2007-07-01

قولوا لعين الشمس ماتحماش


اخيرا انكسرت موجة الحر الفظيعه الله لا يرجعها، وانا في الحر مش باعرف افكر ولا اتكلم ولا اعمل اي حاجه تحتاج مجهود ذهني او عضلي، بس اتفرج علي كل اللي حواليا ببلاهه وبدون اي تعليق ، ببقي عامله زي الجمل اللي يعد يخزن يخزن وبعدين يجتر اللي خزنه ده علي فترات
اليومين اللي فاتوا حصلت كذا حاجه وحسيت ان كلهم بيضغطوا علي اعصابي ، كنت بالعافيه باعلق عند اخواني المدونين ،
بس ماكنتش قادره اني اقوم اكتب بوست ، المهم قلت اخزن وبعدين اجتر:)

اول حاجه كان موضوع اشرف مروان
كل ما افتح التليفيزيون ولا امسك جرنال الاقي الخبر بتاع اشرف مروان ، حتي النت والمدونات مافيش غير اشرف مروان وكل واحد بقي يدلو بدلوه :

هل انتحر ..؟؟؟ هل سقط خطأ بسبب الدوخه اللي سببهاله دوا كان بياخده ..؟؟ هل قتلوه وبعدين رموه من البلكونه ....؟؟؟؟ هل رموه من البلكونه صاحي وبعدين مات من الوقعه ..؟؟؟؟؟

والفضائيات ماصدقت لقت خبر تمسك فيه واهو تبقي حاجه تصدع بيها دمغنا لشهر او اكتر ...كل القنوات وبرامج الحوار بلا استثناء بتناقش الخبر :
هل كان اشرف مروان جاسوس لاسرائيل ونقل لهم معلومات مهمه عن حرب اكتوبر ولا كان جاسوس مزدوج وخدع اسرائيل ونقلها معلومات غلط ، هل حاول يكتب مذكراته فالناس اللي هاتضرر منها قتلوه ،ايه السر وراء وفاته .....؟؟؟؟؟وايه حكاية بلكونات الدور الخامس في لندن اللي كل الناس بتقع منها .؟؟
المهم ان ماحدش عارف حاجه و كلها تكهنات ، الراجل دلوقتي بين يدي الرحمن ماتجوزش عليه الا الرحمه فا ليه كل الهيصه اللي هما عاملينها دي..؟؟؟؟؟؟؟
واحطياتي يا جماعه ماحدش يقف في بلكونات لندن خصوصا لو في الدور الخامس والاحسن بلاش لندن وخلونا في باريس بس ابقوا ابعدوا عن الانفاق وبالذات نفق بوت دي لالما بتاع ديانا ودودي ...ولا اقولكم خليكوا في مصر ...دا من خرج من داره ......
-------
وبما اننا لسه بنتكلم عن اخبار الموت والوفيات ،فاحدث قناة تليفيزيونيه هاتكون للجنازات بس ، وهايتذاع فيها مراسم الدفن والعزاء ده طبعا للي عاوز وبعد اتفاق مسبق علي الاجر مع ادارة القناه اللي هاتفتح في بداية الخريف القادم، القناه دي طبعا مش فمصر ولكنها في تركيا .....نفسي اعيش واشوف اليوم اللي هايفتحوا فيه واحده مصريه اكيد الحجز فيها هايبقي بالضرب وطوابيرها هاتبقي ولا طوابير العيش

------------
ونسيبنا من اخبار الاموات لان الحي ابقي من الميت وكل واحد لازم يرمي اللي فات ورا ضهره و كلنا لازم نبص لمستقبلنا زي ما لجنة السياسات كده بتبص لمستقبل القاهره وتحط لها مخطط جديد هايشوف النور في 2050 يديني ويديكم طولة العمر ....قولوا آمين
----------
ونختم بالاخبار الرياضيه ، حكاية انتقال بشير التابعي الوهميه من الزمالك للاهلي ، والصراع الدائر علي حسني عبد ربه بين ثلاثي القمه الاهلي والزمالك والاسماعيلي وحكاية انتقال احمد شوبير من دريم للبيت بيتك... وبما اني مش باتفرج علي البيت بيتك يبقي خلاص هاستريح من شوبير اللي ليل ونهار قاعد يحلل في الماتشات والاخبار الرياضيه


