2007-07-06

ست الحسن والجمال



كان يما كان ، يا سعد يا اكرام ، مايحلا الكلام الا بذكر النبي عليه الصلاة والسلام

عليه الصلاة والسلام

كانت ست الحسن والجمال عايشه ف سعاده واستقرار وسط ابوها وامها واخواتها الكُتار،
مش حاسين بالزمان ولا حاطين الهموم ف الحسبان ، كان ابوهم ملك علي بلاد كبيره و ثروته كانت كتيره،
وتعدي السنين وتمر الايام ويموت الاب اللي كان بحب ولاده مجنون ووراه تموت الام الحنون
بعد الممات كل واحد من الاخوات طالب بنصيبه ف كل الثروات وحتي كمان ف حدود البلاد

و تتقسم البلاد والثروات بين الاخوات الصبيان والبنات ، والقوه الكبيره اللي كانت عند الاب اللي مات تقل وتضعف وينتهي العهد اللي فات ،
لما كانت كل العيله ايد واحده ونفوذها مالوش حصر ولا عدد ولا يقدر عليهم اي عدو مهما كان عنده من المدد

وكل واحد فيهم معادش هامه الا نفسه وازاي يحافظ علي ثرواته وحدود بلاده

كان نصيب ست الحسن كتير يكفيها طول عمرها ويفيض لولادها من بعدها

الثروه والبلاد كانت كبيره ومكانها ف النفوس كان بيشعلل الحقد والغيره
الكل كان فيها طمعان ....في فلوسها وحكم بلادها وكل الهيلمان

و كان اللي يشوفها يحبها ويبقي عاوز يخطب ودها ، فيهم اللي كان فعلا بيحبها وفيهم اللي كان طمعان ف الثروه اللي عندها ،

وفضلت ست الحسن والجمال طول عمرها بتحلم بالشاطر حسن
اللي يدخل قلبها قبل عقلها ، فضلت تدور عليه في كل راجل اتقدم لها ، كانت عاوزه واحد يبقي عاوزها لنفسها مش لفلوسها ولا مُلكها

ولانها كانت ماشيه ورا قلبها ومش دايما بتحَكِم عقلها ، كانت تصدق اي واحد يتقرب لها وكلام غرام يقول لها
كل واحد منهم يفضل يقول ف كلام معسول لحد ما لغرضه ينول وينهب من فلوسها اللي يقدر عليه

و ياما قاست ست الحسن بسبب الثروه والجمال ، بيقولوا الحلوين كتير اوي بيبقوا في الدنيا مظلموين ، ، ياما عدي عليها من الظلمه الجبارين اللي علي فلوسها كوشوا وعلي بلادها اتمريسوا ، ولشعبها استعبدوا

والحق يتقال شعب بلادها العظيم كان مثال للتضحيه والنضال ، دايما كان واقف جمبها وفي كل محنه يكون سندها وضهرها

ومن كتر النهب والنهابين و الظلمه الجبارين ، الفقر ملا البلاد من غربها لشرقها ومن فوقها لتحتها
والناس ماباقتش لاقيه لقمه تكفيها ولا هدمه تغطيها ولا مدرسه ولادها تتعلم فيها

وكترت علي ست الحسن الهموم ، وماباقتش عارفه تعمل ايه تخلص بيه من اللي هيه فيه
و فضلت ومن قبلها شعبها تدور علي الشاطر حسن اللي يكون فعلا بيحبها ويقدر يسعد قلبها ،
ويحافظ علي الثروه والبلاد ، ويبعد عنها الطمعانين اللي لفلوسها ناهبين ولخيرها واكلين
وفاتت سنين كتير وهي عليه بتدور ، وفضلت تتمني انه يجيها ف يوم يخلصها من عذابها ويبعد عنها الهموم

وبعد مده مش صغيره جاها اللي حلفلها انه بيحبها وف عينيه هايحطها وهايبعد كل الهموم عنها ،
صدقته المسكينه وسلمته قلبها ، ومفاتيح البلاد و كل الثروات واديته كل الصلاحيات اللي بيها يقدر يتصرف في كل الحاجات ، وماكنش حد عليه رقيب الا ضميره اللي مات ونسي ان فيه مالك الملك و الملكوت رب الارض و السماوات

