الفنون جنون

زمان ايام المدرسه - ايام التخته الخشب - اكيد مافيش حد مننا ماسابش عليها ذكري ليه

كتير اوي كانوا بيشخبطوا عليها او يكتبوا اساميهم او اول حرف منها

والناس الهيمانه اوي كانت بترسم قلب وسهم وحرفين وساعت يرسموا ورود

وايام الامتحانات كنا بنلاقي لوحات سيرياليه منقوله من كتاب المدرسة عشان الغش واللذي منه :))

حاجات كتير اوي بس اكيد عمرنا ماشفنا حد رسم مسدسات وقنابل

دا اكيد حد كان مخنوق اوي من المدرسين والمدارس وعاوز يخلص بدري بدري :)

او حد من طلبة الثانوية اللي اليومين دول مزنوقين في الامتحانات وقال افجر المدرسه والوزارة والوزير وانتهي

و اما لقي ان المسدسات حاجه بسيطه ، قال نستخدم القنابل ونجيب من الآخر :)

school-desk-art by Ben Turnbull

وفاكرين بواقي الاقلام الرصاص في الإبتدائي

اما القلم يبقي قد عقلة الصباع وماعدش ينفع يتمسك ، كنا بنرميه صح

طيب ايه رايكوا في اللي عمله فنان اسمه Dalton Ghetti ببواقي الاقلام الرصاص دي

اضغط هنا الصوره بحجم اكبر موضح الابجديه الانجليزيه علي اطراف الاقلام

صدق اللي قال الفنون جنون

شهر من المتعة

غدا يبدأ كأس العالم لكرة القدم في نسخته التاسعة عشر ، وكالعاده يتكرر المشهد ل 20 عام و نظل في مقاعد المتفرجين

تأتي النهائيات هذه المره وفي الحلق غصه ،حزن علي غضب علي حسره

عندما أشاهد البرامج التي تتحدث عن استعدادات جنوب افريقيا للمونديال والكرنفالات في الشوارع وتدفق الناس من كل الجنسيات علي جوهانسبيرج اشعر بالألم خصوصا عندما يذكرنا المذيع انها اول نهائيات تقام علي ارض افريقيا :(

نعم كان ينبغي ان تقام هذه النهائيات هنا علي ارض مصر ولكنهم اضاعوها ، باللامبالاه الاستهتار والاعتماد علي التاريخ وحضارة 7000 سنة

لم يكن ينقصنا شئ لنفوز بشرف تنظيم تلك النهائيات ولكنه سوء التنظيم والتخطط كالعاده

،

نسوا او تناسوا ان هناك قواعد للعبه ينبغي اتباعها ، وكانت النتيجه صفر كبير وضياع الفرصه التي لن تتكرر قريبا

:(

سوء التنظيم لم يتسبب فقط في ضياع فرصة تنظيم النهائيات ولكن ايضا في ضياع فرصة المشاركة فيها ( اعتقد انني لا احتاج لاعادة الحكاية الممله فالكل يحفظها ظهرا عن قلب )

فلاش بااااااااااااك

نهائيات كأس العالم بالمكسيك

1986

كانت اول مره اتابع فيها النهائيات بشغف وفهم ، قبلها كنت اشاهد المباريات افرح بالاهداف والعن مضيعي الفرص بلا وعي فقط اقلد ما يفعله الكبار

اما في نهائيات المكسيك فكان الوضع مختلف تماما ، بدأت افهم القواعد واشاهد المباريات بشغف ، كنا نتجمع في بيت جدي مع الاخوال والخالات ، نسهر لنتابع المباريات ونتسحر فلقد صادف اقامة البطولة شهر رمضان

فلكم ان تتخيلوا مدي المتعه التي كنا فيها ، رمضان وكأس العالم وإجازة اخر العام :)

في المكسيك بدأ بزوغ نجم مارادونا الذي اصبح اشهر واغلي لاعب في العالم ، كنا ننتظر مباريات الارجنتين لنشاهد المعجزة الجديده مارادونا الذي قدم الكأس للأرجنتين علي طبق من فضة

ومن ينسي هدفه الشهير الذي احرزه بيده في مرمي انجلترا في الدور ربع النهائي

اما اكثر ما حيرني في هذه البطولة فكان الظل المعكوس علي ارض الملعب لشئ ما يشبه الشمس؟؟؟

والي الان لم اعرف ماهو تحديدا

ولكن الجميع فسروه علي انها مروحه ضخمه معلقه اعلي الملعب لتلطيف الجو فدرجات الحرارة المرتفعه هذه لم تعتدها المنتخبات الاوروبية.... ربما

!!!