الناس دي مدينا احساس انهم بيلعبوا وبيتكلموا عن الدوري الانجليزي ولا الايطالي ، لاعيبه ماتستحقش ملاليم بيشتروها بملايين ، وصراعات اللي يسمع عنها يفتكر انهم بيجروا ورا خليفة مارادونا ولا بيليه ، المصيبه ان كل الانديه انديه حكوميه وان الفلوس اللي قاعدين يبعتروا فيها يمين وشمال دي في الاصل بتاع الشعب الغلبان
يلاا ..منهم لله
صحيح لسه فيه حاجات كتير زي كادر المعلمين اللي هايطبق علي بتوع الازهر
والاطفال السته اللي اتحقنوا بفيروس سي فمستشفي سبورتنج بالاسكندريه ، وحادثة مطار جلاسكو في انجلترا وغيرها وغيرها .....بس كفايه عليكوا كده زمان دماغكوا صدعت


53 comments:

مناجاة يقول...

احلى حاجة عجبتنى قناة الجنازات دى
ماشاء الله الموت ممكن يكون سبب للتربح
متخيلة فرحتهم بحالة الوفاة ان فى شغل جالهم
ولسه ياما هانشوف

shlapia يقول...

سلام عليكم

انتى كده اتكلمتى عن الى انا كنت عايزة اتكلم عنه بس نسيتى حاجة

قصة الشخص الى ارتد عن الاسلام الى عمال يلف على القنوات الفضائية من اول القاهرة اليوم لحد برنامج الحقيقة وائل الابراشى ..بجد انا مش فاهمة هما عايز ايه هوا والمحامى بتاع الاقباط الى عايز يولعها حريقة

عامة كل ما ما الصيف يحتر المشاكل تزيد معاه بحس ان الشتا اهدى بكتيييييييييييير من الصيف وده لان الدراسة والبرد الى بيخلى الناس تنام بدرى والجو الى بيخلى كل واحد متفوفع جوه بيته

يارب تعدى شهور الصيف الى جاية على خير ونرجع بقى للشتا الى بحبه

شكرا

عصفور المدينة يقول...

كان هذا هو الموجز وإليكم الأنباء بالتفصيل

مش قادر أكمل حران
بس صحيح إيه حكاية البلكونات دي
عايزين أكشن كله بلكونات

ض/خالد يقول...

يا دكتورة
متشتغلي في الجزيرة او تكتبي في لساني حالي :)

علاء يقول...

القنوات دي عاملة زي الستات
عايزين جنازة يشبعوا فيها لطم
:)

كراكيب عادل يقول...

موجز هايل استمري علي كدة نرتاح احنا من القنوات ونشوف عندك هنا الاخبار

بس ضحكني موضوع الاعبين دة بتوع الملاليم بجد الموضوع بقي زيادة

دوشونا في كل مكان

جزر يقول...

ايه الجمال ده ولا أكني قاعد قدام الجزيره
:D
عرض مشوق للاحداث وعندك حق
بوست رائع
تحياتي

محمد العدوي يقول...

هو من نعم ربنا أنه قنوات ميلودي ( الخنقة ) من يومها بيذيعوا قرآن ..

الممتع في الامر بقى إني مكنتش اعرف أساسا مين أشرف مروان دا

عموما سيبوا الفضائيات تسترزق .. أهو كله أكل عيش ..

YHYيــوســف الـمصـرى يقول...

اول تعليق هنا
وشكله مش هيكون الاخير ;)
تحياتى

طالب اخوانى يقول...

احنا عايشين فى قنوات قنوات .. وكل قناة عايزة تبقى احسن من باقى القنوات .. فباقى القنوات بتألف علشان تلى بقيت الناس تفتكر انها من احسن القنوات .. لكن للأسف كل دول ميعتبروش قنوات اصلا ..

ذكريات فى جامعة المنصورة

mohand يقول...

السلام عليكم
كان معكم
الدكتوره فضفضه
قناة البصيره
راسكككككككوووووووووووووووووووووووووو


ايه رايك في عقد عمل في قناتي الجديده
البحث عن الحقيقة
تقدمي برنامج علي الناصية
-------------
حسني عبد ربه دا كذاب
شويه يقول انا مضيت وشويه يقول انا مرتاح للاهلي
وشويه يقول انا فدا الاسماعيلي
اهو كله بيلعب شطرنج
-----------------
قناة الجنازات دي تعليق مناجاة عليها فكرني بفيلم اسماعيل ياسين لما كان حانوتي
------------------
وانتي عامله ايه دلوقت؟

Ma-3lina يقول...

اه يا دماغى

ليه كدا يا دكترة مكنا كويسين و قصص حلوة و الحياة بيس
ليه تقلبى المواجع و بعدين فين النشرة الفنية؟؟

ازاى تنسى اهل الفن


بالنسبة لمروان فانا باطالب ان لندن تركب بلكونات عدلة باه


تحاتى

Hadota يقول...

