TvQuran

٢٠٠٧-٠٧-٢٩

اوراقي القديمه

امبارح قعدت ادعبس في محفظه قديمه محتفظه فيها بشوية اوراق اعتقد انها مهمه
كنت بدور علي ورقه ليها عندي ذكري جميله اوي كان زوجي ربنا يديله الصحه وطولة العمر كتبها لي من خمس سنين لما تم 32 سنه ، كان زعلان جدا انه وصل للعمر ده وحاسس انه خلاص عَجِز ،
وبما اني انا كمان الشهر ده تميت 32 سنه فامش عارفه ليه الورقه دي جت علي بالي وقلت ادور عليها ، والحمد لله لقيتها ، حكام انا مافيش حاجه تضيع مني مهما كانت صغيره ومهما عدي عليها من الوقت طالما قررت احتفظ بيها



المهم وانا بقلب في المحفظة لقيت اوراق تانيه رجعتني لفتره جميله جدا من حياتي وحسيت ان السنين جريت من غير ما احس ، فكل ورقه منهم كان عمرها فوق ال 15 سنه ، تخيلوا لما الزمن يرجع بالواحد 15 _20 سنه بمجرد انه شاف كما ورقه قدامه

هواية جمع الطوابع كانت من اكبر هواياتي وعندي البوم مليان بطوابع يمكن تكون نادره، فكان من ضمن الورق كام طابع بريد لسه ما حطيتهمش في الالبوم

الورقه الاولانيه كانت طابع بريد من العراق تاريخه من سنة 1989 ، يعني عمره دلوقتي 18 سنه ،
الطابع تم اصداره بمناسبة العيد القومي للامن الداخلي او زي ما هو مكتوب بالانجليزي يوم الشرطه
" police day"

الطابع ده تاريخه كان قبل اكبر كارثه عرفها العرب طول تاريخهم ، وهي غزو العراق للكويت سنة 1990


رجع بيا الزمن ايام العراق ما كان آمن وفيه بوليس بيحتفلوا باليوم بتاعه ،

ايام ما كان فيه امن داخلي ، وناس تقدر تعدي الطريق بأمان زي الصوره
اللي علي الطابع ماهي بتصورهم كده

ودعيت من قلبي ان الايام دي ترجع مره تانيه



وفي كمان ورقه تانيه عباره عن جزء من جرنال قديم اعتقد انه الاهرام وبالذات بريد الاهرام ، وكان من ضمن هواياتي اني بعد ما افصص الجرنال من اول صفحه لآخر صفحه احتفظ ببعض القصاصات اللي ممكن يكون فيها بعض الاشياء المهمه من وجهة نظري اواي حاجه ممكن اشوف انها هاتنفعني بعد كده ،وكنت عامله حاجه زي البوم ليها ، واعتقد ان الورقه دي عمرها ممكن يكون حوالي 19 او عشرين سنه
والورقه دي مكتوب فيها كلام جميل جدا بيقول :


" يابني : لا تنظر الي ما في يد غيرك ، فيتعب قلبك ولكن انظر إلى ما في يدك فيلهج بالشكر لسانك وتقر عينيك .
يا بني : ارض بما قسمه الله لك تنعم به وتسعد ولا تتطلع إلى ما ليس لك فتشقي وتحقد .
يا بني : من رضي بقسمته حمد ومن بطر بنعمته فسد ومن قل إيمانه حسد ومن صلح ميزانه زهد ومن بر والديه سعد ومن تصدق وتزكي وجد ومن شح جحد .
يا بني : ذق الطيبات جميعها فلن تجد أطيب من لقمة العافية و لا أمر من لقمة الهم والغم ، و لا أثقل من الدين و لا أصعب من قهر الرجال و لا أذل من السؤال وطلب الحاجة ، و لا أبغض من الظلم .
يا بني : ما من مصيبة أكبر من مصيبة المرء في دينه و لا أبغض من الكذاب المنافق و لا أشرف عند الله من الفقير التقي .
يا بني : ساعد الناس في حوائجهم يحبوك وتعفف عما في أيديهم فيكبروك واستغن عنهم فلا يزهدوك وداوم السؤال عنهم فيفتقدوك واحفظ أسرارهم فيأتمنونك .
يا بني : اقصد في كلامك يقل لغوك ويزدد قدرك وابدأ إخوانك بالسلام وشاركهم طيب الطعام و لا تكثر بينهم الملام تعش معهم في سلام .
يا بني : الناس معادن تصقلها نيران الشدائد فامسك بأسنانك علي من يؤازرك في شدتك و لا تحزن علي من فقدته ولم تجده في محنتك . "



كان في اوراق تانيه كتير ، سرحت فيهم ورجعوني لعمر فات ، حسيت انا كمان اني كبرت قوي وبقالي ذكريات عمرها 15 وعشرين سنه ، ولقتني بقول زي ما زوجي قال : والله زمان ياشباب


ويجعله عامر



83 comments:

دنـيـا محيراني(ايناس لطفي يقول...

