TvQuran

٢٠٠٨-٠٤-١٩

استفزاز


لما قريت الخبر ده ما قدرتش امنع نفسي اني اكتب عنه فاعذروني ان كنت ماردتش لسه علي تعليقات البوست اللي فات
بيقول ايه الخبر ؟؟

بيقول ان المستشارة الألمانية أنجيلا ميركل بترمي باللوم علي سكان العالم الثالث وبتحملهم مسؤلية ارتفاع اسعار الغذاء علي مستوي العالم
وبتقول حرفيا


" أن السياسات الزراعية السيئة وتغير العادات الغذائية في البلدان النامية هي المسئولة أساسًا عن ارتفاع أسعار الغذاء وليس إنتاج الوقود الحيوي "

وان


" من يسافر إلى الهند هذه الأيام سيلاحظ أن النقاش الرئيسي يدور حول الوجبة الثانية. الناس يأكلون مرتين في اليوم وإذا كان ثلث الشعب الهندي البالغ تعداده مليار نسمة يفعل ذلك فهؤلاء عددهم 300 مليون نسمة. ذلك جزء كبير من أوروبا الغربية".


وحول القيود التي يفرضها الاتحاد الأوروبي على منتجات الألبان قالت المستشارة الألمانية:" إذا استهلكوا فجأة طعاما يعادل مثل ما كانوا يستهلكونه واذا بدأ 100 مليون صيني في شرب الحليب أيضا فإن حصص الحليب لدينا ستقل"

منتهي الوقاحه وقلة الادب بصراحه ( مدونة نظيفة )

يا سبحان الله مستكترين علي الفقرا انهم يمارسوا حقهم الطبيعي في الحياه وباكلوا وجبتين ومش هانقول تلاته زي بقيت الناس ، او انهم يشربوا ولادهم كباية لبن


السيده الفاضله ميريكل نسيت ان ثمن وجبه واحده من الوجبات الفخمه علي احد موائد اسرة اوروبية ممكن تأكل أسره كامله لمدة يوم او اكتر في اي بلد نامي

كل الهجوم ده لانهم في اوروبا والدول المتقدمه عاوزين يستخدموا اكل الناس الغلابه في انتاج وقود حيوي يحافظلهم علي البيئه بتاعتهم ويكون ارخص واضمن من البترول اللي برضو بيتحكم في معظم انتاجه دول ناميه ماليانه بالقلائل والحروب

سمعت محمد المسلماني في الطبعه الاولي بيتكلم عن بلده في الصعيد جالهم مستثمرين اجانب وعرضو عليهم شراء شراشي القمح بسعر اغلي من سعر اردب القمح نفسه وبالتالي الفلاحين بدل ما يزرعوا قمح بقوا بيكتفوا انهم يبيعوا القش للاجانب وياخدوا الفلوس علي الجاهز ، بلا جمع وضم ودرس وطحن بلا وجع دماغ
ومايهمش الناس اللي بتموت بعض كل يوم في طوابير العيش

يعني مابيكتفوش انهم يستولوا علي اكل الناس الغلابه ، ويتسببوا في ارتفاع اسعار اساسيات المعيشه وممكن كمان يجروهم لحروب غذاء عالميه
لا وكمان مستكترين علهم انهم ياكلوا زي بقيت خلق الله

طيب ايه راي حضرتك يا مسز مريكل اننا نبطل ناكل خالص ان شالله نموت من الجوع ، ونبعتلكم كل انتاجنا من القمح والذره ، عشان حضرتك تركبي عربيتك المرسيديس اللي تمنها ياكل بلد بحالها لمدة شهر







52 comments:

مدحت محمد يقول...

هى الست دى اسا مبتنزليش من زور اساسا من ساعة لما هاجمت الاسلام

ربنا ينتقم منها هى واللى زيها

بطوط حبوب يقول...
أزال المؤلف هذا التعليق.
بطوط حبوب يقول...

تصدقى كلامها له وجه نظر برضه
واحنا ايه فايدتنا
ما انموت احسن عشان هم يعيشوا

والله حاجه تبك

محمد عبد الغفار يقول...

مش اما يبقوا الأول يعتبرونا خلق

فاتيما يقول...

