TvQuran

٢٠٠٨-١٢-٢٥

اكشفه اغطيه ...انا حره


ايوه دا وشي وانا حره فيه اكشفه ،اغطيه،اعمل اللي انا عاوزاه ، بالظبط بالظبط زي ما بيدوا الحريه لاي حد انه يكشف او يغطي حاجات تانيه

ايوه حره طالما حريتي دي مش هاتضر اي حد ولا تأذي اي حد وكل انسان حر يختار طريقة حياته زي ما هو عايز

الناس ليل ونهار وفكل حته صدعولنا دماغنا بالكلام عن الحريه اللي عاوزنها تبقي متاحه للجميع ،

حتي الشواذ عاوزين يبقي ليهم حريه في اي ممارسات بيعملوها ،

و البهائيين عاوزين يعترفوا بدينهم اللي مش دين اصلا ويدوهم الحق في حرية ممارسة طقوسهم والدعوه لدينهم
حتي الملحدين اللي بيشتموا في كل المقدسات ليل ونهار في ناس بتنادي بحريتهم

طيب اشمعني بقي لما تيجي واحده تقول انا هاغطي نفسي وهاحاول اتشبه بامهات المسلمين ولو في حاجه بسيطه اللي هي النقاب ، وهاتكون نيتي الخالصه هي المحاوله الجاده للتقرب ولو سنتيمترات قليله من ربنا


ليه تلاقي الحوار اتحول من النقيض للنقيض ، مهاجمه عمال علي بطال ونعت بابشع الصفات ومحاولات من كل الناس اللي بينادوا بالحريه انهم يحدوا من حريتها في اختيار ما ارتضته لنفسها مهما كان صح ولا غلط

هو مش ده برضو داخل ضمن نطاق الحريه الشخصيه اللي بيقولوا عليها ؟؟؟ ولا هي الحريه بتتجزأ ولا طالما الموضوع له علاقه بالاسلام يبقي لا والف لا ونلاقي الكل اصابتهم الاسلاموفوبيا ؟؟؟؟

ليه نلاقي الناس عماله تهاجم المنتقبات والمحجبات ، وتربط بينهم وبين التخلف عن ركب الحضاره ، يعني بلدنا مش هاتلحق ركب الحضاره الا اذا خلعت السيدات حجابهم ؟!!!!!!!!!

بيقولوا صلحوا اخلاقكم قبل ما تصلحوا مظهركم الاول.... طيب وفيها ايه يعني لو عملنا الاتنين مع بعض ؟؟

ناس بتقول ان كتير من المنتقبات والمحجبات واخدين الموضوع مجرد شكل خارجي ومظهر امام الناس وبس و ان ده تسطيح للاسلام في شوية مظاهر زي النقاب واللحيه ، اقولهم افرضوا ......احنا مادخلناش في قلوب حد ولا كشفنا عن العلاقه اللي بينه وبين ربنا شكلها عامل ازاي ؟؟

كل الكلام اللي فوق ده بيتقال ويتردد في كل حته وكتير اوي من الاشخاص اللي بيقولوا انهم بيدعوا الي التحضر والرقي و بيستغلوا كل اللي اتعلموه في مهاجمة النقاب والحجاب بطرق غير حياديه وفيها تعصب وكيل بمكيالين
، واللعب بالالفاظ وتحوير في الكلام ، وتصيد اشياء من وجهة نظرهم انها اخطاء ، وده عادي واتعودنا عليه وخدنا مناعه منه وماعدش بيهمنا

بس اللي مش عادي واللي فعلا ما ينفعش يحصل ان كلام زي ده يكون صادر من وزارة الاوقاف المصريه راعية الازهر أعلي مؤسسة دينية اسلامية في مصر والعالم

ماينفعش ان المؤسسات الدينيه يصدر عنها مثل هذا الهراء

أيوه النقاب مش فرض ولكن معظم العلماء اعتبروه فضل تحاول به احدانا ان تزداد عفه وتقرب الي الله ، صحيح ترك النقاب ليس بذنب ولكن الاخذ به ليس بكبيره تستحق العقاب ، ولا هو بدعه نخاف علي الدين منها ، ولا بيسبب نص المفاسد اللي بتسببها حاجات تانيه ووزارة الاوقاف ومن قبلها الازهر ساكتين عنها ومطنشين وعامين ودن من طين والتانيه من عجين ولو حبيت اعددها مش هالحق اخلصها قبل السنه الجايه

ليه بس النقاب هو اللي صدرت ضده الكتب لتهاجمه ونعتته انه مجرد عاده بدويه مستورده من الصحراء ، الأزهر اللي عاش عمره يقول أن النقاب فضل وليس فرض أصبح فجأة عادة سيئة وليس عبادة



وليه بس النقاب هو اللي اتعملت عشان الحد من انتشاره 900 قافله هاتلف المحافظاتو اتكلفت 10 مليون جنيه من ميزانية وزارة الاوقاف ، ويوم ما يدوروا علي 10 ألاف جنيه عشان ترميم معهد ازهري هايتهد فوق رؤوس الطلبه تبقي الميزانيه لا تسمح ؟؟!!!!


لحد امتي هاتفضل سياسة الكيل بمكيالين موجوده وهانفضل نناقش المواضيع علي طريقة لا تقربوا الصلاه ؟؟ ولحد امتي هانفضل نهاجم مظاهر الاسلام والعوده الي الله ؟؟ ولحد امتي الحديث الديني هايكون تحت رحمة السياسة ولخدمة اهداف سياسية بحته ؟؟؟ لحد امتي هانفضل كده ؟؟؟

يمكن كتير منكم قبل البوست ده ماكانش يعرف اني منتقبه ، لكن الحمد لله انا ارتدي النقاب من حوالي سنتين ، ومش حاسه اني مختلفه يعني عن اي حد حواليا ، ولا حاسه اني حاطه قفل علي دماغي ولا ان عندي بدل المخ حاجه تانيه ماركة باتا 45

ولا معلقه المشانق لحد ، ولا بقعد في المواصلات اخوف الناس من عذاب القبر ، ولا ما سكه كرباج اجلد بيه اي واحده مش محجبه ، ولا باذن فودان غير المنتقبات عشان ينتقبوا ، ولا خبيت سلاح في هدومي ودخلت سرقت بنك وروعت امن المواطنين ، ولا العيال الصغيره لما بتشوفني بيتسرعوا ، ولا ماشيه اعيس في الارض فسادا ولا شايفه اني ارهابيه

و لما بابص لنفسي في المرايه مش باشوف كيس زباله ومربوط من فوق، باشوف انسانه عاديه جدا زي اي واحده تانيه ، انسانه كل اللي تتمناه رضا المولي عز وجل مش اي حد تاني

في الاخر ما عنديش الا الآية الكريمة :

( فأما الزبد فيذهب جفاء وأما ما ينفع الناس فيمكث في الأرض كذلك يضرب الله الأمثال‏ )

صدق الله العظيم

61 comments:

Ahmed يقول...

ازدواجيه في الحريه

هو ده اللي موجود
وان كان عجبنا

اه والله
الموضوع فعلا بلطجه فكريه أو بلطجه بالقوه

!!! عارفة ... مش عارف ليه يقول...

هكذا تأتي خواتيم الزمان
عندما ينقلب الحق باطلاً
وينقلب الباطل حقاً

عندما نترك كل المسيئات والسيئات على عواهنها
ونأتي على المنقبات بالمقلاع

في الحقيقة أنا لست مع النقاب
لكني لست ضده فهي حرية مكفولة مثل حرية البنطلون الجينز مثلا
كلُ يفعل ما يشاء

لكم دينكم ولي دين

----
بس حلوة كلمة "الاسلاموفوبيا" دي والله


دومتي بكل خير
وليد

Kiara يقول...

بصراحه انا محروق دمي من الموضوع ده

الا ماجابو سيره اللي مش متغطييين فاهماني طبعا

جايين علي اللي بيحترم نفسه ودينه والناس يجوا عليه

لا حول ولا قوه الا بالله فعلا

غير معرف يقول...

