TvQuran

٢٠٠٩-٠٣-٠٨

ماليش دعوة ياما انا عاوزه حلاوة


حلاوة زمان عروسة حصان
وآن الاوان تدوق يا وله


ماليش دعوة ياما .....انا عاوز حلاوة
ماليش دعوة ياما ....يوه بطل داناوه
ماليش دعوة ياما.... حلاوة حلاوة


حلاوة زمان عروسة حصان


تعالى لعمك ....وشوف الحلاوه
وعيط لامك ....عشان الحلاوه
وعكر فى دمك..... عشان الحلاوه

ان الاوان ودوق ياوله


فاكرين الاغنيه دي -بصوت محمد قنديل وكلمات صلاح جاهين- كل ما باسمعها بافتكر المولد علي طول والحلاوه العروسه المتزوقه بمراوح من ورق الكوريشه - اللي اختفت و
مع ان المناسبه مصريه خالصه الا انه حل محلها عروسه صيني متزوقه بالتل ليها عيون زرقه وشعر اصفر !!!! بالظبط زي ما حصل مع فوانيس رمضان وسجاجيد الصلاه والسِبَح وحاجات تانيه كتير - وبافتكر كمان الحصان الاحمر ابوفارس رافع سيفه و اللي اختفي برضو في ظروفه غامضه

اكيد كلكم اليومين دول من غير عياط ولا دبدبه فالارض غرقانين فالحلاوه ، سمسمية علي حمصيه علي فولية ...الخ -اللهم لا حسد - لو تلاحظوا ان كل احتفالاتنا كمصريين مرتبطه بالاكل مع اختلاف الاكلات طبعا ، وكما لكل مقام مقال فلكل احتفال اكلته المخصوصه [ الا كفتة الرز فادي بتتعمل فكل المناسبات مش عارفه ليه :) ]

" يوسف عوف في واحده من حلقات ساكن قصادي اتكلم علي النقطه دي بطريقه ساخره جدا ووصف تحول سيده اجنبيه من عود البان الي شجرة جميز بعد زواجها بمصري واستقرارها بمصر واتباعها عاداتنا في الاحتفال بالاكل والاكل للاحتفال "

اتعودنا نحتفل بالمولد باكل الحلاوه وركوب المراجيح ولبس الطراطير الملونه واللعب بالعروسه والحصان وبعد كده نكسرهم وناكلهم ، والموكب اللي بيلف البلد من اولها لآخرها ويستقر عند الصاري - بقالي اكتر من عشر سنين ماشفتوش بعد ما سبت بيت امي اللي الموكب بيعدي من جمبه - كنت باحب اوي شكل العربيات المتزوقه وخصوصا اللي علي شكل جامع صغير ،ومنظر الناس وهما فرحانين وكتير منهم بيوزعوا كوبايات شربات او لبن علي اللي رايح واللي جاي اما في الارياف فكان اعيان البلد بيدبحوا ويفرقوا اللحوم علي الفقراء والمساكين

وكان كتير من الناس بيقيموا سرادقات امام منازلهم لذكر الله والقاء التواشيح الدينيه وحكايات السيره العطره ومدح الرسول عليه الصلاة والسلام


افتقدنا كل ده وفضلت بس الحلاوه ، وحتي الحلاوة التقليديه اللي متعودين عليها من سنين بدات تقل وتحل محلها اصناف تانيه غريبه واسماء اغرب باسعار اغرب واغرب ، خايفه كمان سنه ولا اتنين تختفي الحلاوة هي كمان او تيجلنا مستورده من الصين




20 comments:

صبرني يارب يقول...

لاااااااااا تقلقي هايحصل

هو مش بقى فى مصاصه صينى ؟؟؟

شويه شويه حلاوة المولد هاتيجى صينى

وبعدين انا ماليش دعوه ما شوفتش المواكب والحاجات دي اشمعن انتي


بس الاغنيه دي حلوه اوي
تصدقي انا ما سمعتهاش قبل كده

غير من تيته الله يرحمهاااااااا

كانت بتغنيها دايما بس مش بتكملها
واحيانا كانت تحورها بقى وتقولك حلاوة زمان عروسه وحصان وحلاوه النهارده فلان وفلان

الى هما اسامي العيال الى قاعدين معاها هههههههههههههههههههه
الله يرحمها يارب ويسكنها جناته


تحياتي ليكى يا فضفضه وكل سنه وانتى طيبه يا جميل





ملحوظه رفيعه عملت السمنه ولا جيتى ولا شميتى ريحتها يا اختي

Empress appy يقول...

