TvQuran

٢٠٠٨-١١-٠٦

إن غدا لناظره قريب



ياتري العالم هايكون شكله ايه بعد 20 يناير 2009 ؟؟



ياتري الناس متوقعين من اوباما اكتر من اللي يقدر يعمله ؟؟


ياتري فعلا هايكون فيه تغيير في سياسة امريكا الخارجيه تجاه العرب ومشاكلهم بعد توليه السلطة رسمي ؟؟


هل توقعاتنا له وللي يقدر يقدمهولنا كعرب بترتفع إلى مستويات غير واقعية وبعيدة المنال؟



تضاربت الآراء بين مؤيد ومعارض ، عدد لا بأس بيه شايف انه ماسخم من ستي الا سيدي ، وناس تانيه شايفينه هو بطلهم المرتقب وناس تالته مش هاممها ولا تابعوا الموضوع من اصله بيفضلوا التركيز علي مشاكلنا الداخليه احسن



بيني وبينكم احسن حاجه حصلت لحد دلوقتي ان خلاص العالم كله وانا اولهم هانرتاح من كابوس مزعج اسمه جورج دابليو بوش ، فإلي مزبلة التاريخ ، ويمكن تكون الفرحه الكبيره اللي العالم قابل بيها فوز اوباما لان بوش هايمشي في الف ........



ونرجع تاني نسأل:

هل فعلا باراك حسين اوباما هو الامل اللي كل العالم مستنيه ؟؟




إن غدا لناظره قريب


30 comments:

دكتور حر يقول...

خالتنا الدكتوره

سلامات
......
كل اللي افتكره من سنة 200 لما المخفي بوش جه

ان كل العرب والمسلمين كان نفسهم بوش ينجح

:)))

صاحب المضيفة يقول...

ما اسخم من ده الا ده


مع الاعتذار لقوة الكلمة


يا اختي كلهم سواسية في الحقد علينا

على العموم لما نشوف اللي جاي شكله ايه


تحياتي

صابر وراضى يقول...

وعليكم السلاااااااام


بصراحه كلهم زى بعض
واكيد هياخد دوره زى اللى قبله

عمرو يقول...

دكتوره بتتكلمى فى أيه ؟؟!!
ده أوباما أعلن ولائه للصهاينه من قبل أى حاجه لما راح لبس الطرطور اليهودى لما راح زار اٍسرائيل من كام شهر
عندى اٍحساس أننا حنقول بعد شويه و لا يوم من أيام غبائك يا بوش

mohamed ibrahim يقول...

بصراحة
انا اتوقع انه اوباما هيكون اسوأ
لانه هيطور علاقات امريكا مع اسرائيل بشكل غير عادي
يكفي انه زار اسرائيل و عمل معاهم احلي واجب
بانه هيديهم القدس علي طبق من فضة
حاجة لا تطاق
و في وسط ذلك
رؤساء العرب مجرد مشاهدين
و لا تعليق منهم
و لا تعليق مننا علي وضعهم
فالي اين نظل نحن الصامتون الموافقون ؟

تحياتي
محمد

مهندس مصري بيحب مصر يقول...

انا رديت على أسئلتك في البوست الأخير عندي
ابقي شوفيه :)

kochia يقول...

هو طبعا الحقيقة انها امريكا مهما كان هو اوباما ولا بوش ولا غيره

لكن الزمن هو اللي هيثبت او ينفي هذا

عين فى الجنة يقول...

بالاغلبية الديموقراطية فى مجلسى النواب والشيوخ يقدر يعمل اى تغيير بدون معارضة
ودى حاجة لا تتوفر لاى رئيس بسهولة
اوباما عنده فرصة ( اذا شاء الله طبعا ) انه يحقق احلام ناس كتير فى الدنيا
والميه تكدب الغطاس
تحياتى

Jana يقول...