حبس ست الحسن والجمال ف قصرها واستولي علي ثروتها وملكها واستعبد شعبها

قاست ست الحسن و شافت علي اديه الويل وعاشت هي وشعبها ف سجن كبير وخير ارضهم راح لغيرهم وزاد فقرهم وويلهم

و رجعت تاني ست الحسن تحلم بالشاطر حسن اللي يجيها ف يوم ويفك اسرها وعلي حصانه الابيض يخطفها وجوه قلبه يحطها وعلي صدره يرسم صورتها وفوق دراعه يكتب اسمها

وفضلنا معاها نحلم وندعي ربنا ان ست الحسن تلاقي شاطرها حسن بس اهم حاجه يحفظ الامانه ويهني شعبها


---------------------

اي تشابه بين احداث الحكايه دي واي حكايه تانيه هو صدفه بحته و انا غير مسئوله عنه


57 comments:

عصفور المدينة يقول...

صدفة بحتة
هي ست الحسن دي عندها خصخصة في الرئة ولا حاجة؟

خمسة فضفضة يقول...

السلام عليكم ورحمة الله وبركاته

باشمهندس عصفور

ايون صُدفَتون بَحتَتُون

بعد الشر عليها من الخصخصه ، ست الحسن بتاعتنا عندها شفافيه علي عنيهاو تعديلات دستوريه في قلبها

§a§a يقول...

هههههههههههه

جامدة جدا

بس ان شاء الله هيجى اليوم اللى تنطلق فيه الابناء من جديد ويوحدو البلاد والعباد من جديد

ودى سنه الحياة

ma_3alina يقول...

وفي وسط الضلمة تهل انت
ولا نعرف من فين أو امتى
ترفع بنيان الغلبان
وتطاطي بنيان الوالي
وترقص قصر السلطان

الكلام ده من تتر مسلسل علي الزيبق .. غهداء للشاطر حسن

صاحب البوابــة يقول...

هههههههههه

رائعة وساخرة

تحياتي اختاة

mohand يقول...

السلام عليكم
بسم الله الرحمن الرحيم
الاجابة مصر
صح يا دكتوره
عايز ربع جنية دهب بقي
------------------
ايه بس المواهب دي
هو دا كان نثر ولا حاجه؟
استاذه يا دكتورة
وربنا يعينك في الصيدليه
شكل اللي بيتزنق في الشغل بيطلع مواهبه من خنقته
هههههههههههههههه
تحياتي

سكتم بكتم يقول...

القصة دي كدة شكلها
مش زي مايبان من أسمها
ست الحسن الجميلة تبقي البلد بكامل أرضها
والشعب الغلبان أبنها
والحاكم الظالم زوجها
ويارب يارب تفك سجنها

إنـســانـة يقول...

عنيى عليها ست الحسن

بعشق ترابها

وشربت من نيلها

وبموت فى ولادها

وببكى على حالها

وبدعى ربنا يحميها وينصرها

آمييييييين

--------

كعادة بوستاتك يا فضفضة .. راااااااائعة بجد

البنت الشلبية يقول...

السلام عليكم ازيك يا جميلة

التلميح لا التصريح

انتى كده فى السليم عشان لما تتقفشى تقولى ده انا كنت بحكى مجرد قصة للاطفال هههههه

اخ منك...سلام

أحمد سلامة يقول...

مش بحب اكتب شعر حد مش بتاعي في التعليقات كتير
بس مش لاقي احلى من الابيات دي للرائع أحمد فؤاد نجم
******************
حبيبتي يا مدينة
متذوقة و حزينة
في كل حارة حسرة
وفـ كل قصر زينة
ممنوع من أني أصبح
بعشقك .. أو .. أبات
ممنوع من المناقشة
ممنوع من السكات
و كل يوم فـ حبك
تزيد الممنوعـات
وكـل يوم بحبك
أكتر من اللي فات

*****************
جميلة قوي يا دوكتورة
تسلم ايدك والله

خطــاب يقول...

