TvQuran

٢٠٠٧-٠٧-٠٥

سياسة التوشيش



سياسة التوشيش ..اكيد اللفظ غريب ، لوحد راح سوق الخضار قبل كده او اشتري فاكهه اكيد هايكون عارف المعني

عارفين لما البياع يقولك : دا وش القفص يابيه ، ويكون بيقصد انه باع لك احسن حاجه عنده ، هو كده يكون بيمارس سياسة التوشيش

لما في اعلانات التي في شوبينج تبقي شايف الحاجات آخر تمام ومافيش بعد كده ، وبعد ماتشتريها تلاقي انك خدت اكبر مقلب في حياتك....
هي دي سياسة التوشيش

لما تشوف الخضار والفاكهه قدامك مافيش ولا احلي وبعد ماحضرتك تتدبس وتشتري تروح البيت تفتح الكيس تلاقي تلات ارباع اللي انت اشتريته بايظ....هي دي بقي سياسة التوشيش

وسياسة التوشيش دي اعتقد انها اختراع مصري صميم ، من ايام الفراعنه ، والسياسه دي مش بتطبق علي الخضار والفاكهه بس ، لأ.... احنا لو بصينا بتمعن شويه في كل اللي حوالينا هانلاقي انها موجوده في حاجات كتير اوي

لما يتعرف ان فيه زيارة
مسئول كبير لاي حته ، و يبدأ التنظيف والتوضيب ويبقي المكان وجهة الزياره آخر تمام ومافيش ولا كده في الاحلام ، وحارة ميمون القرد تبقي حارة ميمون بيه القرد ، وبعد مايمشي المسئول الواد ميمون ياخد علي قفاه .....هي دي سياسة التوشيش

لما تخرج علينا الحكومه بكام تصريح عن الحياه الورديه والاسعار اللي هاترجع لايام السحتوت و مياه الشرب اللي ولا الميه المعدنيه و تحسين رغيف العيش اللي بقي ولا الكورواسون وغيرها من التصريحات اللي كلنا عارفينها ، ونيجي نشوف ايه اللي اتحقق مانلاقيش .....
هي دي سياسة التوشيش

لما الارصاد الجويه تقول ان درجة الحراره 40 مئويه وهي في الاصل 400 مئويه ...هي دي سياسة التوشيش

لما اي مرشح لاي انتخابات قبل مايبقي عضو مجلس يقعد يجر ناعم ويوعد بمليون حاجه وبعد ما يدخل المجلس آدي وش الضيف ....هي دي
سياسة التوشيش

لما يخرجوا علينا بتصريحات عن نزاهة الانتخابات واختفاء التزوير وسيادة القانون ونسبة 100 % حضور ، والحقيقه غير كده ....هي دي سياسة التوشيش

لما العرب يعملوا مؤتمرات قمه ويبقوا في الجلسات المغلقه ضاربين بعض بال*** وفي الجلسه المفتوحه يتطلعوا علينا وكله سمن علي عسل ويرزعونا كام قرار للشجب والتنديد علي السريع ....
هي دي سياسة التوشيش

لما امريكا توجع لنا دماغنا كل يوم الصبح بالكلام عن الحريات ونشرالديموقراطيه ومساعدة الشعوب وهي بتمارس التعذيب والقتل والاعتقال في كله حته علي وجه الارض وعندها اكبر معتقل شافه التاريخ ...
هي دي سياسة التوشيش


لما البياعين وبتوع السياسه والدول العظمي يعدوا يرصوا بضاعتهم علشان تبقي احسن حاجه علي الوش واللي مش اد كده تبقي مداريه تحت ...هي دي سياسة التوشيش

يعني : من برا هلا هلا ومن جوا يعلم الله

يعني : الكذب واخفاء الحقائق ، وتزويق الواقع الاليم ، واعتبار ان الشعوب مجرد مجموعه من العُبط اللي بيصدقوا اي حاجه تتقال لهم

يعني : الكلام اللي بنسميه كلام جرايد واللي مابيصفاش علي الربع

يعني ....ويعني ...ويعني .......