صحيح هو ميقدرش يرجع يغير المساعد بتاعه ..لكن لايزال عندى امل ..انه كان مجرد "سكة" لكسب أصوات اليهود ..وانه ناوى على حاجة تانية خالص والامر فى الاخر بايده وميقدرش مساعده او اى حد يفرض رأيه فى قرارات اوباما ..هم رمزيين جنبه مش اكتر
وبعدين لازم نأمل ونحلم حتى بالمستحيل عشان منطقّش
هو لا يبقى حقيقة ولا احلام
:))))

mohamed ghalia يقول...

صدقينى من بوش لأوباما مش فارقة الكفر كله مليته واحده
تحياتى
دمتى بسعادة

mostafa rayan يقول...

اولا السلام عليكم ورحمة الله وبركاته
ثانيا : بصي انا مقتنع ان التغيير لازم يكون بأدينا احنا نكون فاعلين مش مجرد مستقبيلن وافعالنا رد فعل
اوباما مش هيكون افضل من بوش جايز يطلع ألعن واكيد اسرائيل هتكون حبيبتنه وجوة عنيه
بلاش تتوقعي من الغرب مع العرب شيئ كويس لأنه مش هيكون
تحياتي لك ودمت بكل الخير
وتقبل الله منك زيارتك ورزقنا جميعا طاياها

صباح الصباح يقول...

متوقعين اية من اوباما

ان الموضوع برضة هيكون زفت

بس مش زى اللى عملة بوش الابن

اوباما منافق

انما بوش غبى

وميض ابتسامة يقول...

حتى نحكم على اوباما بالايجاب أو السلب لابد من وقفة وانتظار وترقب .. فقد عودتنا امريكا انها ام المفاجأت .. وان اللى نفتكره موسى يطلع فرعون ولذلك مفيش داعى نفرح قوى وننتظر مع باقى المنظرين والايام القادمة خير شاهدا على هوية الرئيس اوباما ..
ونأمل ان تكون خير ان شاء الله

مع خالص تحياتى والسلام عليك

مصــــري يقول...

دكتورة فضفضة.

الرئاسة عندهم خط مرسوم للاصلاح الداخلي والكل لازم يمشي عليه.
مش معني كده ان الرئيس مالوش لازمة.
لأ
بس هو مرتبط بخط معين لازم يمشي عليه.

اما علاقته الخارجية بتبقي برضو خاضعة لشوية قرارات تخرج من الكونجرس في كثير من الأحيان.

أوباما أو غيره السياسة موضوعة مسبقاً.

تحياتي
أسامة

kafrawy يقول...

اعتقد ان كله عند العرب صابون

انا حره يقول...

مش قلنا عشم ابليس فالجنه

أحمد المسلم يقول...

السلام عليكم ورحمة الله وبركاته .

ولماذا نهتم بأوباما أو غيره ؟ .

لماذا بلغنا من الضعف أن نتمنى أن يكون رئيس دولة أخرى هو فلان لعله ينجينا مما نحن فيه ؟ .

يجب علينا أن نفكر كيف نجبر كل دول العالم على احترام الدول الإسلامية كما كان الأمر أيام قوة الدولة العثمانية .

لن يأتي التغيير الحقيقي إلا منا نحن وليس من الخارج أبدا فمن ذا الذي سيهتم بنا إن لم نهتم نحن لأمرنا ؟ .

أستودعكم الله والسلام ختام .

mohra يقول...

انا من انصار ما اسخم من سيدى الا ستى
لو اردنا الحل فلنبحث عنه فى انفسنا لا عند غيرنا
تحياتى

son's egypt يقول...

السلام عليكم
لا اعتقد انه حيكون في تغير في سياسة امريكا للعرب
هي ممكن تختلف طرق تطبيق السياسة ولكنها هي سياسة واحدة

الطائر الحزين يقول...

حتى اوباما اهلاوى ولابس احمر؟؟؟؟؟؟

مش عارف ليه حاسس انها اخر 8 سنوات فى هيمنة امريكا

محمد عبد الرحمن يقول...