انتى كده تغيرى اسم المدونة وتعمليها خمسة موجز انباء
حلوة اوى الحكاية دى والله
عموما هوا البوست لذيذ
وبعدين ياستى موضوع الحر دا محدش شارب ناره غير اللى بيخرج وبيشتغل
انا معرفش انتى ظروفك ايه بس انا اعرف انك لسه واخدة الاجازة
اسالينى انا بقى الشمس بتبقى عاملة ازاى الساعة 3 الظهر وانتى ماشية فى الشارع مفيش حتة ظل واحدة

وكمان وراكى مذاكرة وتحصييل علم وامتحانات وقرف
اروح انتحر انا بقى ولاايه
احمدى ربنا قضا اخف من قضى
انتى بقالك كتير مختفية عنى
شكلك خاصمتينى ولايه
مش قولتى انك هتيجى كتير؟؟

ارجو منذيعش خبر اختفائك فى النشرة اللى جاية
وعلى فكرة انتى المفروض تبدئى بالاخبار وتنتهى بالنشرة الجوية مش العكس يا توتة
طولت عليكى معلش تحياتتتى

بيسوو يقول...

عن نفسي انا مبقتش اصدع خلاص..تقدري تقولي بقت عندي مناعة او بقيت جبلة..ايهم اقرب
قناة جنازات: مصائب قوم عند قوم فوائد
تفتكري التهييس ده كله من موجة الحر الي انقشعت الى طريق السلامة ياشربات

مدونتك لظيظة قوي قوي

SoRsaRaa يقول...

السلااااام عليييييكم

فضفوووضة ايه يابنتى دا كله.. انا علقت على التاجات بتاعتك الاول وبعدين قلت اشوف اخر بوست ليكى

ايه الهنا دا كله

احسن حاجة اروح ارمى نفسى من فوق السجادة

لولا بس فرحتى بالاهليييي

ياللا تتعوض وتلاقو خبر انتحار بااقراص ريد قريبا:D

سلاااااااام ياعسولى

محمود الدوح يقول...

يارب متحماش
يارب

انا نفسى اذيع مراسم الدفن على قناة ميلودى الفضائية
ويقرولى قرأن على مزيكا

شاب نفسه يحقق حلمه يقول...

بحس في معظم القنوات انهم زي معظم الستات بيفرحو في المصايب
هههههههههههههه

break يقول...

علفكرة اناكنت مسكة صحبتى النهردة احكيلها ف حوادث حوادث
مصدقت احلة الكسل الرهيبة راحت منعندى بئا والجو فك شوية وبئت هيصة
انا حسيت انى دلوقتى بتفرج على قناة الجزيرة
لا بجد سردك ممتع
وحكاية قناة الجنازات دى مسخرة

تحياتى

احمد رفعت يقول...

والله العظيم انا لما بشوف التلفزيون بأكتئب .

بصى خلينا في روتانا سينما مش هتقدر تغمض عينيك

omar مشروع بطل يقول...

ايه نشرة الاخبار دى؟؟؟؟؟
هو احنا ناقصين ؟
ده احنا بنهرب من اخبار النكد دى ونروح على النت تقومى انتى تفكرينا بالواقع الاليم

اسلوبك حلو.. دى اول مرة ازورك فيها .. وان شاء الله تتكرر ,ومستنى زيارتك انتى كمان بقى

خمسة فضفضة يقول...

السلام عليكم ورحمة الله وبركاته

مناجاه

اهلا بيك ، ايه النور دا كله

في ناس ممكن يحولوا اي حاجه الي بيزنس يجيبوا منه فلوس حتي لو الموت نفسه

تحياتي

خمسة فضفضة يقول...

السلام عليكم ورحمة الله وبركاته

شلبيه
اهلا وسهلا بك

والله يا اختشي الفضائيات دي ما بتصدق تلاقي اي حاجه وتعمل منها ميت حكايه وحكايه ..ناس فاضيه

انا بقي عكس تماما بحب الصيف جدا ، الصيف فيه حركه ونشاط وتجدد
اما الشتاء فسكون وكسل وركود
ومهما حصل في الصيف بحبه


تحياتي يا قمر

خمسة فضفضة يقول...

السلام عليكم ورحمة الله وبركاته

باشمهندس عصفور
تقريبا الناس بتبقي حرانه فابتلع تقف في البلاكونات ،وبعدين يبصوا يلاقوا نفسهم علي الارض .....ازاااااااااااااي الله لعلم

خمسة فضفضة يقول...