اول زيارة لمدونتك

ما شاء الله جميلة

بالتوفيق

رينـــــــــــا يقول...

ههههههههههههههههههه
رجعتينى لايام زمااااااااان
الف ليله وليله بتاعت البرنامج العام
انا بحب اوى قصص الف ليله وليله
قصتك جميله يا فضفوضه

يارب تكونى بخير يا جميله

Ma-3lina يقول...

ياااه

فين ايامك يا زوزو نبيل لما كنتى بتحكى الف ليلة و ليلة

معرفش حستها كده هيا اللى بتحكى

حلوة القصة اللى كلها تورية دى

يعيش الصيادلة يعيش يعيش

SAKAyAR يقول...

أدينا قاعدين منتظرين هنحاول مع نفسنا نطلع من جوانا كل شاطر حسن علشان ست الحسن تنقي الشاطر حسن اللي يحافظ عليها وعلى شعبها
جميييييلة جدا طريقة العرض
تحياتي

queen of girls يقول...

حلوه اوى طريقه عرض الموضوع بس هنعمل ايه ماباليد حليه وأكيد لازم يبقى فى أمل ان هيجى وقت والدنيا تتغيربس امتى بقه الله ورسوله أعلم وادينا مستنين اليوم ده
بس بجد الموضوع حلو اوى

كراكيب عادل يقول...

اية يا دكتورة النظام

انا شكلي سامع الحدوتة دي

بس متاكدة انها ست الحسن

دي وشها كرمش ومحتاجة عمليات تجميل

safa7_karmooz يقول...

هيجى ...هيحلها ...بس ممكن يتأخر حبة عقبال ما يحوش فلوس الحصان ...وممكن يجبه قسط

بس المشكلة انهم باعوا البنك اللى كان شايل فيه فلوسه :D

خمسة فضفضة يقول...

السلام عليكم ورحمة الله وبركاته

صاصا

ان شاء الله ، ويارب يكون قريب

شكرا علي ذوقك نورتني

خمسة فضفضة يقول...

السلام عليكم و رحمة الله وبركاته

باشمهندس ماعلينا

يااااه فكرتني بالمسلسل ده كنت بحبه جدا

وياسلام لما كان علي الزيبق يدي كل مقلب واخوه للمقدم صنقر الكلبي

يارب يكون في البلد دي الف قول مليون علي الزيبق ويغور كل صنقر كلبي


تحياتي

خمسة فضفضة يقول...

السلام عليكم ورحمة الله وبركاته

صاحب البوابه

شكرا علي ذوقك

نورتني

خمسة فضفضة يقول...

السلام عليكم ورحمة الله وبركاته

مهند
ازيك و اخبارك ايه

ايوه الزنقه دي بتعمل بلاوي

يلا ادعيلي ان ربنا يفكها عليا


تحياتي

خمسة فضفضة يقول...

السلام عليكم ورحمة الله وبركاته

د/ سكتم بكتم

ايه يا دكتور انت هاتصيحلنا ولا ايه اكفي علي الخبر ماجور
علي الله بقي مايكونش حد من اخوانا البعدا فايت من جمب المدونه

وينكى يقول...

جميله يا جميله
انا ما فهمتش غلط ولا حاجه ولا ربطت بينها وبين اى حاجه تانيه لاسمح الله
على فكره
انا عامله تجمع بلوجرى جامد جدا بمناسبة نجاحى وتخرجى على خير
التفاصيل على مدونتى الصغنونه..اللى من غير فذلكه

خمسة فضفضة يقول...

السلام عليكم ورحمة الله وبركاته

انسانه

وانا كمان وبضم صوتي لك واقول :
آمين يارب


شكرا يا قمر وسلامي لكاميكاز

خمسة فضفضة يقول...

السلام عليكم ورحمة الله وبركاته

شلبيه هانم

ايوه فعلا كده ...اه منك يا شوشو فقساني كده علي طول..هههههه

بس ماتبقيش تنسيي في العيش والحلاوه لما اشرف هناك


تحياتي يا قمر

Islamist Bloke يقول...