بوست موضوعي ومحترم جدا .. ليه دايما طلب الحريه يكون في العري وقلة الادب والسفاله بالنسبه لمفهومنا الشرقي او الإسلامي .. ليه متصورين اننا لازم ناخد علبة الحريه كامله من الغرب بكل عناصرها .. استغربت جدا لما لقيت مدونه اسمها تقريبا حنان الشريف بتوصف المنقبات والمحجبات بأكياس الزباله وفي نفس الوقت بتدافع عن حقوق الشواذ واصدقائها المثليات .. استخدام فزاعة الوهابيه والمتأسلمين في اي نقاش شئ يجيب المرض .

المهـ إلي الله ـاجر يقول...

جزاك الله خيرا

الحرية التي يدعوها هؤلاء المساكين هي حريقة ناقصة .. فالحرية عندهم هي القدرة علي فعل الحرام او مخالفة ما اجمع عليه المسلمون علمائهم وعوامهم منذ عهد النبي وحتي وقتنا الحالي

الحرب ليست علي النقاب . الحرب تريد ممحو فكر بأكلمه لأنه الفكر الحق . ولكن بين اظهرنا من لا يريد أن تقوم للحق قومة ويكون له كلمة ..

ووالله الذي لا إله غيره .. لهذه الهجمات المشبوهة أثر كبير في زيادة عدد المنتقبات والملتزمات .. وسيموت هؤلاء ولن تذكر اسمائهم إلا مصحوبة بالسباب .. وسيبقي النقاب ثابت وشامخ ودليلا علي الطهر والعفاف . وإن كره المنافقون

انا حره يقول...

انا مش فاهمه هما عاوزين يحصل ايه اكتر من كدا

دى الشوارع بقت ولا الكباريهات

Empress appy يقول...

بجد قولتى اللى نفسي فيه انا مش محجبه بس كل واحد حر فعلا ومش عارفه الازهر عمل كده ليه وازاي يوافق على ده بجد بقى سفه ملوش حل قالك علشان السرقات قولنا يعملوا بوليس نسائي بسال المنقبه او حتى تخليها تكشف وشها لها وبكده يبقوا وضوعوا حدود غير كده عمر المظهر ما دل على التحضر العقل بس ما فيه متخلفات ومتخلفين كتير وتضارب وفى افكارهم ومبرضه مش محجبات مش عارفه ايه الهوس اللى جالنا ده والناس بقت مطبلتيه

mado يقول...

اهلا يا دكتورة ويمكن دي اول مرة اعلق فمدونتك.
فعلا كل شخص حر فنفسة بس مش من الحرية اني اضر الاخرين.الحرية تنتهي عند حدود الاخرين.حضرتك اتكلمتي عن البهائية والمثليين والملحدين والمنقبات.
بالنسبة للبهائيين من حقهم انهم يطلعو اوراق رسمية بديانتهم بغض النظر عن اعترافك بيهم كديانة ولا لاء .وافتكر ان دا مش هيضرك في حاجة ولا فيه تعدي علي حريتك او حرية الاخرين.
اما المثليين كل واحد حر فنفسة طلما انو مش بيضرك او بيقوم بالممارسة فالشارع مثلا.
اما الملحدين معرفش ليه فمجتمعاتنا بنبص للملحد علي انه متحرر من كل شيء علي انه بيشجع علي العلاقات الغير مشروعة علي انه بيتمني الموت لكل المتدينين علي انه خاين.
مع ان الملحد انسان عندي جدا وفيهم ناس محترمة كتير وبتحترم المتدينين وبيحترمو العادات والتقاليد.
وتقريبا الحاده مش هيضرك فحاجة.
اما المنقبين والملتحين بدون مبالغة معظمهم متطرفين وواخدين الدين مظاهر وتقريبا ميعرفوش من الدين الا القشور.ثقافتهم الدينية بتدور في فلك عذاب القبر وحكم اللحية وتقصير الثوب والنقاب وغير كدا ميعرفوش.
بغض النظر عن شخصيتك الي ممكن تكون شخصية عندها وعي ومش متطرفة.انا بكلم علي الاغلبية.

اما النقاب انا شايف انه تعدي علي الحرية الشخصية لانه بيضرني ومن حقي اعرف مين الي راكب جمبي في موصلة مثلا.
ودا ينطبق اكتر علي الستات من حق اي ست تعرف مين الي راكب جمبها او مين الي معاها فالاسنسير وهكذا.
المنقبة شخصية مستخبية ورا قناع.شخصية غامضة .
حضرتك لو فالبيت مثلا وحد لابس قناع ورن الجرس وبيصيتي من العين السحرية هتفتحي .طبعا لا لانه هيثير شكوك ومخاوف الكلام دا ينطبق علي المنتقبة.
واظن دا تعدي علي حقوق الغير.
ومن ابسط الحقوق اني اعرف بكلم مع مين.
اما الحجاب كل واحدة حرة تتحجب وتختار شكل حجابها ايه كمان.

اما حكاية وزارة الاوقاف دي طبعا حاجة مقرفة ان المبلغ دا يتصرف علي حملة توعية.واكيد انو هيتصرف فحاجات تانية فارغة.باختصار هيتسرق.

للاسف الوزارة مخدتش بالها ان سبب انتشار التعصب الديني سببه التهميش السياسي وعدم المشاركة السياسية.المواطن بدل ما ينتمي لحزب سياسي يعبر عن افكاره ويتبني مطالبة بقي ينتمي للجامع او الكنسية وكل مالنظام زاد فتهميشه للناس كل مالناس بدات تتعصب اكتر لدينها.
ودا ينطبق علي المسلم والمسيحي.

متأسف لو كونت طولت فالرد بس حبيت اقول رايي واتمني اني مكنش سببت ازعاج ليكي وعلي فكرة الكلام مش موجه ليكي انا اكلمت بوجه عام.

تحياتي

وميض ابتسامة يقول...

انا لست مع النقاب .. ولكنى لا املك ان امنعه .. فهذه حرية شخصية

ولكنى من مؤيدى الحجاب والزى الاسلامى المحترم ...

واذا كانت وزارة الاوقاف والازهر قد ادلوا بدلوهم فى هذا الموضوع .. فشكرا لهم .. ولكن وبمنتهى البساطة مازال هذا الامر فى نطاق الحرية الشخصية بالرغم من كل شئ...!!

واما عن القوافل ال900 والميزانيات المرصودة فهذا يحتاج الى علامة استفهام كبيرة..

الموضوع خارج اطار التشدد .. فهو ليس فرض ... ولكن لا نستطيع ان نمنع من ارتدته بمحض ارادتها ...

غير معرف يقول...

mado
انت دافعت عن كل الناس وبعدها كعاده اي حوار من النوع ده نكرت كل الحق من الطرف الاخر !!

موناليزا يقول...

مالقيتش كلام اقوله غير
ربنا يعزك بالاسلام ويعز الاسلام بيكى

بنت القمر يقول...

اولا بحيي شجاعتك
تانيا: احنا معندناش ابدا اي احساس ولا تفهم بمعني الحريه
طبعا مش منقبه ومش متخيله نفسي ممكن اتنقب في يوم
لكا اؤيد جدا حرية اي منقبه ان شاء الله تحط علي راسسها كتاكيت بني زي زينات صدقي
هي حرة
واللي تلبس ميني جيب حرة كل انسان وليه اختيارة في الحياة المسئول عنه
واللي يريحه
لكن اللي لللاسف بيريحنا بيتعب غيرنا مش عارفه ليه
وعلي راي المثل واحد شايل دقنه التاني تعبان ليه
الفكرة يا فضفضه
ان كل واحد عنده اختيار عاوز الناس تختار زيه واللي مش زيه يبقي عدوه
:((
وده بيزود الاحتقان هو حاله الرفض
من المتدين لغير المتدين والعكس
اخيرا احيي شجاعتك

عمرو يقول...

