضفضة
**********
كل سنه و انتى طيبه و عقبال 100 سنه

وسلامتك الف سلامه...هو كده دايما باب النجار مخلع

تحياتى

blue-wave يقول...

بلاش الأفكار السودة دى
وكمان خوفك من ربنا دا لوحدة كفايه
بيقولك مرة واحد قبل ما يموت وصى ولادة يحرقوا جثته ويرموا رمادة فى الهواء
ربنا جمعه طبعا
وسألوا
انت ليه عملت كدا؟
قال من خوفى منك يا رب
فأدخله الله الجنه
تحياتى
وكل سنه وانتى الى الله اقرب وعلى طاعته ادوم

عاشــــــ النقاب ـقــــة"نونو" يقول...

يوم ميلاد سعيييدوعقبال ميت سنة طاعة
والف سلامة عليك يا جميل

Unknown يقول...

على فكره انتي مش اكبر مني بكتير ولا حاجه دول يدوب شهر الا 6 ايام انا عيد ميلادي انا ولماضة واحد اغسطس يلا تقلي جيبك من دلوقتى
هديتي ليكي
بوووووووسه كبيررررره
افتكر كده خفيتي من البرد ولا ايه
طيب رجعيلي الباقي بقى
كل سنه وانتي طيبه يا احلى فضفضة

Unknown يقول...

السلام عليكم
كل سنة وانت طيبة يا دكتورة، وإن شاء الله عقبال ال 135، والف سلامة من البرد
أنا حبيت بس اسلم بعد فترة انقطاع وارجع الكهف تاني
والله ليكي واحشة كبيرة جدا
سلامي للعائلة الكريمة كلها
احمد

son's egypt يقول...

السلام عليكم
كل سنه وانتي طيبة
وعقبال ما توصلي لسن 35
وربنا يعفو عنك من دور البرد

دعاء مواجهات يقول...

كل سنة وانتى بألف خير وصحة

وجمال ياقمر

الخووف شئ طبيعى وكويس ان الواحد يخاف والاكوي

يعنى الاحسن

انة يترجم الخوف لأفعال حسنة وكويسة

منتظراكى ياقمر

من زمان مشوفتكيش عندى

بييييس

مصــــري يقول...

دكتورة فضفضة

كل سنة وانتي طيبة

نأسف للتأخير في متابعة المدونة

وألف مليون سلامة من البرد
ربنا يعينك ومن القلب
أصلي لسة طالع من نفس الدور

تحياتي
أسامة

صيدلانيه طالعه نازله يقول...

كل سنه و انت بالف صحه و خير و عقبال 135 سنه و بلاش التشاؤم ده و ربنا يطول فى عمرك يااااااارب
و الف سلامه يا قمر ايه باب النجار مخلع و لا ايه
انتى كده حتكسفينا قدام الاخوه الاطباء
هههههههههههههههه

Unknown يقول...

ابشروا .. هنقفل المدونات ونقعد فى البيت
يوم الاربعاء 9/7/2008

فى المصرى اليوم كتب الاستاذ / مجدى الجلاد عن مشروع جديد

لتقييد الحريات واليكم المقال
---------------------------------------

قانون «ذبح» الفضائيات .. والـ «فيس بوك»!

ادعوكم لبحث هذا الموضوع الخطير قبل فوات الاوان

محمد فوزي يقول...

كل سنه وحضرتك بألف خير , وربنا يعجلك بالشفا إن شاء الله

محمد فوزي يقول...

على فكره انا كنت التعليق 33 على بوست 33 , ومتهيالي ان انا كده ليا جايزه ههههههه

تحياتي

Ma 3lina يقول...

كل سنة و انت طيبة و الف سلامة عليكى يا دكتور :)))

هوندا يقول...

كل سنة وانتى بخييييييير وإلى الله أقرب والف مليون سلامة
ماتخديلك حاجة م الصيدليه ولا ممنوع ههههههه

موناليزا يقول...

كل سنة وانتى الى الله اقرب والى طاعته ادوم
والف سلامة عليكى وطهور باذن الله

أبو خالد يقول...

أبنتي الفاضلة
السلام عليكم ورحمة الله و بركاته
شفاك الله شفاء لا يغادر سقما
و كل عام و حضرتك بخير و بارك الله في عمرك لأن البركة في العمر أفضل من طول العمر و لطالما هناك نفس لوامة فلسوف
يظلك الله بظله يوم لا ظل إلا ظله
و دعي التشاؤم و الطيره فهي مخالفات
لدين الله، دمتى أبنة فاضلة

kafrawy يقول...

كل سنة و انتى طيبة يا دوك

كل سنة و اسرتك بالف خير وسلامة

جمعاوى يقول...

كل عام و إنتم الى الله أقرب و على طاعته أدوم و لجنته أطلب و عن معصيته أبعد


و ..


شفاكم الله و عافاكم

... يقول...

