TvQuran

٢٠٠٩-٠٨-٠٢

لغز الكشك المسكون



من سنتين المحول اللي بيتي تابعه له اتحرق وحرق الدور الارضي للبيت اللي جمبه


ايامها قعدنا حوالي يومين ونص من غير كهربا ولكم ان تتخيلوا شهر يوليو من غير تكييف ولا مروحه ولا حتي شوية مية ساقعه


طبعا علي وجه السرعه اتحركت كل الجهات المعنيه وتم السيطره علي الحريق اللي كان ممكن جدا يعمل كارثه مروعه


وتم تغيير المحول والكشك بحاله

ورجعت الكهربا الحمد لله لقواعدها سالمه

بس طبعا ماكانش فيه مانع انها تقطع ساعه ولا اتنين كل فتره طويله لما يكون فيه اصلاحات في المنطقه او تركيب اسلاك جديده عادي

من شهرونص وبالظبط يوم الجمعه 26 يونيو الساعه 4.5 العصر كشك الكهربا فرقع والمحول اللي جواه اتحرق

وانقطعت الكهرباء 36 ساعه متواصله لحد الساعه 2 من فجر الاحد


تخيلوا اليومين دول عشناهم ازاي في عز الحر الرهيب ده


و بقي حالنا يصعب علي الكافررجعنا تاني للعصور الوسطي اللي منور شمعه واللي شايل لمبة جاز


قمة الاستهتار واللامبالاه من الجميع

وبقي عادي عندهم يسيبونا بالساعات من غير كهربا ومش مهم الحاجات اللي في التلاجات تبوظ

ولا الناس تموت من الحر يعني هما كانوا من بقيت اهالينا

ولا الطلبه يسقطوا واحنا مالنا حد قالهم يتعلموا من اصله

والناس من الحر هجت في الشوارع لحد الفجر

البيت اللي قصادنا كان فيه عريس جديد قضي ليلة العمر علي ضوء الشموع اهي رومانسيه برضو هههههه


حد هايقولي عادي ان المحول يتحرق بسبب الاحمال الزياده في الصيف خصوصا ان المنطقه عندنا اتغيرت جدا عن الاول البيوت زاد عددها وزاد ت ارتفاعاتها ، و المكيفات بقت شئ عادي جدا في البيوت بعد ما كانت من النادر وبالتالي ده كله سبب احمال زياده

اللي مش عادي بقي هو اللي حصل بعد كده

اول لما الكشك اتحرق حاولوا انهم يصلحوه وخلاص من غير ما يغيروا حاجه وبعد حوالي 3 ساعات نجحت محاولاتهم

بس مافيش ربع ساعه وفرقع تاني
فضلوا بقيت اليوم يحاولوا بس من غير امل
وقرروا انهم يستنوا لتاني يوم ويستعينوا بخبرا اجانب ههههه
اقصد خبراء من شبكة الكهربا الرئيسيه

وفعلا جه الفريق الاجنبي وقرر انه لازم المحول يتغير
وتم الاتصال بالجهات المسئوله واستيراد محول جديد من الشبكة الرئيسيه مع فريق العمل الخاص بيه

والمحول في الطريق انفجرت عجلة العربية النقل اللي شايلاه وتعطلت علي الطريق اكتر من 3 ساعات

ولما وصل المحول لارض المعركه اقصد مكان الكشك قعدوا يركبوا فيه اكتر من 5 ساعات واول ما بدأوا يشغلوه عمل قفله ويقال ان اجزاء منه اتحرقت وماعدتش تنفع خالص

وتم تغيير المحول لتاني مره في اقل من 24 ساعه واول ما بدأ يشتغل حصلت قفله تانيه وعطل المحول الجديد
وفضل العمال يحاولوا انقاذ ما يمكن انقاذه بس من غير فايده


ولولا ان الناس كانت محوطاهم من كل ناحيه كانوا مشيوا وسابونا نبات يوم كمان من غير كهربا

وفضلت المحاولات لحد ما جه الفرج الساعه 2 فجرا ورجعت الكهربا

وحمدنا ربنا علي نعمته وفضله اللي دايما مش بنقدرها الا لما تروح مننا

وقلنا خلاص محول جديد بقي مين ادنا وخلاص وداعا لانقطاع الكهربا ولكن عشم ابليس في الجنه

مافيش اسبوع الا وبتدأت الكهربا تقطع بشكل يثير الاعصاب

بالساعتين والتلاته وشويه شويه بقوا خمسه او ست ساعات

واخيرا من يومين كانوا 12 ساعه



المهم ان كل اللي يجي يصلحه يحتار مش عارف يلاقي العيب فين ودايما بيصلبه ويمشي
ولولا ان الناس بتحاصر الفني لحد ما يخلص كان قفل الكشك ومشي وسابنا من غير كهربا