أوباما سيكون دمية اللوبى الصهيونى التى يحققون بها كالعادة أهدافهم المرحلية التى خططوها بدقة ولا يزالون يتابعون خطوات تنفيذها

المستر الجديد لا يمكنه بحكم المؤسسات التى تحكم أمريكا أن يحدث تحولا كبيرا فى سياستها الداخلية
ثم أن التركة المثقلة بالمشاكل التى خلفها له سلفه المأفون تحتاج إلى وقت طويل وإجراءات صعبة لتخفيف العبء وأعتقد أن أولويات الرئيس الجديد ستتركز على الأازمة المالية العالمية ثم وبفارق كبير على تدبير وصفة أو صفقة لتخليص الميزانية من عبء النفقات الباهظة التى سببتها الحروب المتفرقة التى ورطتهم فيها الإبنة المدللة المعروفة بإسم إسرائيل بشكل مباشر والأخرى التى فرضتها عليه لعبة المال والإقتصاد والسياسة والنفط

يبدو لى أنى أفرطت فى السوداوية لكن هذه وجهة نظرى

صبرني يارب يقول...

والله انا شايفه الحكايه ما تفرقش كتير

وان كلهم زفت عادي
وكمان هما مدينين بالنجاح لشعبهم مش لنا
احنا ولا بيفكروا فينا

غير احنا بنهيص ومش فاهمين حاجه فاكرين عملنا ايه ايام بوش وزفت
مش احنا الى كنا بنقول اهو بوش ارحم ؟؟؟؟؟؟؟؟؟؟

فشكووول يقول...

يا فضفضه خمسه .. لا باراك حسين اوباما ولا انا حتى نقدر نغير من سياسة امريكا .. دى دول مؤسسات وهناك الكونجرس بيقدر يوقف ابو اوباما وابو بوش وابو كلينتون وهلم جرا .. مصلحة امريكا هى المحرك الاول لسياستها وبعدين احنا العرب امريكا حتنعى همنا ليه يعنى بأمارة ايه .. بأمارة انها لو عايزه تضربنا بالجزمه مش حتقدر .. بامارة ان عندنا 200 ولا حتى قنبله واحده نوويه .. بامارة ما نقدر نقف قدام امريكا ولا حتى نخليها تخسر على رأيهم خسائر مؤلمه .. امريكا هى امريكا ولا تغيير ولا يحزنون .. هو احنا فاكرين ان اوباما عربى ولا فلسطينى ولا مصرى ولا ايه .. وما بينامش الليل من حبه فينا ولا ايه .. اصل الحقيقه احنا الدور علينا اذا كنا عايزين .. لكن احنا مش عايزين .. احنا الدور بتاعنا فات وراح لغيرنا .. احنا خارج التاريخ .. احنا فشكول

محمد أبو الفتوح يقول...

فيه قصيده لعبد الرحمن الأبنودى بتقول
" الحل من جوَّه "
كل دوله بتخدم مصلحتها
بس خلاص

bastokka طهقانة يقول...

انا مش متفائلة


و الدليل قالوله


اوروفوار

غير معرف يقول...

اخى الفاضل

اختى الفاضلة

نهاية التساؤل الذى طرحناه على مدونتنا


------------- ( كيفية مواجهة المدونات المسيئة ) ------------------


واليكم رد ادارة مكتوب على خطابنا بهذا الخصوص ..

شكرا لكم تواصلكم معنا

يا مراكبي يقول...

لم نعتاد أبدا معنى العمل الجماعي .. فيظل في مخيلتنا أن الرئيس هو القائد واملهم وهو من يحدد المسيرة وتتغير سياسات بلاده بتغيير شخصه .. لا يحدث ذلك في الولايات المتحدة الأمريكية

فالرئيس جزء من منظومة ضخمة تسير في طريق مخطط له مسبقا وهو لا يحيد عن المصلحة الأمريكية العامة .. والرئيس لا يختلف عن آخر سوى في أسلوب التطبيق وفقا لخلفية الحزب القادم هو منه

خمسة فضفضة يقول...