الحريه الشخصيه تقف عند حدود حرية الآخرين و طالما أن البنت المنتقبه لا تسىء لأحد بالطبع ففعلا ليه و لماذا و هلبت و ياترى يا هلترى هذا الهجوم الضارى على النقاب ؟؟
أعجب حوار دار بينى و بين صديق عن موضوع النقاب أنه فضل يسوق فى نفس الحجج اللى قولتيها يا دكتوره اللى بيهاجموا بيها النقاب و المنتقبات و تقريبا كانت ردودى عليه قريبه جدا من ردودك لكن أعجب شىء صديقى ذكره فى مساوىء النقاب أنه كيف للمنتقبه أن تأكل مكرونه اٍسباجيتى فى مكان عام ؟؟!!
هنا بقى صديقى أفحمنى و ماعرفتش أرد عليه :))

صاحب المضيفة يقول...

الحرية الشخصية والعامة يكفلها الدين والشرع والاسلام كله


لا حق لأحد أن يحكر على أحد رايه طالما لا يوجد أي مانع شرعي او أخلاقي أو عرفي يضاد العرفي والأخلاقي


تحياتي

maha zein يقول...

يا الله علي كلامك
بصي
هتلاقيني كاتبة موضوع كامل عن النقاب ده وبيتهيقلي متكلمة فيه نفس كلامك

وانا متاكدة دلوقتي وعارفة انك اكيد مريتي علي كام مدونة تعبانة كده كاتبين عن النقاب وحاجة مسخرة وقلة حيا
بجد سيبك منهم
دول عالم تعبانة
واصلا اساسا تحسيهم مرضا نفسيين او ربنا غلف علي قلوبهم
يلا الحمد الله ان ربنا رازقنا بعقل واعي بيقدر يميز بين الصح والغلط
في غيرنا ربنا بجد اغلق قلوبهم تماما عن الهدي
ربنا يرحمهم بقه

بنت سيناء يقول...

اللة ينور عليكى
دكاترة للاسف ودكتورات فى الازهر يقولون ابشع الكلام مثل الدكتورة سعاد طالح..عندما قالت عنه انةها تشمئز منه!!انا شخصيا اشمئز منها وهى ليست منتقبة.
عاده بدويه مستورده من الصحراء..نعم هى كذلك ولان حياتنا الصحراوية البدوية نحكم انى من بدو سيناء..ما قال ذلك لم يخطئ اختى..انتى نسيتى ان حياة الرسول علية افضل الصلوات وفجر الاسلام كانت حياة بدوية بدائية؟؟
البساطة تصنع الرجال والشدائد وصعوبات الحياة البدوية هى ما تصنع الرجل
اشكرك واحمد الله انى منتقبة

بنت سيناء يقول...

نسيت ان اقول شئ للاخ mado
يا من تدافع عن الملحدين وهم من يكفروا وينكرو وجود الله ..كان من الاولى بك ان على الاقل لا تبدى رايك فى موضوع النقاب وهو ما يتعلق بالحشمة والالتزام والدين
تعجبت حقا على مناصفتك للملحدين وانساب الاخلاق للبعض منهم..قل لى: وهل سيواجهون حسابهم يوم الدين بأخلاقهم أم بكفرهم بالله وعدم اعترافهم اصلا بوجود يوم للحساب!!اردت فقط ان اعرف

شئ عجيب هؤلاء هم من يدافعون عن الالحاد ويقفون فى وجة الالتزام او على الاقل الاحتشام.

عين فى الجنة يقول...

تعرفى يا دكتورة مع احترامى الشديد لكل كلامك وحريتك الشخصية
طرأت لى فكرة اتأمل فيها منذ زمن وهذه اول مرة اطرحها للنقاش
الفكرة هى مقارنة النقاب بالرهبانية التى افترضها بعض النصارى على انفسهم ولم يفرضها الله عليهم وكانوا حسب القران الكريم يبتغون بها وجه الله
ولكن ماذا حدث؟ فما رعوها حق رعايتها
فهل تستطيع المنقبة رعاية النقاب حقا؟
قرين النقاب للنساء هو الاستقرار فى البيوت طبقا لامر المولى عز وجل لامهات المؤمنين ان يقرن فى بيوتهن وطبعا كما افهم فهذا الامر ينسحب على باقى نساء المؤمنين اللاتى يتخذن من نساء الرسول مثلا اعلى يحتزى
فمن باب اولى للسيدة المسلمة اذا ارادت تحصنا وعفة ان تقر فى بيتها ولا تخرج الا للضرورة والا فأين رعاية النقاب حق رعايته وهى تنحشر فى المواصلات وتمشى فى الاسواق وتضحك بصوت عال وترتاد اماكن اللهو والمولات والسينمات وهى بنقابها وهى تظن انها تحسن عملا
نقطة اخرى معروفة للجميع ولكن لا يقف عندها احد وهى مسألة الحرية
الحرية لا يجوز ولا يمكن ان تكون مطلقة بل هى مقيدة فى اغلب الاحوال بالقوانين الشرعية او الوضعية او الطبيعية او العرف الى اخره
فالحرية المطلقة هى وهم مثل العنقاء والخل الوفى تماما
دكتورة، ارجو ان لاتعتبرى كلامى هذا نقدا لكى او للنقاب ولكنها افكار رأيت ان اشاركك فيها لثقتى فى رجاحة عقلك وسعة صدرك

Ahmed Mubarak يقول...

اولا انا احترمتك اكتر لما عرفت انك منتقبه وكبرتي في نظري جدا

ثانيا:
فكرتيني ببوست مدمر اتغظت منه جدا لدرجة اني شتمت للأسف ..

وكان نفس الحوار بتاع وزاره الاوقاف بس ده بقى بشماته ..
وانا متغاظ منه لدرجة اني قربت انساه ..
وفعلا التبريرات سخيفه
واشد ما غظني ان بنت اعترضت قالت ان كل واحد حر فكان الرد ان لا لان اخفاء الهويه خطر على الأمن العام

في المقابل خلاص انا هقول ان البنات الي بتلبس لبس فاضح وضيق بيثيروا الشباب وبيسببوا بكده زياده حالات الاعتداء وده خطر على الامن العام

حاجة عجيبه فعلا الكلام والتبرير .. بس اقلك على حاجة بصراحة لما بيقولوا كده الناس بتعند وربنا بيقلبها لصالحهم
كفايه كده علشان ان والله متغاظ وقلبي محروق جدا

يا مراكبي يقول...

من آفات هذا العصر الكيل بمكيالين .. والتعميم بدون وجه حق

وعلى سبيل التوضيح

إذا رأى الناس مثلا إمرأة منتقبة ليس لها في الدين غير الرداء بينما تمشي بين الناس بالنميمة مثلا .. سيقولون أن المنتقبات "جميعهن" مثال سيء للدين! هذا مثال عن آفة التعميم

وإذا تشدق الجميع بالحرية ودعوا إلى عدم تعنيف الشواذ وأصحاب الديانات الشاذة والعاهرات إلخ .. نجد الوضع يختلف إذا قلنا أن نفس القدر من الحرية مكفول للمنتقبات بل وينكرونه .. وهذا مثال عن الكيل بمكيالين

وبين الإزدواجية وبين التعميم المضلل .. يتخبط المجتمع وتتنوع الآراء فيما يسمى بالشيزوفرينيا

غير معرف يقول...

ماشاء اللة يا دكتورة اية العظمة دي
بس كنت عايزة اضيف حاجة ان ثلاثة من المذاهب الفقهية شافت ان النقاب فرض والمذهب الاخير قال انة فرض اذا لم تؤمن الفتنة و اظن اننا دلوقت في زمن فتنة

حفيدة عرابى يقول...

