TvQuran

٢٠٠٩-٠٥-٠١

تخاريف مصريه جداُ


خنازير خنازير ...اووووووووووعي وشك


ايام انفلونزا الطيور سمعنا عن الناس اللي جالها رعب من الطيور اللي مربياها وسمعنا عن واحد من كتر الخوف رمي الكتاكيت اللي فمزرعته في الشارع وبقت الناس تجري والكتاكيت تجري وراها


تفتكروا بمناسبة انفلونزا الخنازير **ممكن نلاقي حد من اللي بيربو خنازير من كتر خوفه من العدوي يرمي خنازيره في الشارع


يا تري هايبقي ايه الوضع ساعتها خصوصا ان الخنازير مش بتعرف تجري كويس :))



--------------

مع اني مبسوطه ان الخنازير هاتتباد من مصر لان شكلها مقرف وخلتني بقيت مقروفه من اللحمه يععععععععععع

بس تفتكروا باعدامهم للخنازير كده خلاص طمنوا الناس ....يمكن

لكن مع الاسف الكارثه هاتفضل قائمه ومافيش خطوة اهم واكتر ايجابيه اتاخدت زي مثلا الارشادات الصحيه لكيفية التعامل مع المرض او التعامل مع اي حد مشتبه في اصابته بيه مثلا حمله زي بتاع الاخ شعبولا والست انتصار
مافيش اي اجراءات احترازيه في المستشفيات ولا في حالة طوارئ في اي مستشفي في اي حته ولا دورات للدكاتره عشان يقدروا يتعاملوا صح لو حصل حاجه لا قدر الله

مافيش الا تشديد الرقابه علي المواني والمطارات ودي في رايي مش كفايه لان ممكن جدا المرض يجي من جوا مش من برا
وربنا يستر بقي
------------------------

خبر كان علي الصفحه الاولي للاهرام يوم الاربعاء اللي فات بيقول ان إنفلونزا الخنازير تحدث أزمة بين المجلس والحكومة وان سرور يحمل الحكومة المسئولية كاملة إذا لم تستجب لتوصيات المجلس بإعدام الخنازير شهاب يناشد المجلس منح الحكومة فرصة لعرض حلولها

ياسبحان الله الحكومه والمجلس طول عمرهم سمن علي عسل ولا حدش قدر ابدا يزعلهم من بعض تقوم تجي شوية خنازير لا راحت ولا جت توقع بينهم بالشكل ده وكمان يسيحوا لبعض علي صفحات اكبر جريده حكوميه

بركاتك يا انفلونزا الخنازير ، صحيح يا خوانا يوضع سره فأقذر خلقه

---------------------------

**الفيروس الموجود دلوقتي مش انفلونزا خنازير ده عباره عن ميكس من انفلونزا طيور علي خنازير علي انفلونزا بشرية وحصل نتيجة دخول فيروس انفلونزا الطيور لداخل جسم الخنازير وتحوره للشكل اللي ممكن يتنقل من انسان لانسان

******************************


إشاعات اشاعات اشاعات .......... بيقولوا فيه عصابات بتخطف في البيبهات


بقالنا حوالي اسبوع او اكتر مافيش سيره الا عن خطف الاطفال الرضع وسرقة اعضاؤهم
كل يوم اسمع نفس الحكايه مع تغيرات طفيفه ونقلا عن كذا حد
المهم ان الموضوع كله بيدور عن ان ام الطفل تكون في مكان ما ( الوحده الصحيه ،المستشفي ، قدام الفرن ، فعيادة دكتور..الخ )

ويتم استبدال ابنها او بنتها بطفل آخر بحيله ساذجه جدا (مثلا يكون ابناه بيعيط فاتقوم الخاطفه تقولها طيب خدي ابني اهو نايم وساكت وانا اسكتلك ابنك ) ومافيش ثانيه تختفي الخاطفه بالطفل لتكتشف الام بعد كده ان الطفل اللي معاها مقتول وبطنه مفتوحه ومافيهاش اي اعضاء


انا خلاص زهقت وكل شويه حد يجيلي يحكي نفس الحكايه والناس مافيش وراها الا نقل الكلام واضافة مايلزم عشان الحكايه تبقي اكثر اثاره وشوية شويه تبقي حكايه تانيه خالص مالهاش علاقه بالحقيقه



