TvQuran

٢٠٠٧-١٢-٠٦

خبروني يا عصافير الدار


خبروني يا عصافير الدار بهاك البنيه اللي عاشقه

شو صار

بعدها بتسقيكم بايدها ميه وبعدكم بتخبروها اخبار

جالنا "زوجي وانا " هدية عبارة عن زوج من عصافير زينة ، بصراحه شكلهم تحفه سبحان الخلاق العظيم

قررت اني لازم اتعامل معاهم زي ما الكتاب بيقول و قلت اشوف الناس في اوروبا والدول المتقدمه بتعمل ايه في المواقف اللي زي دي

في الاول دورت علي اصل النوع ده من العصافير (ماهو مش معقول ماعرفش اصلهم وفصلهم ايه ) لقيت انهم يقربوا للبغبغان الغلباوي ابو نص لسان من بعيد
ممكن نقول انها بتتبع ال unrelated small parrot species


وبعدين فتحت كام موقع كده بيتكلم عن عصافير الزينه ووطرق تربيتها ، لقيتهم بيقولوا ايه :
ان المفروض الواحد علشان ينوي انه يقتني حاجه زي كده لازم يعرف عنها الاول كل حاجه من اول نوعها وكيفية العناية بيها و يحضرلها كل الحاجات المطلوبه
من قفص محترم واكل درجة اولي (واوعي حد يفتكر انه ممكن يستعبط العصافير دي في الاكل لان الاكل اللي مش هايعجبها هاترميه في وشك ولا مؤاخذه )
ولِعَب من احسن نوع ، ايون
لِعَب علشان طبعا ماتزهقش وتمل من كتر القعده جوا القفص او يجيلها اكتئاب لا سمح الله وخدوا بالكوا تكون اللعب من النوع الآمن علي الطيور ، يعني سيبكوا من المسدسات والبنادق والحاجات الخِطره دي

وبعد كده لازم أزور البيطري ( ومش اي بيطري لازما ولابد يكون متخصص طيور وبالذات عصافير زينه من فصيلة البغبغانات ) وأحدد معاه مواعيد ثابته للزياره علشان أتطمن علي صحتهم كل فتره قبل ماأتعامل معاهم ويكون عندهم انفلونزا الطيور وتقع الفاس في الراس واروح شهيدة عصفورين
وان المفروض كمان أعزلهم عن اي طيور تانيه في البيت مدة 30 يوم علي الاقل لان بعض الطيور بتبقي حامله للامراض ومش بيبان عليها


و الاهم من كل اللي فات ده انك علشان تحافظ علي عصافيرك لازم تديها كتير من الحب والحنان وتلعب معاها يوميا واياك انك تتجاهلها علشان ما تملش وتظهر عندها مشاكل سلوكيه زي انها تتنرفز واعصابها تفلت منها وتبدأ تصرخ او ريشها يقع لا قدر الله
وخليكوا فاكرين ، العصفور السعيد عصفور سليم

تخيلوا كل ده علشان عصفورين ، طيب وجع قلب بوجع قلب ما الواحد يربي بط و فراخ احسن

افتكرت الأشاعه اللي طلعت السنه اللي فاتت مع هوجة انفلونزا الطيور :
ان الحكومة طلعت بيان ان اي كل واحد عنده عصافير للزينة هايدفع غرامه عشرة آلاف جنيه وها يتسجن لمدة بتتراوح ما بين ثلاثة وستة أشهر

المهم اني مش ناويه اقعدهم في البيت كتير مش علشان كده ، بس لان صعبان عليّ شكلهم جدا وهما محبوسين في القفص ، وكل ماقول لحد هو احنا بنستفيد ايه يعني من حبستهم دي يقولي يابنتي النوع ده من العصافير اتخلق علشان كده

لأ اللي اعرفه ان ربنا خلقهم احرار فوق في السما

"الم يروا الى الطير مسخرات في جو السماء ما يمسكهن الا الله ان في ذلك لايات لقوم يؤمنون" صدق الله العظيم

واللي مضايقني اكتر اني حسيت ان الاكل مش عاجبهم وبيبعتروه حوالين القفص ( بس هو ده النوع اللي متوفر عند بتاع العصافير ، استورد لهم اكل يعني
و من يومين لاحظت ان ريشهم بيقع ......تبقي خيبه لو جالهم اكتئاب منا اصلي مش معبراهم ولا بلعب معاهم خالص ( هو انا فاضيالهم ) ومش جيبالهم لعب كمان ( قلبي حجر مش كده )
ماهو لو اعرف اللعب بتاع العصافير بتيجي منين كنت جبت ، حد يقولي وانا هاجيب علي طول

كل ماقول لزوجي نديهم لاي حد ( واهو الواد سمسم ابن اخويا هايموت عليهم )، يوقولي لأ دول هدية ماينفعش ، وافقت اني اخليهم في البيت مؤقتا لحد ما اسربهم في اقرب فرصه
فكرت اني اسميهم اسمين آخر دلع كده لحد ما ربنا يسهل واخلص منهم
ايه رايكم في
زيكاس وبيكي

دي صورهم قمرين مش كده ( تصوير اديا وحياة عنيا )

اضغطوا علي الصوره علشان تشفوها بالحجم الطبيعي


82 comments:

حل وسط يقول...

احمدي ربنا انهم عصافير
اهي حاجة حلوة وتشرح القلب
انا مره جابولي سلحفاة
وكنت اقعد افرم لها الخيار واقطع لها الخس
وما كملتش في البيت اسبوع وبعدين سربتها
مش لما ناكل نفسنا الاول
تحياتي

خمسة فضفضة يقول...