كلام رائع وفى الجون بجد بس فى نقطة اتخضيت منها فى اول كلامك على ان ده وشك وانت حرة فيه لا يافندم حضرتك منقبة لانك اقتنعت بالرأى القائل انه فرض اوفضل ومش معنى ايماننا بالحرية ان يكون من حقى البس على كيفى لان انا بيحكمنى فى الاول والاخر دين من مصلحتى دنيا واخرة الالتزام بتعاليمه ده لوانا باقيس كل حاجة بمصلحتى وانا بستغرب جدا على الناس اللى عندها وعىسياسى راقى ومع كده مؤمنة بالحرية المطلقة اللى بيشجعنا عليها الغرب اللى كان عنده مشاكل جوهرية مع الفكر الكنسى بالعصور الوسطىلكن احنا بصراحة ايه مشكلتنا مع رموزنا الدينية اما مادو فبصراحة كتر خيره يعنى الملحدين والبهائيين وغيرهم ولاد ناس ومن حقهم يتمتعوا بالحرية طالما مش بيضايقونى لااااااااابصراحة بيضايقونى بيحسسونى بحقارة الانسان اللى ربنا خلقه واكرمه ويمارس جحوده مع الله كيف يمكن لى انا ان احس بالامان فى التعامل معه طبعا انا لا اقصداصحاب الديانات السماوية الاخرى اما السيد راجى فالف شكر له فعلا لانه اثار نقطة احيانا تؤرقنى هل النقاب يشبه الرهبنة هل مطلوب من المنقبة فعلا القرار فى البيت ام الاصح ومن حقها الاشتراك فى مناحى الحياةلتستفيد وتكون قدوة لغيرها

mado يقول...
أزال المؤلف هذا التعليق.
عصفور المدينة يقول...

لعل الله يرد كيدهم في نحرهم كما عودنا بفضله وكرمه ويعفو عن تقصيرنا

mado يقول...

لقد خلقنا الله احرارا بجد بارفو عليكي كلامك كله عنصرية.
ولما شوفت البروفيل بتاعك وعرفت انك مدرسة اتاكد وعرفت ان العنصرية والطائفية ممكن تتأصل وتتزرع من الصغر في الاطفال لو شخصيات زيك بيدروسو ليهم.
اكيد هتعلمي الاطفال الي عندك يحتقرو اصحاب الفكر المختلف.
ماله الملحد هو الملحد دا كائن فضائي الملحد دا مش انسان زيه زيك.
اظن عيب جدا العنصرية الي اتكلمتي بيها عن الملحدين دي.علي اي اساس تخافي من الملحد او تحتقرية.لمجرد انو مختلف معاكي ودا يأذيكي في ايه.
هو تقييمك للانسان من خلال الدين او الايمان ولا من خلال الاخلاق.
لو تقييمك من خلال الدين يبقي احب اقولك في ناس متديينة كتير وحرامية وبيتحرشو بالستات هل دول فنظرك بتحسي معاهم بالايمان لانهم مؤمنين.
ولو في ملحد شريف ومحترم هتحسي معاه بالخوف وتحتقرية.
قيسي علي دا حاجات كتير.الاخلاق غير الاديان.
وعلي فكرة الملحد و ممكن يكلم كلام ميعجبكيش عن دينك.بس اكيد اخلاقه مش هتسمح بكدا.واذا كان دينك بيقولك تحتقري الاخر اكيد الملحد مبدائه بتحتم عليه انه يحترم الانسانية كلها وميفرقش بين الناس علي اساس دين او جنس او لون دا الفرق بين الملحد وبين اصحاب الايمان امثالك .وياريت تنقي لغة محترمة شوية تتكلمي بيها وبلاش اذراء ممكن.

Ahmed Mubarak يقول...

استاذ Mado ..
لك الحريه في كونك ملحد او لا او صح او خطأ ولكن ألا تلاحظ انك بمنظورك هذا قد ناقدت نفسك بنفسك ..
اريد ان أسألك سؤالا .. اين الحريه التي تتحدث عنها وانت تدمر احد شعائر دين اخر..
معلش النقاب عندنا فضيله .. وما دام عندنا في الاسلام فضيله .. فليس لك الحق ان تخرج مبررات بداعي الامن والمجتمع .. لان ديني - وانت الذي تنادي بحريه الدين - يقول البسوا النقاب كفضيله فلا تمنعني من (حريه) ديني ..بل تحدث عن اخلاق بعض الناس الذين يستخدمون الدين خطا .. فبمنظوزك هذا يمكنني ان اقول :

*ليس من الحريه ان تلبس البنات اللبس الضيق والخليع لان هذا يثير الشباب ويسبب زياده حالات الاغتصاب ونتيجه لذلك تهديد للأمن العام .. وهنا تنتهي حريات البنطلونات الضيقه
هتقلي كل وحده حره وتلبس الي عايزاه والمغتصب هوا الي اخلاقه وحشه هقلك بالمقابل المنقبين حرين والي بتستخدم النقاب غلط اخلاقهم وحشه والعيب مش في النقاب ..ده المنطق بتاعك بكلامك

*بكلامك ده انت مش حر انك تمشي بعربيه في الشارع علشان ممكن تكون متهور وتدوس الناس .. هتقولي السواق هوا الي متهور مش العربيه!! ..
هقلك اشمعنى النقاب؟؟ ..العيب في الي لبساه مش في النقاب

باسلوبك انت كده بتوقف اي حريه لانك باصص على حاجة مش صح
العيب مش في النقاب ولا المحزق ولا العربيه العيب في الي لابسه النقاب والمحزق والي لابس العربيه وواضح ان مش الكل وحش .. ثم ان وحشه شيطانه حراميه هيا برضو حره تلبس الي عايزاه انت ملكش دعوه .. هوا انت في منطق الحريات بتاعك قانون ان الي يلبس النقاب لازم يكون نبي .. يعني المسيحيه كده ممكنوع تلبس نقاب وهيا مش حره .. ده المنطق بتاعك .. علشان النقاب والدقون للمتتدينين فقط .. معلش انت بتحكم عليهم ليه ..مش انت بتدعوا للحريه ..

هيا حره تغطي وشها .. يعني لو ظهر دين جديد منعرفوش من الي انت بتقول ليهم حريه زي البهائيون بيقول ان الي تكشف وشها تروح النار .. هتمنعها وتدخلها النار ؟؟ هيا معتقده بكده .. انت كده بتمنع حريتها
يا استاذنا فكر في الي بتقوله ..انت بتناقد نفسك .. وللأسف حجتك ضعيفه جدا.. باسلوبك انا ممكن اقفل البلد كلها علشان خاطر الحريه المحتكره الي انت ماشي بيها ..
موضوع ان حريه يدك تنتهي عن حريه غيرك زي اني اكون بعلي صوتي في ودنك .. لكن وحده ماشيه في حالها بنقاب .. هيا ديه الي هتهدد الامن العام ؟ ..
وبالمنطق بتاعك الملحد مش حر علشان الملحدين بيشتموا في الاسلام لازم يتقطع لسانهم .. نفس المنطق .. المنقبين وحشين علشان جزء بيستغلوه غلط .. فكر في الاصل وسيب الفرع علشان حتى تجيب حجه تقنع الناس بيها ..
وياريت انت بس تحاول تغير تفكيرك لانك انت الي بتمنع الحريات ..
وطبعا انا عارف هتقولي ايه الدوله بتكتم وبتاع ... سيبك من كل الكلام ولا كانك في مصر .. اظن ان الدينمارك هيا بلدك الامثل لانها هيا بتدعم كل الي بتقوله .. هل منعوا النقاب ؟ولا خلوه حريه؟ .. بلاش علشان انا عارف انا عارف اسلوبك الي هوا بتدور على كلمه ترد عليها مش بترد على مضمون وهتقلي معندهمش نقاب .. هل هيمنعوا النقاب ؟؟ مستحيل ..رغم انهم بيفكروا زيك بالظبط .. فكر تاني

Unknown يقول...