كل سنة وأنت أحسن من اللي قبلها
وأجمل
وأكثر قربا من الله

جميلة أنت أوي علي فكرة

محمد حمدي يقول...

كل سنه وانتى طيبه .. والف سلامه .. والاعمار بيد الله .. ان شاء الله نتقابل هنا بعد الخامسه والثلاثين وافكرك

sakayar يقول...

السلام عليكم ورحمة الله و بركاته
كل عام وحضرتك في طاعة الله وقربه يا دكتورة
بلااااش الهواجس بتاعة اعياد الميلاد دي
وما تدري نفس ماذا تكسب غداً
وبعدين ده شعور جميل ان الواحد يكون عنده هاجس زي ده ... بس يستخدمه بايجابيه انه يزود من اعماله ويستغل طاقته اكتر ... مش يحزن ويزعل
ده أولا
ثانياً بقى ألف سلامة على حضرتك ... ويمكن يكون دور البرد ده نذير العد التنازلي؟؟؟
بهزر بهزر وربنا متاخديهاش جد
ربنا يوفقكم ويعينكم ويكرمكم ويشفيكم كمان
هه بقى
تحياتي دكتورة

الراقـــص مع الذئـــــاب يقول...

السلام عليكم
كل سنة وانتي طيبة يا دكتورة
والف سلامة عليكي
الايام بتجري والسنين بتعدي بسرعة اوي
ودي من علامات الساعة
ربنا يرزقنا حسن الخاتمة

انا حاسس اني مش من زمان اوي ...بس عندي كنير اوي
26 وماشي في ال27 كتير مش قليل
وحاسس اني لسا معملتش اي حاجة وعمال اتسرق
تخيلي لغاية دلوقتي لسا مجبتش موبيل بكاميرا
كل ما اقعد لوحدي وافكر في الموضوع دا بكتئب اوي
خلاص بقي عشان هتقلب بعياط

الف سلامة عليكي ومرة تانية كل سنة وانتي طيبة

سلام يا دوك

فاتيما يقول...

النيولوك دا حلو قوى قوى

وميض ابتسامة يقول...

اولا .. كل سنة وانت طيبة وان شاء الله نقولها لك كل سنة

ثانيا .. دعى عنك الهواجس فهى ليست من الايمان والاعمار بيد الله وحده ومش عارف ليه انا عندى احساس قوى انك قريبة من ربنا... وخوفك من اللى راح وأملك فى الى جاى اقرب دليل على ذلك ..وربنا يقوى ايمانك ويحسن ختامنا جميعا.

ثالثا ... الف سلامة عليك من انفلونزا الصيف ( احد من السيف ) .. وياريت يادكتورتنا الرقيقة ..تخفى من الادوية شوية .. وخليكى فيما هو طبيعى ....ويارب يشفى عنك وعن كل مريض ..آمين

bedo يقول...

سلام عليكم
اطال الله عمرك وده احساس طبيعي حسب الحالة النفسية اللى بتمري بيها
وشفاك الله وعافاكي من البرد

بيدو

Noble Princess يقول...

كل سنة وأنتي طيبة يا قمر
ويارب كدة على طول فرحانه وفي أعياد دايما لحد ما يبقي عندك 100 سنة وأفرح فيكي :)
وألف سلامة عليكي
خدي بالك من نفسك ..
فيه حد برده يجيله دور برد في الصيف دة ..
ربنا معاكي ..

تقبلي مروري

حبيبـــــــة القمـــــر يقول...

السلام عليكم
كل سنه وانتي طيبه وعقبال 12543682 سنه ونص

والف سلامه عليكي
هو برد الصيف وحش وجربته بس الحمد لله
ربنا يشفيكي ويبعد عنك كل شر

خمسة فضفضة يقول...

السلام عليكم ورحمة الله وبركاته

ربنا ما يحرمنيش منكم جميعا ومن ذوقكم

وكل سنة وانتم جميعا بخير وسلامه

متشكره اوي علي الدعوات الحلوه الكتير دي اللي اكيد كان ليها مفعول السحر في التعجيل بالشفا بامر الله


نورتوني كلكم ويارب دايما منورني


سلام

نعكشة يقول...

اولاً كل عام وانتي بخير
وانتي إلي الله اقرب
و علي طاعته ادوم

ثانياً ربنا يديكي يا رب طولة العمر و يكرمك و يفتح عليكي بالاعمال الخير دايماً

ثالثاً بالنسبة للبرد

احسن حاجة

ملعقة عسل كبيرة عليها عصرة ليمون الصبح وبليل
وانتي متأكدة ان فيه شفاء للناس
لإن اهم حاجة اليقين

و شفاكي الله و عافاكي

دمتي سالمة

سلامٌ عليكي

Ahmed Kamal يقول...

كل سنة و انتي طيبة ، و ربنا يطيل عمرك في طاعة يا رب ، و الف سلامة عليكي من الانفلونزا ..

القرآن الكريم