TvQuran

٢٠٠٨-٠٢-٠٦

القرار رقم 542


لا دا مش قرار مجلس الامن بخصوص قضيه عربيه ،
دا قرار وزير الصحه بخصوص حبس الصيادله ،

ماتستغربوش !!!! ايوه حبس

هايحبسونا

فالاستاذ الدكتور حاتم الجبلي في قراره الوزاري
رقم 542 لسنه 2007 الخاص بتعديل القرار الوزارى رقم 213 لسنه 1998 قرر انه ها يتم حبس اي صيدلي لمدة عام وغرامة ٥٠ ألف جنيه، إذا ثبت وجود مستحضرات ومستلزمات طبية غير مسجلة في صيدليته وكمان غلق الصيدليه لمدة سنه يعني ترخيصها هايتلغي
ماهو فيه قرار تاني ان الصيدليه اللي تقفل سنه كامله ترخيصها يتلغي

يعني ابقي قاعده في صيدليتي لا بيا ولا عليا الاقي اللي داخل يفتش وبعدين يجرني من قفايا علي السجن

واحد محترم يقولي طيب انتو ليه تبيعوا حاجات مش مرخصه في صيدلياتكم ؟؟؟؟؟
دا المثل بيقول امشي عدل يحتار وزير الصحه فيك

ارد انا بقي و اقوله ، يا سيدي الفاضل مستحضرات ومستلزمات دي بتشمل كل حاجه في الصيدليه غير الادويه ، وفيها حاجات كتير اوي مش مرخصه
كمان حاجات تانيه كتير مستورده وملهاش بدايل في السوق المصري
لو قلنا سيبنا من مستحضرات التجميل ومزيلات العرق والبرفانات طيب مافيه حاجات تانيه واهم بكتير

حد يقولي شاف مره كيس قطن مرخص ولا بكرة شاش مرخصه او حتي علبة بامبرز ولا علبة مناديل او فرشة سنان مرخصه ؟؟؟؟

طيب حد شاف مستلزمات العمليات من قساطر وكانيولات وخيوط وحقن اسباينال انتاج مصري ولا مسجله في وزارة الصحه ؟؟؟؟


والمعضله اللي مش لاقيلها اي حل ان فيه حاجه تابعه لوزارة الصحه اسمها
لجنة التحليل الدوائي دي اللي بتوافق علي استيراد المستلزمات الطبيه والادوية من بره وبتدي تصريح دخولها من الجمارك والضرايب ، معني كده انها مطابقه لمواصفات الوزاره ، وكمان بموافقة الوزير نفسه

يعني
وزير الصحة بيسمح بدخول أدوية ومستلزمات لمصر غير مسموح بتداولها بالصيدليات وبعد كده يطلع قرار بحبس اللي يتاجر فيها ؟؟بالله عليكم ده اسمه كلام ؟؟ هاتدخل من اصله ليه ؟؟؟علشان نتفرج عليها ؟؟ ولا تتباع في السوبر ماركت؟؟

طيب ما الوزارة تسجل اي مستلزمات موجوده في السوق ، او حتي يا جماعه تسجل اللي هي عاوزاه وبعدين تبعتلنا نشره بالحاجات اللي نتعامل فيها ، واللي يخالفها يتعاقب ويبقي كده الوزاره عداها العيب وازح

كمان ليه الصيدلي دايما هو الحيطه المايله بتاعهم واللي دايما حطينه في وش المدفع ، مايروحوا يفتشوا علي مكاتب المستلزمات اللي ماليه البلد وبتبيع الحاجات دي علي عينك ياتاجر من غير اي رقابه ، ماهي دي المنبع اللي الصيادله بيجيبوا منه ، ولا سايبين الحمار ويتشطروا علي البردعه


