TvQuran

٢٠٠٩-٠٥-٢٩

السواقة ادب ...مش لفة دركسيون





حلم غريب كان دايما بيتكرر معايا كتير، يمكن فيه اختلاف بسيط في الاماكن او بعض الاحداث بس الخط الرئيسي في الحلم واحد مش بيتغير ابدا
باحلم دايما اني باسوق عربيه بالليل( مع اختلاف نوعها او مكان تواجدها ) ومش عارفه اتحكم في اتجاهها ولا سرعتها ولا حتي عارفه اوقفها وبيتملكني احساس رهيب اني اكيد اكيد لازم في الآخر هاخبط في اي حاجه والعربيه ها تتدمر وانا كمان اكون في خبر كان بس الحمد لله بصحي قبل ما ده يحصل
مش عارفه بالظبط ايه دلالة لحلم ده
بعض المفسرين بيقولوا ان قياده السياره ترمز للتحكم في الحياة ومافيها من صراعات مع النفس وهموم الحياه وان فترة الجلوس فيها هي فتره مؤقته او انتقاليه من حياة الشخص ده
معني كده اني في مرحله من حياتي مش عارفه اتحكم فيها خالص ولا اخد اي قرار صحيح ولا حتي قراراتي مؤثره في خط سير حياتي !!!!

يمكن ...!!!؟؟؟؟

كذب المنجمون ولو صدفوا

وبما ان كل الناس بقوا مفسرين للاحلام وكل واحد بيفسر علي مزاجه انا كمان هافسر اشمعني انا يعني

وتفسيري للحلم هايكون مختلف لان ماحدش يعرفني كويس اد ما انا اعرف نفسي :

اولا اعتقد ان السبب الرئيسي في الحلم ده اني كل ماروح الملاهي واركب العربيات الكهربا مش باعرف اتحكم فيها ولا اسوقها كويس وبتفضل ماشيه في اتجاه واحد او تلف في دواير ومش باعرف اوقفها ابدا الا لما تقف لوحدها :)

تاني حاجه اني دايما باصاب بدوار الحركه لما اركب اي عربيه وبيجيلي غثيان شديد حتي من ريحة البنزين

كمان كمية الحوادث الرهيبه اللي كل يوم نسمع عنها دا غير عدم التزام السواقين في كل حته واللي بيعمله سواقين التكاتك والميكروباصات في الناس سواء اللي راكبين ولا اللي ماشين

والفوضي الرهيبه اللي في كل شوارع مصر المحروسه واللي ماتشجعش حد ابدا انه يغامر باعصابه ويركب او يسوق عربيه

كل ده كون في عقلي الباطن عقده وشنيطه من العربيات وكرهتها من كل قلبي

وخلاني رافضه لفكرة تعلم السواقه اللي زوجي بيلح بيها عليّ اليومين دول

واكيد اكيد هو سبب رئيسي من اسباب الحلم الغريب ده

ايه رايكم في التفسير ده بالذمه مش منطقي و بيعتمد علي اسباب واقعيه
ومش المفروض اني من هنا ورايح اشتغل في التفسير

ولا هو الشيخ سيد احسن مني :)




19 comments:

حلم بيعافر يقول...

لا لا شيخ سيد ايه؟
خليكى عاقلة
دنصاب
الحلم دهه على فكرة حلمته قبل كده
بس مش عارف معناه برضه

مهندس مصري بيحب مصر يقول...

تفسير منطقي

بس أنا بعد ما إتعلمت السواقة في السعودية و سقت هناك و بعدها قارنت في الأجازة اللي إتعلمته و مارسته باللي بيحصل في مصر

أدركت إنك لازم تكون بهلوان في سيرك علشان تسوق في مصر
مفيش أي إلتزام بأبسط القواعد و بعدها يسألوا الحوادث كتيرة ليه

لو مفيش ضرورة ملحة لتعلمك السواقة يبقى ما تتعلميهاش أحسن
أو إتعلميها بس حاولي ما تسوقيش غير للضرورة

الفقيرة إلى الله أم البنات يقول...