******************************


صدق اللي قال الاطفال احباب الله .......عااااااااااااااا



بافتح الصيلية يوم الجمعه عشان كل الدكاتره اجازه ، قاعده في امان الله وقدامي المج بتاعي و مافيش تاتو علي دراعي وبشرب النسكافيه 3 ×1 ومعاه بسكويت اولكر والمسائل آخر تمام
تدخل واحده معاها ابنها وزي ما انتوا عارفين الاطفال احباب الله ويادوب علي ما ادَوّر اجيبلها اللي هي عاوزاها الاقي الواد قلب المج وتعلو وجهه ضحكه خبيثه.... نياه نياه نياه

والست مامته ولا فدماغها مانكرش انها عملت نفسها بتساعدني ومافيش ثانيه خدت اللي هي عاوزاه ومشيت

وطبعا لاقلت حاجه ولا اتنفست مع اني كنت عاوزه اخلص علي الواد ومامته في خبطه واحده بس اعمل ايه لازم الواحد يتمالك اعصابه مع الناس وياريت يحطها في تلاجه من بليل للصبح
في الاخر انا اللي ادبست في التنضيف لان الولد اللي بينضف اجازه وخد عندك يا مواطن ساعه تنضيف من فوق ومن تحت والدفاتر اللي علي المكتب والتليفون وكووووووووول حاجه حتي الارض مسحتها والله








31 comments:

ام البنات يقول...

فضفضه
دى مصر يا حبيبة أم البنات
واى شئ يخليك تستغربى ..فى مصر اوعى تستغربى

Unknown يقول...

طب كويس إن الخنازير عملت مشكلة ما بين سيد قراره والحكومة

هي غريبة دي الفراخ ما عملتهاش

وإشاعة البيبهات مش موجودة عندنا في إسكندرية لكن أكيد قريب راح نسمع عنها

البلد بلد اشاعات صحيح متعرفش تعدي كام يوم من غير إشاعة جديدة

حمـــــــــــــــــــــة يقول...

الموضوع يهم الجميع بلا إستثناء
لكن هذه المرة أصابهم في الصميم
و إن كان بمجرد إعلان النية في التخلص
من قطعان الخنازير تعالت الأصوات الرافضة و المؤسف "علماء" ضد الفكرة

karim يقول...

من دواعى سرورى ان ادخل مدونتك, جميلة وخفيفة الظل وهادفة زى الافلام الكوميدى اللى بتناقش قضايا,تحياتى

أحمد سعيد بسيوني يقول...

اول مرة يتخذ المجلس قرار سليم وسريع بشان اي قضية من القضايا
لذا وجب على الحكومة انها تطلع عينهم الاول وتشارك في اصابة عدد لاباس به من المواطنين بالانفلونزا قبل ان تتخذ اي اجرارات احترازية

***
بالنسبة للنسكافيه
امال انتوا كنتوا فاكرين ان اكل العيش سهل اوي كده
هههههه

تدوينة مميزة

دمتم سالمين

ستيتة يقول...

هي دي الفضفضة فعلا
ربنا ينجينا
من انفلونزا الحيوانات
وعبط الأمهات
وسرقة البيبيهات
واهم شيء من الإشاعات
اللي خلت حياتنا من زمان بلح امهات

مودتي

Tarkieb يقول...
أزال المؤلف هذا التعليق.
Tarkieb يقول...
أزال المؤلف هذا التعليق.
Tarkieb يقول...

نا بس عايز اووضح ليكي حاجة وهي ان الناس حاطة همها في حاجة مش هي السبب خالص ومش عارفين حاجة وكل عمال يشتم في الخنازير وخلاص لمجرد انه مش بياكلها وقرفان منها فا بيطلع فيها القطط الفاتصة.زي في العصور الوسطى لما قالو اليهود سبب الطاعون .وباستغرب ليه الناس ما هجتش كدة على الفراخ وتخلصت منها؟ الخنازير في مصر عايشة على الزبالة يعني لو تخلصنا منها ح نودي الزبالة فين؟ ازاي بلد بحالها تسمح انها تتخلص من حيوان بمجرد ان اسم المرض فيه خنزير..يا ستي الفيروس الجديد متركب من فيروس H1N1
المصدر بتاعة الانسان
وواخد حته تانية من انفلونزا طيور وواحد اسيووي يعني حاجة متركبة مش معمولة في خنزير.. وبعدين يعني ح تفرحي لما الزباليين يشتروا خرفان ومعييز بدلها ويعيشو ع الزبالة وبعد كدة ناكل الحيوانات دي وكلها معادن ثقيلة ونفايات سامة؟ والفشل الكلوي يزيد والله اللي بيفهم يسيب ام الخنزير ياكل الزبالة وما ياكلوه