الست السماوية دى ما ساعة ما جت و أنا موش مرتحالها أصلا
شكلها كدا متعصبة و مخها متربس و اللى يدور فى شجرة عيلتها يلاقي فى نسبها عرق هتلرى...
بس الأسوء من رأيها المتعصب هوه البجاحة الغيرمسبوقة دى ..
يعنى عينى عينك كدا بتعلن عن إحتقارها للعالم النامى و سياسته الملخبطلها حياتها ...
الله
طب ما تساعديهم يا ست و ينوبك ثواب
موش تعلنى استنكارك و انشالله يموتوا
معلش
احنا برضو الغلطانين
هونا على روحنا فهونا على الناس
تحياتى يا فضفوضة

مهندس مصري بيحب مصر يقول...

أنا بقى الست دي مش بالعها من ساعة ما إنتخبوها
مستكترة ان الناس تأكل وجبتين علشان عددنا كتير
طيب و هو احنا منعناهم من الخلفة
هما بسبب تحللهم الأخلاقي بيتناقصوا لأن معظمهم بيفضل متعته الشخصية على مشقة بناء أسرة
ثم مش الغرب ده برضه هو اللي استعمر الشرق و استزف ثرواته لمئات السنين
مستكترين علينا الأكل
بس دايماً الحق في ايد القوي مش الضعيف
:(

على فكرة التامبليت ده أحلى بكتير

عصفور المدينة يقول...

الولية -هذه مدونة نظيفة-
دي انا مش مستريحلها أساسا

طب ما تجيب م الآخر تقول لو سمحتم روحوا موتوا عشان انتم عاملين لنا زحمة

mohand يقول...

تصدقي فعلا مستفزه

وتصدقي ان ميركل دي من ساعة ما مسكت الحكم وهي عايزه تولع في كل العالم عشان مصلحتها

منهم لله

غير معرف يقول...

ولا يهمك
برضه حناكل
لحد ما ننفجر من التخمة
ومش حنسيبلهم أي فتفوتة واحدة
عشان يموتوا م الجوع
الأوروبيين يعني
ونخلص

مجداوية يقول...

التفكير العنصرى والنازى فى الجينات عندهم من أيام هتلر هم شايفين ان أى جنس غيرهم المفروض يباد وازاى ناكل زيهم ايش جاب لجاب وسبحان الله بيقولوا الكلام اللى بيبين النوايا الحقيقية واللى فى قلوبهم وبيزيلوا بيه قناع التحضر والانسانية

دكتور حر يقول...

يا اختنا
ودي طبيعة نظرتهم لينا
وعشان كده بيزدروا ديننا ونبينا
لأننا لا نأكل من صنع ايدينا
ولنا أمة كانت وستظل اسوأ من يعبر عن دينها





ولسه

لـــى لــــىِ يقول...

انتقدت منظمة للمسلمين في ألمانيا تصريحات للمستشارة الألمانية أنجيلا ميركل قالت فيها إنه يجب ألا تعلو مآذن المساجد على أبراج الكنائس.

وأبدى مجلس التنسيق بين المسلمين –الذي يضم عددا من المنظمات الإسلامية في ألمانيا- تخوفه من أن يتم استغلال هذا الموضوع في انتخابات الولايات المقبلة في بعض مناطق ألمانيا.

وقال المتحدث باسم المجلس بكير البوجا في بيان"يتعين علينا أن نحتاط ضد إثارة مناقشات مفتعلة لأغراض سياسية وعلاقتها ضعيفة بالواقع".

وأضاف أن "تعليقات المستشارة ميركل ليست على نفس درجة أهمية آراء الخبراء في سلطات البناء، الذين يبنون قراراتهم على الظروف المحلية والتوافق بين المواطنين والجماعات المعنية بالمساجد".

وكانت ميركل -وهي ابنة كاهن لوثري نشأت بألمانيا الشرقية الشيوعية- قالت في مؤتمر لحزبها الديمقراطي المسيحي "يتعين أن ننتبه إلى عدم بناء قباب للمساجد أعلى بشكل واضح من أبراج الكنائس".

ودأب زملاء ميركل المحافظون في ولاية بافاريا على مدى شهور على القيام بمثل هذه المقارنة بين مآذن المساجد وأبراج الكنائس، كما أثارت خطط بشأن بناء مساجد في برلين وميونيخ وكولونيا حفيظة السكان المحليين.
.......