السلام عليكم ورحمة الله وبركاته

لولا الملامه

اهلا وسهلا بكِ، نورتي عالم التدوين بحاله

عارفه زمان اوي كان عندي سلحفه بس ماتت ، ماكانتش بترضي تاكل بعد ما بعدناها عن السلحفه الذكر اللي كانت معاها لحد ما ماتت.....الله يرحمها
:-D


ماقلتليش رايك ايه في الاسامي

Unknown يقول...

عارفة يا دكتورة
عصافير الزينة مشكلتهم الوحيدة في انك تسيبيهم إن الصقر بياكلهم
ده كلام واحد صاحبي بتاع طيور
المهم يتربوا في عزك يادكتورة، وخللي الهدية، والله، الناس لسة عندهم ذوق، وادب في الحاجات دي

فداء غاوي حيوانات بشكل غريب

مرة لقى كلب في الشارع مجروح، راح جابله القطن والشاش وقعد يعالجه ييجي اسبوع
وبقى هو والكلب صحاب
وبعدين أنا راجع في يوم لقيته قاعد على باب البيت ولامم اصحابه، وانا الحقيقة مش صحاب أنا والكلاب
جيت أدخل لقيت الواد بيقول للكلب .. هاتو..

هاتو؟؟
انا طبعا لزقت في الحيط، قلتله مش انا زي ابوك يا فداء
قللي لالالا .. ده هزار.. صبح صبح يا عم الحاج

يا دكتورة .. ربو كلب كمان الله يخليكي

Unknown يقول...

دكتورة قبل ما أنسى
انا اسف اني اضطريت ابعت المقال على الايميل.. والله أنا مش بحب ابعت للناس على ايميلاتهم .. فأرجو المعذرة
بس قلت يمكن المقال تكمل الحكي اللي كان على موضوع هوندا
فأرجو قبول عذري ..

mohand يقول...

السلام عليكم

انا لسه مقريتش بس قولت اعلق بسرعه
عشان همشي

وبستاذنك لو ممكن انشر التعليق
لاني مش هعرف اكتبه في البوست كتحديث

قولتي ايه؟

ويا ريت طلب صغير
العصافير دي لما تجيبلك عصفورين صوغننين
ابقي خليلي واحد

خمسة فضفضة يقول...

السلام عليكم ورحمة الله وبركاته

ابو فداء


عندك حق الناس اللي جابولنا العصافير ناس محترمين وذوق اوي ومع ان علاقتنا بيهم ماتتعداش انهم زباين في الصيدليه عندنا بس كل شويه يجيبولنا هديه من غير سبب
بس احنا برضو بنردها ،ماتفتكرش اننا بخلا ....:-D

وانا ماكنتش هاسيبهم ولا حاجه انا كنت هاديهم لحد تاني يكون بيستفيد بيهم اكتر مني ويقدر انه يعتني بيهم اكتر
دا انا جيت انهارده لاقيتهم كاشين ياعيني من السقعه والهوا الشديد اللي كان طول اليوم ، صعبو عليا جدا بس انا خارجه من الصبح ومارجعتش الا المغرب هاعمل ايه بقي


----------
فداء عمل فيك كده ، ههههههههه ، الله يسامحه هو ماقراش البوست اللي الكلاب جريت فيه وراك ولا ايه
اكيد من يوميها وانت لو لقيت كلب في اي شارع تعدي من شارع تاني
وعاوزني اربي كلب....عاااااااااااااا
بقي انا باخاف من القطه اربي كلب ....حراااااااااااااام عليك
دا انا بموت في جلدي من الكلاب
:-D

-----------------
مافيش اسف ولا حاجه ، دا انا اللي بتاسف لك اني تعبتك وخليتك تبعته بس دا من عشمي والله ، متشكره جدا جدا


تحياتي

خمسة فضفضة يقول...

السلام عليكم ورحمة الله وبركاته

مهند

هاتمشي تروح فين يا حاج البلد دي احسن من غيرها ...ههههه
خليك هنا خليك

طيب ايه رايك طالما عاجبينك كده ابعتهملك وحلال عليك العصفورين الكبار والصغيرين

--------
خلاص اوك انشره بس ابقي شيل الحته الاخيره دي وربنا يسهل وابعتلك الشرح بالصور تنزله في البوست

تحياتي

šσяšαяαα يقول...

السلاااااااام عليكمممم

ياسلاااااام على الناس اللى بتعز فيروز وتفتكرها اول ماربنا يكرمهم بجوز عصافير ملونين مبسوطين وفرحانين:))

شكلهم حلو اوى يافضفوضة ممكن يتعملو جنب صنية بطاطس فى الفرن

واللا اقلك حرام ايه القسوة اللى انا فيها دى.. بس اعمل ايه شكلهم يفتح الشهية:))

احنا هنا بنربى حمام ومش عاوزة اقلك مش بطيقهم لانهم بيغلسو لما يكون الباب مفتوح ويدخلو لا وكمان يتنكو ويقعدوا جوا الفتحات اللى فى المكتبه

خلاص خللونى محبوسة ومش عارفه افتح الباب شوية

بس بصراحة بحبهم برضو عشان اول مابيشوفونى طالعة بالاكل بيتجمعو زى الشطار ويستنوا لما ارميه
مش عارفه انا بيعرفو ان اللى فإيدى اكلهم ازاى.. سبحان الله

هما برضو طيور بس اصيلة بصراحة بتطير براحتها وبترجع اخر اليوم

انما لو طيرتى عصافيرك هيقولو يافكيييييك ويمكن يسيبو مصر كلها:))

بس شكلهم عسول بجد ماشاءالله

ربنا يخلليهم ويجيبو عصافير وعصفورات وتفتحيلهم بعدها جناح فى البيت يكون اوسع مالقفص دا

وسلام بقى انا رغيت اوى:))

Unknown يقول...