مش عارفه اقول ايه انت بتكلمي علي يا دكتوره و الله انا كمان بقي عندي 30سنه و قعدت من يومين و فتحت اوراقي القديمه و قولت ياه كل السنين ده عادت الحمدلله ربنا يديكي الصحه و احنا معاكي
كل سنه و انتي طيبه و عقبال 320سنه

عصفور المدينة يقول...

تصدقي يا دكتورة إنها تدوينة مؤثرة
فكرتيني يوم ما كنت باكتب تدوينة اسمها أربعينية بتاعة وصولي للأربعين
وشتان فعمر أهل الجنة هو 33 سنة
وبعدين أهم حاجة أن تمر علينا الأيام ونحن نعمل فيها بطاعة الله وما أوجبه علينا فيها وأن نقدم عليه وهو غير غضبان عنا
تغير الزمان عدة مرات خلال تلك السنوات العجاف وما ينتظرنا الله أعلم به

خمسة فضفضة يقول...

السلام عليكم ورحمة الله وبركاته

دنيا محيرني

وانت طيبه يا قمر

كلنا بنصحي في يوم نلاقي السنين عدت والعمر فات
مع ان الثلاثينات ده قمة الشباب بس مش عارفه ليه حسه اني بقالي في الدنيا كتير اوي وان اللي باقي ممكن ما يكونش اد اللي فات ، يارب استعملنا في طاعتك ....آمين

تحياتي

خمسة فضفضة يقول...

السلام عليكم ورحمة الله وبركاته

باشمهندس عصفور

يعني انا لسالي سنه وابقي في عمر اهل الجنه ...يا مسهل


عندك حضرتك حق المهم تمر علينا الايام في طاعة الله
وننتهز صحتنا قبل مرضنا وشبابنا قبل هرمنا

ربنا يديك الصحه وعقبال 400 سنه

تحياتي

عصفور المدينة يقول...

400 سنة
دي عاملة زي اللي قاله كل ألفية وسعادتك طيب يا سعادة الوزير

Hadota ... حدوتة يقول...

تعيشى وتفتكرى
زكريات جميلة
انا عاملة زيك احب احتفظ بالاوراق القديمة والذكريات
وعندى صندوق صغنتت كده مسمياه صندوق الذكريات
محتفظة فيه بحاجات كتير زى دى

:)

الطائر الحزين يقول...

محتفظ باشعار لفاروق جويدة ايام حرب البوسنة اسمها رسالة من طفلة مسلمة من البوسنة ويبدأها بسيدى بوش العظيم
و اخرى لنزار قبانى اسمها متى يعلنون وفاة العرب
احاول منذ الطفولة رسم بلاد تسمى مجازا بلاد العرب

وكان هذه الكتابات تنف لكل العصور لو اتينا بها اليوم لوصفت الحال تماما

تحياتى

إيمان الحسيني يقول...

الظاهر إن الجيل ده كانت هواياته متشابهة
أنا كمان عندي ألبوم طوابع وكنت باحب أقص من الجرنال (صدق أو لا تصدق) إللي بتبقى في آخر صفحة في الأهرام
وحدث في مثل هذا اليوم
ياااااااااااااااااااااه
قول للزمان إرجع يا زمان

Reemo يقول...

أنا كمان مش ممكن أبدا ارمى اى ورقه ول كانت صغيره طالما انها بتمثل جزء منى او لمستنى فى وقت معين فى حياتى
بحتفظ بأوراق غريبه جدا
بس بجد وجوده بيفكرنى بذكريات كتير
كل سنه وانتى طيبه
وفى سعاده ورضا ان شاء الله
ربنا يكرمك يارب
تحياتى

http://kasperb4.blogspot.com/ يقول...

!!!!! !!!!! !!!!!!

تخيلي انا فوجئت جدااا من البوست ده بمعلومة مكنتش متوقها ابدااااااا

انا كنت فاكر حضرتك لسة بتدرسي ف صيدلة او بالكتير متخرجة مثلا من سنة او حاجة كده

لكن مش عارف ليه كنت مسلم بالأمر ده
يمكن عشان الصورة اللي حضرتك حاطاها

لكن عموما انا كده فرحتي بحضرتك بقت أكبر بكتير لأني بشعر بسعادة بالغة لما اعرف ان في شخص أكبر مني قرأ أي موضوع من موضوعاتي وأفكاري

وبقولك أطال الله في عمرك وأحسن عملك ورزقك حسن الخاتمة
"""""""""""""""""""""""""""""

معندكيش عروسة ليه بقى
:)) :)) :))

بنت القمر يقول...