هي دي سياسة التوشيش

44 comments:

Gid-Do - جدو يقول...

طيب ماهو الشعب المصرى بذكائة الفطرى ادى دهرة لكل دة وسماة كلام جرايد
كان فية نكته من زمان تنطبق على الحال دة النكتة بقول

مذيع الراديو بيقول
نذيع عليكم برامجنا على موجات طولها
وابتدى يقرى اطوال الموجات
ابن البلد هز راسة وقال
قول زى ماانت عاوز هو فية حد بيقيس وراك

مشاركة الشعب فى الانتخابات تكاد تكون معدومة ورغم هذا الحكومة بتطلع نتايج زى الفل والشعب عارف والحكومة عارفة والدنيا عارفة انه تزوير فى اوراق رسمية ـ وهى جريمة يعاقب عليها القانون

على فكرة مرة قبل انت ما تتولدى اشتريت موز مستورد من سوق التوفقية فى القاهرة ـ بعد ما حط البياع الموز فى الكيس قدام عينى راح حاطة على الميزان واتارية حاطط جنب الميزان الموز السكة خدت الكيس وروحت البيت وقلت لامى ـ يرحمها الله ـ جبتلك موز عجب ضحكت وقالت ورينى ياحكيم زمانك خدتة على المطبخ وخرجت تقولى ياما جاب الغراب لامه ـ وكانت المفاجاءة موز مصرى يترمى ـ تحياتى

رينـــــــــــا يقول...

السلام عليكم
فضفوضه ازيك
انا عارفه انك اكيد زعلانه وانا مقصرة معاكى بجد
بس والله غصب عنى حقك عليا

بالنسبه للبوست
هكرر الجمله مرارا وتكرارا
يبقى انت اكيد اكيد فى مصر

Alaa يقول...

مفيش حد في مصر يا دكتورة بأه بينضحك عليه بالكلام ده
الناس فهمت
بس المهم امتا هتكون الحركة

تحياتي

عصفور المدينة يقول...

زي ما قال الأخوة السابقون وأولهم
جدو
ما حدش عاد بيصدق بس المشكلة إن الكذاب لازال بيكذب ويحترف
سياسة التلميع
وممكن يكون بنفس الأساليب القديمة يعني حتى مش مكلف نفسه يبتكر

Unknown يقول...

المصيبة انهم عارفين اننا فاقسينهم وكاشفين حراكاتهم
وبكل بجاحة وبرود يطلعوا يقولوا نفس الكلام وينفذو نفس السياسة

بجد حسبى الله ونعم الوكيل

بوست جميل اوى يا فضفوضة
:)

البنت الشلبية يقول...

فعلا مفقوسة اوى..قال يعنى احنا بنصدق

بصى الشعب المصرى ودن من طين وودن من عجين

هوا وش القفص حلو فى حاجة واحدة لما بتشترى الفاكهة ومع كده وبرده الراجل لازم يدينى وحداية ضاربة فى النص

نقول ايه بقى ..لك الله يا مصر

زحل الفلكي يقول...

لما بنروح مكان جديد وكل اللي فيه يبقا فيهم اللي يعلمه ربنا
ويظهر الوش

لما تتعرفي على حد جديد وتتخدعي فيه مهو برضه بسبب الوش

لما تلاقي واحد بيبيع كتكوت على انه بيرقص وتلاقيه اصلا حاطه على صينيه تحتها بابور
يبقا برضه من الوش

وربنا يكفينا شر الوش الوحش

يا مراكبي يقول...

الحر لسة شغال معاكي جامد

ممكن تلاقي واحد لابس بدلة شيك وكرافتة ومنديل وجزمة تحفه .. وتكون الفانلة الداخلية مقورة ومخرمة

هو ده المعني الصريح المباشر للمثل المصري الأصيل: من بره هاللا هاللا .. ومن جوه يعلم الله

اللي هو التوشيش يعني بلغتكم يابتوع المدارس

أي خدمة

sakayar يقول...