السلام عليكم يادكتوره
سبحان الخلاق فيما خلق
كان الاستاذ عمرو خالد بيتكلم عن اسم الله البديع سبحانه وتعالي يبدع في خلقه كما يشاء
وفي الاف الانواع من الطيور والعصافير ايه في الجمال
وان حضرتك متحبسيهمش ان معاكي الحجات دي بالذات تنطلق في ملكوت الله العلي القدير
وجزاكم الله خير

عصفور المدينة يقول...

نفس قصتنا مع السمك والذي ننتظر انتهاؤه بعد أن أصبح عبئا في رعايته

خمسة فضفضة يقول...

السلام عليكم ورحمة الله وبركاته

صرصارتي
ازيك ياعسوله
بقي عاوزه تعملي صنية بطاطس علي العصافير
ماشي ياحاجه ابعتهلك علي الميل بتاعك ولا علي البلوج ، انت تامري بس واحنا ننفز
هههههههههههههه
مين بقي عندكم اللي غاوي تربية حمام ، اصل الحمام ده بيبقي ادمان وممكن اللي بيربيه يجراله حاجه لو حمامه واحده بس لاقدر الله تعبت
تخيلي بيجولي الصيدليه ياخدوا كبسولات مضاد حيوي واقراص كالسيوم للحمام
بس عموما تربية الحمام برضو مش وحشه اقله الواحد يضمن اكلة حمام مشوي معتبره كل فتره
:-D

نورتيني يا ساااااااااااره و ماتغيبيش عليا تاني


سلام

خمسة فضفضة يقول...

السلام عليكم ورحمة الله وبركاته

الفاتح الجعفري
الواحد دايما بيقف ادام قدرة الله وابداعه في خلقه عاجز ومايقدرش الا انه يقول سبحان الله بديع السماوات والارض

انت كمان رايك زي رايي ان المفروض يبقوا طايرين في السما مش محبوسين في قفص
بس الدكتور احمد بيقول ان ممكن صقر ياكلهم
مش عارفه عموما علشان اخلص نفسي من المسؤليه لاني مش فاضيالهم هاشوف اي حد غاوي واديهم له

نورتني

خمسة فضفضة يقول...

السلام عليكم ورحمة الله وبركاته

باشمهندس عصفور المدينة

دا مش انا لوحدي بقي، دا اتضح انها مشكله عامه

طيب معلش اصل فهمي علي ادي
هو حضرتك منتظر انتهاؤه ازاي يعني
هايموت ولا بتاكلو :-D

منورني دايما

الفقيرة إلى الله أم البنات يقول...

السلام عليكم ورحمة الله وبركاته
موضوع العصافير ده شاق ويحتاج نظافه وساعات بيعملوا دوشه جامده
المهم حكايه صغيرة كده عن العصافير
اخويا كان بيربى عصافير ...وكانوا بيفرخوا عصافير صغيرة
المهم اخويا فى يوم جاب انثى جديده
وحطها مع القديمه!!!!
دخلت يوم وكان شتا وكان حاططهم فى السفره..بيخاف عليهم من البرد
سمعت دوشه وصريخ عصافيرى وبهدله
قلت لهم هش كانوا بيخافوا منى علشان كنت لما ادخل ارسم يقعدوا يعملوا دوشه فاااقول لهم هس يسكتوا
مرديوش يسكتوا قمت علشان اخبط على القفص لانهم زودوها
لقيت ايه...؟
لقيت الانثى الجديده...مفصولة الرأس والقديمه واقفه منتصره
والباشا محل النزاع واقف آخر القفص بيرتعش



كلمة سمعتها من شيخ...مش متذكرة إسمه
قال مكروه تربيه العصافير والقطط وصرف المال عليهم وهناك فقراء المسلمين
يحتاجون كل مليم

Unknown يقول...

بصي ياسيتي العصافير اللي من النوع ده مش بتعرف انها تطير كويس اصلا, لأنها مولوده في الأسر واتربت فيه

حتي انتي لو طلعتيها في البيت هتطير حبه صغيرين وهتقع تاني

بالنسبه للعب بتبقي زي مورجيحه وحاجات كده ودي بتباع عند بتاع العصافير

عادب انهم يوقعو الأكل وهم بياكلو لأنهم بيدورو فيه برجليهم فعادي انه يقع

الريش بيقع عادي طالما مش كتير تبقي مش حاله مرضيه ماتقلقيش يعني

واستمتعي بصوتهم وجمال شكلهم بدل مانتي شايله همهم
(:

موجة يقول...

العصافير شيء جميل جدا
و اهتمامك بيها بيكشف رقتك طبعا على كائنات غلبانة
و رهافة حس فاكيد وجودها في البيت بعد من أبعاد الجو الرومانسي هههههه
ربنا يسعدك و زوجك
خالص تحياتي

Unknown يقول...

تبارك الخلاق
ياختى كميلة جمال ما شاء الله
فكرتينى بعقدة الطفوله قعدنا نتخانق انا واخويا هو نفسه فى كلب وانا نفسى فى عصافير
ولما فقدت الامل وكبرت شويه ضمنت ان محدش هيزعقلى على عمايلى زى زمان
نزلت اشتريت كتكوت ملون بربع جنيه وسميته وحيد
صراحه مكنش مغلبنى فى الاكل الراجل مكنش بيتامر وكان برضه قايم بوظيفة كلب الحراسه بيمشى ورا اى حد هههههه وقلت لما يكبر شوه اعمل عليه شوربه
الاسمين اللى اختراتيهم عسل على فكره خليهم يا دكتوره بالله عليكى
دول شكرهم يفرح

كراكيب عادل يقول...

افرحي بيهم شوية وبعدين اطلقي سراحهم

بيني وبينك تعب ومحتاج ناس غاوية المواضيع دي طيور الزينة واسماك الزينة

تعب دماغ

هما شكلهم تحفة بجد ويغري انهم يفضلوا

اقولك خليهم

متشكر جداا لزيارتك وشعورك الحلو دة في مدونتي

مهندس مصري بيحب مصر يقول...