ده احد الاخبار المستفزة
كانت ارسلته لى صديقة تعيش فى ألمانيا
وهى مدونة ايضا

علشان تعرفى ان الاخبار المستفزة دى دايما ويوميا تنشر فى الجرائد الالمانيه ككروت تهديد للجالية المسلمة اللى سبحان الله كل يوم بتزيد وتزيد بشكل حيجننهم

تقبلى مرورى

د/اجدع بنوته يقول...

اهلاااااااااا

هى دى كمان طلعلها حس اهوو

اكيد قالت كوندليزا اهى عامله شوو

اشمعنا انا لازم اطلع ف الصوره

نسوااااااااان مش لاقيه اللى يلمها

ملحوظه .. نسوان كلمه عربيه فصحى

son's egypt يقول...

السلام عليكم
يبدو ان دول اوربا تريد لهذا العالم ان يعيش في فقر ومجاعة الي ابد الابدين

AHMED SAMIR يقول...

يا زميلتي الفاضلة
لما شعوب العالم الثالث هانت على حكامها....مش هتهون على حكام اوروبا؟
تحياتي

... يقول...

تعرفي إن النظرية دي بتتطبق عندنا
أيوة
أكيد فيه هنا ناس عايزة تخلص وتخلص علي الغلابة
علشان البلد تنضف والنفس وكدة
صدقيني النظرة العنصرية دي مش عندهم بس
هنا كمان
الفقرا عاملين زحمة ومشاكلهم كتير
لولا ان مدونتك نضيفة كنت قلت انها ست بنت ...هي وكل من علي شاكلتها

khobayb يقول...

أمال لو شافتني وأنا باكل ؟؟؟

---

شكلها لسه في فاضل في دمها شوية من هتلر ، ومؤمنة إن مفيش حد يستاهل يعيش غيرهم

لكن ده ليه ؟

من يهن يسهل الهوان عليه !
ما لجرح بميت إيلام !

ده اللي هو احنا يعني !

خالد حفظي يقول...

خالص التحية لك أختنا الكريمة لإثارة هذا الموضوع
و أقف طوييييييييييييييلا أمام مسألة شراء القمح قبل نضوجه فان منذ فترة أسمع عن هذه المسألة و أستشعر وقوف بني صهيون وراء المسألة لهدف آخر غير الوقود الحيوي ( وإن كان مفيش مانع انه يكون هدف ثاني ) ولكن الهدف الرئيس هو تجويع الشعب المصري و لا عجب أن تكون بلد النيل ( اللي عمل عملية تحويل وبقى نيلة ) من أكبر مستوردي القمح في العالم و لعلنا جميعا لم ننسى ما سماه كاتبنا الكبير فهمي هويدي ( صفعة القمح ) لما جرت صفقة استيراد قمح من المملكة العربية السعودية لمصر
كذلك ما كتبه شاعرنا الكبير فاروق جويده في عشرات المقالات بالأهرام عن استهداف اليهود للرقعة الزراعية في مصر
خالص تحياتي مرة أخرى لإثارة هذا الموضوع الهام

محمود المصرى يقول...

بسم الله الرحمن الرحيم

بالنسبة لتصريحات ميركل فقد لا نلومها بشدة على اعتبار انها تعبر عن مصالح الشعب الالمانى الغنى وليس عن مصالح ثلاثة مليارات فقير فى العالم , لكن المشكلة فى تصريحات رئيس ثمانين مليون مصرى اغلبهم فقراء اللى خرج علينا يقول انتوا بتخلفوا كتير هانجيبلكم فلوس منين , واللى رجاله بيحملوا الشعب بعاداته الغذائية السيئة مسئولية نفص الخبز على اساس انه بيستهلك قمح اعلى من الاستهلاك العالمى وكأن الشعب لاقى اللحمة متكومة بس مالوش نفس فيها .
تحياتى

واحد من البلد دى يقول...

أنا مش عارف..حضرتك منتظرة إيه من الغرب...المثل الشعبى على لسان جدتى قال قديما(مافيش حاجة تييجى من الغرب تسر القلب)..مع إن جدتى ماكنش لها أى علاقة بالست ادلعدى(ميركل)وبعدين واضح جدا إن الست ميركل دى عندها عقدة من العرب وخاصة المسلمين...أقولك إيه؟؟؟
وإن يخاطبك السفيه فلا تجبه
فخـيرا من إجابته السكوت
فإن كلـمته.فرجـت عنــه
وإن أهمـلته.كمدا يمـــوت
مع تحياتى

آفاق الحرية يقول...