في مثل الماني بيقول انت زي اللي بتاكله يعني لو الناس اكلت حيوان زبالة فاكيد ح تكون زبالة برضه... وبعدين حكاية ان الزباليين كلهم مسيحيين مش صححيح نص اللي بيربو خنازير مسلمين برضه... وبلاش الحل الغريب اللي بيتخلص من حيوان لا ليه لا في التور ولا في الطحين كل مشكله امه انه اتولد في بلد بتكره ام الخنزير من ايام الفراعنة عشان معظم اله الشر عند الفراعنة كانو خنازير...الحل هو التحصين والوقاية من المسافرين الجايين من المكسيك وغيرها مش شغل الاونطة لارضاء العوام اللي مش طايقيين ام الخنزير

mohra يقول...

اجمل حاجه الخلاف بين الحكومه و البرلمان
كله ساعه الجد يقول يلا نفسى

جنّي يقول...

السلام عليكم

من انفلونزا الخنازير لخطف الاطفال دليل على فشل تام للحكومة في مواجهة الطوارئ فكما قلتي المشكة في الاجرائات الاحترازية وان كان اعدام الخنازير خطوة مهمة لكن يجب ان تكون هناك خطوات اخرى اكثر اهمية عند ظهور المرض لا قدر الله ..

اما الطفل اللي قلب المج فدا شئ هين اما ما حدث من سيدة اجلست ابنها الرضيع على الريون وبسلامته عملها على الريون والمحروسة امه بتضحك كانها نكتة .. لو حصل دا معاكي كنتي عملتي ايه ؟

عبدالله يقول...

:) بوست دمه خفيف عن مشكله مش دمها خفيف خالص
وهوا فعلا قرار تخليص مصر من الخنازير انا شايف انه قرار صح جدا ان كمية الاوبئه الي بيبقوا مركزها كتير جدا ده غير ان انفلونزا الطيور بقيت مستطونه مصر و الفيرس الجديد كان مبداه تحور فيرس انفلونزا الطيور مع فيرس تاني في جسم الخنزير و انتج الفيرس الجديد ده من التحور الجيني

المهم بس عملتي كوبايه نسكافيه تانيه ولا لسه :))

تحياتي

يا مراكبي يقول...

بوست كومبو جديد فيه أكتر من موضوع .. لكن الرابط بينهم هو العنوان الجميل .. تخاريف مصرية جدا .. فعلا حاجات نتميز بيها عن غيرنا من الشعوب .. وده من دواعي الفخر والإعتزاز .. إن تخاريفنا خاصة بينا إحنا بس

عموما بالنسبة للإشاعات .. مافيش دخان من غير نار .. والأزمة الإقتصادية هتخلي الناس تأكل بعض بجد

ومازلتُ أتعلم يقول...

ههههههههه
فكرتينى يادكتورة برده وانا فى الصيدلية
كنت باكل شيكولاته
وانا لما اكل شيكولاته ببقى فى احسن حالاتى المزاجية وعندى استعداد اقفل باب الصيدلية ومحدش يدخل
المهم دخلت واحدة وبنتها زى القمر
فرحت بالبنوتة جدا وقعدتها مكانى على كرسى المكتب
مافيش ثوانى ولاقيت الشيكولاته مبهدلة المكتب والارض والكرسى اتبقع كل شيكولاته
ومامتها بتضحك وتقولى عندك شيكولاته تانى تاكلها بدل اللى بهدلتها :((


--------------

الخنازير بقى
ده انا مبسوطة علشان حاسة تحالف قوى الشعب كلهم مع بعض
وقرارهم بإبادة الخنازير قرار متوحد
ههههه
--------------
البيبهات
ربنا يستر على البيبيهات
احنا عندنا برده فى اشاعات كتير عن الخطف وكده
ربنا يستر علينا

تحياتى يادكتور

محمد عبد الغفار يقول...

الخنازير
مفيش دورات ولا علاجات ولا اى حاجه لأن محدش هنا او بره يعرف عنه حاجه ده حتى الأصابة بتتحدد بالأستبعاد

الأشاعات
كبرى

التنظيف
بالشفا

Empress appy يقول...