السلام عليكم ورحمة الله وبركاته

ياجماعه انا اللي اقصده مش اني مع ولا ضد اوباما

كل الحكايه اني باقول نستني عليه
دا الراجل حتي لسه ما استلمش السلطه ولا عمل اي حاجه

جايز يطلع حلو وجايز جدا يطلع وحش و يقرفنا في عيشتنا اكتر من اللي قبله

وجايز يبقي علي الحياد

مانعرفش لسه وكل ده هيبان بعد 20 يناير ان شاء الله
دا حتي هو نفسه لما وصله جواب من ايران وكانوا عاوزين يفتحوا معاه كلام في الملف النووي الايراني قال اني اصلا ماقريتش الجواب لان امريكا لحد 20 يناير مالهاش الا رئيس واحد هو بوش


بس فيه مشكله اننا اصلا مش مهيئين اننا نتستفيد من اي فرصه هاتبان لو سياسة امريكا الخارجيه اتغيرت للاحسن وده لاننا اصلا غرقانين في مشاكلنا الداخليه وازماتنا اللي مابتنتهيش من العيش للسحابه السوده لازمة الصرف الصحي والتعليم

شوفوا فلسطين وخناقة فتح وحماس ،ودول يقولوا مش هانحضر اجتماعات مع دول ولا هانتكلم معاهم زي ما يكونوا عيال صغيرين ومقموصين من بعض وسايبين اليهود ينهشوا في بلدهم ولا حد هامه

وغيرها وغيرها من مشاكل اما علي طول الوطن العربي سوريا ولبنان ، الجزاير والمغرب ، تقريبا حرب اهلية في السودان ، مجاعات في الصومال .......الخ

يعني احنا محتاجين لنا 3 او 4 قرون عشان نعرف نتخلص من مشاكلنا الداخليه عشان نفوق للمهم

عموما يا جماعه زي ماقلتلكم انا لا متفائله ولا متشائمه انا مترقيه ومستنيه ايه اللي هايحصل

ولا وني حاسه ان اوبامازي ما بيقولوا انه في تشابه بينه وبين كنيدي ، انه ممكن جدا يغتالوه زي ما حصل مع كنيدي


ويا خوانا ان غدا لناظره قريب


----------------

علي فكره والله ايام ما بوش جه زعلت جدا ماكنتش عاوزه ينجح ولا يكون رئيس ولما طلع كلام عن تزوير انتخابات في فلوريدا وغيرها قلت يا مسهل هايتشال بس ابن الايه فضل متبت في الكرسي لحد ماكملهم 8 سنين باينه جه مصر خد كورس " كيفية الحفاظ علي كرسيك لاطول فتره ممكنه" :))



سلام

رابطة هويتي اسلامية يقول...

ندعوكم للمشاركة معنا في رابطة " هويتي إسلامية "

شارك معنا لنهضة التدوين

كون معنا أول شبكة تواصل في عالم التدوين

كلنا نتفق في الغاية نختلف في الأسلوب

هيا.................. كن أول المشاركين

رابطة هويتي إسلامية

كراكيب عادل يقول...

«بايدن» - نائب الرئيس «اوباما» - اعلن انه ليس مواليا لاسرائيل فقط، بل «صهيوني حتى النخاع»، وكان ضد حرب تحرير الكويت و.. «رام ايمانويل» الذي اصبح امين عام البيت الابيض - أو كبير موظفيه - تطوع للقتال مع الجيش الاسرائيلي خلال اجتياح بيروت عام 1982، وتطوع - ثانية - في الجيش الاسرائيلي حين ارسل صدام حسين صواريخه الى تل ابيب في حرب تحرير الكويت، وهو يحمل الجنسية الاسرائيلية مع الامريكية!!

القرآن الكريم