ما شاء الله يادكتورة أول عرض أشوفه مرتب لحد بيدافع عن النقاب

أحياناً تصرفات أصحاب القضية نفسهم هيا اللى بتضيع حقهم .. حتى فى طريقة الدفاع عن نفسهم

معاكى ان النقاب حرية شخصية بل وفضيلة بلا شك .. وترفع يحسب للمرأة لا عليها

ومعاكى كمان فى ان كل حد يبدأ يصلح من نفسه من مكان ما يحب .. من الداخل أو الخارج المهم يصلح مش يفسد

أختلف معكِ فى وصف ما يحدث بازدواجية المعايير ... ده انقلاب معايير وانفلات أخلاقى

وبعدين عندنا مدونة حضرتك كرد جميل لأى حد بيقول الكلام اللى قولتيه عن عقلية المنتقبة

دمتِ بكل خير

تحياتى

مهندس مصري بيحب مصر يقول...

انا موافق حضرتك على كل اللي قلتيه
بس عندي كلمة بسيطة لمادو
انت بتقول في متدينين و بيسرقوا و بيتحرشوا
ودول لا يمكن يكونوا متدينين
الدين في الإسلام عبادات و معاملات
و لابد من الإلتزام في الإتنين
و اللي يلتزم بجزء و يسيب جزء يبقى مش متدين و مش ملتزم بدينه

اما بالنسبة للتعامل مع الغير مسلمين من ملحدين و بهائيين و خلافه
فالصح إني أعاملهم بإحترام و عدل و الا اظلمهم ابداً بحجة انهم غير مسلمين
لكن قلبياً من جوايا مش حأكون مرتاح لهم
لكن عمري ما حأظلمهم

mado يقول...

أستاذ @ Ahmed Mubarak
انا مابمنعش حرية بالعكس انا اتكلمت عن حرية الحجاب وقولت كل وحداة حرة تلبس حجاب وحرة كمان فشكلة.يعني طرحة طوية او قصيرة اواسدال.
اظن الحجاب دا فرض ديني (ملحوظة : بعض المسليمن لايؤمن بأن الحجاب فرض. والاغلبية تقر بان النقاب عادة ).وانا مش من حقي امنع حد يمارس طقوس دينيه اي ان كانت.لكن انا اتكلمت علي النقاب الي هوا عادة ومش من الدين الاسلامي ولا من أساسياته .وقولت انه بيحد من حرية الاخرين وذكرت ان الي بتلبس نقاب بيبقي شخص متخفي في وسط الناس ومن حقي اعرف انا راكب مع مين او هفتح بيتي لمين لو خبط عليا.بس هي دي الفكرة.
ملحوظة اخيرة انا مش داخل اعمل جدل انا بعلق بس.

وعلي فكرة برده انا مبحبش الف وادور.انا بس رديت علي الموضوع باحترام ورديت مرة تانية علشان الاستاذة صاحبة الرد العنصري.
تحياتي

mado يقول...

@ مهندس مصري
اهلا بيك يا بشمهندس
وياريت تقول الكلمتين دول للاستاذة العنصرية
اما بالنسبة للتعامل مع الغير مسلمين من ملحدين و بهائيين و خلافه
فالصح إني أعاملهم بإحترام و عدل و الا اظلمهم ابداً بحجة انهم غير مسلمين
لكن قلبياً من جوايا مش حأكون مرتاح لهم
لكن عمري ما حأظلمهم
لانها قالت:
فبصراحة كتر خيره يعنى الملحدين والبهائيين وغيرهم ولاد ناس ومن حقهم يتمتعوا بالحرية طالما مش بيضايقونى لااااااااابصراحة بيضايقونى بيحسسونى بحقارة الانسان اللى ربنا خلقه واكرمه ويمارس جحوده مع الله كيف يمكن لى انا ان احس بالامان فى التعامل معه.

صنفت الملحدين والبهائين علي انهم مش ولاد ناس اكنهم ولاد ***
وكمان مش من حقهم الحرية.
قولها بلاش تظهري عنصريتك علشان شكلها وحش قوي.

وتصبح علي خير .

مجداوية يقول...

السلام عليكم

أنا أعلم أنك كتبت بنفس منطقهملكى تقنعيهم ولكنك تتحدثين لأناس يروجون للحرية لهم فقط ويا ليتها حرية من مستعمر أو من الأمية أو من الفقر ولكنها الحرية من الحياء !!! فلن تلقى حريتك صداها لديهم لأنها مع الحياء وهم ضده




استخدام الدين فى السياسة عندما يحلوا للحكومة ويمنعوه عندما يحلو لهم وهى أيضا حرية من طرف واحد بأن تفعل الحكومة ما تشاء مع شعبها وتفكيره ودينه أيضا أما الشعب فهو متلقي فقط وعليه السمع والطاعة واذا اعترضت استخدمواآية القرآن الوحيدة التى يطبقوا جزءا منها فقط وهى طاعة (أولي الأمر منكم) أما أطيعوا الله ورسوله فلم يطبقوها




التخاطب مع الآخر سواء كان علمانيا أو ملحدا أو مشركا
يتطلب صبرا وقدوة فى اظهار حسن وجمال ديننا الاسلامي وعدم الانسياق الى جرجرتنا لجدال عقيم اذا لم يكونوا يبحثوا عن الحق
فلا اإكراه فى الدين قد تبين الرشد من الغي
وأيضا لأن منهم من يتبدل حاله الى الايمان وما أكثر الملحدين والمشركين الذين دخلوا الى الاسلام فزادوه عزا فلنترفق بهم ونجادلهم بالتي هى أحسن




فاجأني جدا كونك منتقبه أختي الكريمة بعد أن رأيت انضمامك لجروب لست متبرجة على الفيس بوك لأن صاحبه منكرا أصلا لفرضية الحجاب !!!!!
وأنشا هذا الجروب خصيصا ردا على مناقشات مطولة الكثير حول هذا الأمر ومنهم أنا ومع الأخت الكريمة عاشقة النقاب التى اتهمنا زورا بازدراء غير المحجبة ووصفها بأنها تتغنج وهى ما لم يحدث لا مني ولا منها وأشهد الله على ذلك بل كانت تصف التبرج كما جاء فى القرآن بل وصفت المحجبة المتزينة بالمتبرجة وهو المعنى الصحيح للكلمة وهى التي تبدى زينتها لغير المحارم وامعانابل اتهمني زورا بأني أكفر غير المحجبة وامعانا فى الهجوم المستتر على الحجاب أنشأ هذا الجروب وستر ذلك تحت غطاء الحريةوحق الاحترام لغير المحجبات!!!

ولكن ليس غريبا على مدعي الحرية التحوير والافتراءفهذا أسلوبهم

أعتذر عن الاطالة وتشرفنا بمعرفتك الجديدة أختي الكريمة

عاشــــــ النقاب ـقــــة"نونو" يقول...

السلام عليكم ورحمة الله
دكتورتنا الغالية
كل عام وانتم الى الرحمن اقرب
والله تفاجأت مثلك بالكتاب
لكن تفآجات اكثر من الميزانية المحترمة المعمولة للقوافل اللي رايحة تثبت انه عادة
ربنا يهدي يارب
انا من الناس اللي اشجع تواجد امني نسائي للحد من مستغلي النقاب في ما يخالف النظام
مش علشان ناس بتستغله في الغلط اقوم امنعه هو مش اعمل احتياطاتي
وكانهم يلوموا السكين على الذبح وليس الذابح
موضوع النقاب زي مجداوية ما ذاقت معايا اول ما تيجي سيرته تنعتي بالارهاب والتعفن والتخلف ووووووو
لكن سبحان الله ربك بيرد كيدهم في نحرهم
ودة اكبر شهرة للتعرف على مشروعية النقاب من عدمه
فضل او فرض او غيره هذه حريتي
قتلوها وظلموها هذه الحرية المزعومة
ربنا يجعله في ميزان حسناتنا يارب في ميزان حسنات كل منتقبة لوجه الله
اول مرة اعرف انكمنتقبة وربنا يثبتنا واياك

كلمة للاخ راجي
فعلااتفق معك كثيرا
تحياتي

Ahmed Mubarak يقول...