امممممممممم بصىاولا رديت عليكى عندى رد طويل بس معلش
موضوع العصابات دى اه تصدقى بجد مش كدب
دى حقيقه واول حاجه لو تفتكرى الولد اللى لقيوه تحت الكوبرى بتاع السلام هنا فى القاهرة
ده مسروق اعضاء منه وهما قالوا وكدبوا الاول انها حاله اغتصاب
كدابين لان الولد ده واسمه كريم ابن البواب اللى فى عماره اخويا اللى ساكن فيها

عاشــــــ النقاب ـقــــة"نونو" يقول...

السلام عليكم ورحمة الله
الخنازير وربنا يسترها يارب
الاطفال في حقائق مش اشاعات بس مش لدرجة ظاهرة وما اعتقدش انها تتم بالبجاحة دي ولو انه بقى كله جايز
الحكومة واشياء اخرى ربنا يجعل كلامنا خفيف
الواد اللي لخبط لك الدنيا
لو منك كنت خليت مامته تنظف الاول معايا وبعدين ابيع جزاءا لها على تقصيرها في انها تاخد بالها من الواد دة



عاوزة استشارة يا دكتورة الله يخليكي
اسراء بنتي سنتين دلقت مج شاي برضه بس مغلي وعلى صدرها وعمل جرحين الاتنين على بعض يعملوا عشرة سم
بعد الاسعافات حطيت مضاد حيوي وبعد اسبوع استعملت ميبو بقالناعشر ايامخلصت انبوبة وفي بداية التانية
الجرح خف خلاص بس قالوا نستمر شوية علشان الاثر يروح
طمنيتني بالله عليكي
هيروح الاثر دة وكفاية انبوبة ميبو التانية دي ولا تنصحيني بحاجة تانية
ربنا يطمنك طمنيني
تحياتي

تركناك فضعنا..! فهل من عودة؟ يقول...

السلام عليكم ورحمة الله وبركاته

بجد أول مرة أدخل المدونة ولكني فعلا إنبهرت من الإسلوب

بجد موضوع إقلب القدرة علي فمها "لا لا مش هو المثال ده"

المهم

موضوع الحكومة ومجلس الشعب فعلا موضوع قاسي علي الحكومة بجد

لأن سرور مسرور عمره مزعل الست الحكومة وبكده هي هتزعل جدا وهتنادي بابا " مبارك " وبابا هيزعل من سرور مسرور ويخليه حزين مكشر.

أما موضوع الأعضاء والله واحد حكالي إن في واحد كبير حدث فيه نفس الحكاية تاني يوم شوفت الراجل اللي بيتحدثوا عنه ماشي وغية صحته زي البريمو

أما موضوع الأطفال بجد أنا لو مكانك كنت إستلفت منها الطفل يومين علشان عندي واحد زهقان منه.

أما عن موضوع ...

أه معلش المواضيع خلصت.

بجد جزاكي الله كل خير وبارك الله فيك

أسأل الله العظيم لكي التوفيق والسداد

المستقبل لهذا الدين

غير معرف يقول...

مدونتك جميلة و تصميمها اعجبنى
تحياتى

عمرو يقول...

الحقيقه أن مشكلة الخنازير كانت محتاجه حل من فتره كبيره و العجيب فى الموضوع أن تقريبا مافيش حد بياكلها حتى من غير المسلمين يعنى هم كمان بيقرفوا منها أكمنها بتعيش فى مقالب الزباله و جلدها مش بيتسلخ و مش بتدبح لكن بتنغز فى قلبها بسيخ مخصوص و تظل تنزف لحد ما تموت يعنى الموضوع بتاعها كله مقرف ده غير أمكان تربيتها اللى قالب رائحة مداخل المدن و مسبب تلوث و أمراض لا حصر لها ..
الحقيقه فكره كانت جيده جدا و فرصه ذهبيه للتخلص من قطعان الخنازير بس المهم بقى اٍحكام الرقابه بشده لمنع تسرب لحومها و هى دلوقتى بالأطنان للمطاعم و مصانع اللانشون و السجق و الحاجات دى .. يعنى برضو مشاكلها لسه موجوده للأسف و نرجو من قلوبنا أن تمر الأزمه كلها على خير ..
تقبلى تقديرى و تحياتى ..

