TvQuran

٢٠٠٨-١١-١٩

الطبعة المميزة / تحديث


الراجل ده باحبه وباحترمه وبقدره جدا جدا

و برنامجه الطبعه الاولي علي قناة دريم من اجمل البرامج واكثرها جرأه علي شاشة الفضائيات ، باحرص اني اتابعه باستمرار مع انه دايما بيسبب لي اكتئاب وباحس اننا رايحيين علي المجهول وان طريقك مسدود مسدود مسدود يا ولدي


تحس وانت بتتفرج علي المسلماني انك قاعد قدام ابن بلد اصيل ، من نبت ارض مصر الطاهره اللي لسه فيها ناس بيخافوا عليها وبيحبوها بجد

اسلوبه شيق جدا في عرض الموضوعات ومناقشة الاخبار ، بيحاول يوصل بالمعلومه مهما كانت صعوبتها لمستوي المواطن البسيط جدا اللي عمره ما قرا جرايد ولا راح مدارس

من متابعتي لبرنامجه فهمت مواضيع كتير اوي ما كنتش اعرف عنها اي حاجه ، ومواضيع تانيه كان كلها غموض بسبب التعتيم الاعلامي للحكومه

احترمته جدا جدا لما قرر من فتره ان البرنامج ماعدش هايناقش ولا يتابع ولا يجيب سيرة طلعت مصطفي وسوزان تميم ، مع ان الموضوع ده بالذات فاتح شهية الفضائيات اليومين دول علي الآخر، حسيت انه فعلا وبجد مش عاوز يضيع وقته ولا وقت المشاهد في مواضيع هايفه ملهاش اي لازمه وانه يركز احسن علي الموضوعات الجاده اللي تهم الناس


كمان احترمت فيه انه بيتعامل بصدر رحب مع اي حد يبعتله تعقيب او اعتراض علي حاجه قالها في حلقات سابقه ، زي موضوع فضيله مطلقة الملك السابق احمد فؤاد واللي عمل معاها حوار ادعت فيه انها ماتزال علي زمة احمد فؤاد اللي بدوره بعت تكذيب للكلام ده ، وفعلا ذاع الرساله واجري مكالمه تليفونيه مع احمد فؤاد اعتذرله فيها عن الخطأ ده وحكي نصها في البرنامج


كمان لما قال ان مصر مافيش فيها اي برنامج فضاء ولا بتسعي لكده لما جاله تكذيب من رئيس مركز بحوث الفضاء ما اتكسفش انه يذيع الكلام ده ويعرف الناس ان فعلا مصر ليها برنامج فضاء بس المشكله ان الاعلام الحكومي مش فاضي للحاجات المهمه وفاضي بس للتفاهات وبالتالي ماهتمش ان مصر اطلقت مؤخرا بتعاون اوكراني قمر صناعي جزء كبير منه مصنع بايدي مصريه


بيناقش ويحلل كل حاجه حوالينا و يقول للاعور انت اعور في عينه حتي لو رئيس الوزراء نفسه ، اعتبره اجرأ مذيع حاليا علي الساحه المصريه ( طبعا يسبقه حمدي قنديل بس برنامجه بيذاع من دبي مش من مصر )


ومع انه مش فوتوجينيك ولا بيستظرف زي بعضهم
الا انه بيتميز عن اي مقدم برامج آخر انه دارس وفاهم ( حاصل علي بكالوريوس اقتصاد وعلوم سياسية من جامعة القاهره ) ومش مجرد واحد شكله حلو طالع يقرا كلمتين في جرنال ويمشي ، ولا واحد بيستخف دمه ويحرقلنا دمنا بإفيهات سخيفه مالهاش اي لازمه ، ولا بيحاول انه يحابي لحد ويمشي مع الموجه


وبالمناسبة حاولت قناة المحور انها تستنسخ الطبعه الاولي فاطلع برنامج ممسوخ اسمه الصفحه الاخيره لا لون ولا طعم ولا رائحه


احمد المسلماني عمل لفتره في مركز الاهرام للدراسات السياسيه والاقتصادية ، وحاليا هو المستشار الصحفي للدكتور احمد زويل وبيكتب في المصري اليوم