استاذ mado
معلش يا دكتوره قضفضه انا عمري ما بدخل في نقاشات لكن فعلا انا مش قادر واوعدك يكون اخر تدخل ليا عشلان عارف انه مش من حقي ارد عنك بس مش قادر

استاذ mado

على فكره انت بتلف وبتدور لانك مردتش على ولا حاجة من الي قلتها وعدت نفس كلامك تاني ..

مسلمين وخدين الحجاب فرض او عباده او فضيله يا استاذ .. هما حرين ..انت زعلان ليه انهم وخدينه فرض ليه ..مش ديه حريتهم ؟؟ بطل تناقد نفسك بقى ..

لو هتتكلم عن حريه متتكلمش على حكم شرعي لانك ببساطه بتناقد نفسك لانك بتقول مضمونا
"كل واحد حر .. بس اصل الاسلام مفرضش ..فمينفعش يلبسوه " ..

حر فين بقى .. ارجوك فكر في الي بتقوله كل الي شافوا تعليقك قالوا مشفناش تناقد في حياتنا زي كده ..
عندنا في الاسلام كذا مذهب في مذاهب بتفرضه .. بلاش.. امهات المؤمنين عندنا كمسلمين كان بيلبسوه .. وفي بنات بتقلد .. قلي بقى امهات المؤمنين مش بيلبسوه ومينفعش نقلدهم !! ..

ثم تاني.. لو ناس مؤمنه انه فرض هتقلهم لا علشان الازهر ؟؟ هما حرين.. ديه حريتهم لان الازهر مستند على مذهب هما يكوتوا مستندين على مذهب غيره .. لانهم زي (ما بتقول) حرين .. ما دام بتقول انهم حرين بتناقش (امر دين وحكم شرعي) ليه ؟؟ حريه يبقى ملكش دعوه بحكم شرعي زي ما قلت ردا عليا بلسانك :

(ملحوظة : بعض المسليمن لايؤمن بأن الحجاب فرض. والاغلبية تقر بان النقاب عادة )
مش ده كلامك؟؟
هما مش من الاغلبيه هتقيد حريتهم ليه ؟؟ ولا الحريه بتعتك لازم يكون ليها عدد معين ؟؟

.. يعني اديت الشاذ والملحد والكافر والبهائي الحريه ومدتش للي بتلتزم بيه (كفضيله) الحريه .. انت كده مش بتناقد نفسك ؟؟ ومادام هوا فضيله زي ما قلت بلسانك .. والفضيله (قي دنا)معناها حاجة كويسه .. لكن تقول فرض وعاده وتناقش حكم ..حريتك بتقول كل واحد حر ياخده فرض ولا عاده اشمعنى البهائي والشاذ ؟؟ جت هلى النقاب .. ثم ان واحد غيران على مراته مثلا.. وملوش دعوه بالاسلام وقلها غطي وشك .. هتقول عليه متخلف ولازم يغير تفكيره لانك مش مقتنع .. خلاص الملحد بنفس الطريقه هيكون مش عاقل ولازم يغير تفكيره لاي دين سماوي لانه مش مقتنع ومش حر في وجهة نظري لانه بيسبب زعزه اديان الاخرين ونشوب الخلافات بين العائلات نتيجه الافكار المتطرفه في مجتمعنا ويسبب بذلك ضرر على امن المجتمع وحريه يدك تنتهي عند حريه انفي..
مش لازم تعرف مين الي جنبك .. خايف متفتحش الباب وابعد لكن متمنعش .. لما تبقى يسرقك واحد لابس نقاب اعمل فيه الي انت عايزه .. لكن خصه هوا مش تخص شعب ..
عامه انا مش هرد عليك تاني لسبب واحد فقط .. انك قبل كده لفيت ودرت ومردتش على ولا حاجة من الي قلتها ..

وقلت كلام هلامي معملتش فيه غير انك اعدت كل الي بتقوله تاني كل كومنت .. زي ما الناس كلها قالت عنك علقوا او لم يعلقوا لان معندكش حجة ..
تحياتي
ونصيحه بشكل عام خدها في حياتك..
لو حاولت تناقش او تفتح باب جدال لازم تعرف تجيب حجه كويسه يا انا متخشش لانك كده هتخسر ... واهم من ده كله لازم قبل ما تخش نقاش تفكر في كلامك هل هوا مقنع ولا لا من جميع جوانبه لان ببساطه تفكيرك بيفكر في حاجة مش هيا القضيه ..

تحياتي ليك

صبرني يارب يقول...

يا فضفضه يا حبيبتى دعاة الحريه هم اول من يسلبوها

ده عادي وانا فى الجامعه كان فى حمله ضد المنقبات بالفعل ومنعهم من دخول الجامعه

أولا كنت بانصح المنتقبات كلهم انهم يكشفوا وشهم وهما داخلين الجامعه حتى لو كان قدام الناس مش فى اوضة الحرس ده بس عشان يكتموا الحراس والظابط الرخم

انما كنت بسأل ليه احنا فى بلد مسلم وعندنا بدل الموظفه االاف فى الجامعه قاعدين لا شغله ولا مشغله

ايه يعنى لما واحده منهم تتحط فى اوضة الحرس تبقى تشوف المنقبات وهما داخلين ما دام اخدوا حكم من المحكمه عشر مرات بكده ؟؟؟

وصحيح يا فضفضه ان نسبه كبيره من المنقبات انا لما باتناقش معاهم بابقى فاضلي همسه واولع فيهم ههههههههههههههههههههه

الا انى باحترم برضه راي الاخرين وحريتهم طبعااااااا

وطبعا الازهر بيتستهبل للاسف الشديد

Jana يقول...

أصحاب الفكر القاصر فقط والعقل المحدود هم من ينادوا بالحرية كذباً ..وهم أول من يقفوا فى طريق حرية الفرد حين يظهروا استيائهم لوجود المنتقبات ..
كلامى لا يشمل الملحدين ...لأن فكرهم له طبيعة خاصة تخرج عن نطاق تفكيرنا من الاساس
يعنى مينفعش مثلا احنا سكان كوكب الأرض نلوم سكان كوكب المريخ لمجرد ان هناك مجموعة شمسية واحدة تجمعنا
احنا كمؤمنين بالله اصحاب فكر واحد بيدور ويبدأ وينتهى ويصب فى مكان واحد هو طاعة الله وحده
فلما يختلف الهدف لدينا من الحياة فى الأصل فلماذا نحاول ان نتفق فى غيره !!!؟

لكن ببساطة اقدر الوم اى حد تانى على فكره القاصر لما يهاجم النقاب او الحجاب ...وادعيله ربنا يهديه ..لأنه بييجى عليه وقت فى اليوم يسجد لربنا ويا عالم منين تجيله الهداية!!!

واخيرا احيى شجاعتك يا فضفضة
واقول ان اكبر دليل على النضج الفكرى لمعظم المنتقبات
انك منتقبة من سنتين ومحدش كان يعرف ده وهم نفسهم اللى ممكن يهاجموكى دلوقتى او يغيروا رأيهم فيكى كانوا بيسقفولك قبل كده ...يبقى مين بقى العنصرى!!!؟

Unknown يقول...

انت حر ان لم تضر

انا ضد النقاب و الحجاب في حاله واحده لما يكون مفروض قهرآ علي امرأه او طفله

بس لو الست اختارت الحجاب او النقاب و هي مقتنعه يبقي خلاص هي حره

محدش ليه سلطه عليها الي شايفاه صح و مقتنعه بيه تعمله

بوست جميل اوي

غير معرف يقول...