هييييه لقيت حد من سنى بس لنا كمان اكبر بسنتين كل سنه وانتى واسرتك الكريمه بصحه واحسن حال بفرح لما الاقى حد من جيلي لان التواصل بيكون احسن وكمان المشاعر مشتركه ... تحياتى ومحبتى وعقبال ال15 سنه الجايين..لمل تقولى بشجن هيييه فين لما كان عندى 32سنه واللله زمان يا شباب اختك فى الكفاح
بنت القمر

خمسة فضفضة يقول...

hgسلام عليكم ورحمة الله وبركاته

باشمهندس عصفور

مش كتير علي ربنا ، وان شاء الله ربنا يديك الصحه وطولة العمر

تحياتي

خمسة فضفضة يقول...

السلام عليكم ورحمة الله وبركاته

حدوته

ربنا يخليكي يا قمر
دا انا مش لوحدي بقي...ههههه
الظاهر اننا بنحاول اننا نحتفظ بماضينا وذكرياتنا باي طريقه ، يمكن يكون ده سببه اننا خايفين انها تضيع مننا او ننساها
تحياتي

خمسة فضفضة يقول...

السلام عليكم ورحمة الله وبركاته
الطائر الحزين

لو بصينا لتاريخ العرب من اول سقوط الاندلس لحد دلوقتي هانلاقي مافيش فيه اي اختلاف في الاحداث فقط اختلاف في الاماكن والاسامي
علشان كده الاشعار والقصايد اللي اكتبت عن البوسنه تنفع للعراق والكلام اللي اكتب ايام ثورة الجزائر يمشي علي فلسطين
واشعار النكسه تنفع لدلوقتي

وزي ما الناس بتقول من بوش الاب لبوش الابن يا قلبي لا تحزن

و هانفضل ندعي ربنا ان الاحوال تتغير للاحسن ويارب يتقبل منا ويكون فرجه قريب


تحياتي

أمــانــى يقول...

السلام عليكم
ازيك يا دكتورة
ايه الحلاوة دى تصدقى حتى انا برضو كنت بأحتفظ بالجرنال وبعض القصصات منها بس الان لا اعرف اين مكانها ولا حتى بقيت بأجمع اى شئ
سوى البحث عن السرير أخخخخخ
كل سنة وحضرتك طبية وياااااارب يكون عمرك كلها طاعة لله يااااااااااااارب آمــــــــــــين

خمسة فضفضة يقول...

السلام عليكم ورحمة الله وبركاته

طعمه
مش عارفه ليه بحس ان لو جبتي اي حد من جيلنا هاتلاقي مافيش اختلاف بين اهتماماته وهوايته عن اي حد تاني من نفس الجيل

كلنا كان لينا نفس الهوايات وبنقرا نفس الحاجات ، يمكن لان ده اللي كان متوفر وماكانتش الدنيا مفتوحه اوي زي دلوقتي

بس خلاص ماعدناش بنجمع الطوابع ولا بنقرا جرايد ورق ، والايام الحلوه دي خلاص

وقوووول للزمااااان

خمسة فضفضة يقول...

السلام عليكم ورحمة الله وبركاته

ريموو


اكيد لما بترجعي تبصي في اوراقك بيجيلك نفس الاحساس اللي جالي
بيرجعوكي لايام فاتت كانت جميله وماتتعوضش ، مش كده

وانت طيبه يا عسوله ، وربنا يكرمنا جميعا


تحياتي

خمسة فضفضة يقول...

السلام عليكم ورحمة الله وبركاته

كاسبر

ههههههههه
طيب الحمد لله اني صححت لك المعلومه

بالنسبه للصوره دي مجرد صورة بروفايل مش بتاعتي خالص

شكرا علي الدعاء تقبل الله منك ...آمين

-------
العروسه موجوده بس تقدر علي المهر
:)) :)) :))

خمسة فضفضة يقول...

السلام عليكم ورحمة الله وبركاته

بنت القمر

وانت طيبه يا قمر ،
علي فكره جيلنا مالي المدونات هاتلاقي كتير اوي في التلاتينات واوائل الاربعينات
وزي ماقلتي فعلا بحس ان افكارنا واهتمامتنا ومشاعرنا مشتركه ،

ياااه هل ممكن فعلا اوصل لسن ال47 .....واقول هييييه دنيا

ربنا يديكي ويدينا طولة العمر


تحياتي

خمسة فضفضة يقول...

السلام عليكم ورحمة الله وبركاته

اماني

اهلا يا امونه اخبارك ايه في الحر ده

كلنا بطلنا نجمع القصاصات ، وبطلنا اصلا نقرا جرايد ورقيه ، هي يا دوبك بصه سريعه علي الاخبار في النت

وانت طيبه يا قمر ويارب يدكي طولة العمر ويرزقك جنات العلي

آمين

تحياتي

Ma 3lina يقول...

اولا كل سنة و انتى طيبة

ثانيا لا كبرتى و لا حاجة الوقت اختلف دلوقتى و مبيقولوش ان حد كبر الا على الستين كدا

اهم حاجة الصحة و راحة البال تقولى باه 70 80 مش مهم

و عقبال 100 سنة ان شاء الله

BinO يقول...