الفني قبل الاخير فكرنا باسماعيل ياسين لما كان بيصلح الطياره وكل اللي يقابله يرميه لحد ما بقي هيكل من غير موتور

اهو الفني ده قالولي انه كان بيعمل كده اي حاجه في سكته مش عجباه يرميها

ولحد حالا ماحدش عارف السبب في الاعطال المستمره دي

هل يا تري الكشك ده مسكون وفيه عفاريت هي اللي بتعمل كده

ولا الفني مش بيفهم حاجه اصلا

ولا الاجهزه اللي بيجيبوها غير مطابقه للمواصفات وبتتورد بمناقصات مشكوك فيها

ولا احنا اللي نيتنا مش صافيه عشان كده بيحصلنا كل ده



حاليا الحمد لله بقالنا يومين والوضع مستقر

دعواتكم




21 comments:

Empress appy يقول...

فيه حاجه فيوز او سلك او قطعه اتركبت اصلا فى المكان غلط بتعمل كونفليكت او قفله مع المحول علشان كده لازم كله يتكشف عليه سلوك وقطع وكل حاجه تتعاد صيانته
زائد بقى ان الاحمال فى البيوت لازم تكون مظبوطه خاصه فى التكيفات يعنى اللى عنده تكييف يركب عداد مناسب ميكونش الموضوع فهلوه بمعنى ان لازم يبقى مش عارفه كام امبير علشان التكييف
لان اللى بيحصل التالى العداد بيكون اقل وحتى لو فى بيت واحد
فبيضرب فبدل ضرب ده بتضرب حاجات من الرئيسى زى فكره الفيوزات فى شقتك لما تضرب
اللى محمل على ده الكشك بتاع الكهربا
فهمتى القصد يعنى لازم تجيبوا واحد من قفاه وتقعدوا معاه يكشف على كل حاجه وسلوك فيه سلك بيعمل قفله وهما عارفين وفاهمين
وتتبعوا من اللى لاعب فى العدادات
الموضوع كبير ومرهق بس ده حله
على فكره الكلام ده من مهندس كهربا مش انا يعنى احقاقا للحقيقه هههههههههههههه
والموضوع خطر جدا لازم تشوفوا ايه لانه ممكن يحرق لكم حاجات بلاس بىق انه ممكن يعمل لا قدر الله حريقه كبيره وتبقى المنطقه باظت بسبب كتائب الشهيد ماس
ربنا يحفظكوا يا رب

ستيتة يقول...

لما يجي الفني الجاي
اول شيء تقرأوا عليه عدية ياسين
وبعدين تقولوا له ها ندعي لك يابني دعوة ولية ساعة صبحية
وبعدين تشهيصوه بغدوة مكن قد خروفين كده يملأ بيهم التانك
وبعدين بعد ما تدلعوه وتمرجحوه قولوا له اعمل شغلك صح بقى احنا خلاص جبنا جاز
والله الأسباب اللي قلتيها كلها واردة وخاصة حكاية اللي مبيفهموش واللي مش مطابق
لكن العفريت ده بس اللي مش حقيقي

ربنا يصلح لكم الحال يارب
وفعلا انتم في مهزلة حيه
الصيف بحره وانتم محتاسين مع فنين يسووا وميسوش

Me7'o يقول...

بصى يا ستى

لما ييجوا يركبوا المحول المرة الجاية قوليلهم يقيسوا فرق الجهد بين أطراف الكابلات اللى هايوصولها بالمحول
وبين كل طرف والأرضى
وخليهم يشوفوا القاعدة بتاعة المحول نفسه
بس خلاص

Me7'o يقول...

أنا عاجبانى قوى قوى الصورة ومعبرة عن البوست جداً

لو منفعش كل الكلام اللى فوق ده أدبحوا عجل بقى وهاتيلى حتة

عمرو يقول...

من واقع خبرتى اللامحدوده فى كل ما يخص محولات الكهربا اقدر اقولك ان العيب الحقيقه مش فى المحولات و لا فى الفنيين ..
العيب فيكم أنتم و لازم تواجهوا الحقيقه دى بشجاعه و بروح رياضيه ..
أكيد فيكم حد بيكره الحكومه و لأن الحكومه طاهره و سرها باتع فعفاريتها بترد على الكره ده بأنها تخرب لكم المحولات و بتعمل عكوسات علشان تقعدوا فى الضلمه و الحر و تحسوا بقيمة الحكومه اللى فيكم حد بيكرهها و ياللعجب ..
الحل بسيط خالص ..
أول هام تطلعوا من وسطكم هذا الشخص اللى بيكره الحكومه و ترنوه علقه لحد ما يبان له صاحب علشان يحرم و يعرف أن الله حق ..
تانى حاجه تسترضوا الأسياد و تبخروا الكشك بعين العفريت و مكايد بنى اٍسرائيل و ترشوا على بابه شويه من دم الأخوين ..
تالت حاجه لكم فى العريس الرومانسى عبره و قدوه و أهو عايش أهو قدامكم من غير كهربا و لا حاجه و مقضى وقته تمام يبقى ليه بقى طلباتكم دى اللى مش بتخلص و المشاكل و وجع الدماغ ؟؟
آل كهربا آل !!
مواطنين آخر دلع بصراحه ..