السلام عليكم ورحمةالله وبركاته

د/ خالد

عندك واسطه .ههه

خمسة فضفضة يقول...

السلام عليكم ورحمة الله وبركاته

علاء

ليه التخبيط في الحلل بقيييييييييييييييي


ايه جاب الفضائيات للستات

خمسة فضفضة يقول...

السلام عليكم ورحمة الله وبركاته

الفنان عادل

وحياتك انت مايسوا حتي ملاليم
ممكن تقول سحاتيت

خمسة فضفضة يقول...

السلام عليكم ورحمة الله وبركاته
جزر

لا دي مش الجزيره ...دي فضفضه تي في ...هههه

شكرا علي ذوقك انت نورتني وياريت تكرر الزياره دايما

خمسة فضفضة يقول...

السلام عليكم ورحمة الله وبركاته

د/ محمد العدوي

للاسف ميلودي رجعت تاني تصدع لنا دماغنا


ولا انا والله كنت اعرفه ، بس قاعده يوم الاربع قدام 90 دقيقه لقيتهم بيقولوا اشرف مروان جراله اللي جراله ، قمت فتحت النت اشوف مين اشرف مروان ده

نورتني

خمسة فضفضة يقول...

السلام عليكم ورحمة الله وبركاته


يوسف المصري

ياويلكم ياويلكم

نزلت اهلا وحللت سهلا

يارب اشوفك هنا دايما

خمسة فضفضة يقول...

السلام عليكم ورحمة الله وبركاته

طالب اخواني

اهلا وسهلا بيك نورت المدونة

كلام صح 100 %
للاسف كل القنوات الفضائيه دي لا ترقي لمستوي اقل قناة فضائيه اجنبيه
تحس ان كلهم عايشين علي النميمه وفبركة الاخبار

خمسة فضفضة يقول...

السلام عليكم ورحمة الله وبركاته

مهند

لا يا اقدم الاخبار يابلاش

----------
كلهم كذابين بس علشان يغاوا سعرهم في السوق يقولوا دا الاهلي عاروزني لا دا الزمالك بيجري ورايا

عموما عبد ربه خلاص رسميا في الاهلي الدور والباقي علي كبير الهجاصين بشير التابعي

-------------

اه انت واخد بالك اكيد اسماعيل ياسين هايبقي رئيس القناة
-----------
الحمد لله كويسه ..انت عامل ايه

تخيل البنت اللي كانت هاتيجي اول سبعه ماجتش وانا لسه في نفس الدوامه

ادعيلي

خمسة فضفضة يقول...

السلام عليكم ورحمة الله وبركاته

د/ مرام

اضم صوتي لصوتك ، واطالب بارسال خبير من الامم المتحده للاشراف علي بناء بلاكونات لندن


نورتيني

خمسة فضفضة يقول...

السلام عليكم ورحمة الله وبركاته

هادوتا

الله يكون في عون كل اللي بتضطره ظروفه ان يخر في الحر الفظيع ده
الحمد لله الواحد حتي لو في الصيدليه بيبقي فيه مروحه وبابين مفتوحين علي الاخر

الله يكون في عون اللي بيشتغلوا اوت دور في الشوارع والمواقع

الحمد لله انك اخدتي الاجازه ربنا يجعلها اجازه سعيده ان شاء الله

ان شاء الله هاجيلك كتيررررررررر اوي بس انا تقريبا اليومين اللي فاتوا ماقعدتش علي النت ساعه علي بعضها ، كانت تخاطيف كده

ماتقلقيش عمري ماهاسيبكم ان شاء الله


تحياتي يا قمر

خمسة فضفضة يقول...

السلام عليكم ورحمة الله وبركاته

بيسوو

من كتر المصايب اللي بتحصل في العالم كلنا خلاص خدنا مناعه ماعدش حاجه بتاثر ...هههههه

اعتقد انه بسبب الحر اكيد ..ماتقلقيش بكره ارجع لعقلي ...هههه

شكرا علي ذوقك انت الظ ... الظ ....الظ ...بكتييرررررررررررررررر

خمسة فضفضة يقول...

السلام عليكم ورحمة الله وبركاته

صورصاره

ساااااااااره عندنا يامرحبا يامرحبا
اتابي المدونه نورها زايد

انتحار ايه وبتاع ايه لا ياصورصاره يابنتي اعقلي احنا عاوزينك

الف مبروك للاهلي

وتحياتي ليكي يا قمر

خمسة فضفضة يقول...