حاولت معلقش مقدرتش صوابعي هرشتني. ياسلااااااااااام يا سيد مادو الست المنتقبة واقفة ضد حريتك الشخصية؟؟؟؟ طيب ايه رأيك انا دخلت على موقع اوقفوا التحرش الجنسي في مصر وكنت سعيده جدا اني انضم للحملة دي وشايفه ان اي شيء يرجع الأداب العامة والذوق لمصر ده شيء جميل لازم كلنا نساعد فيه ثم فوجئت للأسف بواحده متطرفه جدا جدا كاتبة "لو حتى ملط متعاكسنيش" ياسلام اشي خيال يا ناس وعاملة بلوك لأي شخص نفسه يناقشها والموقع متبني وجهة نظرها. هو خلاص الوسطية محيت من البلد ولا ايه؟ يعني ملط حرية والست مش عاوزة حد حتى يناقشها يتوافق على كلامها يتوافق ملكش حل. ثم نتكلم عن المنتقبة. المنتقبة حرة حرية لم تضر بي ولا بأهل بيتي ولا ببلدي هي اختارت هذا الطريق وقالت مرضاه لله انا ها امشي في الصعب. طيب يا عم ما تكلم الست بتاعة الملط وتقول لها رأيك يضرنا جميعا ويهز امن بلدنا وقيمنا الشرقية رغم انف كراهيتها لهذه الكلمة. نعم مسلمين شرقين ونفتخر

محمد عبد الغفار يقول...

هو انت فاكره ان فيه بصحيح حريه شخصيه وحريره راى وكلام فاضى من ده ولا ايه

الفقيرة إلى الله أم البنات يقول...

دكتورتى المفضله
الحر فقط من يستطيع الاختيار


فضفضه فى رساله نشفت من البرد فى الفيس بوك شوفيها ضرورى

حفيدة عرابى يقول...

مادو -- انا مكنتش هرد على كلامك كنت حاسة انى ههدر وقتى فى نقاش غير مجدى بس مدام انت اتكلمت عن العنصرية وعن الطلبة بتوعى يبقى انا فعلا عنصرية لانى بدرسلهم كلام بيقول ان الشعب المصرى متدين منذ الاف السنين وان معتقداته الدينية هى اللى شكلت اساس حضارنه وترتب عليها التحنيط وبناء الاهرامات وحاجات كتير تانية مع انه كان بيعبد اوثان وبشرح للطلبة بتوعى انه كتر خيره كان بيعبد اوثان علشان لما نكلمه عن اديان سماوية يبقى سهل عليه يفهم يعنى ايه بعث وخلودوباقى العقائد الموجودة فى كل الديانات السماوية وبعدين مش الحرية هى الاساس عند سيادتك ----طيب انا حرة انا مش هقدر اقتنع انى اتعامل مع واحد جحد ربنا سبحانه وتعالى ---الاستاذ مهندس مصرى حسيت انه عبرعنى لما قال مش هاظلمهم ولوعلى مش هاظلمهم لان دينى امرنى بكده ---- كيف اعطى الامان لمن كفر بالله ومع ذلك انا مش من حقى احاسبه اواعاقبه حسابه على الله لكن من حقى ارفض التعامل معاه نهائيا ---- فلتحيا العنصرية لو دى عنصريةوبصراحة هجومك على كلامى اسعدنى جدا اصل دى اول مرة اتعرف على حد بيدافع عن حرية الفرد فى الكفر بخالقه وبعتبر هجومك ده وسام على صدرى وقربى الى الله ------الاستاذة صاحبة المكان الف شكر لك على اثارتك لهذا النقاش واسفة لو كلامى ممكن يسبب لك اى حرج اوضيق

Eman يقول...

مع اني قررت ابعد عن المدونات والتدوين
بس حقيقي الكلام دة ريح قلبي الله يريح قلبك

الموضوع بجد بيغيظ
يعني اللي تمشي عريانة معفية من السؤال والمستورة تتعرض لضيق وكلام ممل وجارح

ياحبيبتي اتنقبي وخليكي عارفة انك احسن منهم وان اي واحد بيقاوم التزام الاخرين دة بيدل على الحقد والحسد اللي في قلبو

احنا عندنا في السودان المجتمع ما بيرحم المتدينة
يعني بتسمع من اولاد الاهل واولاد الجيران تريقة في الكلام
انا ما اتنقبت بس كل اللي عملتو وقفت المصافحة وسممو بدني

حتى مرة كتبت عن الموضوع
http://emoo-83.blogspot.com/2008/04/blog-post.html

بس توصل لمرحلة تنظيم وتخصيص اموال والخ
هنا بقولك دة نهاية الزمان
لم يبقى القابض على دينه كالقابض على جمرة

ربنا يحفظك ويعينك

فارس الحسناء يقول...

اولا النقاب حرية شخصية

بس الموضوع غير كده

الموضوع انهم عاوزين يلهو الناس عن حاجة اكبر من كده فقامو بحملات النقاب
ومش قصدي التقليل من حجم الموضوع بس هي دي الحقيقة ان لما بيحصل في بلدنا حاجة كبيرة غلط بيخترعوا حاجة الناس تتلهي فيا

تحياتي ليكي

شاب نفسة يحقق حلمة يقول...

هي دي بلدنا

وده مش جديد علينا

تحياتي ليكي

جنّي يقول...

السلام عليكم

كان الله مع اهل غزة وليغفرالله لنا تقصيرنا معهم ..

كل من له عينان يرى التواطؤ الكريه من حكومة فاسدة وحزب فاسد .. اما وانه قد خدع رئيس اكبر دولة اسلامية .. فهو غير كفيل بحكمنا .. نتحدث عن تواطؤ رئيس جاهل وحزب فاسد وحكومة اقرب الى الصهيونية ..ان لم تكن كذلك ..
اما حماس فيكفيها فخرا انها لم تستسلم كما استسلم غيرها .. لم تسرق اموال الشعب الفلسطيني كما فعل غيرها ..
حماس التي قدمت فخر شبابها شهداء في ساحة الجهاد والزود عن شرف الامة العربية والاسلامية ..
حماس العزة والكرامة والشرف ..
ولكن ماذا نحن فاعلون ؟

اقول لا للوقفات والاستنكارات ولكن اجمعوا المال والمؤن والسلاح وليفعل كل منا ما يستطيع لايصال المال والمؤن والسلاح لاهل غزة ..

ويارجال سيناء الشرفاء قوموا بايصال المال والمؤن والسلاح لاخوانكم في غزة الصامدة..

ولعنة الله على الكلب الذي استقبل العاهرة اليهودية للتواطؤ لضرب غزة ..

وحسبنا الله ونعم الوكيل

غير معرف يقول...

************** ( كلنا معك يا غزة ) ****************

بيان اتحاد المدونين المصريين بشان ما حدث ويحدث فى غزة والدعوة الى مواقف

شجاعة .... الى متى الخضوع ؟

الى متى الاستسلام و الركوع ؟

التاريخ لن يرحمنا جميعا ... ماذا قدمنا للقضية وماذا نترك للاجيال القادمة ؟

يارب

ارحم شهداؤنا

يارب

اهدى قادتنا الى الطريق السليم

يارب

انصرنا على القوم الظالمين

***********************************************************

وندعوكم للانضمام الينا فى وقفتنا الاحتجاجية المقرر لها

يوم الاربعاء القادم

31/12/2008

اما نقابة الصحفيين الساعة 11 ظهرا

وندعوكم لاحضار اللافتات الورقية للتعبير عن مطالبنا وآراؤنا فيما يحدث

عمرو المصري يقول...

السلام عليكم
أخي / أختي في الله
انهض الآن
انفض عن نفسك غبار الألم والحزن
كفانا شجب واستنكار وحزن
كلنا مدانون
وكلنا قد يكون سببا فيما يحدث في غزة
ونحن لا ندري
حاول بما يتأتي لك أن تدفع عنهم ماهم فيه
اصنع شيئا
اخلق فكرة
أنت مسئول أمام الله يوم القيامة

تابعوا الآن
اجتياح غزة ... وماذا بعد ؟؟؟
واجبات عملية لنصرة غزة
علي مدونة
أرض الحرب

فضلا
انشر الرسالة
جزاك الله خيرا

أنسانة-شوية وشوية يقول...