صوت من مصر يقول...

انت شكلك جارتى بجد
نفس المواقف بتحصل عندى

وميض ابتسامة يقول...

فكرتينى بفأر السبتية

حيث تم القاء اللوم عليه فى حادثة مشابهه منذ سنوات مضت ...

نأمل ان ينتهى هذا العذاب قريبا وبلا رجعة أو حتى ذكر اسباب !!

عين فى الجنة يقول...

الحل هو الهجرة بعيد عن المحول والمنطقة ومصر كلها وخدونى معاكم

غير معرف يقول...

الى العزيزة فضفضة فى أرض المعركة

اجمل تعبيراتك فرقع .. انفجر .. بالفعل انتقل الينا جو المعركة الذى فيه كل شئ انفجار وفرقعة ..
ربنا يديمها نعمة ويحفظها من الزوال ولااعادها الله من ايام

بوست لذيذ

ليس فقيرا من يحب يقول...

وانا بضم صوتى لصوت الاستاذ

عمرو لازم تطلعوا الجاسوس اللى بينكم

ههههههههههههههههههههههههههههه

وبعدها كله هيبقى تمااااااااااااام

صاحب المضيفة يقول...

دي حالة بسيطة من حالات كتير بتحصل هنا برضو

ربنا يعافينا ويقدر لنا الخير على طول

تحياتي

أحمد الشمسي يقول...

انتي نجحتي في انك تحرقي دمي فعلا... وانا اللي كنت جاي اسلم عليكي ضمن حملة لزيارة الأصدقاء القدامى لمدونتي

عموما.. الله يكون في عونكم، الأيام الحر دي مش طالبة الكهربا تقطع نهائي

غير معرف يقول...

أنا بقول إنو توفيراً للوقت و النفقات و وقت الحكومة، لما يتحرق المحول مرة تانية تتصلوا بناس ييجوا يعملوا زار

:D

Monzer يقول...

الله يكون فى العون بجد

غير معرف يقول...

يااااه
ربنا معاكم
أنا مريت أقول
كل رمضان و انتم بخير

Tamer Nabil Moussa يقول...

السلام عليكم

كل سنة وانتى طيبة

رمضان كريم

مع خالص تحياتى

سبهللة يقول...

كل سنة وانتى طيب
بلغك الله الشهر
وعظم لكى الاجر
========
وبالنسبة للكهربا
ربنا ينور لكم حياتكم كلها

شمس النهار يقول...

ازيك
كل سنه وانت طيبه
وشكرا علي سؤالك علي وانا مسافره
ربنا يكرمك
وطبعا كل الاسباب اللي ذكرتيها هي السبب في العطل ماعدي نيتكم علشان هي خير ان شاء الله

يا مراكبي يقول...

نفس اللي حصل عند بيتنا في مصر

الكشك في آخر الشارع ولع وحرق العمارة اللي تحتها بالكامل وأنقذو السكان بإعجوبة .. وبعدها بشهر حصلت نفس الحريقة في الكشك اللي جنب بيتنا

الحقيقة الموضوع مركب جدا .. وخصوصا إن كل الشبكات الكهربائية أو معظمها مش مدروس ... لا هم دارسين الأحمال ولا الأحمال الإضافية الجديدة المتوقعة .. ولا علاقة الشبكات الرئيسية بالفرعية .. ولا وصلة الأرضي موجودة أصلا

عشوائية متناهية جدا جدا بالذات لو تعمقتي في الأمور الفنية

الموضوع فعلا بالطريقة دي عمره ما هيتحل .. كلها حلول مسكنة وخلاص

مصطفى ريان يقول...

لا يا دكتوره الكشك مش مسكون ولا العيب
فيكوالعيب فى الحكومه اللي عينت موظف مسئول عن حياه الناس من غير ما تهتم له فى الشغلانه ولا لاء ومنغسير ماتهم انها
تدربو وتعلمه .. العيب على البلد اللي خلت واحد زي ده يشتغل شغلانه هو مش حاببها - وإلا كان اتقنها - لمجرد انه يلاقى مصدر رزق له ولعياله مش عيب اننا نجيب تكيف لكن عيب على البلد انها ماتخيلناش نتمتع بالتكيف ده
اقولك ايه بس الموضوع كبير قوي
كل سنه وانت طيبه وبخير

Eyzinhyem يقول...

مش مشكلة كهرباء بس ده فى مكان فى فيصل المياه فيه مش بتيجى غير خمس ساعات بس فى اليوم وبقالهم على الحال ده عشرين سنة
تخيلوا بقى الحياه من غير مياه !!

القرآن الكريم