أدام الله عليك نعمة الصحة أنت وزوجك
كنت بعمل زي حضرتك أحتفظ بأوراقي وحاجات صغيررة كثيرة جداً
حتي تذاكر القطار
:)
وتراكمت الأشياء وفقد الكثير منهاأهميته بالنسبة لي
ولا أعلم أين يوجد معظمها
تقع في يدي بعضها أيام
وأجلس في بعض الذكريات

daktara يقول...

www.picstalk.blogspot.com
مدونة جديدة
شقية
اوعي تفوتك متابعتها

انظر حولك
د. خالد عزب

mohand يقول...

السلام عليكم
انا مش عارف البوست ده نزل امتي

بس يجعله عامر

والسن بيزيد وقار


مش تقولي ان عيد ميلادك الشهر ده كنا احتفلنا بيه
وجبنا تورته وهدايا كتير وكده

بس كويس وفرتي
:P:P:P:P

كل سنه وانتي طيبه
واقرب الي الله

تحياتي

أحمد سلامــة يقول...

يااااه يا دوكتورة
تصدقي ما اخدش بالي ان ممكن ده يكون عمر كلامك ابدا
انتي كده محدش قدك اهو
روح شباب وحكمة السنين
يعني نحسدك اكيد
على فكرة انا امبارح كنت بقلب بنس الطريقه ولقيت محظة قديمة برضو
بس خفت افتحها عشان مكنتش فاكر اللي جواها هيفرحني ولا هيكئبني
تحياتي لكي

smraa alnil يقول...

اولا هقولك كل سنة وانتي طيبة عشان عيد ميلادك

فكرتيني لما سالت خطيبي انت ليه مش بتلبس ساعات

قالي كنت بلبس بس قررت مش البسها ن تلات سنين

ولما سالته عن السبب

قالي كانت بتفكرني بعمري اللي بيتسرق مني وانا مش حاسس

بتفكرني اني قضيت عمري كله وخلص وانا مش عارف في ايه

لقتني بقوله انا كمان مش بلبس ساعه عشان نفس السبب

بحس ان عمري جري بسرعه اوي لا تتفق مع سلوكي اللي الناس بتقول عليه طفولي

بس اهو قدرنا كدة
كل سنة وانتي وزوجك بالف خير

وكل سنة وانتو مع بعض

عارفة انا برضه بحتفظ بكل حاجة صغيرة وكبيرة مريت بيها
يمكن برضه من 15 وا 18 سنة من وقت ما كنت صغيرة

ساعات بخاف افتحها واقرا اللي فيها

وزي ما جوزك يقول
يجعلوا عامر

Unknown يقول...

ياااااااه يا فضفصة .. المقالة اللى فى الجرنال دى تتبروز مش يحتفظ بيها وبس .. بجد تحفة جدا

انا عاملة زيك بردو ليا كراكيب عجيبة ومحدش لحد دلوقتى يعرف انا بحتفظ بيهم ليه

يارب العمر كله فى طاعة الله ويعينك ع الدنيا ويخرجك منها على خير وعلى حسن خاتمة
اللهم اميييييييييين

بحبك اوى فى الله
:)

طهقان يقول...

هههههه

تعرفي يا ...
خمسة فضفضة

انا ضحكت على الموضوع دا قوي


وكمان استنتجت حاجة

:)

عرفت اسمك الحقيقي أيه

:))

مجهول يقول...

هههههههههههه
ياسلام يا دكتورة
احنا ايه غير شوية حاجات جنب بعضها
حاجات قديمة وذكريات ارتبطنا بيها

انا كل ما الاقي حاجات زي دي ودايما بلاقيها في ادراج مكتبي في شنطي القديمة في قلب كتاب مقفول

يااااااااااه بتفكرني بحاجات كتير وتجر شريط ذكريات
وشريط ورا شريط ورا شريط

في الاخر ادي العمر بيعدي
واهي دنيا وعايشينها بأمر الله

وحنفضل شباب
الشباب شباب القلب والعقل

كل سنة وانتي بخير والي الله اقرب

دمتي بخير وعشت هانئة وسعيدة

mohand يقول...

السلام عليكم
وانا كمان عرفته
بس عملت نفسي مش واخد باللي

تحياتي يا دكتوره

الا انتي فين صحيح

هي لسه برضه اجازه الوضع مخلصتش بتاع اللي هتشتغل في الصيدليه

ايه دا كله بس

http://kasperb4.blogspot.com/ يقول...

انا جيت تاني يا دكتورة معلش استحمليني
:)

انا عامل استقصاء عندي ويا ريت تشرفيني بإضافة رأيك

منتظرك
:)

gohayna يقول...