انا رأيي من رأيك الحاجات دي عايزة اللي غاويها و الواحد دماغه مش فاضية
ثم دي مسؤلية عن كائن حي بأكله و شربه و نظافته و خلافه
يعني مش حاجة سهلة
أسلم حاجة إنك تسربيهم لواحد غاويهم بس بسرعة قبل ما يفطسوا منك

بنت الصالحين يقول...

ياختى ع السكر
ماشاء الله
سبحانك ياربى فيما ابدعت

انا كمان معاكى فى رايك ده

مش بحب شترى عصافير ولا اربى عصافير ولا اى طير بيتحبس فى قفص

بفكر لو انا مكانهم هحب اتحبس كده
لالالالالالالالالالالالالالالالالالالالالالالالالا

سربيهم سربيهم


ربنا يخليكى وتسربى اهم برده يدعولك
هههههههههههههه


على فكرة تصويرك عسووووووووول

مروة الزارع يقول...

السلام عليكم

مدونتك فعلا رائعة

دى اول زيارة ليكى وان شاء الله مش الاخيرة

ومش عارفة حاسة لية انك حد رقيق جدا

اتمنى نبقى اصحاب

واتمنى تزورينى فى مدونتى الجديدة واسمها سلطة

www.salataa.blogspot.com

اشوفك على خير

الربان يقول...

تحياتي

اولا مبروك علي الهدية الجميلة....ثانيا سأتطرق الي نقطتين من كلامك:

اولا..أنت محقة فقد خلق الله هذه المخلوقات الجميلة حرة...تغرد و تغدو كيفما تشاء و وقتما تشاء ...لكن الانسان بطبعه أناني ...لهذا فهو يحاول جهده أن يستأثر بكل ما هو جميل في الحياة.

ثانيا....كما فعلت انت بالضبط...و نعم ما فعلت انك بحثتي و عرفتي الكثير عن نوع العصافير و كيفية العناية و الرعاية لها. الكثيرين منا لا ينتبهون لهذا....بل ان بعض الازواج لا يكلف نفسه
قراءة كتاب عن سيكولوجية الطفولة او التربية السليمة...او مراحل نمو الجنين
و ذلك قبل أن يقدما علي الإنجاب...و يتركوا الامور للتجربة و المحاولة و الخطأ .

الامر الاخير الذي أحذر منه...أن الاحصائيات أثبتت أن ما نسبته 75 % من الامراض التي قد تصيب الانسان اصلها
من الحيوان و الحشرات و الطيور....
القطط و الكلاب و خلافه ..

تحياتي و أشكرك علي المعلومات التي ذكرتيها عن العصفورين.

أُكتب بالرصاص يقول...

اللي جاب لك ..يخليلك

بورك لك في الموهوب وشكرتي الواهب
وبلغوا اشدهم ورزقتي برهم


حلوين قوي يا خمسة : )

Unknown يقول...

عيب عصافير طيور الحب واللي منها الفيشر اللي عندك ان صوتها مزعج..
صبحان الله شكلها جميل لكن صوتها صريخ وطقطقه
ومفتريين في اكل اللب السوري
بس فعلا متعه اني اقعد ادامهم اتفرج عليهم وخصوصا انهم بيحبوا يعيشوا في جماعات اكتر ما يكونوا كل اتنين في قفص لوحدهم..
متفكرنيش بايام انفلوزنا الطيور كنت حاسس زي تاجر المخدرات الي عنده بضاعه وخايف يتقفش بيها..
وقعدت اتصل بالارقام اللي زاوعها ان حد يرد او حد يجي ياخدهم محصلش..
وبعدين لما رحت لمحل العصافير قلت لنفسي
اذا كنت انا خايف من عصفورين يموتوني المفروض الراجل دا يكون مات وشبع موت وهوه وسط خمستلاف عصفور..
وفي اللحظه دي قررت مخفش واستمريت في تربيتهم بس قللت العدد عشان متعبين..
ربنا يتوب عليها ونقلب سمك زينه بقه :)

موضوع خفيف وجميل

البنت الشلبية يقول...

سبحان الله
شكلهم حلو اوى
بس انا لو مكانك هديهم لسمسم على طول
معنديش خلق للعصافير وكمان مش عايزة اشيل ذنبهم لو اهملتهم غصب عنى
حطيهم جنب الشباك وافتحى القفص واعملى نفسك مش واخدة بالك وهما لما يطيرو قولى لجوزك ده قدرهم بقى
هههههههه
سلام يا دكتورة

truelove يقول...

جميل قوي فكرت تربية العصافير والاجمل اننا نديها حقها جميل قوي الموضوع ده شكلك هتطلعيها في دماغي يادكتور سلامي ليكي

mohand يقول...

السلام عليكم

حبيت اضيف بس حاجه

اسم زيكاس دا عزيز عليا قوي


كلام في سرك
كانوا بيقولوي كده وانا صغير في المدرسة

علي اساس ان اسم والدي شبة الاسم دا قوي

طبعا عرفتي الاسم

هههههههههههههه
تحياتي

max.adams يقول...

وجود حياة صغيرة بريئة في البيت حاجة تشرح القلب وخصوصا لو هم كويسين و قمرات زي بتوعك ربنا يخليهوملك ويباركلك فيهم بس اديهم عناية قد ما تقدري و توكلي على الحي الذي لايموت وبس

تحياتي لك على مدونتك الجميلة

محمد عبد الغفار يقول...

هو ايه اصله ده

انا لو جانى عصفورين هاكلهم

Ma 3lina يقول...