أيون أنا كمان معاكي فـ إن سياسة التوشيش سياسة مصرية والدليل على إنها من أيام الفراعنة التمثال اللي بتيجي على وشه الشمس مرة يوم تنصيبه ملك ومرة يوم ميلاده المرتين الشمس بتيجي على وشه ... شفتي بقى إن الفراعنة اول من اخترع سياسة التوشيش
تحياتي

Unknown يقول...

أعتقد أن ممكن سياسة التشويش تتلغى طول ما فى مدونات أمينة و نظيفة زى المدونة الراقية دى
أرق تحياتى على شعار الحجاب الموجود بالهامش و على التنسيق الجميل للمدونة
بالغ تحياتى :)

http://kasperb4.blogspot.com/ يقول...

احنا مينفعش معانا غير كده للأسف
طول محنا مصدرين العبيطة والطرشة ومكبرين دماغنا
وبنقول خلينا ماشيين جمب الحيط
نستاهل اللي يدينا على قفانا
ده احنا كمان بنسقف لهم
يعني حاجة اخر عبط وهبل
يا شيخة ده حاجة تقرف والله الواحد مخنوق ولو اتكلمت اكتر من كده ممكن اخبط
الله يسامحك يا دكتورة بوظتي حالة التوازن اللي كنت عايشها وفكرتيني بالخلل اللي عايشينه

صاحب البوابــة يقول...

وككل انواع الخداع

فإن تلك السياسة لن تستمر

تحياتي اختاة

gohayna يقول...

مساء الخير يا دكتوره

طبعا لا غبار علي كلامك

بس يمكن الناس دلوقتي بقيت انصح شويتين من زمان

صحيح بيتضحك علينا لغايه دلوقتي

بس برضه كميه الضحك قليت شويه

ربنا يسهلنا ونخلص من الي احنا فيه

تحياتي يا جميله

mohand يقول...

السلام عليكم
وسلملي علي النزاهه والشفافية والمصداقية
بقت شعارات وراحت خلاص
بس علي فكرة انتي قولتي انها اختراع مصري
وفي النص بينتي انها اختراع عالمي
مش مصر بس
الهم بقي اننا خلاص بقيني مش بنثق في اي شئ
-------------------
طيب ما تشوفي واحده غيرها
متزعليش مني ما هما كتير يعني مش قليلين
او شوفي اسستنت يكون زيه زي الدكتور كده حاجه زي الفل
النوعيه دي كتيره
شدي حيلك المهم
ربنا معاكي

الطائر الحزين يقول...

مادام مفيش رد فعل يبقى السياسة ماشية زى ما هيا
تحياتى

S H A H يقول...

الكل فاهم و الكل سااكت

ma 3lina يقول...

الكلام دا في السياسة .. مش كده
بس إيه علاقته بالسوق والقفص ...

تكونش هي دي اللي بيسموها الطبيخ السياسي ؟؟؟

طيب أنا مش حقدر اعلق على البوست عشان مش بفهم في السياسة ولا بفهم في أي حاجة .. دا اللي اتأكدت منه لما تابعت جرايد وش القفص وتلفزيونات وش القفص .. اتأكدت إن كلنا مش بنفهم في حاجة وإن هو وشلته بس في مصر اللي بيفهموا في كل حاجة

خمسة فضفضة يقول...

السلام عليكم ورحمة الله وبركاته

جدو

اهلا وسهلا بيك لاول مره في مدونتي المتواضع


الشعب المصري عمره ما بينضحك عليه ، الناس بتبقي عارفه كل حاجه و مطنشه بمزاجها ، المشكله الكبيره ان الناس اللي بتمارس سياسة التوشيش وبيقولوا كلام جرايد مابيزهقوش ومش قادرين يصدقوا ان مافيش حد مصدقهم


بالنسبه للموز معلش بقي ياجدو تعيش وتاخد غيرها ..ههههه

نورتني

خمسة فضفضة يقول...

السلام عليكم ورحمة الله وبركاته

رينا

اهلا بيك يا حبيبتي
معلش عارفه انك اكيد مشغوله في اجراءات السفر ..ربنا يوفقك

ونورت مصر

تحياتي

خمسة فضفضة يقول...