بجد بيعد عن الكلام الجميل الله انت كاتباه وفعلا كلنا حاسين به ، الا انى فرحت جدا لما عرفت انك منتقبة بجد بجد بحبهم جدا وبحترمهم جدا وادعو الله ان القاه وانا واحدة منهم

بحبك في الله

zordeak يقول...

بسم الله ما شاء الله

ربنا يزيدك ويحفظك ان شاء الله

كنت عايز اتكلم عن الموضوع ده من زمان بس مصداقيته منك زادت لان انتى منتقبة ومظنش ان اى حد بيقرالك هيقدر يقول الكلام اللى بيقولوه عن المنتقبات لان شايف الفكر المستنير

ده اتجاه فى الدولة دلوقتى ماشى بفكر غربى متأمرك مش متحضر

كل اللى بيدافعو عن الحريات بييجو عند النقاب وعينيهم تبرق ونظرة امتعاض تيجى على وشهم ويطلعو كلام قذر

ولان صوتهم عالى محدش بيقف قصادهم

دلوقتى بقى سفهاء القوم هما اللى بيفتو فى حياتنا وبيطلعو فى البرامج

قعدات المطلقات اللى بتيجى فى القنوات الفضائية دلوقتى اللى بتكره الرجالة وتكره الحجاب وتكره نفسها

متبصيش عالناس دى ومش عايزك تحسى لحظة واحدة بضيق من كلامهم لان زى مقلتلك السفهاء هما اللى بيتكلمو فى حالنا دلوقتى

انا مكنتش بدخل من زمان عشان بمتحن وبالصدفة فى الريدر شفتك كاتبه اكشفه أغطيه انا حره

قلت هوبا ..هتتكلم فى النقاب زى ما كل واحد بيتكلم اليومين دول .., وكنت قريت موضوع قبلها عند محمد حمدى عن النقاب وطبعا معجبنيش الكلام .., ودمى محروق اصلا من اللى بيحصل فى غزة .., فصراحة كنت داخل وانا متحيز ومتضايق وفاكرك هتنتقدى فكرة النقاب

:)

انا اسف انى بقول كده بس بكلمك بصراحة عاللى جه فى بالى

بس العكس تماما حصل لما قريت اتبسطت بجد وحسيت ان ربنا باعتلى البوست ده علشان يبسطنى ويهدينى شوية

انا مبعلقش من زمان مش لسبب غير انى وقتى فعلاكان مشغول الفترة اللى فاتت وانا لسه مخلصتش امتحانات حتى

بس شفت انى لازم احييكى عالبوست ده

واحييكى على ايمانك بفكرك والدفاع عنه بشكل عقلانى متحضر محترم علشان تحطيه فى عين اى حد من اللى لسانهم طويل

ربنا يزيدك

:)

مدونةالغالى يقول...

أحسنتى أحسن الله إليك

صحفية روشة يقول...

كل واحد حر يعمل اللى عاوزه
يعنى احنا نقول حرية انما النقاب نيجى عندة ونقول لا
والشواذ يقولو حرية ويتهمنا بضيق الافق
عجبى

http://kasperb4.blogspot.com/ يقول...

دي أرقام تليفونات وأرقام حسابات للتبرع لغزة يا دكتورة
---------------------------------

لجنة اغاثة نقابة أطباء مصر
البنك الوطني المصري
حساب رقم 500555

للإتصال: نقابة الأطباء المصرية
هاتف: 7940738 - 7943812 - 7943166 - 3652006 – 3636366
العنوان: 27 شارع القصر العينى امام معهد السكر
ems_cai@ems.org.eg بريد ألكتروني::ـ


لجنة الإغاثة الطبية التابعة لاتحاد نقابات الأطباء العرب
بنك قناة السويس فرع الدقى
حساب رقم (21090/1)ـ

للإتصال: الدكتور جمال عبد السلام، مدير لجنة الإغاثة باتحاد الأطباء العرب
دار الحكمة 42 شارع القصر العينى
تليفون: 7940738-7943166
فاكس: 7940518


مؤسسة لجنة الإغاثة الإنسانية للعون
الناصرة - الصفافرة ,حي بلال ص.ب 20059
تليفون : 046082095
فاكس : 046082097
info@egatha.com بريد ألكتروني::ـ

Ahmad Hegab يقول...

أحيكى لأثارة الموضوع ..
كنت على وشك اثارته قريبا .. و لسوف افعل انشالله

تحياتى

شمس النهار يقول...

شوفي طالما انك حاسه وعارفه انك صح خلاص
مايهمكيش
لما اتحجبت 1979وكنت في فنون جميله وماكنش في محجبات في البلد اصلا الا القليل القليل
مش قادره احكي لك قد ايه ضيقوني وسمعت كلام غريب
بس كان في موقف لطيف اتعرضتله في اسكندريه كنت ماشيه مع صحبتي وكانت لابسه شورت من اللي بيقولوا عليه ساخن
وولدين وقف واحد منهم امامي وقالي طب ايه رايك ان انا هعكسك انت مش هي انت احلا
وبعدين ياستي اتعلمي اكل المكرونه الاسباكتي علي راي صاحب عمرو بدر

Shimaa Esmail يقول...

الأستاذة صاحبة مدونة / خمسة فضفضة
" تحية طيبة" وبعد..
اعتذر عن الخروج من موضوع التدوينة، لكنني أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية.
أرجو الاهتمام والرد سريعا بالإيجاب أو السلب.
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

غير معرف يقول...

يارب يخللى سنة 2009 جميلة عليكى
احلى من 2008
و2007
و2006
و2005
و ..

أنت وراكى حاجة؟

أحمد سعيد بسيوني يقول...

بارك الله فيكم

وليذهب الجهلة والحاقدون الى الجحيم

Shimaa Esmail يقول...

الأستاذة صاحبة مدونة / خمسة فضفضة
" تحية طيبة" وبعد..
اعتذر عن الخروج من موضوع التدوينة لقد أرسلت لك الجزء الثاني من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

mostafa rayan يقول...

متفق معاكي في كل اللي قولتيه
ولكن فقط لي عتاب على بعض المنتقبات
ان احيان كتير بتكون افعالهم مش لايقة مع النقاب ماينفعش اتنقب واضحك مع دة واهزر مع دة واجيب في سيرة دة ودة
لازم المنتقبة تكون افضل نموذج للمرأةالمسلمة المتدينة
بارك الله فيكي واعزك واعز الإسلام بك

dodda يقول...

الفاضى يعمل قاضى

منهم لله

الاسلام بيتحارب بأى صوره من صوره!!!
والنقاب من الصور دى

كلنا مقاومة يقول...

السلام عليكم

نتشرف أن ندعوك لزيارة مدونتنا الجديدة كلنا مقاومة ونتمنى التواصل معنا والمساهمة معنا في تغيير ما بأنفسنا حتى يغير الله ما بنا

وشكرا جزيلا

غير معرف يقول...

ربنا يوفقك ويعينك عيل الصلاح الداخلي في القلب أولا والصلاح الظاهري ايضا


ولكن تذكري ان الجاد الاكبر جهاد النفس اي ذكر الله عز وجل آناء الليل واطراف النهار وان تعبدي الله كأنك ترينه .

أما ان فعلت ذلك صدقا وستجدين ان الدنيا ليس لها محل في الاعراب من حياتك وليس لها نصيب في اتمامك ويصبح الذهد صفة كم صفاتك
اما اهتمامك بالجحاب في نظري يأتي في المرتبة الثانية فكم من نساء عاشوا وماتو وذكروا الشهادة عند الموت ولهم في حاله الغسل من العبر التي يفرح لها القلب عاشوا بدون هذا الحجاب .

ولكن مادمت تعتقدين انه مهم ولكي هذا الاعتقاد بالصحة بالنسبة للدين الاسلامي بنصوصه فكوني بهذاالنقاب مستمسكة به كما تشأئيين
والله الموفق
......

القرآن الكريم