خايفه جدا يحصل معاه زي اللي حصل مع حمدي قنديل لحد ما يزهق ويمشي هو كمان


عاوزه اقولكم اني كان نفسي اكتب الكلام ده من زمان اوي وكل ما انوي الاقي ناس كتير كاتبه عنه وقايللين اللي عاوزه اقوله ،بس حتي لو الموضوع هايكون مكرر ماكنش ينفع ماقولش اني باحترم الراجل ده وبقدره جدا



N.B :


اكتشفت وانا بدور علي صوره للبوست ان في ناس عاملينله جروب علي الفيس بوك
هنا

وان له صفحه علي الويكيبيديا

هنا


ممكن تقروا شويه من مقالاته


هنا



وبعض المدونين كتبوا عن البرنامج

EMERALD.OASIS

احمد المسلماني


اسكندراني

الطبعة الاولى “برنامجي المفضل” والاستاذ احمد المسلماني


------------------------------------

تحديث


لقيت الحوار الجميل ده عملاه مجلة الشباب مع المسلماني اقروه هايعجبكم ان شاء الله

هنا



23 comments:

عمرو يقول...

صباح الخير يا دكتوره
أنا أوافقك تماما فى كل ما قلتى
الراجل ده محترم و مستنير و شجاع بس تحسى أن جواه جبال من الحزن كل ما يحاول يبتسم تحسى أن اٍكتئابه بيزيد
ربنا معاه و يكفيه شر الوطاويط

غير معرف يقول...

كنت لا استسيغ هذا الرجل فى أول ظهوره وكتاباته فى المصرى اليوم ..

ومع الوقت .. احترمت عقله .. وصدقه قبل عقله .. فاصبحت اتابع مايعمل .. واصبح يعجبنى الصوت الهادئ فى تناول الامور

معظم برامجنا .. زعيق عالفاضى .. واغلبها لم يكلف المقدم خاطره ويبذل مجهودا اضافيا حتى يكون البرنامج ذا وزن

معك يادكتورة قلبا وقالبا

Unknown يقول...

والله عندك حق يا فضفضة ياحبيبتى .. بجد البرنامج بيشدنا بشكل كبير اوى

حتى لو الموضوع فعلا مايهمنيش فى حاجة .. بس بيفهموهولى وافضل قاعدة متابعة ومهتمة .. ومنهم مثلا مولد سيدى او حصير

فعلا جزاه الله عنا خير الجزاء .. انسان مصرى .. محترم .. عاقل .. واعى .. شجاع

ومهتم بمصر بجد

ربنا يكتر من امثاله اللهم امين

Mony يقول...

فعلا عندك حق

احمد المسلماني
و برنامج الطبعة الاولي


مافيش كلام احسن من اللي قولتيه

صبرني يارب يقول...

اه والله يا فضفضه
الراجل ده فعلا محترم

واهم حاجه بعده عن الفرقعات الاعلاميه وحب الظهور والحركات السخيفه دي

ربنايحميه ويثبته

عين فى الجنة يقول...

انتى كده خلتينى احبه انا كمان وحاشوف برنامجه انشاء الله

وميض ابتسامة يقول...

السلام عليك ورحمة الله

حيث انه لايصح الا الصحيح ......
فأنا لايسعنى سوى مشاركتك هذا التقدير والاحترام لهذا الرجل الانسان احمد المسلمانى .. الذى اتابعه للاسف بطريقة متقطعة ..نظرا لظروف عملى ..
ولكنى اكن له كل التقدير ولبرنامجه المميز ونأمل ان يستمر بثه من مصر الحبيبة ..
خالص تحياتى

مـحـمـد مـفـيـد يقول...

مش عارف
البرنامج فكرته مميزه وجميله
بس احمد المسلماني مش عارف اقبله
حاسس انه تقيل

mido g يقول...

طبعا أفضل من عمرو أديب بكتير كفاية العلم و عدم النفاق

Dr. Ibrahim يقول...

أحمد المسلمانى

انا أحترمته من مقالك على الرغم انى لا اشاهد الدش اصلا لأنى معنديش دش ومش فاضى

بس فيه ناس اصحابى بيقولوا انت شبه أحمد مسلمانى فى كل حاجة

والوقتى انا اتأكدت منه شكلا وصفاتا

دى مش مدح ولكن تعجبا ممن قالوا لى هذا الكلام

شكرا جزيلا على هذه المعلومات

د إبراهيم

Kiara يقول...