يا عينى على العصفورين كده جبتلهم اكتئاب

مال لو عندك قط زى حالتنا تعملى ايه ؟؟ تطفشى من البلد

هههههههه

ربنا يخليليك العصافير و تفرحى بولدهم ان شاء الله

رينـــــــــــا يقول...

السلام عليكم
كميلين يا فضفوضه اوى ماشاء الله
كان عندى اتنين ولما زهقت فى الاخر اديتهم لنان :D
زهقت هى كمان راحت اديتهم لمامتها :D
ومش عارفه عايشين دلواقتى والا

خمسة فضفضة يقول...

وعليكم السلام ورحمة الله وبركاته

ام البنات
هههههههههه
حلوه اوي الحكاية دي
الستات هما الستات حتي لو كانوا عصافير

الفتوي دي انا مقتنعه بيها جدا
مهو لو كل واحد وجهه فلوسه لعمل الخير او كفالة يتيم مش هاتلاقي فقراء من المسلمين

نورتيني

خمسة فضفضة يقول...

السلام عليكم ورحمة الله وبركاته

اسراء
ايوه ما المرجيحه دي موجوده ، انا بحسب في لعب تانيه
كوره عروسه ...حاجات من دي يعني
:-D


يعني الاعراض دي كلها عاديه مش اكتئاب يعني ، علي ضمانتك ..هههه
خلاص هاخليهم مع ان صوتهم عالي اوي زي مايكونوا بيصرخوا

نورتيني

خمسة فضفضة يقول...

السلام عليكم ورحمة اله وبركاته

موجة
ربنا يخليكِ متشكره اوي علي الكلام الرقيق ده

نورتيني

خمسة فضفضة يقول...

السلام عليكم ورحمة الله وبركاته

لماضة


هو انت من صغرك كده ..لمضه ..ههههههه
الا الكتكوت وحيد ده طيب خليهم اتنين تلاته علشان يكفوا العيله كلها
هههههههههه

كويس ان الاسامي عجبتك و طالما عاجبينك خلاص هاخليهم علشان خاطرك

نورتيني

خمسة فضفضة يقول...

السلام عليكم ورحمة الله وبركاته

كراكيب عادل

مش كده ، آخر تعب دا انا باكنس تحتهم كل خمس دقايق

كده يبقي صوتين بيقولوا خليهم ..هههههه
خلاص هاخليهم

--
العفو يا فنان والف مبروك مره تانيه

تحياتي

خمسة فضفضة يقول...

السلام عليكم ورحمة الله وبركاته

مهندس مصري

والله اللي مخليني مضايقه من وجودهم اني هاتسال عنهم يوم القيامه وهابقي مسؤله عنهم قدام ربنا لو حصلهم حاجه ، عيوا او بردوا او جاعوا او ماتوا لاقدر الله
وده السبب الاول اللي مخليني مش عوزاهم الي جانب التعب في تربيتهم كمان

نورتني

خمسة فضفضة يقول...

السلام عليكم ورحمة الله وبركاته

عاشقة الفردوس

انا لو مكانهم ماقدرش اكمل يوم في الحبس
بس زي ما اسراء قالت دول اتولدوا واتربوا في الاسر ومتعودين علي كده

لا انا هاسربهم لحد غاوي مش هاطيرهم لانهم بيقولوا مش هايعرفوا يطيروا والصقر هاياكلهم

بصي انا بافكر اسيبهم شويه وبعدين اديهم لاي حد

متشكرة علي ذوقك ، واهلا بيك هنا ويارب دايما

تحياتي

خمسة فضفضة يقول...

وعليكم السلام ورحمة الله وبركاته

مروة الزراع

ربنا يخليكي دا من ذوقك
ان شاء الله ازورك هناك بس ابقي حضري الحاجه الساقعه والجاتوه

نورتيني

خمسة فضفضة يقول...

السلام عليكم ورحمة الله وبركاته

الربان

الله يبارك فيك

مش كده ربنا خلقهم احرار يبقي ليه نحبسهم ؟؟

دي عاده فيا اي حاجه جديده اجيبها مهما كانت لازم اعرف عنها كل حاجه واعرف ازاي اتعامل معاها صح
يعني لازم اقرا الكتالوج من الجلده للجلده زي ما بيقولوا

وطالما في الموضوع امراض يبقي نسربهم بقي وامرنا لله ، احنا مش ناقصين
:-D

العفو
نورتني ويارب دايما

خمسة فضفضة يقول...

السلام عليكم ورحمة الله وبركاته
اكتب بالرصاص

الله يبارك فيك

اتفضل ، مايغلوش عليك واوصلهم لك لحد باب المدونه
:-D

نورتني

خمسة فضفضة يقول...

السلام عليكم ورحمة الله وبركاته

ماسك
هما فعلا صوتهم عالي اوي
اكنهم بيصرخوا
وبما انك غاوي كده ايه رايك ابعتهم لك تضمهم للمجموعه اللي عندك

نورتني ويارب دايما

خمسة فضفضة يقول...

السلام عليكم ورحمة الله وبركاته

البنت الشلبية

فعلا شكلهم تحفه سبحان الله ، بس متعبين وبيوسخوا حواليهم وعاوزين عنايه
يمكن اعمل بنصيحتك و فتح القفص
بس انت اللي مسؤله عن العواقب بقي ...هههههههههههه

سلام ياقمر

خمسة فضفضة يقول...

السلام عليكم ورحمة الله وبركاته

truelove
والاجمل والاجمل ان يكون عندنا وقت لده
اقولك ايه رايك ابعتهم لك تبدأي بيهم
:-D

سلام

خمسة فضفضة يقول...

وعليكم السلام ورحمة الله وبركاته

مهند تاني
يا مرحب يامرحب

اسم والدك شبيه باسم زيكس ...مممممم...عروستي

ايه يابني انت شغال اليومين دول في الفوازير ليه ، رمضان عدي من زمان..ههههه
-----

الصور وصلت ولا لأ

خمسة فضفضة يقول...