فيه حاجه تانبه كمان ( الوزير ده شكله مستقصدنا ) ، السنه اللي فاتت الوزاره رفعت اسعار 92 صنف من الادويه المهمه (منها ادوية ضغط وسكر يعني حاجات من بتاع الناس الغلابه) بحجة ايه ان المواد الخام غليت وان الشركات دي يا ولداه بتخسر ( معظم الادويه اللي غليت كانت شركات انترناشونال )
واحد هايقولي عادي ماكل حاجه في البلد غليت اشمعني يعني الدوا ؟؟
طيب يا محترم لما السعر يزيد يبقي علي الكل ، اشمعني التأمين الصحي ، بالرغم من وجود كراسة مواصفات وتسعيره للادويه اللي بتتورد ، اشمعني بقي ال 92 صنف دول يتوردو بره الكراسه دي وبخصم يعدي ال50 % ؟؟؟
يعني الشركات دي هاتخسر من الصيدليات ومش هاتخسر من التأمين ؟؟

واللي زاد وغطي ان التامين فتح منافذ بيع للادويه ، والمنافذ دي غير مرخصه و حاطين عليها اسم «الصيدليات التجارية» وبيشغلوا فيها ناس مش صيادله وكمانالادوية فيها بتتباع باسعار اقل من الموجود في الصيدليات العاديه
معني كده ان نفس الدوا هايتباع باكتر من سعر ، وكل محافظه بسعر

نقابتنا
( اللي هي نقابة الصيادله يعني ) ردا علي الكلام ده قررت انها تقاضي هيئة التأمين الصحي وربنا يسهل و يدينا ويديكم طولة العمر


كمان فيه جمعيه عموميه يوم الجمعه بنطالب فيها الوزير بالغاء القرار الظالم ده وبنعلن الاحتجاج عليه ، وممكن يوصل الموضوع لاضراب عام من كل الصيادله وغلق للصيدليات لحد ما يشوفولهم حل ؟؟

يعني يا جماعه اللي عاوز اي دوا او حاجه تانيه من الصيدليات يلحق يجيبها قبل مانقفل :-)



-----------------------------------------

تحديث


ظروفي ما سمحتليش اني احضر الجمعية العموميه ، بس من بعض الاصدقاء عرفت آخر الاخبار

الحلول اللي اقترحتها الجمعيه العموميه الطارئة

1/اقاله وزير الصحة المصري بعد ما ثبت اهدارة للمال العام


2/تطبيق نفس قانون المستلزمات والادويه الغير مرخصه علي الطبيب
معاقبه الطبيب اللذي يقوم بكتابة ادوية غير مرخصه بوزارة الصحه لمرضاه بنفس العقوبه ( ولا الطبيب ملاك )

3/انشاء الهيئة العليا للدواء تابعة لرئيس الجمهوريه وتكون خاصه بشئون الدواء والصيادلة بعد ان اثبت وزراء الصحة تحاملهم علي الصيادلة وانكار دورهم وتشبسهم بالدواء لمصالح اقل ما يقال عنها انها شخصيه


كما وافقت الجمعيه العموميه علي اعطاء مجلس النقابه الضوء الاخضر لاتخاذ الاجراءات القانونيه لشطب الدكتورة رئيسه التفتيش الصيدلي واصرت جموع الصيادلة الممثلين للجمعيه العموميه علي شطبها بدون تحقيق بعد محاوله طلب احد اعضاء النقابه التحقيق معها اولا الا ان الجمعيه رفضت رفضا قاطعا فكيف نحقق مع مفتشه ولا اقول صيدلانيه بعد شطبها من النقابه ساهمت في وضع قانون لحبس الصيدلي لاجل منصب الادارة المركزيه



وطالبت النقابه جموع الصيادله الاتفاف حول نقابتهم فهي الجهة الوحيدة المهمومه بحل مشاكل الصيادلة وعدم التقليل من دورها فلكل جهة سلبياتها وايجابتيها

هذا وقد امهلت الجمعيه وزارة الصحة اسبوعا لالغاء القوانين المخربه لمجال الصيدله او التصعيد المستمر وبالتدريج من جهة النقابه

دعوااااااااااااااتكم


42 comments:

جمعاوى يقول...