انا كمان كنت بحب كل اللى قولتى عليه وافتقدته
بس ماما بتجيب ليه العروسه الحلاوة لسه لغايه دلوقتى بس مبقتش بجمال الاول
كل سنه وانتى طيبه يا حبيبتى

صيدلانيه طالعه نازله يقول...

اولا كل سنه و انت طيبه
انا برضه افتقدت المولد و احتفاله برضه من ساعه ما اتجوزت من 10 سنين
لان المولد فى اسوان ايام ماكنت مع ماما و بابا ليه احتفال تحفه بيبقى اسبوع بحاله و يبلغ ذروته ليله المولد اما فى اسيوط الاحتفال بيقتصر على بيع الحلاوه و بعد الامسيات الدينيه
الموضوع كله فقد لذه زمان و العروسه فقدت رونقهاو بقت عروسه عاديه حلوه من بعيد بس اما تقربى منها تلاقيها مسخ مالوش شكل و لون و طعم حلاوه زمان

Ahmed يقول...

صعب أني أصدق أن الحلاوه مش هتختفي زي غيرها

كل الحاجات الحلوه اختفت, اشمعنى يعني هيا ديه اللي مش هتختفي

بس ياترى هيظهر مكانها ايه؟
مسدسات آلي وبمب ضوئي للأطفال ولا أيه؟

أنسانة-شوية وشوية يقول...

كل سنة وكل سنة وكل المسلمين بخير انا بس اعرف بداية الاغنية اول مرة اكملها، جدى كان عنده محل حلويات وكان يأتى لنا بالعرائس التى نختار ملابس والوانها نحن ويزينها باحلي الزينة اه فكرتنى بأحلي ايام الله يرحمك يا جدى

الفقيرة إلى الله أم البنات يقول...

دكتورتى المفضله
الحقيقه عندنا فى القاهره او يعنى عائلتى معندناش الطقوس الرائعه دى خالص
كويس انها مكنتش عندنا علشان مفتقدهاش كده
بس الأكيد كلنا بنفتقد الروح المصاحبه للمناسبت ..وبعيد عن الأكل وما شابه
كانت المشاعر رائعه

بتغيبى كده ليه..مش الصيادله فكوا الاعتصام..؟
معتصم فين بعيد عننا
بجد وحشتينى

ღϠ₡ღأمير الهدوءღϠ₡ღ يقول...

ده أكيييييييد

الاول مبروك على الإستايل التحفه ده
لاني مدخلتش هنا من زمان


^_^

فعلا كل الأيام الجميله
راحت
والواحد لما بفتكر الايام دي
ممكن عينه تدمع

مشتاق للماضي
لكن صعب إنه يرجع تاني

تحياتي
^_^

نعكشة يقول...

يعني مش بعيد متخافيش خالص

كلو هيوبجى صيني يا بنتي

على الرغمن اني مليش في الحلاوة بتاعت المولد

و اني عمري ما جبت العروسة الحلاوة

إلا إني بحب اتفرج على المحل و هوه عارضها
وكان زمان عند خالي فيه عروسة من ايام الاغريق -بهرج- قديمة يعني حاططها لما مرة جاب حلاوة المولد

امو هند مش فارخة

حكاية الاكل بقة اللي في كل المناسبات فدة في كل مكان مش بس في مصر
الاكل مصدر سعادة يعني
لما تشوفي صنوف الاكل قدامك كدة بيعمل سعادة في الواحد
برغم اني دايما بعدها بقلب بإكتئاب لإني بكون كلت كتير
هههههههه

المشكلة اية بقة اني دايماً افتكر اني سمعت ان الرسول عليه افضل الصلاة و السلام كان بياكل صنف او صنفين بالكتير
و كل ما اقول هعمل كدة
ألاقي اصناف مختلفة عالسفرة هنتحاسب عليها كلها

يلا خير

صحيح كل سنة وانتي طيبة

سلام عليكِ

مهندس مصري بيحب مصر يقول...

طيب أعمل ايه انا بقى اللي مفتقد هنا مظاهر الحاجات دي كلها

كل سنة و انتي طيبة يا دكتورة
:)

MaNoO يقول...

هههههههههههههههههه
هبدأ من الصين وهقولك مضمنش اقول اه اول ا بس يمكن برده
تعرفى زمان كنا نروح المسجد بعد صلاة العشا عشان هيوزعوا حلاوة وننتظر بقى كان جو بجد حلو جدا وكنا نجيب العروسة الحلاوة تتحط وخلاص محدش يكلها متعرفيش بتيجى ليه اصلا
يارب نقدر نحيى اى حاجة من دى تانى او حتى نحافظ على الموجود
تقبلى مرورى واتمنى التواصل بالمدونات

sydalany-وش مكرمش يقول...