السلام عليكم ورحمة الله وبركاته
علاء

ايوه ماحدش بيصدق وبرضوا مش بيبطلوا توشيش الاقفاص

بس حركة ايه اللي انت بتتكلم عليها...هو احنا فينا من حركات ...هههه

خمسة فضفضة يقول...

السلام عليكم ورحمة الله وبركاته

باشمهندس عصفور

تقريبا عاوزين دورات تدريبيه في احدث اساليب التوشيش ، انصحهم يروحوا يخدوها عند البروفيسير بوش الابن

خمسة فضفضة يقول...

السلام عليكم ورحمة الله وبركاته

انسانه

ايوه حسبنا الله ونعم الوكيل


تحياتي

خمسة فضفضة يقول...

السلام عليكم ورحمة الله وبركاته

شلبيه هانم

احلي حاجه في الشعب ده انه ولا بيهمه سايب اللي يقول يقول واللي يحصل يحصل ولا هوه هنا ولا اكن البلد دي بتاعته اصلا


معلش لكي بقي ما يقع الا الشاطر ، ابقي خدي بالك المره الجايه


تحياتي

خمسة فضفضة يقول...

السلام عليكم ورحمة الله وبركاته

زحل الفلكي

اللهم آمين
ربنا يكفينا جميعا شر الوش الوحش

خمسة فضفضة يقول...

السلام عليكم ورحمة الله وبركاته

باشمهندس احمد

آه الحر تقريبا كده بوظ الربع اللي كان فاضل سليم ، يعني شويه حر كمان وهاتلاقيني في العباسيه

شكرا علي الوصف التفصيلي للبدله والكرافاته

نورتني

خمسة فضفضة يقول...

السلام عليكم رحمة الله وبركاته

سكايرا

ايون طبعا سياسه مصريه وفرعونيه كمان
خد مني الكلام وماتدورش وراه، ثقه يا ابني .....ههههههه

خمسة فضفضة يقول...

السلام عليكم ورحمة الله وبركاته

عاليا حليم

شكرا علي ذوقك ، نورتي مدونتي المتواضعه وياريت ما تبقاش آخر زياره

خمسة فضفضة يقول...

السلام عليكم ورحمة الله وبركاته

كاسبر

آسفه ليك جدا ، بس اعمل ايه بقي لازم انفس والا هاطق في الحر ده

خمسة فضفضة يقول...

السلام عليكم ورحمة الله وبركاته

صاحب البوابة

دوام الحال من المحال

تحياتي

خمسة فضفضة يقول...

السلام عليكم ورحمة الله وبركاته

د/ جيهان

مابينضحكش علينا يا دكتوره ، احنا مطنشين بمزاجنا

تحياتي

خمسة فضفضة يقول...

السلام عليكم ورحمة الله وبركاته

مهند

اختراع مصري وصل للعالميه ، واثبت نجاحه كمان

------------

لا انا مش باثق في اي حد يجي يشتغل خصوصا اني بسيبله الصيدليه لفتره 5 او 6 ساعات بيبقي لوحده
كمان البنت فقوق انها امينة جدا فهي خبره اكتر من 15 سنة صيدليات
ربنا يسهل هي كانت والده و مستنيه ابنها يكبر شويه وتلاقي حضانه تقبله
ادعيلي

تحياتي

خمسة فضفضة يقول...

السلام عليكم ورحمة الله وبركاته

الطائر الحزين

اكيد هايجي اليوم ويبقي فيه رد فعل ، واكيد هايكون ان شاء الله مش هايكون قليل

خمسة فضفضة يقول...

السلام عليكم ورحمة الله وبركاته

شاه

مريحين دماغهم

نورتني

خمسة فضفضة يقول...

السلام عليكم ورحمة الله وبركاته

باشمهندس ماعلينا

ايون هوه ده بقي الطبيخ السياسي اللي بيقولوا عليه

طيب بلاش تعلق خدلك اتنين كيلو فاكهه من وش القفص :)

BinO يقول...