أول تعليق ..الحمد لله


بما إنى على معرفة جاامدة جدا ببعض الصيادلة فهم لسه فاتحيين معايا الموضوع ده من يومين

سألت نفس الأسئلة اللى حضرتك قلتيها ف البوست و كانت الردود نفس الردرود تقريبا


لا و إيه كمان

تقريبا فيه قانون غن الوزير ممكن يصدر قرار بحظر أى دواء تقريبا بدون إعلام الصيادلة أو حاجة زى كده مش فاكر

الشاهد كنت ح أكد على حضرتك الجمعية العمومية بتاعت يوم الجمعة

بس انا سمعت إن مممكن الموضوع يتحل ودى تقريبا ..ربنا يستر

Dr.khaled يقول...

وفضايح شركة هيدلينا...
والأدوية المنتهية الصلاحية؟؟
كل دي مش مستحقية السجن...

وازاي مثلا الصيدلي هيسجل في صيدليته فوط أو مناديل أو زي ما قلتي بامبرز أو ما شابه...
الوزير ده خرب أكثر ما أصلح...
وحسبنا الله ونعم الوكيل في القوانين اللي بيطلعوها اي سمك لبن تمر هندي
بدون دراسة جدوى أو حتى استشارة للمتخصصين ....
مش مشكلة اهو -حضرتك برضه- عارفة انه بكده فتح باب رزء (بالهمزة مش بالقاف) للي عايزين يسترزءوا (برضه بالهمزة مش بالقاف)
كل موظف من دول يدخل على لادكتور الصدلي...ويفرض عليه إتاوة...
هاااه..هاتدفع المعلوم ولا أبلغ إنك بتتاجر في مواد ممنوعة ...بامبرز وكريمات و زيوت شعر....
حسبنا الله ونعم الوكيل

smraa alnil يقول...

لا اضراب ايه بس

انتو بتهرجوا
طب استنوا الاول لما اجيب فرشة السنان
ومعطر الجو والشامبو بتاعي
:))

مش بايدي غير اني اقول حسبي الله ونعم الوكيل

ما في اي نقابة عدلة فيكي يا مصر

كل يغني علي ليلاه

هو انا اي نعم نقابة المهن الرياضية

بس برضه الامر لا يسلم من لعبكة احيانا

ربنا يخرجنا من الازمة دي علي خير

الطائر الحزين يقول...

اى كلااااااام فى اى كلللللللللام

تقصدى اللى عاوز دوا يلحق يعيا ويمرض قبل ما الصيدليات تقفل

... يقول...

فضفضة
ان شاء الله تتحل سلمي من غير اضرابات ولا اعتصامات
ولو انك كنتي هتنوري الشاشة وانت مضربة
قولتلك
اجريها من الباطن لخريج جديد متحمس وهاحجز لك معايا في شرم الشتا الجاي

عدى النهار يقول...

الراجل بتاع وزارة الصحة ده أصلاً مالوش غير فى البزنيس وقراره بإغلاق صيدلية لمدة سنة مع وجود قرار آخر بإلغاء التصريح فى حالة الإغلاق لمدة سنة بيدل على مدى جٌبن ودناءة الأسلوب اللي بيدير به العمل. تخيلى بأه نتيجة الأسلوب ده على كل من عمل عنده فى البزنيس الخاص به من مركز.. أشعة فى بداية حياته العملية للدار الفؤاد حالياً. وطبعاً أمثاله كتير ومش بيجوا غير بلوي الدراع.. ربنا يمسر دراع كل مفترى

البنت الشلبية يقول...

الله يكون فى عونك
معرفش ايه الغباء والظلم الى بيحصل ده
عايزين يحاربو الناس فى لقمة عيشهم
قال يعنى مصر بتصنع كل الدوا الى فى العالم وبتصدره وبتسجله فى وزارة الصحة!!!!!