ربنا يرجع ست الحسن لرشدها........اللى ضحكوا عليها كتير واللى اتحكموا فى ولادها كتير

يارب ترجع لولادها اللى بيحبوا خيرها ورقيها

والسلام

خمسة فضفضة يقول...

السلام عليكم ورحمة الله وبركاته

د/ احمد سلامه

والله يا دكتور احمد من كتر المنوعات ماعدتش باخد بالي ايه الحاجات اللي المفروض انها مش ممنوعه

عموما الحمد لله وربنا اكيد فرجه قريب

شكراعلي ذوقك ...تحياتي

خمسة فضفضة يقول...

السلام عليكم ورحمة الله وبركاته

خطاب

اهلا بيك ويلريت ماتكونش الاخيره

تحياتي

خمسة فضفضة يقول...

السلام عليكم ورحمة الله وبركاته
رينا

يااااه طاهر ابو فاشا بحاله ، انا لا ارقي للمستوي دا طبعا دا حاجه كدا علي ادنا

الحمد لله بخير ويارب تكوني انت كمان في احسن حال

تحياتي

خمسة فضفضة يقول...

السلام عليكم ورحمة الله وبركاته

د/ مرام

شكرا يافندم

وطبعا يعيش الصيادله يعيش يعيش يعيش يعيش

تحياتي يا قمر

خمسة فضفضة يقول...

السلام عليكم ورحمة الله وبركاته

ساكايرا

ان شاء الله ما نستناش كتير

وباذن الله الفرج قريب طول ما فيه ناس بتحاول تصلح الامور وتدور علي الشاطر حسن جواها

تحياتي

خمسة فضفضة يقول...

السلام عليكم ورحمة الله وبركاته

queen of girls

ادعي ربنا انه ان شاء الله يبقي قريب

شكرا علي ذوقك ونورتي مدونتي المتواضعه وياريت تشرفيني علي طول


تحياتي يا قمر

خمسة فضفضة يقول...

السلام عليكم ورحمة الله وبركاته

الفنان عادل

بالرغم من ان فيه ناس كتير شايفينها كده وشها كرمش وخلاص ماعدتش تنفع ومحتاجه تجميل

انا شيفاها اجمل ست في الدنيا ، بس ياريت تشوفوها لما الشاطر حسن يجيها اكيد الحال هايبقي غير الحال


تحياتي

خمسة فضفضة يقول...

السلام عليكم ورحمة الله وبركاته

سفاح كرموز

ماهم لما باعوا البنك قام عامل جمعيه مع الجران وقبضها الاول واشتري الحصان بس المشكله انه اتاخر في الشحن

وان شاء الله اول ما يستلمه هايجي علي طول


تحياتي

خمسة فضفضة يقول...

السلام عليكم ورحمة الله وبركاته

وينكي

الف مبروك علي النجاح والتخرج وعقبال العريس

علي فكره حلوه اوي مدونة اللينكات دي

نورتيني يا قمر

خمسة فضفضة يقول...

السلام عليكم ورحمة الله وبركاته

Islamist Bloke

يارب اللهم آمين

تحياتي

يا مراكبي يقول...

إنتي قلتي: اي تشابه بين احداث الحكايه دي واي حكايه تانيه من سبيل الصدفه البحته و انا غير مسئوله عنه

************

الجملة دي مش هتنفعك زي ما إنتي فاكرة لما أمن الدولة يمسكك .. وخصوصا إنك في آخر الحدوتة خبطي جامد في الشاطر محمد اللي حبس ست الحسن والجمال

وش بيغمز

خدي بالك من نفسك اليومين دول

:-D

محمد الجرايحى يقول...

السلام عليكم ورحمة الله وبركاته
طرح قيم وملئ كما يقولون بإسقاطات سياسية وغمز ولمز .....!!!!!

تقديرى واحترامى لقلمك الواعى والراقى

أخوك
محمد

ياسر سليم يقول...

يارب ست الحسن تلاقى الشاطر حسن

أسلوب قصصى جميل

واللى عجبنى فيه قوى

السجع اللى فى القصة

بورك فى قلمك

تحياتى

دنــــيــــــا مـحـيـرنـي يقول...

قصه حلوه اوي و اسلوب ساخر جامد جدا تحياتي لقلمك

الطائر الحزين يقول...