السلام عليكم
هو فعلا الحل اننا نبطل اكل
يبقي ارحنا واسترحنا
وبالمرة يبقي ريجيم
حسبنا الله ونعم الوكيل

عاشــــــ النقاب ـقــــة"نونو" يقول...

السلام عليكم
اولا مبروك اللوك الشديد دة ما شاء الله
ما حد يشوفني ببانر ينوبكوا ثواب فيا ما علينا
الست ميركل لازم يطلع منها اللي اكتر من كدة اما راحت لليهود وحطت على المحرقة الورد وطبعا اعلنت عدم رضاها على اللي عمله هتلر افندي يا ولداه في اليهود وفي نفس الوقت كان اطفال غزة والتهديد بمحرقة وما هزتش طولها وراحت تفت في وشهم حتى
يبقى طبعا لازم تقول بطلوا طفح جوعتوا كلابي وخليتوا عربيتي تزقزق
امالل يا دول نامية يا رعاع
هقول ايه تاني
حسبي الله ونعم الوكيل
تحياتي ليكي يادكتورة وما تزعليش نفسك عيلة وبكرة تلاقي اللي يلمها

Wael Galal يقول...

العالم الغربي لما بيتكلم في أي موضوع اقتصادي أو سياسي طبعا بيدور أولا على المصلحة الشخصية

و لكن الفكرة اللي بتكون في ضميرهم مش ان بيننا علاقة تجارية : أشتري منك سلعة و آخد فلوس و العكس , و انما بيشوفوا ان أي سلعة بيبيعوها لينا هي منه منهم , حتى بعد ما أخدوا تمنها فلوس , تفكيرهم انهم تعبوا و فكروا و اخترعوا و زرعوا و احنا جايين بشوية فلوس ناخد الحاجة دي ع الجاهز

و بنفس المعيار لما يشتروا من عندنا بترول مثلا , تفكيره بيقول ان احنا بنبيع حاجة لاقيناها تحت الارض و لم نتعب فيها , و أنه كان الأحق بهذه الاكتشافات لأنه يملك العلم
هم لا يعترفون بحقوق الشعوب في الثروات الطبيعية و لكن يعترفون فقط بالإنتاج العلمي

و هذا تحديدا ما يجعل الفكر الاستعماري متأصلا في ضمير الغرب

Ahmed El-Agouz يقول...

حسبي الله ونعم الوكيل
جوعوا تصحوا
بس هي قالت دول نامية ولا دول متخلفة !!!!

انا سعدت جدا بتعرفي عليك من خلال مدونتك الجميلة القيمة
اتمني ان نتواصل دائما
العجوز

بنت الصالحين يقول...

طيب قوليلنا نعمل ايه يافضفض
انا زهقت من القرف ده
ربنا يحرمنا

ماهو بقي اي حد وكل حد بيتكلم حتي لو كلامه كلام غبي ولايصدر الا من انسان غبي


ربنا يرحمنا برحمته



وحشتيني يافضفوض
معلش اصلي كنت مش بدخل الايام اللي فاتت


سلامي ليكي
وربنا يرحمنا

غادة يقول...

عندك حق والله دى ست مستفزه جدا بس هيا بانت من اول ما استلمت منصبها انها متعصبه جدا جدا
بس احنا ما نقدرش نعمل حاجه لأننا عالم تالت
بس الله المستعان
سلام مؤقت يا فضفوضه

محمد حمدي يقول...

ايه والنبى حرق الدم ده ..

ميضربونا بالنووى احسن بقا

ابقى شوف مدونتى فيها روايه جديده
http://demaghy.blogspot.com/2008/04/blog-post_21.html

المـــفـــــــقــــــــوعـــــة مــرارتـهــا يقول...

دي واحدة مستفزة...
أنا كنت فاكرة ان الألمان بطلوا يشوفوا نفسهم الصفوة بتوع العالم .. قال مستكترة علي الناس الغلابة أكلهم
سيبوني عليها

mostafa rayan يقول...

بصي ميركل مش سيدة فاضلةولا حاجةدي ولية وقحة وبنت ... ولابلاش لأن مدونتك نظيفة - عايزين نبقي نشرح يعني ايه مدونة نظيفةدي -
بصي العيب مش عليهم العيب علي اللي حاكمنا وعملو فينا كدة وخلو احفاد القردة والخنازير يتحكموا فينا والحقيقة بقي العيب مش عليهم هما بس علينا احنا كمان احنا اللي اسكتنا واستسلمنا ورضينا بهذا الواقع المر
سلام

الطائر الحزين يقول...