بالمناسبة السعيدة ديه
الوزير كان عندنا أنهارده
وشفت أكبر توشيش في حياتي
:)
مش ممكن
فجأة الموقع تغير حاله
شوارع ظهرت من العدم
وأرصفة
وحاجات غريبة
ونا طلعت متعرفش منين

يلا ماعلينا
كله تمام يا فندم
وكلوا عيش

خمسة فضفضة يقول...

السلام عليكم ورحمة الله وبركاته

باشمهندس بينو

شفت اد ايه التوشيش ذو قوة ثلاثيه منتشر ومتوغل ومستمر ....

ومعلش بقي كلوا عيش كلوا جاتو كلوا كل اللي اتحبوه

تحياتي

كرم مسلم يقول...

السلام عليكم

اللهم غير الحال الى أفضل حال
آمين

Hadota ... حدوتة يقول...

السلام عليكم
احييك على قوة ملاحظتك اللى ابدعت لنا البوست الحلو دا
الفكرة موجودة ومكنش حد يعبر عنها بالتحديد والرؤية دى
احييكى
وانتى لو لاحظتى هتلاقى بنعملها حتى على مستوى حياتنا العادية
جاى لنا ضيوف او عريس او مش عارف ايه تلاقينا روقنا بزيادة وجبنا حاجات جديدة عشان نبان احسن
دا مش معناه اننا اصلا وحشين

وبرده لما نبقى رايحين انتر فيو بنلبس حلو شويه
برده شعان نبان احسن

يتحصل كتير صدقينى



على فكرة كل سنة وانتى طيبة
معرفتش اجى اهنيكى فى عيد ميلادك لانى والله كان عندنا ضيوف معرفغتش المس الكمبيوتر ولا حتى اعدى جنبه

ويوم السبت كلن فرح اسماء

كل سنة وانتى طيبة بالف خير وعقبال مليون سنة


يللا حالن بالن بالن حيوا ابو الفصا
هيكون عيد ميلاده الليلة اسعد الاعياد فليحا ابو الفصاد


على فكرة القبض لسه
بس هديتك محفوظة
تحيااااتى

AoLaAoL يقول...

انتى متحاملة جدا....يعنى عشان حكومتنا الرشيدة عايزة تفرحنا وتبهجنا وتورينا نص الكوباية المليان وتبعد عننا الوحش وتحطه فى قعر الكيس قصدى بعيدا عن الشعب المصون تبقى عملت جريمة
مش عايزين حاجة حلوة ابدا..مليتوا البلد
:P :D

Islamist Bloke يقول...

برة برضة فيه سياسة توشيش كتير جدا..........واهمها انهم بيظهروا لنا غير الحقيقة اللى عندهم

بيظهروا لنا انهم الامانة والشرف وتلاقى اعلى معدلات نصب فى الدنيا عندهم....بس عندهم تلاقى القوانين بتتطبق بحزم.....انما برضة تلاقى المرتشين والفاسدين.....فى كل مكان


عارفة؟ قرأت مرة عن مهاجر مصرى عاش فى امستردام 25 سنة.....اول ما راح هناك كان منبهر جدا بكل شىء....النظام والنظافة....اهم شىء فى اوروبا....كان الترماي والباص مفيش فيه محصل تذاكر...فيه على رصيف المحطة ذاتها ماكينة تذاكر....تحطي العملة تطلع تذكرة...وكله بيقطع ومحدش بيزوغ

القمامة ليها ميعاد معين تترمي فيه ومحدش بيخالف

الرجل اشتغل فى مسح الارضيات وغسيل الصحون واتنقل بمجهوده من المطبخ للتقديم على الكاونتر

بعد فترة....بدأ يلاحظ حاجات

لاحظ ان لو ادى ظهره لزبون على الكاونتر وفيه شوية فكة -ملاليم وشلنات يعني عندنا- الزبون ده اما يسرقهم او يزود عليهم وياخد مشروب بيهم....لو اتاكد ان الاخ ده مش واخد باله يعني

وبعدين فى يوم كان راكب الباص لقى كذا فرد من الشرطة قفزوا فى الباص وفتشوا على التذاكر.....واللى مش معاه بيدفع غرامة فورية 500 ضعف ثمن التذكرة