اقول ايه
الله يكون فى عونك

=======
وحشتينى جدا يا دكتورة واشكرك على سؤالك الغالى
جزاكى الله كل خير

Unknown يقول...

يعنى انا عاوزه اعرف حاجه دلوقتى
سابوا كل المصايب اللى بتحصل ى الوسط الطبي كله ومسكوا فى دى
وبعدين زى ما حضرتك اشرتي الحاجات دى مش مرخصه ايه الحل فيها
الله يخليكى يا دكتوره
كيسين قطن ولزقة الاسد انشف عرقى وافرد ضهرى اللى عاوزين يقطموهولنا ده
:))

mohand يقول...

السلام عليكم

ولله فيكي الخير يا دكتوره

كاتبه الموضوع عشان تقوليلنا اننا نشتري الادوية من دلوقتي

طيب انا اعرف منين اني همرض بعد يومين مثلا


------------------
الله يكون في عونكم يا دكتوره
بس انتم فئة من الشعب
لازم تستحملوا بقي

:(:(:(

mo'men mohamed يقول...

الحمد لله انى مش دخلت صيدلة
وربنا يعمى عينهم عن البيطريين
جزاكم الله كل خير
السلام عليكم

Desert cat يقول...

هو فى ايه فى البلد
الواحد ينشغل يومين يلاقى قرارت وحبس وسجن
معلشى يا دكتورة اصلى كنت مشغولة بعمل ورق لشركة مستحضرات ادوية اللى فاتحين على عينك يا تاجر
وصاحبا بقى عامل جرد ومكس وخسارة مقولكيش كنت طول الوقت قاعده أأقر عليه واقول هى تجارة ادوية بتكسب كل دهههههههه .... مش معنى كدا ان اللى حصل لكو ده عينى وصابتكو اصل ضرتك دكتورة صيلانية لكن التانى بيوزع بقى على الصيدليات مش عارفه مرخص ولا ايه الليلة هبقى اساله
ربنا يقويكو وينصركو على الوزير بتاع الصحة اللى رفع اسعار المضادات الحيوية واحنا فى الشتا وانا عندى حاجه مش ينفع اصلا استغنى عن المضاد الحيوى لا صيف ولا شتا بس هى فى الشتا بتنشط اوى واحيانا بتعمل نزيف ... منه لله رفع لى سع المضاد الحيوى ... الهى يجرب اللى عندى علشان لما يجى له نزيف يحس بالناس

مدونة يلا نفضحهم يقول...

الى كل حر فى هذه البلد
سلام عليكم ورحمه الله وبركاته
ابعث أليكم بهذه الرساله من داخل زنزانتى
فأشهد الله انى احبكم فى الله
فلقد اعتقلت انا واخرين من خيره رجال هذه البلد
فى تهمه هى وسام على صدورنا جميعا
فكنا نقف كما وقفتم انتم ضد حصار غزة
وهذا مالم يعجب ضباط امن الدولة
فتم اعتقالنا وعلى الرغم من صدور قرارت قضائية
بالافراج عنا ولكن لا يتم التنفيذ
وعلى الرغم من حالتى الصحية التى تحتاج ان
اكون تحت اشراف الاطباء
ولكن كلنا فداكى يا فلسطين
فداكى روحنا ودمائنا واموالنا
اخوانى الكرام
انتهت رسالتى لكم من داخل زنزانتى
ووالله لو أملك المقدرة على ان اصافح ايديكم الطاهره
واقبل جبهاكم التى ترفض الركوع لغير الله لفعلت
ولكن عذرى
انى اتلقى كل يوم رسائل منكم انتم معشر الشباب
فكم كانت هى اسعد اللحظات عندما كنت اتحدث اليكم
وها انا افعلها الان
اخوانى المدونين الاحرار
جزاكم الله عنى كل خير
د\ ابراهيم الزعفرانى
امين عام نقابة الاطباء بالاسكندرية
المعتقل بتهمه
المطالبه برفع الحصار عن غزة
=============================================
للتوقيع على وثيقة الافراج عن
الدكتور ابراهيم الزعفرانى

اضغط هنا
http://yallanefdahom2.blogspot.com/2008/01/blog-post_3398.html

عصفور المدينة يقول...