السلام عليكم ورحمة الله وبركاته

max.adams
مشكلتي اني مش فاضيالهم ، وهما زي ما بتقول محتاجين عنايه
ان شاء الله اشوف حد فاضي وغاوي واديهم له علشان اخلص من ذمبهم

نورتني

خمسة فضفضة يقول...

السلام عليكم ورحمة الله وبركاته

استاذ محمد عبد الغفار
طيب ودول هايكفوا ايه ولا ايه

خمسة فضفضة يقول...

السلام عليكم ورحمة الله وبركاته

د/ مرام
قصد علي جارفيلد ولا فعلا عندك قط بحق وحقيقي
انا بخاف من القطط اوي لانها غداره وبتخربش كمان بتنقل عدوي كتيرهع جدا علي راسها التوكسوبلازما

نورتيني

خمسة فضفضة يقول...

وعليكم السلام ورحمةالله وبركاته

رينا
اتفضلي يا حبيبتي ما يغلوش عليك
ربنا يستر ويكونوا لسه عايشين ماماتوش

نورتيني

مدحت محمد يقول...

العصافير كان بابا وانا صغير جابهم كنت بخاف اجى جنبهم
ابن خالى بقى كل مااروح عنده
اقعد ازعقله عشان بيسيبهم فى البلكونة
اقله حرام يابنى هيموتو من الساقعه
ربنا هيحاسبك عليهم وهو فى الطراوة
المهم انتى ربنا هيجازيكى خير كبير عليهم اوى
لو اهتميتى بيهم
الراحمون يرحمهم الرحمن
ارحمو من فى الارض يرحمكم من فى السماء
اهتمى بيهم وحافظى عليهم
وربنا هيجازيكى خير كبير عليهم
خالص تحياتى

Unknown يقول...

وعلى ايه تكاليف سفر ونقل

انت تبعيهم وتجيبي بتمنهم كيلو لحمه
تعمليه على صنيه بطاطس
وبالهنا و الشفا

mohand يقول...

السلام عليكم

مهند تالت


تم تنزيل البوست حضرتك
وتعالي راجعيه بعد اذنك

تحياتي

Unknown يقول...

دكتورة ايه الأخبار

نورتي التدوينة
لوحضرتك موجودة ردي ع التعليق عشان فيه موضوع سريع عاوزين ناخد رأيك فيه

لحظة يقول...

السلام عليكم
الله يعينك
انا مش باقدر اتعامل مع اي كائنات في البيت
باخاف من المسئولية
ماهي برضه روح
بس العصافير حلوين قوي
مبروكين عليك

Unknown يقول...

هههههههههههههه

معلش ولامواخذة فى السؤال لو فيها إسائة ادب يعنى .. هو مين الرايق اللى بيهادى حد بعصافير اليومين دول؟؟

ده إزازة الزيت بقت ب9 جنيه يا فضفضة .. الناس خلاص حتاكل بعضها ويجعلوا عامر

واقعدوا بالعافية فى مصر
:D

دكتورة سنان يقول...
أزال المؤلف هذا التعليق.
دكتورة سنان يقول...

التعليق اتمسح كنت عاوزه امسح كلمه واحده كتبتها غلط اصل تفتكرى انى محو اميه ولاحاجه..هكتبه تاانى :((
كنت بقول
تصميم البلوج بتاعك عاجبنى اوى
ماشاء الله اللهم لاحسد يعنى
انا معلقتش على البوست ليه ؟ وبعلق على شكل المدونه؟ اكيد بتسألى نفسك السؤال ده او بتستغربى على الاقل
اصل
اصل
اصل انا مبحبش العصافير
مبحبش الطيور خالص
حتى الفراخ
باكلها بس لكن اشوفها لااستحاله ايمبوسيبل
والسبب فيلم اجنبى اسمه الطيور مش عارفه هتعرفيه ولالا كان جه زمان فى برنامج اوسكار بتاع القناه التانيه ده.. بس من ساعتها بترعب منهم

حاسه انى غررريبه اوى وانا بخاف من كائنات حلوه رقيقه كده بس اعمل ايه منه لله اللى كان السبب

Gid-Do - جدو يقول...

العزيزة فضفضة

من بعد تربية اربع كلاب ـ فى مراحل مختلفة من عمرى بين القاهرة وامريكا ـ قررت عدم تربية الحيوانات الاليفة لان بعد فترة تنشأء علاقة عاطفية ما بين الحيوان الاليف وصاحبة وبيبقى واحد من الاسرة عاوز عناية زى اى فرد ودة بيتطلب اجراءات كتيرة خاصة فى الاجازات او السفر وعند وفاة احداها بتبقى حالة حزن مخيمة على كل افراد الاسرة

الكلام دة لاى واحد مجربش يعتبر جنان لكن لمن جرب حيعرف ان كلامى دة واقع خاصة لما يكون الحيوان ـ زى الكلاب ـ درب على الطاعة وبعضها له ذكاء عجيب يجبر صاحبة على الارتباط بيةـ تحياتى

ملحوظة:
ارجو ان محدش يدينى محاضرة ويقولى الكلب نجس ـ لانى عارف ـ ولكنة بالنسبة لى مخلوق من مخلوقات الله يختلف عن الخنزير اللى له حكم صريح فى الدين الاسلامى وشكرا

Omar... [ خروشات ] يقول...

.............................