السلام عليكم ورحمة الله وبركاته

محمود الدوح

ايوه وحياتك ادعي كمان بقلب جامد كده ، احسن الصيف شكله جاي شادد حيله علينا

نورتني

خمسة فضفضة يقول...

السلام عليكم ورحمة الله وبركاته

شاب نفسه يجقق حلمه

حتي انت يابروتس

يااخوانا ايش دخل الستات في الفضائيات
دا حتي معظم البرامج اللي نازله لت وعجن في الموضوع اللي بيقدموها رجاله

خمسة فضفضة يقول...

السلام عليكم ورحمة الله وبركاته

بريك

الحمد لله انه فك وخلاص الجو بدا يحلو شويه

شكرا علي ذوقك وتحرمينيش من تعليقاتك الجميله

خمسة فضفضة يقول...

السلام عليكم ورحمة الله وبركاته

احمد رفعت

خلاص ايه رايك نمشيها راديو ..هههه

ولا نروح دريم وايدك والرموت كنترول

خمسة فضفضة يقول...

السلام عليكم ورحمة الله وبركاته

مشروع بطل

معلش استحملني ، حبت تهييس من الحر

شكرا علي ذوقك ونورت المدونه ، وان شاء الله استني زيارتي


نحياتي

BinO يقول...

هو فعلاً حرارة الجو كانت غير عادية
عشان كده بنقول أن التكييف من أهم أختراعات هذا العصر
بالنسبة للأخبار كله شبه بعضه وهو ده الغريب
:)
سلامو عليكو

إنـســانـة يقول...

لالالالالالا مش بصدع منك يا دكتورة

كملى كملى

يا مراكبي يقول...

دي مابقتش خمسة فضفضة .. دي بقت خمسين فضفضة

بس أحلى حاجة هي الإختصار .. يعني خمسين مصيبة ومشكلة بس .. مش كتير

إبقي تعالي مرة الكويت في أغسطس لما تعدي درجة الحرارة ال52 مئوية وإنتي هتقولي أحلى كلام

Hadota يقول...

لالا انا مخدتش اجازة
انا اصلا اتخرجت وباخد كورس الزامى كل يوم
يعنى انا شربت نار الصيف دى كلها
:(

david santos يقول...

Hello, my friend! This day 8 I go for Africa. I go I stop next to abandoned children. When I to arrive, in October, go to visit you. I take you in my heart. Until always

David Santos

خمسة فضفضة يقول...

السلام عليكم ورحمة الله وبركاته

باشمهندس بينو

فعلا التكييف اهم اختراع علشان كده لما بدخل البيت مش ببقي عاوزه اخرج تاني ، ياريته يبقي تكييف مركزي في كل حته حتي الشوارع

خمسة فضفضة يقول...

السلام عليكم ورحمة الله وبركاته

إنسانه

يعني كده ....انت اللي جبته لنفسك ..استحملي بقي ....ههههههه

نورتيني يا قمر

خمسة فضفضة يقول...

السلام عليكم ورحمة الله وبركاته

باشمهندس احمد

معلش استحملوني ، امال يعني افضفض مع مين ..هههه

الله يكون في عونكم في الحر الفظيع ده
بس ارجع واقول ان التكييف هناك في كل حته من اول البيت لحد سوق الخضار
احنا هنا يادوب في البيت والعربيه وبعد كده كل سنة وانت طيب

تحياتي لحضرتك

خمسة فضفضة يقول...

السلام عليكم ورحمة الله وبركاته

هادوتا


الحر ده كان بيخليني ايام الدراسه مش عارفه اركز ولا احصل اي حاجه ....الله يكون في عونك

خمسة فضفضة يقول...

david santos

تروح وترجع بالسلامه ، افريقيا هاتنور

see you in October

أحمد سلامة يقول...

يا ساتر
ايه الاخبار المتعبة دي كلها يا دوك
طب مفيش اي حاجة كده تفتح النفس عالماشي
ده حتى كفاية الحر
يالله
نصيب
بس سيبك انتي قناة الجنازات دي شكلها هتبقى حكاية
ويجيبو ناس بقى متخصصة في الصويت وحركات كده
ربنا كون في العون
معلش بقى متاخر عليكي كتير
امتحانات بقى
:)

محمود ماجد يقول...

واحدة جديدة جت النهارده اهي ، على فكرة انا بحب موجة الحر على عكس كل الناس ،

لأن البحر فيها عندنا في اسكندرية بيكون اكثر ازرقاقاً ، وبيكون اكثر هدوءً ، وصيد السمك بيكون افضل بكتير اوي في الظروف دي

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

القرآن الكريم