نعلن نحن المعلم عصفور المدينة عن فتح فرع العطارة والأعشاب والعودة للطبيعة والطب البديل هلم جرا

http://kasperb4.blogspot.com/ يقول...

على فكرة في أمل كبير جدا ان الاضراب يجيب نتيجة
لأن القرار على خطة 542
مش على خطة 433

معنى كده انهم بيلعبو باتنين راس حربة بس
اذن عليكم استغلال هذه الثغرة بكل قوتكم
D:

A long distance يقول...

انا من رايي
ان الصيدليات تقفل
لا بلاش تقفل
تغير نشاطها
يعني اللي يفتح بقال
او اللي يفتح محل يبيع فيه كروت شحن
او اي حاجه
علشان ميقعدوش يطلعوا قرارات ونريحهم
ولا ايه الكلام
كده احنا بنريحهم من اي قرارات في المستقبل

ma 3lina يقول...

معذرة يا دكتورة
أنا عارف انه بوست المفروض يزعل وحاسس إن حضرتك بتكتبيه وانتي متنرفزة جدا .. بس أنا قريته وأنا بضحك ..
صحيح هم يبكي وهم يضحك

متهيألي كده في مشورع قومي كبير معمول في مصر .. تهمة وضية لكل مواطن

يعني كل فئات الشعب المصري دلوقتي ممكن تتسجن وكله بالقانون ..

الـسـيـدة نـون يقول...

ايه الهبل ده
قبل ما ياخدوا قرار المفروض يدرسوه
من كل الجوانب
لما هما موافقين على الحاجات تدخل البلد يجوا ازاى بعد كدة يقولوا انها مش مترخصة
دول ناس تجيب الضغط منهم لله
سلام
اختك خيخة

Unknown يقول...

صباح العشوائيه
.
.
.
.
.
مساء الهرجلة


وبينهما نهار موظفي وزارة الصحة

من أول الوزير ..لغاية أصغر موظف

يا مراكبي يقول...

أولا
بالنسبة لموضوع إن فيه مخبرين هيجروكوا عالقسم والحاجات المعتادة دي .. فأنا من موقفي هنا مستعد أتبرع بالحلاوة الطحينية لمدة شهر .. شوفي حد يجيبلك العيش من الفرن غيري

ثانيا
نصيحة من أخوكي .. إنت تعملي زي تجار المخدرات وتبيعي الحاجات دي في السر عن طريق وسطاء وناضورجية

أي خدمة

د/اجدع بنوته يقول...

ههههههههههههههههههههههه

هو انتو هتعملوا اضراب

واطباء مصر خلال اسبوعين برده هيعملوا اضراب

البلد دى هتخرب ياجدعان

بس م الواضح جدا ان حاتم الجبلى مطلع سيئات الكل

دكاتره وصيادله

ده ال ايه اعلن ان الطبيب دلوقت مرتبه 850 جنيه اول التعيين وبعد سنه بيقفل الالف

هو الراجل ده وزير صحه ف انهى بلد بالظبط

ربنا يعافيه ويعافينا

تحياتى

Noony يقول...

بكلم ماما في الموضوع دة بعج ما قريته عندك

بتقولي دة قرار يطلعوه عشان يلموا فلوس وبعدين يطلعوا قرار تاني يلغوا بيه الأولاني..وهي دي شغلتهم في دنيتهم
:)
بالنسبة للمستحضرات المستوردة ممكن يبقى معاكم الورق اللي بيثبت صحة دخولها مصر واللي يكلمكم اعملوا الورق دة صاروخ ودخلوه في عينه عشان يستكشف عن شيء هلامي يطلق عليه اسم المخ في جسم الكائن دة

ايه اللي دخلك صيدلة من الأول؟
ربنا يكون في عونك
:)
نوني

غير معرف يقول...