أولا الشيخ سيد مش احسن منك
هو بس أخد فرصه فى الفضائيات وإنت لاء

ثانيا لازم تتعلمى السواقه لانها تيسر أمور كثيره
وياستى انا بسوق بقى لى 25 سنه
وبخاف من العربيات المتصادمه ولما اركب مع بناتى اغمض عينى علشان مشفش العيال وهما نازيل ضرب فى جنابى

عادى يعنى
بس ممكن اسأل لك أحدهن بتفسر ومن بيتهم ملهاش دعوة بالفضائيات
بقترأ فى ابن سيرين
فكرى وقررى وارمى بياضك

karim يقول...

اعتقد سيدتى ان اللى يخاف من العفريت يضهرلة هو دة سبب حلمك ضغوط السواقة مع بعض الافكار الخاصة بالعربيات, عايزة نصيحتى اوعى تسوقى بجد بقت شىء يجيب الضغط,تحياتى

FOrty يقول...

مش عارف ليه افتكرت الفيلم بنتاع فاتن حمامه و هى برضه بتحلم انها سايقه العربيه ووقفت على شريط القطر بس انتى حلمك ارحم كتير من غير قطر :)
بالمناسبه كونك صيدلانيه ملقتيش علاج للدوار ده فى ناس كتير اعرفهم بيعانو منه و لا نافع مهاهم دراممكس و لا برامبرام
تحياتى

نعكشة يقول...

قدامك سكة سفر
و هتحصلك حاجة حلوة
بعد
ثانيتين
دقيقتين
ساعتين
يومين
شهرين
سنتين
أو قرنين

حسب

ههههههههههههه

ربنا يكرمك في حياتك

........
أنا عكسك تقريبا

بحب السواقة كدة
و قاعدة بزن على والدي عشان أتعلم

روحت اتعلمت بس نسيت

هاخد كورس تاني ان شاء الله و هعمل البتاعة دية

و ربنا يستر

سلام عليكِ

مخبر قمل دولة يقول...

بشرى خير ان شاء الله
مستنيكي توك توك صيني في المستقبل
قال شيخ سيد قال

مجداوية يقول...

السلام عليكم

تنفعي ونص
بس قبل ما اقول تنفعي ليه أقولك إن تفسير الأحلام ليس بالضرورة تنجيم لأن المنجمون يدعون أنهم يعرفون الغيب والمستقبل فهناك من يلجأ لهم لأخذ المشورة قبل القيام بأمور حياتهم ومن صدقهم فقد أشرك بالله ولا تقبل صلاته أربعين ليلة ومن أيقن بما يقولون وعمل به فقد كفر بالله والعياذ بالله

أما تفسير الأحلام كما فعل سيدنا يوسف عليه الصلاة والسلام فهي منحة وهبة من الله عز وجل لبعض عباده المخلصين المختارين والرؤيا الصادقة للانسان هي علامة متبقية من علامات النبوة

ونأتي لحلمك المتكرر
فعقلك الباطن مشغول بالفعل بأمرين هما حياتك وعدم قدرتك على السواقة والعقل الباطن يخرج مكنوناته في شكل أحلام وعند التقصير في أمر ما تأت الأحلام المقلقة لتقول لنا ما نخفيه عن أنفسنا ونحن مستيقظين واذا كان هذا الحلم يضايقك فكان من الأفضل ألا ترويه لأحد وتستعيذي من الشيطان وتبحثي في نفسك عما يقلقك وما قد تكوني مقصرة فيه
واذا كانت السواقة هي التقصير فعليك بمدرسة لتعلم القيادة وكفى الله المؤمنين شر القتال لتنعمي بنوم هادىء
:)
:)
استفتِ قلبك

صوت من مصر يقول...

دى هلوسه
انا برضه الفنجان بتاعى النهارده كان ايه ابيض من جوه واحده زميلتى بتقراهولى قالتلى انت م ظاهرك اى حوار

ayman gad يقول...

هههههههههه موضوع لذيذ بساللى انا نفسى افهمه حاجه واحده بس هيا الحروف دى معناها اىه وا بترمز الى ايه هتجنن وكل مشوف عربيه اتجنن واقعد اقلف وزى متيجى

يا مراكبي يقول...