مين الناس دول!!!!!!!!
أنا كنت داخل اسيب كومنت فوجئت إن كل اللي عامل كومنت ناس ما أعرفهاش
يااااااه
انا قد كدة منفصل عن التدوين!!!!!!!

المهم
يا ستي شوية حتلاقي الناس بيحتفلوا بمولد حد تاني
مش بعيد يتعمل عيد أي حاجة ف نفس اليوم
عيد الأكل ...عيد الشرب أي حاجة و السلام عشان يضربوا اليوم
بس بيني و بينك الاحتفال المفروض يبقى طول السنة مش ف يوم المولد بس يعني من الآخر ...عاوز آكل حلاوة طول السنة
ملحوظة: أنا مع الناس التانيين اللي ما بيبحبوش إن أي احتفال بحاجة عظيمة يبقى يوم ف السنة
زي المولد النبوي
و عيد الأم
و عيد الطفولة
و عيد الحب
كلها حاجات المفروض تبقى معانا طول السنة مش يوم و اقلب

يا مراكبي يقول...

وأحب أضيف أنا كمان للبوست ده إن المقيمين خارج مصر ممكن ما يعرفوش إن فيه إحتفال بالمولد النبوي أصلا .. مش مجرد إختفاء العروسة والحصان .. لأ .. ده إختفاء المناسبة كلها أساسا

في بعض دول الخليج ممكن يمنحوا يوم عطلة بمناسبة المولد النبوي الشريف .. وفيه دول تانية ما بتحتفلش بيه أصلا

وسواء هنا أو هناك مافيش أي مظاهر لأي حلاوة مولد .. الأولاد نشأوا وهما ما يعرفوش أي حاجة عن المظاهر الجميلة دي للأسف

شمس النهار يقول...

كل سنه وانت طيبه
بس بصراحه انامابحبش الحلويات وليه تحفظ في موضوع التخن ده
الانسان ممكن ياكل كل حاجه بقدر بسيط في الحاله دي عمره ماهيشبع لكن لوزود عن طاقطه اكيد هيتخن وخصوصا كمان لو كان كسلان ومابيتحركش كتير

فكرة من الزمن ده يقول...

كل سنة وانت طيبة
وجميلة اوي الاغنية ياخسارة كل الحاجات الجميلة بتندثر من حياتنا
بس انت جبتي صورة عروسة المولد دي منين ده انتي شكلك قاطعاها من كراسة الرسم بتاعتي وانا في ابتدائي كان لازم ارسمها بالشكل ده كل سنة
تحياتي دمتي بخير

جنّي يقول...

السلام عليكم

رجعتيني لايام زمان .. كنت بحب اشتري سفينة او حصان ونلعب بيها وبعد المولد توضع فوق الدولاب ولو النمل ما اكلهاش نكسرها ونعمل بيها بالوظة او مهلبية ..

الاغنية موجودة عندي لو عاوزاها ومن الحان احمد صدقي

شكرا يا دكتورة

عمرو يقول...

كل سنه و أنتى طيبه يا دكتوره و تعود علينا و عليكم الأيام بخير يا رب
فعلا و الله كانت على أيامنا العروسه الحلاوه و الفارس اللى على الحصان من أحلى مظاهر الاٍحتفال بمولد سيدنا النبى عليه الصلاة و السلام
و كانت بتنباع بالكيلو و كان الكيلو ب 7 قروش على ما أذكر لكن دلوقتى كل حاجه بقت بلاستيك حتى العقول و القلوب بقت حاجات صناعيه لا حياة فيها
أنا خايف ييجى يوم و الصين تورد الهوا و الشمس للعالم
ربنا يستر :)

kochia يقول...

لفت نظري اكتر حاجة موضوع استيراد الحلاوة من الصين ...
ربنا يخلي الصين

حنعيش يعنى حنعيش يقول...

حلو البوست بس على فكرة انا المدير الوحيد اللى ميتظبطش والدليل انى حاخصم للماضة يومين بسببك

Maha يقول...

تدوييييييينة راااااااااائعة

بحب الحاجات دي قوي

الجو المصري اللى نفتقده

Maha يقول...

آه لحظة .. مع إقراري بإني بحب الجو المصري دايما في كل حالاته

بس الإحتفال بالمولد بدعة لا شك فيها ولا أشارك فيه ولا أوافق عليه

حبيت أوضح النقطة دي بس :)

القرآن الكريم