احنا ملناش صفة عندهم

لاننا عالم تالت يروحوا يشوفوا العالم التانى الاول


بس تصدقى

من يوم ما سبنا الزراعه واحنا خبنا

Unknown يقول...

ياه فى ناس لسه بتلاقى وجبتين بالصلا ع النبى يا حلاوة ده فيه ناس مبتلاقيش الوجبة الواحدة ولا العيش الحاف بجد كلام مستفز وعاوز رد بس هنقول ايه: حسبى الله ونعم الوكيل

Soooo يقول...

قريت الكلام ده عالصبح كده وانا لسه باضرب الفيسكافيه
وفعلا دمي اتحرق والله

هم بتوع اورومبا دول عايزين ايه يعني
بجد والله مش فاهم المنطق الغريب اللي بتتكلم بيه

عارفه
عامله زي واحده شافت اتنين عيال بيلعبو قدام بيتهم واهلم مش قادرين يدودوهم نادي بمبلغ وقدره عشان يلعبو هناك .. ولما دي شافت العيال بيلعبو راحت لايمه على اهاليهم انهم سايبين المذاكره وبيلعبو
اه والله منطق غريب


الاهي اورومبا وامريكيا وكنكا واوستراليا وكل الدول الكبيره دي .. يمسكها حكام زي حكام دول الشرق الاوسط
قادر يا كريم




سلامووووووووووووووووز

كلبوزة لكن سمباتيك يقول...

ايوة احنا السبب في الجوع
اصلنا عاملين رجيم

تخنا قوي حتى شوفي الواد اللي في الصورة اللي جلد على عضم ده كلبوووز قوي

تحياتي

صيحة البجعة يقول...

السلام عليكم
المشكلة يا دكتورة فينا احنا طالما لا نملك قوت يومنا نستاهل اللي بيجرالنا
والله موضوع القمح دة كان فيه زمان وزير اسمه احمد الليثي مشي ليه عشان اقترح نزرع القمح بطرق جديدة ووجيهةوتزود الانتاج في خلال مدة معينة يحصل اكتفاء ذاتي وطبعا علشان احنا لازم نبقي كدة مشي لان الناس المحترمة لا تبقي فيه اقتراح اننا نبطل اكل ذل وخضوع وانصياع
ولكم جزيل الشكر

جهاد خالد يقول...

من هانت عليه نفسه
هان على غيره
...

لو أننا اعتززنا بأنفسنا
وتعلمنا كيف نأخذ حقوقنا
ونرد على أمثال هؤلاء
ونحافظ على مواردنا
ولم نبع أنفسنا

لما وصل بنا الحال إلى هنا

..

تحايا

المستنصر بالله يقول...

سيدتى الفاضله كلامها به جانب من الحقيقه انظرى الى موائدنا والفاكهه التى نشتريها بكميات كبيره ثم تفسد مننا ويكون مصيرها صندوق القمامه نحن هنا ليس لدينا وعى استهلاكى بنشترى كل حجاه وبكميات كبيره ويكون مصيرها انها تفسد
اعتقد اننا لازم يكون عندنا وعى استهلاكى يمكن مشكله الغذاء تنحل

صاحب المضيفة يقول...

على راي المثل

افاضي يعمل قاضي

وهمه هايعملوا قضاة على مين غيرنا

ربنا يرحمنا ويعتقنا من الذل اللي احنا عايشين فيه ده


دمت بخير

wanna b a physician يقول...

زى ما قولتى بالظبط منتهى الوقاحة وقلة الادب
وهى اساسا ست مستفزة مووووووووت حتى شكلها مستفز
سلام

HeLsiNG يقول...

ما يقولوا اللى يقولوه

اشمعنا احنا اما بنقول بيعملوا كانهم ولا سمعوا حاجة

احنا اللى بندى الناس دى اكبر من حجمهم

هبههههووب يقول...

مبروك الاستايل الجديد

Ahmed Mubarak يقول...

تصدقي صح ..ديه هيا خايفه علينا من
الكوليسترول والتخمة ..