انا برده بتابعه بصراحه بيجيب بلاوي

فاتيما يقول...

أحييكى على ذوقك يا فضفوضتى
الراجل دا هايل و محترم
و تقريباً كل أرائه بتعجبنى
و تشغل دماغى
تحياتى ليكى يا حبيبتى

محمد فاروق الشاذلى يقول...

معاكى فى رأيك يا فضفضة، وفعلا انا كمان خايف قوى إنه يعمل زى حمدى قنديل ويسيب البلد ويطفش، لكن ربنا يستر

شمس النهار يقول...

شوفي انا كمان بحبه لدرجة ان انا خايفه عليه من نفسه لايتغر ويتغير
ربنا يكفيه شر نفسه
وشر حزب اعداء النجاح

Unknown يقول...

الأخت الفاضلة
السلام عليكم ورحمة الله وبركاته
أكيد نحن جميعاً نشاركك الإعجاب به وببرنامجه المميز وأنا من المتابعين الدائمين لحلقاته ..وأهم مايميزه إلى جانب ماذكرتى أنه لايتعالى على المشاهدين

مصــــري يقول...

مساء الفل يادكتورة

بيتهيألي ان مفيش حد بيكره.

الراجل جرئ لدرجة مذهلة وعبقري في توصيل المعلومة.
اينعم زي ما قلتي انه لا ينفوق علي اللأستاذ حمدي قنديل.
الا ان جرائته تظل في مكان متقدم عن باقي مقدمي البرامج.

أسامة

زمان الوصل يقول...

مذيع محترم و يقدّم برنامج متميّز لكن له بعض المواقف التى تثير امتعاضى و قبله دهشتى !!
نقل خبرا مفاده أن الدكتور "أحمد عكاشه" الطبيب النفسى المعروف قال أن الرئيس "جمال عبد الناصر" تلقّى علاجا نفسيا من الاكتئاب بعد نكسة يونيو 67
وكان تعليق "المسلمانى" على هذا الخبر أنّه "لا يصح" أن يقال هذا على الرئيس "ناصر" متراجعا سنين ضوئيه قضيناها فى تخلّف معتبرين أن المرض النفسى سبّه أو شتيمه لا يصح أن يوصف بها الرئيس الملهم بينما لا غبار أن توصف نسبه معتبره من المصريين بأنّها مصابه بالاكتئاب و الأمراض النفسيه ولا يكون هناك غضاضه فى هذا بل القول المأثور "المرض النفسى زيّه زى أى مرض" !! طيب إيه الفرق بين أن يصاب "ناصر" بالاكتئاب أو أن يصاب بالسكّر كما هو معروف ولاّ "ناصر" ده كان من الخارقين !! بجد ضايقنى جدّا موقفه هذا و أدهشنى أن يأتى من شخص مثقّف زيّه !!

مهندس مصري بيحب مصر يقول...

متفق مع حضرتك طبعاً
الراجل ده من القلائل المحترمين في الإعلام المصري

karakib يقول...

له كتاب اسمه خريف الثورة صادر عن دار ميريت
لا يجب ان يفوتك ابدا

صاحب المضيفة يقول...

ماشاء الله على عرضك الطيب


تسلم الأيادي بجد

كل الود

koukawy يقول...

هو فعلا راجل هايل
و دمه خفيف اوي في عرض المواضيع
و بسيط يصل للقلب و العقل بمنتهي السهوله

غير معرف يقول...

جروب الطبعة الأولى على الفيس بوك


http://www.facebook.com/profile.php?id=100000234492762&ref=profile#/group.php?gid=162219330060&ref=mf

Unknown يقول...

http://www.facebook.com/pages/معا-لترشيح-أحمد-المسلمانى-رئيسا-للجمهورية/189581831080466?ref=ts#!/pages/%D9%85%D8%B9%D8%A7-%D9%84%D8%AA%D8%B1%D8%B4%D9%8A%D8%AD-%D8%A3%D8%AD%D9%85%D8%AF-%D8%A7%D9%84%D9%85%D8%B3%D9%84%D9%85%D8%A7%D9%86%D9%89-%D8%B1%D8%A6%D9%8A%D8%B3%D8%A7-%D9%84%D9%84%D8%AC%D9%85%D9%87%D9%88%D8%B1%D9%8A%D8%A9/189581831080466?sk=wall

القرآن الكريم