اولا يارب العمر المديد والسعيد ليكي انتي وجوزك يا دكتوره يا قمر

جميله استرجاع الذكريات دا

العمر بيجري من ايدينا ومش بنحس بيه بجد

نقول 25 ولا 30 كلهم والله محصلين بعضهم

اهم حاجه ايامهم واننا نعيشهم في كل لحظه في حب وهنا وسعاده

ربنا يديم عليكي سعادتك انتي وجوزك

ويهنيكوا دايما يا قمر

تحياتي ليك يا جميله

Shreef يقول...

بجد فعلا لذيذ الحوار ده و علشان انا عارف ان الحاجات ديه هتبى ذكريات جميلة في النستقبل فا في حاجات كتير دلوقتي بفضل احتفظ بيعها و ينفعش افرط فيها لانها بالنسبة لينا عمر طويل من حياتنا..سلام

يا مراكبي يقول...

إممممم

موضوع الإحساس بالعمر ده نسبي جدا .. ممكن واحد يكون صغير وبيحس إنه عجوز والعكس

لكن الموضوع فعلا شيق

أنا كمان كنت بأهوى جمع طوابع البريد .. وكانت سفريات والدي الكتيره أحد أسباب إني يكون عندي طوابع غريبة لدول عديدة فيه منها مش موجود على وجه الأرض دلوقت

ممكن نبقى نتكلم عنها بالتفصيل بعدين

david santos يقول...

Very, very nice work. Thank you

šσяšαяαα يقول...

السلاااام عليكممم ورحمة الله

فضفووووضتى ياهلااااا ياهلاااا

انا جييييت نورت البيت:D

موضوعك حلو جدا اوى خالص

كنا بنرتب المكتبه مرة ودعبست فالحاجات القديمة

ياااااه كأنى فعلا رجعت لايام ماكنت نونو
تخيلى شهادتى وانا فرابعه ابتدائى
وحاجااات تااانية كتيييير
بس دى اللى فرحت بيها اوى:D

حلو اوى كمان الجواب النونو دا..ماشى ياعم ربنا يسعدكم دايما ياااارب

والاحلى الكلام اللى كان فى الجرنال

كلماااات اكتر من راااائعه

دعبسى كدا عندك تانى يمكن تلاقى حاجات حلوة زى دى:))

يا مسافر وحدك يقول...

انا لو منك كنت ادور
بس مش فى محفظه
كنت ادور على ساندوتش
بلا هم ياما ملياناها ورق وذكريات وكله راح ما فضل غير ..ذكرى ودمعه
ياريت يكون ساندوتش فراخ بالملوخيه

david santos يقول...

The purchase of weapons for Mubarak to the Bush terrorist will be for making peace, or will be for taking the American terrorism for the Egipto?

The great people of the Egipto that is intent.

Of these two cannot come nothing of good.

David Santos (Portuguese)

خمسة فضفضة يقول...

السلام عليكم ورحمة الله وبركاته

د/ مرام
وانت طيبه يا قمر
علي رايك اهم حاجه الصحه وراحة البال

ربنا يديكي طولة العمر مع الصحه وراحة البال

تحياتي

خمسة فضفضة يقول...

السلام عليكم ورحمة الله وبركاته
باشمهندس بينو

اللهم آمين

دا كلنا بقي لينا اوراقنا القديمه اللي بترجعنا لاحلي الذكريات

بس انا ما بطلتش العاده دي ولسه باشيل الحاجات اللي ممكن تكون مهمه

شكرا علي ذوقك ، نورتني

خمسة فضفضة يقول...

السلام عليكم ورحمة الله وبركاته

د/ خالد عزب
الف مبروك علي المدونة الجديده ،ان شاء الله تكون متميزه

تحياتي

خمسة فضفضة يقول...

السلام عليكم ورحمة الله وبركاته

مهند

البوست نزل والنور مقطوع ..ههههه


كل سنه وانت طيب ، و ملحوقه ممكن تبعتلي التورته والهدايا علي الميل وادي انت عارفه
(:


وانت كمان عرفت الاسم طيب قولي اول حرف منه ايه ...هههههه
بالنسبه للبنت اللي قلتلك عليها ، انتات قلتلها مرتين بس مش عاوزه الح عليها علشان ما تفتكرش نفسها مهمه وكده
فامستنياها تيجي براحتها، وربنا يسهل وماتطولش

تحياتي

خمسة فضفضة يقول...

السلام عليكم ورحمة الله وبركاته

د/ احمد سلامه

هههههههه
لسه شويه علي حكمة السنين يا دكتور ،
انا كدا متخيله نفسي زي الحكيم في الحكايات القديمه
ذقن ابيض طويل وعصايه معوجه سانده عليها ولابسه ابيض في ابيض (:

انا لو مكانك كنت فتحت المحفظه دي مهما كانت الذكريات اللي جوها
يمكن كان يبقي فيها حاجه تفرحني

تحياتي

خمسة فضفضة يقول...