السلام عليكم ورحمة الله و بركاته

عجبنى حكاية العصافير

احيانا بيعملو للبيت جو

و احيانا بيعملو فى الدماغ زنة

و احيانا بيعملوا للضمير كلكيعه لو جاعو او اتنسوا

و احيانا بيعملوا للمدونيين فكرة جميلة للكتابة


و احيانا بيلاقو نفسهم موضوع للافتاء و التحليل و التحريم، كان فقراء المسلمين يغنيهم استغناءنا عن العصافير وعدم استغنائنا عن الاسباب الحقيقية لفقرهم.
- حاجة غريبة شوية؟ -

بس المؤكد المؤكد انهم مظلومين مع بنى الانسان لانهم ببساطة بيتحرمو من الحرية عشان يعملوا جو زينة فى البيوت


اول مرة بخطى عتبة دارك

و عارف كلامى ممكن ميعجبكيش

بس متاكد انك موش هتحذفى تعليقى من التعليقات

معلشى، استحمللى خروشتى

عمر،
...........................

Dr Emad يقول...

مبرووووك العصافير
بجد حاجه رومنسية جدا جدا جدا
انا بموووت فى حاجتين
العصافير و السمك
بس للاسف الصور مش راضيه تفتح عندى

YHYيــوســف الـمصـرى يقول...

السلام عليكم ورحمة الله وبركاته
............................

عصفير :D
هما بيببقوا لذاذ فى البيت بس بيعملوا صداع الصبح بيفضلو يزقزقوا كده عمال على بطال :D

وحشتنى مدونتك والله يا دكتورة وكل سنة وانتى طيبة وعيد اضحى مبارك ولا بلاش مبارك ... عيد اضحى جمال مبارك :D
هههههههههه
ابقى زورى الساعة ستة !
تحياتى

الـسـيـدة نـون يقول...

انا عندى شوية لعب بتاعة شكشوكة وهو صغير
ومتخافيش كلها لعب امنة وتعليمية كمان
لو تحبى ابعتهملك فاكس
بصراحة كان نفسى افيدك اكتر
بس للاسف انا ماليش فى حكاية تربية الطيور او اى كائن حى
ده انا حتى معرفش انا ربيت شريف التلات سنين ونص اللى فاتوا ازاى

اهه ربك بيستر مع عباده
انا لو منك تسربيهم احسن
اختك خيخة

sakayar يقول...

السلام عليكم ورحمة الله وبركاته
العصافير دي أكتر حاجة بتجنني .. وهيه فرحانة تلاقيها بتصوصو ومش بتبطل هيصة ... وهيه زعلانة تلاقيها برضه بتصوصو ومش بتبطل هيييييصة ... بس والله الواحد بيفتقدهم لما يبعد عنهم
ربنا يخليهوملك ... ولو مش عرفتي تعامليهم ازاي ابقي اسألي أخونا عصفور المدينة أكيد له في الليلة ههههه
أعزكم الله

Unknown يقول...

الصور مش واضحه للأسف
انا من صغري محظوظ
ربينا عصافير زينه
و ربينا حوضين سمك
و كان في قطه بتزورنا من حين لحين
اتهى السمك بفيرس امات كل السمك من حوض من اثنين
و الثاني بعناه
و العصافير انهت بأن احد الزوجين كل شويه يهرب ما بين سلوك القفص نضيق السلوك و نجيب مكانه اللي يجي يهرب برضه و ده قاعد و تالت يهرب برضه و ده قاعد شكله كان كله بيطفش من الحياه معاه فبعناه

Coca يقول...

طيب انا جالي سمكتين زينه من يومين لسا ملحقتش اهتم بيهم اصلا هتخليني اسربهم هما كمان
بس انا بقالي يومين اعده ببص عليهم بيعيشوا ازاي مع بعض
بس الغريبه ان لقيت السمكه الذكر اللي فيهم عليه تناحه وبيعاكس السمكه الانثي قلت ياربي حتي في السمك ناس رخمه كدا
بس انتي قرار صح
مدونه جميله
تحياتي

خمسة فضفضة يقول...

السلام عليكم ورحمة الله وبركاته

ضحي
اهو انا كل اللي خايفه منه اني هاتحاسب عليهم لو جرالهم حاجه ، وبما اني مش فضيالهم قلت اشوف حد فاضي وغاوي يشيل الليله عني

نورتنيني

خمسة فضفضة يقول...

السلام عليكم ورحمة الله وبركاته
ماسك
هههههههه
ماشي يعني بترفض الهديه ، دا نا قلت خلاص لقيت اللي هايتولاهم بالنيابه عني

خمسة فضفضة يقول...

السلام عليكم ورحمة الله وبركاته

مهند
منور تاني وتالت ورابع
ايوه رحت شفته حلو اوي تسلم اديك

خمسة فضفضة يقول...

السلام عليكم ورحمة اله وبركاته

يوميات عيل مصري
التدوينه منوره باهلها

معلش ياابو فداء ماكنتش موجوده انا آسفه والله لو فيه حاجه ابعتلي ميل

تحياتي

خمسة فضفضة يقول...

وعليكم السلام ورحمة الله وبركاته

لحظة
الله يبارك فيكي ، انا كمان خايفه من المسؤليه والحساب يوم القيامه

نورتيني ويارب دايما

خمسة فضفضة يقول...

السلام عليكم ورحمة الله وبركاته

ياسمين الانسانه

ههههههههه
اه تخيلي يا ياسمين رحت اجيب ازازة زيت 3 كيلو لقيتها ب26 جنيه والله اتخضيت ، اصلي كان بقالي كتير مشتريتوهوش كان عندي من ايام ماكانت ب 21 جنيه

بس عارفه هوه فعلا واحد رايق راح قبل كده عمره لقيناه جايب لنا كل واحد ازازة برفان مش زي الناس اللي بيجيبوا سبحه ومصليه ههههههه

الله يعافيكي يا حبيبتي ما انتي قاعده، البلد دي احسن من غيرها
ويجعلو عامر

خمسة فضفضة يقول...