اما البطولة التاليه مباشرة ايطاليا 1990

فكانت من اسعد البطولات علي كل المصريين ، فاخيرا وبعد اكثر من 50 عام تعود مصر الي النهائيات

اعتقد ان هذه البطوله محفوره في الاذهان ولا يمكن ان ينساها من تابعها ابدا

الجوهري ، شوبير ، طاهر ابو زيد، هاني رمزي ، مجدي عبد الغني ، ربيع يس ،

وبزوغ نجم حسام حسن بهدفه الشهير في مرمي الجزائر

الرحلات البحريه من امام شواطئ الاسكندرية لايطاليا

وعدالة السماء التي هبطت علي استاد باليرمو بهدف مصر الوحيد في النهائيات حتي الأن

ثم الخروج الدراماتيكي للمنتخب من الدور الاول بعد الفوز غير المستحق لانجلترا وتحيز الحكم الواضح جدا والذي شهد به الجميع

وبعد التمثيل المشرف للمنتخبات الافريقيه مصر والكاميرون تقرر الفيفا زيادة عدد المنتخبات الافريقية الي 3 منتخبات بدلا من 2

ثم الي 5 منتخبات وبالرغم من ذلك لم تتمكن مصر من بلوغ النهائيات طيلة 20 عام :((

غدا تبدأ المتعة وكرة القدم الحقيقية ، كرة قدم مختلفه تماما عما نراه في البطولات المحلية او حتي القارية ، فالنستعد جميعا لشهر من المتعه

يمكنكم يتحميل جدول المباريات من هذا الرابط

http://rapidshare.com/files/334191170/WC2010.rar

وهو عباره عن برنامج اكسل يساعدكم في تسجيل نتائج المباريات و يقوم بحساب عدد النقاط و الاهداف و بالتالي الفرق المتأهلة للدور التالي الى ان يفوز احدى الفرق بالكاس.

انصحكم بمتابعة مايكل محسن علي موقع راديو حريتنا حيث يقدم تحليل مفصل وفوري عن كل مباريات البطولة

مش مجرد نقط صفراء

النقط الصفراء الموجوده في الفيديو ده مش مجرد نقط صفراء ، ده عباره عن رصد بالرادار لحركة الطيران حول العالم في 24 ساعه

كل نقطة صفراء من دول ماهي الا طياره خارجه من مكان ما رايحه لمكان اخر حول العالم

لاحظوا ان معظم حركة الطيران مركزه فوق اوروبا وامريكا الشماليه وانه علي نهاية اليوم بيكون تقريبا 90 % من طيران العالم بيعمل لاندينج في مطار ما من اوروبا او امريكا الشماليه

اما النص الجنوبي الفقير فكل الناس بتخرج منه الي الشمال ، اكيد كتير اوي من الناس دي وهي بتحط رجلها علي اول درجة من سلم الطياره كانت بتحلم احلام كبيره طبعا علي قمتها الثراء والرفاهيه واحترام حقوق الانسان

الشرق الاقصي هناك عند الصين ودول جنوب شرق اسيا كمان بيجذب عدد كبير اوي من المسافرين ، نسبه بدأت تتضاعف في السنوات الاخيره

تحليل دقيق ونظره فاحصه علي حركة الطيران ممكن يدينا تصور مبدأي مش بس عن الاقتصاد وتمركز رؤوس الأموال انما عن حاجات تانية كتير

اما النقط الصفراء اللي في الفلاش الجاي ، فا معموله بحرفيه عاليه جدا لو حاولتوا تحركوا الفاره عليها هاتلاحظوا ان اتجاه ونظام حركتها اتغير وبدأت تتمركز عند مكان سهم الفاره

انا شيفاه ممتع اوي حاولوا تجربوه وقولوا رايكوا :))