السلام عليكم ورحمة الله وبركاته

سمراء النيل

وانت طيبه يا قمر
علي فكره انا كمان مش بلبس ساعات ومش بحب ابص في النتيجه

بس هانعمل ايه عمرنا ولازم هانعيشه هانعيشه
ربنا يجعل كل لحظه في طاعته

تحياتي لك وللاستاذ طارق ، ويارب تكون حياتكم كلها سعاده

خمسة فضفضة يقول...

السلام عليكم ورحمة الله وبركاته

انسانه

فعلا انا برضو لما شفتها وسط الورق قلت انقلها هنا علشان الكل يقراها

ربنا يخليكي ويتقبل منك ، اللهم آمين

واحبك الله الذي احببتني فيه

تحياتي

خمسة فضفضة يقول...

السلام عليكم ورحمة الله وبركاته

طهقان

ضحكت من الموضوع ، يبقي اكيد استعيلتني.....مش كده

وكمان عرفت اسمي

طيب اول حرف ايه ...:))

خمسة فضفضة يقول...

السلام عليكم ورحمة الله وبركاته

مجهول

فعلا الشباب شباب القلب والعقل وربنا يديمها علينا نعمه ، ويارب يفضلوا شباب علي طول

كل سنه وانت طيب

تحياتي

خمسة فضفضة يقول...

السلام عليكم ورحمة الله وبركاته

كاسبر
بما ان صوتي امانه ، فرحت ادليت بيه ، ياريت يكون وصل
:)

خمسة فضفضة يقول...

السلام عليكم ورحمة الله وبركاته

د/ جيهان

ربنا يخليكي ، ويسعد ايامك

تحياتي

خمسة فضفضة يقول...

السلام عليكم ورحمة الله وبركاته

شريف

صدقني بعد كام سنه من دلوقتي لو رجعت للحاجات اللي بتشيلها دي هاتحس احساس مختلف ، اكنك بتبص علي السنين اللي فاتت من عمرك من خلال حبة الورق دول

ربنا يديك طولة العمر والسعاده

خمسة فضفضة يقول...

السلام عليكم ورحمة الله وبركاته

باشمهندس احمد ثروت

صح الحكايه نسبيه فعلا
ساعات بحس ان عندي ميت سنه وساعات بحس اني لسه في الروضه

متهيالي ان كل الجيل بتاعنا هواياته كانت واحده وكان علي راسها جمع الطوابع
وماعتقدش ان الهوايه دي لسه موجوده

خلاص هانستني منكم بوست عن الطوابع بتاعك

نورتني

خمسة فضفضة يقول...

david santos

thank you

خمسة فضفضة يقول...

السلام عليكم ورحمة الله وبركاته

صورصاره

اخيرا انت فين يا بنتي ايه الغيبه الطويله دي

حمد الله علي السلامه

ربنا يخليكي ويتقبل دعائك اللهم آمين

واوعي تغيبي تاني

تحياتي

خمسة فضفضة يقول...

السلام عليكم ورحمة الله وبركاته

شيكابيكا

هههههههه
ماشي يا سيدي المره الجايه هابقي ادعبس في الحلل مش في المَحَافظ

نورتني

الدفاع يقول...

السلام عليكم يا دكتوره تعيشى ةتفتكرى يا رب
وادعو الجميع للمشاركه معى
تخيل نفسك اصبحت رئيسا
http://masralmkhrosah.blogspot.com/2007/08/blog-post_7368.html
مدونه احوال مصر المخروسه

Gid-Do - جدو يقول...

امبارح قعدت ادعبس

ادعبس ـ كلمة مالوفة جدا اليا ميقلهاش غير الناس اللى زى عيلتى صعايدة ورغم انهم عاشوا فى القاهرة وخلفوا اولادهم وشافوا احفادهم لكن مغبروش لهجتهم ـ انت او عائلتك من اى محافظة فى الصعيد ـ تحياتى

خمسة فضفضة يقول...

السلام عليكم ورحمة الله وبركاته

ا/ اسامه

متشكره اوي ، ربنا يخليك

والف مبروك علي المدونه الجديده
تحياتي

خمسة فضفضة يقول...

السلام عليكم ورحمة الله وبركاته

جدو

اهلا بحضرتك ، ايه النور اللي ملا المدونه ده ،

لا انا مش من الصعيد خالص ، انا من بحري
يمكن تشابه الفاظ بقي ولا حاجه ...(:

تحياتي لشخصك الجميل

طهقان يقول...

م

sakayar يقول...