السلام عليكم ورحمة الله وبركاته

نوسه
ولا يهمك ، والغلطات الاملائيه دي بتبقي كتير بسبب السرعه في الكتابه علي الكيبورد

متشكره اوي علي ذوقك ربنا يخليكي

ايوه فاكره الفيلم ده كنت بترعب منه ، بس للدرجه دي ماثر فيكي ولحد دلوقتي مخليكي تخافي من الطيور عموما ، سبحان الله

عموما ماغريب الا الشيطان فيه ناس كتير مش بتحب الطيور زيك بالظبط

نورتيني

خمسة فضفضة يقول...

السلام عليكم ورحمة الله وبركاته

جدو الجميل
والله مش عارفه اوصف سعادتي لما لقيت تعليقك ربنا يديك الصحه

فاهمه كويس اوي كلامك عن ارتباط بعض الناس بالحيوانات الاليفه بتاعتهم لدرجه توصلهم انهم يحبوها ويعاملهوا زي مايكنوا افراد من العيله
خصوصا عند حضرتك في امريكا الحيوان الاليف ده اساسي في كل اسره زي مابنشوف في الافلام وازاي معاملتهم ليه بتبقي احسن من معاملتنا هنا لاطفال الشوارع

اكيد حضرتك سمعت عن رفض استراليا السنه دي انها تصدر خرفان لمصر علي عيد الاضحي علشان بيعاملوها معامله مش كويسه قبل الدبح

ربنا يحليك وتربي
وكل سنة وانت طيب

دايما منورني

خمسة فضفضة يقول...

وعليكم السلام ورحمة الله وبركاته

عمر

يا الف مرحب ويا خطوه عزيزه ، اتاري المجونه نورت
وماتقلقش مش بامسح تعليقات الا اذا خرجت عن حدود الادب ، بس هنا بقي فضفض ( مش خروش ) براحتك وقول كل اللي في قلبك
ماهي اسمها خمسه فضفضة
:-D
----
اه بيعملوا احلي زنه
عمالوهالي لما رجعت الخميس اللي فات يوم ما كان فيه هوا شديد وبرد
لقيتهم كشين في قاع القفص ويحسسوا اللي يشوفهم انهم خلاص هايتجمدوا من البرد

بالنسبه للقتوي انا سمعت عنها ، بس لو فكرنا فيها هانلاقي فيها بعض المنطق ، لان فيه انواع من العصافير النادره اللي بيوصل تمنها لمبالغ كبيره ممكن لو صاحبها اتبرع بيها للفقرا يبقي احسن
وانا بعمل بحث علي تربية العصافير دخلت منتديات كامله عن العصافير وفيها ناس حاطين صور لعصافيرهم مش قادره اوصفلك الكميه ولا الانواع المختلفه ولا شكل القفص
لدرجة ان واحد كان عامل قفص اد اوضه ومجهزه تجهيزات جامده جدا
هما دول بقي اللي الفتوي دي اكيد بتقصدهم

بس طبعا ده ماينفيش اننا ندور علي الاسباب الحقيقيه ورا مشكلة الفقرا ونعالجها


نورتني

خمسة فضفضة يقول...

السلام عليكم ورحمة الله وبركاته

د/ عماد

الله يبارك فيك ، اتفضل

معلش كان فيه مشكله عندي انا وخلاص ظبتها

نورتني

خمسة فضفضة يقول...

السلام عليكم ورحمة الله وبيركاته

يوسف المصري

فيه ناس قبلك قالت انهم هايبقوا الذ علي صينية بطاطس
ههههههههه

مايوحشكش غالي وان شاء الله منورني دايما
وكل عيد اضحي وانت بخير وسعاده
ولا الحوجه لمبارك ولاجمال مبارك

استناني هناك الساعه سته

هههههههه

تحياتي

خمسة فضفضة يقول...

السلام عليكم ورحمة الله وبركاته

خيخة
طيب وشريف مش هايزعل ويحقد علي العصافير الغلابه اللي هايخدوا لعبه

ربنا يسترها معانا يارب ، وان شاء الله اسربهم في اقرب فرصه

نورتيني ياخوخه ابقي كرريها دايما

سلام

خمسة فضفضة يقول...

السلام عليكم ورحمة الله وبركاته

الطاغيه سكايار عندنا ، يامرحبا يا مرحبا
ايه النور دا كله
تصدق انهم عمالين يصوصوا بصوت فظيع لدرجة انك ممكن تفتكرهم بيصوتوا ولا زعلانين من حاجه ، مع ان مافيش حاجه نقصاهم ...ههههه

اخونا عصفور ماطلعش ليه في العصافير ، طلع بيربي سمك
:-D

تحياتي

خمسة فضفضة يقول...

السلام عليكم ورحمة الله وبركاته

محمد صبحي
هههههههههههه
ايه الحظ ده ياخواتي

بس العصفور بتاعك ده شكله فقري من يومه ويطفش بلد

الصور ان شاء الله واضحه دلوقتي كان عيب بسيط وتم اصلاحه

نورتني

خمسة فضفضة يقول...

السلام عليكم ورحمة الله وبركاته

كوكا

متهيالي ان السمك مش متعب زي العصافير ، لا بيوسخ حواليبه ولابيسقع ولا بيعمل دوشه ، خليهم شويه لحد ما تشوفي هاتعرفي تتعاملي معاهم ولا لا

حتي في عالم الاسمالك الذكر هو الذكر ، طول عمره عينه زايغه
هههههههههههههه

اقري تعليق ام البنات فوق عن العصفوره اللي قتلت ضرتها
هههههههههه

شكرا علي ذوقك نورتيني

غير معرف يقول...

موضوع يخوف من اليوم ماعرفت انام وابى اشتم لكن انتم تحذفونها

غير معرف يقول...

ياشرموطة ياشرموطة يا شرمووووووووووووووووووووووووووووطة

القرآن الكريم