و القمامة حاول يرميها مرة فى غير الوقت المحدد جاءت البلدية وامسكت به ودفع غرامة كبيرة جدا

الكلام بأة كان ان الاسلام هو اقوى نظام قانوني عرفه الكون.........فيه عقوبة فورية وعاجلة ومفيهاش تهاون -لا تهاون فى الحدود- يعني السارق او القاتل او الزاني هيخاف من العقوبة لو اتكشف فى الدنيا....و فى نفس الوقت عارف انه حتى لو فلت من العقوبة فى الدنيا....فيه نار وجحيم فى الاخرة وربنا شايفه وناظر اليه وهيعاقبه....يعني مش هتفلت باى صورة......انما القوانين الوضعية كلها تفتقر للعامل الالهى.....مفيش قوة عليا او سلطة عليا شايفاك فى كل مكان....مستحيل الا على الله

احنا بأة هنا فى العالم الاسلامي...عملنا اية........كان عندنا قانون الاسلام زي الفل وماشيين بيه ومفيش حاجة اسمها جريمة ولا يحزنون....فجأة ابطلوا العمل به وقرروا العمل بالقوانين الوضعية.....طيب لو هتقلدوا الغرب وهتعملوا قوانين وضعية....طبقوها بحزم زي الغرب.....يعني اللى يعمل حاجة يعملها كاملة وصح ويتقنها.....لا ...ابدا

القوانين فيها محسوبية....ومفيش تطبيق فورى للعقوبات....والحرامي الكبير لما بينهب مش بيخاف واللى مش بيدفع قسط المروحة 20 جنيه بيتاخد على المركز وينضرب من الخفراء لغاية ما يظهر له صاحب و يدفع الكمبيالة

اقول اية بس....ربنا عالم بأمور العباد

ونعود لسياسة التوشيش......الغش مشكلة كبيرة....والاسلام حاربه ....لكن مفيش حرب على سياسة التوشيش حاليا لانها سياسة الدولة المعترف بيها

فى اى حادث فتنة طائفية يحصل بتلاقى الدولة عملت اية؟

كتمت على الحوار ومفيش اى اخبار وتلاقى بالليل فيلم من افلام يحيا الهلال مع الصليب والناس مقطعة بعض بالسيوف فى اماكن الفتنة

انا قلت حوار الغرب ده عشان اقول ان مش احنا بس اللى غلط..........الغرب كله غلط فى غلط بس بيظهروا لنا الجانب الحلو او جزء لذيذ.....وده برضة منهم توشيش

اما احنا..........لو مشينا على الاسلام-فى انفسنا قبل الحكومات- هنبقى تمام

لكن لو كل واحد مشى بالتوشيش....يبقى الضياع هيظل مستمر

ارجو انك تكوني كونتي صورة واضحة عن قصدى

اشكرك بشدة لصبرك على قراءة كل ما كتبت.....شكرا جزيلا....جزاك الله خيرا

والسلام

خمسة فضفضة يقول...

السلام عليكم ورحمة الله وبركاته

كرم المسلم

اللهم آمين

خمسة فضفضة يقول...

السلام عليكم ورحمة الله وبركاته

حدوته

ايوه عندك حق سياسة التوشيش دي في كل حاجه
ما انا قلت دي اختراع مصري اصيل

وانت طيبه يا قمر ويارب ماتحرم منك

وعقبال ما نبارك يوم فرحك ان شاء الله


تحياتي

خمسة فضفضة يقول...

السلام عليكم ورحمة الله وبركاته

اولي اول


معلش اعذرني بقي اصلي من حزب اعداء النجاح، فقريه اعمل ايه ...ههههه


اهلا بيك لاول مره هنا ...نورتني

خمسة فضفضة يقول...

السلام عليكم ورحمة الله وبركاته

Islamist Bloke

ايوه التوشيش في كل حته ،بس يمكن عندجنا زياده شويتين تلاته

وزي ما حضرتك قلت لو رجعنا للاسلام الصحيح اكيد في اجات كتير ها تتغير للاحسن

تحياتي

القرآن الكريم