السلام عليكم ورحمة الله وبركاته
والله يا دكتورة فكرتيني بدرج الذكريات .. كل ما أحس إني مشتاق لحد أو مشتاق لحاجة أفتح أدراج المكتب وأبدأ أدعبس فيها على الورق القديم اللي محتفظ بيه .. والله بلاقي ورق من أيام ثانوي وأيام ابتدائي كمان
بتبقى حاجات حلوة أوي .. أحيانا بعتبرها وقفة مع النفس لما أسأل نفسي بعدها كنت بتفكر في الوقت ده في إيه ودلوقتي تفكيرك بقى إزاي؟؟؟ وأفتكر على طووول أول بوست عملته في مداونتي ... لو صحيت م النوووم لقيت اللي فات من حياتك كان حلم؟؟؟
تحياتي ... بجد بوست مؤثر والنصايح بتاعة يا بني دي جميلة أوي

عمر عاشق القرآن يقول...

بجد احساس الحنين والذكريات جميل جدا جدا

خصوصا لما تكون ذكريات لواحد بتحبه او مكان او هواية او شىء ليه مكان فى قلبك

ويجعله عامر

غير معرف يقول...

الله

يعني عندك طابع من عمري
هههههه يعني ينفع أقول الطابع دا من جيلي؟

طب أنا كمان عندي هواية قصقصة الجريدة دي و عندي كرتونة مليانة قصاصات ماما كان نفسها بس تتلم عليها و ترميها ف الزبالة من كتر ما زهقت منها بس بعد ما قعدتلها ف يوم كدة و قعدت أطلعلها فيهم و أخليها تقرأ سابتني بعدها

حلوة الحكم اللي انتي حاطاها دي خصوصا أول واحدة

خمسة فضفضة يقول...

السلام عليكم ورحمة الله وبركاته

طهقان

لا غلط

ليك محاوله تانيه ..وممكن تستعين بصديق ...ههههه

خمسة فضفضة يقول...

السلام عليكم ورحمة الله وبركاته

سكايار
كل واحد فينا له درج ذكريات لما بيفتحه بترجع ايام وسنين عمره اللي فات تمر قدامه زي شريط سينيما

من غير اوراقنا القديمه ماكانش هايبقي للحياه معني

تحياتي

خمسة فضفضة يقول...

السلام عليكم ورحمة الله وبركاته

مشروع بطل

صح بيقي احساس رائع بيرجع الواحد لعمره اللي عدي وايامه الجميله

تحياتي

خمسة فضفضة يقول...

السلام عليكم ورحمة الله وبركاته

محمد فوزي آل ربيع

انت فين يا ابني ايه كل الغياب ده ، ولا انت خدت الثانويه خلاص بقي وماحدش هايعرف يكلمك ...ههههه

كويس ان مامتك اقتنعت انها تسيبلك الكرتونه دي بجد بعد 10 او 15 سنه لما ترجع تفتحها وتبص للي جواها ها تحس احساس جميل جدا

تحياتي

الراقـــص مع الذئـــــاب يقول...

السلام عليكم ورحمة الله وبركاته
دكتورتنا خمسة فضفضة
الاول كل سنة وانتي طيبة عشان عيد ميلادك ال 25 ...
جميل اوي إن الواحد يرجع للماضي عن طريق الدعبثة في الاوراق القديمة
انا برضو عندي هواية جمع الاشياء وجمع الطوابع والعملات وبعض القصاصات الورقية

ومن فترة للتانية برجع ليها واقرلأها وابتسم وانا بتخيل نفسي زمان وكانت الحياة عاملة ازاي

بارك الله لكي في زوجك واسعدكما في ظل طاعته ورضوانه ورزقكما الزرية الصالحة

ويجعله عامر

البنت الشلبية يقول...

سلام عليكم

ربنا يبارك فى عمرك يا دكتورة

بس تعرفى انا بحس ان اخر عشرين سنة فاتو بحس انهم كلهم زى بعض كل الاحداث متشابهة

ربنا يجعل ايامنا الجاية افضل ونقضيها فى طاعته

سلام

Mai_Jeneen يقول...

ياااه يا دكتورة

تصدقي

أنا كمان شهر و شيوة حاتم 19 إن شاء الله

و حاسة اني مرعوبة جداً ... مش عايزة ابقى 19 !!! ده رقم كبير قوي !!!

معقولة حاقول بعد كدة انا عشت 19 سنة ؟؟

طب و عملت فيهم ايه ؟؟

حاسة ان عمري بيجري

مؤمنه يقول...

السلام عليكم ورحمة الله وبركاته
عزيزتى اتمنى من الله أن يكون بارك فى العمر الى فات ويبارك فى العمر الجاى ويجعلنا من المقبولين عنده
لا أحب جمع أشياء للذكرى فى بعض الاحوال خاصة عندما اكون متأكده ان هذه اللحظه لن تعود مرة أخرى والاناس الذين شاركونى هذه اللحظه لن يبقوا معى فأفضل أن أنسحب وأترك الزمان يمضى كما شاء دون أن أحتفظ بذكرى منه لانى أشعر باحنين الشديد الذى يؤلمنى عندما أتذكرها بقدر كونى فى أشد الحاجه للملمة بض الذكريات بقدر ما يكون تركها دون الاحتفاظ بها أرحم لى بكثير
لهذا ومن أجل شعورى بالحنين الى الاعوام التى تفوت من عمرى وكأنها تتخلل كالماء من بين أصابعى أحاول أن أعين نفسى على الاستفاده من هذا العمر الغالى فى طاعة الله هذا العمر الذى سوف نسأل عنه أمام الله عز وجل وحتى أكون قد قدمت لنفسى شئ لا يشعرنى بأنى قد فقدت عمرى
وفى الختام اتمنى لك دوام العافيه والعمل الصالح والسلام عليكم ورحمة الله وبركاته

طهقان يقول...