عملوا زى المثل اللى بيقول ميعرفوش يتشطروا على الحمار فاتشطروا على البردعة
عفوا طبعا للتشبيه بس هى دى الحقيقة معرفوش يتشطرواعلى الشركات اللى بتغش الادوية زى هايدى لينا وشركاها قاموا اتشطروا على الصيدليات

david santos يقول...

Congratulations Egypt!!!!!!!!!!

Unknown يقول...

الجمعيه اتعملت فعلا

واعتقد ان الوزير هيستجيب

احمد الجيزاوى يقول...

الله يكون فى عونك دة لزم تخلى حجتين اساسى فى الصيدليه عندك عيش وحلوة تخده معاكى مع كل كبثه

وتحفظى رقم محامى وشكلك هتكونى زبونه مستديمه عند المحامى دة فلزم يعملك خص اتفقى عليه

بس زى مبقوله مصائب قوم عند قوم فوائدة فانا اعتقد انى مشكله حضرتك مفيدة ليه كمحامى واى كبسه كلمينى

ههههههههههههههههههه

كلام جد شويه لو فعلا اى بتقليه دة ممكن تشوفه كصيادله مع بعض وترفعه قضيه امام مجلس الدوله هتاخد منكم 60 يوم وبعدة يتم الغاء القرار الادارى لوزير حوله تظبته مع بعض
لانى انا اول مرة اسمع عن كيس قطن مرخص
هههههههههههههههههههههههههههههههه

امضاء
احمد الجيزاوى
محامى وابو كاتو ونسلك بلعات احيانا

^ H@fSS@^ يقول...

طيب لما يقبضوا عليكي ابقي قولي لنا عشان نعملك حملة و بانر و ننشره في كل المدونات
بلاوي ايه دي اللي بتتحدف علينا
فعلا شكلهم بيتشطروا على الصيادلة
ما هو ده اللي ناقص

قلبي معاك يا فضفضة

Soul.o0o.Whisper يقول...

ايه دا يا دكتورة ؟؟؟؟

طب الصيدلى اللى واقف هيتمسك هو كمان
و لا صاحب الصيدلية بس <<< عشان تعمل حسابها من بدرى بدرى يعنى

شفتى الندالة ...:)

بصى يا اختى العزيزة ...
عادى يعنى ... هو دا جديد
مع الحكومة المصرية مافيش مستحيل

حكومة تزيل الدهون
بلمعان بريل المضمون
ههههههههههههههههه


بجد ربنا يفرجها من عنده
على العموم أنا لسه لى تيرم
و عندى امل فى انقلاب قبل انتهاؤه
عاوزة أشوف حياتى بقى ... :)

حسبى الله و نعم الوكيل
تقبلى خالص تحياتى

خمسة فضفضة يقول...

السلام عليكم ورحمة الله وبركاته

جمعاوي روش طحن

ربنا يسهل والموضوع يتحل ودي

دعواتك ،
ادي النقابه ادت الوزير مهلة اسبوع
اما نشوف ايه اللي ها يحصل

خمسة فضفضة يقول...

السلام عليكم ورحمة الله وبركاته

د/ خالد

ايوه يا دكتور خرب اكتر ماصلح
منه لله وحسبنا الله ونعم الوكيل فيه

مش عارفه سايبينه ليه ، مع ان كذا مره سمعت انه هايتشال


مش باب رزء واحد بس ، دول ميت باب
ربنا يستر

نورتني

خمسة فضفضة يقول...

السلام عليكم ورحمة الله وبركاته

سمراء النيل

حسبنا الله ونعم الوكيل علي الظالم والمفتري ووزير الصحه ، وابن الحرام

وادي النقابه ياستي عملت مهلة اسبوع علشان تشتري اللي انت عاوزاه براحتك

ربنا يعديها علي خير

منوره ويارب دايما

خمسة فضفضة يقول...