حتى الحصان الأبيض اللى كان عربى أصيل
انقرض

دكتور مستكنيس يقول...

اول زيارة ليا لمدونتك بس المؤكد مش هتبقي الاخيرة ابدا ايدا بجد والله مدونة تحفة في كل حاجة فيها
تحياتي

الراقص مع الذئاب يقول...

السلام عليكم ورحمة الله وبركاته
ازيك يا دكتورة
قصة جميلة
بس هو الشاطر حسن دا اسمه حسن؟؟؟
اصل انا اعرف شاطر بس مش اسمه حسن
هو شاطر اوي علي فكرة...اوي اوي اوي كمان

يخلق من الشبه اربعين

شكلنا هنروح في داهية يا دكتورة
نسكت احسن

تحياتي لكي وللقصة الجميلة

Eman Eltaher يقول...

مدونتك جميلة جدا على فكرة
ما شاء الله عليكى

موضوعك لذيذ خصوصا انه بيفكرنا بأيام زمان و أفلام زمان الشاطر حسن
و حسن و نعيمة

بحييييييكى على البوست
و الى الأمام دايما

تحياتى

HaMbAcAWeY يقول...

ahlan ya 5 fadfada ana awel marrah a2ra el post beta3ak bas howa mo3abber awy we yekhaly el wa7ed yefked el amal fe el 7ayah ledaraget en el wa7ed ma3atsh shayef masr gamela

علاء يقول...

ده موضوع التجمع ياريت أعرف رأيك

المدوّن خانة

خمسة فضفضة يقول...

السلام عليكم ورحمة الله وبركاته

باشمهندس احمد

انت شايف كده .؟؟؟يعني احضر العيش والحلاوه واستعد ، ولارايك اديها سكه واهرب علي بره ...عاااااااااااااااااااااا
ابقوا افتكروني وانا خلف الاسوار

تحياتي

خمسة فضفضة يقول...

السلام عليكم ورحمة الله وبركاته

الاستاذ محمد الجرايحي
شكرا علي ذوقك
نورتني

خمسة فضفضة يقول...

السلام عليكم ورحمة الله وبركاته

ياسر سليم

ادعي معانا انها تلاقيه قريب

شكرا علي ذوقك
تحياتي

خمسة فضفضة يقول...

السلام عليكم ورحمة الله وبركاته
دنيا محيرني

شكرا علي ذوقك
واهلا بك في مدونتي المتواضعه

سلام

خمسة فضفضة يقول...

السلام عليكم ورحمة الله وبركاته

الطائر الحزين

لا الشاطر حسن بتاعنا مدكن واحد من انقي السلالات العربيه وباذن الله ها يجيبه ويجي يخطف ست الحسن عليه

تحياتي

خمسة فضفضة يقول...

السلام عليكم ورحمة الله وبركاته

د/مستكنيس

اهلا بك دايما هنا

نورت المدونه والمدونات المجاوره وشكرا علي ذوقك

تحياتي

خمسة فضفضة يقول...

السلام عليكم ورحمة الله وبركاته

باشمهندس محمد

اي شاطر بس يكون علي ضمانتك يا باشمهندس ومش مهم الاسم
المهم يجي وتنصلح علي ايده احوال ست الحسن اللي لا تسر عدو ولا حبيب

تحياتي

خمسة فضفضة يقول...

السلام عليكم ورحمة الله وبركاته

ايمان الطاهر
فرحت اوي ان الحكايه عجبتك
شكرا علي ذوقك


تحياتي

خمسة فضفضة يقول...

السلام عليكم ورحمة الله وبركاته

همباكاوي
لا ما تفقدش الامل
ان شاء الله بكره هايبقي احسن من النهارده ، وان شاء الله يجينا الشاطر حسن اللي يخلصنا ويخلص ست الحسن من اللي هي فيه

تحياتي

خمسة فضفضة يقول...

السلام عليكم ورحمة الله وبركاته

علاء

رديت عليك في الموضوع

تحياتي

غير معرف يقول...
أزال أحد مشرفي المدونة هذا التعليق.

القرآن الكريم