ر

القلم السكندري يقول...

عقبال 100 سنة في الطاعة يا دكتورة

رغم أني شبه كنت واخد علي نفسي مدخلش مدونات تاني بسبب موقف كدة

الا أني
كنت بتجول في مدونات بلوج سبوت

ودخلت هنا بالصدفة

حقيقي بوست رائع ومتميز

واللي جذبني للدخول اني شوفت القاء السلام كامل في ردودك في مدونات تانية

بصراحة لما بلاقي مدونات سمتها طيب بحس أنها حاجة غريبة في وسط اللي شوفته اخر يومين

معلش بقي شوية فضفضة

مش اسمها خمسة فضفضة برده؟؟

لك موفور التحية

رفقة عمر يقول...

كل سنه وانت طيبه اسفه متاخرة شويه
بس انا بقالى فترة مش بتابع مدونات كتير
ربنا يديم عليكى الرضا والسعادة

كراكيب عادل يقول...

اية دة الحجات دي كلها انا بعملها

اخ من السنين يا دكتورة الي بتمر زي الهوا

فعلا الواحد بيفوق يلقي نفسة بقي في جيل تاني وتالت

انا جاي اسلم

خمسة فضفضة يقول...

وعليكم السلام ورحمة الله وبركاته

باشمهندس محمد
اولا حمد الله علي السلامه

كل سنه وانت طيب تقبل الله دعائك

الظاهر كده ان دي هواية كل الناس مش انا بس

تحياتي

خمسة فضفضة يقول...

وعليكم السلام ورحمة الله وبركاته

البنت الشلبيه

ربنا يبارك فيك
مش كده برضو اللي بنبات فيه بنصبح فيه ، مافيش تغيير
علشان كده مش قادره اصدق ان كل الفتره دي فاتت

تحياتي يا قمر

خمسة فضفضة يقول...

السلام عليكم ورحمة الله وبركاته

جنين

19 سنه .بس دا انتي لسه نونو

ربنا يسعد ايامك وتعيشي فوقهم 190 سنه

نورتيني

خمسة فضفضة يقول...

وعليكم السلام ورحمة الله وبركاته
مؤمنه

اللهم آمين

اختلف معك ، لما بنحتفظ بذكريات من عمرنا اللي عدي ونرجع نبصلها تاني بترجعنا معاها لاحلي ايام وتعيشنا لحظات من السعاده والصفاء النفسي

و يارب عمرنا كله يعدي في طاعة الله عز وجل

تحياتي

خمسة فضفضة يقول...

السلام عليكم ورحمة الله وبركاته

طهقان

لا برضو غلط
فاضلك ظلته وتطلع بره ...ههههه

خمسة فضفضة يقول...

السلام عليكم ورحمة الله وبركاته

القلم السكندري

اللهم آمين

بالنسبه للمدونات النظيفه في منها كتير اوي
بس للاسف المدونات الاخري مشهوره اكتر
شوف حضرتك فيه في الصفحه الرئيسيه لمدونتي محرك بحث المدونات النظيفه وفيه ستجد مجموعه هايله من المدونات الاكثر من رائعه

وممكن لو تحب تقرا الاربع بوستات الخاصه بحملة مدونات نظيفه
هنا :

http://5fadfada.blogspot.com/2007/05/4.html

وولا يهمك فضفض براحتك ما احنا عاملنها للفضفضه ...ههههه

تحياتي

خمسة فضفضة يقول...

السلام عليكم ورحمة الله وبركاته

رفقة عمر
وانت طيبه يا قمر
ولا يهمك انا كمان بقالي فتره بادخل النت تخاطيف

ربنا يخليكي ويتقبل دعائك

تحياتي

خمسة فضفضة يقول...

السلام عليكم ورحمة الله وبركاته

الفنان عادل

الله يسلمك
انت كمان
كل الناس طلعت بتعمل كده

علي رايك ، بقي جيلنا من الاجيال القديمه ، السنين عدت وكبرنا واحنا مش حاسين


تحياتي

محمود الدوح يقول...

اولا كل سنة وانت طيبة
ومش هقول زى كل الناس انى مش برمى ورق لكن احيانا لما اقلب الاقى كتب او ورق او شهادات ابتدائى وورق غريب مش ببقى عارف بتاع

ويجعلة عامر

القرآن الكريم