السلام عليكم ورحمة الله وبركاته

الطائر الحزين
طبعا كله اي كلام ، وكل واحد بيطق في دماغه حاجه بيعملها واي واحد عاوز يطلع قرارات بيطلعها

اعتقد ان المفروض اي واحد يتعين في موقع قيادي لازم يتم الكشف علي قواه العقليه الاول

-----
بالنسبة لغلق الصيدليات ماليش دعوه اتصرفوا انا حذرتكم وخلاص
وفيه اسبوع مهله اهوه علشان مايبقاش لحد حجه
:-D

خمسة فضفضة يقول...

السلام عليكم ورحمة الله وبركاته

بثبوثه

يارب
دعواتك ، اصل بصراحه خلاص الحكاية مش ناقصه

ربنا يستر

طيب ماتعرفليش واحد يكون ابن حلال ويرضي ياجرها من الباطن ،
خلينا ننطلق

kafrawy يقول...

صباح الفل يا دوك


اولا احب اسجل اعترافى بان د\ حاتم الجبلى دة افشل وزير صحة مسك مصر

ثانيا

الحكومة مش عارفة ياعينى تجيب فلوس منين
ع تسد العجز ف المديونيات
قامت عاملة الغرامة ام 50000 جنية

ثالثا
احب اقول ل
\حاتم الجبلى
روح اتشطر ع انفلونزا الطيور بدل ما انت جاى تتشطر ع الغلابة

رابعا

الحمد للة ان د\حاتم الجبلى لة دعوة بينا (البيطرين) والا كان حيوانات مصر كلها ...............
ولا بلاش

تحياتى يا افندم ربنا معاكم

الراقـــص مع الذئـــــاب يقول...

السلام عليكم

يعني ايه يا دكتورة؟؟؟
عيش وحلاوة وحجات من ديه

لالالالا يا شيخة

متوصلش لكدا


كانوا حابسوا شركات الادوية اللي بتبيع حبوب الجبس اللي لونها ازرق وتقول للناس انه(....) وأكيد انتي سمعتي بالموضوع دا

بصي طول ما انتي عندك مخالفات في الصيدلية طول ما انتي في السليم وتمام

تخافي امته بقي

لما تمشي مظبوطة وتتبعي القوانين
تلاقي عليكي ضرايب وحجوزات
وتلاقي مثلا جايلك اعلان قضية علي يد محضر مرفوعة عليكي متعرفيش بسبب ايه...بس مرفوعة وخلاص


قولي يا باسط ومتحرقيش دمك

عاشــــــ النقاب ـقــــة"نونو" يقول...

الله يعينك ويعينا يا رب
انا عندي حل كويس
شوفي ممكن تقسمي الصيدلية نصين نص صيدلية موجود فيها الحاجات اللي مرخصينها والنص تاني ترخصيه للحاجات اللي مش مرخصينها ويكون اسمه مثلا ملحق للغير مرخص ورخصتله المكان دة
معلش امال هتعملي ايه وهنعمل احنا كمان ايه ولا القطن والشاش والحقن هنشتريهم من بتاع اللحمة
حاجة تفرس
دمتي بخير يادكتورة وقلبي معاكي

الدرويش المرووش يقول...

الناس دى ضاربه
ربنا يشفى

تلاقيهم جايبيين القانون ده من بلاد بره
و مش داريين باللى إحنا فيه

تراخيص إيه يا بتوع التراخيص

المهم إنتى بتحبى الحلاوه ساده ولا بالفزدق

غير معرف يقول...