ده أنا من عنوان البوست والصورة افتكرت ان البوست بيتكلم عن المرور في مصر .. طلع الموضوع حلم؟

ما قلتيش يا دكتورة انك قلبتي المدونة برنامد تفسير الأحلام

إنتي كده ممكن تكسبي دهب على فكرة .. بلا تدوين بلا بتاع

فكرة من الزمن ده يقول...

ههههههههههه
مين الشيخ سيد ده
ياشيخة صلي ع النبي
وبلاش تتفرجي عليه كتير
اما نصيحتي بلاش
تسوقي
لان في مصر محدش بيعرف يسوق
وفي الاخر اكتر حد بيتشتم الستات
واول جملة بتسمعها اي واحدة اول ما تسوق الله يخرب بيت اللي علمك السواقة ياشيخة ماتعودو في بيتكو بقى ماليتو البلد

فخلينا باحترامنا احسن
ههه
تحياتي

محمد عبد الغفار يقول...

متحكيش احلامك لحد فالرؤيا اذا فسرت وقعت

د. ياسر عمر عبد الفتاح يقول...

انا حلمت حلم شبه ده قبل كده
واتصلت بشيخ وفسره
هوه علي العموم فسره غلط

الأحلام دي لا يعول عليها بشيء نهائي
ويمكن يكون تفسيرك صح
لأنه هوه دهاللي بيحصلك في الحقيقة

ماله العربيات بس؟
فيه حد لسه بيخاف كده من العربيات؟

غير معرف يقول...

فعلا
السواقة أخلاق
تحياتى لك

م. حجاز يقول...

افسرلك انا الحلم... قدامك طريق طويل... مش باينله راس ولا ديل... بس خلى بالك يابنيتى هو مشورا يهد الحيل... لا تزلعى ولا تغضبى واتواكلى على ربنا وشدى رحالك وهو فى الاخر يطلع جميل...
على فكره يادكتوره مدونتك جميله جدا وشدتنى بجد ياريت تشرفينى فى مدونتى وتقوليلى ايه رأيك
http://moon-bokra.blogspot.com/

!!! عارفة ... مش عارف ليه يقول...

افتكر ان التفسير مقبول جدا

وخصوصا إنك ارجعتي كل شيء للعقل الباطن

واللي اكيد له دوور رئيسي في موضوع الأحلام دي

وإن شاء الله ربنا يعافينا من السواقين وعفرتتهم

وهابي دريمز إن شاء الله بعيدا عن الملاهي وعفاريت الأسفلت

تحياتي
وليد

Maryama Qandil يقول...

الي شااغل بالك العربيات الي في الملاهيوالعربيات في شوارع المحروسة...:D

على فكرة انا برده بحلم بلعبة need for speed وشوية جيمز للاي كيو

الواحد اتعلم السواقة واعتزلها من قبل ان يمارسها ...بلد نظام ومرور...حاسبي الاشارة بس اوعي تكسريها

مقطوعة من بلوجة تانية ليا اقريها

-------------------------------
عالم هلفطة ...عالم مجانين
-------------------------------

الحالة الاولى
مواطنة ماشية في الشارع وبتعدي الشارع وهي بتبص في كل الاتجاهات وخلاص كأن راسها بقى فيها سست و صامولة عشان تبص في كل حتة قصادها ويمينها وشمالها عشان خايفة تداس وهي في بالها
هتهلفط هتقول ايه غير
اشكي ايه ولا ايه...أصله حمار الي علمهم السواقة واداهم الرخصة
تعمل ايه ساعتها...:)
ذنبها ولا ذنب حكومتها ولا ذنب الي بيسوقوا العربيات ولا ذنب الي علموهم السواقة
كل واحد بيجري ورا مصالحه مش مراعي غيره
كله بيدوس في كله وعيش يا مصري عيش

تحياتي,,,

Unknown يقول...

شدي حيلك واتعلمي السواقه لانها ستفيدك بدل زحمة المواصلات

القرآن الكريم