ده حتى المثل -الي معرفش مين قاله - محدش بيموت من الجوع لكن بتموت من التخن

ربنا يهدي

Ahmed Kamal يقول...

يا جماعة سيبوا مدام ميركل تعبر عن نفسها و تفضفض . من فضلك فضفضي يا مدام .

لكن إنتو عايزين الحق؟ من شهر أنا حضرت معرض في ألمانيا ، و حسيت قد إيه إحنا متخلفين قوي ، طيب ده الهند و الصين كان ليهم شنه و رنه في المعرض ، لكن إحنا .. اكتفينا بالتصفيق .

لو كان هو ده النظام يبقى نروح نموت أحسن .. على رأي مدام ميركل .

Ahmed Al-Sabbagh يقول...

ايوة عندها حق

مش كفاية بياكلو ضرب

تحياتى ليكى على موضوعاتك الجامدة دائما

احمد الصباغ

kafrawy يقول...

105714621طب اية رايك فى اننا نجيبهم كمان

يوصوفلنا ناكل اية و مناكلش اية

عالم معندهاش دم

البنت الشلبية يقول...

ماهو عشان مدونة حضرتك مدونة نظيفة فأنا هكتفى بحاجة بسيطة

بصراحة الحمير الى بيتكلمو كده مش عازين غير الضرب بالبتاعة على دمغتهم لحد ما يفوقو من غرورهم وعجرفتهم الى خلتهم فاكرين انهم ملكو العالم
جتهم نيلة

اوعى تفكر يقول...

يااااااه
هما مستكترين علينا الاكل كمان
دى بقيت حاجه تفرس
انا رأيي ان نبطل اكل عشان نعجب

la3lahakhier يقول...

السلام عليكم
ازيك يا جميل
يا بنتى جاتهم خيبة تخيبهم اكتر من خيبتهم
هو فى بعد الكفر ذنب وطظ مليون مرة فى اللى بيقولوه بس فى حاجة مانبقى احنا كمان بنى ادمين كدا ونرجع العالم الاول زى ماكنا قبل مانفرط فى ديننا
يلا
دمتى بخير

Unknown يقول...

وهو انتوا كمان عاوزين تاكلوا زى المخلوقات الساميه دى
انتوا مين انتوا؟ ولاد مين انتوا؟ انتوا حايلله شويه بنادمين مهضوم حقكم؟ أقول ايه بس
حسبى الله ونعم الوكيل

غير معرف يقول...

دا الطبيعي حالياً و اللي هيبقى عادي بعد سنتين بإذن الله، فالأفضل إن إحنا نتعود ع الكلام دة من دلوقتي و الست ميركل ربنا يجزيها عنا خير بتقوم بالدور دة تخفيفاً عن بوش و كوندوليزا لأنهم مشغولين بحاجات تانية حالياً و ف نفس الوقت بتمهد للي هيعمله فينا رئيس أميركا الجديد سواء هيلاري أو أوباما

ع فكرة: أنا أول مرة أسمع عن ميركل كانت ف الأحياء لما كنا بندرس أقراص ميركل الخاصة باستشعار الضغط العميق و يبدو إن الست ليها نصيب من اسمها مش أكتر و بتحاول تمارس وظيفتها البيولوجية ف الضغط العميق على شعوب العالم التالت، اللي هيا إحنا

بذمتك، بتحسي إية لما يتقال علينا شعوب العالم التالت؟ مش حاجة تخليك رافع راسك كدة؟

أحمد سلامــة يقول...

انا قريته قبل كده واستفزني جدا
بس بيتهيالي هو استفزاز متعمد وليس جهل نتيجة غباء

الفقيرة إلى الله أم البنات يقول...

حبيبتى
اسأل الله ان يخلصنامن تقاعسنا
وان يرزقنا همه تجعل امورنا فى إيدينا
واذا كانت أمورنا فى إيدينا لن نسمح بمخلوقات غريبه ان تتدخل فى حياتنا
ولكن...ارأيت
الناس بتستسهل يا حبيبتى
الناس مش عاوزة تتعب
ربنا يرحمنا

dodda يقول...

الست حسستنى ان خط امداد العالم باللبن بتاع ابوها وان الصين حتستنفذ مخزون اللبن فى العالم
وانها حتيقى مطالبه بتوريد اللبن بين لحظه والتانيه...غالبا خايفه يحلبوها!!!

القرآن الكريم