تمام يا دكتورة

خليهم يتعلموا الأدب، اللي عاوز أفهمه إن ليه القرار الغبي دة بيقفل الصيدلية على قرارين؟ مكانش ينفع يقول إن الصيدلية هتتقفل و خلاص؟

و لا هوا كتر قرارات و خلاص؟
هوا أكبر مشكلة العالم بيواجهها دلوقتي تدخل الرأسمالية في قطاع الطب و العلاج و بالتالي فمالك الشركات بيغتني و الوزير طبعاً لأنه الأمر لا يسلم من الرشاوي، بينما اللي يتأثر هوا المستهلك و الصيدلية
و أنا من موقعي هذا في المكتبة أطالب الرئيس حسني مبارك أدام الله فضله و أعز مقداره بأن يقف إلى جانب إخواننا الصيادلة في مصر و ضواحيها

تمام كدة؟

mohamed يقول...

مع انى مش عايزك تتحبسى بس انا شايف القرار ده فيه كتير من الصواب لانى فيه كتير م الادوية بتتعمل تحت بير السلم وبتتباع

صاحب المضيفة يقول...

ربنا ينتقم من كل الظلمة

الواحد مش عارف همه عاوزين يوصلوا لايه

لما نشوف هاترسى علي ايه في الاخر

تحياتي

باب البحر يقول...

مش عارف .. أنا فاكر اني سمعت عن الخبر ده قبل كده .. من مدة كبيرة ، هوه رجع مرة تانية و لا كان بيتهيألي !

ربنا يكون في عون الصيادلة . الصراحة ليهم وقفات هما و نقابة الأطباء تحسب لهم.

جزاكم الله خيرا .

الربان يقول...

تحياتي

غالبا ما تكون قرارتنا عشوائية...انفعالية....هذا ردي المبدئي علي قرار معالي الوزير...و ايضا علي قرارات الجمعية العمومية.

الدواء في مصر حكايته حكاية... الاهواء تتغلب علي المصالح...هناك اساتذة كبار بالطب ، للاسف متورطين مع شركات أدوية كبري ، الشركة ترسلهم في مؤتمرات ( خلي بالك من كلمة مؤتمرات) هم و ازواجهم، و بالتالي الدكتور يرد الجميل بالدعاية لمنتجهم الدوائي سواء عن طريق الاصرار علي وصفه للمرضي او الدعاية للمنتج في الوسط الطبي ...
اما صغار الاطباء...فللاسف الصيادلة الذين يعملون مندوبي مبيعات يجوبون
كل شارع و حارة محملين بهدايا و خلافة
لصغار الاطباء ليصفوا ادوية معينة و محدده للمرضي...

كان يفترض قبل صدور معالي الوزير ، ان يدرس الموضوع مع الجزء المتعلق بالصيدلة في وزارته...و مع نقيب الصيادله...و يتم الاتفاق علي القرار
وايضا منح مهلة قبل التطبيق.

و كان يفترض من الجمعية العمومية الموقرة...قبل اتخاذ قراراتها الثورية
ان تشكل لجنة مصغرة تقترح اقتراحا محددا
لا يضر بمصلحة الصيادلة و لا يضر ايضا
بالمستهلك او المريض المصري...و يتم لقاء بين الوزير و وفد من النقابة للمناقسة و الاقتراحات و من ثم الوصول الي ما يفيد كل الاطراف و يبعد اي ضرر عنهم...سواء المريض ( المستفيد) او الصيادلة او وزارة الصحة...

لكن يبدوا ان كل كنا يعمل في جزيرة منعزلة عن الغير...و ان القرارات العشوائية و العنترية هي السمة الغالبة علي اسلوبنا في الادارة و ليست الادارة العلمية.

أطالب بتشكيل هيئة قومية للغذاء و الدواء تتبع رئيس الجمهورية مباشرة
وأن يعهد اليها بكل ما يتعلق بهما.

وذلك علي غرار هيئة الغذاء و الدواء الامريكية.
http://www.fda.gov/


تحياتي و تقديري

ayar يقول...

ربنا معاكم ومع كل اللى بيحاربوا الفساد فى كل مكان كبروا او صغروا ...

القرآن الكريم