صوت من مصر يقول...

للاسف احنا شعب اشاعات بجد بس الظروف بتتحكم فينا بسرعه مرعبه لدرجه انى سمعت ان محلا الملابس متخصصه فى مسئله الاعضاء وفى جرنال الاخبار امبارح قريت ان فى اكثر من 50 خنزير هرب من العربيه ودخلوه على بلد
الله يكون فى عون الناس الى بتفهم

shabfa2re يقول...

برغم الحالات الكتيرة بتاعة انفلونزا الطيور
الا انى ما بطلتش اكلها نهائيا

فاتيما يقول...

م الآخر للاول ماشى
طيييييب
بالنوسبة للعيال الاحباب دول إبقى إعملى إستحياطات من اول ما تشوفى عيل داخل ... تشيلى المج على رف عالى و ريحى دماغك
حكاية خطف الاطفال دى مهما كان فيها مبالغات او حقيقية فحلها الوحيد إن الأب و الأم عينهم تبقى ف وسط راسهم و يعملوا حراسة على أولادهم على قدر الامكان ...و فى النهاية الى مكتوب هيتشاف رغم كل شىء
ما حكاية الخنازير دى فربنا يستر يا رب علينا و على كل الدنيا و البشرية بحالها
و قبل كل دول بقى
وحشتينى يا فضفوضتى خاااااااااااالص
بوسة و حضونة كبيرة ليكى

صيدلانيه طالعه نازله يقول...

بالنسبه للخنازير كويس ان بقى ليها فايده انها قدرت توقع بين اعضاء المجلس المقر و خلتهم مسمكوا فى بعض
بالنسبه للمج تعيشى و تاخدى غيرها يا قمر و انا حاسه بيكى لان انا دايما الاولاد يدمروا الصيدليه يوم الجمعه و البنت اللى بتنضف اجازه

akeed يقول...

الاشاعات اصبحت من سمات المصريين وانتشارها بكل سهولة ودة علشان معظم الناس بتستقبل الخبر دون تفكير


تحياتى على الموضوع

Unknown يقول...

سلام عليكم يادكتورة
ينفع لما أتكلم عن انفلونزا الخنازير أقول انها للأسف من أخف المشاكل اللى موجودة فى مصر
بالنسبة لخطف الأطفال أنا فعلا سمعت ده فى تفاصيل الكلام مع اخواتى و انهم ازاى مبقوش يخرجوا العيال من البيت ... حاسس اننا بقينا مدمنين خوف ، نفسى نبطل خوف بقى حتى لو هنموت نفضل الشوية اللى باقيين مش خايفين
ممكن أعمل لحضرتك بعثة أسبوع واحد فى صيدلية فى السعودية علشان تعرفى ان الناس فى مصر ملايكة .. له واحد كان بيرجعلى علبة دوا واخد منها قرص واحد بس (آه والله واحد بس) علشان محبهوش!!!! ايه رأيك يادكتورة؟
دمتِ بكل الخير

صاحب المضيفة يقول...

مقتطفات مختلفة جيدة


تسلم الايادي على الطرح الجميل ده

سبهللة يقول...

ان هاعلقك على الولد اللى وقع مج النسكافيه
اصلها بتحصل معايا كتير ومن عيالى
بعد كدة وانتى بتشربى المج بتاعك ودخل عليكى حد سواء كبير او صغير اسحبى المج فى ايديك وانتى رايحه وانتى جاية او حطييه فى رف سفلى بعيد عن الايدى
========
بالنسبة لموضوع الخنازير
ربنا يلطف بينا فى الموضوع دة وفى حياتنا فى البلد دى

Blank-Socrate يقول...

انا دايما موجود هنا وسورى ان اول تعليق ليا عتاب
مع اني مبسوطه ان الخنازير هاتتباد من مصر لان شكلها مقرف
مفيش تعليق لكن كل كلمه فى الرأى دا غلط
سواء علميا او دينيا او اخلاقيا
اختلاف الرأى لا يفسد لمتابعه التدوين قضيه :)

funky girl يقول...

للاسف الخنازير مش هيا الخطر الرئيسي فلو تشوفي هتلاقي 99% من الاصابات هما الجايين من برا
ربنا يستر علينا :)

رضوى يقول...

خنازير اية وقرف اية ربنا يستر

القرآن الكريم